–

għal KORADO a.s., minn P. Mrázek u V. Beringerová, advokáti,

–

għall-Gvern Ċek, minn M. Smolek, J. Vláčil u O. Serdula, bħala aġenti,

–

għall-Kummissjoni Ewropea, minn A. Caeiros u J. Hradil, bħala aġenti,

1

It-talba għal deċiżjoni preliminari tirrigwarda, minn naħa, l-interpretazzjoni tal-intestaturi 7307 u 7322 tan-Nomenklatura Magħquda (iktar ’il quddiem in-“NM”), li tinsab fl-Anness I tar-Regolament tal-Kunsill (KEE) Nru 2658/87 tat-23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (ĠU Edizzjoni Speċjali bil-Malti, Kapitolu 2, Vol. 2, p. 382), kif emendat bir-Regolament ta’ Implimentazzjoni tal-Kummissjoni (UE) Nru 1101/2014 tas-16 ta’ Ottubru 2014 (ĠU 2014, L 312, p. 1), u, min-naħa l-oħra, il-validità tar-Regolament ta’ Implimentazzjoni tal-Kummissjoni (UE) 2015/23 tal-5 ta’ Jannar 2015 dwar il-klassifikazzjoni ta’ ċerti prodotti fin-Nomenklatura Magħquda (ĠU 2015, L 4, p. 15).

2

Din it-talba tressqet fil-kuntest ta’ kawża bejn KORADO a.s. (iktar ’il quddiem “Korado” u Generální ředitelství cel (id-Direttorat Ġenerali tad-Dwana, ir-Repubblika Ċeka) dwar il-klassifikazzjoni ta’ ċerti prodotti fin-NM.

3

Il-konvenzjoni internazzjonali li stabbilixxiet is-sistema armonizzata għad-deskrizzjoni u kodifikazzjoni ta’ merkanzija, konkluża fi Brussell, fl-14 ta’ Ġunju 1983, u l-protokoll li jemendaha tal-24 ta’ Ġunju 1986 ġew approvati f’isem il-Komunità Ekonomika Ewropea bid-Deċiżjoni tal-Kunsill 87/369/KEE tas-7 ta’ April 1987 (ĠU Edizzjoni Speċjali bil-Malti, Kapitolu 2, Vol. 2, p. 288).

4

Il-Kunsill tal-Kooperazzjoni Doganali, li sar l-Organizzazzjoni Dinjija tad-Dwana (WCO), imwaqqaf permezz tal-konvenzjoni li ħolqot l-imsemmi kunsill, konkluża fi Brussell fil-15 ta’ Diċembru 1950, japprova, bil-kundizzjonijiet stabbiliti fl-Artikolu 8 tal-Konvenzjoni dwar is-SA msemmija fil-punt preċedenti, in-Noti ta’ Spjega u l-opinjonijiet ta’ klassifikazzjoni adottati mill-Kumitat tas-SA.

5

Skont l-Artikolu 3(1)(a) tal-imsemmija Konvenzjoni dwar is-SA, kull parti kontraenti timpenja ruħha sabiex in-nomenklaturi tariffarji u statistiċi tagħha jkunu konformi mas-SA, li tuża l-intestaturi u s-subintestaturi tas-SA, mingħajr żidiet jew modifiki, flimkien mal-kodiċijiet numeriċi relatati magħha, u li ssegwi s-sekwenza numerika tas-SA. L-istess dispożizzjoni timponi lill-partijiet kontraenti l-obbligu li japplikaw ir-regoli ġenerali għall-interpretazzjoni tas-SA kif ukoll in-noti kollha tat-taqsimiet, tal-kapitoli u tas-subintestaturi u li ma jbiddlux il-portata tagħhom.

6

Il-punt C tal-Kunsiderazzjonijiet Ġenerali tan-Nota ta’ Spjega tas-SA dwar it-Taqsima XV, intitolata “Partijiet”, tinqara kif ġej:

“[…] il-partijiet ta’ użu ġenerali (ara n-nota 2 tat-taqsima), ippreżentati iżolati, ma humiex ikkunsidrati bħala partijiet, iżda jsegwu s-sistema proprja tagħhom. Dan japplika wkoll, pereżempju, għall-boltijiet maħsuba b’mod speċjali għar-radjaturi għat-tisħin ċentrali jew ta’ molol partikolari għall-vetturi. Tal-ewwel huma kklassifikati bħala boltijiet taħt in-numru 73.18 u mhux bħala partijiet ta’ radjaturi taħt in-numru 73.22, filwaqt li tat-tieni jaqgħu taħt in-numru 73.20 relatat mal-molol u mhux taħt in-numru 87.08 li jikkonċerna l-partijiet u aċċessorji tal-vetturi” [traduzzjoni mhux uffiċjali].

