Baġit tal-EU

Il-baġit tal-UE huwa baġit ta’ investiment li jiġbor ir-riżorsi u jidderiġihom lejn proġetti f’konformità mal-prijoritajiet politiċi tal-UE. Dan jinkludi d-dħul u l-infiq kollu tal-UE. L-UE tiddeċiedi dwar il-qafas tal-baġit fit-tul tagħha, imsejjaħ il-qafas finanzjarju plurjennali (QFP), kull 7 snin. Kif stipulat fit-Trattat ta’ Lisbona (l-Artikolu 312 tat-Trattat dwar il-Funzjonament tal-Unjoni Ewropea), il-QFP jistipula l-ammonti annwali massimi (limiti massimi) għall-infiq tal-UE komplessivament u għall-oqsma ewlenin ta’ nfiq (intestaturi). Il-QFP attwali se jdum mill-2021 sal-2027.

Il-baġit tal-UE huwa ffinanzjat minn diversi sorsi ta’ dħul, magħrufa bħala r-“riżorsi proprji” tal-UE (dazji doganali, proporzjon tad-dħul nazzjonali gross ta’ kull pajjiż tal-UE, sehem mill-irċevuti tat-taxxa fuq il-valur miżjud tal-pajjiżi tal-UE u, mill-1 ta’ Jannar 2021, riżorsa proprja ġdida bbażata fuq l-ammont ta’ skart mhux irriċklat mill-imballaġġ tal-plastik).

Kull 7 snin, il-Parlament Ewropew u l-Kunsill jinnegozjaw il-QFP u kif il-flus se jiġu allokati fl-oqsma ta’ nfiq fuq il-bażi ta’ proposta mill-Kummissjoni. Kull sena, il-Parlament Ewropew u l-Kunsill jaqblu fuq id-daqs tal-baġit annwali u fuq il-prijoritajiet ta’ nfiq għat-12-il xahar ta’ wara.

Biex tiffinanzja l-irkupru ta’ wara l-coronavirus, l-UE qablet fuq pjan ta’ rkupru, NextGenerationEU, li jiswa EUR 750 biljun, apparti l-baġit fit-tul għall-2021-2027. Biex tiffinanzjah, l-UE se tissellef finanzjament mis-swieq.

ARA WKOLL

• Il-Qorti Ewropea tal-Awdituri
• Qafas finanzjarju plurjennali
• NextGenerationEU
• Riżorsi proprji
• Il-kontribuzzjonijiet tal-pajjiżi tal-UE għall-baġit tal-UE (sommarju)
• Ir-riżorsi proprji tal-UE (sommarju)
• L-istrument għall-Irkupru u r-Reżiljenza tal-UE (sommarju)
• Kif jiġi deċiż il-baġit tal-UE? (sommarju)
• Qafas Finanzjarju Pluriennali tal-UE (2021-2027) (sommarju)
• Baġit tal-UE (il-Kummissjoni Ewropea)
• Il-baġit tal-UE fit tul għall-2021-2027 (il-Kummissjoni Ewropea)
• Kif jaħdem il-baġit tal-UE (il-Kummissjoni Ewropea).