IL-KUMMISSJONI EWROPEA
Brussell, 24.11.2023
COM(2023) 739 final
2023/0422(NLE)
Proposta għal
REGOLAMENT TAL-KUNSILL
li jemenda l-Anness II tar-Regolament (KE) Nru 396/2005 tal-Parlament Ewropew u tal-Kunsill fir-rigward tal-livelli massimi ta’ residwi għat-tijakloprid f’ċerti prodotti jew fuqhom
(Test b’rilevanza għaż-ŻEE)
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
Ir-Regolament (KE) Nru 396/2005 jistabbilixxi, f’konformità mal-prinċipji ġenerali stabbiliti fir-Regolament (KE) Nru 178/2002, b’mod partikolari l-ħtieġa li jiġu żgurati livell għoli ta’ protezzjoni tal-konsumatur u dispożizzjonijiet armonizzati tal-Unjoni marbuta mal-livelli massimi (MRL) ta’ residwi tal-pestiċidi fl-ikel u l-għalf, jew fuqhom, li joriġinaw minn pjanti u annimali. Dan ir-Regolament jirrikonoxxi li għall-ikel u l-għalf prodotti barra mill-Unjoni, jistgħu jiġu applikati b’mod legali prattiki agrikoli differenti fir-rigward tal-użu tal-prodotti għall-protezzjoni tal-pjanti, li xi drabi jirriżultaw f’residwi tal-pestiċidi differenti minn dawk li jirriżultaw mill-użi applikati b’mod legali fl-Unjoni. Għalhekk, dan jipprevedi l-possibbiltà li ssir applikazzjoni għall-istabbiliment tal-MRL għall-prodotti importati (jiġifieri t-tolleranzi għall-importazzjoni) billi jiġi pprovdut fajl xjentifiku komprensiv li jqis dawn l-użi u r-residwi li jirriżultaw u li jiġi evalwat minn Stat Membru u mill-Awtorità Ewropea dwar is-Sigurtà fl-Ikel (EFSA). Barra minn hekk, l-MRL stabbiliti fil-livell internazzjonali mill-Kummissjoni Codex Alimentarius jiġu kkunsidrati wkoll meta jiġu stabbiliti l-MRL, filwaqt li jitqiesu l-prattiki agrikoli tajbin korrispondenti.
Għas-sustanza attiva tijakloprid, il-konklużjonijiet tal-EFSA dwar ir-rieżami bejn il-pari identifikaw oqsma ta’ tħassib kritiku fir-rigward tal-kontaminazzjoni tal-ilma ta’ taħt l-art bil-metaboliti tat-tijakloprid fir-rigward ta’ użu rappreżentattiv wieħed jew aktar li jissodisfa(w) il-kriterji tal-approvazzjoni previsti fl-Artikolu 4 tar-Regolament (KE) Nru 1107/2009. Minħabba f’hekk, l-approvazzjoni tas-sustanza ma ġġedditx bir-Regolament ta’ Implimentazzjoni tal-Kummissjoni (UE) 2020/23. Barra minn hekk, f’konformità mar-Regolament (KE) Nru 1272/2008 tal-Parlament Ewropew u tal-Kunsill, it-tijakloprid hija klassifikata bħala sustanza tossika għar-riproduzzjoni kategorija 1B.
Sat-3 ta’ Awwissu 2020, l-Istati Membri kellhom jirtiraw l-awtorizzazzjonijiet għall-prodotti għall-protezzjoni tal-pjanti li fihom it-tijakloprid bħala sustanza attiva. Il-perjodu massimu ta’ grazzja li għandu jingħata minn Stat Membru f’konformità mal-Artikolu 46 tar-Regolament (KE) Nru 1107/2009 skada fit-3 ta’ Frar 2021.
F’konformità mal-Artikolu 14(1)(a), u flimkien mal-Artikolu 17 tar-Regolament (KE) Nru 396/2005, wara n-nuqqas ta’ tiġdid tat-tijakloprid, il-Kummissjoni abbozzat Regolament biex l-MRL tagħha jitnaqqsu għal-limitu ta’ kwantifikazzjoni. Madankollu, jista’ jkun hemm xi eċċezzjonijiet għal ċerti tolleranzi għall-importazzjoni u MRL tal-Codex (CXL), b’mod partikolari dawk li ġew rieżaminati dan l-aħħar u li L-EFSA sabet li huma sikuri. Dawk l-MRL inżammu skont l-Artikolu 3(2)(g) u l-Artikolu 14(2)(a), (c) u (e) tar-Regolament (KE) Nru 396/2005.
