1

Permezz tar-rikors tagħha bbażat fuq l-Artikolu 263 TFUE, ir-rikorrenti, Max Heinr. Sutor OHG, qiegħda titlob l-annullament tad-deċiżjoni SRB/ES/2021/22 tal-Bord Uniku ta’ Riżoluzzjoni (SRB) tal‑14 ta’ April 2021 dwar il-kalkolu tal-kontribuzzjonijiet ex ante għall‑2021 għall-Fond Uniku ta’ Riżoluzzjoni (iktar ’il quddiem id-“Deċiżjoni kkontestata”), sa fejn din tikkonċernaha.

[omissis]

25

Ir-rikorrenti titlob li l-Qorti Ġenerali jogħġobha:

26

Is-SRB jitlob li l-Qorti Ġenerali jogħġobha:

27

Preliminarjament, għandu jitfakkar li, permezz tar-rikors tagħha, ir-rikorrenti qiegħda titlob ukoll, b’mod preventiv, l-annullament tal-komunikazzjoni kkontestata, fil-każ li, b’risposta għas-sitt motiv, il-Qorti Ġenerali tqis li l-kontenut tagħha huwa independenti minn dak tad-Deċiżjoni kkontestata. Fil-fehma tar-rikorrenti, f’din il-komunikazzjoni, is-SBR jispjega d-deċiżjoni tiegħu li ma jilqax it-talba għal reviżjoni tad-data tiegħu dwar il-kontribuzzjonijiet ex ante għall-perijodi ta’ kontribuzzjoni 2018 sa 2020.

28

F’dan ir-rigward, għandu jiġi kkonstatat li, minkejja t-titolu tal-kap tat-talbiet intiż għall-annullament tal-komunikazzjoni kkontestata, kif ifformulat mir-rikorrenti, l-argument ta’ din tal-aħħar, fir-realtà, sempliċement jikkontesta l-legalità tad-Deċiżjoni kkontestata. B’hekk, ir-rikorrenti ma qiegħda tressaq ebda argument awtonomu u speċifiku fir-rigward tal-komunikazzjoni kkontestata. F’dawn iċ-ċirkustanzi, għandu jiġi dedott minn dan li s-sitt motiv u r-rikors kollu kemm hu jirrigwardaw, fir-realtà, id-Deċiżjoni kkontestata biss.

29

Insostenn tar-rikors tagħha, ir-rikorrenti tqajjem erbatax‑il motiv, ibbażati:

30

Fir-replika tagħha, ir-rikorrenti indikat li hija kienet qiegħda tirrinunzja għall-għaxar u għall-ħdax‑il motiv.

31

Qabelxejn, għandhom jiġu eżaminati l-motivi li permezz tagħhom ir-rikorrenti qiegħda teċċepixxi l-illegalità tal-Artikolu 14(2) u tal-punt 11 tal-Artikolu 3 tar-Regolament Delegat 2015/63 u, imbagħad, il-motivi li jirrigwardaw b’mod dirett il-legalità tad-Deċiżjoni kkontestata.

32

Bit-titolu tat-tnax, it-tlettax u l-erbatax‑il motiv, ir-rikorrenti qiegħda tqajjem eċċezzjonijiet ta’ illegalità kontra l-Artikolu 14(2) u l-punt 11 tal-Artikolu 3 tar-Regolament Delegat 2015/63. Madankollu, mill-motivi tar-rikors jirriżulta li r-rikorrenti qiegħda essenzjalment tikkontesta wkoll il-legalità tal-Artikolu 5(1)(e) ta’ dan ir-regolament delegat.

33

B’hekk, b’mod iktar konkret, ir-rikorrenti ssostni, permezz tat-tnax‑il motiv, li l-punt 11 tal-Artikolu 3, l-Artikolu 5(1)(e) u l-Artikolu 14(2) tar-Regolament Delegat 2015/63 jiksru l-Artikolu 103(7) tad-Direttiva 2014/59 u l-prinċipju ta’ ugwaljanza fit-trattament. Permezz tat-tlettax‑il motiv, ir-rikorrenti ssostni li dawn id-dispożizzjonijiet tar-Regolament Delegat 2015/63 jiksru wkoll il-libertà ta’ intrapriża protetta mill-Artikolu 16 tal-Karta. Permezz tal-erbatax‑il motiv, ir-rikorrenti ssostni li l-imsemmija dispożizzjonijiet jiksru l-libertà ta’ stabbiliment protetta mill-Artikoli 49 u 54 TFUE.

34

Ir-rikorrenti qajmet dawn l-eċċezzjonijiet ta’ illegalità f’każ li l-Artikolu 5(1)(e) tar-Regolament Delegat 2015/63 kellu jiġi interpretat fis-sens li ma jippermettix l-esklużjoni tal-passiv fiduċjarju mill-kalkolu tal-passiv użat sabiex jiġu ddeterminati l-kontribuzzjonijiet ex ante.

35

B’hekk, għandu jiġi eżaminat, fl-ewwel lok, jekk l-Artikolu 5(1)(e) tar-Regolament Delegat 2015/63 għandux jiġi interpretat fis-sens li ma jippermettix tali esklużjoni. Jekk dan ikun il-każ, għandu jiġi evalwat, fit-tieni lok, jekk l-Artikolu 14(2) u l-punt 11 tal-Artikolu 3 tar-Regolament Delegat 2015/63 humiex konformi mal-Artikolu 103(7) tad-Direttiva 2014/59, mal-prinċipju ta’ ugwaljanza fit-trattament, mal-Artikolu 16 tal-Karta u mal-Artikoli 49 u 54 TFUE.

36

Skont l-Artikolu 5(1)(e) tar-Regolament Delegat 2015/63, huma esklużi mill-kalkolu tal-kontribuzzjonijiet ex ante, “fil-każ tad-ditti tal-investiment [impriżi ta’ investiment], obbligazzjonijiet [passiv] li jirriżultaw miż-żamma ta’ assi [attiv] jew flus kontanti [attiv likwidu] tal-klijenti, […] sakemm dak il-klijent ikun protett mil-liġi applikabbli dwar l-insolvenza”.

37

Ir-rikorrenti ssostni li din id-dispożizzjoni għandha tiġi interpretata fis-sens li tippermetti li jiġi eskluż l-ammont tal-passiv fiduċjarju tagħha mill-kalkolu tal-passiv tagħha fid-determinazzjoni tal-kontribuzzjoni ex ante tagħha, peress li dan il-passiv jissodisfa l-kundizzjonijiet previsti fl-imsemmija dispożizzjoni.

38

Is-SRB jikkontesta l-argumenti tar-rikorrenti.

39

Mill-ġurisprudenza jirriżulta li l-Artikolu 5(1) tar-Regolament Delegat 2015/63 ma jagħtix setgħa diskrezzjonali lis-SRB sabiex jeskludi ċertu passiv huwa u jaġġusta l-kontribuzzjonijiet ex ante skont ir-riskju tagħhom, iżda jelenka, għall-kuntrarju, b’mod preċiż il-kundizzjonijiet li fihom passiv ikun suġġett għal tali esklużjoni (ara, f’dan is-sens, is-sentenza tat‑3 ta’ Diċembru 2019, Iccrea Banca, C‑414/18, EU:C:2019:1036, punt 93). Skont din l-istess ġurisprudenza, it-teħid inkunsiderazzjoni tal-prinċipji ta’ ugwaljanza fit-trattament, ta’ nondiskriminazzjoni u ta’ proporzjonalità ma jistax jiġġustifika riżultat ieħor, peress li r-Regolament Delegat 2015/63 iddistingwa sitwazzjonijiet b’karatteristiċi speċifiċi, direttament marbuta mar-riskji inerenti għall-passiv inkwistjoni (sentenza tat‑3 ta’ Diċembru 2019, Iccrea Banca, C‑414/18, EU:C:2019:1036, punt 95).

40

F’dan ir-rigward, għandu jitfakkar li, skont il-ġurisprudenza, id-dispożizzjonijiet li jistabbilixxu deroga għandhom jiġu interpretati b’mod strett (ara, f’dan is-sens, is-sentenza tal‑14 ta’ Novembru 2019, State Street Bank International, C‑255/18, EU:C:2019:967, punti 39 u 40). B’hekk, peress li l-Artikolu 5(1) tar-Regolament Delegat 2015/63 jistabbilixxi deroga mir-regola ġenerali prevista fl-Artikolu 103(2) tad-Direttiva 2014/59, billi jippermetti l-esklużjoni ta’ ċertu passiv mill-kalkolu tal-kontribuzzjonijiet ex ante, huwa dispożizzjoni li għandha tiġi interpretata b’mod strett.

41

F’dan il-kuntest, għandu jiġi rrilevat li l-Artikolu 5(1)(e) tar-Regolament Delegat 2015/63 jipprevedi tliet kundizzjonijiet kumulattivi għall-esklużjoni tal-passiv ikkonċernat mill-kalkolu tal-kontribuzzjonijiet ex ante, jiġifieri, l-ewwel, il-fatt li dan il-passiv għandu jinżamm minn impriża ta’ investiment, it-tieni, il-fatt li dan għandu jirriżulta miż-żamma ta’ attiv jew ta’ attiv likwidu ta’ klijenti u, it-tielet, il-fatt li dawn il-klijenti għandhom jiġu protetti mid-dritt applikabbli fil-qasam tal-insolvenza.

42

Fir-rigward tal-ewwel kundizzjoni, ir-rikorrenti ssostni li hija għandha titqies bħala impriża ta’ investiment fis-sens tal-Artikolu 5(1)(e) tar-Regolament Delegat 2015/63.

43

Il-kunċett ta’ “impriżi ta’ investiment” huwa ddefinit fil-punt 2 tal-Artikolu 3 tar-Regolament Delegat 2015/63 bħala “ditti tal-investiment kif definit fil-punt (3) tal-Artikolu 2(1) tad-Direttiva 2014/59/UE […]”.

44

Huwa stabbilit bejn il-partijiet li, fil-mument li fih ittieħdet id-Deċiżjoni kkontestata, il-punt 3 tal-Artikolu 2(1) tad-Direttiva 2014/59 kien jiddefinixxi l-kunċett ta’ “impriża ta’ investiment” bħala “ditta ta’ investiment kif definita fil-punt (2) tal-Artikolu 4(1) tar-Regolament (UE) Nru 575/2013 […]” liema punt kien jiddefinixxi l-kunċett ta’ “impriża ta’ investiment” bħala “persuna kif definit fil-punt (1) tal-Artikolu 4(1) tad-Direttiva 2004/39/KE, li tkun soġġetta għar-rekwiżiti imposti minn dik id-Direttiva, esklużi dawn li ġejjin: (a) istituzzjonijiet ta’ kreditu […]”.

45

Mill-kliem stess ta’ dawn id-dispożizzjonijiet jirriżulta li, fil-mument li fih ittieħdet id-Deċiżjoni kkontestata, id-deroga li tinsab fl-Artikolu 5(1)(e) tar-Regolament Delegat ma kinitx tapplika għall-entitajiet li kienu fl-istess ħin istituzzjonijiet ta’ kreditu u impriżi ta’ investiment, bħalma kien il-każ tar-rikorrenti. F’dan ir-rigward, ma huwiex ikkontestat li r-rikorrenti hija istituzzjoni ta’ kreditu li għandha awtorizzazzjoni bankarja bħala istituzzjoni fis-sens tal-Artikolu 2, moqri flimkien mal-punt 13 tal-Artikolu 3(1) tar-Regolament Nru 806/2014 u mal-punt 2 tal-Artikolu 2(1) tad-Direttiva 2014/59.

46

Din il-konklużjoni ma hijiex ikkontestata mid-dikjarazzjoni tar-rikorrenti li hija għandha awtorizzazzjoni sabiex tipprovdi s-servizzi u twettaq l-attivitajiet ta’ investiment imsemmija fil-punti 1 sa 7 tat-Taqsima A tal-Anness I tad-Direttiva 2014/65/UE tal-Parlament Ewropew u tal-Kunsill tal‑15 ta’ Mejju 2014 dwar is-swieq fl-istrumenti finanzjarji u li temenda d-Direttiva 2002/92/KE u d-Direttiva 2011/61/UE (ĠU 2014, L 173, p. 349).

47

Fil-fatt, kif isostni s-SRB, li kieku l-Kummissjoni riedet tirreferi, fl-Artikolu 5(1)(e) tar-Regolament Delegat 2015/63, kemm għall-istituzzjonijiet ta’ kreditu, kif ukoll għall-impriżi ta’ investiment, jew saħansitra għall-istituzzjonijiet ta’ kreditu li huma wkoll impriżi ta’ investiment, hija kienet tirreferi, f’din id-dispożizzjoni, għall-“istituzzjonijiet” u mhux għall-“impriżi ta’ investiment”. Barra minn hekk, il-Kummissjoni mxiet b’dan il-mod ukoll fil-punti (a), (b) u (f) ta’ din id-dispożizzjoni billi użat il-kelma “istituzzjoni”. Mill-banda l-oħra, meta l-Kummissjoni riedet tillimita l-applikazzjoni ta’ eċċezzjoni taħt l-Artikolu 5(1) ta’ dan ir-regolament delegat għal ċerti entitajiet, hija nqdiet minn formulazzjonijiet iktar preċiżi, bħall-formulazzjonijiet “kontroparti[jiet] ċentrali”, “depożitarji[i] ċentrali tat-titoli” u “ditti tal-investiment”, użati fil-punti (c), (d) u (e) ta’ din id-dispożizzjoni, rispettivament.

48

Fir-rigward, fl-aħħar nett, tal-argument tar-rikorrenti li r-riferiment mill-punt 3 tal-Artikolu 2(1) tad-Direttiva 2014/59 għall-punt 2 tal-Artikolu 4(1) tar-Regolament (UE) Nru 575/2013 tal-Parlament Ewropew u tal-Kunsill tas‑26 ta’ Ġunju 2013 dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment u li jemenda r-Regolament (UE) Nru 648/2012 (ĠU 2013, L 176, p. 1) huwa żball li s-SRB kellu jikkoreġi, ir-rikorrenti ma tipproduċi ebda prova tanġibbli insostenn ta’ din id-dikjarazzjoni.

49

F’dan ir-rigward, għandu jitfakkar li d-definizzjoni ta’ “impriża ta’ investiment”, kif attwalment prevista fil-punt 3 tal-Artikolu 2(1) tad-Direttiva 2014/59, ġiet emendata bil-punt 1 tal-Artikolu 63 tad-Direttiva (UE) 2019/2034 tal-Parlament Ewropew u tal-Kunsill tas‑27 ta’ Novembru 2019 dwar is-superviżjoni prudenzjali tad-ditti tal-investiment u li temenda d-Direttivi 2002/87/KE, 2009/65/KE, 2011/61/UE, 2013/36/UE, 2014/59/UE u 2014/65/UE (ĠU 2019, L 314, p. 64, rettifiki fil-ĠU 2020, L 405, p. 84, u fil-ĠU L, 2023/90096). Din id-definizzjoni issa tirreferi għall-punt 22 tal-Artikolu 4(1) tar-Regolament (UE) 2019/2033 tal-Parlament Ewropew u tal-Kunsill tas‑27 ta’ Novembru 2019 dwar ir-rekwiżiti prudenzjali għad-ditti tal-investiment u li jemenda r-Regolamenti (UE) Nru 1093/2010, (UE) Nru 575/2013, (UE) Nru 600/2014 u (UE) Nru 806/2014 (ĠU 2019, L 314, p. 1), li jirreferi, min-naħa tiegħu, fir-rigward tal-kunċett ta’ “impriża ta’ investiment”, għall-punt 1 tal-Artikolu 4(1) tad-Direttiva 2014/65, liema punt jiddefinixxi dan il-kunċett fis-sens li japplika għal kull persuna ġuridika li tipprovdi servizzi ta’ investiment lil terzi, mingħajr ma jeskludi minn din id-definizzjoni l-istituzzjonijiet ta’ kreditu.

50

Madankollu, huwa stabbilit bejn il-partijiet li din l-emenda tad-definizzjoni ta’ “impriża ta’ investiment”, li tinsab fil-punt 3 tal-Artikolu 2(1) tad-Direttiva 2014/59 kienet tapplika biss mis‑26 ta’ Ġunju 2021, konformement mat-tieni subparagrafu tal-Artikolu 67(1) tad-Direttiva 2019/2034, moqri fid-dawl tal-premessa 39 ta’ din l-istess direttiva.

51

Mill-premess jirriżulta li l-Artikolu 5(1)(e) tar-Regolament Delegat 2015/63, fil-verżjoni tiegħu applikabbli fil-mument li fih ittieħdet id-Deċiżjoni kkontestata, fl‑14 ta’ April 2021, għandu jiġi interpretat fis-sens li ma jippermettix li jiġi eskluż il-passiv miżmum minn istituzzjonijiet ta’ kreditu, bħalma hija r-rikorrenti, mill-kalkolu tal-passiv użat sabiex tiġi ddeterminata l-kontribuzzjoni ex ante tagħhom.

52

F’dawn iċ-ċirkustanzi, il-passiv fiduċjarju tar-rikorrenti ma jissodisfax l-ewwel kundizzjoni prevista fl-Artikolu 5(1)(e) tar-Regolament Delegat 2015/63.

53

Peress li t-tliet kundizzjonijiet previsti fl-Artikolu 5(1)(e) tar-Regolament Delegat 2015/63 huma ta’ natura kumulattiva, l-argument tar-rikorrenti għandu jiġi miċħud kollu kemm hu, mingħajr ma huwa neċessarju li jiġi eżaminat jekk iż-żewġ kundizzjonijiet l-oħra humiex issodisfatti.

54

Konsegwentement, għandhom jiġu eżaminati l-eċċezzjonijiet ta’ illegalità li r-rikorrenti qajmet fil-kuntest tat-tnax, tat-tlettax u tal-erbatax‑il motiv.

55

Dan il-motiv huwa magħmul minn żewġ partijiet, ibbażati, tal-ewwel, fuq l-illegalità tal-punt 11 tal-Artikolu 3, tal-Artikolu 5(1)(e) u tal-Artikolu 14(2) tar-Regolament Delegat 2015/63, minħabba ksur tal-Artikolu 103(7) tad-Direttiva 2014/59 u, tat-tieni, fuq ksur tal-prinċipju ta’ ugwaljanza fit-trattament minn dawn l-istess dispożizzjonijiet.

56

Preliminarjament, għandu jiġi rrilevat li l-Artikolu 14(2) tar-Regolament Delegat 2015/63 jobbliga lill-istituzzjonijiet jipprovdu lis-SRB, tal-inqas, l-informazzjoni msemmija fl-Anness II ta’ dan ir-regolament delegat, peress li, skont it-tieni inċiż ta’ dan l-anness, l-istituzzjonijiet huma obbligati jissottomettu lis-SRB id-data dwar il-“obbligazzjonijiet totali”, li l-punt 11 tal-Artikolu 3 tal-imsemmi regolament delegat jiddefinixxi bħala t-total tal-passiv fis-sens tat-Taqsima 3 tad-Direttiva tal-Kunsill 86/635/KEE tat‑8 ta’ Diċembru 1986 dwar il-kontijiet annwali u l-kontijiet konsolidati ta’ banek u istituzzjonijiet finanzjarji oħra (ĠU Edizzjoni Speċjali bil-Malti, Kapitolu 6, Vol. 1, p. 157), jew fis-sens tal-istandards internazzjonali ta’ rrapportar finanzjarju msemmija fir-Regolament (KE) Nru 1606/2002 tal-Parlament Ewropew u tal-Kunsill tad‑19 ta’ Lulju 2002 dwar l-applikazzjoni ta’ standards internazzjonali tal-kontabilità (ĠU Edizzjoni Speċjali bil-Malti, Kapitolu 13, Vol. 29, p. 609).

57

Mill-punti 39 sa 53 iktar ’il fuq jirriżulta li l-Artikolu 5(1)(e) tar-Regolament Delegat 2015/63 ma jipprevedix l-esklużjoni tal-passiv fiduċjarju mill-kalkolu tal-kontribuzzjonijiet ex ante u jinkludi b’hekk l-imsemmi passiv f’dan il-kalkolu. Tali esklużjoni la hija prevista mill-punt 11 tal-Artikolu 3 u lanqas mill-Artikolu 14(2) ta’ dan l-istess regolament delegat.

58

Ir-rikorrenti qiegħda essenzjalment issostni li d-dispożizzjonijiet imsemmija iktar ’il fuq tar-Regolament Delegat 2015/63 jiksru l-Artikolu 103(7)(a) tad-Direttiva 2014/59 minħabba li ma jieħdux inkunsiderazzjoni, sabiex jiġi ddeterminat il-profil ta’ riskju tal-istituzzjonijiet, l-assenza ta’ riskju tal-passiv fiduċjarju.

59

Is-SRB jikkontesta l-argumenti tar-rikorrenti.

60

F’dan ir-rigward, għandu jiġi rrilevat li, skont l-Artikolu 103(7) tad-Direttiva 2014/59, il-Kummissjoni għandha s-setgħa li tadotta atti ddelegati sabiex tippreċiża l-kunċett ta’ “aġġustament tal-kontribuzzjonijiet fi proporzjon tal-profil tar-riskju tal-istituzzjonijiet”.

61

Madankollu, fil-kuntest ta’ setgħa ddelegata fis-sens tal-Artikolu 290 TFUE, il-Kummissjoni għandha, fl-eżerċizzju tal-kompetenzi mogħtija lilha, setgħa wiesgħa ta’ evalwazzjoni meta hija tintalab, b’mod partikolari, twettaq evalwazzjonijiet u eżamijiet kumplessi (ara, f’dan is-sens, is-sentenza tal‑11 ta’ Mejju 2017, Dyson vs Il‑Kummissjoni, C‑44/16 P, EU:C:2017:357, punt 53 u l-ġurisprudenza ċċitata).

62

Dan huwa l-każ fir-rigward tal-iffissar tal-kriterji ta’ aġġustament tal-kontribuzzjonijiet ex ante skont il-profil ta’ riskju fis-sens tal-Artikolu 103(7) tad-Direttiva 2014/59.

63

F’dan ir-rigward, għandu jitfakkar li n-natura speċifika ta’ dawn il-kontribuzzjonijiet tikkonsisti, kif jirriżulta mill-premessi 105 sa 107 tad-Direttiva 2014/59 u mill-premessa 41 tar-Regolament Nru 806/2014, fil-garanzija, b’loġika ta’ ordni ta’ assigurazzjoni, li s-settur finanzjarju jipprovdi biżżejjed riżorsi finanzjarji lis-SRM sabiex ikun jista’ jaqdi l-funzjonijiet tiegħu, filwaqt li jħeġġeġ l-adozzjoni, mill-istituzzjonijiet ikkonċernati, ta’ modi ta’ funzjonament inqas riskjużi (ara, f’dan is-sens, is-sentenza tal‑15 ta’ Lulju 2021, Il‑Kummissjoni vs Landesbank Baden‑Württemberg u SRB (C‑584/20 P u C‑621/20 P, EU:C:2021:601, punt 113).

64

F’dan il-kuntest, u kif jirriżulta mill-premessa 114 tad-Direttiva 2014/59, il-leġiżlatur tal-Unjoni inkariga lill-Kummissjoni tispeċifika, permezz ta’ att iddelegat, il-mod kif il-kontribuzzjonijiet tal-istituzzjonijiet għall-arranġamenti ta’ finanzjament ta’ riżoluzzjoni għandhom jiġu aġġustati approporzjon tal-profil ta’ riskju tagħhom.

65

Barra minn hekk, il-premessa 107 ta’ din id-direttiva tippreċiża li, sabiex jiġi żgurat kalkolu ġust tal-kontribuzzjonijiet ex ante għall-arranġamenti ta’ finanzjament nazzjonali u sabiex tiġi mħeġġa l-adozzjoni ta’ modi ta’ finanzjament inqas riskjużi, dawn il-kontribuzzjonijiet għandhom jiddependu mir-riskju tal-kreditu, tal-attiv likwidu u tas-suq tal-istituzzjonijiet.

66

Mill-premess jirriżulta li l-Kummissjoni kellha tfassal regoli ta’ aġġustament tal-kontribuzzjonijiet ex ante skont il-profil ta’ riskju tal-istituzzjonijiet fid-dawl ta’ żewġ għanijiet marbutin flimkien, jiġifieri, minn naħa, li tiżgura li jittieħdu inkunsiderazzjoni d-diversi riskji li joħolqu l-attivitajiet tal-istituzzjonijiet, ta’ natura bankarja jew, b’mod iktar wiesa’, ta’ natura finanzjarja, u, min-naħa l-oħra, li tħeġġeġ lil dawn l-istess istituzzjonijiet jadottaw modi ta’ funzjonament inqas riskjużi.

67

Issa, kif jirriżulta mid-dokumenti relatati mal-adozzjoni tar-Regolament Delegat 2015/63, b’mod partikolari d-dokumenti “JRC technical work supporting Commission 2 level legislation on risk based contributions to the (single) resolution fund” (Studju tekniku tal-JRC insostenn tal-leġiżlazzjoni tat-tieni livell tal-Kummissjoni dwar il-kontribuzzjonijiet ibbażati fuq ir-riskji għall-fond ta’ riżoluzzjoni (uniku)) u “Commission Staff Working Document: estimates of the application of the proposed methodology for the calculation of contributions to resolution financing arrangements” (Dokument ta’ Ħidma tal-Persunal tal-Kummissjoni: stimi tal-applikazzjoni tal-metodu propost għall-kalkolu tal-kontribuzzjonijiet għall-arranġamenti ta’ finanzjament tar-riżoluzzjonijiet), it-tfassil ta’ tali regoli kien jinvolvi evalwazzjonijiet u valutazzjonijiet kumplessi min-naħa tal-Kummissjoni, inkwantu din tal-aħħar kellha teżamina d-diversi elementi li fid-dawl tagħhom kienu ġew ikkunsidrati d-diversi tipi ta’ riskji fis-setturi bankarji u finanzjarji.

68

Fid-dawl tal-premess, il-Kummissjoni kellha setgħa ta’ evalwazzjoni wiesgħa sabiex tadotta, skont l-Artikolu 103(7) tad-Direttiva 2014/59, ir-regoli li jiddefinixxu l-kunċett ta’ “aġġustament tal-kontribuzzjonijiet fi proporzjon tal-profil tar-riskju tal-istituzzjonijiet”.

69

F’dawn iċ-ċirkustanzi, fir-rigward tal-metodu ta’ aġġustament tal-kontribuzzjonijiet annwali bażiċi skont l-Artikolu 103(7) tad-Direttiva 2014/59, l-istħarriġ tal-qorti tal-Unjoni għandu jkun limitat għal eżami dwar jekk l-eżerċizzju tas-setgħa ta’ evalwazzjoni mogħtija lill-Kummissjoni huwiex ivvizzjat bi żball manifest jew b’użu ħażin ta’ poter jew jekk din tal-aħħar marritx manifestament lil hinn mil-limiti ta’ din is-setgħa (ara, f’dan is-sens, is-sentenza tal‑21 ta’ Lulju 2011, Etimine, C‑15/10, EU:C:2011:504, punt 60).

70

F’dawn iċ-ċirkustanzi, hija r-rikorrenti li għandha turi li d-dispożizzjonijiet imsemmija fil-punt 57 iktar ’il fuq huma vvizzjati bi żball manifest jew b’użu ħażin ta’ poter jew li jmorru manifestament lil hinn mil-limiti tas-setgħa ta’ evalwazzjoni mogħtija lill-Kummissjoni mill-Artikolu 103(7) tad-Direttiva 2014/59, billi ma jipprevedux l-esklużjoni tal-passiv fiduċjarju mill-kalkolu tal-kontribuzzjoni ex ante tagħha.

71

F’dan ir-rigward, ir-rikorrenti ssostni li l-Kummissjoni kisret l-Artikolu 103(7) tad-Direttiva 2014/59, peress li l-passiv fiduċjarju ma joħloq ebda riskju, fatt li huwa rilevanti għall-finijiet tal-kalkolu tal-kontribuzzjonijiet ex ante għal żewġ raġunijiet. Fl-ewwel lok, fil-fehma tagħha, li kieku kellha tkun insolventi skont id-dritt Ġermaniż fil-qasam tal-insolvenza, l-attiv likwidu tal-klijenti fiduċjarji tagħha jkun protett. Fit-tieni lok, ir-rikorrenti ssostni li, sa fejn hija obbligata tittrasferixxi l-fondi tal-klijenti lill-istituzzjonijiet ta’ investiment, fil-każ ta’ falliment ta’ tali istituzzjoni, dawn il-fondi jkunu wkoll protetti mill-iskema ta’ garanzija tad-depożiti fis-sens tad-Direttiva 2014/49/UE tal-Parlament Ewropew u tal-Kunsill tas‑16 ta’ April 2014 dwar skemi ta’ garanzija għal depożiti (ĠU 2014, L 173, p. 149).

72

Għandu jitfakkar, qabelxejn, li l-Artikolu 103(7) tad-Direttiva 2014/59 jipprevedi tmien fatturi li l-Kummissjoni għandha tieħu inkunsiderazzjoni għall-finijiet tal-aġġustament tal-kontribuzzjonijiet ex ante skont il-profil tar-riskju tal-istituzzjonijiet. Issa, għalkemm “l-espożizzjoni għar-riskju tal-istituzzjoni” huwa wieħed minn dawn il fatturi, b’mod li l-Kummissjoni hija obbligata tieħdu inkunsiderazzjoni waqt l-adozzjoni ta’ att iddelegat, bħalma huwa r-Regolament Delegat 2015/63, dan il-fattur jikkostitwixxi biss kriterju wieħed fost it-tmienja li l-Kummissjoni għandha tieħu inkunsiderazzjoni hija u tfassal tali att.

73

Sussegwentement, ma hemm xejn fl-Artikolu 103(7) tad-Direttiva 2014/59 li jindika li l-Kummissjoni hija marbuta tagħti iktar importanza lil wieħed jew iktar mill-fatturi msemmija fil-punt 72 iktar ’il fuq, bħall-espożizzjoni għar-riskju tal-istituzzjoni. Barra minn hekk, din id-dispożizzjoni ma tippreċiżax il-mod li bih il-Kummissjoni għandha tieħu inkunsiderazzjoni din l-espożizzjoni.

74

Fl-aħħar nett, u fi kwalunkwe każ, ir-rikorrenti ma stabbilixxietx li l-passiv fiduċjarju kien nieqes minn kull riskju fil-każ ta’ riżoluzzjoni.

75

Fil-fatt, fir-rigward, qabelxejn, tal-argument tar-rikorrenti li dan il-passiv ma joħloqx tali riskju fil-każ ta’ insolvenza, peress li l-attiv likwidu ta’ klijenti, miżmum fiduċjarjament, ikun protett mid-dritt Ġermaniż, għandu jiġi kkonstatat li r-rikorrenti ma kkontestatx id-dikjarazzjoni tas-SRB li dan id-dritt ma jagħtix protezzjoni speċjali lill-fondi tal-klijenti sakemm dawn ikunu fil-kont ta’ tranżitu.

76

F’dan ir-rigward, is-SRB spjega, mingħajr ma ġie kkontestat mir-rikorrenti, li l-fatt li dawn il-fondi jinżammu f’tali kont ta’ tranżitu żied ir-riskju assoċjat mal-passiv fiduċjarju, peress li dawn il-fondi ma ġewx immedjatament isseparati mill-fondi l-oħra tar-rikorrenti u ma kinux għalhekk protetti mid-dritt Ġermaniż fil-każ ta’ insolvenza.

77

Barra minn hekk, dwar dan il-punt, mir-rikors jirriżulta, u ġie kkonfermat ukoll mir-rikorrenti waqt is-seduta li, safejn jikkonċerna lilha, dawn il-fondi jiġu ttrasferiti f’kontijiet fiduċjarji kollettivi fi ħdan istituzzjonijiet ta’ investiment fil‑15 jew fit‑30 tax-xahar, u, b’hekk, il-fondi jistgħu jibqgħu fil-kont ta’ tranżitu għal terminu massimu ta’ ħmistax‑il jum mingħajr ma jkunu protetti mid-dritt Ġermaniż f’każ ta’ insolvenza.

78

Bl-istess mod, ir-rikorrenti ssostni, b’mod żbaljat, li l-passiv fiduċjarju ma ppreżenta ebda riskju mill-mument li fih il-fondi tal-klijenti jiġu ttrasferiti mill-kont ta’ tranżitu lill-istituzzjonijiet ta’ investiment, peress li, fil-każ ta’ falliment ta’ waħda minn dawn l-istituzzjonijiet, dawn il-fondi ikunu protetti mill-iskema ta’ garanzija tad-depożiti.

79

F’dan ir-rigward, ir-rikorrenti ma kkontestatx l-argument tas-SRB li, sabiex il-fondi tal-klijenti jkunu protetti mill-iskema ta’ garanzija tad-depożiti, huwa neċessarju li l-istituzzjonijiet ta’ investiment ikkonċernati jkollhom is-sede tagħhom fi Stat Membru u li l-klijenti ma jpoġġux iktar minn EUR 100000 f’tali istituzzjonijiet, b’mod li l-imsemmija protezzjoni tkun limitata kemm fuq il-livell territorjali kif ukoll fuq il-livell kwantitattiv.

80

Fid-dawl tal-premess, ir-rikorrenti ma stabbilixxietx li l-punt 11 tal-Artikolu 3, l-Artikolu 5(1)(e) u l-Artikolu 14(2) tar-Regolament Delegat 2015/63 kienu jmorru kontra l-Artikolu 103(7) tad-Direttiva 2014/59.

81

Ir-rikorrenti qiegħda essenzjalment ssostni li l-assenza ta’ esklużjoni tal-passiv fiduċjarju mill-kalkolu tal-kontribuzzjoni ex ante fil-punt 11 tal-Artikolu 3, fl-Artikolu 5(1)(e) u fl-Artikolu 14(2) tar-Regolament Delegat 2015/63 tmur kontra l-prinċipju ta’ ugwaljanza fit-trattament, inkwantu l-istituzzjonijiet ta’ kreditu, bħalma hija hi, jinsabu f’sitwazzjoni paragunabbli ma’ dik tal-impriżi ta’ investiment imsemmija f’dan l-Artikolu 5(1)(e) ta’ dan l-istess regolament delegat, iżda qegħdin jiġu ttrattati b’mod differenti.

82

Is-SRB jikkontesta dan l-argument.

83

Għandu jitfakkar li l-prinċipju ta’ ugwaljanza fit-trattament, bħala prinċipju ġenerali tad-dritt tal-Unjoni, jeżiġi li sitwazzjonijiet paragunabbli ma jiġux ittrattati b’mod differenti u li sitwazzjonijiet differenti ma jiġux ittrattati bl-istess mod, kemm‑il darba tali trattament ma jkunx oġġettivament iġġustifikat (sentenza tat‑3 ta’ Frar 2021, Fussl Modestraße Mayr, C‑555/19, EU:C:2021:89, punt 95).

84

Billi r-rikorrenti qiegħda tinvoka ksur tal-prinċipju ta’ ugwaljanza fit-trattament, hija hi li għandha tidentifika b’mod preċiż is-sitwazzjonijiet paragunabbli li hija tqis li ġew ittrattati b’mod differenti jew is-sitwazzjonijiet differenti li hija tqis li ġew ittrattati bl-istess mod (sentenza tat‑12 ta’ April 2013, Du Pont de Nemours (France) et vs Il‑Kummissjoni, T‑31/07, mhux ippubblikata, EU:T:2013:167, punt 311).

85

Skont ġurisprudenza stabbilita, in-natura paragunabbli ta’ tali sitwazzjonijiet għandha tiġi evalwata fid-dawl tal-elementi kollha li jikkaratterizzawhom. Dawn l-elementi għandhom, b’mod partikolari, jiġu ddeterminati u evalwati fid-dawl tas-suġġett u tal-għan tal-att li jagħmel id-distinzjoni inkwistjoni. Barra minn hekk, għandhom jittieħdu inkunsiderazzjoni l-prinċipji u l-għanijiet tal-qasam li taħtu jaqa’ dan l-att (ara s-sentenza tat‑3 ta’ Frar 2021, Fussl Modestraße Mayr, C‑555/19, EU:C:2021:89, punt 99 u l-ġurisprudenza ċċitata).

86

Fir-rigward tal-għan u tal-iskop tad-Direttiva 806/2014, tar-Regolament 806/2014 u tar-Regolament Delegat 2015/63, għandu jitfakkar li dawn l-atti jaqgħu fil-qasam tas-SRM, li nħoloq bil-għan li, konformement mal-premessa 12 tar-Regolament Nru 806/2014, jiżgura approċċ newtrali fit-trattament tal-istituzzjonijiet fi nkwiet finanzjarju, isaħħaħ l-istabbiltà tal-istituzzjonijiet fl-Istati Membri li jipparteċipaw fis-SRM u jipprevjeni l-possibbiltà ta’ tixrid ta’ kriżijiet lejn l-Istati Membri li ma jipparteċipawx f’dan il-mekkaniżmu, sabiex jiġi ffaċilitat il-funzjonament tas-suq intern kollu kemm hu.

87

Barra minn hekk, fir-rigward, b’mod iktar speċifiku, tad-dispożizzjonijiet tad-Direttiva 2014/59, tar-Regolament Nru 806/2014 u tar-Regolament Delegat 2015/63 li jistabbilixxu l-kontribuzzjonijiet ex ante, mill-punt 63 iktar ’il fuq jirriżulta li dawn tal-aħħar għandhom l-għan li jiggarantixxu, b’loġika ta’ ordni ta’ assigurazzjoni, li s-settur finanzjarju jipprovdi biżżejjed riżorsi finanzjarji lis-SRM sabiex ikun jista’ jwettaq il-funzjonijiet tiegħu u jħeġġeġ lill-istituzzjonijiet jadottaw modi ta’ funzjonament inqas riskjużi.

88

Huwa fid-dawl ta’ dawn il-prinċipji u għanijiet li għandu jiġi eżaminat, fl-ewwel lok, jekk l-istituzzjonijiet ta’ kreditu awtorizzati sabiex jeżerċitaw ukoll attivitajiet ta’ investiment, bħalma hija r-rikorrenti, jinsabux f’sitwazzjoni paragunabbli għal dik tal-impriżi ta’ investiment imsemmija fl-Artikolu 5(1)(e) tar-Regolament Delegat 2015/63 (iktar ’il quddiem l-“impriżi ta’ investiment”) fir-rigward tat-teħid inkunsiderazzjoni tal-passiv fiduċjarju għall-finijiet tal-kalkolu tal-kontribuzzjonijiet ex ante.

89

F’dan ir-rigward, għandu jiġi rrilevat li l-kontribuzzjonijiet ex ante huma intiżi sabiex jiffinanzjaw miżuri ta’ riżoluzzjoni li l-adozzjoni tagħhom hija suġġetta għall-kundizzjoni, li tirriżulta mill-Artikolu 18(1)(c) u (5) tar-Regolament Nru 806/2014, li tali miżura tkun neċessarja fl-interess pubbliku, jiġifieri li tippermetti li jintlaħaq, b’mod partikolari, l-għan — imsemmi fl-Artikolu 14(2)(b) ta’ dan ir-regolament — li jiġu evitati l-effetti negattivi sinjifikattivi li l-istralċ ta’ istituzzjoni jkollu fuq l-istabbiltà finanzjarja, b’mod partikolari billi tipprevjeni l-kontaġju, inkluż lill-infrastrutturi tas-suq, u billi żżomm id-dixxiplina fis-suq.

90

Issa, kif tindika l-premessa 4 tad-Direttiva 2019/2034, l-istituzzjonijiet ta’ kreditu u l-impriżi ta’ investiment ma joħolqux riskju paragunabbli fir-rigward tal-effetti dannużi li l-falliment tagħhom jista’ jkollu fuq l-istabbiltà finanzjarja, peress li, għall-kuntrarju tal-istituzzjonijiet ta’ kreditu, l-impriżi ta’ investiment ma għandhomx portafolli kbar ta’ self lill-individwi u lill-impriżi u ma jaċċettawx depożiti. Effettivament, il-fatt li jinżammu portafolli kbar ta’ depożiti u ta’ self lill-individwi u lill-impriżi u ta’ depożiti jwassal għal riskju għall-istabbiltà finanzjarja meta l-individwi jew l-impriżi debituri ma jirnexxilhomx, fuq skala kbira, jirrimborsaw l-ammonti mislufa lill-istituzzjonijiet ta’ kreditu kkonċernati jew meta jiġi rtirat ammont sinjifikattiv ta’ depożiti.

91

Dan huwa iktar u iktar il-każ peress li l-klijentela tal-istituzzjonijiet ta’ kreditu u tal-impriżi ta’ investiment hija differenti. Fil-fatt, kif isostni s-SRB, mingħajr ma ġie kkontradett dwar dan il-punt, il-klijentela tal-impriżi ta’ investiment hija magħmula minn persuni li jinqdew minn ċerti servizzi speċifiċi marbuta mal-istrumenti finanzjarji, liema konstatazzjoni hija kkonfermata mid-definizzjoni tal-kunċett ta’ “klijent” ta’ tali impriżi, li huwa mfisser fil-punt 9 tal-Artikolu 4(1) tad-Direttiva 2014/65. Mill-banda l-oħra, kif jirriżulta mill-punt 1 tal-Artikolu 4(1) tar-Regolament Nru 575/2013, l-istituzzjonijiet ta’ kreditu, inklużi dawk awtorizzati sabiex jeżerċitaw ukoll attivitajiet ta’ investiment, jirċievu depożiti u fondi oħra rimborsabbli mingħand il-pubbliku u jagħtu kreditu f’isimhom stess, b’mod li joffru s-servizzi tagħhom lil ċirku usa’ ta’ nies.

92

F’dawn iċ-ċirkustanzi, il-probabbiltà li istituzzjoni ta’ kreditu tkun is-suġġett ta’ riżoluzzjoni, skont l-Artikolu 18(1)(c) u (5) tar-Regolament Nru 806/2014, hija ogħla minn dik li impriża ta’ investiment tkun is-suġġett ta’ riżoluzzjoni, b’mod li dawn iż-żewġ kategoriji ta’ istituzzjonijiet ma jinsabux, f’dan ir-rigward, f’sitwazzjoni paragunabbli.

93

Bl-istess mod, is-sitwazzjoni ta’ dawn l-istituzzjonijiet ma hijiex paragunabbli fir-rigward tat-trattament tal-passiv fiduċjarju.

94

Dwar dan il-punt, ir-rikorrenti ma kkontestatx serjament li, skont l-Artikolu 84(2) tal-Wertpapierhandelsgesetz (il-Liġi dwar il-Kummerċ ta’ Titoli) tad‑9 ta’ Settembru 1998 (BGBl. 1998 I, p. 2708), l-impriżi ta’ investiment, li ma humiex awtorizzati jwettqu tranżazzjonijiet ta’ depożitu, huma obbligati li jisseparaw immedjatament il-fondi li jirċievu mingħand il-klijenti f’kontijiet fiduċjarji miftuħa ma’ istituzzjonijiet ta’ kreditu. Min-naħa l-oħra, istituzzjoni ta’ kreditu, bħalma hija r-rikorrenti, ma hijiex obbligata li tipproċedi b’dan il-mod fil-kuntest tal-eżerċizzju tal-attivitajiet ta’ investiment peress li, kif jirriżulta mill-kunsiderazzjonijiet imsemmija fil-punti 76 sa 77 iktar ’il fuq, hija ma hijiex marbuta tittrasferixxi l-imsemmija fondi mill-kont ta’ tranżitu lill-istituzzjonijiet ta’ investiment.

95

F’dawn iċ-ċirkustanzi, ir-rikorrenti ma stabbilixxietx li l-passiv fiduċjarju miżmum mill-impriżi ta’ investiment kien espost għal livell ta’ riskju paragunabbli ma’ dak tal-passiv fiduċjarju miżmum mill-istituzzjonijiet ta’ kreditu awtorizzati sabiex jeżerċitaw ukoll attivitajiet ta’ investiment, bħalma hija hi. Konsegwentement, ir-rikorrenti ma tistax issostni li s-sitwazzjoni tal-istituzzjonijiet ta’ kreditu awtorizzati sabiex jeżerċitaw ukoll attivitajiet ta’ investiment, bħalma hija hi, hija paragunabbli ma’ dik tal-impriżi ta’ investiment u li, għaldaqstant, dawn iż-żewġ tipi ta’ istituzzjonijiet għandhom jiġu ttrattati bl-istess mod fir-rigward tal-esklużjoni tal-passiv fiduċjarju għall-finijiet tal-kalkolu tal-kontribuzzjonijiet ex ante.

96

Fit-tieni lok, ir-rikorrenti ssostni li l-punt 11 tal-Artikolu 3 u l-Artikolu 14(2) tar-Regolament Delegat 2015/63 jintroduċu inugwaljanza fit-trattament bejn l-istituzzjonijiet li għandhom is-sede tagħhom fil-Ġermanja u dawk li għandhom is-sede tagħhom fi Stati Membri li nqdew mid-deroga prevista fit-tielet sentenza tal-Artikolu 10(1) tad-Direttiva 86/635.

97

F’dan ir-rigward, għandu jitfakkar li, skont il-punt (b) tat-tieni subparagrafu tal-Artikolu 70(2) tar-Regolament Nru 806/2014 u l-Artikolu 103(2) tad-Direttiva 2014/59, is-SRB għandu jikkalkola kontribuzzjoni annwali bażika għal kull istituzzjoni, kif indikat fil-punt 17 iktar ’il fuq. Din il-kontribuzzjoni hija approporzjon tal-ammont tal-passiv tal-istituzzjoni kkonċernata, minbarra l-fondi proprji u d-depożiti koperti, imqabbel mat-total tal-passiv, minbarra l-fondi proprji u d-depożiti koperti, ta’ kull istituzzjoni awtorizzata fit-territorji tal-Istati Membri li jipparteċipaw fis-SRM — fir-rigward tal-parti minn din il-kontribuzzjoni kkalkolata fuq il-bażi tal-Unjoni — u ta’ kull istituzzjoni awtorizzata fit-territorju tal-Istat Membru fejn l-istituzzjoni inkwistjoni għandha s-sede tagħha — fir-rigward tal-parti minn dik il-kontribuzzjoni kkalkolata fuq il-bażi nazzjonali.

98

Fir-rigward tad-determinazzjoni tal-passiv li għandu jittieħed inkunsiderazzjoni għall-finijiet ta’ dan il-kalkolu, għandu jitfakkar li l-punt 11 tal-Artikolu 3 tar-Regolament Delegat 2015/63 jiddefinixxi l-“obbligazzjonijiet totali” bħala l-“obbligazzjonijiet kif definit fit-Taqsima 3 tad-[Direttiva 86/635] […] jew kif definit skont l-Istandards Internazzjonali tar-Rapportar Finanzjarju msemmija fir-Regolament […] Nru 1606/2002 […]”.

99

Barra minn hekk, skont l-Artikolu 10(1) tad-Direttiva 86/635, li jagħmel parti mit-Taqsima 3 ta’ din id-direttiva, il-fondi li istituzzjoni tamministra f’isimha stess, iżda għall-benefiċċju ta’ ħaddieħor, għandhom jidhru, bħala regola ġenerali, fil-karta tal-bilanċ ta’ din l-istituzzjoni meta din tal-aħħar tkun detentriċi tal-attiv korrispondenti.

100

B’dan premess, it-tielet sentenza tal-Artikolu 10(1) tad-Direttiva 86/635 tipprovdi li l-Istati Membri jistgħu jippermettu lill-istituzzjonijiet ikkonċernati jindikaw dawn il-fondi barra l-karta tal-bilanċ bil-kundizzjoni li jkun hemm fis-seħħ sistema speċjali li tippermetti li, fil-każ ta’ stralċ ta’ istituzzjoni ta’ kreditu, l-imsemmija fondi jiġu esklużi mill-massa.

101

F’dan ir-rigward, il-partijiet iddikjaraw li, skont id-dispożizzjonijiet adottati mir-Repubblika Federali tal-Ġermanja sabiex tikkonforma ruħha mal-Artikolu 10 tad-Direttiva 86/635, il-passiv fiduċjarju ta’ istituzzjoni ta’ kreditu awtorizzata sabiex teżerċita attivitajiet ta’ investiment u li għandha s-sede tagħha f’dan l-Istat, bħalma hija r-rikorrenti, kellu jidher fuq il-karta tal-bilanċ ta’ din tal-aħħar.

102

Il-partijiet indikaw ukoll li ċerti Stati Membri kienu għamlu użu mill-possibbiltà mogħtija mit-tielet sentenza tal-Artikolu 10(1) tad-Direttiva 86/635 sabiex jippermettu lill-istituzzjonijiet li għandhom is-sede tagħhom f’dawn l-Istati li jindikaw, barra mill-karta tal-bilanċ, il-fondi amministrati f’isimhom stess, iżda għall-benefiċċju ta’ ħaddieħor.

103

Dan ifisser, fil-fehma tar-rikorrenti, li jekk istituzzjoni jkollha s-sede tagħha fi Stat Membru li jkun għamel użu mill-possibbiltà li toffri t-tielet sentenza tal-Artikolu 10(1) tad-Direttiva 86/635, huwa jista’ jindika l-passiv marbut ma’ tali attivitajiet fiduċjarji barra mill-karta tal-bilanċ, b’tali mod li dan il-passiv ma jitteħidx inkunsiderazzjoni sabiex tiġi kkalkolata l-kontribuzzjoni annwali bażika tagħha. Min-naħa l-oħra, il-passiv fiduċjarju tal-istituzzjonijiet li għandhom is-sede tagħhom fl-Istati Membri li ma jkunux użaw il-possibbiltà li jindikaw l-attiv u l-passiv fiduċjarju barra mill-karta tal-bilanċ, bħal fil-każ tal-Ġermanja, għandu jittieħed inkunsiderazzjoni għall-finijiet ta’ dan il-kalkolu.

104

B’hekk, il-konsegwenza deskritta fil-punt 103 iktar ’il fuq tirriżulta mill-applikazzjoni konġunta tal-punt (b) tat-tieni subparagrafu tal-Artikolu 70(2) tar-Regolament Nru 806/2014 u tal-Artikolu 103(2) tad-Direttiva 2014/59, moqrija fid-dawl tat-Taqsima 3 tad-Direttiva 86/635, u, b’mod partikolari, tat-tielet sentenza tal-Artikolu 10(1) tagħha, li tiddefinixxi l-kunċett ta’ “passiv” tal-istituzzjonijiet u tipprevedi l-possibbiltà għall-Istati Membri li jagħżlu regoli differenti fir-rigward tal-inklużjoni tal-passiv fiduċjarju fil-karta tal-bilanċ tal-istituzzjonijiet.

105

Issa, ir-rikorrenti ma kkontestatx il-validità ta’ dawn id-dispożizzjonijiet fid-dawl tal-prinċipju ta’ ugwaljanza fit-trattament.

106

Barra minn hekk, għalkemm l-argument tar-rikorrenti kellu jinftiehem fis-sens li hija qiegħda ssostni, fir-realtà, li l-punt 11 tal-Artikolu 3 u l-Artikolu 14(2) tar-Regolament Delegat 2015/63 jiksru l-prinċipju ta’ ugwaljanza fit-trattament minħabba li dawn id-dispożizzjonijiet ma jiħdux inkunsiderazzjoni d-differenza li teżisti bejn ir-regoli ta’ kontabbiltà tal-Istati Membri differenti fir-rigward tal-inklużjoni tal-passiv fiduċjarju fil-karta tal-bilanċ tal-istituzzjonijiet, għandu jiġi rrilevat li l-prinċipju ta’ ugwaljanza fit-trattament ma jistax jawtorizza lill-Kummissjoni, hija u tadotta atti ddelegati skont l-Artikolu 290 TFUE, li taġixxi lil hinn mid-delega mogħtija mil-leġiżlatur tal-Unjoni abbażi ta’ din id-dispożizzjoni tal-aħħar. Konsegwentement, ma hijiex il-Kummissjoni li għandha ssib soluzzjoni għad-diverġenzi fil-modalitajiet nazzjonali ta’ implimentazzjoni tad-dritt tal-Unjoni, sakemm ma tingħatax awtorizzazzjoni għal dan il-għan permezz ta’ att leġiżlattiv.

107

F’dan il-każ, la d-Direttiva 2014/59 u lanqas ir-Regolament Nru 806/2014 ma awtorizzaw lill-Kummissjoni tarmonizza r-regoli nazzjonali ta’ kontabbiltà li jikkonċernaw l-inklużjoni tal-passiv fiduċjarju fil-karta tal-bilanċ tal-istituzzjonijiet.

108

F’dawn iċ-ċirkustanzi, ir-rikorrenti ma tistax tikkritika lill-Kummissjoni talli kisret il-prinċipju ta’ ugwaljanza fit-trattament billi ma sabitx soluzzjoni għad-diverġenzi eżistenti fir-regoli nazzjonali ta’ kontabbiltà dwar l-inklużjoni ta’ dan il-passiv f’din il-karta tal-bilanċ.

109

Fi kwalunkwe każ, anki jekk jitqies li l-Kummissjoni setgħet tipprevedi, fil-punt 11 tal-Artikolu 3 tar-Regolament Delegat 2015/63, definizzjoni tal-passiv differenti minn dik li tinsab fit-Taqsima 3 tad-Direttiva 86/635, minn dan ma jirriżultax li l-punt 11 tal-Artikolu 3 ta’ dan ir-regolament delegat jikser il-prinċipju ta’ ugwaljanza fit-trattament.

110

Fil-fatt, mill-ġurisprudenza jirriżulta li l-projbizzjoni ta’ diskriminazzjoni ma tirrigwardax id-differenzi fit-trattament li jistgħu jirriżultaw, minn Stat Membru għal ieħor, mid-diverġenzi li jeżistu fil-leġiżlazzjonijiet tal-Istati Membri differenti, kemm‑il darba dawn il-leġiżlazzjonijiet ikunu jaffettwaw bl-istess mod lill-persuni kollha li jaqgħu taħt il-kamp ta’ applikazzjoni tagħhom (ara, f’dan is-sens, is-sentenzi tas‑16 ta’ Lulju 2009, Horvath, C‑428/07, EU:C:2009:458, punt 55, u tad‑19 ta’ Settembru 2013, Panellinios Syndesmos Viomichanion Metapoiisis Kapnou, C‑373/11, EU:C:2013:567, punt 35).

111

Għalkemm huwa minnu li dan il-prinċipju ġie żviluppat fil-kuntest tal-interpretazzjoni tad-dispożizzjonijiet tad-dritt tal-Unjoni sabiex tiġi evalwata l-kompatibbiltà tal-leġiżlazzjoni nazzjonali mal-prinċipju ta’ nondiskriminazzjoni, dan, madankollu, ma jistax ikun mod ieħor fir-rigward tal-evalwazzjoni tal-validità tad-dispożizzjoni tad-dritt tal-Unjoni li tagħti lill-Istati Membri marġni ta’ diskrezzjoni li abbażi tagħha huma jadottaw l-imsemmija leġiżlazzjonijiet differenti (sentenza tad‑19 ta’ Settembru 2013, Panellinios Syndesmos Viomichanion Metapoiisis Kapnou, C‑373/11, EU:C:2013:567, punt 36).

112

F’dan il-każ, ir-rikorrenti ma sostnietx, u wisq inqas uriet, li l-leġiżlazzjoni Ġermaniża kkonċernata ma kinitx taffettwa bl-istess mod lill-persuni kollha li jaqgħu fil-kamp ta’ applikazzjoni tagħha.

113

Barra minn hekk, l-adozzjoni ta’ leġiżlazzjoni tal-Unjoni f’qasam ta’ azzjoni partikolari jista’ jkollha riperkussjonijiet differenti għal ċerti operaturi ekonomiċi fid-dawl tas-sitwazzjoni individwali tagħhom jew tar-regoli nazzjonali li huma wkoll suġġetti għalihom, u tali konsegwenza ma tistax titqies li hija ksur tal-prinċipju ta’ ugwaljanza fit-trattament jekk l-imsemmija leġiżlazzjoni hija bbażata fuq kriterji oġġettivi u adattati għall-għanijiet imfittxija minnha (ara, f’dan is-sens u b’analoġija, is-sentenza tad‑19 ta’ Settembru 2013, Panellinios Syndesmos Viomichanion Metapoiisis Kapnou, C‑373/11, EU:C:2013:567, punt 34 u l-ġurisprudenza ċċitata).

114

F’dan ir-rigward, ir-rikorrenti ma pproduċiet ebda prova quddiem il-Qorti Ġenerali li minnha jirriżulta li l-punt 11 tal-Artikolu 3 tar-Regolament Delegat 2015/63, sa fejn jirreferi għat-Taqsima 3 tad-Direttiva 86/635, ma kienx ibbażat fuq kriterji oġġettivi u adattati għall-għanijiet imfittxija mir-Regolament Delegat 2015/63.

115

Għalhekk, l-argument tar-rikorrenti għandu jiġi miċħud.

116

Fit-tielet lok, ir-rikorrenti ssostni li hija ssib ruħha suġġetta għal inugwaljanza fit-trattament meta mqabbla mal-istituzzjonijiet ta’ kreditu li jfasslu l-karta tal-bilanċ tagħhom skont l-istandards internazzjonali ta’ kontabbiltà, filwaqt li hija ma tistax tfassal il-karta tal-bilanċ tagħha skont dawn l-istandards, peress li, skont il-leġiżlazzjoni Ġermaniża applikabbli, huma biss il-kumpanniji omm li għandhom id-dritt li jfasslu l-karta tal-bilanċ tagħhom esklużivament skont dawn l-istandards.

117

F’dan ir-rigward, minn naħa, għandu jiġi rrilevat li tali allegata inugwaljanza fit-trattament hija l-konsegwenza tal-applikazzjoni ta’ regola li toriġina mil-leġiżlazzjoni Ġermaniża applikabbli u mhux mill-punt 11 tal-Artikolu 3, l-Artikolu 5(1)(e) jew l-Artikolu 14(2) tar-Regolament Delegat 2015/63, li r-rikorrenti qiegħda tikkontesta l-validità tagħhom.

118

Min-naħa l-oħra, u fi kwalunkwe każ, kif tirrikonoxxi r-rikorrenti stess, hija setgħet tfassal il-kontijiet skont l-istandards internazzjonali ta’ kontabbiltà, iżda għażlet li ma tagħmilx dan għal raġunijiet amministrattivi u finanzjarji. F’dawn iċ-ċirkustanzi, ir-rikorrenti ma tistax tinvoka inugwaljanza fit-trattament għal din ir-raġuni.

119

Mill-premess jirriżulta li r-rikorrenti ma wrietx li l-punt 11 tal-Artikolu 3, l-Artikolu 5(1)(e) jew l-Artikolu 14(2) tar-Regolament Delegat 2015/63 kienu jiksru l-prinċipju ta’ ugwaljanza fit-trattament.

120

Konsegwentement, it-tnax‑il motiv għandu jiġi miċħud bħala infondat.

[omissis]

144

Ir-rikorrenti ssostni li, billi rrifjuta li jeskludi mill-kalkolu tal-kontribuzzjonijiet ex ante l-ammont tal-passiv fiduċjarju tagħha, is-SRB kiser l-Artikolu 5(1)(e) tar-Regolament Delegat 2015/63. L-argumenti mressqa insostenn ta’ dan il-motiv jinqasmu f’żewġ partijiet.

145

Ir-rikorrenti ssostni li, billi rrifjutat li teskludi mill-kalkolu tal-kontribuzzjonijiet ex ante l-ammont tal-passiv fiduċjarju tagħha, id-Deċiżjoni kkontestata tikser l-Artikolu 5(1)(e) tar-Regolament Delegat 2015/63.

146

Is-SRB jikkontesta dan l-argument.

147

Kif jirriżulta mill-punti 39 sa 52 iktar ’il fuq, l-Artikolu 5(1)(e) tar-Regolament Delegat 2015/63 għandu jiġi interpretat fis-sens li ma jippermettix li jiġi eskluż il-passiv fiduċjarju tar-rikorrenti mill-kalkolu tal-kontribuzzjoni ex ante tagħha.

148

F’dawn iċ-ċirkustanzi, is-SRB ma wettaqx żball ta’ liġi meta ma eskludiex l-ammont ta’ dan il-passiv mill-kalkolu tal-kontribuzzjoni ex ante tar-rikorrenti.

149

Konsegwentement, l-ewwel parti tal-ewwel motiv għandha tiġi miċħuda bħala infondata.

150

Ir-rikorrenti ssostni li, kemm‑il darba l-Artikolu 5(1)(e) tar-Regolament Delega 2015/63 kellu jiġi interpretat fis-sens li ma jippermettix l-esklużjoni tal-passiv fiduċjarju tagħha mill-kalkolu tal-kontribuzzjoni ex ante tagħha, l-għan ta’ dan ir-regolament delegat, kif ukoll il-prinċipji ta’ ugwaljanza fit-trattament u ta’ proporzjonalità, kienu jeżiġu li din id-dispożizzjoni tiġi applikata b’analoġija għas-sitwazzjoni tagħha.

151

Is-SRB jikkontesta dan l-argument.

152

Qabelxejn, għandu jitfakkar li, skont il-ġurisprudenza, l-applikazzjoni tal-Artikolu 5(1)(e) tar-Regolament Delegat 2015/63 għal sitwazzjonijiet li jistgħu jiġi ekwiparati għal dawk koperti minnu, anki jekk dawn ma jkunux jissodisfaw il-kundizzjonijiet kollha stabbiliti f’din id-dispożizzjoni, hija inkompatibbli mat-test tal-imsemmija dispożizzjoni (ara, f’dan is-sens, is-sentenza tat‑3 ta’ Diċembru 2019, Iccrea Banca, C‑414/18, EU:C:2019:1036, punt 92).

153

B’hekk, il-Qorti tal-Ġustizzja ddeċidiet li l-Artikolu 5(1) tar-Regolament Delegat 2015/63, ma kien jagħti setgħa diskrezzjonali lill-awtoritajiet kompetenti sabiex jeskludu ċertu passiv huma u jaġġustaw skont ir-riskju l-kontribuzzjonijiet ex ante msemmija fl-Artikolu 103(2) tad-Direttiva 2014/59, iżda kien jelenka, għall-kuntrarju, b’mod preċiż il-kundizzjonijiet li fihom ċertu passiv seta’ jiġi eskluż mill-kontribuzzjonijiet ex ante (ara, f’dan is-sens, is-sentenza tat‑3 ta’ Diċembru 2019, Iccrea Banca, C‑414/18, EU:C:2019:1036, punt 93).

154

Konsegwentement, għall-kuntrarju ta’ dak li ssostni r-rikorrenti, is-SRB ma wettaqx żball ta’ liġi meta ma applikax b’analoġija l-Artikolu 5(1)(e) tar-Regolament Delegat 2015/63.

155

It-teħid inkunsiderazzjoni tal-prinċipji ta’ ugwaljanza fit-trattament u ta’ proporzjonalità, invokati mir-rikorrenti, ma jistax jiġġustifika riżultat ieħor, peress li r-Regolament Delegat 2015/63 iddistingwa sitwazzjonijiet b’karatteristiċi speċifiċi, direttament marbuta mar-riskji inerenti għall-passiv inkwistjoni (sentenza tat‑3 ta’ Diċembru 2019, Iccrea Banca, C‑414/18, EU:C:2019:1036, punt 95).

156

Fi kwalunkwe każ, fid-dawl tal-kunsiderazzjonijiet imfissra fil-punti 83 sa 120 iktar ’il fuq, ir-rikorrenti ma tistax issostni li l-assenza ta’ applikazzjoni b’analoġija tal-Artikolu 5(1)(e) tar-Regolament Delegat 2015/63 tmur kontra l-prinċipju ta’ ugwaljanza fit-trattament.

157

L-istess konklużjoni tapplika fir-rigward tal-prinċipju ta’ proporzjonalità.

158

F’dan ir-rigward, mill-ġurisprudenza jirriżulta li l-prinċipju ta’ proporzjonalità, li jagħmel parti mill-prinċipji ġenerali tad-dritt tal-Unjoni, jeżiġi li l-atti tal-istituzzjonijiet tal-Unjoni jkunu xierqa sabiex jitwettqu l-għanijiet leġittimi li l-leġiżlazzjoni inkwistjoni tfittex li tilħaq u li ma jmorrux lil hinn mil-limiti ta’ dak li huwa neċessarju sabiex jitwettqu dawn l-għanijiet, filwaqt li meta jkun hemm l-għażla bejn diversi miżuri xierqa, għandha tintgħażel l-inqas waħda restrittiva, u li l-inkonvenjenzi li jinħolqu ma għandhomx ikunu sproporzjonati fid-dawl tal-għanijiet previsti (sentenzi tal‑4 ta’ Mejju 2016, Philip Morris Brands et, C‑547/14, EU:C:2016:325, punt 165, u tal‑20 ta’ Jannar 2021, ABLV Bank vs SRB, T‑758/18, EU:T:2021:28, punt 142; ara wkoll, f’dan is-sens, is-sentenza tat‑8 ta’ Ġunju 2010, Vodafone et, C‑58/08, EU:C:2010:321, punt 51).

159

Fir-rigward, qabelxejn, tal-adegwatezza li jittieħed inkunsiderazzjoni l-passiv fiduċjarju tar-rikorrenti fil-kalkolu tal-kontribuzzjoni ex ante tagħha, ir-rikorrenti ma tikkontestax, fl-ewwel lok, li l-inklużjoni tal-passiv fiduċjarju tagħha fil-kalkolu ta’ din il-kontribuzzjoni tgħin sabiex jitwettqu l-għanijiet tal-kontribuzzjonijiet ex ante, deskritti fil-punt 63 iktar ’il fuq, billi tipprovdi biżżejjed riżorsi finanzjarji lis-SRM sabiex dan ikun jista’ jwettaq il-funzjonijiet tiegħu u billi tħeġġeġ lill-istituzzjonijiet jadottaw modi ta’ funzjonament inqas riskjużi.

160

F’dan ir-rigward, ir-rikorrenti għamlet biss dikjarazzjonijiet mhux issostanzjati.

161

Fil-fatt, minn naħa, ir-rikorrenti ssostni li t-teħid inkunsiderazzjoni tal-passiv fiduċjarju tagħha fil-kalkolu tal-kontribuzzjoni ex ante tagħha jgħabbiha b’piż inaċċettabbli u manifestament sproporzjonat meta mqabbel mad-daqs tagħha. Issa, fid-dawl tal-kunsiderazzjonijiet imfissra fil-punti 39 sa 52 iktar ’il fuq, tali argument ma jistax jintlaqa’, peress li l-esklużjoni tal-passiv stabbilita fl-Artikolu 5(1)(e) tar-Regolament Delegat 2015/63 ma tiddependix mid-daqs tal-istituzzjonijiet ikkonċernati, iżda mill-osservanza tal-kundizzjonijiet stabbiliti f’din id-dispożizzjoni, liema kundizzjonijiet ma għandhom ebda rabta mad-daqs tagħhom.

162

Min-naħa l-oħra, ir-rikorrenti ssostni li l-inklużjoni tal-ammont tal-passiv fiduċjarju tagħha fil-kalkolu tal-passiv tagħha fil-waqt li tiġi ddeterminata l-kontribuzzjoni ex ante tagħha hija kuntrarja għall-kriterji stabbiliti fl-Artikolu 103(7) tad-Direttiva 2014/59. F’dan ir-rigward, huwa biżżejjed li jiġi kkonstatat li r-rikorrenti ma hijiex tispjega, b’mod suffiċjenti fid-dritt, ir-rabta bejn dan l-argument u l-prinċipju ta’ proporzjonalità.

163

Sussegwentement, fir-rigward tan-neċessità li jittieħed inkunsiderazzjoni l-passiv fiduċjarju tar-rikorrenti fil-kalkolu tal-kontribuzzjoni ex ante tagħha, fid-dawl tal-għanijiet imsemmija fil-punt 63 iktar ’il fuq, għandu jiġi kkonstatat li din tal-aħħar qiegħda essenzjalment tinvoka żewġ argumenti.

164

L-ewwel nett, ir-rikorrenti ssostni li t-teħid inkunsiderazzjoni tal-passiv fiduċjarju tagħha ma huwiex neċessarju, peress li l-fondi tal-klijenti diġà jinġabru fil-forma ta’ depożiti mill-istituzzjonijiet ta’ investiment u protetti mill-iskema ta’ garanzija tad-depożiti tagħhom u li jeżistu garanziji suffiċjenti sabiex dawn il-klijenti jkunu protetti mid-dritt applikabbli fil-qasam tal-insolvenza. Fil-fehma tagħha, it-teħid inkunsiderazzjoni tal-passiv fiduċjarju tagħha jwassal għall-possibbiltà, fil-kuntest tal-kalkolu tal-kontribuzzjoni ex ante tagħha, ta’ teħid inkunsiderazzjoni doppju ta’ dan il-passiv.

165

F’dan ir-rigward, ir-rikorrenti ma tispjegax, madankollu, liema metodu konkret ta’ kalkolu tal-kontribuzzjonijiet ex ante huwa inqas restrittiv għall-istituzzjonijiet u li jkun xieraq sabiex jintlaħqu, b’mod daqstantieħor effikaċi, l-għanijiet imsemmija fil-punt 63 iktar ’il fuq, billi jiġi kkumpensat, b’mod partikolari, it-tnaqqis fil-mezzi finanzjarji disponibbli fis-SRF ikkawżat minn tali esklużjoni.

166

Barra minn hekk, u fi kwalunkwe każ, ir-rikorrenti ma pproduċiet ebda prova li tista’ tikkontesta d-dikjarazzjoni tas-SRB, imsemmija fil-punt 79 iktar ’il fuq, li, sabiex il-fondi tal-klijenti jkunu protetti mill-iskema ta’ garanzija tad-depożiti, huwa neċessarju li l-istituzzjonijiet ta’ investiment ikkonċernati jkollhom is-sede tagħhom fi Stat Membru u li l-klijenti ma jpoġġux iktar minn EUR 100000 f’tali istituzzjonijiet.

167

Fl-aħħar nett, fir-rigward tal-argument tar-rikorrenti bbażat fuq il-fatt li t-teħid inkunsiderazzjoni tal-passiv fiduċjarju tagħha jwassal għal allegat teħid inkunsiderazzjoni doppju ta’ dan il-passiv fil-kuntest tal-kalkolu tal-kontribuzzjoni ex ante tagħha, huwa biżżejjed li jiġi kkonstatat li r-rikorrenti ma tressaq ebda argument li jindika li l-Kummissjoni kellha l-intenzjoni, permezz tal-Artikolu 5(1)(e) tar-Regolament Delegat 2015/63, telimina kompletament kull forma ta’ għadd doppju tal-passiv.

168

It-tieni nett, ir-rikorrenti ssostni li t-teħid inkunsiderazzjoni tal-passiv fiduċjarju tagħha fil-kalkolu tal-kontribuzzjoni ex ante tagħha ma jissodisfax il-kriterju ta’ neċessità, peress li, fil-każ ta’ insolvenza, il-klijenti tagħha jkollhom id-dritt għas-separazzjoni tal-attiv fiduċjarju ġestit minnha. Dan juri li jeżistu garanziji suffiċjenti ta’ protezzjoni ta’ dawn il-klijenti.

169

Minn naħa, dan l-argument għandu jiġi miċħud għall-istess raġunijiet bħal dawk imfissra fil-punt 165 iktar ’il fuq.

170

Min-naħa l-oħra, u fi kwalunkwe każ, ir-rikorrenti ma stabbilixxietx li, fil-każ ta’ insolvenza, l-attiv u l-attiv likwidu tal-klijenti tagħha jkunu koperti minn garanziji paragunabbli ma’ dawk li jkopru l-attiv u l-attiv likwidu tal-klijenti tal-impriżi ta’ investiment, kif indikat fil-punti 75 sa 77 iktar ’il fuq.

171

Fl-aħħar nett, ir-rikorrenti ma ppreżentat lill-Qorti Ġenerali ebda prova konkreta intiża sabiex jintwera li l-inklużjoni tal-passiv fiduċjarju tagħha fil-kalkolu tal-kontribuzzjoni ex ante tagħha twassal għal inkonvenjenzi manifestament sproporzjonati fid-dawl tal-għanijiet imsemmija fil-punt 63 iktar ’il fuq.

172

F’dawn iċ-ċirkustanzi, it-tieni parti tal-ewwel motiv u, għalhekk, dan il-motiv fl-intier tiegħu, għandhom jiġu miċħuda.

[omissis]

240

Preliminarjament, għandu jitfakkar li nuqqas jew insuffiċjenza ta’ motivazzjoni jikkostitwixxu motiv ta’ ordni pubbliku li jista’, jew li saħansitra għandu, jitqajjem ex officio mill-qorti tal-Unjoni (ara s-sentenza tat‑2 ta’ Diċembru 2009, Il‑Kummissjoni vs L‑Irlanda et, C‑89/08 P, EU:C:2009:742, punt 34 u l-ġurisprudenza ċċitata). Konsegwentement, il-Qorti Ġenerali tista’, jew saħansitra għandha, tieħu inkunsiderazzjoni wkoll nuqqasijiet oħra ta’ motivazzjoni minbarra dawk invokati mir-rikorrenti, u dan b’mod partikolari f’sitwazzjoni fejn dawn jirriżultaw matul il-proċedura.

241

F’dan il-każ, il-Qorti Ġenerali tqis li hija għandha teżamina ex officio jekk is-SRB naqasx mid-dmir ta’ motivazzjoni tiegħu fir-rigward tad-determinazzjoni tal-livell fil-mira annwali.

242

Għal dan il-għan, il-partijiet instemgħu, permezz ta’ miżura ta’ organizzazzjoni tal-proċedura u waqt is-seduta, dwar kull nuqqas ta’ motivazzjoni li jista’ jivvizzja d-Deċiżjoni kkontestata fir-rigward tad-determinazzjoni tal-livell fil-mira annwali.

243

B’dan premess, għandu jitfakkar li, skont l-Artikolu 69(1) tar-Regolament Nru 806/2014, fi tmiem il-perijodu inizjali ta’ tmien snin b’effett mill‑1 ta’ Jannar 2016 (iktar ’il quddiem il-“perijodu inizjali”), il-mezzi finanzjarji disponibbli fis-SRF għandhom jilħqu l-livell fil-mira finali, li jikkorrispondi għal mill-inqas 1 % tal-ammont tad-depożiti koperti ta’ kull istituzzjoni awtorizzata fit-territorju ta’ kull Stat Membru li jipparteċipa fis-SRM (iktar ’il quddiem il-“livell fil-mira finali”).

244

Skont l-Artikolu 69(2) tar-Regolament Nru 806/2014, matul il-perijodu inizjali, il-kontribuzzjonijiet ex ante għandhom jitqassmu b’mod kemm jista’ jkun uniformi fiż-żmien sakemm jintlaħaq il-livell fil-mira finali msemmi fil-punt 243 iktar ’il fuq, filwaqt li jittieħdu debitament inkunsiderazzjoni l-fażi taċ-ċiklu tan-negozju u l-impatt li l-kontribuzzjonijiet proċikliċi jistgħu jħallu fuq il-pożizzjoni finanzjarja tal-istituzzjonijiet.

245

L-Artikolu 70(2) tar-Regolament Nru 806/2014 jippreċiża li, kull sena, il-kontribuzzjonijiet dovuti minn kull istituzzjoni awtorizzata fit-territorju ta’ kull Stat Membru li jipparteċipa fis-SRM ma għandhomx jaqbżu 12.5 % tal-livell fil-mira finali.

246

Fir-rigward tal-metodu ta’ kalkolu tal-kontribuzzjonijiet ex ante, l-Artikolu 4(2) tar-Regolament Delegat 2015/63 jipprevedi li s-SRB għandu jiddetermina l-ammont tagħhom abbażi tal-livell fil-mira annwali, fid-dawl tal-livell fil-mira finali, u abbażi tal-ammont medju tad-depożiti koperti tas-sena ta’ qabel, ikkalkolat kull tliet xhur, għal kull istituzzjoni awtorizzata fit-territorju ta’ kull Stat Membru li jipparteċipa fis-SRM.

247

Bl-istess mod, skont l-Artikolu 4 tar-Regolament ta’ Implimentazzjoni 2015/81, is-SRB għandu jikkalkola l-kontribuzzjoni ex ante għal kull istituzzjoni abbażi tal-livell fil-mira annwali, liema livell għandu jiġi stabbilit fid-dawl tal-livell fil-mira finali u skont il-metodu spjegat fir-Regolament Delegat 2015/63.

248

F’dan il-każ, kif jirriżulta mill-premessa 48 tad-Deċiżjoni kkontestata, is-SRB iffissa, għall-perijodu ta’ kontribuzzjoni 2021, l-ammont tal-livell fil-mira annwali għal EUR 11287677212,56.

249

Fil-premessi 36 u 37 tad-Deċiżjoni kkontestata, is-SRB spjega, essenzjalment, li l-livell fil-mira annwali kellu jiġi ddeterminat abbażi ta’ analiżi tal-evoluzzjoni tad-depożiti koperti matul is-snin ta’ qabel, ta’ kull żvilupp rilevanti fis-sitwazzjoni ekonomika, kif ukoll abbażi ta’ analiżi dwar l-indikaturi relatati mal-fażi taċ-ċiklu tan-negozju u dwar l-effetti li l-kontribuzzjonijiet proċikliċi jkollhom fuq is-sitwazzjoni finanzjarja tal-istituzzjonijiet. Sussegwentement, is-SRB qies xieraq li jiġi ffissat koeffiċjent ibbażat fuq din l-analiżi u fuq il-mezzi finanzjarji disponibbli fis-SRF (iktar ’il quddiem il-“koeffiċjent”). Is-SRB applika dan il-koeffiċjent għal wieħed minn tmienja tal-ammont medju tad-depożiti koperti fl‑2020, sabiex jinkiseb il-livell fil-mira annwali.

250

Fil-premessi 38 sa 47 tad-Deċiżjoni kkontestata, is-SRB fisser il-mod kif ġie ffissat il-koeffiċjent.

251

Fil-premessa 38 tad-Deċiżjoni kkontestata, is-SRB ikkonstata tendenza kontinwa ta’ żieda fid-depożiti koperti għall-istituzzjonijiet kollha tal-Istati Membri li jipparteċipaw fis-SRM. B’mod partikolari, l-ammont medju ta’ dawn id-depożiti, ikkalkolat kull tliet xhur, għas-sena 2020, kien jammonta għal EUR 6.689 triljun.

252

Fil-premessi 40 u 41 tad-Deċiżjoni kkontestata, is-SRB ippreżenta l-evoluzzjoni mbassra tad-depożiti koperti għat-tliet snin li kien jifdal mill-perijodu inizjali, jiġifieri mill‑2021 sal‑2023. Huwa qies li r-rati annwali ta’ żieda fid-depożiti koperti sal-aħħar tal-perijodu inizjali kienu bejn 4 % u 7 %.

253

Fil-premessi 42 sa 45 tad-Deċiżjoni kkontestata, is-SRB ippreżenta evalwazzjoni tal-fażi taċ-ċiklu tan-negozju u tal-effett proċikliku li l-kontribuzzjonijiet ex ante jista’ jkollhom fuq is-sitwazzjoni finanzjarja tal-istituzzjonijiet. Sabiex isir dan, huwa indika li ħa inkunsiderazzjoni diversi indikaturi, bħall-previżjoni taż-żieda fil-prodott domestiku gross tal-Kummissjoni u bħall-projezzjonijiet tal-Bank Ċentrali Ewropew f’dan ir-rigward, jew bħall-fluss ta’ kreditu tas-settur privat f’perċentwali tal-prodott domestiku gross.

254

Fil-premessa 46 tad-Deċiżjoni kkontestata, is-SRB ikkonkluda li, għalkemm kien raġonevoli li wieħed jistenna li jkomplu jiżdiedu d-depożiti koperti fi ħdan l-unjoni bankarja, ir-ritmu ta’ din iż-żieda jkun inqas minn dak tal‑2020. F’dan ir-rigward, is-SRB indika, fil-premessa 47 tad-Deċiżjoni kkontestata, li adotta “approċċ prudenti” fir-rigward tar-rati ta’ żieda fid-depożiti koperti għas-snin li ġejjin sal‑2023.

255

Fid-dawl ta’ dawn il-kunsiderazzjonijiet, is-SRB, fil-premessa 48 tad-Deċiżjoni kkontestata, iffissa l-valur tal-koeffiċjent għal 1.35 %. Huwa kkalkola mbagħad l-ammont tal-livell fil-mira annwali, billi mmultiplika l-ammont medju tad-depożiti koperti fl‑2020 b’dan il-koeffiċjent u billi ddivida bi tmienja r-riżultat ta’ dan il-kalkolu, konformement mal-formula matematika li ġejja, li tinsab fil-premessa 48 tal-imsemmija deċiżjoni:

“Mira0 [ammont tal-livell fil-mira annwali] = Total tad-depożiti koperti2020 * 0.0135 * ⅛ = EUR 11287677212,56”.

256

Madankollu, waqt is-seduta, is-SRB indika li huwa kien iddetermina l-livell fil-mira annwali għall-perijodu ta’ kontribuzzjoni 2021 bil-mod kif ġej.

257

L-ewwel nett, is-SRB iffissa, abbażi ta’ analiżi prospettiva, l-ammont tad-depożiti koperti ta’ kull istituzzjoni awtorizzata fit-territorju tal-Istati Membri li jipparteċipaw fis-SRM, imbassar sal-aħħar tal-perijodu inizjali, għal madwar EUR 7.5 triljun. Sabiex jasal għal dan l-ammont, is-SRB ħa inkunsiderazzjoni l-ammont medju tad-depożiti koperti fl‑2020, jiġifieri EUR 6.689 triljun, rata ta’ żieda annwali fid-depożiti koperti ta’ 4 %, kif ukoll in-numru ta’ perijodi ta’ kontribuzzjoni li kien għad jifdal sa tmiem il-perijodu inizjali, jiġifieri tlieta.

258

It-tieni nett, skont l-Artikolu 69(1) tar-Regolament Nru 806/2014, is-SRB ikkalkola 1 % ta’ dawn is-EUR 7.5 triljun sabiex jasal għall-ammont stmat tal-livell fil-mira finali li kellu jintlaħaq fil‑31 ta’ Diċembru 2023, jiġifieri madwar EUR 75 biljun.

259

It-tielet nett, is-SRB naqqas minn dan l-ammont tal-aħħar ir-riżorsi finanzjarji diġà disponibbli fis-SRF fl‑2021, jiġifieri madwar EUR 42 biljun, sabiex wasal għall-ammont li kien baqa’ jirċievi matul il-perijodi ta’ kontribuzzjoni li kien għad fadal qabel tmiem il-perijodu inizjali, jiġifieri mill‑2021 sal‑2023. Dan l-ammont tela’ għal madwar EUR 33 biljun.

260

Ir-raba’ nett, is-SRB iddivida dan l-ammont tal-aħħar bi tlieta sabiex iqassmu b’mod uniformi bejn l-imsemmija tliet perijodi ta’ kontribuzzjoni li kien għad fadal. B’hekk, il-livell fil-mira annwali għall-perijodu ta’ kontribuzzjoni 2021 ġie iffissat għall-ammont imsemmi fil-punt 248 iktar ’il fuq, jiġifieri madwar EUR 11.287 biljun.

261

Is-SRB iddikjara wkoll, waqt is-seduta, li huwa kien ippubblika informazzjoni li fuqha kien ġie bbażat il-metodu deskritt fil-punti 257 sa 260 iktar ’il fuq u li, abbażi tagħha, ir-rikorrenti seta’ jifhem il-metodu li permezz tiegħu ġie ddeterminat il-livell fil-mira annwali. B’mod partikolari, huwa ppreċiża li kien ippubblika fis-sit internet tiegħu, f’Mejju 2021, jiġifieri wara li ttieħdet id-Deċiżjoni kkontestata, iżda qabel ma ġie ppreżentat dan ir-rikors, skeda informattiva msejħa “Fact Sheet 2021” (iktar ’il quddiem l-“iskeda informattiva”), li kienet tindika l-ammont stmat tal-livell fil-mira finali. Bl-istess mod, is-SRB iddikjara li l-ammont tal-mezzi finanzjarji disponibbli fis-SRF kien ukoll disponibbli fuq is-sit internet tiegħu, kif ukoll fuq sorsi pubbliċi oħra, u dan ferm qabel ma ttieħdet id-Deċiżjoni kkontestata.

262

Fir-rigward tal-kontenut tal-obbligu ta’ motivazzjoni, mill-ġurisprudenza jirriżulta li l-motivazzjoni ta’ deċiżjoni meħuda minn istituzzjoni jew korp tal-Unjoni għandha tkun, b’mod partikolari, nieqsa minn kontradizzjonijiet sabiex il-persuni kkonċernati jkunu jistgħu jsiru jafu r-raġunijiet veri għal din id-deċiżjoni u sabiex ikunu jistgħu jiddefendu d-drittijiet tagħhom quddiem il-qorti kompetenti, u sabiex din tal-aħħar tkun tista’ teżerċita l-istħarriġ tagħha (ara, f’dan is-sens, is-sentenzi tal‑10 ta’ Lulju 2008, Bertelsmann u Sony Corporation of America vs Impala, C‑413/06 P, EU:C:2008:392, punt 169 u l-ġurisprudenza ċċitata; tat‑22 ta’ Settembru 2005, Suproco vs Il‑Kummissjoni, T‑101/03, EU:T:2005:336, punti 20 u 45 sa 47, u tas‑16 ta’ Diċembru 2015, Il‑Greċja vs Il‑Kummissjoni, T‑241/13, EU:T:2015:982, punt 56).

263

Bl-istess mod, meta, matul il-proċedura quddiem il-qorti tal-Unjoni, l-awtur tad-Deċiżjoni kkontestata jagħti ċerti spjegazzjonijiet dwar ir-raġunijiet għal din id-deċiżjoni, dawn l-ispjegazzjonijiet għandhom ikunu konsistenti mal-kunsiderazzjonijiet imfissra f’din id-deċiżjoni (ara, f’dan is-sens, is-sentenzi tat‑22 ta’ Settembru 2005, Suproco vs Il‑Kummissjoni, T‑101/03, EU:T:2005:336, punti 45 sa 47, u tat‑13 ta’ Diċembru 2016, Printeos et vs Il‑Kummissjoni, T‑95/15, EU:T:2016:722, punti 54 u 55).

264

Fil-fatt, jekk il-kunsiderazzjonijiet imfissra fid-Deċiżjoni kkontestata ma jkunux konsistenti ma’ tali spjegazzjonijiet mogħtija matul il-proċedura ġudizzjarja, il-motivazzjoni tad-deċiżjoni kkonċernata ma taqdix il-funzjonijiet imfakkra fil-punti 217 u 218 iktar ’il fuq. B’mod partikolari, tali inkonsistenza żżomm, minn naħa, lill-persuni kkonċernati milli jkunu jafu, qabel il-preżentata tar-rikors, ir-raġunijiet veri għad-Deċiżjoni kkontestata, u milli jippreparaw id-difiża tagħhom fir-rigward ta’ dawn ir-raġunijiet u żżomm ukoll, min-naħa l-oħra, lill-qorti tal-Unjoni milli tidentifika r-raġunijiet li jkunu servew bħala bażi legali vera għal din id-deċiżjoni u milli teżamina l-konformità tagħhom mar-regoli applikabbli.

265

Fl-aħħar nett, għandu jitfakkar li, meta s-SRB jieħu deċiżjoni li tiddetermina l-kontribuzzjonijiet ex ante, huwa għandu jgħarraf lill-istituzzjonijiet ikkonċernati bil-metodu ta’ kalkolu ta’ dawn il-kontribuzzjonijiet (ara s-sentenza tal‑15 ta’ Lulju 2021, Il‑Kummissjoni vs Landesbank Baden‑Württemberg u SRB, C‑584/20 P u C‑621/20 P, EU:C:2021:601, punt 122).

266

L-istess għandu japplika għall-metodu ta’ determinazzjoni tal-livell fil-mira annwali, peress li dan l-ammont għandu importanza essenzjali fl-istruttura ta’ tali deċiżjoni. Fil-fatt, kif jirriżulta mill-Artikolu 4 tar-Regolament ta’ Implimentazzjoni 2015/81, il-metodu ta’ kalkolu tal-kontribuzzjonijiet ex ante jikkonsisti fit-tqassim tal-imsemmi ammont bejn l-istituzzjonijiet ikkonċernati kollha, b’tali mod li żieda jew tnaqqis f’dan l-istess ammont iwassal għal żieda jew tnaqqis korrispondenti fil-kontribuzzjoni ex ante ta’ kull waħda minn dawn l-istituzzjonijiet.

267

Mill-premess jirriżulta li, għalkemm is-SRB huwa marbut jagħti lill-istituzzjonijiet, permezz tad-Deċiżjoni kkontestata, spjegazzjonijiet dwar il-metodu ta’ determinazzjoni tal-livell annwali fil-mira, dawn l-ispjegazzjonijiet għandhom ikunu konsistenti mal-ispjegazzjonijiet mogħtija mis-SRB matul il-proċedura ġudizzjarja u għandhom jirrigwardaw il-metodu effettivament applikat.

268

Madankollu, dan ma huwiex il-każ f’din il-kawża.

269

Fil-fatt, għandu jiġi rrilevat, qabelxejn, li d-Deċiżjoni kkontestata fissret, fil-premessa 48, formula matematika li hija ppreżentat bħala l-bażi tad-determinazzjoni tal-livell fil-mira annwali. Madankollu, jirriżulta li din il-formula ma tinkludix l-elementi tal-metodu effettivament applikat mis-SRB, kif spjegat waqt is-seduta. Fil-fatt, kif jirriżulta mill-punti 257 sa 260 iktar ’il fuq, is-SRB wasal għall-ammont tal-livell fil-mira annwali, fil-kuntest ta’ dan il-metodu, billi naqqas mil-livell fil-mira finali l-mezzi finanzjarji disponibbli fis-SRF, sabiex jikkalkola l-ammont li kien għad irid jinġabar sa tmiem il-perijodu inizjali, u billi ddivida dan l-ammont tal-aħħar bi tlieta. Issa, dawn iż-żewġ stadji tal-kalkolu ma jissemmew imkien fl-imsemmija formula matematika.

270

Barra minn hekk, din il-konstatazzjoni ma tistax titqiegħed f’dubju mid-dikjarazzjoni tas-SRB li, f’Mejju 2021, huwa ppubblika l-iskeda informattiva, li kienet tinkludi firxa li tindika l-ammonti possibbli tal-livell fil-mira finali u, fuq is-sit internet tiegħu, l-ammont tal-mezzi finanzjarji disponibbli fis-SRF. Fil-fatt, indipendentement mill-kwistjoni dwar jekk ir-rikorrenti kinitx effettivament taf b’dawn l-ammonti, dawn tal-aħħar ma kinux, waħedhom, ta’ natura li jippermettulha tifhem li ż-żewġ kalkoli imsemmija fil-punt 269 iktar ’il fuq kienu ġew effettivament applikati mis-SRB, filwaqt li, barra minn hekk, il-formula matematika prevista fil-premessa 48 tad-Deċiżjoni kkontestata lanqas biss semmiethom.

271

Inkonsistenzi simili jaffettwaw ukoll il-mod li bih ġie ffissat il-koeffiċjent ta’ 1.35 %, li, madankollu, jaqdi rwol importanti fil-formula matematika msemmija fil-punt 255 iktar ’il fuq. Fil-fatt, dan il-koeffiċjent jista’ jinftiehem fis-sens li huwa bbażat, fost parametri oħra, fuq iż-żieda mbassra fid-depożiti koperti matul is-snin li jifdal mill-perijodu inizjali. Issa, kif irrikonoxxa s-SRB matul is-seduta, dan il-koeffiċjent ġie ffissat b’mod li jkun jista’ jiġġustifika r-riżultat tal-kalkolu tal-ammont tal-livell fil-mira annwali, jiġifieri wara li s-SRB ikun ikkalkola dan l-ammont b’applikazzjoni tal-erba’ stadji mfissra fil-punti 257 sa 260 iktar ’il fuq u, b’mod partikolari, billi jiddividi bi tlieta l-ammont li jirriżulta mit-tnaqqis tal-mezzi finanzjarji disponibbli fis-SRF mil-livell fil-mira finali. Issa, dan l-approċċ b’ebda mod ma jirriżulta mid-Deċiżjoni kkontestata.

272

Barra minn hekk, għandu jitfakkar li, skont l-iskeda informattiva, l-ammont tal-livell fil-mira finali stmat kien bejn EUR 70 u EUR 75 biljun. Issa, jirriżulta li din il-firxa hija inkonsistenti mal-firxa tar-rata ta’ żieda fid-depożiti koperti ta’ bejn 4 % u 7 % li tinsab fil-premessa 41 tad-Deċiżjoni kkontestata. Fil-fatt, is-SRB indika waqt is-seduta li, sabiex jiġi ddeterminat il-livell fil-mira annwali, huwa kien ħa inkunsiderazzjoni r-rata ta’ żieda fid-depożiti koperti ta’ 4 % – li kienet l-iktar rata baxxa tat-tieni firxa – u li, b’hekk, kien wasal għal-livell fil-mira finali stmat ta’ EUR 75 biljun – li kien l-ogħla valur tal-ewwel firxa. B’hekk, jirriżulta li jeżisti nuqqas ta’ qbil bejn dawn iż-żewġ firxiet. Fil-fatt, minn naħa, il-firxa li tirrigwarda r-rata ta’ evoluzzjoni tad-depożiti koperti tinkludi wkoll valuri ogħla mir-rata ta’ 4 %, li l-applikazzjoni tagħhom wasslet, madankollu, għal ammont stmat tal-livell fil-mira finali ogħla minn dawk l-ammonti inklużi fil-firxa relatata ma’ dan il-livell fil-mira. Min-naħa l-oħra, huwa impossibbli għar-rikorrenti li tifhem ir-raġuni għaliex is-SRB inkluda ammonti ta’ inqas minn EUR 75 biljun fil-firxa relatata mal-imsemmi livell fil-mira. Fil-fatt, sabiex jasal għalihom, kien meħtieġ li tiġi applikata rata ta’ inqas minn 4 %, li, madankollu, ma hijiex inkluża fil-firxa relatata mar-rata ta’ żieda fid-depożiti koperti. F’dawn iċ-ċirkustanzi, ir-rikorrenti ma kinitx f’pożizzjoni li tiddetermina l-mod kif is-SRB kien uża l-firxa li tirrigwarda r-rata ta’ evoluzzjoni ta’ dawn id-depożiti sabiex jasal għall-kalkolu tal-livell fil-mira finali stmat.

273

Dan ifisser li, fir-rigward tad-determinazzjoni tal-livell fil-mira annwali, il-metodu effettivament applikat mis-SRB, kif spjegat waqt is-seduta, ma jikkorrispondix għal dak deskritt fid-Deċiżjoni kkontestata, b’mod li r-raġunijiet veri, li fid-dawl tagħhom ġie ffissat dan il-livell fil-mira, ma setgħux jiġu identifikati abbażi tad-Deċiżjoni kkontestata la mill-istituzzjonijiet u lanqas mill-Qorti Ġenerali.

274

Fid-dawl tal-premess, għandu jiġi kkonstatat li d-Deċiżjoni kkontestata hija vvizzjata b’nuqqasijiet ta’ motivazzjoni fir-rigward tad-determinazzjoni tal-livell fil-mira annwali. Konsegwentement, id-Deċiżjoni kkontestata għandha tiġi annullata għal din ir-raġuni.

275

Wara eżami ex officio mwettaq mill-Qorti Ġenerali, għandu jiġi kkonstatat li d-Deċiżjoni kkontestata hija vvizzjata b’difetti ta’ motivazzjoni fir-rigward tad-determinazzjoni tal-livell fil-mira annwali. Peress li dawn il-vizzji huma, waħedhom, ta’ natura li jiġġustifikaw l-annullament ta’ din id-deċiżjoni, hemm lok li din tal-aħħar tiġi annullata, sa fejn din tikkonċerna lir-rikorrenti.

[omissis]

Għal dawn il-motivi,

IL‑QORTI ĠENERALI (It‑Tmien Awla Estiża)

taqta’ u tiddeċiedi: