1.

Il-provvista ta’ servizzi tat-trasport internazzjonali tal-merkanzija bit-triq fl-Unjoni Ewropea ma hija suġġetta għal ebda kwota jew limitazzjoni fil-volum jew fil-frekwenza tas-servizzi ( 2 ). B’kuntrast, il-kabotaġġ, li jista’ jiġi ddefinit bħala l-provvista ta’ servizzi nazzjonali tat-trasport tal-merkanzija fit-triq, huwa suġġett għal limitazzjonijiet meta jitwettaq minn trasportaturi li ma humiex residenti. Filwaqt li ebda kwota ma tapplika għall-provvista ta’ servizzi ta’ kabotaġġ minn trasportaturi mhux residenti, dawk it-trasportaturi huma, skont l-Artikolu 8(2) tar-Regolament Nru 1072/2009, permessi biss li jwettqu sa tliet operazzjonijiet ta’ kabotaġġ wara trasport internazzjonali minn Stat Membru ieħor jew minn pajjiż terz. Barra minn hekk, dawk it-tliet operazzjonijiet għandhom isiru fi żmien sebat ijiem mill-ħatt tat-trasport internazzjonali.

2.

L-Artikolu 8(2) tar-Regolament Nru 1072/2009, li hu magħruf bħala r-regola “tlieta minn seba’” ( 3 ), huwa suġġett għal interpretazzjonijiet differenti fuq livell nazzjonali ( 4 ). B’mod partikolari nqalgħu diffikultajiet fir-rigward tal-għadd ta’ operazzjonijiet ta’ kabotaġġ.

3.

Id-dispożizzjonijiet nazzjonali taħt skrutinju f’din il-kawża huma r-regoli Daniżi, li jipprovdu li operazzjoni waħda ta’ kabotaġġ tista’ tinvolvi jew diversi punti ta’ tagħbija jew diversi punti ta’ ħatt, imma mhux it-tnejn.

4.

Il-Kummissjoni Ewropea, min-naħa tagħha, tikkunsidra li operazzjoni ta’ kabotaġġ tista’ tinvolvi diversi punti ta’ tagħbija u bosta punti ta’ ħatt. Għaldaqstant, hija ppreżentat rikors quddiem il-Qorti tal-Ġustizzja, skont it-tieni paragrafu tal-Artikolu 258 TFUE, maħsub sabiex jiġi kkonstatat li, meta rrifjuta li jgħodd bħala operazzjoni waħda ta’ kabotaġġ operazzjoni b’diversi punti ta’ tagħbija u diversi punti ta’ ħatt, ir-Renju tad-Danimarka naqas milli jwettaq l-obbligi tiegħu skont ir-Regolament Nru 1072/2009.

5.

Għandi ngħid li, filwaqt li l-kabotaġġ jirrappreżenta sehem żgħir ħafna tat-trasport nazzjonali tal-merkanzija fit-triq fid-Danimarka ( 5 ) u l-kabotaġġ illegali huwa baxx ( 6 ), l-interpretazzjoni tar-regola “tlieta minn seba’” tista’ tkun minkejja dan importanti għal dak l-Istat Membru billi d-Danimarka tidher li hija affettwata b’mod partikolari mill-hekk imsejjaħ “kabotaġġ sistematiku”, fejn “it-trasportaturi jgħaddu l-maġġoranza tal-ħin tagħhom jagħmlu trasport nazzjonali f’pajjiż ieħor tal-Unjoni”. Dan jidher li huwa dovut għall-pagi relattivament għoljin tax-xufiera fid-Danimarka ( 7 ) u, preżumibbilment, il-ġeografija ta’ dak l-Istat Membru.

6.

L-Artikolu 2 tar-Regolament Nru 1072/2009 jipprovdi:

“Għall-finijiet ta’ dan ir-Regolament:

[…]

[…]”

7.

L-Artikolu 8 tar-Regolament Nru 1072/2009 jipprovdi:

“1.   Kull trasportatur b’kiri jew qligħ, li huwa detentur ta’ liċenza Komunitarja u li x-xufier tiegħu, jekk ikun ċittadin ta’ pajjiż terz, ikollu l-attestazzjoni tax-xufier, ikun intitolat, permezz tal-kondizzjonijiet stabbiliti f’dan il-Kapitolu, iwettaq operazzjonijiet ta’ kabotaġġ.

2.   Ladarba l-merkanzija li tinġarr tul vjaġġ internazzjonali li jkun dieħel tiġi kkunsinjata, it-trasportaturi msemmijin fil-paragrafu 1 għandhom ikun permessi jwettqu, bl-istess vettura, jew, fil-każ ta’ vetturi mgħaqqdin, il-vettura bil-mutur ta’ dik l-istess vettura, sa tliet operazzjonijiet ta’ kabotaġġ wara t-trasport internazzjonali minn Stat Membru ieħor jew minn pajjiż terz għall-Istat Membru ospitanti. L-aħħar ħatt tul operazzjoni tal-kabotaġġ qabel it-tluq mill-Istat Membru ospitanti għandu jsseħħ fi żmien sebat ijiem mill-aħħar ħatt fl-Istat Membru ospitanti waqt il-vjaġġ internazzjonali li jkun dieħel.

Fil-limitu ta’ żmien imsemmi fl-ewwel subparagrafu, it-trasportaturi jistgħu jwettqu wħud mill-operazzjonijiet ta’ kabotaġġ, jew kollha kemm huma, permessi taħt dak is-subparagrafu fi kwalunkwe Stat Membru bil-kondizzjoni li jkunu limitati għal operazzjoni ta’ kabotaġġ waħda għal kull Stat Membru fi żmien tlett ijiem mid-dħul mhux mgħobbi fit-territorju ta’ dak l-Istat Membru

[…]”

8.

Il-punt 3 tal-Linji Gwida fuq ir-regoli dwar il-kabotaġġ fit-triq fir-Regolament Nru 1072/2009 tal-Parlament Ewropew u tal-Kunsill dwar regoli komuni għall-aċċess għas-suq internazzjonali tat-trasport bit-triq tal-merkanzija ( 8 ) (iktar ’il quddiem il-“Linji Gwida dwar il-Kabotaġġ”), li t-Trafikstyrelsen (l-Uffiċċju tat-Trasport), ippubblika fuq is-sit internet tiegħu fil-21 ta’ Mejju 2010, jgħid:

“Operazzjoni ta’ kabotaġġ hija ddefinita bħala trasport nazzjonali ta’ kunsinna mill-ġbir tal-oġġetti sakemm jaslu għand id-destinatarju kif speċifikat fin-nota tal-kunsinna. Operazzjoni tista’ tinvolvi diversi punti ta’ tagħbija jew diversi kunsinni.

[…]”

9.

Permezz ta’ ittri tad-9 ta’ Settembru u tat-2 ta’ Ottubru 2013, il-Kummissjoni talbet lir-Renju tad-Danimarka, fi ħdan il-qafas ta’ proċedura pilota tal-UE ( 9 ), informazzjoni dwar regoli nazzjonali relatati mal-kabotaġġ. Ir-Renju tad-Danimarka wieġeb b’ittri tat-18 ta’ Novembru u tat-12 ta’ Diċembru 2013.

10.

