23.6.2007   

MT

Il-Ġurnal Uffiċjali ta’ l-Unjoni Ewropea

C 140/12

—

tikkonstata li r-Repubblika Taljana, billi estendiet permezz ta' l-Artikolu 2(44) tal-liġi ta' l-24 ta' Diċembru 2003, Nru. 350 (legge finanziaria 2004) għas-sena 2002 il-maħfra mill-ħlas ta' taxxa previst fl-Artikoli 8 u 9 tal-liġi tas-27 ta' Diċembru 2002 Nru. 289 (legge finanziaria 2003), u billi pprovdiet b'mod espliċitu u ġenerali li ma ssirx l-investigazzjoni ta' l-operazzjonijiet taxxabbli li twettqu waqt il-perijodu ta' tassazzjoni li jirrigwarda s-sena 2002, ir-Repubblika Taljana kisret l-obbligi li hija kellha taħt l-Artikolu 2(11)(a)(ċ) u (d) u taħt l-Artikoli 193 sa 273 tat-Titolu XI ta-Direttiva tal-Kunsill 2006/112/KE (1), tat-28 ta' Novembru 2006, dwar sistema komuni ta' taxxa fuq il-valur miżjud, li abrogaw u ssostitwew mill-1 ta' Jannar 2007 l-Artikoli 2 u 22 tas-Sitt Direttiva tal-Kunsill 77/388/KEE (2), tas-17 ta' Mejju 1977, fuq l-armonizzazzjoni tal-liġijiet ta' l-Istati Membri dwar taxxi fuq id-dħul mill-bejgħ (Sistema komuni ta' taxxa fuq il-valur miżjud: bażi uniformi ta' stima), flimkien ma' l-Artikolu 10 tat-Trattat KE;

—

tikkundanna lir-Repubblika Taljana tbati l-ispejjeż.

1.

Il-Kummissjoni tfakkar l-eżistenza ta' obbligu doppju impost fuq l-Istati Membri mil-leġiżlatur Komunitarju, mhux biss li joħroġ l-atti legali kollha tad-dritt nazzjonali meħtieġa sabiex jimplementa s-Sit Direttiva VAT, iżda ukoll li jaddotta l-miżuri kollha ta' natura amministrattiva meħtieġa sabiex jiġi żgurat ir-rispett, min-naħa ta' min hu suġġett passiv tal-VAT, ta' l-obbligi li jirriżultaw minn din l-istess Sitt Direttiva, l-ewwel nett l-obbligu li titħallas it-taxxa dovuta minħabba li jkunu saru operazzjonijiet taxxabbli tul ċertu perijodu ta' żmien. L-armonizzazjoni tal-VAT prevista mil-leġiżlatur Komunitarju ma jkollha l-ebsa sens, kif ukoll minn kwalunkwe użu prattiku, li kieku l-aministrazzjonijiet fiskali nazzjonali ma kinux marbuta li jġibu fis-seħħ azzjoni effettiva ta' verifika u ta' kontroll intiż sabiex tiġi żgurata “ġabra ekwivalenti tat-taxxa fl-Istati Membri kollha”, kif inhu ppreċiżat fil-premessa Nru. 14 tas-Sitt Direttiva.

2.

Ir-regoli introdotti permezz ta' l-Artikoli 8 u 9 tal-liġi Taljana Nru. 289/2002 marru hafna lil hinn mill-marġini ta' diskrezzjoni amministrattiva mogħtija lill-Istati Membri mil-leġiżlatur Komunitarju. Fil-fatt, minflokk ma l-użu ta' din is-setgħa ta' diskrezzjoni ġie intiż sabiex ikun hemm effettività ikbar ta' verifiki fiskali, l-Istat Taljan wettaq, bil-liġi ċċitata iktar 'il fuq, rinunzja ġenerali, indiskriminata u preventiva għal kull attività ta' investigazzjoni u verifika fil-qasam tal-VAT, u b'hekk kiser b'mod dirett id-dispożizzjonijiet ta' l-Artikolu 22 tas-Sitt Direttiva u, għaldaqstant, l-obbligu ġenerali li jinsab fl-Artikolu 2, li l-operazzjonijiet kollha taxxabbli jkunu suġġetti għall-VAT. Il-leġiżlatur Taljan offra lil kull suġġett passiv tal-VAT li jaqa' taħt il-kompetenza taxxabbli tiegħu stess il-possibbiltà li jeskludi “in toto”, relattivament għal sekwenza ta' perijodi ta' taxxa, l-eventwalità ta' kwalunkwe verifika fuq it-taxxa. Dan il-vantaġġ sinjifikattiv jista' jitgawda mill-kontribwent permezz ta' ħlas ta' somma kkalkulata b'rata fissa li ma jkollhiex x'taqsam mal-VAT li kellha tkun dovuta fuq il-prezz ta' trasferiment ta' proprjetà jew għoti ta' servizzi li saru mis-suġġett passiv fil-perijodu ta' bażi kkonċernat.

3.

Dan it-“tluq” radikali mit-taxxa dovuta kkalkulata skond ir-regoli ordinarji tal-VAT u l-“quantum” li għandu jitħallas sabiex wieħed jimxi skond il-“maħfra stabbilita”, jidher partikolarment fil-każ fejn is-suġġett passiv ikun naqas għal kollox milli jippreżenta d-dikjarazzjoni tad-dħul. Il-kontribwent jista' jirregolarizza l-pożizzjoni tiegħu għal kull sena ta' stima, permezz tal-ħlas ta' EUR 1,500, jekk huwa persuna fiżika, jew EUR 3,000 jekk is-suġġett passiv huwa kumpannija. Nuqqas analogu ta' kwalunkwe konnessjoni ma' l-ammont taxxabbli ta' l-operazzjonijiet li saru (u ma ġewx iddikjarati) jikkaratterizza wkoll il-metodu ta' maħfra “stabbilita” li jseħħ billi tiġi ppreżentata dikjarazzjoni li tiġbor fiha kollox. Id-dħul dovut mill-kontribwent li għandu l-intenzjoni li jgawdi mill-maħfra huwa fil-fatt ikkalkulat f'perċentwali (2 %) li għandu jiġi applikat fuq il-VAT li suppost huwa dovut fiċ-ċessjoni ta' proprjetà jew fuq l-għoti ta' servizzi li saru f'kull sena ta' stima (jew fuq il-VAT fuq l-akkwisti indebitament meħuda fl-istess perijodu ta' taxxa).

4.

Din ir-rinunzja preventiva u ġenerali għal kull attività ta' verifika tista' twassal għal distorsjoni gravi tal-ħidma tajba tas-sistema komuni tal-VAT. B'mod partikolari jirriżulta mibdul il-prinċipju ta' newtralità tat-taxxa, li jmur kontra li operaturi ekonomiċi li jagħmlu l-istess operazzjonijiet jiġu ttrattati b'mod differenti fir-rigward tal-ġbir tal-VAT. Kull eċċezzjoni għar-regola ta' l-effettività ta' l-applikazzjoni u ġbir tal-VAT tirriżulta fil-fatt, minn naħa, f'dannu gravi kontra l-impriżi kemm dawk Taljani kif ukoll ta' Stati Membri oħra, li huma suġġetti għas-sistema ordinarja tat-taxxa fuq il-valur miżjud u, min-naħa l-oħra, għal ħsara gravi tal-prinċipju ta' “kompetizzjoni b'saħħitha” fis-suq komuni, imsemmi fir-raba' premessa tas-Sitt Direttiva.