Il-Kummissjoni pproponiet abbozz ta’ Regolament lill-Istati Membri, li ġie diskuss bir-reqqa fil-Kumitat Permanenti dwar il-Pjanti, l-Annimali, l-Ikel u l-Għalf fil-laqgħat tiegħu tat-13–14 ta’ Frar 2023, tal-10–11 ta’ Mejju 2023 u tat-18–19 ta’ Settembru 2023.
•Konsistenza mad-dispożizzjonijiet eżistenti fil-qasam ta’ politika
L-approċċ segwit huwa konsistenti mad-dispożizzjonijiet tar-Regolament (KE) Nru 396/2005.
2.BAŻI LEGALI, SUSSIDJARJETÀ U PROPORZJONALITÀ
•Bażi ġuridika
F’konformità mal-opinjoni motivata favorevoli adottata mill-EFSA u msejsa fuq l-Artikolu 14(1)(a) u l-Artikolu 49(2) tar-Regolament (KE) Nru 396/2005, tħejja abbozz ta’ Regolament tal-Kummissjoni li ġie ppreżentat lill-Kumitat Permanenti dwar il-Pjanti, l-Annimali, l-Ikel u l-Għalf (ara l-Kapitolu 1). Skont l-Artikolu 45(4) ta’ dak ir-Regolament, il-proċedura regolatorja bi skrutinju tapplika skont l-Artikolu 5a tad-Deċiżjoni tal-Kunsill 1999/468.
•Għażla tal-istrument
Fit-18–19 ta’ Settembru 2023, l-abbozz ta’ Regolament tal-Kummissjoni msemmi hawn fuq li jipproponi r-reviżjoni tal-MRL għat-tijakloprid ġie ppreżentat għal opinjoni lill-Kumitat Permanenti dwar il-Pjanti, l-Annimali, l-Ikel u l-Għalf. Il-Kumitat ma tax opinjoni dwar l-abbozz ta’ Regolament tal-Kummissjoni, peress li ma ntlaħqitx maġġoranza kwalifikata la favur u lanqas kontra l-miżuri proposti.
Konsegwentement, skont l-Artikolu 5a tad-Deċiżjoni tal-Kunsill 1999/468/KE flimkien mal-Artikolu 45(4) tar-Regolament (KE) Nru 396/2005, il-Kummissjoni qed tippreżenta lill-Kunsill u lill-Parlament abbozz ta’ Regolament tal-Kunsill b’rabta mal-miżuri li għandhom jittieħdu. Il-Kunsill għandu jaġixxi fuq il-miżura proposta b’maġġoranza kwalifikata fi żmien xahar minn meta tkun ġiet irriferita lilu. Jekk il-Kunsill jopponi l-miżura b’maġġoranza kwalifikata, il-miżura ma għandhiex tiġi adottata. Jekk il-Kunsill jipprevedi li jadotta l-miżura, huwa għandu jippreżentaha bla dewmien lill-Parlament Ewropew. Fin-nuqqas ta’ opinjoni tal-Kunsill, ir-Regolament jintbagħat lura lill-Kummissjoni, li għandha tippreżentah mingħajr dewmien għall-iskrutinju tal-Parlament Ewropew. Jekk il-Parlament ma jopponix il-miżura, din tal-aħħar għandha tiġi adottata mill-Kummissjoni. Jekk il-Parlament jopponi l-miżura, din ma għandhiex tiġi adottata mill-Kummissjoni.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
Ma huma previsti l-ebda evalwazzjonijiet ex post, konsultazzjonijiet mal-partijiet ikkonċernati u valutazzjonijiet tal-impatt għal dan ir-Regolament ta’ Implimentazzjoni fil-kuntest tar-Regolament (KE) Nru 396/2005.