Fil-11 ta’ Lulju 2014, il-Kummissjoni, li ma kinitx sodisfatta b’dawk it-tweġibiet, bagħtet ittra ta’ intimazzjoni lir-Renju tad-Danimarka u sostniet b’mod partikolari li dan l-Istat Membru kien kiser l-Artikolu 2 u l-Artikolu 8 tar-Regolament Nru 1072/2009. Fil-fehma tal-Kummissjoni, il-Linji Gwida dwar il-Kabotaġġ, fejn operazzjoni ta’ kabotaġġ jista’ jkollha jew diversi punti ta’ tagħbija jew diversi punti ta’ ħatt, imma mhux it-tnejn, kienu inkonsistenti ma’ dawk id-dispożizzjonijiet li ma ffissawx numru massimu ta’ punti ta’ tagħbija jew ta’ ħatt.

11.

Permezz ta’ ittra tad-9 ta’ Settembru 2014, ir-Renju tad-Danimarka ppreżenta l-osservazzjonijiet tiegħu dwar din l-ittra ta’ intimazzjoni.

12.

Fil-25 ta’ Settembru 2015, il-Kummissjoni bagħtet opinjoni motivata lir-Renju tad-Danimarka. Il-Kummissjoni ddikjarat, b’mod partikolari, li d-definizzjoni ta’ operazzjoni ta’ kabotaġġ li tinvolvi diversi punti ta’ tagħbija jew diversi punti ta’ ħatt kienet inkonsistenti mal-Artikolu 2(6) u l-Artikolu 8(2) tar-Regolament Nru 1072/2009.

13.

Permezz tal-ittra tal-25 ta’ Novembru 2015, ir-Renju tad-Danimarka ssottometta l-osservazzjonijiet tiegħu dwar l-opinjoni motivata.

14.

Billi ma kinitx konvinta mill-argumenti tar-Renju tad-Danimarka, il-Kummissjoni ressqet din il-kawża fil-25 ta’ Ottubru 2016.

15.

Il-Kummissjoni titlob lill-Qorti tal-Ġustizzja sabiex tiddikjara li r-Renju tad-Danimarka naqas milli jwettaq l-obbligi tiegħu skont l-Artikolu 2(6) u l-Artikolu 8 tar-Regolament Nru 1072/2009 u tikkundanna lir-Renju tad-Danimarka jbati l-ispejjeż.

16.

Ir-Renju tad-Danimarka jitlob lill-Qorti tal-Ġustizzja tiċħad ir-rikors għar-raġuni li ma kisritx id-dispożizzjonijiet tar-Regolament Nru 1072/2009 dwar il-kabotaġġ. Ir-Renju tad-Danimarka jitlob ukoll lil-Kummissjoni tiġi kkundannata sabiex tbati l-ispejjeż.

17.

Ġew sottomessi osservazzjonijiet bil-miktub mill-Kummissjoni u mir-Renju tad-Danimarka. Kemm ir-Renju tad-Danimarka kif ukoll il-Kummissjoni ppreżentaw osservazzjonijiet orali waqt is-seduta tal-11 ta’ Ottubru 2017.

18.

Il-Kummissjoni ssostni li r-Renju tad-Danimarka naqas milli jwettaq l-obbligi tiegħu skont l-Artikolu 2(6) u l-Artikolu 8 tar-Regolament Nru 1072/2009 billi jippermetti li operazzjoni ta’ kabotaġġ ikollha diversi punti ta’ tagħbija jew diversi punti ta’ ħatt, imma mhux it-tnejn.

19.

L-ewwel nett, il-Kummissjoni ssostni li l-Artikolu 8(2) tar-Regolament Nru 1072/2009 ma jipprovdix għal numru massimu ta’ punti ta’ tagħbija u/jew ta’ ħatt fl-istess operazzjoni ta’ kabotaġġ. Għalhekk, operazzjoni jista’ jkollha kwalunkwe numru ta’ punti ta’ tagħbija u/jew ta’ ħatt. Għaldaqstant, il-Linji Gwida dwar il-Kabotaġġ, fejn operazzjoni ta’ kabotaġġ jista’ jkollha diversi punti ta’ tagħbija jew diversi punti ta’ ħatt, iżda mhux it-tnejn, iżidu kundizzjoni ġdida ma’ dawk stabbiliti fir-Regolament Nru 1072/2009. Fil-fatt, dak ir-regolament jirrestrinġi n-numru ta’ operazzjonijiet ta’ kabotaġġ li jistgħu jitwettqu wara trasport internazzjonali. Ma jirrestrinġix in-numru ta’ punti ta’ tagħbija u/jew ta’ ħatt ta’ operazzjoni ta’ kabotaġġ.

20.

It-tieni nett, il-Kummissjoni tissottometti li l-Artikolu 2(6) u l-Artikolu 8(2) tar-Regolament Nru 1072/2009 jirregolaw b’mod eżawrjenti d-definizzjoni ta’ operazzjoni ta’ kabotaġġ. Għaldaqstant, l-Istati Membri ma għandhom l-ebda diskrezzjoni f’dak ir-rigward. Jista’ jkun hemm biss interpretazzjoni waħda tal-kunċett ta’ operazzjoni ta’ kabotaġġ. Dik l-interpretazzjoni tinsab f’dokument adottat mill-Kummissjoni fil-forma ta’ mistoqsijiet u tweġibiet (iktar ’il quddiem “l-Q&A”) ( 10 ) u ppubblikat fuq is-sit internet tad-Direttorat Ġenerali tal-Kummissjoni għall-Mobbiltà u t-Trasport. Dak id-dokument jorbot lill-Istati Membri kollha. F’dak ir-rigward, huwa irrilevanti li l-Kumitat għat-Trasport bit-Triq, li jikkonsisti minn rappreżentanti tal-Istati Membri, ma vvotax dwar dak id-dokument, billi ma kienet meħtieġa l-ebda votazzjoni.

21.

It-tielet nett, il-Kummissjoni tirrikonoxxi li l-Kumitat għat-Trasport bit-Triq kien oriġinarjament ikkunsidra li operazzjoni ta’ kabotaġġ tista’ tinvolvi biss “diversi punti ta’ tagħbija jew diversi kunsinni” [traduzzjoni mhux uffiċjali]. Madankollu, dik il-pożizzjoni ttieħdet fil-laqgħa tas-17 ta’ Novembru 2009 ta’ dak il-kumitat, jiġifieri, qabel ma r-Regolament Nru 1072/2009 sar applikabbli. Ladarba l-Artikoli 8 u 9 tar-Regolament Nru 1072/2009 saru applikabbli fl-14 ta’ Mejju 2010 ( 11 ), inqalgħu xi problemi fir-rigward tad-definizzjoni ta’ operazzjoni ta’ kabotaġġ. Għalhekk, din il-kwistjoni ġiet diskussa mill-ġdid mill-Kumitat għat-Trasport bit-Triq fil-laqgħa tal-25 ta’ Ottubru 2010. F’dik il-laqgħa, ir-rappreżentanti tal-Istati Membri laħqu ftehim. Huma kkonkludew li operazzjoni ta’ kabotaġġ tista’ tinvolvi “diversi punti ta’ tagħbija, diversi punti ta’ kunsinna jew saħansitra diversi punti ta’ tagħbija u ta’ kunsinna, skont il-każ”. Dik l-interpretazzjoni tal-kunċett ta’ operazzjoni ta’ kabotaġġ ġiet sussegwentement ippubblikata mill-Kummissjoni fil-forma tal-Q&A imsemmija iktar ’il fuq.

