This document is an excerpt from the EUR-Lex website
Document 52022PC0713
Proposal for a COUNCIL DECISION as regards the extension of the period of entitlement for audiovisual co-productions as provided for in Article 5 of the Protocol on Cultural Cooperation to the Free Trade Agreement between the European Union and its Member States, of the one part, and the Republic of Korea, of the other part
Proposta għal DEĊIŻJONI TAL-KUNSILL dwar l-estensjoni tal-perjodu tad-dritt għal koproduzzjonijiet awdjoviżivi kif previst fl-Artikolu 5 tal-Protokoll dwar il-Kooperazzjoni Kulturali għall-Ftehim ta’ Kummerċ Ħieles bejn l-Unjoni Ewropea u l-Istati Membri tagħha, minn naħa waħda, u r-Repubblika tal-Korea, min-naħa l-oħra
Proposta għal DEĊIŻJONI TAL-KUNSILL dwar l-estensjoni tal-perjodu tad-dritt għal koproduzzjonijiet awdjoviżivi kif previst fl-Artikolu 5 tal-Protokoll dwar il-Kooperazzjoni Kulturali għall-Ftehim ta’ Kummerċ Ħieles bejn l-Unjoni Ewropea u l-Istati Membri tagħha, minn naħa waħda, u r-Repubblika tal-Korea, min-naħa l-oħra
COM/2022/713 final
IL-KUMMISSJONI EWROPEA
Brussell, 12.12.2022
COM(2022) 713 final
2022/0416(NLE)
Proposta għal
DEĊIŻJONI TAL-KUNSILL
dwar l-estensjoni tal-perjodu tad-dritt għal koproduzzjonijiet awdjoviżivi kif previst fl-Artikolu 5 tal-Protokoll dwar il-Kooperazzjoni Kulturali għall-Ftehim ta’ Kummerċ Ħieles bejn l-Unjoni Ewropea u l-Istati Membri tagħha, minn naħa waħda, u r-Repubblika tal-Korea, min-naħa l-oħra
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
Fl-1 ta’ Ottubru 2015, il-Kunsill adotta d-Deċiżjoni (UE) 2015/2169 dwar il-konklużjoni ta’ Ftehim ta’ Kummerċ Ħieles bejn l-Unjoni Ewropea u l-Istati Membri tagħha, minn naħa waħda, u r-Repubblika tal-Korea, min-naħa l-oħra.
Il-Protokoll dwar il-Kooperazzjoni Kulturali 1 anness mal-Ftehim ta’ Kummerċ Ħieles bejn l-Unjoni Ewropea u l-Istati Membri tagħha, minn naħa waħda, u r-Repubblika tal-Korea, min-naħa l-oħra 2 (“il-Protokoll”) jistabbilixxi fl-Artikolu 1 il-qafas li fi ħdanu l-Partijiet għandhom jikkooperaw għall-iffaċilitar ta’ skambji li jirrigwardaw l-attivitajiet, l-oġġetti u s-servizzi kulturali, inkluż fis-settur awdjoviżiv.
Skont l-Artikolu 5(8)(b) tal-Protokoll, wara l-perjodu inizjali ta’ tliet snin, id-dritt se jiġġedded għal perjodi suċċessivi oħra tal-istess tul, sakemm Parti ma ttemmx id-dritt billi tagħti avviż bil-miktub mill-anqas tliet xhur qabel l-iskadenza tal-perjodu inizjali jew ta’ kwalunkwe perjodu suċċessiv.
Dan id-dritt ġie stabbilit għal perjodu ta’ tliet snin (mill-1 ta’ Lulju 2011 sat-30 ta’ Ġunju 2014). Skont l-Artikolu 5(8)(b) tal-Protokoll, “[i]d-dritt għandu jiġġedded għal perjodu ta’ tliet snin u wara jiġġedded awtomatikament għal perjodi oħra suċċessivi tal-istess tul, sakemm Parti ma ttemmx id-dritt billi tagħti avviż bil-miktub mill-anqas tliet xhur qabel l-iskadenza tal-perjodu inizjali jew ta’ kwalunkwe perjodu suċċessiv.”
F’konformità ma’ dik id-dispożizzjoni, id-dritt iġġedded tliet darbiet għal tliet snin oħra. L-ewwel tiġdid baqa’ applikabbli sat-30 ta’ Ġunju 2017, it-tieni wieħed baqa’ applikabbli sat-30 ta’ Ġunju 2020, u t-tielet wieħed jibqa’ applikabbli sat-30 ta’ Ġunju 2023, peress li l-ebda Parti ma temmet id-dritt.
Permezz tad-Deċiżjoni tal-Kunsill (UE) 2020/470 tal-25 ta’ Marzu 2020 dwar l-estensjoni tal-perjodu tad-dritt għal koproduzzjonijiet awdjoviżivi kif previst fl-Artikolu 5 tal-Protokoll dwar il-Kooperazzjoni Kulturali għall-Ftehim ta’ Kummerċ Ħieles bejn l-Unjoni Ewropea u l-Istati Membri tagħha, minn naħa waħda, u r-Repubblika tal-Korea, min-naħa l-oħra 3 , il-Kunsill qabel li jkompli d-dritt mill-1 ta’ Lulju 2020 sat-30 ta’ Ġunju 2023.
Id-Deċiżjoni tal-Kunsill (UE) 2020/470 ġiet adottata abbażi tal-Artikolu 3(1) tad-Deċiżjoni (UE) 2015/2169 li, waqt l-adozzjoni tad-Deċiżjoni tal-Kunsill (UE) 2020/470, ippreveda b’mod partikolari li l-Kummissjoni għandha tagħti avviż lir-Repubblika tal-Korea dwar l-intenzjoni tal-Unjoni Ewropea li ma testendix il-perjodu tad-dritt inkwistjoni sakemm, wara proposta tal-Kummissjoni, il-Kunsill ma jaqbilx b’mod unanimu erba’ xhur qabel tmiem il-perjodu li jkompli d-dritt.
Permezz tas-sentenza tal-1 ta’ Marzu 2022 fil-kawża Il-Kummissjoni vs Il-Kunsill 4 , il-Qorti tal-Ġustizzja annullat dik id-deċiżjoni għax dehrilha li l-proċedura stabbilita fl-Artikolu 3(1) tad-Deċiżjoni (UE) 2015/2169 ma kinitx tikkonforma mal-Artikolu 218 tat-TFUE sa fejn kienet tirrikjedi li l-Kunsill jivvota b’unanimità. Ir-regola tal-votazzjoni applikabbli għall-adozzjoni ta’ deċiżjonijiet bħad-Deċiżjoni tal-Kunsill (UE) 2020/470 kellha tkun dik stabbilita fl-ewwel subparagrafu tal-Artikolu 218(8) tat-TFUE, jiġifieri votazzjoni b’maġġoranza kwalifikata fil-Kunsill. Fis-sentenza tagħha, il-Qorti żammet ukoll l-effetti tad-Deċiżjoni (UE) 2020/470 sakemm jiġu rimedjati r-raġunijiet tal-annullament stabbiliti.
Permezz tad-Deċiżjoni tal-Kunsill (UE) 2022/2335, tħassar ir-rekwiżit li l-Kunsill jaġixxi b’unanimità sabiex jiddeċiedi dwar il-kontinwazzjoni tad-dritt fl-Artikolu 3(1) tad-Deċiżjoni tal-Kunsill (UE) 2015/2169.
Sabiex jitneħħa kull dubju dwar l-impenn tal-Unjoni Ewropea rigward l-estensjoni tad-dritt għal perjodu ta’ tliet snin, mill-1 ta’ Lulju 2020 sal-30 ta’ Ġunju 2023, jenħtieġ li tiġi adottata deċiżjoni ġdida, u b’hekk tiġi żgurata l-implimentazzjoni korretta tal-Protokoll.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
F’konformità mas-sentenza msemmija hawn fuq, il-bażi ġuridika tad-deċiżjoni proposta hija l-Artikolu 3(1) tad-Deċiżjoni tal-Kunsill (UE) 2015/2169 kif emendata permezz tad-Deċiżjoni tal-Kunsill (UE) 2022/2335.
•Għażla tal-istrument
F’konformità mal-Artikolu 3(1) tad-Deċiżjoni tal-Kunsill (UE) 2015/2169, l-istrument xieraq sabiex jintlaħaq qbil dwar l-estensjoni tad-dritt huwa Deċiżjoni tal-Kunsill.
2022/0416 (NLE)
Proposta għal
DEĊIŻJONI TAL-KUNSILL
dwar l-estensjoni tal-perjodu tad-dritt għal koproduzzjonijiet awdjoviżivi kif previst fl-Artikolu 5 tal-Protokoll dwar il-Kooperazzjoni Kulturali għall-Ftehim ta’ Kummerċ Ħieles bejn l-Unjoni Ewropea u l-Istati Membri tagħha, minn naħa waħda, u r-Repubblika tal-Korea, min-naħa l-oħra
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea,
Wara li kkunsidra d-Deċiżjoni tal-Kunsill (UE) 2015/2169 tal-1 ta’ Ottubru 2015 dwar il-konklużjoni ta’ Ftehim ta’ Kummerċ Ħieles bejn l-Unjoni Ewropea u l-Istati Membri tagħha, minn naħa waħda, u r-Repubblika tal-Korea, min-naħa l-oħra, kif emendata permezz tad-Deċiżjoni tal-Kunsill (UE) 2022/2335 5 , u b’mod partikolari l-Artikolu 3(1) tagħha,
Wara li kkunsidra l-proposta tal-Kummissjoni Ewropea,
Billi:
(1)Il-Protokoll dwar il-Kooperazzjoni Kulturali 6 anness mal-Ftehim ta’ Kummerċ Ħieles bejn l-Unjoni Ewropea u l-Istati Membri tagħha, minn naħa waħda, u r-Repubblika tal-Korea, min-naħa l-oħra 7 (“il-Protokoll”) jistabbilixxi fl-Artikolu 1 il-qafas li fi ħdanu l-Partijiet għandhom jikkooperaw għall-iffaċilitar ta’ skambji li jirrigwardaw l-attivitajiet, l-oġġetti u s-servizzi kulturali, inkluż fis-settur awdjoviżiv.
(2)Il-Protokoll jinkludi dispożizzjonijiet dwar id-dritt għal koproduzzjonijiet awdjoviżivi li jibbenefikaw mill-iskemi rispettivi.
(3)Skont l-Artikolu 5(8), il-punt (b), tal-Protokoll, wara l-perjodu inizjali ta’ tliet snin, id-dritt jiġġedded għal perjodi oħra suċċessivi tal-istess tul, sakemm Parti ma ttemmx id-dritt billi tagħti avviż bil-miktub mill-anqas tliet xhur qabel l-iskadenza tal-perjodu inizjali jew ta’ kwalunkwe perjodu suċċessiv ieħor. F’konformità ma’ dik id-dispożizzjoni, id-dritt ġie estiż l-aħħar sat-30 ta’ Ġunju 2023, peress li ebda parti ma temmitu.
(4)Id-Deċiżjoni tal-Kunsill (UE) 2020/470 8 estendiet id-dritt għal koproduzzjonijiet awdjoviżivi għal perjodu ta’ tliet snin, mill-1 ta’ Lulju 2020 sat-30 ta’ Ġunju 2023. Permezz tas-sentenza tal-1 ta’ Marzu 2022 fil-kawża Il-Kummissjoni vs Il-Kunsill 9 , il-Qorti tal-Ġustizzja annullat dik id-deċiżjoni. Fis-sentenza tagħha, il-Qorti żammet ukoll l-effetti tad-Deċiżjoni (UE) 2020/470 sakemm jiġu rimedjati r-raġunijiet tal-annullament stabbiliti.
(5)Fit-28 ta’ Novembru 2022, il-Kunsill adotta d-Deċiżjoni (UE) 2022/2335 li temenda d-Deċiżjoni (UE) 2015/2169 10 f’konformità ma’ dik is-sentenza.
(6)Sabiex jitneħħa kull dubju dwar l-impenn tal-Unjoni rigward l-estensjoni tad-dritt għal perjodu ta’ tliet snin, mill-1 ta’ Lulju 2020 sat-30 ta’ Ġunju 2023, u b’hekk tiġi żgurata l-implimentazzjoni korretta tal-Protokoll, jenħtieġ li tiġi adottata deċiżjoni ġdida abbażi tal-Artikolu 3(1) tad-Deċiżjoni tal-Kunsill (UE) 2015/2169, kif emendata permezz tad-Deċiżjoni tal-Kunsill (UE) 2022/2335, u tkun tapplika mill-1 ta’ Lulju 2020, f’konformità ma’ dik is-sentenza,
ADOTTA DIN ID-DEĊIŻJONI:
Artikolu 1
Id-dritt għal koproduzzjonijiet awdjoviżivi li jibbenefikaw mill-iskemi rispettivi tal-Partijiet għall-promozzjoni ta’ kontenut kulturali lokali/reġjonali, kif previst fl-Artikolu 5(4) sa (7) tal-Protokoll dwar il-Kooperazzjoni Kulturali anness mal-Ftehim ta’ Kummerċ Ħieles bejn l-Unjoni Ewropea u l-Istati Membri tagħha minn naħa waħda, u r-Repubblika tal-Korea, min-naħa l-oħra, għandu jiġi estiż għal perjodu ta’ tliet snin, mill-1 ta’ Lulju 2020 sat-30 ta’ Ġunju 2023.
Artikolu 2
Din id-Deċiżjoni għandha tidħol fis-seħħ fid-data tal-adozzjoni tagħha.
Għandha tapplika mill-1 ta’ Lulju 2020.
Magħmul fi Brussell,
Għall-Kunsill
Il-President
