EUR-Lex Access to European Union law
This document is an excerpt from the EUR-Lex website
Document 52022PC0411
Proposal for a COUNCIL DECISION on the position to be taken on behalf of the European Union in the Council of Members of the International Olive Council (IOC), concerning the elimination of the category ordinary virgin olive oil from Annex B of the International Agreement on Olive Oil and Table Olives, 2015
Proposta għal DEĊIŻJONI TAL-KUNSILL dwar il-pożizzjoni li għandha tittieħed f’isem l-Unjoni Ewropea fil-Kunsill tal-Membri tal-Kunsill Internazzjonali taż-Żebbuġ (IOC) dwar it-tħassir tal-kategorija żejt taż-żebbuġa verġni ordinarju mill-Anness B tal-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda, 2015
Proposta għal DEĊIŻJONI TAL-KUNSILL dwar il-pożizzjoni li għandha tittieħed f’isem l-Unjoni Ewropea fil-Kunsill tal-Membri tal-Kunsill Internazzjonali taż-Żebbuġ (IOC) dwar it-tħassir tal-kategorija żejt taż-żebbuġa verġni ordinarju mill-Anness B tal-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda, 2015
COM/2022/411 final
IL-KUMMISSJONI EWROPEA
Brussell, 22.8.2022
COM(2022) 411 final
2022/0241(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kunsill tal-Membri tal-Kunsill Internazzjonali taż-Żebbuġ (IOC) dwar it-tħassir tal-kategorija żejt taż-żebbuġa verġni ordinarju mill-Anness B tal-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda, 2015
{SWD(2022) 217 final}
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna d-Deċiżjoni li tistabbilixxi l-pożizzjoni li trid tiġi adottata f’isem l-Unjoni fil-Kunsill tal-Membri tal-Kunsill Internazzjonali taż-Żebbuġ (l-“IOC”) b’rabta mat-tħassir tal-kategorija żejt taż-żebbuġa verġni ordinarju mill-Anness B tal-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda.
2.Kuntest tal-proposta
2.1.Il-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda tal-2015
Il-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda, 2015 (“il-Ftehim”) għandu l-għanijiet: (i) li jfittex li tinkiseb uniformità fil-leġiżlazzjoni nazzjonali u internazzjonali b’rabta mal-karatteristiċi fiżikokimiċi u organolettiċi taż-żjut taż-żebbuġa, taż-żjut mir-residwi taż-żebbuġ, u taż-żebbuġ tal-mejda, sabiex jiġu evitati l-ostakli għall-kummerċ; (ii) li jitwettqu attivitajiet fil-qasam tal-ittestjar fiżikokimiku u organolettiku biex jiżdied l-għarfien dwar il-karatteristiċi tal-kompożizzjoni u tal-kwalità tal-prodotti taż-żebbuġ, bl-għan li jiġu kkonsolidati l-istandards internazzjonali; u (iii) li jissaħħaħ ir-rwol tal-Kunsill Internazzjonali taż-Żebbuġ bħala forum ta’ eċċellenza għall-komunità xjentifika internazzjonali fil-qasam taż-żebbuġ u taż-żejt taż-żebbuġa.
Il-verżjoni mġedda tal-Ftehim daħlet fis-seħħ fl-1 ta’ Jannar 2017.
L-Unjoni Ewropea hija parti għall-Ftehim 1 .
2.2.Il-Kunsill tal-Membri
Il-Kunsill tal-Membri tal-Kunsill Internazzjonali taż-Żebbuġ (“il-Kunsill tal-Membri”) huwa l-ogħla awtorità u l-korp li jieħu d-deċiżjonijiet tal-IOC u għandu jeżerċita s-setgħat kollha u jwettaq il-funzjonijiet kollha meħtieġa biex jintlaħqu l-objettivi ta’ dan il-Ftehim. Bħala parti għall-Ftehim, l-Unjoni Ewropea hija membru tal-IOC u hija rappreżentata fil-Kunsill tal-Membri. Skont l-Artikolu 19(2) tal-Ftehim tal-IOC, il-Kunsill tal-Membri jista’ jieħu d-deċiżjonijiet biex jemenda l-Annessi tal-Ftehim tal-IOC. F’konformità mal-Artikolu 10(3) tal-Ftehim tal-IOC, id-deċiżjonijet tal-Kunsill tal-Membri dwar emendi possibbli tal-Ftehim għandhom jittieħdu b’kunsens.
2.3.L-att previst tal-Kunsill tal-Membri
Fid-29 ta’ April 2022, is-Segretarju Eżekuttiv tal-IOC bagħat it-test ta’ deċiżjoni dwar il-kimika u l-istandardizzazzjoni li se jiġi adottat mill-Kunsill tal-Membri lill-Membri tiegħu. L-għan tal-att previst huwa li titħassar il-kategorija żejt taż-żebbuġa verġni ordinarju mill-Anness B tal-Ftehim tal-IOC mill-1 ta’ Jannar 2026. Skont l-Artikolu 20(1) tal-Ftehim, l-ismijiet fl-Annessi B u C tal-Ftehim tal-IOC japplikaw għall-kummerċ internazzjonali tal-Membri. L-att previst b’hekk ikun jemenda l-Anness B tal-Ftehim tal-IOC.
Id-Dokument ta’ Ħidma tal-Persunal tal-Kummissjoni mehmuż ma’ din il-proposta jinkludi t-test tad-deċiżjoni.
Waqt il-115-il seduta tal-IOC (f’Ġunju tal-2022) l-UE talbet li tiġi posposta l-adozzjoni tad-deċiżjoni, billi ma kinitx f’pożizzjoni li tagħti l-approvazzjoni tagħha (kellha bżonn iż-żmien biex tadotta l-pożizzjoni li se tittieħed f’isem l-Unjoni). Għalhekk, il-pożizzjoni dettaljata fid-Deċiżjoni preżenti se tiġi adottata f’isem l-Unjoni fil-116-il seduta tal-IOC f’Novembru tal-2022, jew fil-qafas ta’ proċedura possibbli għall-adozzjoni mill-Kunsill tal-Membri permezz tal-korrispondenza, skont l-Artikolu 10(6) tal-Ftehim, qabel is-seduta regolari li jmiss f’Novembru tal-2022.
3.Pożizzjoni li għandha tittieħed f’isem l-Unjoni
Id-deċiżjoni li se tiġi adottata mill-Kunsill tal-Membri se temenda l-Anness B tal-Ftehim tal-IOC bit-tħassir tal-kategorija żejt taż-żebbuġa verġni ordinarju, bid-data tad-dħul fis-seħħ tal-1 ta’ Jannar 2026. F’dak iż-żmien se tkun meħtieġa deċiżjoni oħra tal-Kunsill tal-Membri li din il-kategorija u l-parametri marbutin magħha jitħassru mill-Istandard Kummerċjali tal-IOC għaż-Żejt taż-Żebbuġa u għaż-Żejt mir-residwi taż-żebbuġ.
Din il-kategorija ta’ Żejt taż-Żebbuġa ma teżistix fir-Regolament (UE) Nru 1308/2013 tal-Parlament Ewropew u tal-Kunsill 2 . Għalhekk, id-deċiżjoni msemmija hawn fuq taqbel mal-politika tal-Unjoni fir-rigward tal-istandards għall-kummerċjalizzazzjoni tal-prodotti agrikoli kif previst fit-Titolu II tal-Parti II tar-Regolament (UE) Nru 1308/2013 tal-Parlament Ewropew u tal-Kunsill.
Meta jitqies il-proċess tat-teħid tad-deċiżjonijiet fil-Kunsill tal-Membri tal-IOC, il-pożizzjoni tal-Unjoni hija meħtieġa biex jiġu stabbiliti l-kundizzjonijiet biex tiġi adottata d-deċiżjoni prevista fl-Anness.
4.Bażi ġuridika
4.1.Bażi ġuridika proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
Il-kunċett ta’ “atti li jkollhom effetti legali” jinkludi atti li għandhom effetti legali skont ir-regoli tad-dritt internazzjonali li jirregolaw is-sede inkwistjoni. Dan jinkludi wkoll l-istrumenti li ma jkollhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatur tal-Unjoni” 3 .
4.1.2.Applikazzjoni għall-każ preżenti
Il-Kunsill tal-Membri huwa korp imwaqqaf bi ftehim, speċifikament il-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda.
L-atti li l-Kunsill tal-Membri jrid jadotta jikkostitwixxu atti li jkollhom effetti legali. L-att previst ikun vinkolanti skont id-dritt internazzjonali f’konformità mal-Artikolu 20(1) tal-Ftehim.
L-att previst ma jissupplimentax u ma jemendax il-qafas istituzzjonali tal-Ftehim.
Għalhekk, il-bażi ġuridika proċedurali għad-Deċiżjoni proposta hija l-Artikolu 218(9) tat-TFUE.
4.2.Bażi ġuridika sostantiva
4.2.1.Prinċipji
Il-bażi ġuridika sostantiva għal deċiżjoni skont l-Artikolu 218(9) tat-TFUE tiddependi primarjament mill-objettiv u mill-kontenut tal-att previst li dwaru tittieħed pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawk l-għanijiet jew il-komponenti jkun jista’ jiġi identifikat bħala dak ewlieni, filwaqt li l-ieħor ikun sempliċement inċidentali, id-Deċiżjoni skont l-Artikolu 218(9) tat-TFUE trid tkun imsejsa fuq bażi ġuridika sostantiva waħda, jiġifieri dik meħtieġa mill-għan jew mill-komponent ewlieni jew predominanti.
4.2.2.Applikazzjoni għall-każ preżenti
L-objettiv ewlieni u l-kontenut tal-att previst huma relatati mal-politika kummerċjali komuni.
Għalhekk, il-bażi ġuridika sostantiva tad-Deċiżjoni proposta hija l-Artikolu 207 tat-TFUE.
4.3.Konklużjoni
Jenħtieġ li l-bażi ġuridika tad-Deċiżjoni proposta tkun l-Artikolu 207 tat-TFUE, flimkien mal-Artikolu 218(9) tat-TFUE.
5.Pubblikazzjoni tal-att previst
Billi l-att tal-Kumitat tal-Membri tal-Kunsill se jemenda l-Ftehim tal-IOC, jixraq li dan jiġi ppubblikat f’Il-Ġurnal Uffiċjali tal-Unjoni Ewropea wara li jiġi adottat.
2022/0241 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kunsill tal-Membri tal-Kunsill Internazzjonali taż-Żebbuġ (IOC) dwar it-tħassir tal-kategorija żejt taż-żebbuġa verġni ordinarju mill-Anness B tal-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda, 2015
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207 flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)Il-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda, 2015 (“il-Ftehim”) ġie ffirmat f’isem l-Unjoni f’konformità mad-Deċiżjoni tal-Kunsill (UE) 2016/1892 4 fit-18 ta’ Novembru 2016, soġġett għall-konklużjoni tiegħu f’data aktar tard. Il-Ftehim daħal fis-seħħ b’mod proviżorju fl-1 ta’ Jannar 2017 f’konformità mal-Artikolu 31(2) tiegħu u ġie konkluż mill-Unjoni bid-Deċiżjoni tal-Kunsill (UE) 2019/848 tas-17 ta’ Mejju 2019 5 .
(2)Skont l-Artikolu 7(1) tal-Ftehim, il-Kunsill tal-Membri tal-Kunsill Internazzjonali taż-Żebbuġ (“il-Kunsill tal-Membri”) irid jadotta d-deċiżjonijiet li jagħmlu t-tibdil fil-Ftehim.
(3)Waqt il-116-il seduta tal-IOC li se ssir bejn it-28 ta’ Novembru u t-2 ta’ Diċembru 2022, jew fil-qafas ta’ proċedura permezz tal-korrispondenza, il-Kunsill tal-Membri se jadotta deċiżjoni biex titħassar il-kategorija “żejt taż-żebbuġa verġni ordinarju” mill-Anness B tal-Ftehim tal-IOC.
(4)Id-deċiżjoni ssir vinkolanti skont id-dritt internazzjonali f’konformità mal-Artikolu 20(1) tal-Ftehim tal-IOC. Jixraq li tiġi stabbilita l-pożizzjoni li għandha tittieħed f’isem l-Unjoni fil-Kunsill tal-Membri, peress li d-deċiżjoni li se tiġi adottata se tkun vinkolanti fuq l-Unjoni.
(5)Billi l-kategorija “żejt taż-żebbuġa verġni ordinarju” ma teżistix fir-Regolament (UE) Nru 1308/2013 tal-Parlament Ewropew u tal-Kunsill 6 , jenħtieġ li d-deċiżjoni tiġi appoġġata.
(6)Jenħtieġ li f’isem l-Unjoni tittieħed il-pożizzjoni stabbilita fl-Anness ta’ din id-Deċiżjoni fil-116-il seduta tal-IOC, jew fil-qafas ta’ proċedura għall-adozzjoni mill-Kunsill tal-Membri permezz tal-korrispondenza, skont l-Artikolu 10(6) tal-Ftehim. Jenħtieġ li l-proċedura għall-adozzjoni permezz ta’ skambju ta’ korrispondenza tinbeda qabel is-seduta regolari li jmiss tal-Kunsill tal-Membri f’Novembru tal-2022.
ADOTTAT DIN ID-DEĊIŻJONI:
Artikolu 1
Il-pożizzjoni li trid tittieħed f’isem l-Unjoni fil-Kunsill tal-Membri waqt il-116-il seduta li se ssir bejn it-28 ta’ Novembru u t-2 ta’ Diċembru 2022, jew fil-qafas ta’ proċedura ta’ adozzjoni mill-Kunsill tal-Membri permezz tal-korrispondenza li trid tinbeda qabel is-seduta regolari li jmiss f’Novembru tal-2022 hija stabbilita fl-Anness.
Artikolu 2
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 22.8.2022
COM(2022) 411 final
ANNESS
tal-Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kunsill tal-Membri tal-Kunsill Internazzjonali taż-Żebbuġ (IOC) dwar it-tħassir tal-kategorija żejt taż-żebbuġa verġni ordinarju mill-Anness B tal-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda, 2015
{SWD(2022) 217 final}
ANNESS
L-Unjoni għandha tappoġġa t-tħassir tal-kategorija “żejt taż-żebbuġa verġni ordinarju” mill-Anness B tal-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda, li jibda jseħħ mill-1 ta’ Jannar 2026, waqt seduta futura tal-Kunsill tal-Membri jew fil-qafas ta’ proċedura għall-adozzjoni mill-Kunsill tal-Membri permezz tal-korrispondenza.