22.

Ir-raba’ nett, fil-fehma tal-Kummissjoni, ma jistax jiġi argumentat li l-fatt li jiġi permess li operazzjoni ta’ kabotaġġ tippermetti diversi punti ta’ tagħbija u diversi punti ta’ ħatt huwa inkonsistenti mal-għan tar-Regolament Nru 1072/2009 u jipperikola n-natura temporanja tal-kabotaġġ. Dan minħabba li n-natura temporanja hija ggarantita mir-regola “tlieta minn sebgħa” stabbilita fl-Artikolu 8(2) tar-Regolament Nru 1072/2009.

23.

Il-ħames nett, il-Kummissjoni ssostni li, kuntrarjament għal dak li jsostni r-Renju tad-Danimarka, l-interpretazzjoni tal-kunċett ta’ operazzjoni ta’ kabotaġġ stabbilit fil-Linji Gwida dwar il-Kabotaġġ hija inkonsistenti mal-prinċipju ta’ proporzjonalità. Li t-trasportaturi mhux residenti jiġu ppreklużi milli jwettqu operazzjonijiet ta’ kabotaġġ b’diversi punti ta’ tagħbija u diversi punti ta’ ħatt jillimita bla bżonn l-opportunitajiet ta’ trasportaturi li jwettqu operazzjonijiet ta’ kabotaġġ. B’kuntrast, li trasportaturi mhux residenti jitħallew iwettqu operazzjonijiet b’diversi punti ta’ tagħbija u diversi punti ta’ ħatt jevita vjaġġi vojta u jtejjeb l-effiċjenza tat-trasport.

24.

Ir-Renju tad-Danimarka jsostni li, meta jippermetti li operazzjoni ta’ kabotaġġ ikollha jew diversi punti ta’ tagħbija jew diversi punti ta’ ħatt, imma mhux it-tnejn, huwa ma kisirx l-Artikolu 2(6) u l-Artikolu 8 tar-Regolament Nru 1072/2009.

25.

Ir-Renju tad-Danimarka jsostni li r-Regolament Nru 1072/2009 ma jirregolax b’mod eżawrjenti l-operazzjonijiet ta’ kabotaġġ peress li d-dispożizzjonijiet ta’ dan ir-regolament li jirrigwardaw il-kabotaġġ ma humiex ċari. Għaldaqstant, l-Istati Membri jistgħu jadottaw miżuri għall-applikazzjoni ta’ dawk id-dispożizzjonijiet, iżda dawk il-miżuri għandhom ikunu konsistenti mal-prinċipju ta’ proporzjonalità.

26.

L-ewwel nett, ir-Renju tad-Danimarka jsostni li r-Regolament Nru 1072/2009 huwa nieqes miċ-ċarezza dwar id-definizzjoni ta’ operazzjonijiet ta’ kabotaġġ. Dak ir-regolament ma jispeċifikax minn kemm punti ta’ tagħbija u/jew punti ta’ ħatt tista’ tkun magħmula operazzjoni ta’ kabotaġġ. Għalhekk, ma jistax jiġi determinat meta jintlaħaq l-limitu ta’ tliet operazzjonijiet stabbilit fl-Artikolu 8(2) ta’ dak ir-regolament. Dak in-nuqqas ta’ ċarezza huwa evidenzjat iktar bil-fatt li: (i) il-Kummissjoni oriġinarjament kienet tal-istess opinjoni bħar-Renju tad-Danimarka, u bidlet il-ħsieb tagħha biss waqt il-laqgħa tal-Kumitat għat-Trasport bit-Triq tal-25 ta’ Ottubru 2010; (ii) li l-Kummissjoni stess irrikonoxxiet fir-rapport tal-2014 ( 12 ) li d-definizzjoni ta’ kabotaġġ fir-Regolament Nru 1072/2009 ma kinitx ċara u kellha tiġi emendata; u li l-Istati Membri għandhom interpretazzjonijiet diverġenti ta’ dak il-kunċett.

27.

It-tieni nett, ir-Renju tad-Danimarka jsostni li l-Linji Gwida dwar il-Kabotaġġ huma xierqa sabiex jintlaħaq l-għan tar-Regolament Nru 1072/2009. L-għan ta’ dak ir-regolament huwa li jipprevjeni lil trasportaturi mhux residenti milli jwettqu kabotaġġ permanenti fl-Istat Membru ospitanti. Jekk operazzjoni ta’ kabotaġġ tista’ tikkonsisti minn diversi punti ta’ tagħbija u diversi punti ta’ ħatt, numru kbir ta’ vjaġġi jistgħu jitqiesu bħala operazzjoni waħda ta’ kabotaġġ. Il-limitu ta’ tliet operazzjonijiet stabbilit fl-Artikolu 8(2) tar-Regolament Nru 1072/2009 jitbattal mis-sustanza tiegħu. Il-kabotaġġ ma jibqax “temporanju”, kif jeħtieġ l-Artikolu 2(6) ta’ dak ir-regolament.

28.

It-tielet nett, ir-Renju tad-Danimarka jsostni li l-Linji Gwida dwar il-Kabotaġġ ma jmorrux lil hinn minn dak li huwa meħtieġ biex jintlaħaq l-għan tar-Regolament Nru 1072/2009. B’mod partikolari, ma jeħtiġux li operazzjoni ta’ kabotaġġ ikollha punt tat-tagħbija wieħed u punt ta’ ħatt wieħed. Barra minn hekk, ma hemm l-ebda limitazzjoni skont il-liġi Daniża dwar in-numru ta’ min jibgħat u l-prinċipali. Għaldaqstant, il-Linji Gwida dwar il-Kabotaġġ huma konsistenti mal-prinċipju ta’ proporzjonalità.

29.

L-ewwel nett se nispjega li l-Artikolu 2(6) u l-Artikolu 8(2) tar-Regolament Nru 1072/2009 ma jindirizzawx il-kwistjoni jekk operazzjoni ta’ kabotaġġ jistax ikollha diversi punti ta’ tagħbija u diversi punti ta’ ħatt. Imbagħad ser niddiskuti jekk dawk id-dispożizzjonijiet jagħtux lill-Istati Membri marġni ta’ diskrezzjoni biex jadottaw miżuri ta’ applikazzjoni għall-implementazzjoni tagħhom. Peress li dan huwa, fil-fehma tiegħi, il-każ, imbagħad nevalwa l-proporzjonalità tal-Linji Gwida dwar il-Kabotaġġ. Fl-aħħar nett, se nindirizza l-kwistjoni tal-forza legali tal-Q&A ppubblikata mill-Kummissjoni fuq il-websajt tagħha, li tistabbilixxi l-interpretazzjoni tal-Kummissjoni tal-kunċett ta’ operazzjoni ta’ kabotaġġ.

30.

Jiena ninnota li l-Artikolu 2(6) tar-Regolament Nru 1072/2009 ma jagħmel l-ebda riferiment għall-punti ta’ tagħbija jew ta’ ħatt. Dik id-dispożizzjoni sempliċement tenfasizza n-natura “temporanja” tal-operazzjonijiet ta’ kabotaġġ.

31.

