Il-ġlieda kontra l-iffalsifikar tal-euro (Pericles IV)

 

SOMMARJU TA’:

Regolament (UE) 2021/840 li jistabbilixxi programm għall-protezzjoni tal-euro kontra l-iffalsifikar għall-perjodu 2021-2027 (il-programm “Pericles IV”)

X’INHU L-GĦAN TAR-REGOLAMENT?

Huwa jistabbilixxi programm ta’ skambju, assistenza u taħriġ (Pericles IV) għall-protezzjoni tal-euro kontra l-iffalsifikar. Dan se jibqa’ għaddej tul il-qafas finanzjarju pluriennali tal-Unjoni Ewropea (UE) tal-2021–2027. Jistipula:

• l-objettivi ġenerali u speċifiċi tal-programm
• l-ammont, il-forom u r-regoli ta’ finanzjament tal-UE.

PUNTI EWLENIN

L-għanijiet ġenerali tal-leġiżlazzjoni huma li:

• jevitaw u jiġġieldu l-iffalsifikar u l-frodi relatati;
• jippreservaw l-integrità tal-karti tal-flus u l-muniti tal-euro.

L-għanijiet speċifiċi tal-programm huma li jipproteġu l-karti tal-flus u l-muniti tal-euro kontra l-falsifikazzjoni:

• permezz ta’ miżuri nazzjonali ta’ appoġġ u li jissuplimentaw;
• billi jgħinu lill-awtoritajiet tal-UE jiżviluppaw kooperazzjoni mill-qrib u skambju tal-aħjar prattiki bejniethom u mal-Kummissjoni Ewropea u, fejn xieraq, ma’ pajjiżi mhux tal-UE u organizzazzjonijiet internazzjonali.

Il-baġit ta’ 7 snin biex jiġi implimentat il-programm huwa ta’ EUR 6 193 284 (prezzijiet kurrenti). Jista’ jintuża biex:

• jipprovdi assistenza teknika u amministrattiva, bħat-tħejjija, il-monitoraġġ, il-kontroll, l-awditjar, l-evalwazzjoni u sistemi korporattivi tat-teknoloġija tal-informazzjoni;
• għotjiet ta’ finanzjament sa 75 %, u f’każijiet eċċezzjonali 90 %, tal-ispejjeż eliġibbli ta’ proġetti proposti minn awtoritajiet nazzjonali;
• jimplimenta azzjonijiet ta’ akkwist tal-Kummissjoni* li jissuplimentaw il-proġetti proposti mill-awtoritajiet nazzjonali.

Il-Kummissjoni:

• timplimenta l-programm f’kooperazzjoni mill-qrib mal-Istati Membri tal-UE, biex tiżgura u tevita dupplikazzjoni ta’ xogħol mhux meħtieġa mill-Bank Ċentrali Ewropew (BĊE) u l-Aġenzija tal-Unjoni Ewropea għall-Kooperazzjoni fl-Infurzar tal-Liġi;
• tista’ torganizza attivitajiet konġunti ma’ msieħba li għandhom l-esperjenza rilevanti bħal:
  • banek ċentrali nazzjonali u l-BĊE;
  • ċentri għall-analiżi nazzjonali u ċentri għall-analiżi nazzjonali tal-munita;
  • iċ-Ċentru Tekniku u Xjentifiku Ewropew u zekek;
  • l-Aġenzija tal-Unjoni Ewropea għall-Kooperazzjoni fl-Infurzar tal-Liġi, l-Aġenzija tal-Unjoni Ewropea għall-Kooperazzjoni fil-Ġustizzja Kriminali u l-Interpol;
  • uffiċċji nazzjonali ċentrali kontra l-iffalsifikar u aġenziji speċjalizzati oħra, inkluż dawk f’pajjiżi mhux fl-UE, u korpi privati bl-għarfien tekniku meħtieġ.

