This document is an excerpt from the EUR-Lex website
Document 52023DC0060
REPORT FROM THE COMMISSION TO THE EUROPEAN PARLIAMENT AND THE COUNCIL on the implementation of the public sector loan facility under the Just Transition Mechanism in 2022, as referred in Article 16 of Regulation (EU) 2021/1229
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-implimentazzjoni tal-faċilità ta’ self għas-settur pubbliku skont il-Mekkaniżmu ta’ Tranżizzjoni Ġusta fl-2022, kif imsemmi fl-Artikolu 16 tar-Regolament (UE) 2021/1229
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-implimentazzjoni tal-faċilità ta’ self għas-settur pubbliku skont il-Mekkaniżmu ta’ Tranżizzjoni Ġusta fl-2022, kif imsemmi fl-Artikolu 16 tar-Regolament (UE) 2021/1229
COM/2023/60 final
IL-KUMMISSJONI EWROPEA
Brussell, 7.2.2023
COM(2023) 60 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
dwar l-implimentazzjoni tal-faċilità ta’ self għas-settur pubbliku skont il-Mekkaniżmu ta’ Tranżizzjoni Ġusta fl-2022, kif imsemmi fl-Artikolu 16 tar-Regolament (UE) 2021/1229
RAPPORT TAL-KUMMISSJONI LILL-PARLAMENT EWROPEW U LILL-KUNSILL
dwar l-implimentazzjoni tal-faċilità ta’ self għas-settur pubbliku skont il-Mekkaniżmu ta’ Tranżizzjoni Ġusta fl-2022, kif imsemmi fl-Artikolu 16 tar-Regolament (UE) 2021/1229
1. Introduzzjoni u għan ta’ dan ir-rapport
F’Diċembru 2019, il-Kummissjoni stabbiliet Patt Ekoloġiku Ewropew għall-Unjoni Ewropea u ċ-ċittadini tagħha 1 , filwaqt li fakkret fl-impenn tal-Kummissjoni li tindirizza l-isfidi relatati mal-klima u mal-ambjent u tiddeskrivi l-ħtieġa għal tranżizzjoni mwettqa b’mod ġust u inklużiv. F’Jannar 2020, il-Kummissjoni spjegat Mekkaniżmu għal Tranżizzjoni Ġusta bħala parti mill-Pjan ta’ Investiment tal-Patt Ekoloġiku Ewropew 2 , biex tiżgura li ħadd u l-ebda reġjun ma jitħalla jibqa’ lura fit-tranżizzjoni lejn ekonomija newtrali għall-klima. L-għan primarju tal-mekkaniżmu huwa li jipprovdi appoġġ lir-reġjuni u lin-nies l-aktar milquta ħażin u li jgħinhom itaffu l-ispejjeż soċjoekonomiċi tat-tranżizzjoni. Il-Mekkaniżmu ta’ Tranżizzjoni Ġusta jikkonsisti fi tliet pilastri: l-ewwel pilastru huwa l-Fond għal Tranżizzjoni Ġusta, it-tieni pilastru huwa skema ddedikata taħt il-Programm InvestEU, filwaqt li t-tielet pilastru huwa l-faċilità ta’ self għas-settur pubbliku (il-Faċilità).
Taħt il-Faċilità, is-self (ipprovdut mill-Bank Ewropew tal-Investiment bħala sieħeb finanzjarju) se jiġi kkombinat ma’ għotjiet (ipprovduti mill-Unjoni) biex jiġu appoġġati l-entitajiet tas-settur pubbliku b’riżorsi biex jissodisfaw il-ħtiġijiet tal-iżvilupp fit-tranżizzjoni lejn ekonomija newtrali għall-klima.