L-Artikolu 8(2) tar-Regolament Nru 1072/2009 lanqas ma jagħmel referenza għall-punti ta’ tagħbija jew ta’ ħatt. Dik id-dispożizzjoni tiddikjara li massimu ta’ tliet operazzjonijiet ta’ kabotaġġ jistgħu jitwettqu fi żmien sebat ijiem minn trasport internazzjonali ( 13 ). Huwa veru li l-Artikolu 8(2) tar-Regolament Nru 1072/2009 jispeċifika li operazzjoni ta’ kabotaġġ jista’ jkollha diversi punti ta’ ħatt. Fil-fatt, skont l-aħħar sentenza tal-ewwel subparagrafu ta’ dik id-dispożizzjoni,“[l]-aħħar ħatt tul operazzjoni tal-kabotaġġ […] għandu jsseħħ fi żmien sebat ijiem mill-aħħar ħatt […] waqt il-vjaġġ internazzjonali li jkun dieħel” ( 14 ). Madankollu, l-Artikolu 8(2) ta’ dak ir-regolament ma jispeċifikax jekk operazzjoni ta’ kabotaġġ jistax ikollha wkoll diversi punti ta’ tagħbija. Għaldaqstant, dik id-dispożizzjoni ma tindikax jekk operazzjoni jistax jkollha diversi punti ta’ tagħbija u diversi punti ta’ ħatt.

32.

Fi kliem ieħor, l-Artikolu 2(6) u l-Artikolu 8(2) tar-Regolament Nru 1072/2009 sempliċement ma jindirizzawx il-kwistjoni jekk operazzjoni ta’ kabotaġġ jistax ikollha diversi punti ta’ tagħbija u diversi punti ta’ ħatt.

33.

B’kuntrast, il-Linji Gwida dwar il-Kabotaġġ jiddikjaraw b’mod ċar li “operazzjoni tista’ tinvolvi diversi punti ta’ tagħbija jew bosta kunsinni ” ( 15 ), u b’hekk tipprekludi operazzjonijiet li jikkonsistu f’diversi punti ta’ tagħbija u diversi punti ta’ ħatt. Fl-adozzjoni tal-Linji Gwida dwar il-Kabotaġġ, ir-Renju tad-Danimarka indirizza u ddeċieda b’mod ċar dwar il-kwistjoni.

34.

Għaldaqstant, għandu jiġi ddeterminat jekk ir-Regolament Nru 1072/2009 tax is-setgħa diskrezzjonali lir-Renju tad-Danimarka biex jadotta l-Linji Gwida dwar il-Kabotaġġ sabiex jiċċara d-definizzjoni ta’ operazzjonijiet ta’ kabotaġġ u r-regola “tlieta minn seba’” stipulata fl-Artikolu 2(6) u l-Artikolu 8(2) ta’ dak ir-regolament.

35.

Għandi nenfasizza li l-att tal-liġi tal-Unjoni li d-dispożizzjonijiet tiegħu allegatament inkisru mir-Renju tad-Danimarka huwa regolament, mhux direttiva.

36.

B’differenza mid-direttivi, ir-regolamenti, skont it-tieni paragrafu tal-Artikolu 288 TFUE, jorbtu fl-intier tagħhom u huma direttament applikabbli fl-Istati Membri kollha. Għaldaqstant, l-Istati Membri huma preklużi milli jadottaw miżuri domestiċi li jirriproduċu t-test ta’ regolament ( 16 ). Huma wkoll preklużi milli jadottaw miżuri domestiċi maħsuba biex ibiddlu l-kamp ta’ applikazzjoni ta’ regolament ( 17 ), jew id-dispożizzjonijiet tiegħu.

37.

Madankollu, dan ma jfissirx li l-Istati Membri huma preklużi milli jadottaw kwalunkwe miżura ta’ applikazzjoni tar-regolamenti. Dan minħabba li xi dispożizzjonijiet ta’ regolamenti jistgħu jeħtieġu, għall-implementazzjoni tagħhom, l-adozzjoni ta’ miżuri ta’ applikazzjoni mill-Istati Membri ( 18 ). Fi kliem ieħor, ir-regolamenti ma jistgħux jirregolaw b’mod eżawrjenti l-kwistjoni u jagħtu diskrezzjoni lill-Istati Membri biex jadottaw miżuri għall-implementazzjoni tagħhom ( 19 ).

38.

Skont ġurisprudenza stabbilita, l-Istati Membri jistgħu jadottaw regoli għall-applikazzjoni ta’ regolament iżda: b’dan ma għandhomx ifixklu l-applikabbiltà diretta tiegħu jew jaħbu n-natura tiegħu bħala att tad-dritt tal-Unjoni; għandhom jispeċifikaw li qed jaġixxu fl-eżerċizzju ta’ diskrezzjoni li ngħatatilhom taħt dak ir-regolament; u li huma jaderixxu mal-parametri stabbiliti iktar ’l isfel ( 20 ).

39.

Huwa permezz ta’ riferiment għad-dispożizzjonijiet relevanti tar-regolament inkwistjoni, interpretati fid-dawl tal-għanijiet tiegħu, li għandu jiġi ddeterminat jekk dawn jipprojbixxux, jimponux jew jippermettux lill-Istati Membri li jadottaw ċerti miżuri ta’ applikazzjoni u, b’mod partikolari f’din l-aħħar ipoteżi, jekk il-miżura kkonċernata taqax fil-kuntest tal-marġni ta’ diskrezzjoni li għandu kull Stat Membru ( 21 ).

40.

F’dan il-każ, la l-Artikolu 2(6) u lanqas l-Artikolu 8(2) tar-Regolament Nru 1072/2009 ma jirreferu għad-dritt nazzjonali. L-ebda waħda minn dawk id-dispożizzjonijiet ma tagħti s-setgħa espressament lill-Istati Membri biex jadottaw miżuri ta’ applikazzjoni fir-rigward tad-definizzjoni tal-kunċett ta’ operazzjoni ta’ kabotaġġ jew tar-regola ta’ “tliet minn seba’”. Lanqas ma tagħmel dan ebda dispożizzjoni oħra tar-Regolament Nru 1072/2009 ( 22 ).

41.

Madankollu, l-Istati Membri jistgħu jadottaw miżuri ta’ applikazzjoni tar-regolamenti minkejja li ma humiex espressament awtorizzati li jagħmlu dan ( 23 ).

42.

Pereżempju, it-tieni paragrafu tal-Artikolu 3 tar-Regolament tal-Kunsill Nru 1/2005 ( 24 ) jiddikjara li kundizzjoni waħda li għandha tiġi osservata għat-trasport tal-annimali hija li “għandhom jiġu pprovduti art u għoli biżżejjed għall-annimali, skond il-qies tagħhom u l-vjaġġ maħsub”. Madankollu, fir-rigward tat-trasport bit-triq tal-ħnieżer, ir-Regolament Nru 1/2005 ma jistabbilixxix standards numeriċi għall-għoli tal-kompartimenti interni li fihom dawn l-annimali jiġu ttrasportati. Lanqas ma jawtorizza espressament lill-Istati Membri biex jistabbilixxu tali rekwiżiti. Madankollu, ġie deċiż li l-Istati Membri jistgħu jadottaw miżuri ta’ implementazzjoni li jistabbilixxu standards numeriċi fir-rigward tal-għoli intern tal-kompartimenti li fihom jinġarru l-ħnieżer ( 25 ).