L-attivitajiet li ġejjin huma eliġibbli għall-finanzjament:

• forom differenti ta’ taħriġ, skambju u disseminazzjoni ta’ informazzjoni, b’mod partikolari f’oqsma bħall-aħjar prattiki, metodoloġija, bażijiet tad-data operattivi, riċerka u għajnuna xjentifika, u tekniki ta’ mistoqsijiet u investigazzjoni;
• għajnuna teknika, xjentifika u operattiva, speċjalment għar-riżorsi tat-tagħlim tal-UE, studji multidixxiplinarji u transnazzjonali, appoġġ u kooperazzjoni teknika li tinvolvi mill-inqas żewġ pajjiżi;
• xiri ta’ tagħmir kontra l-iffalsifikar għall-awtoritajiet speċjalizzati f’pajjiżi mhux tal-UE.

Il-programm għandu fil-mira l-parteċipazzjoni ta’:

• aġenziji — notevolment il-pulizija, amministrazzjonijiet doganali u finazjarji — isibu u jiġġieldu l-iffalsifikar;
• servizzi tal-intelliġenza;
• banek nazzjonali ċentrali u kummerċjali, zekek u istituzzjonijiet finanzjarji oħra;
• uffiċjali ġudizzjarji u avukati speċjalisti;
• gruppi speċjalizzati, bħal kmamar tal-kummerċ u l-industrija, u organizzazzjonijiet li jirrappreżentaw intrapriżi żgħar u ta’ daqs medju, bejjiegħa bl-imnut u kumpaniji li jittrasportaw il-flus.

Il-Kummissjoni:

• tadotta programmi ta’ ħidma;
• tippreżenta informazzjoni annwali lill-Parlament Ewropew, lill-Kunsill u lill-BĊE dwar ir-riżultti mill-programm — dawn huma bbażati fuq informazzjoni mill-pajjiż parteċipi u benefiċjarji u l-indikaturi kwantitattivi u kwalitattivi elenkati fl-anness, bħal euros iffalsifikati li jinstabu u workshops illegali żarmati;
• tipprovdi valutazzjoni finali lill-Parlament Ewropew, lill-Kunsill u lill-BĊE fi żmien sentejn tat-tmien tal-programm, wara valutazzjoni indipendenti f’nofs it-terminu fi żmien 4 snin mill-bidu tiegħu;
• tista’ tadotta atti delegati.

Il-leġiżlazzjoni teħtieġ li:

• ir-riċevituri tal-finanzjament tal-UE jirrikonoxxu s-sors tagħhom u jipprovdu informazzjoni effettiva u mmirata dwar l-attivitajiet u r-riżultati tagħhom lill-udjenzi li jvarjaw mill-midja sal-pubbliku;
• il-Kummissjoni timplimenta kampanji ta’ informazzjoni u komunikazzjoni dwar il-programm.

Il-leġiżlazzjoni tħassar ir-Regolament (UE) Nru 331/2014 mill-1 ta’ Jannar 2021 (ara s-sommarju). Madanakollu, l-azzjonijiet kollha mibdija taħt ir-Regolament (UE) Nru 331/2014 se jkomplu japplikaw sal-għeluq tagħhom.

MINN META JAPPLIKA R-REGOLAMENT?

Dan ilu japplika mill-1 ta’ Jannar 2021.

SFOND

Ir-regolament huwa maħsub biex isaħħaħ il-fiduċja tal-pubbliku u tan-negozji fl-awtentiċità tal-karti tal-flus u l-muniti. Dan itejjeb il-fiduċja fl-ekonomija tal-UE u jassigura s-sostenibilità tal-finanzi pubbliċi.

Għal aktar informazzjoni, ara:

• Dwar il-Programm Pericles IV (Kummissjoni Ewropea).

TERMINI EWLENIN

DOKUMENT EWLIENI

Ir-Regolament (UE) Nru 2021/840 tal-Parlament Ewropew u tal-Kunsill tal-20 ta’ Mejju 2021 li jistabbilixxi programm ta’ skambju, assistenza u taħriġ għall-protezzjoni tal-euro kontra l-iffalsifikar għall-perjodu 2021-2027 (il-programm “Pericles IV”) u li jħassar ir-Regolament (UE) 331/2014 (ĠU L 186, 27.5.2021, pp. 1–11)

l-aħħar aġġornament 30.07.2021