7

Skont in-nota ta’ spjega dwar l-intestatura 7307 tas-SA:

“[…]

Din l-intestatura tinkludi diversi oġġetti tal-ħadid jew azzar, intiżi essenzjalment sabiex jgħaqqdu bejniethom pajpijiet jew elementi ta’ pajp jew pajp ma’ apparat ieħor, jew inkella sabiex jagħlqu ċerti elementi ta’ pajpijiet, bl-esklużjoni ta’ ċerti oġġetti li, minkejja intiżi għall-muntaġġ ta’ pajpijiet u katusi (pereżempju sleeves li jitwaħħlu mal-ħitan sabiex isostnu l-pajpijiet, l-isleeves li jservu sabiex jitwaħħlu l-pajpijiet rotob fuq elementi riġidi bħall-katusi, viti jew partijiet li jgħaqqdu, eċċ.), ma jagħmlux parti integrali minnhom (Nri 73.25 jew 73.26).

[…]

Fost it-tagħmir ta’ tubi u pajpijiet inklużi hawn, wieħed jista’ jiċċita l-flanġijiet ċatti jew b’ħolqa tal-metall mikwija f’forġa, il-liwjiet minkeb u liwjiet, adattaturi (reducers), adattaturi fil-forom ta’ T, is-slaleb u s-saddieda, il-pajpijiet għal welding tarf ma’ tarf, il-fittings b’liwja mqabbża li ssir biex jinqabeż ostakolu (offsets), fittings multifergħat, il-fittings simili għal balavostri ċilindriċi, il-viti bil-kamin, is-sleeves u l-pajpijiet ta’ konġunzjoni bil-kamin (nipples), il-pajpijiet ta’ għaqda (unions), il-filtri, il-washers għall-pajpijiet, il-morsi u l-ħoloq metalliċi ta’ konġunzjoni.” [traduzzjoni mhux uffiċjali]

8

In-nota ta’ spjega dwar l-intestatura 7322 tas-SA tipprovdi b’mod partikolari li:

“[…]

Din l-intestatura tinkludi:

[…]

[…]” [traduzzjoni mhux uffiċjali]

9

Il-klassifikazzjoni doganali tal-merkanzija importata fl-Unjoni Ewropea hija rregolata min-NM, li hija bbażata fuq is-SA. Il-verżjoni fis-seħħ fid-data tal-fatti fil-kawża prinċipali kienet dik li tirriżulta mir-Regolament Nru 2658/87, kif emendat bir-Regolament ta’ Implimentazzjoni Nru 1101/2014.

10

L-ewwel parti tan-NM tinkludi ġabra ta’ dispożizzjonijiet preliminari. F’din il-parti, taħt it-Titolu I, iddedikat għar-regoli ġenerali, it-Taqsima A tipprovdi regoli ġenerali għall-interpretazzjoni ta’ din in-nomenklatura, li skonthom issir il-klassifikazzjoni tal-merkanzija fin-NM. Għaldaqstant huwa, b’mod partikolari, previst li l-klassifikazzjoni għandha tiġi ddeterminata legalment skont it-termini tal-intestaturi u tan-noti tat-taqsimiet jew tal-kapitoli, peress li l-formulazzjoni tat-titoli tat-taqsimiet, tal-kapitoli jew tas-subkapitoli hija meqjusa bħala li għandha biss valur indikattiv.

11

It-tieni parti tan-NM tinkludi t-Taqsima XV, li tirrigwarda “Metalli ta’ valur baxx u oġġetti minn metalli ta’ valur baxx”.

12

Din it-taqsima hija magħmula mill-Kapitoli 72 sa 83 u tinkludi, fost oħrajn, il-Kapitolu 73, intitolat “Oġġetti ta’ ħadid jew azzar”.