43.

Bl-istess mod, l-Artikolu 5 tar-Regolament tal-Kunsill (KE, Euratom) Nru 2988/95 ( 26 ) jelenka l-penalitajiet li “jistgħu” jiġu imposti f’każ ta’ ksur tad-dispożizzjonijiet tad-dritt tal-Unjoni li jippreġudikaw il-baġit tal-Unjoni ( 27 ). L-Artikolu 7 tar-Regolament Nru 2988/95 jiddikjara li dawk il-penalitajiet jistgħu jiġu imposti fuq l-operatur ekonomiku li wettaq dan il-ksur, jew fuq il-persuna li hija meħtieġa li tieħu r-responsabbiltà għall-ksur jew li tiżgura li ma jitwettaqx. Madankollu, ir-Regolament Nru 2988/95 ma jispeċifikax f’liema sitwazzjoni, u lanqas għal min japplikaw kull waħda mill-penalitajiet elenkati fl-Artikolu 5. Lanqas ma jawtorizza espressament lill-Istati Membri biex jadottaw dispożizzjonijiet f’dak ir-rigward ( 28 ). Madankollu, ġie deċiż li l-Istati Membri setgħu, u saħansitra kellhom, jadottaw dispożizzjonijiet f’dak il-qasam ( 29 ).

44.

Għandu jiġi rrilevat li, kif sostna r-Renju tad-Danimarka, il-fatt li dispożizzjoni ta’ regolament tkun stabbilita f’termini ġenerali jew mhux preċiżi huwa indikazzjoni li l-miżuri domestiċi ta’ applikazzjoni huma meħtieġa. Kif iddeċidiet il-Qorti tal-Ġustizzja fis-sentenza Zerbone, “fil-każ ta’ diffikultà ta’ interpretazzjoni, l-amministrazzjoni nazzjonali jista’ jkollha tadotta regoli ddettaljati għall-applikazzjoni ta’ regolament tal-[Unjoni] u fl-istess ħin tikkjarifika kwalunkwe dubju mqajjem” [Traduzzjoni mhux uffiċjali] ( 30 ). Fil-kawża Danske Svineproduceenter, l-Istati Membri ġew irrikonoxxuti bħala li għandhom ċerta diskrezzjoni sabiex jistabbilixxu standards numeriċi għall-għoli tal-kompartimenti interni għat-trasport bit-triq tal-ħnieżer minħabba li r-regolament applikabbli ma stabbilixxiex “b’mod preċiż” l-għoli ta’ tali kompartimenti, jiġifieri, ma stabbilixxiex l-istandards numeriċi huwa stess ( 31 ). Bl-istess mod, fil-kawża SGS Belgium, l-Istati Membri ġew irrikonoxxuti bħala intitolati li jadottaw miżuri ta’ applikazzjoni li jistabbilixxu penalitajiet billi d-dispożizzjonijiet rilevanti tar-Regolament Nru 2988/95 sempliċiment “jistabbilixxu r-regoli ġenerali” u dawn “ma jiddeterminaw[x] b’mod preċiż la liema mis-sanzjonijiet elenkati fl-Artikolu 5... għandha tiġi applikata... u lanqas il‑kategorija ta’ atturi li għandha tkun suġġetta għal tali sanzjoni f’każ bħal dan” ( 32 ).

45.

Fil-kawża preżenti, nikkunsidra li, għar-raġunijiet imsemmija iktar ’l isfel, l-Artikolu 2(6) u l-Artikolu 8(2) tar-Regolament Nru 1072/2009 jeħtieġu l-adozzjoni ta’ miżuri domestiċi ta’ applikazzjoni anki għalkemm ma jipprovdux espressament għall-adozzjoni ta’ miżuri bħal dawn.

46.

L-ewwel nett, sabiex jiġi aċċertat jekk intlaħaqx il-limitu ta’ tliet operazzjonijiet stabbilit fl-Artikolu 8(2) tar-Regolament Nru 1072/2009, huwa meħtieġ li jiġi deċiż jekk vjaġġ li jikkonsisti minn diversi postijiet ta’ tagħbija u diversi punti ta’ ħatt jgħoddx bħala operazzjoni waħda ta’ kabotaġġ, bħala żewġ operazzjonijiet, jew iktar. Fin-nuqqas ta’ dik il-kjarifika mill-Istati Membri, il-limitu ta’ tliet operazzjonijiet ma jistax jiġi applikat.

47.

It-tieni nett, l-Artikolu 2(6) tar-Regolament Nru 1072/2009 jiddefinixxi operazzjonijiet ta’ kabotaġġ f’termini ġenerali, sempliċement billi jiddikjara li huma operazzjonijiet ta’ “trasport nazzjonali” u li huma mwettqa “fuq bażi temporanja”. Kif imsemmi fil-punt 44 iktar ’il fuq, il-fatt li dispożizzjoni hija stabbilita f’termini mhux preċiżi hija indikazzjoni li huma meħtieġa l-miżuri domestiċi ta’ applikazzjoni.

48.

It-tielet nett, l-interpretazzjonijiet differenti tal-kunċett ta’ operazzjoni ta’ kabotaġġ mill-Istati Membri ( 33 ) huma indikattivi tan-nuqqas ta’ ċarezza u impreċiżjoni tal-Artikolu 2(6) u l-Artikolu 8(2) tar-Regolament Nru 1072/2009.

49.

Xi Stati Membri, bħall-Pajjiżi l-Baxxi ( 34 ) u l-Isvezja ( 35 ), jaqblu mal-Kummissjoni li operazzjoni ta’ kabotaġġ jista’ jkollha diversi punti ta’ tagħbija u diversi punti ta’ ħatt. Stati Membri oħra, bħad-Danimarka jew, sa ftit ilu, il-Finlandja, jikkunsidraw li operazzjoni jista’ ma jkollhiex diversi punti ta’ tagħbija u diversi punti ta’ ħatt ( 36 ). Taħt ċerta leġiżlazzjoni domestika, din il-pożizzjoni tal-aħħar hija suġġetta għal eċċezzjonijiet meta jkun hemm kuntratt wieħed tal-merkanzija li jipprovdi għal diversi punti ta’ tagħbija u punti ta’ ħatt, jew fejn il-ġbir minn postijiet differenti u/jew il-kunsinna lejn postijiet differenti jsiru għall-istess konsenjatur u/jew lill-istess destinatarju ( 37 ). Għandi nsemmi wkoll il-pożizzjoni tal-awtoritajiet tar-Renju Unit li, sabiex jingħaddu l-operazzjonijiet fejn ikun hemm ġabriet multipli u kunsinni multipli, iridu jittieħdu inkunsiderazzjoni n-“numru ta’ ġbir magħmul jew in-numru ta’ kunsinni magħmula, skont liema jkun l-iktar baxx” ( 38 ).

50.

Ir-raba’ nett, il-Kummissjoni nnifisha rrikonoxxiet il-ħtieġa li jiġi ċċarat il-kunċett ta’ operazzjoni ta’ kabotaġġ fir-Rapport dwar l-Istat tas-Suq tat-Trasport bit-Triq tal-Unjoni, fejn qalet li r-“reviżjoni [tar- Regolament Nru 1072/2009] se jkollha l-għan li tiċċara t-termini problematiċi [tiegħu], jiġifieri d-definizzjoni tal-[…] kabotaġġ” ( 39 ).

