IL-KUMMISSJONI EWROPEA

Brussell, 19.7.2022

COM(2022) 349 final

2022/0219(COD)

Proposta għal

REGOLAMENT TAL-PARLAMENT EWROPEW U TAL-KUNSILL

dwar l-istabbiliment tal-Att dwar it-Tisħiħ tal-Industrija Ewropea tad-Difiża permezz tal-Akkwist Komuni

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u objettivi tal-proposta

Il-kuntest ġeopolitiku tal-Unjoni, li diġà ilu kkaratterizzat minn sitwazzjoni instabbli fir-reġjuni tal-viċinat tal-Ewropa għal ħafna snin u minn ambjent kumpless u diffiċli, inbidel b’mod drammatiku fid-dawl tal-aggressjoni militari Russa fl-Ukrajna. Minħabba r-ritorn tal-kunflitt territorjali u l-gwerra mill-aktar intensi fit-territorju Ewropew, l-Istati Membri jeħtieġ jirrevedu l-pjanijiet u l-kapaċitajiet tad-difiża tagħhom.

Il-Kapijiet ta’ Stat jew ta’ Gvern tal-UE, li ltaqgħu f’Versailles fil-11 ta’ Marzu 2022, impenjaw ruħhom li “jsaħħu l-kapaċitajiet Ewropej tad-difiża” fid-dawl tal-aggressjoni militari Russa fl-Ukrajna. Id-dikjarazzjoni ta’ Versailles tistqarr b’mod partikolari li l-Istati Membri jenħtieġ li jżidu n-nefqa fuq id-difiża; iżidu l-kooperazzjoni bi proġetti konġunti; ixejnu n-nuqqasijiet u jilħqu l-objettivi tal-kapaċità; jixprunaw l-innovazzjoni inkluż b’sinerġiji ċivili/militari; u jsaħħu u jiżviluppaw l-industrija tad-difiża tal-UE, inkluż SMEs. Barra minn hekk, il-Kunsill stieden “lill-Kummissjoni biex b’koordinazzjoni mal-Aġenzija Ewropea għad-Difiża tippreżenta analiżi tad-diskrepanzi fl-investiment fid-difiża sa nofs Mejju u tipproponi xi inizjattivi oħrajn meħtieġa biex tissaħħaħ il-bażi industrijali u teknoloġika tad-difiża Ewropea.”

Bħala tweġiba għal din l-istedina, fit-18 ta’ Mejju 2022, il-Kummissjoni Ewropea u r-Rappreżentant Għoli ppreżentaw Komunikazzjoni Konġunta dwar l-Analiżi tad-Diskrepanzi fl-Investiment fid-Difiża u l-Passi li Jmiss (il-“Komunikazzjoni Konġunta”). Din tat għarfien dwar tliet tipi ewlenin ta’ diskrepanzi: diskrepanzi finanzjarji, diskrepanzi industriji, u diskrepanzi fil-kapaċità. Il-Komunikazzjoni Konġunta tinnota li ż-żidiet riċenti fil-baġit tal-Istati Membri qed jiġu wara bosta snin ta’ tnaqqis sostanzjali u nuqqas serju fl-investiment. Dan in-nuqqas ta’ investiment fin-nefqa fuq id-difiża wassal biex inħolqu diskrepanzi industrijali u fil-kapaċità fl-UE, u wassal għal-livelli baxxi attwali ta’ ħażniet tat-tagħmir tad-difiża. It-trasferimenti tat-tagħmir tad-difiża lejn l-Ukrajna, flimkien mal-livell tal-ħażniet li tfassal għal żminijiet ta’ paċi wasslu biex inħolqu diskrepanzi urġenti u kritiċi mil-lat ta’ tagħmir militari.

Il-Komunikazzjoni Konġunta tfakkar li l-Istati Membri jeħtieġ jerġgħu jistabbilixxu l-prontezza għal ġlied u difiża bħala kwistjoni ta’ urġenza fid-dawl tas-sitwazzjoni tas-sigurtà u tat-trasferimenti li diġà saru lejn l-Ukrajna. B’mod partikolari, bir-riforniment tal-ħażniet tal-materjal, tkun tista’ tingħata aktar assistenza lill-Ukrajna.

Il-Komunikazzjoni Konġunta tindika li filwaqt li l-Istati Membri se jkunu qed jimlew il-ħażniet tagħhom u jżidu l-kwantità tat-tagħmir tad-difiża tagħhom, dawn jenħtieġ li jaħtfu l-opportunità li jagħmlu dan b’mod kollaborattiv. Dan jipprovdi valur akbar għall-flus, itejjeb l-interoperabbiltà u jevita li l-aktar Stati Membri tal-UE esposti jispiċċaw ma jkunux jistgħu jiksbu dak li jeħtieġu, minħabba domandi kunfliġġenti fuq l-industrija tad-difiża, li ma tkunx tista’ tirrispondi għal din iż-żieda fid-domanda fi żmien qasir.

Mingħajr koordinazzjoni u kooperazzjoni, iż-żidiet fl-investimenti tal-Istati Membri fid-difiża għandhom ir-riskju li jkabbru l-frammentazzjoni tas-settur tad-difiża Ewropea, li jillimitaw il-potenzjal ta’ kooperazzjoni tul iċ-ċiklu tal-ħajja tat-tagħmir, li jitqawwew id-dipendenzi esterni, u li tixxekkel l-interoperabbiltà. L-għażliet li jsiru rigward l-akkwist fl-immedjat se jħallu impatt fit-tul fuq is-saħħa tas-suq tal-Bażi Industrijali u Teknoloġika tad-Difiża Ewropea (EDTIB) u fuq l-opportunitajiet għall-għexieren ta’ snin li ġejjin.

