Politika ta' Dividendi tal-Bank – rakkomandazzjoni tal-BĊE

 

SOMMARJU TAD-DOKUMENT:

Rakkomandazzjoni tal-Bank Ċentrali Ewropew dwar il-politiki għad-distribuzzjoni ta' dividendi (BĊE/2015/49)

X'INHU L-GĦAN TA' DIN IR-RAKKOMANDAZZJONI?

Din hija rakkomandazzjoni mill-Bank Ċentrali Ewropew (BĊE) dwar il-politika ta' dividendi tal-bank. Hija għandha l-għan li tiżgura li l-banek huma kapaċi jissodisfaw ir-rekwiżiti tal-kapital wara li jkunu ħallsu d-dividendi.

PUNTI EWLENIN

Il-banek għandhom jadottaw politika ta' dividendi konservattiva u prudenti. Dan għandu jiżgura li huma jkunu jistgħu jissodisfaw ir-rekwiżiti tal-kapital applikabbli wara li jkunu ħallsu d-dividendi.

Ir-rekwiżiti tal-kapital huma:

• Rekwiżiti tal-Pilastru 1 (rekwiżiti minimi): Proporzjon tal-kapital ta' Livell 1 ta' Ekwità Komuni ta' 4.5 %, proporzjon tal-kapital ta' Livell 1 ta' 6 % u proporzjon tal-kapital totali ta' 8 %.
• rekwiżiti tal-kapital imponuti taħt il-Proċess Superviżorju ta' Reviżjoni u Evalwazzjoni tal-BĊE, li jmorru lil hinn mir-rekwiżiti minimi ta' Pilastru 1
• bafers ta' kapital kontroċikliku u sistemiċi
• ir-rekwiżiti ta' Pilastru 1 “mgħobbija totalment”* u l-bafers tal-kapital kontroċikliku u sistemiċi mid-data sħiħa phase-in.

Dawn ir-rekwiżiti għandhom jiġu sodisfatti kemm fuq livell ta' grupp konsolidat kif ukoll fuq bażi individwali, sakemm ir-rekwiżiti għal dan tal-aħħar ikunu ġew eżentati.

• Il-BĊE ħareġ 3 rakkomandazzjonijiet għad-dividendi li tħallsu fl-2016 għas-sena fiskali 2015:
  • 1.

    Il-banek li jissodisfaw ir-rekwiżiti tal-kapital u li sal-31 ta' Diċembru 2015 ikunu laħqu l-proporzjonijiet “mgħobbija totalment” tagħhom għandhom iqassmu d-dividendi b'mod konservattiv sabiex ikunu jistgħu jkomplu jissodisfaw ir-rekwiżiti kollha anke jekk il-kundizzjonijiet ekonomiċi u finanzjarji jiddeterjoraw.

  • 2.

    Il-banek li jissodisfaw ir-rekwiżiti tal-kapital, iżda li sal-31 ta' Diċembru 2015 ma jkunux laħqu l-proporzjonijiet “mgħobbija totalment” tagħhom għandhom iqassmu wkoll id-dividendi b'mod konservattiv sabiex ikunu jistgħu jkomplu jissodisfaw ir-rekwiżiti kollha anke jekk il-kundizzjonijiet ekonomiċi u finanzjarji jiddeterjoraw, iżda b'żieda biss sal-limitu li jiġi żgurat progress lineari lejn il-proporzjonijiet “mgħobbija totalment” tagħhom fi żmien 4 snin.

  • 3.

    Il-banek li ma jirnexxilhomx jissodisfaw ir-rekwiżiti ma għandhom iqassmu l-ebda dividend.

SFOND

Il-banek jeħtieġu jissodisfaw ċerti rekwiżiti u bafers kapitali. L-ambjent makroekonomiku u finanzjarju li joffri sfida jitfa' pressjoni fuq il-profittabilità tal-banek u l-kapaċità tagħhom biex jibnu l-bażijiet tal-kapital tagħhom.

Il-BĊE jirrakkomanda li l-banek jadottaw politiki li jippermettulhom jissodisfaw ir-rekwiżiti tal-kapital wara li jkunu ħallsu d-dividendi tagħhom.

* TERMINI EWLENIN

DOKUMENT EWLIENI

Rakkomandazzjoni BĊE/2015/49 tal-Bank Ċentrali Ewropew tas-17 ta' Diċembru 2015 dwar politiki għad-distribuzzjoni tad-dividendi (ĠU C 438, 30.12.2015, pp. 1-3)

DOKUMENTI RELATATI

Regolament (UE) Nru 575/2013 tal-Parlament Ewropew u tal-Kunsill tas-26 ta' Ġunju 2013 dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment u li jemenda r-Regolament (UE) Nru 648/2012 (ĠU L 176, 27.6.2013, pp. 1-337)

Emendi suċċessivi għar-Regolament (UE) Nru 575/2013 ġew inkorporati fid-dokument oriġinali. Din il-verżjoni kkonsolidata għandha valur dokumentarju biss.

Regolament (UE) Nru 468/2014 tal-Bank Ċentrali Ewropew tas-16 ta' April 2014 li jistabbilixxi l-qafas għal kooperazzjoni fi ħdan il-Mekkaniżmu Superviżorju Uniku bejn il-Bank Ċentrali Ewropew u awtoritajiet kompetenti nazzjonali u ma' awtoritajiet maħtura nazzjonali (Regolament Qafas tal-MSU)(BĊE/2014/17) (ĠU L 141, 14.5.2014, p. 1-50)

Direttiva 2013/36/UE tal-Parlament Ewropew u tal-Kunsill tas-26 ta' Ġunju 2013 dwar l-aċċess għall-attività tal-istituzzjonijiet ta’ kreditu u s-superviżjoni prudenzjali tal-istituzzjonijiet ta’ kreditu u tad-ditti tal-investiment, li temenda d-Direttiva 2002/87/KE u li tħassar id-Direttivi 2006/48/KE u 2006/49/KE (ĠU L 176, 27.6.2013, pp. 338-436)

Ara l-verżjoni konsolidata.

l-aħħar aġġornament 29.08.2016