It-tisħiħ tal-innovazzjoni fir-reġjuni tal-Ewropa: Strateġiji għal tkabbir reżiljenti, inklużiv u sostenibbli

 

SOMMARJU TA’:

Il-Kommunikazzjoni tal-Kummissjoni — Insaħħu l-innovazzjoni fir-reġjuni tal-Ewropa

X’INHU L-GĦAN TAL-KOMUNIKAZZJONI?

Għandha l-għan li:

• issaħħaħ il-potenzjal għall-innovazzjoni u l-kompetittività tar-reġjuni tal-Unjoni Ewropea (UE) bħala bażi ta’ tkabbir sostenibbli;
• iżżid il-kooperazzjoni interreġjonali li hija element prinċipali f’ekonomiji globalizzati;
• iżżid il-konċentrazzjoni fuq reġjuni inqas żviluppati u li għaddejjin minn tranżizzjoni industrijali;
• ittejjeb u tibni fuq ħidma konġunta f’politiki u programmi fl-UE li jappoġġaw l-innovazzjoni.

PUNTI EWLENIN

Speċjalizzazzjoni intelliġenti

• Il-komunikazzjoni tippromwovi strateġija ta’ speċjalizzazzjoni intelliġenti għar-reġjuni tal-UE.
• L-istrateġija kienet oriġinarjament integrata fil-politika ta’ koeżjoni riformata tal-UE għall-2014–2020 biex jiġi massimizzat l-impatt pożittiv fuq it-tkabbir u l-impjiegi.
• Hija tiffoka fuq:
  • l-identifikazzjoni tas-saħħiet u l-assi komparattivi tar-reġjuni stess;
  • il-prijorità għall-investiment fir-riċerka u fl-innovazzjoni f’oqsma kompetittivi;
  • id-definizzjoni ta’ viżjoni konġunta għal innovazzjoni reġjonali.

Sfidi ewlenija

Il-Kummissjoni Ewropea tidentifika erba’ sfidi ewlenin fil-komunikazzjoni u tagħmel proposti biex tindirizza kull waħda minnhom.

• 1.

  It-tisħiħ tal-kapaċità għall-innovazzjoni fir-reġjuni inqas żviluppati u ta’ tranżizzjoni industrijali

  Il-Kummissjoni tipproponi:

  • għajnuna kontinwa mill-pjattaforma ta’ speċjalizzazzjoni intelliġenti biex timplimenta strateġiji intelliġenti nazzjonali u reġjonali;
  • promozzjoni ta’ azzjoni pilota ffinanzjata mill-UE, faċilità ta’ appoġġ għall-politiki ta’ Orizzont 2020 (issa Faċilità għall-appoġġ ta’ politiki ta’ Orizzont Ewropa 2021—2027), inkluż għadd ta’ reġjuni volontarji biex jgħinu fir-riforma tas-sistemi ta’ innovazzjoni tagħhom ibbażati fuq l-istrateġiji ta’ speċjalizzazzjoni tagħhom;
  • l-użu ta’ Strument ta’ Appoġġ Tekniku (TSI) biex jgħin fit-tfassil u l-implimentazzjoni tar-riformi.
• 2.

  Żieda tal-kooperazzjoni fl-investiment għall-innovazzjoni tul ir-reġjuni

  Filwaqt li tibni fuq azzjonijiet ta’ speċjalizzazzjoni intelliġenti eżistenti bħall-Inizzjattiva Vanguard, il-Kummissjoni tipproponi:

  • azzjoni pilota ffinanzjata mill-UE, appoġġata permezz tal-Fond Ewropew għall-Iżvilupp Reġjonali, biex iżżid il-proġetti għall-innovazzjoni interreġjonali b’kooperazzjoni mal-Istati Membri tal-UE — 5 sa 10 sħubijiet tematiċi ser jinħolqu ma’ dawk li jfasslu l-politika, ma’ riċerkaturi, ma’ negozji u ma’ innovaturi oħrajn li jimmiraw setturi ekonomiċi b’valur miżjud għoli.
• 3.

  Riformi għal sistemi reġjonali ta’ innovazzjoni

  Sabiex tinkoraġġixxi r-riforma u tindirizza l-ħtiġijiet ta’ strateġiji ta’ speċjalizzazzjoni intelliġenti ta’ reġjuni inqas żviluppati u fi tranżizzjoni industrijali, il-Kummissjoni ser iżżid l-impenji tagħha biex tinkoraġġixxi l-Istati Membri jagħmlu użu sħiħ tal-għajnuna disponibbli mill-UE. Azzjoni pilota ser titwaqqaf biex tiffaċilita l-użu flimkien ta’ strumenti u programmi eżistenti tal-UE li huma amministrati mill-Kummissjoni flimkien ma’ riżorsi ta’ koeżjoni politika.

• 4.

  Niffaċilitaw is-sinerġiji bejn il-politiki u l-istrumenti tal-UE

  • Għadd ta’ strumenti tal-politika reġjonali, nazzjonali u Ewropea jgħinu biex jippromwovu riċerka u innovazzjoni, tkabbir u kompetittività u kooperazzjoni interreġjonali.
  • Peress li l-Kummissjoni Ewropea diġà ħadet passi biex tippromwovi u tissimplifika t-taħlita u s-sinerġiji bejn il-Fond Ewropew għall-Investimenti Strateġiċi, Orizzont 2020 (issa Orizzont Ewropa) u fondi ta’ politika ta’ koeżjoni, il-Kummissjoni tipproponi:
    • li tkompli taħdem mal-awtoritajiet nazzjonali u reġjonali u tgħinhom jgħaqqdu l-fondi, b’mod partikolari billi tiċċara s-sinerġiji mal-għajnuna mill-Istat u l-offerti pubbliċi;
    • li tikkunsidra li tipprovdi assistenza prattika permezz ta’ rappreżentanti għall-investimenti ddedikati, li ser jaġixxu bħala l-ewwel punt ta’ kuntatt għan-nies lokali u għall-korpi involuti biex jimmassimizzaw l-impatt ta’ diversi fondi tal-UE.

SFOND

Għal aktar informazzjoni, ara:

• Sfidi fil-ġejjieni: it-tisħiħ tat-tkabbir immexxi mill-innovazzjoni fir-reġjuni tal-UE — informazzjoni għall-istampa (il-Kummissjoni Ewropea).

DOKUMENT EWLIENI

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Insaħħu l-Innovazzjoni fir-Reġjuni tal-Ewropa: Strateġija għat-tkabbir reżiljenti, inklużiv u sostenibbli (COM(2017) 376 finali, 18.7.2017).

DOKUMENTI RELATATI

Dokument ta’ riflessjoni dwar il-ġestjoni tal-globalizzazzjoni (COM(2017) 240 final, 10.5.2017).

l-aħħar aġġornament 07.03.2022