13

In-nota 2 tat-Taqsima XV tan-NM tipprovdi li:

“Matul in-nomenklatura, l-espresjoni “partijiet għal użu ġenerali” tfisser:

[…]

Kapitli 73 sa 76 u 78 sa 82 (iżda mhux f’titlu 7315), riferenzi għal partijiet ta’ oġġetti ma jinkludux riferenzi għal partijiet ta’ użu ġenerali kif definit hawn fuq.

[…]”

14

L-intestatura 7307 tan-NM hija fformulata kif ġej:

“Tagħmir ta’ tubi u pajpijiet (per eżempju, couplings, liwjiet minkeb, sleeves), ta’ ħadid jew azzar

[…]

730793 – – Tagħmir iwweldjat tarf ma’ tarf (butt welding)

– – Bl-ikbar dijametru ta’ barra mhux aktar minn 609,6 mm:

[…]

73079319 – – – – Oħrajn

[…]”

15

L-intestatura 7322 tan-NM hija fformulata kif ġej:

“Radjaturi għal tisħin ċentrali, mhux imsaħħnin bl-elettriku, u partijiet tagħhom, ta’ ħadid jew azzar; hiters ta’ l-arja u distributuri ta’ arja sħuna (inklużi distributuri li jistgħu jqassmu ukoll arja friska jew kundizzjonata), mhux imsaħħnin bl-elettriku, li fihom fann jew blower imħaddmin b’mutur, u l-partijiet għalihom, ta’ ħadid jew azzar:

16

Sabiex tiġi żgurata applikazzjoni uniformi tan-NM, il-Kummissjoni Ewropea adottat ir-Regolament ta’ Implimentazzjoni 2015/23 li, konformement mal-Artikolu 3 tiegħu, daħal fis-seħħ fit-28 ta’ Jannar 2015.

17

Il-premessi 1 sa 5 tar-Regolament ta’ Implimentazzjoni 2015/23 jipprovdu li:

18

L-Artikolu 1 tar-Regolament ta’ Implimentazzjoni Nru 2015/23 jipprovdi li:

“Il-prodotti deskritti fil-kolonna (1) tat-tabella stabbilita fl-Anness jiġu kklassifikati fin-[NM] skont il-kodiċi NM indikat fil-kolonna (2) ta’ dik it-tabella.”

19

L-Artikolu 2 ta’ dan ir-regolament ta’ implimentazzjoni jipprovdi li:

“L-informazzjoni tariffarja vinkolanti li ma tikkonformax ma’ dan ir-Regolament tista’ tibqa’ tiġi invokata skont l-Artikolu 12(6) tar-Regolament (KEE) Nru 2913/92 għal perjodu ta’ tliet xhur mid-data tad-dħul fis-seħħ ta’ dan ir-Regolament.”

20

L-Anness tar-Regolament ta’ Implimentazzjoni 2015/23 huwa fformulat kif ġej:

“

”

21

Fid-9 ta’ Novembru 2015, ir-rikorrenti fil-kawża prinċipali talbet liz-Celní úřad pro Olomoucký kraj (l-amministrazzjoni doganali għar-reġjun ta’ Olomouc, ir-Repubblika Ċeka) informazzjoni tariffarja vinkolanti dwar il-klassifikazzjoni ta’ ċerti prodotti. Ir-rikorrenti fil-kawża prinċipali pproponiet li tikklassifikahom fis-subintestatura 73221900 tan-NM.

22

Il-prodotti inkwistjoni fil-kawża prinċipali, bir-referenzi “T 74‑32”, “T 40‑32” u “L 35‑32”, huma partijiet tal-azzar iwweldjati, immanifatturati għal radjaturi għal tisħin ċentrali, mhux imsaħħnin bl-elettriku.

23

Dawn huma kkostitwiti minn żewġ jew tliet trufijiet, fejn fosthom jistgħu jiġu identifikati, minn naħa, spalla waħda jew diversi ddisinjati sabiex jiġu konnessi mal-bordijiet tar-radjatur permezz ta’ welding tarf ma’ tarf u, min-naħa l-oħra, tarf ieħor b’għonq tal-kamin li jservi sabiex jiġi konness valv ta’ ventilazzjoni, valv ta’ regolazzjoni jew apparat ieħor, jew sabiex jiġi konness kwalunkwe pajp li jwassal għal sors ta’ tisħin.

24

Permezz ta’ diversi deċiżjonijiet tal-24 ta’ Novembru 2015, l-amministrazzjoni doganali għar-reġjun ta’ Olomouc ikklassifikat, konformement mar-Regolament ta’ Implimentazzjoni 2015/23, il-prodotti inkwistjoni fil-kawża prinċipali fis-subintestatura 73079319 tan-NM.

25

Ir-rikorrenti fil-kawża prinċipali appellat minn dawn id-deċiżjonijiet quddiem id-Direttorat Ġenerali tad-Dwana. Peress li dawn ġew miċħuda, hija ppreżentat rikors quddiem il-Krajský soud v Ostravě – pobočka v Olomouci (il-Qorti Reġjonali ta’ Ostrava, sezzjoni ta’ Olomouc, ir-Repubblika Ċeka).

26

Il-qorti tar-rinviju tqis li, minkejja li l-prodotti inkwistjoni fil-kawża prinċipali huma identiċi jew suffiċjentement simili għall-prodotti msemmija mir-Regolament ta’ Implimentazzjoni 2015/23 u għandhom, għaldaqstant, jiġu kklassifikati fl-intestatura 7307 tan-NM, bħala “tagħmir ta’ tubi u pajpijiet tal-ħadid jew azzar”, u b’mod iktar partikolari fis-subintestatura 73079319 tan-NM, tali klassifikazzjoni ma tkunx korretta fid-dawl, b’mod partikolari, tan-natura tal-prodotti.

27

Il-qorti tar-rinviju tirrileva li n-nota 2 tat-Taqsima XV tan-NM tindika li l-artikoli tal-intestatura 7307 tan-NM għandhom jiġu kkunsidrati bħala “partijiet għal użu ġenerali”. Hija tqis li l-prodotti inkwistjoni fil-kawża prinċipali ma jikkostitwixxux parti ta’ użu ġenerali, iżda parti speċifika tar-radjaturi mmanifatturata fuq ordni tar-rikorrenti fil-kawża prinċipali, skont id-dokumentazzjoni teknika mfassla mill-produtturi ta’ radjaturi. Min-natura tagħhom, huma jaqgħu għaldaqstant taħt l-intestatura 7322 tan-NM.

28

Barra minn hekk, il-qorti tar-rinviju tqis, bħar-rikorrenti fil-kawża prinċipali, li l-prodotti inkwistjoni fil-kawża prinċipali ma jistgħux jitqiesu bħala aċċessorji u tirrileva, f’dan ir-rigward, li fis-sentenza tas‑26 ta’ Ottubru 2006, Turbon International, (C‑250/05, EU:C:2006:681), il-Qorti tal-Ġustizzja ddeċidiet li l-kunċett ta’ “partijiet” jimplika l-preżenza ta’ unità li dawn il-partijiet ikunu indispensabbli għall-funzjonament tagħha u li l-kunċett ta’ “aċċessorji” jinkludi l-elementi ta’ tagħmir interkambjabbli li jippermettu l-adattament ta’ apparat għal xogħol partikolari jew li jagħtuh possibbiltajiet supplimentari jew li nkella jippermettulu jwettaq servizz partikolari relatat mal-funzjoni prinċipali tiegħu.

29

Skont il-qorti tar-rinviju, il-prodotti inkwistjoni fil-kawża prinċipali huma indispensabbli għall-funzjonament tar-radjatur li flimkien miegħu huma jifformaw unità. Konsegwentement, huma ma għandhomx jitqiesu li huma “tagħmir ta’ tubi u pajpijiet”, fis-sens tal-intestatura 7307 tan-NM, iżda bħala “partijiet” ta’ radjaturi, li jaqgħu taħt l-intestatura 7322 tan-NM.

30

Fid-dawl ta’ dawn il-kunsiderazzjonijiet, il-qorti tar-rinviju hija inċerta dwar il-validità tar-Regolament ta’ Implimentazzjoni 2015/23 u tistaqsi, b’mod iktar partikolari, jekk dan ir-regolament estendiex illegalment il-portata tas-subintestatura 73079319 tan-NM.