Il-Faċilità se tappoġġja proġetti li ma jiġġenerawx fluss suffiċjenti ta’ dħul biex ikopru l-kostijiet tal-investiment tagħhom u jindirizzaw il-ħtiġijiet ta’ żvilupp tat-territorji identifikati fil-Pjanijiet territorjali ta’ tranżizzjoni ġusta 3 . L-investimenti appoġġati se jkopru firxa wiesgħa ta’ ħtiġijiet ta’ żvilupp, mill-infrastruttura tal-enerġija u tat-trasport, in-networks tat-tisħin distrettwali, l-effiċjenza enerġetika, kif ukoll it-titjib tal-ħiliet u t-taħriġ mill-ġdid, it-taħriġ u l-infrastruttura soċjali, inkluż l-akkomodazzjoni soċjali.
1.1. Qafas legali u baġitarju tal-faċilità ta’ self għas-settur pubbliku taħt il-Mekkaniżmu għal Tranżizzjoni Ġusta
Il-Faċilità kienet stabbilita permezz tar-Regolament (UE) 2021/1229 tal-Parlament Ewropew u tal-Kunsill fl-14 ta’ Lulju 2021 Dwar il-faċilità ta’ self għas-settur pubbliku taħt il-mekkaniżmu għal Tranżizzjoni Ġusta (minn hawn ‘il quddiem “ir-Regolament PSLF”).
Ir-Regolament PSLF jipprovdi baġit massimu totali ta’ EUR 1 525 miljun ta’ appoġġ tal-Unjoni għall-komponent tal-għotja tal-Faċilità (inklużi l-assistenza teknika u l-appoġġ konsultattiv).
Barra minn hekk, il-Bank Ewropew tal-Investiment se jipprovdi sa EUR 10 biljun għall-komponent tas-self tal-Faċilità.
1.2. L-ambitu tar-rapport ta’ implimentazzjoni tal-2022
Skont l-Artikolu 16(3) tar-Regolament PSLF, "sal-31 ta’ Ottubru ta’ kull sena kalendarja, li tibda mill-2022, il-Kummissjoni għandha toħroġ rapport dwar l-implimentazzjoni tal-Faċilità. Dak ir-rapport għandu jipprovdi informazzjoni dwar il-livell ta’ implimentazzjoni tal-Faċilità fir-rigward tal-objettivi, il-kondizzjonijiet u l-indikaturi tal-prestazzjoni tagħha.”
Kif spjegat hawn taħt, il-pubblikazzjoni tal-ewwel sejħa għal proposti taħt il-Faċilità kienet soġġetta għat-tlestija ta’ għadd ta’ passi preparatorji inkluż: l-adozzjoni tad-deċiżjoni ta’ finanzjament (ara l-punt2.1.1), id-delega tal-implimentazzjoni tal-Faċilità lis-CINEA (ara l-punt2.1.2), l-iffirmar tal-ftehim amministrattiv mas-sieħeb finanzjarju (ara l-punt2.1.3) u l-istabbiliment tal-appoġġ konsultattiv taħt iċ-Ċentru tal-Konsulenza tal-InvestEU (ara l-punt2.1.4). Barra minn hekk, il-pubblikazzjoni tal-ewwel sejħa għal proposti kienet soġġetta għall-adozzjoni ta’ għadd suffiċjenti ta’ Pjanijiet territorjali għal tranżizzjonijiet ġusti, peress li dawn il-pjanijiet huma meħtieġa għall-applikanti potenzjali biex jidentifikaw proġetti rilevanti u jissottomettu l-proposti tagħhom.
Fis-16 ta’ Ġunju 2022, il-Kummissjoni adottat l-ewwel programmi tal-Fond għal Tranżizzjoni Ġusta u l-Pjanijiet ta’ tranżizzjoni territorjali ġusta relatati għall-perjodu ta’ programmazzjoni 2021-2027 4 . Dan ippermetta lill-Kummissjoni tipproċedi bil-pubblikazzjoni tal-ewwel sejħa għal proposti taħt il-Faċilità fid-19 ta’ Lulju 2022 bl-ewwel skadenza għas-sottomissjoni sseħħ fid-19 ta’ Ottubru 2022.