51.

Għaldaqstant, jien ma narax kif ir-Renju tad-Danimarka jista’ jiġi kkritikat għall-adozzjoni ta’ regoli domestiċi għall-implementazzjoni tal-Artikolu 2(6) u l-Artikolu 8 (2) tar-Regolament Nru 1072/2009.

52.

Fl-aħħar nett, għandu jiġi enfasizzat li dik il-konklużjoni ma hijiex qed titpoġġa fid-dubju mill-fatt li, fl-2017, il-Kummissjoni pproponiet li temenda d-definizzjoni ta’ operazzjoni ta’ kabotaġġ sabiex tispeċifika li operazzjoni jista’ jkollha diversi punti ta’ tagħbija u diversi punti ta’ ħatt ( 40 ).

53.

Fil-fatt, skont l-Artikolu 2(2) tal-proposta tal-2017 tal-Kummissjoni, l-Artikolu 2(6) tar-Regolament Nru 1072/2009 jinbidel b’dan li ġej: “‘operazzjoni ta’ kabotaġġ’ tfisser trasport nazzjonali f’isem ħaddieħor imwettaq fuq bażi temporanja fi Stat Membru ospitanti, li jinvolvi t-trasport ta’ merkanzija mill-ġbir minn punt jew punti ta’ tagħbija sal-kunsinna tagħha f’punt jew punti ta’ kunsinna, kif speċifikat fin-nota ta’ konsenja” ( 41 ).

54.

Il-fatt li l-Kummissjoni tipproponi li temenda l-Artikolu 2(6) tar-Regolament Nru 1072/2009 sabiex tispeċifika li operazzjoni ta’ kabotaġġ jista’ jkollha diversi punti ta’ tagħbija u diversi punti ta’ ħatt ma jfissirx li qabel, jew fin-nuqqas ta’ dik l-emenda, l-Istati Membri ma jistgħux jippermettu li operazzjoni tikkonsisti minn diversi punti ta’ tagħbija u diversi punti ta’ ħatt. Lanqas ma jfisser li qabel, jew fin-nuqqas ta’ dik l-emenda, l-Istati Membri huma meħtieġa li jippermettu li operazzjoni tikkonsisti minn diversi punti ta’ tagħbija u diversi punti ta’ ħatt. Fil-fatt, kif spjegajt, l-Artikolu 2(6) attwali tar-Regolament Nru 1072/2009 sempliċement ma jindirizzax dik il-kwistjoni. Il-proposta tal-2017 tal-Kummissjoni tagħżel interpretazzjoni waħda. Dik il-proposta ma tneħħi xejn mill-fatt li d-definizzjoni attwali ta’ operazzjoni ta’ kabotaġġ hija abbozzata f’termini ġenerali ħafna u għalhekk tagħti lill-Istati Membri marġni ta’ diskrezzjoni biex jagħżlu interpretazzjoni waħda jew l-oħra.

55.

Għandi ninnota wkoll li, fl-2017, il-Kummissjoni pproponiet ukoll li tabbanduna r-regola “tlieta minn seba’”. Fejn it-trasportaturi mhux residenti issa huma permessi li jwettqu tliet operazzjonijiet ta’ kabotaġġ fi żmien sebat ijiem mill-aħħar ħatt ta’ trasport internazzjonali, skont il-proposta tal-2017 tal-Kummissjoni, huma jkunu jistgħu jwettqu numru illimitat ta’ operazzjonijiet f’perijodu iqsar, jiġifieri, ħamest ijiem mill-aħħar ħatt ta’ trasport internazzjonali ( 42 ).

56.

Jekk l-Artikolu 8(2) tar-Regolament Nru 1072/2009 ġie emendat kif propost mill-Kummissjoni, ma jkunx hemm iktar bżonn li wieħed jgħodd l-operazzjonijiet tal-kabotaġġ peress li ma jkun hemm l-ebda limitu fuq in-numru ta’ operazzjonijiet li jistgħu jitwettqu fil-perijodu ta’ riferiment. Għalhekk, il-mistoqsija dwar jekk operazzjoni tistax tikkonsisti minn diversi punti ta’ tagħbija u diversi punti ta’ ħatt issir irrelevanti, u l-emenda proposta tal-Artikolu 2(6) tar-Regolament Nru 1072/2009 tkun bla sens.

57.

Fi kwalunkwe każ, ninnota li l-proposta tal-2017 tal-Kummissjoni bħalissa qed tiġi diskussa u li bosta Stati Membri esprimew in-nuqqas ta’ qbil tagħhom ( 43 ). Meta qed jinkiteb dan, hija biss il-fehma tal-Kummissjoni li l-Artikolu 2(6) tar-Regolament Nru 1072/2009 għandu jiġi emendat kif imsemmi iktar ’il fuq.

58.

Għaldaqstant, ma għandha tinġibed l-ebda konklużjoni mill-proposta tal-2017 tal-Kummissjoni biex jiġi emendat l-Artikolu 2(6) tar-Regolament Nru 1072/2009 sabiex jispeċifika li operazzjoni ta’ kabotaġġ tkun tista’ tikkonsisti minn diversi punti ta’ tagħbija u diversi punti ta’ ħatt.

59.

Jien nikkonkludi li l-Artikolu 2(6) u l-Artikolu 8(2) tar-Regolament Nru 1072/2009 jagħtu diskrezzjoni lill-Istati Membri biex jadottaw miżuri ta’ implementazzjoni li jiċċaraw il-kunċett ta’ operazzjoni ta’ kabotaġġ.

60.

Madankollu, miżuri ta’ applikazzjoni tal-Artikoli 2(6) u 8(2) tar-Regolament Nru 1072/2009 adottati mill-Istati Membri għandhom ikunu skont il-prinċipji ġenerali tad-dritt tal-Unjoni, b’mod partikolari l-prinċipju ta’ proporzjonalità ( 44 ).

61.

Dak il-prinċipju, li japplika, inter alia, għall-awtoritajiet leġiżlattivi u regolatorji tal-Istati Membri meta japplikaw id-dritt tal-Unjoni, jirrikjedi li miżuri implementati permezz ta’ dispożizzjoni għandhom ikunu xierqa sabiex jintlaħaq l-għan mixtieq u ma għandhomx imorru lil hinn minn dak li huwa meħtieġ biex dan jintlaħaq ( 45 ).

62.

Fl-opinjoni tiegħi, il-Linji Gwida dwar il-Kabotaġġ jikkonformaw mal-prinċipju ta’ proporzjonalità.

63.

L-ewwel nett, huma adegwati biex jintlaħaq l-għan li jrid ir-Regolament Nru 1072/2009 fir-rigward tal-kabotaġġ.

64.

L-għan tar-Regolament Nru 1072/2009 huwa, fir-rigward tal-kabotaġġ, biex jitwaqqaf “reġim transizzjonali” ( 46 ). Il-“ftuħ aktar [għall-] kabotaġġ” u l-liberalizzazzjoni mtejba għandha ssir biss “jekk ikun xieraq”, fid-dawl “tal-effettività tal-kontrolli u l-evoluzzjoni tal-kundizzjonijiet tal-impjieg fil-professjoni, l-armonizzazzjoni ta’ regoli fl-oqsma, inter alia, tal-infuzar u l-ħlasijiet tal-utenti tat-triq, u l-leġiżlazzjoni soċjali u dwar is-sikurezza” ( 47 ). F’dak ir-rigward, l-Artikolu 17(3) tar-Regolament Nru 1072/2009 jafda lill-Kummissjoni bil-kompitu li tevalwa jekk l-armonizzazzjoni f’dawk l-oqsma “ipprogressawx tant li jkun previst aktar ftuħ tas-swieq tat-trasport bit-triq domestiku, inkluż il-kabotaġġ” ( 48 ).

