Konvenzjoni Internazzjonali għall-Konservazzjoni tat-Tonn tal-Atlantiku

 

SOMMARJU TA’:

Konvenzjoni Internazzjonali għall-Konservazzjoni tat-Tonn tal-Atlantiku

Protokoll biex tiġi emendata l-Konvenzjoni Internazzjonali għall-konservazzjoni tat-Tonn tal-Atlantiku

Id-Deċiżjoni 86/238/KEE dwar l-adeżjoni tal-Komunità fil-Konvenzjoni Internazzjonali għall-Konservazzjoni tat-Tonn tal-Atlantiku, kif emendata bil-Protokoll ffirmat f’Pariġi fl-1984

Deċiżjoni (UE) 2019/2025 dwar l-iffirmar, f’isem l-Unjoni Ewropea, u l-applikazzjoni provviżorja tal-Protokoll li jemenda l-Konvenzjoni Internazzjonali għall-Konservazzjoni tat-Tonn tal-Atlantiku

Regolament (UE) 2017/2107 li jistabbilixxi l-miżuri ta’ ġestjoni, ta’ konservazzjoni u ta’ kontroll applikabbli fiż-żona tal-Konvenzjoni tal-Kummissjoni Internazzjonali għall-Konservazzjoni tat-Tonn tal-Atlantiku

X’INHUMA L-GĦANIJIET TAL-KONVENZJONI, TAL-PROTOKOLL, TAD-DEĊIŻJONIJIET U TAR-REGOLAMENT?

• Il-konvenzjoni għandha l-għan li tiżgura li l-popolazzjoni tat-tonn tal-Atlantiku tinżamm f’livelli li jippermettu l-qbid massimu sostenibbli għall-ikel u skopijiet oħra, u tintroduċi l-Kummissjoni Internazzjonali għall-Konservazzjoni tat-Tonn tal-Atlantiku (ICCAT).
• Il-protokoll jemenda l-konvenzjoni, b’enfasi fuq l-għan ta’ konservazzjoni fit-tul.
• Id-deċiżjoni tal-1986 timmarka l-adeżjoni tal-Komunità Ewropea mal-konvenzjoni.
• Id-deċiżjoni tal-2019 timmarka l-iffirmar u l-applikazzjoni provviżorja tal-protokoll, f’isem l-Unjoni Ewropea (UE).
• Ir-regolament jistabbilixxi regoli ta’ ġestjoni, konservazzjoni u kontroll relatati mas-sajd għall-ispeċi tat-tonn immaniġġjati mill-ICCAT.

PUNTI EWLENIN

Nota: dan is-sommarju jkopri l-konvenzjoni kif emendata sussegwentement mill-protokoll.

Struttura

Il-konvenzjoni tistabbilixxi l- ICCAT biex twettaq l-għanijiet tagħha, billi tapplika approċċ ta’ prekawzjoni u ekosistema li jinkludi:

• l-użu tal-aħjar evidenza xjentifika disponibbli;
• il-protezzjoni tad-diversità tal-ambjent tal-baħar;
• it-teħid ta’ deċiżjonijiet ġust u trasparenti.

Skont il-konvenzjoni, il-Kummissjoni tal-ICCAT għandha tiltaqa’ kull sentejn u għandha tkun magħmula minn mhux aktar minn tliet delegati minn kull membru tal-ICCAT, assistiti minn esperti u konsulenti. Fil-fatt il-Kummissjoni tal-ICCAT tiltaqa’ kull sena u hija responsabbli għal:

• l-istudju tal-popolazzjonijiet ta’ tonn, ħut simili għat-tonn u elasmobranki (bħal pereżempju klieb il-baħar, rebekkini, rajji u pixxisegi) li huma oċeaniċi, pelaġiċi u li jpassu ħafna (speċi tal-ICCAT), bl-użu fejn possibbli tas-servizzi tekniċi u xjentifiċi tal-aġenziji uffiċjali tal-membri tal-Kummissjoni tal-ICCAT;
• il-ġbir u l-analiżi ta’ informazzjoni statistika relatata mal-kundizzjonijiet u x-xejriet attwali tal-ispeċi tal-ICCAT;
• l-istudju u l-valutazzjoni ta’ miżuri u metodi biex jiġi żgurat li jinżammu l-popolazzjonijiet tal-ispeċi tal-ICCAT;
• ir-rakkomandazzjoni ta’ studji u investigazzjonijiet lill-membri tal-Kummissjoni; u
• il-pubblikazzjoni tas-sejbiet tagħha.

