L-indirizzar tal-epidemija tal-obeżità fit-tfulija
SOMMARJU TA’:
Konklużjonijiet dwar it-twaqqif taż-żieda fil-piż żejjed u l-obeżità fit-tfulija
X’INHU L-GĦAN TA’ DAWN IL-KONKLUŻJONIJIET?
Dawn jistiednu lill-pajjiżi tal-UE u lill-Kummissjoni Ewropea biex jieħdu serje ta’ azzjonijiet ikkoordinati sabiex jindirizzaw iż-żieda fl-għadd ta’ tfal li għandhom piż żejjed u/jew huma obeżi — waħda mill-isfidi ewlenin dwar is-saħħa tal-lum li spiss twassal għal konsegwenzi tas-saħħa u ekonomiċi serji, kemm fil-perjodu qasir kif ukoll fil-perjodu twil.
PUNTI EWLENIN
Il-konklużjonijiet jistiednu lill-pajjiżi tal-UE biex jindirizzaw il-piż żejjed u l-obeżità fit-tfulija, pereżempju billi:
- jaħdmu mal-produtturi tal-ikel, mal-bejjiegħa bl-imnut u mas-settur tal-catering sabiex iħeġġu titjib fil-prodotti tal-ikel u b’mod partikolari sabiex jippromwovu l-għażla sana bħala l-għażla faċli;
- jiżviluppaw kodiċi ta’ kondotta sabiex jiżguraw li r-reklamar (u forom oħra ta’ kummerċjalizzazzjoni) immirat lejn it-tfal ma jippromwovix ikel b’ħafna enerġija, melħ, zokkor, aċidi saturati jew aċidi xaħmin trans li ma jikkonformawx mal-linji gwida nutrizzjonali nazzjonali jew internazzjonali;
- janalizzaw il-konsegwenzi ekonomiċi tal-piż żejjed u l-obeżità fl-adulti u fit-tfulija (pereżempju spejjeż tas-saħħa u soċjali u l-piż fuq il-baġit pubbliku u fuq il-baġits tal-familja fi gruppi ta’ popolazzjonijiet differenti).
Huma jistiednu lill-pajjiżi tal-UE flimkien mal-Kummissjoni biex:
- jaħdmu flimkien, mal-partijiet rilevanti, fuq aspetti bħal tnaqqis fil-kummerċjalizzazzjoni lit-tfal u lill-adolexxenti ta’ ikel li ma jikkonformax mal-linji gwida nutrizzjonali internazzjonali jew nazzjonali, jiġġieldu l-istili ta’ ħajja sedentarji u jużaw għodod ibbażati fuq l-evidenza (minħabba l-konnessjoni b’saħħitha bejn il-kummerċjalizzazzjoni u l-piż żejjed);
- iwieġbu b’mod urġenti għall-isfida tal-kummerċjalizzazzjoni u r-reklamar permezz ta’ pjattaformi onlajn u l-midja soċjali — li diffiċli jiġu mmonitorjati peress li l-messaġġi spiss huma mmirati lejn tfal individwali;
- jiżviluppaw u jevalwaw programmi u linji gwida bbażati fuq l-evidenza dwar il-promozzjoni tas-saħħa u l-prevenzjoni ta’ interventi, dijanjożi u kura għal tfal u adoloxxenti li għandhom piż żejjed u huma obeżi li jinsabu f’riskju;
- ikomplu jappoġġjaw il-pjan ta’ azzjoni tal-UE dwar l-obeżità fit-tfulija 2014-2020, speċjalment permezz ta’ attivitajiet li jinvolvu l-kooperazzjoni bejn il-pajjiżi u l-effetti bħal titjib fil-prodotti tal-ikel u kummerċjalizzazzjoni mmirata lejn it-tfal.
Huma jistiednu lill-Kummissjoni biex:
- tappoġġja l-ħidma konġunta tal-pajjiżi tal-UE, speċjalment fl-oqsma ta’ titjib fil-prodotti tal-ikel, analiżi ekonomika tal-konsegwenzi tal-obeżità, kummerċjalizzazzjoni u akkwist pubbliku tal-ikel;
- tappoġġja l-abbozzar tal-kodiċi ta’ kondotta tal-UE fil-qasam tal-kummerċjalizzazzjoni u tar-reklamar tal-ikel, b’mod partikolari b’rabta mat-tfal u mal-adoloxxenti, filwaqt li tinvolvi lid-diversi partijiet interessati kif xieraq;
- tiżgura approċċ dwar is-saħħa fil-politiki kollha effettiv sabiex tippromwovi kunsiderazzjonijiet dwar is-saħħa, il-prevenzjoni u n-nutrizzjoni fis-setturi u l-inizjattivi.
SFOND
Għal aktar informazzjoni, ara:
DOKUMENT EWLIENI
Konklużjonijiet tal-Kunsill li jikkontribwixxu fit-twaqqif taż-żieda fil-piż żejjed u l-obeżità fit-tfulija (ĠU C 205, 29.6.2017, pp. 46-52)
l-aħħar aġġornament 06.11.2017
Top