Peress li l-Istati Membri jeħtieġ jitwieżnu fil-ħin u b’mod immirat ħalli jsaħħu l-kapaċitajiet tad-difiża tagħhom f’din is-sitwazzjoni ta’ emerġenza, il-Kummissjoni Ewropea pproponiet li tinċentiva l-akkwist komuni permezz tal-baġit tal-UE bl-użu ta’ Strument apposta għall-Immedjat li jistabbilixxi l-Att dwar it-Tisħiħ tal-Industrija Ewropea tad-Difiża permezz tal-Akkwist Komuni (l-“Istrument”).

L-appoġġ finanzjarju tal-UE permezz tal-Istrument jenħtieġ li jistimula proċess tal-akkwist kooperattiv tad-difiża mill-Istati Membri għall-benefiċċju tal-EDTIB, u jiżgura l-kapaċità ta’ azzjoni mill-forzi armati tal-Istati Membri tal-UE, is-sigurtà tal-provvista u aktar interoperabbiltà.

Dan l-Istrument jenħtieġ li jiġi stabbilit biex jinċentiva lill-Istati Membri li lesti jwettqu akkwist komuni biex jimlew dawn id-diskrepanzi. L-Istrument jenħtieġ li jkun għodda apposta li titfassal biex tindirizza l-effetti negattivi u l-konsegwenzi tal-gwerra tal-Ukrajna fuq l-Unjoni.

L-Istrument se jsegwi l-istabbiliment ta’ Task Force tal-Akkwist Konġunt għad-Difiża li se tgħinhom jikkoordinaw il-ħtiġijiet tal-akkwist tagħhom għall-immedjat ħalli jiffaċċjaw is-sitwazzjoni l-ġdida tas-sigurtà. Wara li stabbiliet l-Istrument, il-Kummissjoni se tipproponi Regolament dwar il-Programm Ewropew għall-Investiment fil-Qasam tad-Difiża (EDIP). Ir-Regolament EDIP jkun l-ankra għal proġetti konġunti futuri ta’ żvilupp u akkwist li jkollhom interess komuni qawwi fil-qasam tas-sigurtà tal-Istati Membri u tal-Unjoni, u b’estenjoni tal-loġika tal-Istrument għall-immedjat, għal intervent finanzjarju tal-Unjoni assoċjat possibbli biex tissaħħaħ il-bażi industrijali tad-difiża Ewropea, b’mod partikolari għall-proġetti li l-ebda Stat Membru ma jista’ jiżviluppa jew jakkwista waħdu.

•Konsistenza mad-dispożizzjonijiet eżistenti fil-qasam ta’ politika

•Konsistenza ma’ politiki oħra tal-Unjoni

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

•Sussidjarjetà (għall-kompetenza mhux esklużiva)

–aktar kumplessità u piż amministrattiv minħabba l-kooperazzjoni;

–rekwiżiti nazzjonali differenti;

–skedi differenti tal-akkwist u nuqqas ta’ sinkronizzazzjoni baġitarja;

–kunsiderazzjonijiet dwar is-sigurtà tal-informazzjoni;

–kunsiderazzjonijiet dwar il-politika industrijali nazzjonali tad-difiża;

–nuqqas ta’ għarfien espert nazzjonali fl-aġenziji tal-akkwist.

•Proporzjonalità

•Għażla tal-istrument

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Evalwazzjonijiet ex post/kontrolli tal-idoneità tal-leġiżlazzjoni eżistenti

•Valutazzjoni tal-impatt

•Idoneità regolatorja u simplifikazzjoni

•Drittijiet fundamentali

4.IMPLIKAZZJONIJIET BAĠITARJI

5.ELEMENTI OĦRAJN

•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar

2022/0219 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

dwar l-istabbiliment tal-Att dwar it-Tisħiħ tal-Industrija Ewropea tad-Difiża permezz tal-Akkwist Komuni

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 173(3) tiegħu,

Wara li kkunsidraw il-proposta tal-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew 1 ,

Filwaqt li jaġixxu f’konformità mal-proċedura leġiżlattiva ordinarja,

Billi:

(1)Il-Kapijiet ta’ Stat jew ta’ Gvern tal-UE, fil-laqgħa tagħhom f’Versailles fil-11 ta’ Marzu, impenjaw ruħhom li “jixprunaw il-kapaċitajiet tad-difiża Ewropej” fid-dawl tal-aggressjoni militari Russa fl-Ukrajna. Ftiehmu li jżidu l-infiq fuq id-difiża, iżidu l-kooperazzjoni bi proġetti konġunti u b’akkwist komuni tal-kapaċitajiet tad-difiża, jindirizzaw in-nuqqasijiet, jixprunaw l-innovazzjoni, u jsaħħu u jiżviluppaw l-industrija tad-difiża tal-UE.

(2)L-invażjoni mhux ġustifikata tal-Ukrajna mill-Federazzjoni Russa fl-24 ta’ Frar 2022 u l-kunflitt armat li għaddej fl-Ukrajna għamluha ċara li hu kruċjali li tittieħed azzjoni issa biex jiġu indirizzati n-nuqqasijiet eżistenti. Din l-invażjoni reġgħet ħolqot gwerra u kunflitt territorjali mill-aktar intensi fl-Ewropa li jeżiġu żieda sinifikanti fil-kapaċità tal-Istati Membri ħalli jimtlew l-aktar diskrepanzi urġenti u kritiċi, speċjalment dawk aggravati bit-trasferiment tal-prodotti tad-difiża lejn l-Ukrajna.