65.

Fi kliem ieħor, l-għan tar-Regolament Nru 1072/2009 ma huwiex, fir-rigward tal-kabotaġġ, li jinfetħu s-swieq domestiċi għal trasportaturi mhux residenti. Din hija r-raġuni għaliex, skont l-Artikolu 8(2) tar-Regolament Nru 1072/2009, il-kabotaġġ huwa permess biss wara trasport internazzjonali u huwa limitat għal tliet operazzjonijiet fi żmien sebat ijiem mill-ħatt ta’ dak it-trasport internazzjonali. Ninnota, f’dak ir-rigward, li, meta ħejjiet il-proposta għal dak li sar ir-Regolament Nru 1072/2009, il-Kummissjoni kkontemplat u ċaħdet għażla li biha t-trasportaturi mhux residenti jitħallew iwettqu numru illimitat ta’ operazzjonijiet ta’ kabotaġġ f’perijodu ta’ xahar wieħed ( 49 ). Dan huwa wkoll għaliex il-premessa 13 u l-Artikolu 2(6) tar-Regolament Nru 1072/2009 jenfasizzaw in-natura “temporanja” tal-kabotaġġ u l-premessa 15 ta’ dak ir-regolament tenfasizza li l-kabotaġġ ma għandux ikun “permanenti” jew “kontinw[u]”.

66.

Li t-trasportaturi mhux residenti jitħallew iwettqu tliet operazzjonijiet ta’ kabotaġġ b’numru illimitat ta’ punti ta’ tagħbija u numru illimitat ta’ punti ta’ ħatt jista’ jirrendi bla skop il-limitu ta’ tliet operazzjonijiet stabbiliti fl-Artikolu 8(2) tar-Regolament Nru 1072/2009. Pereżempju, trasportatur mhux residenti jista’ jgħabbi oġġetti fil-punt A, iħott xi oġġetti fil-punt B, jgħabbi oġġetti oħra fil-punt C, iħott xi oġġetti fil-punt D, jgħabbi oġġetti oħra fil-punt E, imbagħad iħott l-oġġetti kollha fil-punt F u xorta jkun għamel operazzjoni waħda biss ta’ kabotaġġ. In-natura temporanja tal-kabotaġġ għalhekk tkun żgurata biss permezz tal-limitu ta’ sebat ijiem.

67.

Jiena nenfasizza li, kif imsemmi fil-punt 65 iktar ’il fuq, l-għażla li permezz tagħha numru illimitat ta’ operazzjonijiet ta’ kabotaġġ ikunu permessi f’ċertu perijodu ta’ żmien (verament, xahar, mhux sebat ijiem) ġiet imwarrba mill-Kummissjoni fil-proposta tagħha għal dak li sar ir-Regolament Nru 1072/2009. Għażla bħal din ġiet ippreżentata reċentement biss (b’perijodu iqsar ta’ ħamest ijiem) fil-proposta tal-2017 tal-Kummissjoni ( 50 ).

68.

Għaldaqstant, jidhirli li jekk l-operazzjonijiet ta’ kabotaġġ ikollhom numru illimitat ta’ punti ta’ tagħbija u numru illimitat ta’ punti ta’ ħatt dan imur kontra n-natura temporanja tal-kabotaġġ previst fl-Artikolu 2(6) tar-Regolament Nru 1072/2009, il-limitu ta’ tliet operazzjonijiet stabbilit fl-Artikolu 8(2), u l-għan tar-Regolament Nru 1072/2009 fir-rigward tal-kabotaġġ.

69.

Bil-maqlub, il-preklużjoni tat-trasportaturi mhux residenti milli jwettqu operazzjonijiet ta’ kabotaġġ b’diversi punti ta’ tagħbija u diversi punti ta’ ħatt timmira biex tiġi żgurata n-natura temporanja tal-kabotaġġ u tinkiseb liberalizzazzjoni limitata tas-suq tal-kabotaġġ.

70.

Għalhekk, il-Linji Gwida dwar il-Kabotaġġ huma xierqa biex jintlaħaq l-għan segwit mir-Regolament Nru 1072/2009 fir-rigward tal-kabotaġġ.

71.

It-tieni nett, il-Linji Gwida dwar il-Kabotaġġ ma jmorrux lil hinn minn dak li huwa meħtieġ biex jinkiseb dak l-għan.

72.

Dan peress li, kif argumenta r-Renju tad-Danimarka, il-Linji Gwida dwar il-Kabotaġġ ma jipprekludux operazzjonijiet li jikkonsistu minn diversi punti ta’ tagħbija u punt ta’ ħatt wieħed, jew operazzjonijiet li jikkonsistu f’punt wieħed ta’ tagħbija u diversi punti ta’ ħatt. Huma jipprekludu biss operazzjonijiet li jikkonsistu f’diversi punti ta’ tagħbija u diversi punti ta’ ħatt. Dan huwa wkoll minħabba li, skont ir-Renju tad-Danimarka, il-Linji Gwida dwar il-Kabotaġġ ma jirrestrinġux in-numru ta’ konsenjaturi jew prinċipali.

73.

Jien nikkonkludi li r-Renju tad-Danimarka kellu setgħa diskrezzjonali li jadotta l-Linji Gwida dwar il-Kabotaġġ, li dawk il-Linji Gwida huma konsistenti mal-prinċipju ta’ proporzjonalità u li, għaldaqstant, ir-Renju tad-Danimarka ma naqasx, meta adottahom, milli jwettaq l-obbligi tiegħu skont l-Artikolu 2(6) u l-Artikolu 8(2) tar-Regolament Nru 1072/2009.

74.

Dik il-konklużjoni ma titpoġġiex fid-dubju mill-fatt li l-Kummissjoni adottat il-Q&A ( 51 ) li ġie ippubblikat fuq il-websajt tad-Direttorat Ġenerali tagħha għall-Mobilità u t-Trasport, u li jgħid li “operazzjoni ta’ kabotaġġ tista’ tinvolvi diversi punti ta’ tagħbija, diversi punti ta’ kunsinna jew saħansitra diversi punti ta’ tagħbija u ta’ kunsinna, skont il-każ” ( 52 ).

75.

F’dak ir-rigward, il-Kummissjoni targumenta li l-interpretazzjoni tagħha tal-kunċett ta’ operazzjoni ta’ kabotaġġ, kif stabbilit fil-Q&A, torbot lill-Istati Membri peress li r-rappreżentanti tal-Istati Membri ddiskutew u qablu fuq dik l-interpretazzjoni waqt il-laqgħa tal-25 ta’ Ottubru 2010 tal-Kumitat għat-Trasport bit-Triq, u għaliex ġiet ippubblikata fuq il-websajt tal-Kummissjoni ( 53 ).

76.

Dak l-argument, fil-fehma tiegħi, ma jistax jiġi aċċettat. Il-Q&A ma jistax jiġi kkunsidrat li jorbot lill-Istati Membri għar-raġunijiet li ġejjin.