31

F’dan il-kuntest, il-Krajský soud v Ostravě – pobočka v Olomouci (il-Qorti Reġjonali ta’ Ostrava, sezzjoni ta’ Olomouc) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:

32

Permezz tad-domandi tagħha, li għandhom jiġu eżaminati flimkien, il-qorti tar-rinviju essenzjalment tistaqsi, minn naħa, jekk in-NM għandhiex tiġi interpretata fis-sens li l-partijiet tal-azzar iwweldjati bħal dawk inkwistjoni fil-kawża prinċipali għandhomx jiġu kklassifikati fl-intestatura 7307 tan-NM, bħala “tagħmir ta’ tubi u pajpijiet”, jew pjuttost fl-intestatura 7322 tan-NM, bħala “partijiet” tar-radjaturi, kif ukoll, min-naħa l-oħra, u sussidjarjament, jekk ir-Regolament ta’ Implimentazzjoni 2015/23 huwiex validu.

33

Preliminarjament, għandu jitfakkar li, konformement ma’ ġurisprudenza stabbilita, meta l-Qorti tal-Ġustizzja jkollha quddiemha rinviju għal deċiżjoni preliminari fil-qasam tal-klassifikazzjoni tariffarja, il-funzjoni tagħha hija li tiggwida lill-qorti nazzjonali dwar il-kriterji li permezz tagħhom din tal-aħħar tkun tista’ tikklassifika b’mod korrett il-prodotti inkwistjoni fin-NM, iktar milli tikklassifikahom hija stess, u dan iktar u iktar minħabba li hija ma jkollhiex neċessarjament għad-dispożizzjoni tagħha l-informazzjoni indispensabbli kollha f’dan ir-rigward. Għaldaqstant, jidher li l-qorti nazzjonali hija fi kwalunkwe każ f’pożizzjoni aħjar biex tagħmel dan (ara, b’mod partikolari, is-sentenza tal-25 ta’ Frar 2016, G. E. Security, C‑143/15, EU:C:2016:115, punt 41 u l-ġurisprudenza ċċitata).

34

Għaldaqstant, huwa l-kompitu tal-qorti tar-rinviju li tikklassifika l-prodotti fil-kawża prinċipali fid-dawl tar-risposta mogħtija mill-Qorti tal-Ġustizzja għad-domandi sottomessi lilha.

35

Sabiex tingħata risposta utli għal din id-domanda, huwa importanti, qabel kollox, li jiġi enfasizzat li r-regoli ġenerali għall-interpretazzjoni tan-NM jipprovdu li l-klassifikazzjoni tal-merkanzija għandha tiġi ddeterminata skont it-termini tal-intestaturi u tan-noti tat-taqsimiet jew tal-kapitoli, peress li l-kliem tat-titoli tat-taqsimiet, tal-kapitoli jew tas-subkapitoli huma kkunsidrati li għandhom biss valur indikattiv. Minkejja li ma għandhomx forza vinkolanti, in-noti ta’ spjega tas-SA u tan-NM jikkontribwixxu b’mod importanti għall-interpretazzjoni tal-portata tad-diversi intestaturi doganali (sentenza tat-12 ta’ Ġunju 2014, Lukoyl Neftohim Burgas, C‑330/13, EU:C:2014:1757, punti 33 u 35 kif ukoll il-ġurisprudenza ċċitata).

36

Skont ġurisprudenza stabbilita tal-Qorti tal-Ġustizzja, fl-interess taċ-ċertezza legali u tal-faċilità tal-verifika, il-kriterju deċiżiv għall-klassifikazzjoni tariffarja tal-merkanzija għandu, b’mod ġenerali, jitfittex fil-karatteristiċi u fil-proprjetajiet oġġettivi tagħha, kif iddefiniti mill-kliem tal-intestatura tan-NM u tan-noti tat-taqsimiet jew tal-kapitoli (sentenza tal-25 ta’ Frar 2016, G. E. Security, C‑143/15, EU:C:2016:115, punt 44 u l-ġurisprudenza ċċitata).

37

Il-Qorti tal-Ġustizzja ddeċidiet ukoll li l-użu li għalih huwa intiż il-prodott jista’ jikkostitwixxi kriterju oġġettiv ta’ klassifikazzjoni sa fejn dan ikun inerenti għall-imsemmi prodott, u din in-natura inerenti għandha tkun tista’ tiġi evalwata abbażi tal-karatteristiċi u tal-proprjetajiet oġġettivi tiegħu (sentenzi tat-13 ta’ Lulju 2006, Uroplasty, C‑514/04, EU:C:2006:464, punt 42, u tas-26 ta’ April 2017, Stryker EMEA Supply Chain Services, C‑51/16, EU:C:2017:298, punt 40).

38

Fil-kawża prinċipali, il-qorti tar-rinviju essenzjalment tistaqsi f’liema intestatura tan-NM, jiġifieri l-intestatura 7307 tan-NM jew l-intestatura 7322 tagħha, għandhom jiġu kklassifikati l-partijiet tal-azzar iwweldjati bħal dawk inkwistjoni fil-kawża prinċipali.

39

F’dan ir-rigward, mill-kliem tal-intestatura 7307 tan-NM jirriżulta li din tkopri t-tagħmir ta’ tubi u pajpijiet, bħal couplings, liwjiet minkeb u sleeves, tal-ħadid jew azzar.

40

In-nota ta’ spjega tas-SA relatata mal-intestatura 7307 tas-SA tippreċiża, barra minn hekk, li din l-intestatura tinkludi diversi oġġetti ta’ ħadid jew azzar, intiżi essenzjalment sabiex jgħaqqdu bejniethom żewġ pajpijiet jew elementi ta’ pajp ma’ apparat ieħor, jew inkella sabiex jagħlqu ċerti elementi ta’ pajpijiet.

41

Il-kliem tal-intestatura 7322 tan-NM jindika, min-naħa tiegħu, li din l-intestatura tkopri r-radjaturi għal tisħin ċentrali, mhux imsaħħnin bl-elettriku, kif ukoll il-partijiet tagħhom tal-ħadid jew azzar.

42

Minn dan isegwi li, għall-finijiet tal-klassifikazzjoni tal-partijiet tal-azzar iwweldjati bħal dawk inkwistjoni fil-kawża prinċipali, huwa importanti li jiġi ddeterminat jekk dawn jikkostitwixxux “tagħmir ta’ tubi u pajpijiet”, fis-sens tal-intestatura 7307 tan-NM, jew “partijiet” ta’ radjaturi, fis-sens tal-intestatura 7322 tan-NM.

43

F’dan ir-rigward, għandu jiġi rrilevat li, minkejja li n-NM ma tiddefinixxix il-kunċett ta’ “partijiet” fis-sens tal-intestatura 7322 tan-NM, mill-ġurisprudenza tal-Qorti tal-Ġustizzja, żviluppata fil-kuntest tal-Kapitoli 84 u 85 tat-Taqsima XVI u tal-Kapitolu 90 tat-Taqsima XVIII tan-NM, jirriżulta li l-kunċett ta’ “partijiet” jimplika l-preżenza ta’ unità li dawn il-partijiet ikunu indispensabbli għall-funzjonament tagħha. Sabiex oġġett jiġi kklassifikat bħala “partijiet”, fis-sens tal-imsemmija kapitoli, ma huwiex suffiċjenti li jintwera li, mingħajr dan l-oġġett, il-magna jew l-apparat ma jistgħux jaqdu l-bżonnijiet li għalihom huma intiżi. Għandu jiġi stabbilit ukoll li l-funzjonament mekkaniku jew elettriku tal-magna jew tal-apparat inkwistjoni huwa kkundizzjonat mill-imsemmi oġġett (sentenza tat-12 ta’ Diċembru 2013, HARK, C‑450/12, EU:C:2013:824, punt 36).

44

Fl-interess tal-applikazzjoni koerenti u uniformi tat-tariffa doganali komuni, il-kunċett ta’ “partijiet”, fis-sens tal-intestatura 7322 tan-NM, għandu jingħata l-istess definizzjoni bħal din li tirriżulta mill-ġurisprudenza mogħtija fir-rigward ta’ kapitoli oħra tan-NM (ara, b’analoġija, is-sentenza tat-12 ta’ Diċembru 2013, HARK, C‑450/12, EU:C:2013:824, punt 37).

45

Fil-każ ineżami, mill-fajl li l-Qorti tal-Ġustizzja għandha quddiemha jirriżulta li l-partijiet tal-azzar iwweldjati inkwistjoni fil-kawża prinċipali huma indispensabbli għall-funzjonament tar-radjaturi li magħhom huma konnessi u li flimkien magħhom huma jifformaw unità.

46

Għaldaqstant, dawn jistgħu jiġu kklassifikati bħala “partijiet” ta’ radjaturi li jaqgħu taħt l-intestatura 7322 tan-NM.

47

Madankollu, għandu jitfakkar li l-Qorti tal-Ġustizzja diġà ddeċidiet li l-klassifikazzjoni ta’ prodott partikolari fl-intestatura 7307 tan-NM bħala “tagħmir ta’ tubi u pajpijiet”, u għaldaqstant bħala “partijiet ta’ użu ġenerali”, fis-sens tan-nota 2 tat-Taqsima XV tan-NM, teskludi l-klassifikazzjoni ta’ dan il-prodott bħala “partijiet” taħt intestatura oħra tan-NM (sentenza tat-12 ta’ Diċembru 2013, HARK, C‑450/12, EU:C:2013:824, punti 40 sa 43).

48

Fil-fatt, skont in-nota 2 tat-Taqsima XV tan-NM, ir-referenzi għall-“partijiet” li jinsabu fil-Kapitoli 73 sa 76 u 78 sa 82 tan-NM ma jkoprux il-“partijiet ta’ użu ġenerali”. In-nota 2 tat-Taqsima XV tan-NM tippreċiża li l-oġġetti li jaqgħu, fost oħrajn, taħt l-intestatura 7307 tan-NM jikkostitwixxu “partijiet ta’ użu ġenerali”.

49

Konsegwentement, għandu jiġi eżaminat jekk partijiet tal-azzar iwweldjati bħal dawk inkwistjoni fil-kawża prinċipali għandhomx jiġu kkunsidrati bħala “tagħmir ta’ tubi u pajpijiet” li jaqgħu taħt l-intestatura 7307 tan-NM u, għaldaqstant, bħala “partijiet ta’ użu ġenerali”, fis-sens tan-nota 2 tat-Taqsima XV tan-NM, li jeskludi l-klassifikazzjoni ta’ dawn il-partijiet bħala “partijiet” tar-radjaturi li jaqgħu taħt l-intestatura 7322 tan-NM.

50

Għandu jiġi enfasizzat, f’dan ir-rigward li, sabiex jiġi kklassifikat bħala “partijiet ta’ użu ġenerali”, fis-sens tan-nota 2 tat-Taqsima XV tan-NM, il-prodott inkwistjoni għandu, abbażi tal-karatteristiċi tiegħu, tal-proprjetajiet oġġettivi tiegħu u tal-użu inerenti intiż ta’ dan il-prodott, ikun intiż sabiex jgħaqqad żewġ pajpijiet jew elementi ta’ pajpijiet bejniethom jew anki pajp ma’ apparat ieħor (ara, f’dan is-sens, is-sentenza tat-12 ta’ Diċembru 2013, HARK, C‑450/12, EU:C:2013:824, punti 41 u 42).

51

Fil-każ ineżami, hekk kif ġie rrilevat fil-punt 23 tas-sentenza preżenti, il-partijiet tal-azzar iwweldjati inkwistjoni fil-kawża prinċipali huma kkostitwiti minn żewġ trufijiet jew tlieta, fejn fosthom jistgħu jiġu identifikati, minn naħa, spalla waħda jew diversi ddisinjati sabiex jiġu konnessi mal-bordijiet tar-radjatur permezz ta’ welding tarf ma’ tarf u, min-naħa l-oħra, tarf ieħor b’għonq tal-kamin li jservi sabiex jiġi konness valv ta’ ventilazzjoni, valv ta’ regolazzjoni jew apparat ieħor, jew sabiex jiġi konness kwalunkwe pajp li jwassal għal sors ta’ tisħin.

52

Barra minn hekk, ir-rikorrenti fil-kawża prinċipali rrikonoxxiet, matul is-seduta quddiem il-Qorti tal-Ġustizzja, li d-dijametru intern tal-għonq tal-kamin li għandhom il-partijiet tal-azzar iwweldjati inkwistjoni fil-kawża prinċipali jikkorrispondi għad-dijametru klassiku użat, b’mod ġenerali, għat-tagħmir ta’ tubi u pajpijiet.

53

Minn dan isegwi li l-partijiet tal-azzar iwweldjati bħal dawk inkwistjoni fil-kawża prinċipali għandhom, bla ħsara għal verifika mill-qorti tar-rinviju tal-informazzjoni fattwali kollha quddiemha, jiġu kkunsidrati bħala “partijiet ta’ użu ġenerali”, fis-sens tan-nota 2 tat-Taqsima XV tan-NM u b’mod iktar partikolari, bħala “tagħmir ta’ tubi u pajpijiet” li jaqgħu taħt l-intestatura 7307 tan-NM.

54

Għal dak li jikkonċerna l-validità tar-Regolament ta’ Implimentazzjoni 2015/23, għandu jitfakkar li, skont il-ġurisprudenza stabbilita tal-Qorti tal-Ġustizzja, minn naħa, regolament ta’ klassifikazzjoni huwa adottat mill-Kummissjoni meta l-klassifikazzjoni ta’ prodott partikolari fin-NM tista’ tqajjem diffikultajiet jew tista’ tkun suġġett ta’ tilwima u, min-naħa l-oħra, tali regolament għandu portata ġenerali peress li ma japplikax għal operatur partikolari, iżda b’mod ġenerali għal prodotti identiċi għal dak li huwa s-suġġett ta’ tali klassifikazzjoni (sentenzi tad-19 ta’ Frar 2009, Kamino International Logistics, C‑376/07, EU:C:2009:105, punt 63, kif ukoll tas-26 ta’ April 2017, Stryker EMEA Supply Chain Services, C‑51/16, EU:C:2017:298, punt 59 u l-ġurisprudenza ċċitata).

55

Fil-każ ineżami, l-informazzjoni fid-deċiżjoni tar-rinviju ma tippermettix li jiġi ddeterminat b’mod ċar jekk il-partijiet tal-azzar iwweldjati inkwistjoni fil-kawża prinċipali humiex identiċi għall-prodott kopert mir-Regolament ta’ Implimentazzjoni 2015/23 u għaldaqstant jekk dan huwiex applikabbli għal tali partijiet.

56

Anki jekk jiġi preżunt li l-imsemmi Regolament ta’ Implimentazzjoni huwa applikabbli, il-Qorti tal-Ġustizzja diġà ddeċidiet li tali applikazzjoni ma hijiex neċessarja meta, permezz tar-risposta tagħha għal domanda preliminari, il-Qorti tal-Ġustizzja tkun ipprovdiet lill-qorti tar-rinviju bl-informazzjoni kollha neċessarja għall-klassifikazzjoni ta’ prodott fl-intestatura xierqa tan-NM (sentenza tas‑26 ta’ April 2017, Stryker EMEA Supply Chain Services, C‑51/16, EU:C:2017:298, punt 62).

57

Minn dan isegwi li, peress li mill-argumenti preċedenti jirriżulta li l-Qorti tal-Ġustizzja pprovdiet lill-qorti tar-rinviju l-informazzjoni kollha neċessarja għall-klassifikazzjoni tal-partijiet tal-azzar iwweldjati inkwistjoni fil-kawża prinċipali fl-intestatura xierqa tan-NM, ma hemmx lok li tingħata deċiżjoni dwar il-validità tar-Regolament ta’ Implimentazzjoni 2015/23.

58

Fid-dawl ta’ dak kollu li ntqal, ir-risposta għad-domandi magħmula għandha tkun li n-NM għandha tiġi interpretata fis-sens li partijiet tal-azzar iwweldjati bħal dawk inkwistjoni fil-kawża prinċipali għandhom jiġu kklassifikati, bla ħsara għall-verifika mill-qorti tar-rinviju tal-informazzjoni fattwali kollha quddiemha, fl-intestatura 7307 tan-NM, bħala “tagħmir ta’ tubi u pajpijiet”.

59

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (It-Tmien Awla) taqta’ u tiddeċiedi:

In-Nomenklatura Magħquda li tinsab fl-Anness I tar-Regolament tal-Kunsill (KEE) Nru 2658/87 tat-23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana, kif emendat bir-Regolament ta’ Implimentazzjoni tal-Kummissjoni (UE) Nru 1101/2014 tas‑16 ta’ Ottubru 2014, għandha tiġi interpretata fis-sens li partijiet tal-azzar iwweldjati bħal dawk inkwistjoni fil-kawża prinċipali għandhom jiġu kklassifikati, bla ħsara għall-verifika mill-qorti tar-rinviju tal-informazzjoni fattwali kollha quddiemha, fl-intestatura 7307 tan-Nomenklatura Magħquda, bħala “tagħmir ta’ tubi u pajpijiet”.