(3)Fit-18 ta’ Mejju 2022, il-Kummissjoni u r-Rappreżentant Għoli ppreżentaw Komunikazzjoni Konġunta dwar “l-Analiżi tad-Diskrepanzi fl-Investiment fid-Difiża u l-Passi li Jmiss”. Il-Komunikazzjoni enfasizzat li fl-UE jeżistu għadd ta’ diskrepanzi finanzjarji, industrijali, u fil-kapaċità.

(4)Strument dedikat għall-immedjat, imfassal bi spirtu ta’ solidarjetà, ġie indikat bħala għodda li tinċentiva lill-Istati Membri, b’mod volontarju, iwettqu akkwist komuni li jimla l-aktar diskrepanzi urġenti u kritiċi b’mod kollaborattiv, speċjalment dawk ikkawżati mir-rispons għall-aggressjoni attwali Russa.

(5)Strument ġdid bħal dan jikkontribwixxi għat-tisħiħ tal-akkwist komuni tad-difiża u, bil-finanzjament assoċjat tal-Unjoni, għat-tisħiħ tal-kapaċitajiet industrijali tad-difiża tal-UE.

(6)Għalhekk, it-tisħiħ tal-Bażi Industrijali u Teknoloġika tad-Difiża Ewropea jenħtieġ li jkun fil-qalba ta’ dawk l-isforzi. Fil-fatt għad hemm bosta diffikultajiet u diskrepanzi, u l-bażi industrijali Ewropea tad-difiża għadha frammentata ħafna u ma twettaqx biżżejjed azzjonijiet kollaborattivi u interoperabbiltà tal-prodotti.

(7)Fil-kuntest attwali tas-suq tad-difiża, ikkaratterizzat b’żieda fit-theddid għas-sigurtà u bi prospett realistiku ta’ kunflitt mill-aktar intens, l-Istati Membri qed iżidu malajr il-baġits tad-difiża tagħhom u jistinkaw biex jixru tagħmir simili. Dan se jwassal biex id-domanda taqbeż il-kapaċitajiet tal-manifattura tal-EDTIB, li bħalissa huma maħsuba għal żminijiet ta’ paċi.

(8)Għaldaqstant jistgħu jiġu antiċipati inflazzjoni qawwija fil-prezzijiet u aktar dewmien fit-twassil tal-ordnijiet, li potenzjalment jistgħu jagħmlu ħsara lis-sigurtà tal-Unjoni u tal-Istati Membri tagħha. L-industriji tad-difiża jeħtieġ jiżguraw il-kapaċità tal-produzzjoni meħtieġa għall-ipproċessar tal-ordnijiet, kif ukoll il-materja prima kritika u s-sottokomponenti. F’dan il-kuntest, il-produtturi jaf jagħtu preferenza lil ordnijiet kbar, u potenzjalment iħallu lill-aktar pajjiżi vulnerabbli esposti, mingħajr id-daqs kritiku u l-mezzi finanzjarji biex jiżguraw ordnijiet kbar.

(9)Barra minn hekk, jenħtieġ li jsiru sforzi ħalli ż-żieda fl-infiq tissarraf f’Bażi Industrijali u Teknoloġika tad-Difiża Ewropea ferm aktar b’saħħitha. Tabilħaqq, mingħajr koordinazzjoni u kooperazzjoni, iż-żidiet fl-investimenti nazzjonali għandhom ir-riskju li jkabbru l-frammentazzjoni tal-industrija Ewropea tad-difiża.

(10)Fid-dawl tal-isfidi msemmija hawn fuq u l-bidliet strutturali relatati fl-industrija tad-difiża tal-UE, jidher li jeħtieġ jitħaffef l-aġġustament tal-Bażi Industrijali u Teknoloġika tad-Difiża Ewropea, u li jissaħħu l-kompetittività u l-effiċjenza tagħha, ħalli tikkontribwixxi għat-tisħiħ u r-riformar tal-kapaċitajiet industrijali tad-difiża tal-Istati Membri. In-nuqqasijiet industrijali jenħtieġ li jiġu indirizzati b’tali mod li jiġu indirizzati wkoll l-aktar dispkrepanzi urġenti, mill-aktar fis.

(11)Jenħtieġ li b’mod partikolari jiġu inċentivati l-investiment komuni u l-akkwist tad-difiża peress li dawn l-azzjonijiet kollaborattivi jiżguraw li l-bidliet meħtieġa fil-bażi industrijali tal-UE jsiru b’mod kollaborattiv, filwaqt li jevitaw aktar frammentazzjoni tal-industrija.

(12)Għal dak il-għan, jenħtieġ li jiġi stabbilit Strument għall-Immedjat biex tiżdied il-kollaborazzjoni tal-Istati Membri fil-fażi tal-akkwist tad-difiża (l-“Istrument”). Dan se jinċentiva lill-Istati Membri biex iwettqu azzjonijiet kollaborattivi u b’mod partikolari, waqt l-akkwisti biex jimlew dawn id-diskrepanzi, li jagħmlu dan b’mod konġunt, filwaqt li jżidu l-livell ta’ interoperabbiltà, u jsaħħu u jirriformaw il-kapaċitajiet industrijali tad-difiża tagħhom.

(13)L-Istrument għall-Immedjat jenħtieġ li jpaċi l-kumplessità u r-riskji assoċjati ma’ dawn l-azzjonijiet konġunti filwaqt li jippermetti lill-ekonomiji ta’ skala fl-azzjonijiet tal-Istati Membri jsaħħu u jimmodernizzaw il-Bażi Industrijali u Teknoloġika tad-Difiża Ewropea biex jiżdiedu r-reżiljenza tal-kapaċità u s-sigurtà tal-provvista tal-Unjoni. L-inċentivar tal-akkwist komuni jwassal ukoll biex jonqsu l-kostijiet mil-lat ta’ sfruttament, manutenzjoni u rtirar tas-sistemi.