Għalhekk, l-implimentazzjoni tal-Faċilità għadha kif bdiet u hemm biss elementi limitati li għandhom jiġu rrapportati.
Għalhekk, dan l-ewwel rapport se jiffoka fuq id-deskrizzjoni tal-passi preparatorji ewlenin li wasslu għall-pubblikazzjoni tal-ewwel sejħa għall-proposti u l-karatteristiċi tas-sejħa.
Sabiex f’dan ir-rapport jiġu inklużi elementi relatati mal-implimentazzjoni attwali tal-Faċilità, ġie deċiż li dan ir-rapport jiġi ffinalizzat u jinħareġ biss wara l-ewwel skadenza għas-sottomissjoni, u għalhekk ftit dewmien meta mqabbel mal-iskadenza regolatorja stabbilita fir-Regolament PSLF.
2. Rapport dwar l-implimentazzjoni tal-Faċilità
2.1. Tħejjijiet għall-pubblikazzjoni tal-ewwel sejħa għal proposti taħt il-Faċilità
2.1.1. Adozzjoni tad-deċiżjoni ta’ finanzjament
Skont l-Artikolu 14 tar-Regolament PSLF (Programmi ta’ Ħidma), il-Faċilità għandha tiġi implimentata permezz ta’ programmi ta’ ħidma stabbiliti skont l-Artikolu 110 tar-Regolament Finanzjarju u adottati permezz ta’ atti ta’ implimentazzjoni tal-Kummissjoni skont il-proċedura ta’ komitoloġija.
Id-deċiżjoni ta’ finanzjament inkluż il-programm ta’ ħidma pluriennali għall-Faċilità għall-perjodu 2021-2025 irċeviet opinjoni pożittiva mill-Kumitat għall-Fondi tar-Regolament dwar Dispożizzjonijiet Komuni fis-6 ta’ Mejju 2022 5 u ġiet adottata fis-17 ta’ Ġunju 2022.
Id-deċiżjoni ta’ finanzjament inkluż il-programm ta’ ħidma pluriennali hija disponibbli għall-pubbliku:
- fuq is-sit web tal-Kummissjoni għall-Politika ta’ Koeżjoni: Pubblikazzjoni tad-Deċiżjonijiet ta’ Finanzjament u l-Programm ta’ Ħidma Annwali - DĠ REGIO - Politika Reġjonali - Kummissjoni Ewropea (europa.eu)
- fuq il- “portal Funding &Tenders”, il-punt tad-dħul għall-parteċipanti fil-programmi ta’ finanzjament mill-Kummissjoni Ewropea: 2022_public_loan_facility_annex.pdf (europa.eu)
2.1.2. Delegazzjoni tal-implimentazzjoni tal-Faċilità lis-CINEA
Il-ġestjoni tal-Faċilità ġiet iddelegata 6 mid-Direttorat Ġenerali tal-Kummissjoni għall-Politika Reġjonali u Urbana (DĠ REGIO) lill-Aġenzija Eżekuttiva Ewropea għall-Infrastruttura Klimatika u l-Ambjent (CINEA) 7 u l-qsim finali tal-kompiti ġie miftiehem permezz ta’ Memorandum ta’ Qbil iffirmat fil-5 ta’ Settembru 2022.
Is-CINEA hija responsabbli għall-implimentazzjoni ta’ kompiti speċifiċi li jikkonċernaw l-għoti ta’ għajnuna finanzjarja tal-Unjoni u l-implimentazzjoni tal-approprjazzjonijiet korrispondenti mdaħħla fil-baġit tal-Unjoni, taħt is-superviżjoni tad-DĠ REGIO li jaġixxi bħala d-DĠ prinċipali. Id-DĠ REGIO jibqa’ responsabbli mill-aspetti ta’ politika u l-għażla finali tal-proġetti li għandhom jiġu appoġġati mill-Faċilità.
2.1.3. Ftehim amministrattiv mas-sieħeb finanzjarju (Bank Ewropew tal-Investiment)
Skont l-Artikolu 8 tar-Regolament PSLF (Ftehim amministrattiv), il-Kummissjoni u s-sieħeb finanzjarju għandhom jiffirmaw ftehim amministrattiv, qabel l-implimentazzjoni tal-Faċilità.
Wara negozjati mal-Bank Ewropew tal-Investiment, il-ftehim amministrattiv bejn il-Kummissjoni u l-Bank Ewropew tal-Investiment daħal fis-seħħ fl-1 ta’ Settembru 2022.
2.1.4. Appoġġ ta’ konsulenza taħt iċ-Ċentru ta’ Konsulenza InvestEU
Skont l-Artikolu 3 (Objettivi) u l-Artikolu 13 (Servizzi ta’ appoġġ konsultattiv) tar-Regolament PSLF, jenħtieġ li jiġi pprovdut appoġġ konsultattiv (għat-tħejjija, l-iżvilupp u l-implimentazzjoni ta’ proġetti eliġibbli) u jiġi implimentat f’ġestjoni indiretta, f’konformità mar-regoli u l-metodi ta’ implimentazzjoni għaċ-Ċentru tal-Konsulenza tal-InvestEU.
Sa EUR 35 miljun għandhom jiġu pprovduti għal attivitajiet ta’ appoġġ konsultattiv, li minnhom mill-inqas EUR 10 miljun għandhom jappoġġaw il-kapaċità amministrattiva tal-benefiċjarji, b’mod partikolari fir-reġjuni inqas żviluppati.
Il-Kummissjoni u l-Bank Ewropew tal-Investiment fl-4 ta’ Marzu 2022 8 iffirmaw ftehim konsultattiv fir-rigward tal-attivitajiet konsultattivi u l-appoġġ operazzjonali li għandhom jiġu implimentati mill-Bank Ewropew tal-Investiment taħt iċ-Ċentru tal-Konsulenza tal-InvestEU fil-perjodu 2021-2024.
Dan il-ftehim jagħti dettalji u jimplimenta l-appoġġ konsultattiv fir-rigward tal-Faċilità. Fil-prattika, l-appoġġ konsultattiv jista’ jintalab mill-benefiċjarji potenzjali permezz tal-punt tad-dħul ċentrali taċ-Ċentru tal-Konsulenza tal-InvestEU 9 .
Id-disponibbiltà tal-appoġġ konsultattiv tqassmet b’mod wiesa’ bħala parti mill-attivitajiet ta’ komunikazzjoni li jappoġġaw il-pubblikazzjoni tal-ewwel sejħa għal proposti taħt il-Faċilità.
Sa miż-żmien tal-abbozzar ta’ dan ir-rapport, ma kien hemm l-ebda talba għal appoġġ. Madankollu, il-Bank Ewropew tal-Investiment ilu jagħti pariri lill-benefiċjarji potenzjali fir-rigward ta’ proġetti potenzjali taħt il-Mekkaniżmu għal Tranżizzjoni Ġusta permezz ta’ JASPERS 10 , Appoġġ Konsultattiv tal-Proġetti u Servizzi ta’ Konsulenza.
2.1.5. Prinċipji orizzontali
Skont l-Artikolu 4 tar-Regolament PSLF (Prinċipji orizzontali), il-konformità mal-prinċipji orizzontali għandha tiġi żgurata meta tiġi implimentata l-Faċilità.
Dan ġie rifless b’modi differenti fid-dokumentazzjoni, f’konformità mal-prattiki tal-Kummissjoni. Il-konformità mal-prinċipji orizzontali ġiet inkluża fit-test tas-sejħa għall-proposti bħala kundizzjoni ta’ eliġibbiltà u bħala parti mill-kriterji tal-aġġudikazzjoni. Konsegwentement, il-mudell tal-formola tal-applikazzjoni jinkludi mistoqsijiet iddedikati dwar il-konformità ma’ dawn il-prinċipji.
Barra minn hekk, skont ir-regoli, il-politiki u l-proċeduri tiegħu stess, il-Bank Ewropew tal-Investiment jinkludi wkoll il-konformità ma’ dawn il-prinċipji fil-valutazzjoni tiegħu tas-self li għandu jiġi pprovdut mill-Bank Ewropew tal-Investiment.
2.2. Il-bidu tal-implimentazzjoni tal-Faċilità
2.2.1. L-istabbiliment tal-parametri għall-implimentazzjoni tal-Faċilità
Skont l-Artikolu 7 tar-Regolament PSLF (Disponibbiltà tar-riżorsi), it-total tal-għotjiet allokati lil proġetti eliġibbli fi Stat Membru partikolari skont is-sejħa għall-proposti ppubblikata mhux aktar tard mill-31 ta’ Diċembru 2025 ma għandux jaqbeż is-sehem nazzjonali korrispondenti allokat lil tali Stat Membru. Dawn l-ishma nazzjonali huma stabbiliti fl-Anness I tar-Regolament (UE) 2021/1056 tal-Parlament Ewropew u tal-Kunsill 11 u fid-deċiżjoni ta’ finanzjament inkluż il-programm ta’ ħidma pluriennali.
Il-Kummissjoni ddeċidiet li tibda l-implimentazzjoni tal-Faċilità bl-ewwel sejħa pluriennali għall-proposti. Din is-sejħa għall-proposti se tkun l-unika waħda ppubblikata biex tkopri l-perjodu 2022–2025. Is-sehem nazzjonali kollu ta’ kull Stat Membru se jkun disponibbli taħt din l-ewwel sejħa pluriennali għall-proposti.
Il-Kummissjoni se tippubblika t-tieni sejħa pluriennali għall-proposti biex tkopri l-perjodu 2026-2027. Din it-tieni sejħa għall-proposti se jkollha baġit li jikkonsisti fi kwalunkwe ammont li jibqa’ disponibbli taħt kull sehem nazzjonali fi tmiem l-ewwel sejħa għall-proposti u se tagħti għotjiet fuq bażi kompetittiva fil-livell tal-Unjoni.
2.2.2. Il-pubblikazzjoni tal-ewwel sejħa għal proposti taħt il-Faċilità
Peress li l-aċċess għall-finanzjament taħt il-Faċilità huwa kundizzjonali għall-eżistenza ta’ Pjan territorjali ta’ tranżizzjoni ġusta approvat, ġie deċiż li l-ewwel sejħa għal proposti tiġi ppubblikata biss wara l-adozzjoni ta’ għadd suffiċjenti ta’ pjanijiet territorjali ta’ tranżizzjoni ġusta.
Fis-16 ta’ Ġunju 2022, il-Kummissjoni adottat l-ewwel programmi tal-Fond għal Tranżizzjoni Ġusta u l-Pjanijiet ta’ tranżizzjoni territorjali ġusta relatati għall-perjodu ta’ programmazzjoni 2021-2027.
Dan ippermetta lill-Kummissjoni tipproċedi bil-pubblikazzjoni tal-ewwel sejħa għal proposti taħt il-Faċilità fid-19 ta’ Lulju 2022. L-ewwel skadenza għas-sottomissjoni seħħet fid-19 ta’ Ottubru 2022, u se tkun segwita minn tliet skadenzi għas-sottomissjoni għal kull sena kalendarja (f’Jannar, April u Settembru 2023, 2024 u 2025), kif spjegat fit-tabella ta’ hawn taħt.
Wara l-pubblikazzjoni tal-ewwel sejħa, ġew adottati Pjanijiet territorjali ta’ tranżizzjoni ġusta addizzjonali. Fiż-żmien tal-ewwel skadenza għas-sottomissjoni, ġew adottati 16-il Pjan territorjali ta’ tranżizzjoni ġusta għat-territorji li jinsabu fl-Awstrija, fiċ-Ċekja, f’Ċipru, fl-Estonja, fi Franza, fil-Ġermanja, fil-Greċja u fl-Iżvezja.
B’kollox, madwar 70 Pjan territorjali ta’ tranżizzjoni ġusta huma mistennija li jiġu adottati sal-ewwel kwart tal-2023 12 .
2.2.3. Disponibbiltà tas-sejħa għal proposti u attivitajiet ta’ komunikazzjoni inizjali
Is-sejħa għall-proposti hija ppubblikata u aċċessibbli fuq il-portal tal-Kummissjoni għall-Finanzjament u l-Offerti 13 . Tista’ ssib ukoll informazzjoni mill-applikanti potenzjali fuq il-Pjattaforma għal Tranżizzjoni Ġusta 14 u fuq is-sit web tas-CINEA 15 . Il-pubblikazzjoni tal-ewwel sejħa għal proposti taħt il-Faċilità ġiet disseminata wkoll b’mezzi tas-soltu oħra (ara t-Taqsima 3.2) inkluż fi stqarrija għall-istampa konġunta bejn il-Kummissjoni u l-BEI u l-midja soċjali.
Barra minn hekk, il-Kummissjoni, is-CINEA u l-Bank Ewropew tal-Investiment organizzaw “Jum ta’ Informazzjoni” apposta fl-14 ta’ Settembru 2022. Matul dan l-avveniment, l-aspetti tal-politika tal-Faċilità u l-proċeduri biex tintalab għotja mill-Kummissjoni u self mill-Bank Ewropew tal-Investiment ġew spjegati fid-dettall u l-mistoqsijiet tal-applikanti potenzjali ġew imwieġba. L-avveniment ġie rreġistrat u l-link għar-replay huwa disponibbli għal kwalunkwe applikant potenzjali fuq il-paġna web tal-Faċilità tas-sit web tas-CINEA 16 .
Ġiet organizzata wkoll sessjoni ddedikata dwar l-appoġġ konsultattiv disponibbli (inkluż fir-rigward tal-Faċilità) taħt iċ-Ċentru tal-Konsulenza tal-InvestEU.
Żewġ sessjonijiet ta’ informazzjoni ddedikati oħra saru fl-21 ta’ Settembru 2022 fi ħdan il-Ġimgħa Sostenibbli tal-Enerġija tal-UE u fl-11 ta’ Ottubru 2022 fi ħdan il-Ġimgħa Ewropea tar-Reġjuni u l-Bliet.
Flimkien attendew madwar 300 parteċipant għal dawn is-sessjonijiet.
2.3. Riżultati wara l-ewwel skadenza għas-sottomissjoni
L-ewwel skadenza għas-sottomissjoni kienet fid-19 ta’ Ottubru 2022; waslu tliet applikazzjonijiet, li waħda minnhom hija ammissibbli/eliġibbli u għaddejja mill-proċess ta’ evalwazzjoni.
Dan l-għadd baxx kien mistenni peress li (i) kien ġie adottat biss għadd limitat ta’ Pjanijiet territorjali ta’ tranżizzjoni ġusta, peress li hija prekundizzjoni (jiġifieri kundizzjoni ta’ eliġibbiltà) biex tiġi ppreżentata proposta u (ii) l-applikanti potenzjali jeħtieġu ż-żmien biex jiffamiljarizzaw ruħhom mal-Faċilità u jħejju l-proposti.
Il-Kummissjoni se tkompli taħdem biex tqajjem kuxjenza madwar il-Faċilità għall-iskadenzi tas-sottomissjoni li jmiss sabiex jiżdied l-għadd ta’ applikazzjonijiet.
3. Attivitajiet tal-komunikazzjoni
3.1. Ftehim amministrattiv mas-sieħeb finanzjarju (Bank Ewropew tal-Investiment)
Wara l-iffirmar tal-ftehim amministrattiv mal-Bank Ewropew tal-Investiment, il-Kummissjoni 17 u l-BEI 18 ħarġu stqarrijiet għall-istampa.
3.2. Il-pubblikazzjoni tal-ewwel sejħiet għall-proposti
Il-Kummissjoni żgurat sforz wiesa’ ta’ komunikazzjoni dwar il-pubblikazzjoni tal-ewwel sejħa għal proposti billi ħarġet stqarrijiet għall-istampa mis-servizzi tal-Kummissjoni 19 u mis-CINEA 20 u inkludiet aħbarijiet ta’ kuljum dwar ir-rokna tal-istampa tal-Kummissjoni 21 .
Il-messaġġi bil-vidjo ġew irreġistrati kemm mill-Kummissarju responsabbli għall-Politika Reġjonali u Urbana 22 kif ukoll mill-Viċi President tal-Bank Ewropew tal-Investiment 23 .
3.3. Mistoqsijiet frekwenti (FAQs)
Il-mistoqsijiet imqajma matul l-avvenimenti ta’ komunikazzjoni jiġu ppubblikati fuq is-sit web tas-CINEA bħala referenza għall-parteċipanti. Il-Kummissjoni ppubblikat ukoll madwar 40 FAQs magħżula fuq il-portal Funding &Tenders.
Inħolqot kaxxa postali funzjonali apposta mis-CINEA biex twieġeb aktar mistoqsijiet li jidħlu ta’ benefiċjarji potenzjali.
3.4. avvenimenti ta’ komunikazzjoni fl-2022
10 ta' Mejju 2022: Sessjoni matul il-Pjattaforma għal Tranżizzjoni Ġusta 24
14 ta' Settembru 2022: Jum ta’ Informazzjoni organizzat mis-CINEA, il-Kummissjoni u l-BEI 25
21 ta' Settembru 2022: Sessjoni matul il-Ġimgħa Ewropea għall-Enerġija Sostenibbli (programm estiż) 26
11 ta' Ottubru 2022: Sessjoni matul il-Ġimgħa Ewropea tar-Reġjuni u l-Bliet 27
8-11 ta’ Novembru 2022: Laqgħat “Wieħed għal UE” matul l-avveniment Ecomondo 28
Ġew organizzati wkoll sessjonijiet apposta fuq talba mill-Istati Membri (is-Slovenja f’Marzu u Franza f’Ottubru).
4. Il-passi li jmiss
Il-Kummissjoni se tkompli taħdem fuq l-evalwazzjoni u l-għażla tal-proposti wara kull skadenza għas-sottomissjoni f’kooperazzjoni mas-CINEA (ara t-tabella fil-punt 2.2.2.).
Il-Kummissjoni f’koordinazzjoni mas-CINEA u l-Bank Ewropew tal-Investiment se tkompli tqajjem kuxjenza dwar il-Faċilità sabiex tippromwoviha u turi l-potenzjal tagħha. Dan se jsir billi, fost l-oħrajn, jiġu organizzati laqgħat bilaterali mal-Istati Membri u r-reġjuni bi Pjanijiet territorjali ta’ tranżizzjoni ġusta, jitħejjew preżentazzjonijiet dedikati għall-kumitati ta’ monitoraġġ rilevanti tal-Kummissjoni u jipparteċipaw f’avvenimenti rilevanti, li jagħtu opportunità li tiġi ppreżentata l-Faċilità. B’mod ġenerali, il-Kummissjoni se tieħu kwalunkwe opportunità biex tippromwovi l-Faċilità u tilħaq udjenza wiesgħa ta’ partijiet ikkonċernati potenzjalment interessati.
Barra minn hekk, l-Aġenzija se torganizza jiem ta’ informazzjoni marbuta mad-dati ta’ skadenza tal-2023.
