L-azzjoni konġunta tal-UE għandha l-għan li tappoġġja l-implimentazzjoni tal-Konvenzjoni fuq il-Projbizzjoni ta’ Mini Kontra l-Persunal (APMBC) tan-Nazzjonijiet Uniti permezz ta’ ċerti azzjonijiet speċifiċi. L-appoġġ tal-Unjoni Ewropea (UE) għall-konvenzjoni kien ibbażat fuq l-istrateġija ta’ sigurtà tal-UE tal-2003 (li sadanittant ġiet sostitwita mill-istrateġija globali tal-UE – ara s-sommarju).
Id-deċiżjoni tal-2021 (Deċiżjoni (PESK) 2021/257) tappoġġja l-Pjan ta’ Azzjoni ta’ Oslo għall-implimentazzjoni tal-APMBC bejn l-2020 u l-2024 u tistabbilixxi għadd ta’ objettivi biex jgħinu fil-ksib ta’ dan.

PUNTI EWLENIN

Konvenzjoni fuq il-Projbizzjoni ta’ Mini kontra l-Persunal

Aktar minn 80 % tal-Istati Membri tan-Nazzjonijiet Uniti huma stati partijiet li jfisser li huma rratifikaw il-konvenzjoni. Iċ-Ċina, ir-Russja u l-Istati Uniti mhumiex stati partijiet.
L-Istati Membri kollha tal-UE huma stati partijiet.
L-Istati partijiet jaqblu li:
- ma jużawx mini kontra l-persunal (AP)*;
- ma jiżviluppawx, ma jipproduċux, ma jakkwistawx, ma jaħżnux, ma jżommux jew jittrasferixxu mini AP;
- ma jassistux, ma jħeġġux jew jinduċu b’xi mod ieħor lil xi ħadd biex jipparteċipa f’attività pprojbita mill-konvenzjoni.
L-Istati partijiet għandhom jeqirdu l-ħażniet kollha ta’ mini AP fi żmien 4 snin u jnaddfu ż-żoni bil-mini taħt il-ġurisdizzjoni jew il-kontroll tagħhom fi żmien 10 snin.

L-azzjoni konġunta tal-UE tistabbilixxi żewġ objettivi:

il-promozzjoni tal-konvenzjoni lil dawk il-pajjiżi li għadhom ma sarux partijiet (magħrufa bħala “universalizzazzjoni”);
l-għoti ta’ appoġġ għall-implimentazzjoni sħiħa tagħha minn dawk il-pajjiżi li saru partijiet.

Biex jintlaħqu dawn l-objettivi, l-azzjoni konġunta tipprevedi żewġ tipi ta’ azzjonijiet:

l-organizzazzjoni ta’ seminars fuq bażi reġjonali jew sottoreġjonali biex il-pajjiżi jiġu mħeġġa jsiru partijiet għall-konvenzjoni;
l-għoti ta’ pariri tekniċi u żjarat ta’ assistenza lill-pajjiżi biex tingħata għajnuna fl-implimentazzjoni sħiħa.

Pjanijiet ta’ azzjoni u involviment tal-UE

L-APMBC hija l-bażi legali li tiggwida l-azzjonijiet tal-istati partijiet fl-isforz internazzjonali biex jintemmu t-tbatija u d-diżgrazzji kkawżati mill-mini kontra l-persunal. Ġew stabbiliti pjanijiet ta’ azzjoni f’intervalli regolari biex jappoġġaw din l-implimentazzjoni. L-UE adottat deċiżjonijiet biex timplimenta l-konvenzjoni u tappoġġja dawn l-azzjonijiet:

Id-Deċiżjoni 2012/700/PESK b’appoġġ għall-implimentazzjoni tal-Pjan ta’ Azzjoni ta’ Cartagena 2010–2014;
Deċiżjoni (PESK) 2017/1428 li tappoġġa l-implimentazzjoni tal-Pjan ta’ Azzjoni ta’ Maputo 2014–2019.

Pjan ta’ Azzjoni ta’ Oslo

Il-Pjan ta’ Azzjoni ta’ Oslo jistabbilixxi l-azzjonijiet li l-Istati Partijiet se jieħdu matul il-perjodu 2020–2024.

Il-pjan jidentifika azzjonijiet f’għadd ta’ oqsma:

l-aħjar prattika għall-implimentazzjoni tal-konvenzjoni;
universalizzazzjoni;
il-qerda tal-ħażniet u ż-żamma ta’ mini kontra l-persunal;
stħarriġ u tneħħija ta’ żoni bil-mini;
edukazzjoni u tnaqqis tar-riskju tal-mini;
assistenza lill-vittmi;
kooperazzjoni u assistenza internazzjonali;
miżuri biex tiġi żgurata l-konformità.