(14)Dan l-Istrument se jibni fuq il-ħidma tat-Task Force tal-Akkwist Konġunt għad-Difiża stabbilita mill-Kummissjoni u mir-Rappreżentant Għoli/Kap tal-Aġenzija, bi qbil mal-Komunikazzjoni Konġunta “l-Analiżi tad-Diskrepanzi fl-Investiment fid-Difiża u l-Passi li Jmiss”, biex jiġu kkoordinati l-ħtiġijiet tal-akkwist tad-difiża fl-immedjat u ssir ħidma mal-Istati Membri u mal-manifatturi tad-difiża tal-UE biex jappoġġaw l-akkwist konġunt għar-riforniment tal-ħażniet, l-aktar fid-dawl tal-appoġġ mogħti lill-Ukrajna.

(15)L-Istrument hu koerenti ma’ inizjattivi kollaborattivi eżistenti tal-UE relatati mad-difiża bħall-Fond Ewropew għad-Difiża kif ukoll fil-Kooperazzjoni Strutturata Permanenti (PESCO), u jibni sinerġiji ma’ programmi oħra tal-UE. L-Istrument hu koerenti għalkollox mal-ambizzjoni tal-Boxxla Strateġika.

(16)Peress li l-Istrument għandu l-għan li jtejjeb il-kompetittività u l-effiċjenza tal-industrija tad-difiża tal-Unjoni, biex jibbenefikaw mill-Istrument, il-kuntratti komuni tal-akkwist se jkun jeħtiġilhom jitqiegħdu ma’ entitajiet ġuridiċi li huma stabbiliti fl-Unjoni jew f’pajjiżi assoċjati, u li ma jkunux soġġetti għal kontroll minn pajjiżi terzi mhux assoċjati jew minn entitajiet ta’ pajjiżi terzi mhux assoċjati. F’dak il-kuntest, kontroll jenħtieġ li tinftiehem bħala l-abbiltà li tiġi eżerċitata influwenza deċiżiva fuq entità ġuridika b’mod dirett jew indirett permezz ta’ entità ġuridika intermedja waħda jew aktar. Minbarra dan, biex tkun żgurata l-protezzjoni tal-interessi tas-sigurtà u tad-difiża essenzjali tal-Unjoni u tal-Istati Membri tagħha, l-infrastruttura, il-faċilitajiet, l-assi u r-riżorsi tal-kuntratturi u tas-sottokuntratturi involuti fl-akkwist komuni li jintużaw għall-finijiet tal-akkwist komuni għandhom ikunu qegħdin fit-territorju ta’ Stat Membru jew ta’ pajjiż terz assoċjat.

(17)F’ċerti ċirkostanzi, jenħtieġ li jkun possibbli li ssir deroga mill-prinċipju li l-kuntratturi u s-sottokuntratturi involuti f’akkwist komuni appoġġat mill-Istrument ma jkunux soġġetti għal kontroll minn pajjiżi terzi mhux assoċjati jew minn entitajiet ta’ pajjiżi terzi mhux assoċjati. F’dak il-kuntest, entità ġuridika stabbilita fl-Unjoni jew f’pajjiż terz assoċjat u kkontrollata minn pajjiż terz mhux assoċjat jew minn entità ta’ pajjiż terz mhux assoċjat tista’ tipparteċipa bħala kuntrattur u sottokuntrattur involut fl-akkwist komuni, diment li din tkun tissodisfa kundizzjonijiet stretti relatati mal-interessi tas-sigurtà u tad-difiża tal-Unjoni u tal-Istati Membri tagħha, kif stabbilit fil-qafas tal-Politika Estera u ta’ Sigurtà Komuni skont it-Titolu V tat-Trattat dwar l-Unjoni Ewropea (TUE), inkluż f’termini ta’ tisħiħ tal-Bażi Industrijali u Teknoloġika tad-Difiża Ewropea.

(18)Barra minn hekk, il-proċeduri u l-kuntratti tal-akkwist komuni għandhom jinkludu wkoll rekwiżit li l-prodott tad-difiża ma jkunx soġġett għal kontroll jew restrizzjoni minn pajjiż terz mhux assoċjat jew minn entità ta’ pajjiż terz mhux assoċjat.

(19)L-għotjiet tal-Istrument jistgħu jieħdu l-forma ta’ finanzjament mhux relatat mal-kost u bbażat fuq il-kisba tar-riżultati b’referenza għall-pakketti ta’ ħidma, it-tappi u l-miri tal-proċess tal-akkwist komuni, biex jinħoloq l-effett inċentiv meħtieġ.

(20)Meta l-għotja tal-Unjoni tieħu l-forma ta’ finanzjament mhux relatat mal-kostijiet, il-Kummissjoni jenħtieġ li fil-programm ta’ ħidma tiddetermina l-kundizzjonijiet tal-finanzjament għal kull azzjoni, b’mod partikolari (a) deskrizzjoni tal-azzjoni li tinvolvi l-kooperazzjoni għall-akkwist komuni biex jiġu indirizzati l-aktar ħtiġijiet urġenti u kritiċi tal-kapaċità, (b) it-tappi għall-implimentazzjoni tal-azzjoni, (c) l-ordni approssimattiva tal-iskala mistennija mill-akkwist komuni u (d) l-kontribuzzjoni massima tal-Unjoni disponibbli.

