Relatur:	Katrīna ZARIŅA
Korelatur:	Philip VON BROCKDORFF

Konsultazzjoni	Kummissjoni Ewropea, 18.7.2023 Kunsill tal-Unjoni Ewropea, 19.7.2023
Bażi legali	Artikolu 304 tat-Trattat dwar il-Funzjonament tal-Unjoni Ewropea
Sezzjoni kompetenti	Sezzjoni għall-Unjoni Ekonomika u Monetarja u l-Koeżjoni Ekonomika u Soċjali
Adozzjoni fis-sezzjoni	5.10.2023
Adozzjoni fil-plenarja	25.10.2023
Sessjoni plenarja Nru	582
Riżultat tal-votazzjoni (favur/kontra/astensjonijiet)	169/04/04

1.   Konklużjonijiet u rakkomandazzjonijiet

1.1.

Il-Kumitat Ekonomiku u Soċjali Ewropew (KESE) jirrikonoxxi l-isforzi tal-Kummissjoni biex tipproponi riżorsi proprji ġodda u tiggarantixxi baġit tal-UE sod u sostenibbli. Il-baġit tal-UE jirrappreżenta wieħed mill-pilastri ewlenin għall-integrazzjoni ekonomika u l-koeżjoni soċjali tal-UE u l-kompetittività globali tagħha fit-tul.

1.2.

Il-KESE jappoġġja l-proposta għal rieżami ta’ nofs it-terminu tal-Qafas Finanzjarju Pluriennali (QFP) 2021-2027 biex jiżdied progressivament il-proporzjon tar-riżorsi proprji tal-UE meta mqabbel mad-dħul tal-Istati Membri bbażat fuq l-ING. Il-ħtiġijiet baġitarji tal-UE, affettwati mir-reċessjoni ekonomika tal-COVID-19, in-Next Generation EU u l-Faċilità għall-Irkupru u r-Reżiljenza, l-appoġġ mogħti għall-irkupru tal-Ukrajna, il-politiki ta’ awtonomija strateġika, u t-tranżizzjoni ġusta, ekoloġika u diġitali, se jirrikjedu żieda fil-kontribuzzjoni tal-Istati Membri għar-riżorsi proprji eżistenti tal-UE.

1.3.

Il-KESE jappoġġja wkoll b’mod ġenerali l-pakkett aġġustat tal-Kummissjoni Ewropea għall-ġenerazzjoni li jmiss tar-riżorsi proprji, u fl-istess waqt jifhem in-natura temporanja tiegħu u l-fatt li huwa limitat għar-ripagament tal-approprjazzjonijiet użati għall-finanzjament tan-Next Generation EU.

1.4.

Il-KESE jistieden lill-Parlament Ewropew u lill-Kunsill tal-UE jadottaw pakkett aġġustat għall-ġenerazzjoni li jmiss tar-riżorsi proprji qabel l-elezzjonijiet tal-Parlament Ewropew li jmiss fl-2024 u qabel tmiem il-mandat politiku attwali.

1.5.

Madankollu, il-KESE jemmen li l-kwistjoni tar-riżorsi proprji u l-kapaċitajiet baġitarji tal-UE ma rċevietx il-viżibbiltà meħtieġa biex jiġu indirizzati l-aspetti kollha tagħha. Għandu jsir dibattitu profond iżda bi żmien limitat li jinvolvi lill-imsieħba soċjali u l-organizzazzjonijiet tas-soċjetà ċivili, mingħajr dewmien u b’konformità mal-mandat li jmiss tal-istituzzjonijiet tal-UE. Dan huwa dibattitu partikolarment urġenti, li għandu jiffoka wkoll fuq il-kapaċità fiskali tal-UE li tiffinanzja l-aġenda ambizzjuża iżda meħtieġa tagħha stess. F’dan ir-rigward, is-sett ta’ proposti għal riżorsi proprji propost mill-Parlament Ewropew fl-10 ta’ Mejju 2023 (1), u fil-biċċa l-kbira appoġġjat mill-KESE, jirrappreżenta kontribut importanti għal dan id-dibattitu.

1.6.

Il-KESE jenfasizza li n-nefqa mill-baġit tal-Unjoni b’rabta mar-ripagament tan-Next Generation EU ma tridx tnaqqas il-finanzjament ta’ programmi jew investimenti oħra tal-UE taħt il-QFP attwali u li jmiss. Dan jibqa’ kruċjali għall-integrazzjoni ekonomika u l-koeżjoni soċjali tal-UE, kif ukoll għall-kompetittività globali tal-UE matul l-irkupru ta’ wara l-pandemija fuq terminu medju.

1.7.

Il-KESE jirrikonoxxi l-ħtieġa u l-urġenza li jiżdiedu aġġustamenti għar-riżorsi proprji ġodda diġà proposti u li jiġu proposti riżorsi proprji addizzjonali ġodda. Fl-istess ħin, il-KESE jtenni l-ħtieġa għal modernizzazzjoni strutturali tas-sistema tar-riżorsi proprji, li għandha tappoġġja l-objettivi ta’ tkabbir ekonomiku diġitali, ambjentali u sostenibbli.

1.8.

Il-KESE jemmen li d-dħul mis-Sistema għall-Iskambju ta’ Kwoti tal-Emissjonijiet (ETS) għandu jappoġġja l-isforzi tal-Istati Membri biex jistabbilixxu miżuri għad-dekarbonizzazzjoni tan-negozji li joperaw fis-setturi minn fejn jinġabar id-dħul. Għalhekk, is-sehem tad-dħul mill-ETS li għandu jmur għall-baġit tal-UE għandu jkun soġġett għal valutazzjoni rigoruża u kunsens bejn il-Kummissjoni u l-Istati Membri.

1.9.

Il-KESE jemmen li l-produttività u l-kompetittività tan-negozji Ewropej għandhom ikunu fost il-prijoritajiet. Fl-istess ħin, il-KESE jirrikonoxxi li għandha ssir valutazzjoni adatta tal-impatt potenzjali ta’ din ir-riżorsa proprja ġdida fuq il-kompetittività tan-negozji, inkluż rieżami possibbli tal-politiki nazzjonali tat-tassazzjoni korporattiva, u li l-piż amministrattiv, għall-amministrazzjonijiet pubbliċi u l-kumpaniji, għandu jinżamm f’livell minimu. Ir-riżorsi għandhom jintużaw b’mod strateġiku biex jissaħħu l-kompetittività u s-sostenibbiltà tal-UE u biex jiġu promossi l-innovazzjoni kif ukoll il-ġustizzja soċjali u fiskali, u l-objettivi ambjentali.

1.10.

Il-KESE jiġbed l-attenzjoni għall-fatt li r-riżorsa proprja statistika dwar il-profitti tal-kumpaniji tista’ tinvolvi piż amministrattiv għall-istituti tal-istatistika nazzjonali u n-negozji, kif huwa inerenti għal kwalunkwe riżorsa proprja ġdida. Filwaqt li dan il-piż żejjed huwa meqjus marġinali meta mqabbel mal-alternattivi, il-KESE jisħaq li l-piżijiet amministrattivi – speċjalment fuq in-negozji – għandhom jiġu evitati jew minimizzati.

1.11.

Il-KESE jqis li huwa meħtieġ l-użu ta’ analiżijiet kwantitattivi biex jiġi vvalutat kif il-miżuri proposti se jaħdmu fil-prattika. Sabiex l-Istati Membri jaċċettawhom, il-volum tad-dħul mistenni minn kull riżorsa proprja ġdida u l-aġġustamenti tekniċi proposti jridu jiġu sostanzjati minn previżjonijiet komprensivi u għandha tiġi garantita t-trasparenza. Għalhekk, il-Kummissjoni għandha tipproduċi evalwazzjonijiet speċifiċi fil-livell tal-pajjiżi, u fejn meħtieġ fil-livell reġjonali, biex tistabbilixxi l-kontribuzzjonijiet mistennija mill-baġits tal-Istati Membri.

1.12.

Il-KESE jaqbel mal-Kummissjoni li tingħata prijorità lill-implimentazzjoni tal-Ewwel Pilastru tal-OECD/G20 kontra miżuri oħra fis-settur diġitali. Il-KESE jemmen li huwa essenzjali li titħaffef ir-ratifika tal-konvenzjoni. F’dan ir-rigward, il-KESE jixtieq jenfasizza li l-Kummissjoni għandha ssegwi minnufih l-implimentazzjoni tal-Ewwel Pilastru tal-OECD bil-ħidma teknika biex tappoġġja Direttiva tal-UE għar-riżorsa proprja bbażata fuq l-Ewwel Pilastru.

1.13.

Il-KESE jirrikonoxxi li, b’mod ġenerali, ir-riżorsa proprja statistika temporanja tista’ tikkontribwixxi għall-finanzjament tan-Next Generation EU sakemm jiġi implimentat il-mekkaniżmu tal-BEFIT. Fl-istess ħin, il-KESE jitlob valutazzjoni bir-reqqa tal-effettività tar-riżorsi proprji li huma diġà fis-seħħ, u jenfasizza l-ħtieġa li tiġi żgurata l-konformità mar-regoli diġà stabbiliti u li jitlestew u jiġu implimentati r-riformi li nbdew.

2.   Kummenti ġenerali

2.1.

F’Diċembru 2021, il-Kummissjoni pproponiet tliet riżorsi proprji ġodda biex jiffinanzjaw il-baġit tal-UE: kontribuzzjoni mill-ETS, kontribuzzjoni mill-mekkaniżmu ta’ aġġustament tal-karbonju fil-fruntieri (CBAM), u riżorsa proprja bbażata fuq sehem mill-profitti residwi minn kumpaniji multinazzjonali skont il-ftehim tal-OECD/G20 (l-Ewwel Pilastru).

2.2.

Il-KESE jappoġġja bis-sħiħ il-proposta fir-rieżami ta’ nofs it-terminu tal-QFP 2021-2027 biex jiżdied progressivament il-proporzjon tar-riżorsi proprji tal-UE meta mqabbel mad-dħul ibbażat fuq l-ING tal-Istati Membri (2). Wara l-adozzjoni tal-QFP, inħolqu rekwiżiti ġodda għall-finanzjament Ewropew minħabba r-reċessjoni ekonomika tal-COVID-19, in-Next Generation EU u l-Faċilità għall-Irkupru u r-Reżiljenza, l-appoġġ mogħti għar-rikostruzzjoni tal-Ukrajna, u l-finanzjament ta’ investimenti biex tiġi żgurata l-awtonomija strateġika tal-UE f’diversi oqsma, b’mod partikolari fl-industrija ekoloġika.

2.3.

Il-proposta tal-Kummissjoni hija meqjusa urġenti fid-dawl tar-ripagament b’rati ogħla ta’ imgħax tas-self tal-UE biex tiffinanzja l-Faċilità għall-Irkupru u r-Reżiljenza. Il-KESE jaqbel mal-kamp ta’ applikazzjoni tal-proposta u jappoġġja l-adozzjoni bikrija tagħha qabel l-elezzjonijiet tal-Parlament Ewropew li jmiss. Madankollu, b’konformità mar-riżoluzzjoni tal-Parlament Ewropew, il-KESE jisħaq fuq il-ħtieġa li fil-futur jiġi żgurat aktar introjtu għall-baġit tal-UE. Il-Kumitat jemmen li dan it-tieni pass għandu jittieħed wara dibattitu fil-fond u meħtieġ b’mod urġenti dwar il-kapaċità fiskali tal-UE għal finanzjament sostenibbli tal-għanijiet komuni tal-Ewropa, li fih għandu jkollha rwol ewlieni is-soċjetà ċivili organizzata.

2.4.

Il-KESE jirrikonoxxi l-isforzi tal-Kummissjoni – f’konformità mal-Artikolu 322(2) tat-TFUE u l-Artikolu 9(3) tad-Deċiżjoni tal-Kunsill (UE, Euratom) 2020/2053 (3) – biex tipproponi riżorsi proprji ġodda u tiggarantixxi baġit tal-UE solidu u sostenibbli. Il-baġit tal-UE jirrappreżenta wieħed mill-pilastri ewlenin għall-integrazzjoni ekonomika u l-koeżjoni soċjali tal-UE u l-kompetittività globali tagħha fit-tul.

2.5.

Il-KESE jirrikonoxxi l-ħtieġa għal qafas stabbli li jiggarantixxi rispons baġitarju Ewropew flessibbli għal xokkijiet mhux mistennija li jistgħu jseħħu fil-futur. Dan il-qafas għandu jqis il-ħtieġa li jitħallas lura l-kapital u l-imgħax tal-finanzjament tan-Next Generation EU, li ġie miftiehem mill-Istati Membri matul il-pandemija tal-COVID-19.

2.6.

Il-KESE jenfasizza li n-nefqa mill-baġit tal-Unjoni b’rabta mar-ripagamenti tan-Next Generation EU ma tridx tnaqqas il-finanzjament ta’ programmi jew investimenti oħra tal-UE taħt il-qafas finanzjarju pluriennali attwali u li jmiss. Dan jibqa’ kruċjali għall-integrazzjoni ekonomika u l-koeżjoni soċjali tal-UE kif ukoll għall-kompetittività globali tal-UE matul l-irkupru ta’ wara l-pandemija fuq terminu medju.

2.7.

Kif enfasizza fiż-żewġ Opinjonijiet preċedenti tiegħu dwar il-Proposta għal deċiżjoni dwar ir-riżorsi proprji (4) u dwar It-tieni sett ta’ riżorsi proprji ġodda (5), il-KESE jirrikonoxxi l-ħtieġa u l-urġenza li jiżdiedu aġġustamenti għar-riżorsi proprji diġà proposti u li jitressqu riżorsi proprji ġodda. Dan huwa meħtieġ biex tiġi evitata żieda fil-kontribuzzjoni tar-riżorsi bbażati fuq l-ING minħabba kontribuzzjonijiet insuffiċjenti li jirriżultaw mill-pakkett ta’ riżorsi proprji ppreżentat f’Diċembru 2021.

2.8.

Il-KESE, fil-prinċipju, jilqa’ l-analiżi u l-proposta tal-Kummissjoni, ippubblikati f’Ġunju 2023, għal pakkett ġdid ta’ riżorsi proprji li jinkludi r-reviżjoni tal-proposta inizjali ta’ Diċembru 2021 biex jiġu ġġenerati tliet sorsi ġodda ta’ dħul għall-UE, inkluża riżorsa proprja statistika temporanja ġdida bbażata fuq il-profitti tal-kumpaniji. Fl-istess ħin, il-KESE jtenni l-ħtieġa għal modernizzazzjoni strutturali tas-sistema tar-riżorsi proprji, li għandha tappoġġja l-isforzi tal-Istati Membri biex jiksbu objettivi diġitali, ambjentali u ta’ tkabbir ekonomiku sostenibbli.

2.9.

F’Mejju 2023, il-Parlament Ewropew ippreżenta firxa ta’ sorsi ġodda ta’ introjtu għall-baġit tal-UE, inklużi riżorsi proprji korporattivi bbażati fuq it-taxxa, it-taxxa fuq it-tranżazzjonijiet finanzjarji, mekkaniżmu ġust fil-fruntieri, taxxa fuq il-kriptoassi, riżorsi proprji ekoloġiċi, u kontribuzzjonijiet nazzjonali bbażati fuq l-istatistika.

2.10.

Fl-Opinjoni preċedenti tiegħu dwar it-tieni sett ta’ riżorsi proprji ġodda, il-KESE laqa’ għadd ta’ proposti tal-Parlament Ewropew u ressaq ir-rakkomandazzjonijiet tiegħu stess dwar riżorsi proprji ġodda possibbli. Fl-istess okkażjoni, il-KESE tenna li kwalunkwe proposta għal riżorsi proprji għandha tkun akkumpanjata minn valutazzjoni tal-impatt tal-effettività u l-impatt tagħhom fuq in-negozji u l-unitajiet domestiċi. Għalhekk, l-UE għandha tesplora, bħala kwistjoni ta’ prijorità, aktar għażliet għal dħul futur għall-baġit tal-UE li jimminimizzaw il-piż tat-taxxa fuq in-negozji u ċ-ċittadini Ewropej.

2.11.

Waqt li l-Kummissjoni wettqet analiżi tal-għażliet possibbli għal sorsi ġodda ta’ dħul għall-baġit tal-UE, il-KESE jinnota b’dispjaċir li għadd mill-għażliet proposti mill-Parlament Ewropew u l-KESE tqiesu fl-aħħar mill-aħħar bħala mhux adatti u robusti biżżejjed biex jiġu inklużi fil-proposta tal-Kummissjoni. Minkejja dan, riżorsa proprja statistika bbażata fuq stima tal-profitti tal-kumpaniji titqies bħala soluzzjoni interim effettiva b’potenzjal kbir ta’ valur miżjud (6).

2.12.

Il-KESE jsostni, għal darb’oħra, li għal kull deċiżjoni dwar kwistjonijiet relatati mal-baġit tal-UE, il-Kummissjoni trid tfittex li tiftaħ dibattitu soċjetali wiesa’ u tiġbor il-fehmiet taċ-ċittadini, l-organizzazzjonijiet mhux governattivi u tas-soċjetà ċivili, in-negozji, l-amministrazzjonijiet, u l-partijiet interessati kollha. Dan il-prinċipju għandu dejjem jiggwida lill-koleġiżlaturi tal-UE biex jipproponu miżuri li ma joħolqu l-ebda riskju għall-baġits ta’ programmi oħra tal-UE u li jagħtu riżultati f’konformità mal-prinċipji tal-proporzjonalità u tal-ġustizzja soċjali.

2.13.

Il-KESE jistieden lill-Kummissjoni twettaq valutazzjonijiet u evalwazzjonijiet ulterjuri tal-miżuri kandidati identifikati bħala riżorsi proprji potenzjali, u jesprimi dubji dwar l-effettività u s-sostenibbiltà fit-tul tar-riżorsi proposti biex jitħallsu lura l-fondi miġbura għall-finanzjament tal-istrument għall-irkupru Next Generation EU.

2.14.

F’dan ir-rigward, il-KESE jqis li l-kriterji adottati mill-Kummissjoni fil-valutazzjoni tagħha, eż. il-potenzjal tad-dħul, is-sempliċità, u l-mobilizzazzjoni rapida tad-dħul, huma relattivament limitati. L-evalwazzjoni tat-tmien riżorsi proprji potenzjali kienet ibbażata fuq tliet prinċipji derivati minn letteratura eżistenti limitata dwar id-dħul tal-UE. B’riżultat ta’ dan, il-valutazzjoni tal-punteġġ hija fil-biċċa l-kbira kwalitattiva (7) u toħloq aktar ambigwità rigward l-effettività u s-sostenibbiltà tar-riżorsi fuq terminu twil.

2.15.

Sabiex jingħeleb dan, il-KESE jqis li huwa meħtieġ l-użu ta’ analiżijiet kwantitattivi tal-miżuri. Il-volum tad-dħul mistenni minn kull riżorsa proprja ġdida u l-aġġustamenti tekniċi proposti jridu jiġu sostanzjati minn previżjonijiet komprensivi u għandhom jiggarantixxu t-trasparenza sabiex l-Istati Membri jkunu jistgħu jaċċettawhom. Għalhekk, il-Kummissjoni għandha tipproduċi evalwazzjonijiet speċifiċi fil-livell tal-pajjiżi, u fejn meħtieġ fil-livell reġjonali, biex tistabbilixxi l-pressjoni mistennija fuq il-baġits tal-Istati Membri. Il-previżjonijiet għandhom jikkunsidraw ukoll xenarji futuri – inklużi xokkijiet ekonomiċi jew sorsi ġodda ta’ instabbiltà finanzjarja – li se jimponu aktar restrizzjonijiet fuq il-baġits tal-Istati Membri.

2.16.

Il-KESE jesprimi wkoll tħassib dwar l-iskeda ta’ żmien għall-preżentazzjoni tal-proposta dwar ir-riżorsi proprji l-ġodda. Fid-dawl tal-prijoritajiet ippreżentati mill-Presidenza Spanjola tal-Kunsill tal-UE, u l-elezzjonijiet tal-Parlament Ewropew li jmiss f’Ġunju 2024, il-KESE jħeġġeġ lill-partijiet involuti biex jadottaw pakkett ta’ riżorsi proprji aġġustat qabel tmiem il-mandat politiku attwali.

2.17.

Il-KESE jistieden lill-Kummissjoni tkompli tidentifika sorsi ġodda ta’ finanzjament għar-ripagament tan-Next Generation EU u għall-finanzjament tal-baġit tal-UE. Kif issemma qabel, huwa kruċjali li jinfetaħ id-dibattitu billi jiġu involuti l-partijiet interessati rilevanti meta jiġu esplorati aktar għażliet u jiġi indirizzat l-impatt potenzjali tagħhom fuq perjodu ta’ żmien medju u twil. Il-KESE jemmen li, fir-rigward tal-istabbiliment ta’ riżorsi proprji għall-finanzjament tar-ripagament tal-Faċilità għall-Irkupru u r-Reżiljenza, kif ukoll ir-rieżami tas-sistema ġenerali tar-riżorsi proprji, l-involviment tal-imsieħba soċjali u tas-soċjetà ċivili organizzata fil-konsultazzjonijiet formali huwa kruċjali. Dan jiffaċilita l-kisba ta’ kunsens soċjali Ewropew fir-rigward tal-baġit tal-UE. Il-Kumitat jistieden lill-Kummissjoni timxi f’din id-direzzjoni.

3.   Kummenti speċifiċi

3.1.

Il-KESE jaqbel mal-Kummissjoni li tingħata prijorità lill-implimentazzjoni tal-Ewwel Pilastru tal-OECD/G20 kontra miżuri oħra fis-settur diġitali. Peress li l-Ewwel Pilastru tal-OECD diġà jindirizza l-isfidi b’rabta mat-tassazzjoni fis-settur diġitali u bil-ħidma teknika għall-implimentazzjoni tiegħu li għadha għaddejja, il-KESE jemmen li huwa essenzjali li titħaffef ir-ratifika tal-konvenzjoni. F’dan ir-rigward, il-KESE jixtieq jenfasizza li l-Kummissjoni għandha ssegwi minnufih l-implimentazzjoni tal-Ewwel Pilastru tal-OECD bil-ħidma teknika biex tappoġġja Direttiva tal-UE għar-riżorsa proprja bbażata fuq l-Ewwel Pilastru.

3.2.

Il-KESE jirrikonoxxi li l-iżviluppi reċenti fis-swieq tal-karbonju żiedu l-potenzjal tad-dħul tas-sistema għall-iskambju ta’ kwoti tal-emissjonijiet. Minkejja li l-prezzijiet tas-suq huma mistennija li jibqgħu b’mod stabbli ogħla mil-livell tal-prezz ta’ EUR 55 matul is-snin li ġejjin – kif imsemmi mill-Kummissjoni (8) – il-KESE jemmen li d-dħul mill-ETS għandu jappoġġja wkoll l-isforzi tal-Istati Membri biex jistabbilixxu miżuri għad-dekarbonizzazzjoni tan-negozji li joperaw fis-setturi fejn jinġabar id-dħul. Għalhekk, is-sehem mid-dħul mill-ETS li jmur fil-baġit tal-UE għandu jkun soġġett għal valutazzjoni rigoruża u għal kunsens bejn il-Kummissjoni u l-Istati Membri. Il-KESE huwa mħasseb dwar l-aġġustament tar-riżorsa proprja tal-ETS u ż-żieda proposta fir-rata ta’ ġbir għal 30 % tad-dħul kollu ġġenerat mill-iskambju ta’ kwoti tal-emissjonijiet tal-UE, żieda minn dik ta’ 25 % proposta inizjalment. Dan iġib miegħu r-riskju ta’ dewmien fil-proċessi ta’ dekarbonizzazzjoni u, b’mod ġenerali, fl-investimenti ekoloġiċi fil-livell nazzjonali.

3.3.

Il-kisba tan-newtralità klimatika tirrikjedi sforzi sinifikanti mill-Istati Membri, dejjem billi jitqiesu l-ħtiġijiet, l-istrumenti u l-miżuri speċifiċi differenti li għandhom jittieħdu għall-pajjiżi differenti. Għalhekk huwa meħtieġ li jiġu ffaċilitati l-kapaċità u l-isforzi tagħhom biex jiksbu l-objettivi b’rabta mal-klima mingħajr ma jikkompromettu l-impenn tagħhom li jħallsu lura n-Next Generation EU.

3.4.

Il-KESE jilqa’ l-fatt li r-riżorsa proprja statistika proposta hija ta’ natura temporanja. Fl-istess ħin, il-KESE jirrikonoxxi li għandha ssir valutazzjoni adatta tal-impatt potenzjali ta’ din ir-riżorsa proprja ġdida fuq il-kompetittività tan-negozji, inkluż rieżami possibbli tal-politiki nazzjonali tat-tassazzjoni korporattiva, u li l-piż amministrattiv, għall-amministrazzjonijiet pubbliċi u l-kumpaniji, għandu jinżamm f’livell minimu.

3.5.

Il-KESE jinnota d-dikjarazzjoni tal-Kummissjoni li n-nuqqas ta’ armonizzazzjoni tat-taxxa suffiċjenti fl-UE jiġġustifika r-riżorsa proprja statistika bbażata fuq il-profitti tal-kumpaniji. Dan jippermetti lill-intrapriżi multinazzjonali (MNEs) kbar jibbenefikaw permezz ta’ mġiba ta’ trasferiment tal-profitti, ippjanar tat-taxxa, u diskrepanzi fis-sistemi tat-taxxa nazzjonali. Madankollu, għandha ssir disponibbli stampa aktar ċara tal-problema b’rabta mal-proposta tal-Kummissjoni u valutazzjoni bir-reqqa tad-dħul potenzjali. Għalhekk, il-KESE jemmen li valutazzjoni tal-impatt komprensiva għandha tappoġġja l-proposta għal dan is-sors ġdid ta’ dħul.

3.6.

Il-KESE jenfasizza l-fatt li hija meħtieġa aktar ċarezza fid-definizzjoni ta’ MNEs li joperaw fis-setturi finanzjarji u mhux finanzjarji. Id-Dokument ta’ Ħidma tal-Persunal tal-Kummissjoni (9) jeħtieġ informazzjoni aktar trasparenti għall-identifikazzjoni tal-istatistika armonizzata dwar l-introjtu korporattiv jew il-profitti korporattivi u l-kompożizzjoni tagħhom. B’kalkoli bbażati fuq data estrapolata mill-bażi tad-data tal-NFSA tal-Eurostat, il-Kummissjoni għandha tipprovdi informazzjoni faċilment aċċessibbli għall-monitoraġġ tal-kontribuzzjoni ta’ kull Stat Membru għall-baġit tal-UE permezz tar-riżorsa proprja statistika temporanja.

3.7.

Il-KESE jirrikonoxxi li, b’mod ġenerali, ir-riżorsa proprja statistika temporanja tista’ tikkontribwixxi għall-finanzjament tal-programm Next Generation EU sakemm jiġi implimentat il-mekkaniżmu tal-BEFIT.

---

(1)  Riżoluzzjoni tal-Parlament Ewropew dwar Ir-riżorsi proprji: bidu ġdid għall-finanzi tal-UE, bidu ġdid għall-Ewropa

(2)  Opinjoni tal-Kumitat Ekonomiku u Soċjali Ewropew dwar “Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni. Baġit modern għal Unjoni li Tipproteġi, Tagħti s-Setgħa u Tiddefendi. Il-Qafas Finanzjarju Pluriennali għall-2021-2027” [COM(2018) 321 final] “Proposta għal Regolament tal-Kunsill li jistabbilixxi l-qafas finanzjarju pluriennali għas-snin mill-2021 sal-2027” [COM(2018) 322 final/2 — 2018/0166 (APP)] “Proposta għal Deċiżjoni tal-Kunsill dwar is-sistema ta’ Riżorsi Proprji tal-Unjoni Ewropea” [COM(2018) 325 final — 2018/0135 (CNS)] “Proposta għal Regolament tal-Kunsill dwar il-metodi u l-proċedura għad-disponibbiltà tar-Riżorsi Proprji bbażati fuq Bażi Komuni Konsolidata tat-Taxxa Korporattiva, fuq l-Iskema għall-Iskambju ta’ Kwoti tal-Emissjonijiet tal-Unjoni Ewropea u fuq l-Iskart tal-plastik mill-imballaġġ li mhux qed jiġi riċiklat, u dwar il-miżuri li jissodisfaw il-ħtiġijiet fi flus kontanti” [COM(2018) 326 final — 2018/0131 (NLE)] “Proposta għal Regolament tal-Kunsill li jistabbilixxi miżuri ta’ implimentazzjoni għas-sistema tar-Riżorsi Proprji tal-Unjoni Ewropea” [COM(2018) 327 final — 2018/0132 (APP)] u “Proposta għal Regolament tal-Kunsill li jemenda r-Regolament tal-Kunsill (tal-KEE, u l-Euratom) Nru 1553/89 dwar l-arranġamenti uniformi definittivi għall-ġbir mir-riżorsi nfushom li jidħol mit-taxxa fuq il-valur miżjud” [COM(2018) 328 final — 2018/0133 (NLE)] (ĠU C 440, 6.12.2018, p. 106).

(3)  Deċiżjoni tal-Kunsill (UE, Euratom) 2020/2053 tal-14 ta’ Diċembru 2020 dwar is-sistema tar-riżorsi proprji tal-Unjoni Ewropea u li tħassar id-Deċiżjoni 2014/335/UE, Euratom (ĠU L 424, 15.12.2020, p. 1).

(4)  Opinjoni tal-Kumitat Ekonomiku u Soċjali Ewropew dwar “Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni. Il-ġenerazzjoni li jmiss tar-riżorsi proprji tal-baġit tal-UE” (COM(2021) 566 final), “Proposta għal Regolament tal-Kunsill li jemenda r-Regolament (UE, Euratom) 2020/2093 li jistabbilixxi l-qafas finanzjarju pluriennali għas-snin mill-2021 sal-2027 (COM(2021) 569 final — 2021/0429 (APP)) u “Proposta għal Deċiżjoni tal-Kunsill li temenda d-Deċiżjoni (UE, Euratom) 2020/2053 dwar is-sistema tar-riżorsi proprji tal-Unjoni Ewropea” (COM(2021) 570 final — 2021/0430 (CNS)) (ĠU C 323, 26.8.2022, p. 48).

(5)  Opinjoni tal-Kumitat Ekonomiku u Soċjali Ewropew dwar “It-tieni sett ta’ riżorsi proprji ġodda” (opinjoni esploratorja) (ĠU C 293, 18.8.2023, p. 13).

(6)  Abbozz ta’ rapport dwar ir-riżorsi proprji: bidu ġdid għall-finanzi tal-UE, bidu ġdid għall-Ewropa, Kumitat għall-Baġits, Parlament Ewropew

(7)  Proposta emendata għal Deċiżjoni tal-Kunsill li temenda d-Deċiżjoni (UE, Euratom) 2020/2053 dwar is-sistema tar-riżorsi proprji tal-Unjoni Ewropea (COM(2023) 331 final).

(8)  Proposta emendata għal Deċiżjoni tal-Kunsill li temenda d-Deċiżjoni (UE, Euratom) 2020/2053 dwar is-sistema tar-riżorsi proprji tal-Unjoni Ewropea (COM(2023) 331 final).

(9)  Proposta emendata għal Deċiżjoni tal-Kunsill li temenda d-Deċiżjoni (UE, Euratom) 2020/2053 dwar is-sistema tar-riżorsi proprji tal-Unjoni Ewropea (COM(2023) 331 final).