Id-Deċiżjoni (PESK) 2021/257 tistabbilixxi għadd ta’ għanijiet biex jiġi implimentat il-pjan. Dawn jinkludu:

il-promozzjoni tal-universalizzazzjoni;
l-appoġġ tal-isforzi tal-istati partijiet biex jimplimentaw l-aspetti tal-assistenza għall-vittmi tal-Pjan ta’ Azzjoni ta’ Oslo;
l-appoġġ għall-isforzi ta’ stħarriġ u tneħħija u l-edukazzjoni u t-tnaqqis tar-riskju tal-mini;
l-inkoraġġiment lill-istati li jżommu mini kontra l-persunal għal skopijiet permessi biex iżidu l-kapaċitajiet ta’ rappurtar tagħhom;
il-wiri tal-impenn kontinwu tal-UE u l-Istati Membri tagħha għall-konvenzjoni.

Id-deċiżjoni tistabbilixxi wkoll għadd ta’ proġetti biex jgħinu l-kisba ta’ dawn l-għanijiet b’baġit ta’ EUR 2.6 miljun.

MINN META JAPPLIKAW L-AZZJONI KONĠUNTA U D-DEĊIŻJONI?

L-azzjoni konġunta ilha tapplika mit-23 ta’ Ġunju 2008 u d-deċiżjoni mit-18 ta’ Frar 2021.

SFOND

Għal iktar informazzjoni ara:

Il-Konvenzjoni ta’ Ottawa: Il-Kunsill jindirizza t-theddida tal-mini u l-fdalijiet splussivi tal-gwerra – stqarrija għall-istampa (il-Kunsill tal-Unjoni Ewropea).

TERMINI EWLENIN

Mina kontra l-persunal. Mina ddisinjata biex tisplodi bil-preżenza, bil-viċinanza jew b’kuntatt ma’ persuna u li tinkapaċita, tkorri jew toqtol persuna waħda jew aktar.

DOKUMENTI PRINĊIPALI

L-Azzjoni Konġunta tal-Kunsill 2008/487/PESK tat-23 ta’ Ġunju 2008 b’appoġġ għall-universalizzazzjoni u l-implimentazzjoni tal-Konvenzjoni ta’ l-1997 dwar il-Projbizzjoni ta’ l-Użu, il-Kumulu ta’ Ħażna, il-Produzzjoni u t-Trasferiment ta’ Mini ta’ l-Art Kontra l-Persunal u dwar id-Distruzzjoni tagħhom, fil-qafas ta’ l-Istrateġija Ewropea ta’ Sigurtà (ĠU L 165, 26.6.2008, pp. 41–44).

Id-Deċiżjoni tal-Kunsill 2012/700/PESK tat-13 ta’ Novembru 2012 fil-qafas tal-Istrateġija Ewropea ta’ Sigurtà b’appoġġ għall-implimentazzjoni tal-Pjan ta’ Azzjoni ta’ Kartaġena 2010–2014, adottat mill-Istati Parti għall-Konvenzjoni tal-1997 dwar il-Projbizzjoni tal-Użu, il-Kumulazzjoni, il-Produzzjoni u t-Trasferiment ta’ Mini Kontra l-Persunal u dwar id-Distruzzjoni Tagħhom (ĠU L 314, 14.11.2012, pp. 40–46).

Id-Deċiżjoni tal-Kunsill (PESK) 2017/1428 tal-4 ta’ Awwissu 2017 b’appoġġ għall-implimentazzjoni tal-Pjan ta’ Azzjoni ta’ Maputo għall-implimentazzjoni tal-Konvenzjoni tal-1997 fuq il-Projbizzjoni tal-Użu, il-Kumulazzjoni, il-Produzzjoni u t-Trasferiment ta’ Mini kontra l-Persunal u fuq id-Distruzzjoni tagħhom (ĠU L 204, 5.8.2017, pp. 101–109).

Emendi suċċessivi għad-Deċiżjoni (PESK) 2017/1428 ġew inkorporati fit-test bażiku. Din il-verżjoni konsolidata għandha valur dokumentarju biss.

Id-Deċiżjoni tal-Kunsill (PESK) 2021/257 tat-18 ta’ Frar 2021 b’appoġġ għall-Pjan ta’ Azzjoni ta’ Oslo għall-implimentazzjoni tal-Konvenzjoni tal-1997 fuq il-Projbizzjoni tal-Użu, il-Kumulazzjoni, il-Produzzjoni u t-Trasferiment ta’ Mini kontra l-Persunal u fuq id-Distruzzjoni tagħhom (ĠU L 58, 19.2.2021, pp. 41–50).

DOKUMENTI RELATATI

Viżjoni kondiviża, azzjoni komuni: Ewropa aktar b’saħħitha – Strateġija globali għall-politika estera u ta’ sigurtà komuni tal-Unjoni Ewropea, it-28 ta’ Ġunju 2016.

l-aħħar aġġornament 16.05.2022

Top

All