Programm tal-Korp Ewropew ta’ Solidarjetà 2021-2027

 

SOMMARJU TA’:

Ir-Regolament (UE) 2021/888 li jistabbilixxi l-programm tal-Korp Ewropew ta’ Solidarjetà

X’INHU L-GĦAN TAR-REGOLAMENT?

Il-programm tal-Korp Ewropew ta’ Solidarjetà (KES) għandu l-għan li jsaħħaħ is-sehem taż-żgħażagħ u tal-organizzazzjonijiet f’attivitajiet ta’ solidarjetà* li huma aċċessibbli u ta’ kwalità għolja, primarjament tagħmel volontarjat bħala mezz kif issaħħaħ il-koeżjoni, is-solidarjetà, id-demokrazija, l-identità Ewropea u ċ-ċittadinanza attiva fl-Unjoni Ewropea (UE) u lil hinn minnha.

PUNTI EWLENIN

• Il-programm huwa maħsub bħala mezz uniku tal-UE għal attivitajiet ta’ solidarjetà għaż-żgħażagħ.
• Huwa jissostitwixxi l-Korp Ewropew ta’ Solidarjetà 2018-2020 u jibni wkoll is-Servizz Volontarju Ewropew, l-inizjattiva preċedenti ta’ volontarjat fl-UE (parti mill-Programm tal-Erasmus+ sal-2018), u l-programm ta’ Voluntiera tal-Għajnuna tal-UE 2014-2020.
• Il-programm huwa meħtieġ li jkun konsistenti u komplementari ma’ politiki oħra tal-UE, b’mod partikolari mal-istrateġija tal-UE għaż-żgħażagħ u mal-Erasmus+ stabbiliti permezz tar-Regolament (UE) 2021/817 (ara s-sommarju).

Għan speċifiku

Il-programm tal-KES għandu l-għan li jipprovdi liż-żgħażagħ, inklużi dawk b’anqas opportunitajiet, b’opportunitajiet faċilment aċċessibbli għall-involviment f’attivitajiet ta’ solidarjetà li jħeġġu bidliet soċjetali pożittivi fl-UE u lil hinn minnha, filwaqt li jtejbu u jivvalidaw b’mod xieraq il-kompetenzi tagħhom, u jiffaċilitaw l-involviment kontinwu tagħhom bħala ċittadini attivi.

Linji ta’ azzjoni

Il-programm jistabbilixxi żewġ linji ta’ azzjoni għall-parteċipazzjoni taż-żgħażagħ.

• Il-parteċipazzjoni taż-żgħażagħ fl-attivitajiet ta’ solidarjetà. L-azzjonijiet taħt din il-linja tinkludi proġetti ta’ volontarjat u solidarjetà.
• Il-Korp Volontarju Ewropew ta’ Għajnuna Umanitarja. Azzjonijiet taħt din il-linja jinkludi l-volontarjat u jeħtieġ li jikkontribwixxu għall-provvediment ta’ għajnuna umanitarja bbażata fuq il-bżonnijiet immirata biex tippreserva l-ħajja, il-prevenzjoni u t-taffija tat-tbatija tal-bniedem u ż-żamma tad-dinjità tal-bniedem, filwaqt li ssaħħaħ ukoll il-kapaċità u r-reżiljenza ta’ komunitajiet vunerabbli jew affettwati minn diżastru.

Iż-żewġ linji tal-programm jinkludu wkoll l-attivitajiet ta’ networking u miżuri ta’ kwalità u ta’ għajnuna.

Il-programm se jiġi implimentat permezz ta’ programmi ta’ ħidma adottati mill-Kummissjoni Ewropea permezz ta’ atti ta’ implimentazzjoni.

Parteċipazzjoni

• Il-KES joffri attivitajiet volontarji liż-żgħażagħ bejn it-18 u t-30 sena. Il-limitu massimu tal-età għall-voluntiera fil-qasam tal-għajnuna umanitarja huwa ta’ 35 sena, bil-possibbiltà li jimpjegaw esperti u kowċis mingħajr limitu massimu tal-età.
• Il-proġetti jistgħu jdumu sa 36- xahar u jinkludu attività jew iktar ta’ għajnuna li jseħħu simultanjament jew wara xulxin.
• Il-programm jippermetti liż-żgħażagħ li jipparteċipaw f’iktar minn proġett wieħed, sakemm iż-żmien totali tal-attività tagħhhom appoġġjat mil-programm ma jkunx aktar minn 12-il xahar.
• Iż-żgħażagħ jistgħu jgħaddu mill-proċess tal-“Youthpass” u jakkwistaw ċertifikat meta jtemmu l-esperjenza, jispjegaw l-attivitajiet fejn ipparteċipaw, jirriflettu dwar il-proċess tat-tagħlim tal-parteċipanti u jiddokumentaw il-ħiliet li akkwistaw permezz tal-parteċipazzjoni tagħhom.

Baġit

• Il-programm jibda mill-1 ta’Jannar 2021 sal-31 ta’ Diċembru 2027, it-tul tal-qafas finanzjarju pluriennali.
• Il-pakkett finanzjarju għall-implimentazzjoni tal-programm għall-2021-2027 huwa ffissat għal €1,009 biljun bil-prezzijiet preżenti.
• B’massimu ta’ 20% allokat għall-volontarjat nazzjonali, l-ammont jinqasam kif ġej:
  • 94% għal proġetti ta’ volontarjat u solidarjetà;
  • 6% għall-volontarjat taħt il-Korp Volontarju Ewropew ta’ Għajnuna Umanitarja.

Miżuri ta’ inklużjoni

Fl-2021, il-Kummissjoni Ewropea adottat att ta’ implimentazzjoni mmirat lejn parteċipazzjoni aktar inklużiva u varjata fil-KES għall-perjodu 2021–2027. Id-Deċiżjoni ta’ Implimentazzjoni (UE) 2021/1877 se tippermetti lil aktar persuni jivvolontarjaw f’pajjiż ieħor billi jilħaq numru dejjem iktar ta’ persuni b’inqas opportunitajiet, u b’hekk itejbu l-ekwità u l-inklużjoni fil-programm. Il-miżuri jinkludu:

• appoġġ finanzjarju akbar għal persuni b’inqas opportunitajiet, bil-għan li jkopru kwalunkwe spiża jew ħtieġa addizzjonali;
• għajnuna personali għall-parteċipanti permezz tal-fażijiet kollha tal-proġett tagħhom, bħal għajnuna lingwistika, żjarat ta’ preparazzjoni u gwida fit-taħriġ qabel, waqt u wara l-proġett jew mobilità tagħhom biex jassiguraw li jakkwistaw kemm jista’ jkun mill-esperjenza tagħhom;
• għajnuna addizzjonali għall-organizzazzjonijiet li jipparteċipaw fi proġetti inklużivi;
• firxa usa’ ta’ opportunitajiet ta’ proġetti u mobbiltà ta’ durata u formati differenti (virtwali jew fiżiċi, individwali jew fi grupp) biex il-parteċipanti jkunu jistgħu jsibu liema huma dawk li jissodisfaw il-ħtiġijiet tagħhom l-aħjar;
• li jagħtu prijorità lil proġetti ta’ kwalità li jinvolvu parteċipanti b’inqas opportunitajiet u li jindirizzaw it-temi tal-inklużjoni u tad-diversità;
• id-disponibbiltà ta’ dokumenti u materjali aktar faċli għall-utent, aċċessibbli u multilingwi.

MINN META JAPPLIKA R-REGOLAMENT?

Dan ilu japplika mill-1 ta’ Jannar 2021.

SFOND

Għal aktar informazzjoni, ara:

• Gwida tal-Korp Ewropew ta’ Solidarjetà (Il-Kummissjoni Ewropea)
• Korp Ewropew ta’ Solidarjetà (Portal Ewropew taż-Żgħażagħ)
• Korpi Ewropej ta’ Solidarjetà (sit web).

TERMINI EWLENIN

DOKUMENT PRINĊIPALI

Ir-Regolament (UE) 2021/888 tal-Parlament Ewropew u tal-Kunsill tal-20 ta’ Mejju 2021 li jistabbilixxi l-programm tal-Korp Ewropew ta’ Solidarjetà u li jħassar ir-Regolament (UE) Nru 2018/1475 u (UE) Nru 375/2014 (ĠU L 202, 8.6.2021, pp. 32-54).

DOKUMENTI RELATATI

Deċiżjoni ta’ Implimentazzjoni tal-Kummissjoni (UE) 2021/1877 tat-22 ta’ Ottubru 2021 dwar il-qafas ta’ miżuri ta’ inklużjoni tal-Programm Erasmus+ u tal-Programm tal-Korp Ewropew ta’ Solidarjetà 2021–2027 (ĠU L 378, 26.10.2021, pp. 15–21).

Ir-Regolament (UE) 2021/817 tal-Parlament Ewropew u tal-Kunsill tal-20 ta’ Mejju 2021 li jistabbilixxi Erasmus+: il-Programm tal-Unjoni għall-edukazzjoni u taħriġ, żgħażagħ u sport u li jħassar ir-Regolament (UE) Nru 1288/2013 (ĠU L 189, 28.5.2021, pp. 1–33).

Riżoluzzjoni tal-Kunsill tal-Unjoni Ewropea u tar-Rappreżentanti tal-Gvernijiet tal-Istati Membri li jiltaqgħu fi ħdan il-Kunsill dwar qafas għall-kooperazzjoni Ewropea fil-qasam taż-żgħażagħ: L-Istrateġija tal-UE għaż-Żgħażagħ 2019-2027 (ĠU C 456, 18.12.2018, pp. 1-22).

Ir-Riżoluzzjoni leġiżlattiva tal-Parlament Ewropew P8_TA(2018)0328 Korp Ewropew ta’ Solidarjetà ***I tal-11 ta’ Settembru 2018 dwar il-proposta għal regolament tal-Parlament Ewropew u tal-Kunsill li jistabbilixxi l-qafas legali tal-Korp Ewropew ta’ Solidarjetà u li jemenda r-Regolamenti (UE) Nru 1288/2013, (UE) Nru 1293/2013, (UE) Nru 1303/2013, (UE) Nru 1305/2013, (UE) Nru 1306/2013 u d-Deċiżjoni Nru 1313/2013/UE (COM(2017)0262 – C8-0162/2017 – 2017/0102(COD)) P8_TC1-COD(2017)0102 Pożizzjoni tal-Parlament Ewropew adottata fl-ewwel qari fil-11 ta’ Settembru 2018 bil-ħsieb li tadotta r-Regolament (UE) 2018/... tal-Parlament Ewropew u tal-Kunsill li jistabbilixxi l-qafas legali tal-Korp Ewropew ta’ Solidarjetà u li jemenda r-Regolament (UE) Nru 1288/2013, ir-Regolament (UE) Nru 1293/2013 u d-Deċiżjoni Nru 1313/2013/UE (ĠU C 433, 23.12.2019, pp. 222-224).

l-aħħar aġġornament 23.03.2022