77.

L-ewwel nett ninnota li, għalkemm, kif issostni l-Kummissjoni, il-Q&A ġie ppubblikat fuq is-sit internet tad-Direttorat Ġenerali għall-Mobbiltà u t-Trasport, ma ġiex ippubblikat fil-Ġurnal Uffiċjali.

78.

It-tieni nett, jien nenfasizza li, kuntrarjament għal dak li ssostni l-Kummissjoni, ir-rappreżentanti tal-Istati Membri ma qablux dwar l-interpretazzjoni tal-kunċett ta’ operazzjoni ta’ kabotaġġ li hija stabbilita fil-Q&A.

79.

F’dak ir-rigward, għandu jiġi enfasizzat li la l-Artikolu 2(6) u lanqas l-Artikolu 8(2) tar-Regolament Nru 1072/2009 ma jawtorizzaw lill-Kummissjoni tadotta att li jiċċara l-kunċett ta’ operazzjoni ta’ kabotaġġ jew ir-regola “tlieta minn sebgħa”. L-ebda dispożizzjoni oħra ta’ dak ir-regolament ma tagħmel hekk.

80.

Iżda min-naħa l-oħra t-tielet subparagrafu tal-Artikolu 4(2) tar-Regolament Nru 1072/2009 jipprovdi li l-Kummissjoni “għandha tadatta” għall-progress tekniku l-perijodu ta’ validità tal-liċenzja tal-Unjoni mogħtija lit-trasportaturi. Bl-istess mod, it-tieni subparagrafu tal-Artikolu 4(4) u l-Artikolu 5(4) tar-Regolament Nru 1072/2009 jgħidu li l-Kummissjoni “għandha tad[a]tta” għall-progress tekniku, rispettivament, l-Annessi I u II u l-Anness III ta’ dak ir-regolament ( 54 ). It-tielet subparagrafu tal-Artikolu 4(2), it-tieni subparagrafu tal-Artikolu 4(4) u l-Artikolu 5(4) tar-Regolament Nru 1072/2009 kollha jirrikjedu li l-Kummissjoni, meta “tadatta” għall-progress tekniku l-elementi kkonċernati, biex issegwi l-proċedura regolatorja bi skrutinju msemmi fl-Artikolu 15(2) ta’ dak ir-regolament. Skont dik il-proċedura, li hija stabbilita fl-Artikolu 5a(1) sa (4) tad-Deċiżjoni tal-Kunsill 1999/468/KE ( 55 ), kif emendata bid-Deċiżjoni tal-Kunsill 2006/512/KE ( 56 ), huwa meħtieġ vot tal-kumitat rilevanti, fil-każ ineżami l-Kumitat dwar it-Trasport bit-Triq ( 57 ).

81.

Peress li l-ebda dispożizzjoni tar-Regolament Nru 1072/2009 ma tagħti s-setgħa lill-Kummissjoni li tadotta atti li jiċċaraw il-kunċett ta’ operazzjoni ta’ kabotaġġ jew ir-regola ta’ “tliet minn sebgħa”, l-ebda dispożizzjoni ta’ dak ir-regolament ma’ teħtieġ li dawk l-atti jitressqu għall-votazzjoni fil-Kumitat dwar it-Trasport bit-Triq. Ma hemmx dubju li l-proċedura regolatorja bi skrutinju, jew kwalunkwe proċedura oħra li taħtha huwa meħtieġ vot ta’ dak il-kumitat ( 58 ), ma tapplikax għall-adozzjoni tal-Q&A. Dan ġie rrikonoxxut mill-Kummissjoni nnifisha fl-osservazzjonijiet bil-miktub tagħha ( 59 ).

82.

Barra minn hekk, l-Artikolu 2(2) tar-Regoli ta’ Proċedura għall-Kumitat għat-Trasport bit-Triq ( 60 ) jiddikjara li l-aġenda mfassla għal kull laqgħa “għandha tagħmel distinzjoni” bejn, minn naħa waħda, “miżuri proposti dwar liema [dak] il-kumitat hu mitlub jagħti opinjoni, skont il-proċedura regolatorja bi skrutinju”, min-naħa l-oħra, “kwistjonijiet oħra mqiegħda quddiem [dak] il-kumitat għal informazzjoni jew skambju sempliċi ta’ fehmiet”.

83.

Mill-fajl jidher li l-interpretazzjoni tal-kunċett ta’ operazzjoni ta’ kabotaġġ kienet fuq l-aġenda ta’ żewġ laqgħat tal-Kumitat għat-Trasport bit-Triq. Dawk il-laqgħat saru fis-17 ta’ Novembru 2009 u l-25 ta’ Ottubru 2010. F’kull waħda minn dawk il-laqgħat, dik il-kwistjoni kienet ġiet sempliċiment diskussa ( 61 ). Ma tressqitx għall-vot ( 62 ). Dan jissuġġerixxi li, kif argumenta r-Renju tad-Danimarka waqt is-seduta orali, dik il-kwistjoni kienet waħda mill-“kwistjonijiet l-oħra” imsemmija fl-Artikolu 2(2) tar-Regoli ta’ Proċedura għall-Kumitat għat-Trasport bit-Triq, imqiegħda quddiem dak il-kumitat “għal informazzjoni jew skambju sempliċi ta’ fehmiet”.

84.

Għaldaqstant, id-definizzjoni tal-kunċett ta’ operazzjoni ta’ kabotaġġ stabbilita fil-Q&A, mhux talli ma kien hemm l-ebda ftehim dwarha mill-maġġoranza tal-Istati Membri talli hija biss l-interpretazzjoni tal-Kummissjoni ta’ dak il-kunċett.

85.

Barra minn hekk, ninnota li, kieku l-proċedura regolatorja bi skrutinju kienet applikabbli, vot mill-Kumitat tat-Trasport bit-Triq favur l-interpretazzjoni tal-Kummissjoni tal-kunċett ta’ operazzjoni ta’ kabotaġġ ma kienx, fih innifsu, jagħmel dik l-interpretazzjoni vinkolanti fuq l-Istati Membri. Dan għaliex, skont l-Artikolu 5a(3) tad-Deċiżjoni 1999/468, kif emendat mid-Deċiżjoni 2006/512, jeħtieġ li jittieħdu passi oħra għal dak il-għan ( 63 ).

86.

It-tielet nett, jien nenfasizza li, fl-Evalwazzjoni tal-Impatt tal-proposta tagħha tal-2017, il-Kummissjoni stess irrikonoxxiet li l-Q&A “m’għandu l-ebda karattru legalment vinkolanti” ( 64 ). Dan intqal mill-ġdid waqt is-seduta orali mir-rappreżentant tal-Kummissjoni ( 65 ).

87.

Għaldaqstant, fil-fehma tiegħi l-Q&A ma jistax jitqies li jorbot lill-Istati Membri.

88.

Minn dan isegwi li l-Kummissjoni ma wrietx li r-Renju tad-Danimarka naqas milli jwettaq l-obbligi tiegħu skont l-Artikolu 2(6) u l-Artikolu 8 tar-Regolament Nru 1072/2009.

89.

Fid-dawl tal-kunsiderazzjonijiet preċedenti, nipproponi li l-Qorti tal-Ġustizzja għandha: