L-indirizzar tat-traffikar ta’ organiżmi selvaġġi - azzjoni tal-UE

It-traffikar tal-fawna u tal-flora selvaġġi qed jiżdied b’rata mgħaġġla u l-Unjoni Ewropea (UE) hija suq ewlieni għal dawn il-prodotti. Fl-2014, il-Kummissjoni Ewropea ħarġet dokument li jixħet l-attenzjoni fuq il-ħtieġa li l-kwistjoni tiġi indirizzata b’mod aktar effettiv.

ATT

Komunikazzjoni tal-Kummissjoni lill-Kunsill u lill-Parlament Ewropew dwar l-Approċċ tal-UE kontra t-traffikar ta’ Organiżmi Salvaġġi (COM(2014) 64 final tas-7.2.2014).

SOMMARJU

It-traffikar tal-fawna u tal-flora selvaġġi qed jiżdied b’rata mgħaġġla u l-Unjoni Ewropea (UE) hija suq ewlieni għal dawn il-prodotti. Fl-2014, il-Kummissjoni Ewropea ħarġet dokument li jixħet l-attenzjoni fuq il-ħtieġa li l-kwistjoni tiġi indirizzata b’mod aktar effettiv.

X’TAGĦMEL DIN IL-KOMUNIKAZZJONI?

Tivvaluta s-sitwazzjoni attwali u tivvaluta l-miżuri tal-UE fil-ġlieda kontra t-traffikar ta’ organiżmi selvaġġi kemm fuq livell globali kif ukoll fuq livell tal-UE. Isservi wkoll biex jitnieda dibattitu dwar l-approċċ futur tal-UE lejn it-traffikar ta’ organiżmi selvaġġi.

PUNTI EWLENIN

Kemm fil-livell globali kif ukoll fil-livell tal-UE jeżisti korp wiesgħa ta’ regoli biex jiġi regolat il-kummerċ ta’ organiżmi selvaġġi.

L-UE tat l-appoġġ tagħha għal firxa ta’ inizjattivi kontra t-traffikar ta’ organiżmi selvaġġi bħall-Konvenzjoni dwar il-Kummerċ Internazzjonali fl-Ispeċijiet ta’ Fawna u Flora Selvaġġi fil-Periklu (CITES), il-Pjan ta’ Azzjoni dwar l-Infurzar tal-Liġi, it-Tmexxija u l-Kummerċ fis-Settur Forestali tagħha u r-Regolament dwar l-Injam (biex tiġi żgurata l-oriġini legali u t-traċċabbiltà ta’ prodotti tal-injam) u l-ġlieda kontra sajd illegali, mhux irrapportat u mhux irregolat.

Madankollu, dawn ir-regoli ma waqqfux iż-żieda reċenti fit-traffikar ta’ organiżmi selvaġġi motivata minn domanda dejjem tiżdied u mill-faqar u governanza dgħajfa fil-pajjiżi ta’ oriġini.

Il-kwistjonijiet identifikati jinkludu:

• infurzar fqir jew l-ebda infurzar tar-regoli (prijorità politika baxxa u riżorsi insuffiċjenti);
• għarfien dgħajjef dwar l-iskala tal-problema;
• l-involviment tal-kriminalità organizzata li jeħtieġ ir-rispons koordinat tal-atturi u miżuri.

Għalhekk jeħtieġ li jittieħed approċċ koordinat u komprensiv biex jiġi indirizzat kemm il-lat tad-domanda u tal-provvista tal-ekwazzjoni tat-traffikar ta’ organiżmi selvaġġi. Dan għandu jinvolvi atturi f’varjetà ta’ oqsma ta’ politika.

Id-dokument stieden lill-partijiet interessati biex jagħtu l-fehmiet tagħhom, sal-10 ta’ April 2014, dwar aspetti bħal:

• jekk il-politika u l-qafas legali attwali tal-UE humiex adegwati;
• jekk l-UE teħtieġx tiżviluppa pjan ta’ azzjoni fil-qasam;
• liema għodod fil-livell internazzjonali jistgħu jtejbu l-infurzar u l-governanza;
• ir-rwoli rispettivi tas-soċjetà ċivili u tas-settur privat;
• kif għandhom jiġu indirizzati l-aspetti ta’ paċi u ta’ sigurtà tat-traffikar ta’ organiżmi selvaġġi (peress li ċerti kunflitti huma dwar ir-riżorsi naturali bħall-avorju u l-qrun tar-rinoċeronti);
• kif jista' jiġi megħjun il-bini tal-kapaċità fil-pajjiżi li qed jiżviluppaw fil-konservazzjoni ta’ organiżmi selvaġġi;
• kif tista’ tittejjeb id-dejta dwar il-kriminalità marbuta mal-flora u mal-fawna selvaġġi fl-UE u jiġu sfruttati l-għodod użati kontra l-kriminalità organizzata biex jiġi indirizzat it-traffikar ta’ organiżmi selvaġġi.

IL-PASSI LI JMISS

It-tweġibiet għall-mistoqsijiet preċedenti servew biex jgħinu lill-Kummissjoni Ewropea fir-reviżjoni tagħha tal-politika u tal-miżuri attwali tal-UE bil-ħsieb li tiġi mgħammra biex titratta s-sitwazzjoni b’mod aktar effettiv. Dawn huma miġbura fil-qosor f’Dokument ta’ ħidma tal-persunal tal-Kummissjoni. Il-Kummissjoni bdiet ħidma fuq Pjan ta’ Azzjoni tal-UE kontra t-traffikar ta’ organiżmi selvaġġi.

Għal aktar informazzjoni, ara s-sit tal-Kummissjoni Ewropea dwar it-Traffikar ta’ Organiżmi Selvaġġi.

ATTI RELATATI

Dokument ta’ Ħidma tal-Persunal tal-Kummissjoni: Sommarju tat-Tweġibiet għall-Konsultazzjoni tal-Partijiet Interessati dwar l-Approċċ tal-UE kontra t-traffikar ta’ Organiżmi Salvaġġi (SWD(2014) 347 final tas-26.11.2014).

l-aħħar aġġornament 20.05.2015