4.IMPLIKAZZJONIJIET BAĠITARJI
Ir-Regolament ma għandu l-ebda impatt fuq il-baġit.
5.ELEMENTI OĦRA
•Spjegazzjoni fid-dettall tad-dispożizzjonijiet speċifiċi tal-proposta
Issa li l-approvazzjoni tagħha ma ġġeddidtx, dan ir-Regolament għandu l-għan li jnaqqas l-MRL eżistenti kollha għat-tijakloprid għal-limitu ta’ detezzjoni, minbarra xi MRL ibbażati fuq użi f’pajjiżi mhux tal-UE. L-MRL għat-tijakloprid fil-papaja u fit-te jikkorrispondu għat-tolleranzi għall-importazzjoni, li fl-2023, l-EFSA kkonfermat li huma sikuri għall-konsumaturi. L-MRL għat-tijakloprid fil-ġewż tas-siġar, l-isparġel, in-naspli/naspli tal-Ġappun, il-berquq, iċ-ċiras (ħelu), l-għanbaqar, il-frawli, it-tut, it-tut salvaġġ, il-frott żgħir u kukku oħrajn, il-kiwi, il-patata, it-tadam, il-brunġiel, il-bettieħ, id-dulliegħ, ir-ross, il-qamħ, il-prodotti tal-annimali (il-ħnieżer, l-annimali bovini, in-nagħaġ, iż-żwiemel, il-pollam, u annimali terrestri mrobbijin oħrajn) mit-tessuti (il-muskoli, il-fwied, il-kliewi u l-ġewwieni li jittiekel), il-ħalib u l-bajd jikkorrispondu għas-CXL li tqiesu sikuri għall-konsumaturi.
2023/0422 (NLE)
Proposta għal
REGOLAMENT TAL-KUNSILL
li jemenda l-Anness II tar-Regolament (KE) Nru 396/2005 tal-Parlament Ewropew u tal-Kunsill fir-rigward tal-livelli massimi ta’ residwi għat-tijakloprid f’ċerti prodotti jew fuqhom
(Test b’rilevanza għaż-ŻEE)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea,
Wara li kkunsidra r-Regolament (KE) Nru 396/2005 tal-Parlament Ewropew u tal-Kunsill tat-23 ta’ Frar 2005 dwar il-livelli massimi ta’ residwu ta’ pestiċidi fi jew fuq ikel u għalf li joriġina minn pjanti u annimali u jemenda d-Direttiva tal-Kunsill 91/414/KEE, u b’mod partikolari l-Artikolu 14(1)(a) u l-Artikolu 49(2) tiegħu,
Billi:
(1)Għat-tijakloprid, il-livelli massimi ta’ residwi (MRL) ġew stabbiliti fl-Anness II tar-Regolament (KE) Nru 396/2005.
(2)Skont ir-Regolament ta’ Implimentazzjoni tal-Kummissjoni (UE) 2020/23, wara t-tħassib kritiku identifikat mill-Awtorità Ewropea dwar is-Sigurtà fl-Ikel (“l-Awtorità”) b’rabta mal-kontaminazzjoni tal-ilma ta’ taħt l-art bil-metaboliti tat-tijakloprid, l-approvazzjoni tas-sustanza attiva tijakloprid ma ġġedditx. Barra minn hekk, f’konformità mar-Regolament (KE) Nru 1272/2008 tal-Parlament Ewropew u tal-Kunsill, it-tijakloprid hija klassifikata bħala sustanza tossika għar-riproduzzjoni kategorija 1B.
(3)L-awtorizzazzjonijiet kollha għall-prodotti għall-protezzjoni tal-pjanti li fihom is-sustanza attiva tijakloprid ġew revokati minħabba r-riskju għas-saħħa tal-bniedem li jirriżulta mill-użu tat-tijakloprid u mill-kontaminazzjoni tal-ilma ta’ taħt l-art. Għalhekk, jixraq li jitħassru l-MRL eżistenti bbażati fuq il-prattiki agrikoli tajbin relatati ma’ dawk l-awtorizzazzjonijiet stabbiliti għal din is-sustanza fl-Anness II tar-Regolament (KE) Nru 396/2005 f’konformità mal-Artikolu 17 ta’ dak ir-Regolament flimkien mal-Artikolu 14(1)(a) tiegħu.
(4)F’konformità mal-Artikolu 43 tar-Regolament (KE) Nru 396/2005, il-Kummissjoni talbet lill-Awtorità biex tipprovdi opinjoni motivata, li fiha tivvaluta r-riskji li l-MRL attwali, imsejsa fuq it-tolleranzi għall-importazzjoni u l-MRL tal-Codex (CXL) għat-tijakloprid, jistgħu joħolqu lill-konsumaturi meta titqies l-aktar data reċenti dwar il-konsum disponibbli u l-preżenza jew in-nuqqas tad-data konfermatorja meħtieġa biex jiġu indirizzati l-lakuni fid-data li ġew identifikati waqt ir-rieżami tal-MRL f’konformità mal-Artikolu 12 tar-Regolament (KE) Nru 396/2005.
(5)L-awtorità kkonkludiet li l-MRL stabbiliti għar-residwi tat-tijakloprid fil-papaja u fit-te kienu derivati minn tolleranzi għall-importazzjoni li kienu ġew appoġġati minn data u li huma meqjusa sikuri għall-konsumaturi. Għalhekk, jenħtieġ li dawn l-MRL jinżammu f’konformità mal-Artikolu 3(2)(g) tar-Regolament (KE) Nru 396/2005.
(6)Għar-residwi tat-tijakloprid fil-ġewż tas-siġar, l-isparġel, in-naspli/naspli tal-Ġappun, il-berquq, iċ-ċiras (ħelu), l-għanbaqar, il-frawli, it-tut, it-tut salvaġġ, il-frott żgħir u kukku oħrajn, il-kiwi, il-patata, it-tadam, il-brunġiel, il-bettieħ, id-dulliegħ, ir-ross, il-qamħ, il-prodotti tal-annimali (il-ħnieżer, l-annimali bovini, in-nagħaġ, iż-żwiemel, il-pollam, u annimali terrestri mrobbijin oħrajn) mit-tessuti (il-muskoli, il-fwied, il-kliewi u l-ġewwieni li jittiekel), il-ħalib u l-bajd, l-MRL eżistenti jikkorrispondu għall-valuri tas-CXL, u l-Awtorità kkonkludiet li huma sikuri għall-konsumaturi7; għalhekk, jenħtieġ li dawn jinżammu wkoll f’konformità mal-prinċipji tal-Artikolu 14(2)(e) tar-Regolament (KE) Nru 396/2005.
(7)Għal-lampun, il-ħjar, iz-zukkini, iż-żerriegħa tal-lift, iż-żerriegħa tal-mustarda u ż-żerriegħa tal-qoton, jixraq li l-MRL jitnaqqsu għall-valuri korrispondenti tas-CXL li l-Awtorità kkonkludiet li huma sikuri għall-konsumaturi7; għalhekk, jenħtieġ li dawn jitnaqqsu wkoll. L-awtorità evalwat id-data konfermatorja ppreżentata biex jiġu indirizzati l-lakuni fid-data li ġew identifikati matul ir-rieżami tal-MRL f’konformità mal-Artikolu 12 tar-Regolament (KE) Nru 396/2005 u kkonkludiet li r-rekwiżiti tad-data jew ġew issodisfati jew ma għadhomx meħtieġa7. Għalhekk, u biex jiġi evitat kull dubju, jenħtieġ li jitħassru n-noti f’qiegħ il-paġna rispettivi li jindikaw in-nuqqas ta’ informazzjoni dwar il-provi tar-residwi, dwar il-metaboliżmu tal-għelejjel bit-trattament taż-żerriegħa u dwar il-metodi analitiċi għal prodotti bażiċi differenti.
(8)L-Awtorità identifikat riskju għas-saħħa għall-konsumaturi rigward l-MRL għall-ħawħ u għall-bżar ħelu7. Għalhekk, jixraq li l-MRL għal dawk il-prodotti jitnaqqsu għal-limiti ta’ detezzjoni speċifiċi għall-prodott.
(9)Għar-residwi tat-tijakloprid imsejsa fuq prattiki agrikoli tajbin li ma għadhomx awtorizzati fl-UE, jixraq li l-MRL rispettivi stabbiliti fl-Anness II tar-Regolament (KE) Nru 396/2005 jitnaqqsu għal-limitu ta’ detezzjoni speċifiku għall-prodott f’konformità mal-Artikolu 14(1)(a) tar-Regolament (KE) Nru 396/2005, flimkien mal-Artikolu 17 ta’ dak ir-Regolament.
(10)Il-Kummissjoni kkonsultat lil-laboratorji ta’ referenza tal-Unjoni Ewropea dwar ir-residwi tat-tijakloprid fir-rigward tal-ħtieġa li jiġu adattati ċerti limiti ta’ detezzjoni. Dawk il-laboratorji pproponew limiti ta’ detezzjoni speċifiċi għall-prodott li jistgħu jinkisbu b’mod analitiku għall-prodotti kollha.
(11)Permezz tal-Organizzazzjoni Dinjija tal-Kummerċ, l-imsieħba kummerċjali tal-Unjoni ġew ikkonsultati dwar l-MRL il-ġodda, u tqiesu l-kummenti tagħhom. B’mod partikolari, l-MRL għax-xaħam mill-ħnieżer, mill-annimali bovini, min-nagħaġ, mill-mogħoż, mill-ekwini u minn annimali terrestri mrobbijin oħrajn ġew allinjati ma’ dawk tal-muskoli, li għalihom ġew implimentati s-CXL rispettivi biex jirriflettu l-proporzjon ta’ muskoli u xaħam fil-“laħam (mill-mammiferi, għajr il-mammiferi tal-baħar)”.
(12)Għalhekk, jenħtieġ li ir-Regolament (KE) Nru 396/2005 jiġi emendat skont dan.
(13)Biex ikun hemm lok għall-kummerċjalizzazzjoni, l-ipproċessar u l-konsum normali tal-prodotti, jenħtieġ li dan ir-Regolament ma japplikax għall-prodotti li ġew prodotti fl-Unjoni jew li ġew importati fl-Unjoni qabel ma bdew japplikaw l-MRL il-ġodda u li għalihom inżamm livell għoli ta’ protezzjoni tal-konsumatur. Dan japplika għall-prodotti kollha, għajr għall-ħawħ u l-bżar ħelu.
(14)Jenħtieġ li jitħalla jgħaddi perjodu raġonevoli ta’ żmien qabel ma l-MRL modifikati jsiru applikabbli sabiex l-Istati Membri, il-pajjiżi terzi u l-operaturi tan-negozji tal-ikel ikunu jistgħu jħejju ruħhom biex jissodisfaw ir-rekwiżiti l-ġodda li se jirriżultaw mill-modifikazzjoni tal-MRL.
(15)Il-Kumitat Permanenti dwar il-Pjanti, l-Annimali, l-Ikel u l-Għalf ma tax opinjoni fil-limitu ta’ żmien stipulat mill-President tiegħu. Għalhekk, jenħtieġ li l-miżuri previsti f’dan ir-Regolament jiġu adottati mill-Kunsill.
ADOTTA DAN IR-REGOLAMENT:
Artikolu 1
L-Anness II tar-Regolament (KE) Nru 396/2005 huwa emendat f’konformità mal-Anness ta’ dan ir-Regolament.
Artikolu 2
Ir-Regolament (KE) Nru 396/2005 kif kien qabel ma ġie emendat b’dan ir-Regolament għandu jibqa’ japplika għall-prodotti li ġew manifatturati fl-Unjoni jew li ġew importati fl-Unjoni qabel [Uffiċċju tal-Pubblikazzjonijiet: jekk jogħġbok daħħal id-data 6 xhur wara d-data tad-dħul fis-seħħ ta’ dan ir-Regolament], ħlief għall-ħawħ u għall-bżar ħelu.
Artikolu 3
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu japplika minn [Uffiċċju tal-Pubblikazzjonijiet: jekk jogħġbok daħħal id-data 6 xhur wara d-data tad-dħul fis-seħħ ta’ dan ir-Regolament].
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell,
Għall-Kunsill
Il-President