–

għal Pfizer Consumer Healthcare Ltd, minn V. Sloane, QC, L. Catrain González, abogada, E. Wright, barrister, u R. Shiers, solicitor,

–

għall-Commissioners for Her Majesty’s Revenue and Customs, minn H. Watkinson, barrister, u A. Beegun, solicitor,

–

għall-Gvern tar-Renju Unit, minn S. Brandon, bħala aġent, assistit minn H. Watkinson, barrister,

–

għall-Kummissjoni Ewropea, minn A. Caeiros u J. Hradil kif ukoll minn M. Salyková, bħala aġenti,

1

It-talba għal deċiżjoni preliminari tirrigwarda l-validità tar-Regolament ta’ Implimentazzjoni tal-Kummissjoni (UE) 2016/1140 tat-8 ta’ Lulju 2016 dwar il-klassifikazzjoni ta’ ċerti prodotti fin-Nomenklatura Magħquda (ĠU 2016, L 189, p. 1).

2

Din it-talba tressqet fil-kuntest ta’ tilwima bejn Pfizer Consumer Healthcare Ltd (iktar ’il quddiem “Pfizer”) u l-Commissioners for Her Majesty’s Revenue and Customs (l-Amministrazzjoni tat-Taxxa u tad-Dwana, ir-Renju Unit, iktar ’il quddiem l-“Amministrazzjoni tat-Taxxa”), rigward il-klassifikazzjoni tariffarja ta’ kumpressi u ta’ ċinturini li jisħnu waħedhom intiżi sabiex itaffu l-uġigħ.

3

In-Nomenklatura Magħquda, stabbilita permezz tar-Regolament tal-Kunsill (KEE) Nru 2658/87 tat-23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (ĠU Edizzjoni Speċjali bil-Malti, Kapitolu 2, Vol. 2, p. 382) (iktar ’il quddiem in-“NM”), hija bbażata fuq is-sistema armonizzata għad-deskrizzjoni u kodifikazzjoni ta’ merkanzija, imfassla milll-Kunsill ta’ Kooperazzjoni Doganali, li sar l-Organizzazzjoni Dinjija tad-Dwana (ODD), u stabbilita permezz tal-Konvenzjoni Internazzjonali dwar is-Sistema Armonizzata, konkluża fi Brussell fl-14 ta’ Ġunju 1983. Din il-konvenzjoni ġiet approvata, bil-Protokoll ta’ Emenda tagħha tal-24 ta’ Ġunju 1986, f’isem il-Komunità Ekonomika Ewropea, permezz tad-Deċiżjoni tal-Kunsill 87/369/KEE tas-7 ta’ April 1987 (ĠU Edizzjoni Speċjali bil-Malti, Kapitolu 2, Vol. 2, p. 288).

4

Ir-regoli ġenerali għall-interpretazzjoni tan-NM, li jinsabu fit-Taqsima A tat-Titolu I tal-Ewwel Parti tagħha, jipprevedu b’mod partikolari:

“Il-klassifikazzjoni ta’ oġġetti fin-[NM] għandha tkun irregolata mill-prinċipji li ġejjin:

[…]

5

It-Tieni Parti tan-NM, intitolata “Skeda ta’ Dazji tad-Dwana”, tinkludi t-Taqsima VI, intitolata hija nnifisha “Prodotti tal-Industrija Kimika jew Dawk Relatati Magħha”.

6

Fit-Taqsima VI tan-NM jinstabu, b’mod partikolari, il-Kapitlu 30, intitolat “Prodotti Farmaċewtiċi”, kif ukoll il-Kapitlu 38, intitolat “Diversi Prodotti Kimiċi”.

7

Il-Kapitlu 30 tan-NM jinkludi l-intestatura 3005, li hija fformulata kif ġej:

“Tajjar, garża, faxex u oġġetti simili (per eżempju, infaxxar, stikk li jeħel, ġbajjar), mimlijin jew miksijin b’sustanzi farmaċewtiċi jew ippreżentati f’forom jew f’pakki għal bejgħ bl-imnut għal għanijiet mediċi, kirurġiċi, dentali jew veterinarji”.

8

Il-Kapitlu 38 tan-NM jinkludi l-intestatura 3824, li hija fformulata kif ġej:

“Materjali li jgħaqqdu ppreparati għal forom jew ċentri ta’ funderija; prodotti u preparazzjonijiet kimiċi ta’ l-industriji kimiċi jew li għandhom x’jaqsmu magħhom (inklużi dawk li jikkonsistu f’taħlitiet ta’ prodotti naturali), mhux speċifikati jew inklużi band’oħra”.

9

L-intestatura 3824 ta’ dan il-Kapitlu 30, fil-verżjoni tagħha li tirriżulta mir-Regolament ta’ Implimentazzjoni tal-Kummissjoni (UE) 2015/1754 tas-6 ta’ Ottubru 2015 (ĠU 2015, L 285, p. 1), applikabbli fid-data tad-dħul fis-seħħ tar-Regolament ta’ Implimentazzjoni 2016/1140, kienet tinkludi s-subintestaturi li ġejjin:

10

Skont l-Artikolu 57 tar-Regolament (UE) Nru 952/2013 tal-Parlament Ewropew u tal-Kunsill tad-9 ta’ Ottubru 2013 li jistabbilixxi l-Kodiċi Doganali tal-Unjoni (ĠU 2013, L 269, p. 1, rettifika fil-ĠU 2013, L 287, p. 90, iktar ’il quddiem il-“Kodiċi Doganali”):

“1.   Għall-applikazzjoni tat-Tariffa Doganali Komuni, il-klassifikazzjoni tariffarja tal-merkanzija għandha tikkonsisti fid-determinazzjoni ta’ waħda mis-subintestaturi jew sottodiviżjonijiet ulterjuri tan-Nomenklatura Magħquda li taħtha ser tiġi kklassifikata dik il-merkanzija.

2.   Għall-applikazzjoni ta’ miżuri mhux tariffarji, il-klassifikazzjoni tariffarja tal-merkanzija għandha tikkonsisti fid-determinazzjoni ta’ waħda mis-subintestaturi jew sottodiviżjonijiet ulterjuri tan-Nomenklatura Magħquda, jew ta’ kwalunkwe nomenklatura oħra li hi stabbilita mid-provvedimenti tal-Unjoni u li hi għalkollox jew parzjalment ibbażata fuq in-Nomenklatura Magħquda jew li tipprovdi sottodiviżjonijiet ulterjuri fiha, li taħtha ser tiġi kklassifikata dik il-merkanzija.

[…]

4.   Il-Kummissjoni [Ewropea] tista’ tadotta miżuri biex tiddetermina l-klassifikazzjoni tariffarja tal-merkanzija skont il-paragrafi 1 u 2.”

11

L-ewwel subparagrafu tal-Artikolu 58(2) tal-Kodiċi Doganali jipprevedi:

“Il-Kummissjoni għandha tadotta, permezz ta’-atti ta’ implimentazzjoni, il-miżuri msemmija fl-Artikolu 57(4).”

12

L-Artikolu 285(1) ta’ da il-kodiċi jispeċifika:

“Il-Kummissjoni għandha tkun mgħejuna mill-Kumitat dwar il-Kodiċi Doganali. […]”

13

Ir-Regolament ta’ Implimentazzjoni 2016/1140 ġie adottat mill-Kummissjoni abbażi tal-Artikolu 57(4), u l-ewwel subparagrafu tal-Artikolu 58(2) tal-Kodiċi Doganali.

14

L-Artikolu 1 ta’ dan ir-regolament ta’ implimentazzjoni jipprevedi:

“Il-prodotti deskritti fil-kolonna (1) tat-tabella stabbilita fl-Anness għandhom jiġu kklassifikati fin-[NM] taħt il-kodiċi NM indikat fil-kolonna (2) ta’ dik it-tabella.”

15

L-anness tal-imsemmi regolament ta’ implimentazzjoni huwa fformulat kif ġej:

16

Il-mezzi mediċi li jaqgħu taħt id-Direttiva tal-Kunsill 93/42/KEE tal-14 ta’ Ġunju 1993 dwar mezzi mediċi (ĠU Edizzjoni Speċjali bil-Malti, Kapitolu 13, Vol. 12, p. 82), kif emendata bid-Direttiva 2007/47/KE tal-Parlament Ewropew u tal-Kunsill tal-5 ta’ Settembru 2007 (ĠU 2007, L 247, p. 21) (iktar ’il quddiem id-“Direttiva 93/42”), huma ddefiniti fl-Artikolu 1(2)(a) ta’ din id-direttiva b’dawn it-termini:

“‘mezz mediku’ jfisser kull strument, mezz, għodda, software, materjal jew artiklu ieħor, sew jekk użat waħdu jew f’kombinazzjoni, inkluż is-software maħsub minn dak li jimmanifatturah biex jintuża speċifikament għal finijiet dijanjostiċi u/jew għal finijiet terapewtiċi u neċessarju għall-applikazzjoni korretta tiegħu maħsuba minn dak li jimmanifattura sabiex jintuża għal finijiet mediċi fuq il-bnedmin għall-fini ta’:

u li ma jiksibx l-azzjoni prinċipali li għaliha huwa intenzjonat ġewwa jew fuq il-ġisem uman b’mezzi farmakoliġiċi, immunoloġiċi jew metaboliċi, iżda li jista’ jiġi megħjun fil-funzjoni tiegħu minn dawn il-mezzi”.

17

Pfizer timporta fir-Renju Unit prodotti li jintużaw darba biss li huma koperti mit-trade mark irreġistrata ThermaCare. Dawn il-prodotti huma ppreżentati u kkummerċjalizzati għal finijiet ta’ termoterapija terapewtika, bl-għan li jipprovdu benefiċċji bħall-analġeżija, it-tnaqqis tal-għebusija u l-aċċelerazzjoni tal-fejqan tat-tessuti li jkunu ġarrbu ħsara.

18

Il-linja ta’ prodotti tinkludi kumpressi li jsaħħnu li l-biċċa l-kbira tagħhom huma disponibbli f’diversi daqsijiet u maħsuba għal applikazzjoni fuq żona speċifika tal-ġisem. Dawn il-kumpressi huma kollha kemm huma flessibbli, b’tali mod li huma jistgħu jitwaħħlu b’mod sod fuq il-parti rilevanti tal-ġisem, u jibqgħu f’posthom permezz ta’ strixxi adeżivi jew bi strixxi awtoadeżivi, skont il-varjant tal-prodott.

19

L-imsemmija kumpressi huma, essenzjalment, magħmula minn tessut li fih ċelloli li jsaħħnu. Dan it-tessut huwa tip ta’ tessut sintetiku b’saffi sovrapposti li jżomm iċ-ċelloli li jsaħħnu f’posthom u jipproteġi lill-utent fil-każ ta’ nixxija taċ-ċelloli li jsaħħnu. Ċellola li ssaħħan tikkonsisti f’materjal sintetiku permeabbli li jservi ta’ ħajt u f’taħlita ta’ sustanzi inklużi fih (fosthom trab tal-ħadid, faħam, melħ u ilma).

20

L-istess kumpressi jinbiegħu f’boroż magħluqa. Ladarba jinħarġu mill-borża u jiġu esposti għall-arja, huma jibdew isaħħnu. B’mod iktar speċifiku, reazzjoni eżotermika li tipproduċi s-sħana sseħħ meta t-taħlita ta’ sustanzi tiġi esposta għall-arja permezz tal-ħajt permeabbli taċ-ċellola li ssaħħan. Temperatura kostanti ta’ 40 gradi Celsius tinżamm għal perijodu ta’ 8 sa 12 sigħat, skont il-varjant tal-prodott.

21

Skont l-indikazzjonijiet ipprovduti mill-qorti tar-rinviju, il-First-tier Tribunal (Tax Chamber) (il-Qorti tal-Ewwel Istanza (Awla Fiskali), ir-Renju Unit), bosta studji kliniċi juru li t-termoterapija terapewtika tipproduċi effetti fiżjoloġiċi li għandhom benfiċċji mediċi. Il-vantaġġi terapewtiċi tas-sħana huma allegatament ikkonfermati mill-Klassifikazzjoni Internazzjonali tal-Mard, id-disa’ reviżjoni, modifika klinika (CIM 9 CM), ippubblikata mill-Organizzazzjoni Dinjija tas-Saħħa (WHO). It-termoterapija hija wkoll irrikonoxxuta u rrakkomandata bħala trattament f’diversi linji gwida ppubblikati mill-korpi nazzjonali rrikonoxxuti. Fir-rigward, b’mod iktar speċifiku, tal-prodotti inkwistjoni, dawn huma kklassifikati inkwantu “mezzi mediċi attivi”, skont id-Direttiva 93/42 u allegatament ġew approvati u awtorizzati sabiex jibbenefikaw mill-marka KE minn organu nnotifikat.

22

Fl-2012, l-Amministrazzjoni tat-Taxxa ħarġet żewġ dokumenti ta’ informazzjoni vinkolanti dwar it-tariffi (iktar ’il quddiem l-“IVT”), li jikklassifikaw, bħall-awtoritajiet doganali Ġermaniżi u Slovakki, ċerti prodotti ThermaCare fl-intestatura 3005 tan-NM.

23

Abbażi ta’ dawn l-IVT maħruġa mir-Renju Unit, Pfizer importat, tliet darbiet bejn is-sena 2012 u s-sena 2013, prodotti ThermaCare fi Franza. Waqt spezzjoni rigward dawn l-importazzjonijiet, l-awtoritajiet doganali Franċiżi kkonkludew li dawn il-prodotti kellhom jiġu kklassifikati fl-intestatura 3824 tan-NM u kellha tiġi applikata għalihom rata ta’ dazju ta’ 6.5 %. Dawn l-awtoritajiet talbu lill-Kummissjoni, fl-2015, sabiex teżamina l-klassifikazzjoni tal-prodotti ThermaCare, u hija għamlet din id-domanda lill-Kumitat dwar il-Kodiċi Doganali tal-Unjoni.

24

Wara deċiżjoni mhux unanima ta’ dan il-kumitat, il-Kummissjoni adottat ir-Regolament ta’ Implimentazzjoni 2016/1140. Mill-anness ta’ dan tal-aħħar jirriżulta li prodott ippreżentat fil-forma ta’ kumpressa li tisħon waħedha intiża sabiex ittaffi l-uġigħ, u magħmula minn materjal adeżiv, jew fil-forma ta’ ċinturin li jisħon waħdu intiż sabiex itaffi l-uġigħ, magħmul minn materjal mhux adeżiv, huwa kklassifikat taħt is-subintestatura 38249096 tan-NM.

25

Għaldaqstant, l-Amministrazzjoni tat-Taxxa, b’ittra tat-3 ta’ Awwissu 2016, annullat l-IVT li hija kienet ħarġet lil Pfizer fl-2012 u li kienu jikklassifikaw il-prodotti ThermaCare fl-intestatura 3005 tan-NM.

26

B’talba tat-12 ta’ Settembru 2017, Pfizer talbet IVT ġdida intiża għall-klassifikazzjoni tal-prodotti ThermaCare fl-intestatura 3005 tan-NM.

27

Fl-10 ta’ Novembru 2017, l-Amministrazzjoni tat-Taxxa, billi bbażat ruħha fuq ir-Regolament ta’ Implimentazzjoni 2016/1140, ħarġet IVT li tikklassifika dawn il-prodotti fl-intestatura 3824 tan-NM.

28

B’rikors ippreżentat quddiem il-qorti tar-rinviju fit-8 ta’ Diċembru 2017, Pfizer ikkontestat din id-deċiżjoni. Hija ssostni, f’dan ir-rigward, li r-Regolament ta’ Implimentazzjoni 2016/1140 huwa invalidu inkwantu huwa jwassal għall-klassifikazzjoni tal-prodotti ThermaCare fl-intestatura 3824 tan-NM.

29

Prinċipalment, Pfizer issostni li l-formulazzjoni tal-intestatura 3005 tan-NM tkopri l-prodotti msemmija mir-Regolament ta’ Implimentazzjoni 2016/1140. Dawn huma “oġġetti simili” għal tajjar, faxex, stikk li jeħel, u ġbajjar, fis-sens ta’ din l-intestatura, sa fejn dawn ikunu maħsuba b’mod li jiġu applikati fuq il-ġilda għal għanijiet mediċi u jkollhom funzjoni simili għal dik tal-ġbajjar, b’mod partikolari fir-rigward tal-funzjoni li jtaffu l-uġigħ. Barra minn hekk, huma ppakkjati għall-bejgħ bl-imnut.

30

Għaldaqstant, dawn il-prodotti ma jistgħux jiġu kklassifikati fl-intestatura 3824 tan-NM, peress li din tapplika biss għal prodotti “mhux speċifikati jew inklużi band’oħra”. Huwa għalhekk b’applikazzjoni tar-regola ġenerali 1 għall-interpretazzjoni tan-NM li l-prodotti ThermaCare għandhom jiġu kklassifikati fl-intestatura 3005. Peress li r-Regolament ta’ Implimentazzjoni 2016/1140 irrestrinġa, b’mod żbaljat, il-kamp ta’ applikazzjoni ta’ din l-intestatura, il-Kummissjoni allegatament marret lil hinn mill-kompetenzi tagħha.

31

Barra minn hekk, Pfizer issostni li, sa fejn huwa jafferma li l-klassifikazzjoni tal-prodotti koperti mir-Regolament ta’ Implimentazzjoni 2016/1140 fl-intestatura 3824 tan-NM saret b’mod konformi mal-applikazzjoni tar-regola ġenerali 1, tar-regola ġenerali 3(b), u tar-regola ġenerali 6 għall-interpretazzjoni tan-NM, dan ir-regolament huwa mmotivat b’mod inadegwat u żbaljat.

32

Peress li qieset bħala serji l-argumenti mressqa minn Pfizer sabiex tikkontesta l-validità tar-Regolament ta’ Implimentazzjoni 2016/1140, il-First-tier Tribunal (Tax Chamber) (il-Qorti tal-Ewwel Istanza (Awla Fiskali)) iddeċidiet li tissospendi l-proċeduri u li tagħmel lill-Qorti tal-Ġustizzja d-domanda preliminari li ġejja:

“Ir-Regolament ta’ Implimentazzjoni […] 2016/1140 […] huwa invalidu sa fejn huwa jikklassifika taħt il-Kodiċi NM 3824, u b’mod iktar speċifiku, taħt il-Kodiċi 38249096, prodotti li:

għar-raġuni li l-materjal jew il-komponent li jagħtihom il-karattru essenzjali tagħhom huma prodotti kimiċi, minflok jiġu kklassifikati taħt is-subintestatura 3005 (abbażi tal-formulazzjoni tas-subintestaturi, tan-noti tat-taqsima jew tal-kapitoli u tan-noti ta’ spjega tar-Regola Ġenerali ta’ Interpretazzjoni I applikabbli, għaliex il-loġika tar-Regola Ġenerali ta’ Interpretazzjoni 3(a) teżiġi klassifikazzjoni konformement mad-deskrizzjoni l-iktar speċifika, jew fuq kwalunkwe bażi oħra)?”

33

Permezz tad-domanda tagħha, il-qorti tar-rinviju tistaqsi, essenzjalment, dwar il-validità tar-Regolament ta’ Implimentazzjoni 2016/1140.

34

Qabel kollox, għandu jiġi osservat li l-oġġetti importati minn Pfizer li huma s-suġġett tal-proċedura fil-kawża prinċipali, kif huma deskritti fid-deċiżjoni tar-rinviju, huma identiċi jew mill-inqas suffiċjentement simili għaż-żewġ prodotti msemmija mir-Regolament ta’ Implimentazzjoni 2016/1140, u li dan tal-aħħar huwa, għalhekk, applikabbli.

35

Il-Parlament Ewropew u l-Kunsill tal-Unjoni Ewropea taw lill-Kummissjoni, li taġixxi b’kooperazzjoni mal-esperti doganali tal-Istati Membri, setgħa diskrezzjonali wiesgħa sabiex tispeċifika l-kontenut tal-intestaturi tariffarji li huma rilevanti għall-klassifikazzjoni ta’ oġġett speċifiku. Madankollu, is-setgħa tal-Kummissjoni li tadotta miżuri taħt l-Artikolu 57(4) tal-Kodiċi Doganali ma tawtorizzahiex sabiex tibdel il-kontenut u lanqas il-portata tal-intestaturi tariffarji (sentenza tad-19 ta’ Diċembru 2019, Amoena, C‑677/18, EU:C:2019:1142, punt 37 u l-ġurisprudenza ċċitata).

36

Għalhekk, għandu jiġi eżaminat jekk, billi għamlet il-klassifikazzjoni tariffarja tal-prodotti koperti mir-Regolament ta’ Implimentazzjoni 2016/1140 fis-subintestatura 38249096 tan-NM, u mhux fl-intestatura 3005, il-Kummissjoni biddlitx il-kontenut u l-portata ta’ dawn l-intestaturi tariffarji.

37

F’dan ir-rigward, minn ġurisprudenza stabbilita tal-Qorti tal-Ġustizzja jirriżulta li, fl-interess taċ-ċertezza legali u tal-faċilità tal-verifika, il-kriterju deċiżiv għall-klassifikazzjoni tariffarja tal-oġġetti għandu, b’mod ġenerali, jitfittex fil-karatteristiċi u fil-proprjetajiet oġġettivi tagħhom, kif iddefiniti mill-kliem tal-intestatura tan-NM u tan-noti tat-taqsimiet jew tal-kapitoli (sentenza tat-22 ta’ Frar 2018, Kubota (UK) u EP Barrus, C‑545/16, EU:C:2018:101, punt 25 u l-ġurisprudenza ċċitata).

38

Barra minn hekk, l-użu intenzjonat tal-prodott jista’ jikkostitwixxi kriterju oġġettiv ta’ klassifikazzjoni sakemm ikun inerenti għall-imsemmi prodott, u l-inerenza għandha tkun tista’ tiġi evalwata skont il-karatteristiċi u l-proprjetajiet oġġettivi ta’ dan (sentenza tat-22 ta’ Frar 2018, Kubota (UK) u EP Barrus, C‑545/16, EU:C:2018:101, punt 26 u l-ġurisprudenza ċċitata).

39

F’dan il-każ, kif jirriżulta mill-formulazzjoni tal-kolonna 1 tat-tabella li tinsab fl-anness tar-Regolament ta’ Implimentazzjoni 2016/1140, il-prodotti koperti minn dan huma ppreżentati fil-forma ta’ kumpressi jew fil-forma ta’ ċinturini li jisħnu waħedhom intiżi sabiex itaffu l-uġigħ. Dawn il-kumpressi huma magħmula minn materjal adeżiv li jippermetti li huma jitwaħħlu fuq il-ġilda filwaqt li dawn iċ-ċinturini huma magħmula minn materjal mhux adeżiv li jitwaħħal permezz ta’ strixxa awtoadeżiva. Dawn il-prodotti jikkonsistu f’materjal sintetiku flessibbli li jadatta ruħu għall-forma tal-ġisem u li fih ċertu numru ta’ diski mimlija bi trab tal-ħadid, faħam, melħ u ilma, li, ladarba esposti għall-arja, jipproduċu s-sħana minħabba reazzjoni eżotermika.

40

Skont il-kliem tal-intestatura 3824 tan-NM, il-prodotti li jaqgħu taħt din l-intestatura huma prodotti “mhux speċifikati jew inklużi band’oħra”.

41

Għalhekk, għandu jiġi eżaminat minn qabel jekk il-prodotti koperti mir-Regolament ta’ Implimentazzjoni 2016/1140 jaqgħux taħt l-intestatura 3005 tan-NM.

42

L-oġġetti li jaqgħu taħt l-intestatura 3005 tan-NM huma, skont il-formulazzjoni ta’ din, “Tajjar, garża, faxex u oġġetti simili (per eżempju, infaxxar, stikk li jeħel, ġbajjar), mimlijin jew miksijin b’sustanzi farmaċewtiċi jew ippreżentati f’forom jew f’pakki għal bejgħ bl-imnut għal għanijiet mediċi, kirurġiċi, dentali jew veterinarji”.

43

F’dan ir-rigward, Pfizer issostni li l-oġġetti inkwistjoni għandhom jitqiesu bħala “oġġetti simili”, fis-sens ta’ din l-intestatura, ippakkjati għall-bejgħ bl-imnut għal għanijiet mediċi.

44

Fir-rigward, fl-ewwel lok, tal-kriterju rigward l-ippakkjar għall-bejgħ bl-imnut, għandu jiġi osservat li, huwa minnu, fil-kolonna 1 tat-tabella li tinsab fl-anness tar-Regolament ta’ Implimentazzjoni 2016/1140, ma jingħata l-ebda dettall rigward l-ippakkjar tal-prodotti koperti minn dan ir-regolament ta’ implimentazzjoni.

45

Madankollu, ma huwiex ikkontestat li dawn il-prodotti huma ppakkjati għall-bejgħ bl-imnut, u dan huwa kkonfermat, barra minn hekk, mill-oriġini ta’ dan ir-regolament ta’ implimentazzjoni.

46

Fir-rigward, fit-tieni lok, tal-kunċett ta’ “għanijiet mediċi”, fis-sens tal-intestatura 3005 tan-NM, dan la huwa ddefinit fin-NM u lanqas fin-noti ta’ spjega tagħha.

47

Madankollu, għandu jiġi osservat li, skont il-ġurisprudenza tal-Qorti tal-Ġustizzja, sabiex jiġi stabbilit jekk prodott huwiex intiż għal għanijiet mediċi, għandhom jittieħdu inkunsiderazzjoni l-elementi rilevanti kollha tal-każ, sa fejn ikunu kkonċernati karatteristiċi u proprjetajiet inenerti għal dan il-prodott. Fost l-elementi rilevanti, għandu jiġi evalwat l-użu li għalih il-prodott inkwistjoni huwa intenzjonat mill-manifattur, kif ukoll il-modalitajiet u l-post tal-użu ta’ dan (ara, b’mod analogu, is-sentenza tal-4 ta’ Marzu 2015, Oliver Medical, C‑547/13, EU:C:2015:139, punti 51 u 52). B’mod iktar partikolari, il-prodott ikkonċernat għandu jkun maħsub b’mod partikolari sabiex jintuża għal tali għanijiet (ara, f’dan is-sens, is-sentenza tas-6 ta’ Ottubru 1982, Nederlandsch Bevrachtingskantoor, 37/82, EU:C:1982:340, punt 11).

48

Għandu jiġi osservat ukoll li, skont ġurisprudenza stabbilita, it-tifsira u l-portata tal-kliem li ma jingħata ebda definizzjoni fid-dritt Komunitarju għandhom jiġu stabbiliti skont it-tifsira komuni tiegħu fil-lingwaġġ ta’ kuljum, filwaqt li jittieħed inkunsiderazzjoni l-kuntest li fih jintuża u l-għanijiet segwiti permezz tal-leġiżlazzjoni li huwa jagħmel parti minnha (ara s-sentenza tas-6 ta’ Settembru 2018, Kreyenhop & Kluge, C‑471/17, EU:C:2018:681, punt 39 u l-ġurisprudenza ċċitata).

49

Għalhekk, sa fejn, minn naħa, l-aġġettiv “mediku” jirreferi għall-kelma “mediċina” u sa fejn, min-naħa l-oħra, din tal-aħħar tista’ ġeneralment tinftiehem bħala, b’mod partikolari, ix-xjenza tal-prevenzjoni, tal-identifikazzjoni u tat-trattament tal-mard jew tal-feriti, għandu jitqies li oġġett maħsub b’mod partikolari għall-prevenzjoni, għall-identifikazzjoni jew għat-trattament tal-mard jew tal-feriti jkopri “għanijiet mediċi”, fis-sens tal-intestatura 3005 tan-NM.

50

F’dan il-każ, dan jgħodd għall-prodotti koperti mir-Regolament ta’ Implimentazzjoni 2016/1140. Fil-fatt, kif jirriżulta mill-indikazzjoni tagħhom, li tinsab fl-anness ta’ dan ir-regolament ta’ implimentazzjoni, dawn il-prodotti huma intiżi sabiex itaffu l-uġigħ, permezz tas-sħana prodotta permezz ta’ reazzjoni eżotermika meta ċ-ċelloli li huma għandhom fihom jiġu esposti għall-arja. Għaldaqstant, din hija forma ta’ termoterapija permezz tal-ipertermija, li hija rrikonoxxuta bħala trattament, fid-dawl tal-benefiċċji fiżjoloġiċi li jinħolqu b’dan il-mod.

51

Barra minn hekk, il-fatt li dawn il-prodotti huma kklassifikati inkwantu “mezzi mediċi attivi”, skont id-Direttiva 93/42, jikkostitwixxi indizju supplimentari f’dan ir-rigward (ara, f’dan is-sens, is-sentenza tal-4 ta’ Marzu 2015, Oliver Medical, C‑547/13, EU:C:2015:139, punt 53).

52

Min-naħa l-oħra, xejn ma jindika li l-imsemmija prodotti huma intiżi prinċipalment sabiex jipprovdu titjib estetiku, li jkun jikkostitwixxi indizju li ma humiex intiżi għal għanijiet mediċi (ara, f’dan is-sens, is-sentenza tal-4 ta’ Marzu 2015, Oliver Medical, C‑547/13, EU:C:2015:139, punt 52).

53

Fir-rigward, fit-tielet lok, tal-punt dwar jekk il-prodotti koperti mir-Regolament ta’ Implimentazzjoni 2016/1140 jistgħux jitqiesu bħala “oġġetti simili” għal “[t]ajjar, garża [jew għal] faxex”, fis-sens tal-intestatura 3005 tan-NM, il-Kummissjoni tikkontesta dan billi ssostni li l-għan ġenerali tal-oġġetti li jaqgħu taħt din l-intestatura huwa li jiġu ttrattati l-uġigħ jew il-leżjonijiet, filwaqt li fuq l-oġġetti inkwistjoni nfushom tidher twissija kontra l-applikazzjoni tagħhom fuq il-ġilda sabiex jiġu nfaxxati leżjonijiet, tbenġil jew edema.

54

Din it-teżi ma tistax tintlaqa’. Fil-fatt, il-fatt li dawn l-oġġetti ma għandhomx jintużaw f’ċerti każijiet ma jippermettix li tiġi mqiegħda f’dubju l-konklużjoni li huma jservu sabiex jiġu ttrattati uġigħ u leżjonijiet.

55

Għaldaqstant, il-prodotti koperti mir-Regolament ta’ Implimentazzjoni 2016/1140 jaqgħu taħt l-intestatura 3005 tan-NM u, minħabba f’hekk, kif jirriżulta mill-punt 40 ta’ din is-sentenza, ma jistgħux jaqgħu taħt l-intestatura 3824 tan-NM.

56

Għaldaqstant, dawn il-prodotti għandhom jiġu kklassifikati fl-intestatura 3005 tan-NM.

57

Għaldaqstant, billi wettqet il-klassifikazzjoni tariffarja tal-imsemmija prodotti fis-subintestatura 38249096 tan-NM, u mhux fl-intestatura 3005, il-Kummissjoni biddlet il-kontenut ta’ dawn l-intestaturi tariffarji u marret lil hinn mill-kompetenzi mogħtija lilha permezz tal-Artikolu 57(4) tal-Kodiċi Doganali.

58

Minn dak kollu li ntqal hawn fuq, ir-risposta għad-domanda magħmula għandha tkun li r-Regolament ta’ Implimentazzjoni 2016/1140 huwa invalidu.

59

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (Is-Seba’ Awla) taqta’ u tiddeċiedi:

Ir-Regolament ta’ Implimentazzjoni tal-Kummissjoni (UE) 2016/1140 tat-8 ta’ Lulju 2016 dwar il-klassifikazzjoni ta’ ċerti prodotti fin-Nomenklatura Magħquda, huwa invalidu.