(a)

tikkundanna (abbażi tat-tieni paragrafu tal-Artikoli 266, l-Artikolu 268 u t-tieni paragrafu tal-340 TFUE) lill-Unjoni Ewropea, irrappreżentata mill-Kummissjoni Ewropea, tħallas EUR 1 096 814,68 (jew, sussidjarjament, somma differenti eventwalment iddeterminata mill-Qorti Ġenerali, jekk ikun il-każ bl-applikazzjoni ta’ rata ta’ interessi differenti minn dik indikata iktar ’il quddiem) – liema ammont jirriżulta mill-applikazzjoni tar-rata (ta’ 1 %) ta’ rifinanzjament tal-Bank Ċentrali Ewropew (BĊE) fis-seħħ fid-9 ta’ Marzu 2010, miżjuda bi tliet punti u nofs perċentwali, għall-perijodu bejn id-9 ta’ Marzu 2010 u l-25 ta’ Ottubru 2017 (bit-tnaqqis ta’ EUR 129 847,10 diġà mħallsa abbażi ta’ interessi “prodotti”) – bħala kumpens għad-dannu mġarrab minn Ferriere Nord S.p.A. minħabba n-nuqqas ta’ pagament (bi ksur tal-ewwel paragrafu tal-Artikolu 266 TFUE) tal-interessi moratorji dovuti għall-multa (imposta bid-Deċiżjonijiet tal-Kummissjoni Ewropea C(2009) 7492 final tat-30 ta’ Settembru 2009 u C(2009) 9912 final tat-8 ta’ Diċembru 2009) mħallsa minnha provviżorjament fid-9 ta’ Marzu 2010 u mħallsa lura mill-Kummissjoni Ewropea fil-25 ta’ Ottubru 2017 abbażi tas-sentenza tal-Qorti tal-Ġustizzja tal-21 ta’ Settembru 2017 fil-Kawża C-88/15 P;

għaldaqstant,

(b)

tikkundanna lill-Unjoni Ewropea, irrappreżentata mill-Kummissjoni Ewropea, tħallas ammont ieħor abbażi tal-kapitalizzazzjoni tas-somma tal-kumpens imsemmi fil-punt (a) iktar ’il fuq, li bdiet tiddekorri mill-25 ta’ Ottubru 2017 (jew, sussidjarjament, minn data oħra eventwalment iddeterminata mill-Qorti Ġenerali) sad-data tal-pagament sħiħ u effettiv, li għandu jiġi kkalkolat skont ir-rata ffissata mill-Bank Ċentrali Ewropew għat-tranżazzjonijiet ta’ rifinanzjament tiegħu, miżjuda bi tliet punti u nofs perċentwali (jew, sussidjarjament, skont ir-rata eventwalment stabbilita mill-Qorti Ġenerali);

—

F’dan ir-rigward jiġi osservat li biex tingħata eżekuzzjoni sħiħa (skont l-ewwel paragrafu tal-Artikolu 266 TFUE) tas-sentenza tal-Qorti tal-Ġustizzja tal-21 ta’ Settembru 2017 fil-Kawża C-88/15 P (li kienet annullat deċiżjoni tal-2009 ta’ evalwazzjoni skont l-Artikolu 101 TFUE), il-Kummissjoni kellha tirrimborsa lil Ferriere Nord, mhux biss il-multa mħallsa provviżorjament fl-2010, iżda anki l-interessi moratorji relattivi li kellhom jiġu kkalkolati skont ir-rata stabbilita fl-Artikolu 83(2)(b) tar-Regolament Nru 1268/2012, jiġifieri r-rata ffissata mill-BĊE għat-tranżazzjonijiet prinċipali ta’ rifinanzjament tiegħu fis-seħħ fis-seħħ fl-ewwel jum kalendarju tax-xahar ta’ skadenza, miżjud bi tliet punti u nofs perċentwali. Minflok, il-Kummissjoni, fil-25 ta’ Ottubru 2017, ħallset – abbażi ta’ interessi – biss dawk “prodotti” skont l-Artikolu 90(4) tar-Regolament Nru 1268/2012, bħala qliegħ miksub mill-kont bankarju li fih kienet iddepożitat provviżorjament l-ammont tal-multa. In-nuqqas ta’ pagament tal-interessi moratorji jikkostitwixxi ksur tad-dritt primarju tal-Unjoni (l-ewwel paragrafu tal-Artikolu 266 TFUE), bir-responsabbiltà mhux kuntrattwali korrispondenti tal-Kummissjoni. Il-kumpens dovut għad-danni msemmija iktar ’il fuq għandu jkun ukoll suġġett għal kapitalizzazzjoni, mid-data li fiha tħallsu biss l-interessi “prodotti” sad-data tal-ħlas effettiv.

—

F’dan ir-rigward jiġi osservat li bl-ittra tat-30 ta’ April 2021, il-Kummissjoni ddikjarat li ma setgħetx/riditx tiddeċiedi dwar it-talba għal kumpens preġudizzjarja mressqa minn Ferriere Nord skont l-Artikolu 46 tal-Istatut tal-Qorti tal-Ġustizzja għaliex it-terminu ta’ preskrizzjoni ta’ ħames snin stabbilit fih kien skada, peress li – skont l-istituzzjoni – il-fatt li wassal għar-responsabbiltà mhux kuntrattwali tagħha stess (u b’hekk il-mument meta beda jiddekorri t-terminu tal-preskrizzjoni) kien il-pagament provviżorju tal-multa li seħħ fl-2010. Minflok, Ferriere Nord tiddeduċi li l-fatt li wassal għar-responsabbiltà huwa l-fatt li fil-25 ta’ Ottubru 2017 – meta l-multa ġiet imħallsa lura b’eżekuzzjoni tas-sentenza tal-2017 – il-Kummissjoni ma ħallsitx l-interessi moratorji msemmija fl-Artikolu 83 tar-Regolament Nru 1268/2012, billi llimitat ruħha għall-ħlas tal-interessi “prodotti” biss, skont l-Artikolu 90 tal-istess regolament. Tali ksur tal-ewwel paragrafu tal-Artikolu 266 TFUE jikkostitwixxi l-aġir illegali tal-Kummissjoni u jiddetermina r-responsabbiltà mhux kuntrattwali tagħha u għalhekk huwa mill-mument ta’ tali ksur li jibda jiddekorri t-terminu ta’ preskrizzjoni ta’ ħames snin stabbilit fl-Artikolu 46 tal-Istatut.