Il-Kunsill tal-ICCAT jiltaqa’ darba fl-interim bejn il-laqgħat tal-Kummissjoni tal-ICCAT. Dan huwa magħmul mill-President u l-Viċi President tal-ICCAT u bejn 4 u 10 rappreżentanti membri.

Il-Kummissjoni tal-ICCAT taħtar Segretarju Eżekuttiv u tista’ tistabbilixxi bordijiet skont l-ispeċi jew iż-żona ġeografika.

Rakkomandazzjonijiet

Fuq il-bażi ta’ evidenza xjentifika, l-ICCAT tagħmel rakkomandazzjonijiet imfassla biex:

• tiżgura l-konservazzjoni fit-tul u l-użu sostenibbli tal-ispeċi tal-ICCAT billi tinżamm jew tiġi restawrata l-abbundanza tal-istokkijiet fil-livelli jew f’livelli ogħla li kapaċi jipproduċu rendiment massimu sostenibbli;
• tippromwovi l-konservazzjoni ta’ speċi oħra dipendenti fuq speċi tal-ICCAT jew assoċjati magħhom, biex jinżammu jew jiġu restawrati popolazzjonijiet ’il fuq minn livelli li fihom ir-riproduzzjoni tagħhom tista’ tiġi mhedda serjament.

Oġġezzjonijiet u tilwim

Il-membri tal-Kummissjoni tal-ICCAT jistgħu jippreżentaw oġġezzjonijiet bil-miktub għar-rakkomandazzjonijiet fejn:

• tkun inkonsistenti mal-konvenzjoni jew mal-liġi internazzjonali;
• tiddiskrimina b’mod mhux ġustifikat kontra l-membru li joġġezzjona;
• il-membru ma jistax jikkonforma b’mod prattiku; jew
• ikun hemm restrizzjonijiet ta’ sigurtà kieku l-membru li joġġezzjona kellu jikkonforma.

Il-partijiet fi kwalunkwe tilwima għandhom jikkonsultaw ma’ xulxin biex isolvu t-tilwim b’mezzi bonarji u malajr kemm jista’ jkun. Jekk tilwima ma tiġix solvuta, tista’ tiġi sottomessa għal arbitraġġ finali u vinkolanti b’talba konġunta. Anness jistabbilixxi l-proċeduri għas-soluzzjoni tat-tilwim.

Infurzar

Il-membri tal-Kummissjoni tal-ICCAT jaqblu li jagħmlu dak kollu meħtieġ biex jiżguraw li l-konvenzjoni tiġi infurzata u għandhom jissottomettu dikjarazzjoni tal-azzjoni meħuda biex dan jintlaħaq kull sentejn, jew kif meħtieġ. Il-membri tal-Kummissjoni tal-ICCAT għandhom:

• jipprovdi kwalunkwe informazzjoni statistika, bijoloġika u xjentifika oħra disponibbli fuq talba;
• jippermettu lill-Kummissjoni tal-ICCAT tikseb informazzjoni volontarja direttament minn kumpaniji u individwi;
• jikkollaboraw ma’ membri oħra fuq miżuri effettivi xierqa;
• jistabbilixxu sistema ta’ infurzar internazzjonali għaż-żoni ta’ ġurisdizzjoni tagħhom.

Arranġamenti finanzjarji

Kull membru tal-Kummissjoni tal-ICCAT jikkontribwixxi għall-baġit ammont ikkalkulat skont ir-regolamenti finanzjarji adottati mill-Kummissjoni tal-ICCAT, ibbażat parzjalment fuq il-piż totali sal-eqreb ċifra tal-qabda u l-piż nett tal-prodotti fil-laned, u l-grad ta’ żvilupp ekonomiku tal-membri.

Kollaborazzjoni

Il-konvenzjoni titlob relazzjoni ta’ ħidma bejn il-Kummissjoni tal-ICCAT u l-Organizzazzjoni tan-Nazzjonijiet Uniti għall-Ikel u l-Agrikoltura, u kummissjonijiet internazzjonali tas-sajd u organizzazzjonijiet xjentifiċi oħra li jistgħu jikkontribwixxu għall-ħidma tagħhom, bil-possibbiltà li jipparteċipaw (iżda mhux jivvutaw) fil-laqgħat tal-Kummissjoni tal-ICCAT.

Ir-Regolament tal-2017

Ir-Regolament (UE) 2017/2107 jistabbilixxi regoli ta’ konservazzjoni u kontroll għal ħut li jpassi ħafna ġestit mill-ICCAT (l-ispeċi kkonċernati huma elenkati f’anness). Ir-regolament jinkludi regoli dettaljati dwar miżuri speċifiċi għall-ispeċ li ġejjin fiż-żona konvenzjonali tal-ICCAT:

• tonn tropikali,
• alonga tat-Tramuntana tal-Atlantiku,
• pixxispad,
• marlin blu u marlin abjad,
• klieb il-baħar,
• għasafar tal-baħar, u
• fkieren tal-baħar.

Dan jinkludi wkoll regoli dwar:

• awtorizzazzjonijiet,
• kontroll tal-qabdiet,
• trasbord,
• programmi ta’ osservaturi xjentifiċi,
• kontroll ta’ bastimenti tas-sajd mhux tal-UE fil-portijiet tal-Istati Membri tal-UE, u
• infurzar

DATA TAD-DĦUL FIS-SEĦĦ

• Il-konvenzjoni daħlet fis-seħħ fil-21 ta’ Marzu 1969.
• Il-konvenzjoni kif emendata mill-protokoll hija miftuħa għall-iffirmar minn kwalunkwe stat membru tan-Nazzjonijiet Uniti jew aġenzija speċjalizzata. Din tidħol fis-seħħ meta seba’ gvernijiet jirratifikawha, japprovawha jew jaderixxu magħha.
• Ir-Regolament ilu japplika mit-3 ta’ Diċembru 2017.

SFOND

Għal aktar informazzjoni, ara:

• Organizzazzjonijiet reġjonali għall-ġestjoni tas-sajd (il-Kummissjoni Ewropea)
• ICCAT (sit web).

DOKUMENTI PRINĊIPALI

Konvenzjoni Internazzjoni għall-Konservazzjoni tat-Tonn tal-Atlantiku (ĠU L 162, 18.6.1986, pp. 34–38).

Emendi suċċessivi għall-Konvenzjoni Internazzjonali għall-Konservazzjoni tat-Tonn tal-Atlantiku ġew inkorporati fit-test oriġinali. Din il-verżjoni konsolidata għandha biss valur dokumentarju.

Protokoll biex tiġi emendata l-Konvenzjoni Internazzjonali għall-konservazzjoni tat-Tonn tal-Atlantiku (ĠU L 313, 4.12.2019, pp. 3–13).

Id-Deċiżjoni tal-Kunsill 86/238/KEE fid-9 ta’ Ġunju 1986 dwar l-adeżjoni tal-Komunità fil-Konvenzjoni Internazzjonali għall-Konservazzjoni tat-Tonn ta’ l-Atlantiku, kif emendata bil-Protokoll mehmuż ma’ l-Att Finali tal-Konferenza tal-Plenipotenzjari ta’ l-Istati li jifformaw Parti mill-Konvenzjoni ffirmata f’Pariġi fl-10 ta’ Lulju 1984 (ĠU L 162, 18.6.1986, p. 33).

Deċiżjoni tal-Kunsill (UE) 2019/2025 tat-18 ta’ Novembru 2019 dwar l-iffirmar, f’isem l-Unjoni Ewropea, u l-applikazzjoni provviżorja tal-Protokoll li jemenda l-Konvenzjoni Internazzjonali għall-Konservazzjoni tat-Tonn tal-Atlantiku (ĠU L 313, 4.12.2019, pp. 1–2).

Ir-Regolament (UE) 2017/2107 tal-Parlament Ewropew u tal-Kunsill tal-15 ta’ Novembru 2017 li jistabbilixxi l-miżuri ta’ ġestjoni, ta’ konservazzjoni u ta’ kontroll applikabbli fiż-żona tal-Konvenzjoni tal-Kummissjoni Internazzjonali għall-Konservazzjoni tat-Tonn tal-Atlantiku (ICCAT), u li jemenda r-Regolamenti tal-Kunsill (KE) Nru 1936/2001, (KE) Nru 1984/2003 u (KE) Nru 520/2007 (ĠU L 315, 30.11.2019, pp. 1–39).

Ara l-verżjoni konsolidata.

l-aħħar aġġornament 17.01.2022