Kif l-Unjoni Ewropea qiegħda tonfoq il-baġit tagħha fl-2014

Il-baġit tal-Unjoni Ewropea (UE) jikkontribwixxi għall-implimentazzjoni tal-politiki tal-UE f'firxa wiesgħa ta' oqsma bħall-impjiegi, l-iżvilupp reġjonali, ir-riċerka u l-edukazzjoni, l-ambjent, l-għajnuna umanitarja u appoġġ għall-pajjiżi li qegħdin jiżviluppaw.

ATT

Adozzjoni definittiva tal-baġit ġenerali tal-Unjoni Ewropea għas-sena finanzjarja 2014 (2014/67/UE, Euratom).

SOMMARJU

X'INHU L-OBJETTIV EWLIENI TAL-BAĠIT TAL-UE?

Il-baġit tal-Unjoni Ewropea (UE) jikkontribwixxi għall-implimentazzjoni tal-politiki tal-UE f'firxa wiesgħa ta' oqsma bħall-impjiegi, l-iżvilupp reġjonali, ir-riċerka u l-edukazzjoni, l-ambjent, l-għajnuna umanitarja u appoġġ għall-pajjiżi li qegħdin jiżviluppaw.

Sabiex jiġu ffinanzjati proġetti f'dawn l-oqsma, il-Baġit tal-UE huwa definit fuq il-bażi ta' Qafas Finanzjarju Multi-annwali (MFF) li jkopri perjodu ta' 7 snin. Il-baġit tal-2014 huwa l-ewwel baġit tal-MFF il-ġdid tal-2014-2020.

PRIJORITAJIET EWLENIN

Il-baġit tal-UE huwa għodda ewlenija li tipprovdi tkabbir intelliġenti, sostenibbli u inklussiv kif ukoll solidarjetà bejn il-pajjiżi u r-reġjuni tal-UE. F'dan ir-rigward, il-baġit tal-UE għall-2014 iffoka fuq it-tkabbir u l-impjiegi, b'attenzjoni speċifika fuq il-qgħad fost iż-żgħażagħ.

Fi ħdan il-limiti tal-MFF tal-2014-2020 (€960 biljun tal-approprjazzjonijiet ta' impenn (ara taħt) għall-perjodu ta' 7 snin bi prezzijiet tal-2011), il-baġit tal-2014 jammonta għal total ta' madwar €143 biljun f'impenni (prezzijiet attwali).

Dan il-baġit huwa maqsum skont il-qasam kif ġej (impenni, prezzijiet attwali):

• 1.

  Tkabbir Intelliġenti u Inklussiv: 44.9% - €63.986 biljun inkluż:

  • Il-kompetittività għat-tkabbir u l-impjiegi: 11.6% - €16.484 biljun
  • Koeżjoni ekonomika, soċjali u territorjali: 33.3% - €47.502 biljun

• 2.

  Tkabbir Sostenibbli Riżorsi Naturali: 41.6% - €59.267 biljun (li minnhom, infiq relatat mas-Suq u pagamenti diretti lill-bdiewa €43.778 biljun)

• 3.

  Sigurtà u ċittadinanza 1.5% - €2.172 biljun

• 4.

  Ewropa Globali: 5.8% - €8.325 biljun

• 5.

  Amministrazzjoni: 5.9% - €8.405 biljun (l-aktar l-infiq tal-istituzzjonijiet tal-UE).

Fuq xhiex jintnefqu l-flus?

• tkabbir u impjiegi għall-ġlieda kontra l-qgħad, għall-iżvilupp tar-riżorsi umani u għall-promozzjoni tal-integrazzjoni fis-suq tax-xogħol. Il-Fond Soċjali Ewropew (FSE) huwa l-għodda ewlenija f'dak il-qasam;
• żvilupp reġjonali l-aktar iffinanzjat permezz tal-Fond Ewropew għall-Iżvilupp Reġjonali (FEŻR) u l-Fond ta' Koeżjoni (FK) għat-tisħiħ tal-koeżjoni ekonomika u soċjali fi ħdan l-UE u t-tnaqqis tad-disparitajiet bejn ir-reġjuni tal-UE;
• żvilupp rurali u azzjoni ambjentali l-aktar permezz tal-Fond Agrikolu Ewropew għall-Iżvilupp Rurali (FAERŻ) għal miżuri agri-ambjentali u għall-modernizzazzjoni ta' assi agrikoli;
• agrikoltura bil-għajnuna tal-Fond Agrikolu Ewropew ta' Garanzija (FAEG), wieħed mill-istrumenti tal-politika agrikola komuni tal-UE. Ħafna mill-infiq huwa fuq pagamenti lil bdiewa tal-UE;
• relazzjonijiet esterni u għajnuna umanitarja sabiex tingħata assistenza għal u sabiex tiġi promossa l-kooperazzjoni ekonomika mal-pajjiżi tal-Asja, tal-Amerika Latina, tal-Afrika, tal-Karibew u tal-Paċifiku (AKP) jew tal-pajjiżi tal-Mediterran;
• politiki speċifiċi oħrajn bħar-riċerka bil-Programm Orizzont 2020, Erasmus+ għall-mobilità taż-żgħażagħ jew azzjoni diretta lejn intrapriżi żgħar u medji (COSME). Miżura speċifika tinħoloq ukoll sabiex toffri opportunitajiet ġodda lil żgħażagħ bla xogħol (Inizjattiva favur l-Impjieg taż-Żgħażagħ).

META JIĠI IMPLIMENTAT IL-BAĠIT TAL-UE TAL-2014?

Mill-1.1.2014 sal-31.12.2014.

SFOND

Il-baġit tal-UE huwa ekwivalenti għal madwar 1% tal-ġid ekonomiku tal-UE (Introjtu Nazzjonali Gross - ING). Għal kull sena, u fi ħdan il-limiti tal-MFF, il-Kummissjoni tipproponi baġit adottat mill-Parlament Ewropew u mill-Kunsill tal-UE.

KLIEM EWLIENI

• L-approprjazzjonijiet ta' impenn: figura f'sena baġitarja partikolari li tinkludi flus imwiegħda għal programmi tal-UE li jkopru bosta snin iżda mhux neċessarjament imħallsa f'dik is-sena baġitarja;
• Approprjazzjonijiet ta' pagamenti: ammont mistenni li jitħallas attwalment f'dik is-sena baġitarja.

Għal aktar informazzjoni, ara s-sit elettroniku ta' DĠ Baġit u tal-KE Glossarju baġitarju.

l-aħħar aġġornament 02.03.2015