(21)Biex jinkiseb l-effett inċentiv, il-livell ta’ kontribuzzjoni tal-Unjoni jista’ jiġi divrenzjat abbażi ta’ fatturi bħal (a) il-kumplessità tal-akkwist komuni, li għalihom, proporzjon tad-daqs antiċipat tal-kuntratt tal-akkwist, abbażi tal-esperjenza miksuba f’azzjonijiet simili, jista’ jservi bħala indikatur inizjali, (b) il-karatteristiċi tal-kooperazzjoni, bħall-użu konġunt, il-kumulazzjoni, is-sjieda jew il-manutenzjoni, li aktarx iwasslu għal eżiti aktar sodi tal-interoperabbiltà u sinjali ta’ investiment fit-tul lill-industrija, u (c) l-għadd ta’ Stati Membri jew pajjiżi assoċjati parteċipanti, jew l-inklużjoni ta’ Stati Membri jew pajjiżi assoċjati oħrajn mal-kooperazzjonijiet eżistenti.

(22)L-Istati Membri jenħtieġ li jaħtru aġent tal-akkwist biex iwettaq l-akkwist komuni f’isimhom. L-aġent tal-akkwist jenħtieġ li jkun awtorità kontraenti stabbilita fi Stat Membru jew f’pajjiż terz assoċjat, inkluż korpi tal-Unjoni jew organizzazzjonijiet internazzjonali, bħall-Organisation Conjointe de Coopération en matière d’ARmement (OCCAR).

(23)F’konformità mal-Artikolu 193(2) tar-Regolament Finanzjarju, tista’ tingħata għotja għal azzjoni li tkun diġà bdiet, diment li l-applikant ikun jista’ juri l-ħtieġa li l-azzjoni kellha tinbeda qabel l-iffirmar tal-ftehim ta’ għotja. Madankollu, il-kontribuzzjoni finanzjarja jenħtieġ li ma tkoprix il-perjodu qabel id-data tas-sottomissjoni tal-applikazzjoni għall-għotja, għajr f’każijiet eċċezzjonali debitament ġustifikati. Biex ikun evitat it-tfixkil fl-appoġġ tal-Unjoni li jista’ jippreġudika l-interessi tal-Unjoni, jenħtieġ li fid-deċiżjoni tal-finanzjament ikun possibbli jiġu previsti kontribuzzjonijiet finanzjarji għal azzjonijiet li jkopru perjodu mill-24 ta’ Frar 2022, anke jekk ikunu nbdew qabel is-sottomissjoni tal-applikazzjoni għall-għotja.

Ir-Regolament (UE, Euratom) 2018/1046 (ir-“Regolament Finanzjarju”) japplika għal dan il-Programm. Dan jistabbilixxi r-regoli dwar l-implimentazzjoni tal-baġit tal-Unjoni, inkluż ir-regoli dwar l-għotjiet.

(25)Dan ir-Regolament jistabbilixxi pakkett finanzjarju għall-Fond, bħala l-ammont ta’ referenza primarja, skont it-tifsira tal-punt 18 tal-Ftehim Interistituzzjonali tas-16 ta’ Diċembru 2020 bejn il-Parlament Ewropew, il-Kunsill u l-Kummissjoni Ewropea dwar id-dixxiplina baġitarja, dwar il-kooperazzjoni f’materji baġitarji u dwar il-ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali għall-introduzzjoni ta’ riżorsi proprji ġodda 2 (Ftehim Interistituzzjonali tas-16 ta’ Diċembru 2020), għall-Parlament Ewropew u għall-Kunsill waqt il-proċedura baġitarja annwali.

(26)F’konformità mar-Regolament Finanzjarju, ir-Regolament (UE, Euratom) Nru 883/2013 tal-Parlament Ewropew u tal-Kunsill 3 , ir-Regolament tal-Kunsill (Euratom, KE) Nru 2988/95 4 u r-Regolament tal-Kunsill (Euratom, KE) Nru 2185/96 5 u r-Regolament tal-Kunsill (UE) 2017/1939 6 , l-interessi finanzjarji tal-Unjoni jenħtieġ li jitħarsu b’miżuri proporzjonati, inkluż il-prevenzjoni, id-detezzjoni, il-korrezzjoni u l-investigazzjoni ta’ irregolaritajiet u ta’ frodi, l-irkupru ta’ fondi mitlufa, imħallsa bi żball jew użati b’mod skorrett u, meta xieraq, l-impożizzjoni ta’ sanzjonijiet amministrattivi. B’mod partikolari, f’konformità mar-Regolament (UE, Euratom) Nru 883/2013 u r-Regolament (Euratom, KE) Nru 2185/96, l-Uffiċċju Ewropew ta’ Kontra l-Frodi (OLAF) jista’ jwettaq investigazzjonijiet, inkluż verifiki u spezzjonijiet fuq il-post, bil-ħsieb li jistabbilixxi jekk kienx hemm frodi, korruzzjoni jew xi attività illegali oħra li taffettwa l-interessi finanzjarji tal-Unjoni. F’konformità mar-Regolament (UE) 2017/1939, l-Uffiċċju tal-Prosekutur Pubbliku Ewropew (UPPE) jista’ jinvestiga u jressaq każijiet ta’ frodi u attivitajiet illegali oħra li jaffettwaw l-interessi finanzjarji tal-Unjoni, kif previst fid-Direttiva (UE) 2017/1371 tal-Parlament Ewropew u tal-Kunsill 7 . F’konformità mar-Regolament Finanzjarju, kwalunkwe persuna jew entità li tirċievi fondi tal-Unjoni trid tikkoopera bis-sħiħ fil-protezzjoni tal-interessi finanzjarji tal-Unjoni, tagħti d-drittijiet u l-aċċess meħtieġa lill-Kummissjoni, lill-OLAF, lill-UPPE u lill-Qorti Ewropea tal-Awdituri (QEA) u tiżgura li kull parti terza involuta fl-implimentazzjoni tal-fondi tal-Unjoni tagħti drittijiet ekwivalenti.

(27)Skont l-Artikolu 94 tad-Deċiżjoni tal-Kunsill 2013/755/UE 8 , persuni u entitajiet stabbiliti f’pajjiżi u f’territorji extra-Ewropej (OCTs) huma eliġibbli għal finanzjament soġġett għar-regoli u l-objettivi tal-Istrument u għall-arranġamenti possibbli applikabbli għall-Istat Membru li magħhom il-pajjiż jew territorju extra-Ewropew rilevanti jkun marbut.

(28)Peress li l-objettivi ta’ dan ir-Regolament ma jistgħux jintlaħqu biżżejjed mill-Istati Membri iżda pjuttost jistgħu jintlaħqu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-TUE. F’konformità mal-prinċipju tal-proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak meħtieġ biex jilħaq dak l-objettiv.

ADOTTAW DAN IR-REGOLAMENT:

Artikolu 1
Suġġett

Dan ir-Regolament jistabbilixxi l-Att dwar it-Tisħiħ tal-Industrija Ewropea tad-Difiża permezz tal-Akkwist Komuni (l-“Istrument”).

Artikolu 2
Definizzjonijiet

Għall-finijiet ta’ dan ir-Regolament, japplikaw id-definizzjonijiet li ġejjin:

(1)“akkwist komuni” tfisser akkwist kooperattiv imwettaq b’mod konġunt minn mill-inqas tliet Stati Membri;

(2)“kontroll minn pajjiż terz mhux assoċjat jew minn entità ta’ pajjiż terz mhux assoċjat” tfisser il-kapaċità li tiġi eżerċitata influwenza deċiżiva fuq entità legali direttament, jew indirettament permezz ta’ entità legali intermedja waħda jew aktar;

(3)“struttura maniġerjali eżekuttiva” tfisser korp ta’ entità legali maħtur f’konformità mal-liġi nazzjonali u li, meta applikabbli, jirrapporta għall-uffiċjal kap eżekuttiv, li għandu s-setgħa jistabbilixxi l-istrateġija, l-objettivi u d-direzzjoni ġenerali tal-entità legali, u li jissorvelja u jwettaq monitoraġġ tat-teħid tad-deċiżjonijiet maniġerjali;

(4)“entità ta’ pajjiż terz mhux assoċjat” tfisser entità legali stabbilita f’pajjiż terz mhux assoċjat jew, meta tkun stabbilita fl-Unjoni jew f’pajjiż assoċjat, li jkollha l-istrutturi maniġerjali eżekuttivi tagħha f’pajjiż terz mhux assoċjat;

(5)“aġent tal-akkwist” tfisser awtorità kontraenti stabbilita fi Stat Membru jew f’pajjiż assoċjat deżinjata minn mill-inqas tliet Stati Membri biex twettaq akkwist komuni f’isimhom, inkluż korpi tal-Unjoni jew organizzazzjonijiet internazzjonali;

(6)“pajjiż terz” tfisser pajjiż li mhux membru tal-Unjoni.

Artikolu 3
Objettivi

1.L-Istrument għandu l-objettivi speċifiċi li:

(a)irawwem il-kompetittività u l-effiċjenza tal-Bażi Industrijali u Teknoloġika tad-Difiża Ewropea (EDTIB) għal Unjoni aktar reżiljenti, b’mod partikolari billi jħaffef, b’mod kollaborattiv, l-aġġustament tal-industrija għal bidliet strutturali, inkluż it-tisħiħ tal-kapaċitajiet ta’ manifattura tagħha;

(b)irawwem il-kooperazzjoni fil-proċess tal-akkwist tad-difiża bejn l-Istati Membri parteċipanti ħalli din tikkontribwixxi għas-solidarjetà, l-interoperabbiltà, il-prevenzjoni tal-esklużjoni, l-evitar tal-frammentazzjoni u ż-żieda fl-effettività tal-infiq pubbliku.

2.Il-ħidma biex jintlaħqu l-objettivi għandha tagħmel enfasi fuq it-tisħiħ u l-iżvilupp tal-bażi industrijali tad-difiża tal-Unjoni biex din tkun tista’ tindirizza b’mod partikolari l-aktar ħtiġijiet urġenti u kritiċi tal-prodotti tad-difiża, speċjalment dawk żvelati jew aggravati bir-rispons għall-aggressjoni Russa fl-Ukrajna, filwaqt li titqies il-ħidma tat-Task Force tal-Akkwist Konġunt għad-Difiża.

Artikolu 4
Baġit

1.Il-pakkett finanzjarju għall-implimentazzjoni tal-Istrument għall-perjodu mid-dħul fis-seħħ ta’ dan ir-Regolament sal-31 ta’ Diċembru 2024 għandu jkun EUR 500 miljun bil-prezzijiet attwali.

2.L-ammont imsemmi fil-paragrafu 1 jista’ jintuża għal assistenza teknika u amministrattiva għall-implimentazzjoni tal-Fond, bħal attivitajiet ta’ tħejjija, monitoraġġ, kontroll, awditjar u evalwazzjoni, inkluż sistemi tat-teknoloġija tal-informazzjoni korporattivi.

3.Ir-riżorsi allokati għall-Istati Membri b’ġestjoni kondiviża, meta jintalbu minnhom, jistgħu jiġu trasferiti lejn l-Istrument soġġetti għall-kundizzjonijiet stabbiliti fid-dispożizzjonijiet rilevanti tar-Regolament dwar Dispożizzjonijiet Komuni għall-2021-2027. Il-Kummissjoni għandha timplimenta dawk ir-riżorsi direttament f’konformità mal-punt (a) tal-ewwel subparagrafu tal-Artikolu 62(1) tar-Regolament (UE, Euratom) 2018/1046 (ir-“Regolament Finanzjarju”). Dawk ir-riżorsi għandhom jintużaw għall-benefiċċju tal-Istat Membru kkonċernat.

4.L-impenji baġitarji għall-attivitajiet li jestendu għal aktar minn sena finanzjarja waħda jistgħu jinqasmu fuq bosta snin f’pagamenti annwali.

Artikolu 5
Pajjiżi terzi assoċjati fl-Istrument

L-Istrument għandu jkun miftuħ għall-parteċipazzjoni tal-Istati Membri u tal-membri tal-Assoċjazzjoni Ewropea tal-Kummerċ Ħieles li huma membri fiż-Żona Ekonomika Ewropea (pajjiżi assoċjati), f’konformità mal-kundizzjonijiet stabbiliti fil-Ftehim dwar iż-Żona Ekonomika Ewropea.

Artikolu 6
Implimentazzjoni u forom ta’ finanzjament tal-UE

1.L-Istrument għandu jiġi implimentat b’ġestjoni diretta f’konformità mar-Regolament Finanzjarju.

2.Il-finanzjament tal-UE għandu jinċentiva l-kooperazzjoni bejn l-Istati Membri biex jintlaħqu l-objettivi msemmija fl-Artikolu 3. Il-kontribuzzjoni finanzjarja għandha tiġi stabbilita billi titqies in-natura kollaborattiva tal-akkwist komuni flimkien ma’ ammont xieraq biex jinħoloq l-effett inċentiv meħtieġ li jistimula l-kooperazzjoni.

3.Meta jkun meħtieġ għall-implimentazzjoni ta’ xi azzjoni, il-kontribuzzjonijiet finanzjarji jistgħu jkopru perjodu qabel id-data tat-talba tal-kontribuzzjonijiet finanzjarji għal dik l-azzjoni, diment li l-azzjoni ma tkunx bdiet qabel l-24 ta’ Frar 2022.

4.L-għotjiet implimentati b’ġestjoni diretta għandhom jingħataw u jiġu ġestiti f’konformità mat-Titolu VIII tar-Regolament Finanzjarju.

Artikolu 7
Azzjonijiet eliġibbli

1.L-azzjonijiet biss li jissodisfaw il-kriterji kollha li ġejjin għandhom ikunu eliġibbli għall-finanzjament:

(a)l-azzjonijiet għandhom jinvolvu l-kooperazzjoni għall-akkwist komuni tal-aktar prodotti urġenti u kritiċi tad-difiża bejn l-entitajiet eliġibbli li jimplimentaw l-objettivi msemmija fl-Artikolu 3;

(b)l-azzjonijiet għandhom jinvolvu kooperazzjoni ġdida jew estensjoni tal-kooperazzjoni eżistenti ma’ Stati Membri ġodda jew pajjiżi assoċjati;

(c)l-azzjonijiet għandhom isiru minn konsorzju ta’ mill-inqas tliet Stati Membri;

(d)l-azzjonijiet għandhom jissodisfaw il-kundizzjonijiet addizzjonali kif stabbiliti fl-Artikolu 8.

2.L-azzjonijiet li ġejjin ma għandhomx ikunu eliġibbli għall-finanzjament:

(a)l-azzjonijiet tal-akkwist komuni ta’ oġġetti jew servizzi li huma pprojbiti bil-liġi internazzjonali applikabbli;

(b)l-azzjonijiet tal-akkwist komuni ta’ armi awtonomi letali li ma jippermettux kontroll sinifikattiv mill-bniedem tad-deċiżjonijiet tal-għażla u tal-involviment meta jsiru attakki fuq il-bnedmin.

Artikolu 8
Kundizzjonijiet addizzjonali tal-finanzjament

1.L-Istati Membri jew il-pajjiżi terzi assoċjati għandhom jaħtru aġent tal-akkwist biex jaġixxi f’isimhom għall-fini tal-akkwist komuni. L-aġent tal-akkwist għandu jwettaq il-proċeduri tal-akkwist u jikkonkludi l-ftehimiet riżultanti mal-kuntratturi f’isem l-Istati Membri parteċipanti.

2.Il-proċeduri tal-akkwist imsemmija fil-paragrafu 1 għandhom ikunu bbażati fuq ftehim iffirmat mill-Istati Membri parteċipanti mal-aġent tal-akkwist skont il-kundizzjonijiet stabbiliti fil-programm ta’ ħidma msemmi fl-Artikolu 11.

3.Il-proċeduri u l-kuntratti tal-akkwist komuni għandhom jinkludu rekwiżiti tal-parteċipazzjoni għall-kuntratturi u għas-sottokuntratturi involuti fl-akkwist komuni kif imsemmi fil-paragrafi 4 sa 10.

4.Il-kuntratturi u s-sottokuntratturi involuti fl-akkwist komuni għandhom jiġu stabbiliti u jkollhom l-istrutturi maniġerjali eżekuttivi tagħhom fl-Unjoni. Ma għandhomx ikunu soġġetti għal kontroll minn pajjiż terz mhux assoċjat jew minn entità ta’ pajjiż terz mhux assoċjat.

5.B’deroga mill-paragrafu 4, entità legali stabbilita fl-Unjoni jew f’pajjiż terz assoċjat u kkontrollata minn pajjiż terz mhux assoċjat jew minn entità ta’ pajjiż terz mhux assoċjat tista’ tipparteċipa bħala kuntrattur u sottokuntrattur involut fl-akkwist komuni biss jekk tipprovdi garanziji approvati mill-Istat Membru jew mill-pajjiż terz assoċjat li fih ikun stabbilit il-kuntrattur.

6.L-Istati Membri parteċipanti għandhom jipprovdu notifika lill-Kummissjoni mingħand l-aġent tal-akkwist dwar il-garanziji mogħtija minn kuntrattur jew minn sottokuntrattur involut fl-akkwist komuni li jkun stabbilit fl-Unjoni jew f’pajjiż terz assoċjat u kkontrollat minn pajjiż terz mhux assoċjat jew minn entità ta’ pajjiż terz mhux assoċjat. Il-garanziji u d-dispożizzjonijiet relatati fil-kuntratt tal-akkwist għandhom ikunu disponibbli għall-Kummissjoni meta jintalbu. Il-garanziji għandhom jipprovdu assigurazzjonijiet li l-involviment tal-kuntrattur jew tas-sottokuntrattur involut fl-akkwist komuni ma jmurx kontra l-interessi tas-sigurtà u tad-difiża tal-Unjoni u tal-Istati Membri tagħha, kif stabbilit fil-qafas tal-PESK skont it-Titolu V tat-TUE, jew l-objettivi stabbiliti fl-Artikolu 3.

7.Il-garanziji għandhom jissostanzjaw b’mod partikolari li, għall-finijiet tal-akkwist komuni, hemm stabbiliti miżuri biex jiżguraw li:

(a)il-kontroll fuq il-kuntrattur jew fuq is-sottokuntrattur involut fl-akkwist komuni ma jiġix eżerċitat b’mod li jillimita jew jirrestrinġi l-kapaċità tiegħu li jwettaq l-ordni u li jagħti r-riżultati u;

(b)ikun evitat l-aċċess minn pajjiż terz mhux assoċjat jew minn entità ta’ pajjiż terz mhux assoċjat għal informazzjoni sensittiva, filwaqt li l-impjegati jew persuni oħrajn involuti fl-akkwist komuni jkollhom approvazzjoni tas-sigurtà nazzjonali maħruġa minn Stat Membru.

8.L-infrastruttura, il-faċilitajiet, l-assi u r-riżorsi tal-kuntratturi u tas-sottokuntratturi involuti fl-akkwist komuni li jintużaw għall-finijiet tal-akkwist komuni għandhom ikunu qegħdin fit-territorju ta’ Stat Membru jew ta’ pajjiż terz assoċjat. Meta ma jkun hemm l-ebda sostitut kompetittiv disponibbli faċilment fl-Unjoni jew f’pajjiż terz assoċjat, il-kuntratturi u s-sottokuntratturi involuti fl-akkwist komuni jistgħu jużaw l-assi, l-infrastruttura, il-faċilitajiet u r-riżorsi tagħhom li jinsabu jew li jinżammu barra mit-territorju tal-Istati Membri jew tal-pajjiżi terzi assoċjati, diment li tali użu ma jmurx kontra l-interessi tas-sigurtà u tad-difiża tal-Unjoni u tal-Istati Membri tagħha u jkun konsistenti mal-objettivi stabbiliti fl-Artikolu 3.

9.Il-proċeduri u l-kuntratti tal-akkwist komuni għandhom jinkludu wkoll rekwiżit li l-prodott tad-difiża ma jkunx soġġett għal restrizzjoni minn pajjiż terz mhux assoċjat jew minn entità ta’ pajjiż terz mhux assoċjat.

10.Għall-finijiet ta’ dan l-Artikolu, “sottokuntratturi involuti fl-akkwist komuni” tfisser dawn kollha li ġejjin:

(a)sottokuntratturi b’relazzjoni kuntrattwali diretta ma’ kuntrattur;

(b)sottokuntratturi oħra li għalihom jiġi allokat mill-inqas 10% tas-sehem tax-xogħol;

(c)sottokuntratturi li jaf jitolbu aċċess għal informazzjoni klassifikata biex iwettqu l-akkwist komuni.

Artikolu 9
Entitajiet eliġibbli

Diment li jikkonformaw mal-kriterji tal-eliġibbiltà stabbiliti fl-Artikolu 197 tar-Regolament Finanzjarju, l-entitajiet eliġibbli għall-finanzjament huma li ġejjin:

(a)awtoritajiet kontraenti pubbliċi jew entitajiet kontraenti kif definit fid-Direttivi 2014/24/UE 9 u 2014/25/UE 10 tal-Parlament Ewropew u tal-Kunsill;

(b)awtoritajiet pubbliċi ta’ pajjiżi terzi assoċjati.

Artikolu 10
Kriterji għall-għoti

Il-Kummissjoni għandha tevalwa l-proposti sottomessi abbażi tal-kriterji għall-għoti li ġejjin:

1.il-kontribut tal-azzjoni għat-tisħiħ u l-iżvilupp tal-bażi industrijali tad-difiża tal-Unjoni biex tkun tista’ tindirizza b’mod partikolari l-ħtiġijiet l-aktar urġenti u kritiċi tal-prodotti tad-difiża kif imsemmija fl-Artikolu 3, inkluż fir-rigward tal-proċedura tal-akkwist u ż-żmien meħtieġ għat-twassil tal-ordnijiet, għar-riforniment tal-ħażniet, għad-disponibbiltà u għall-forniment;

2.il-kontribut tal-azzjoni għall-kompetittività u l-adattament tal-EDTIB, inkluż bit-tisħiħ previst tal-kapaċitajiet tal-manifattura tagħha, ir-riżerva tal-kapaċitajiet tal-manifattura, it-taħriġ mill-ġdid u t-titjib tal-ħiliet tagħha, u l-modernizzazzjoni ġenerali;

3.il-kontribut tal-azzjoni għat-tisħiħ tal-kooperazzjoni fost l-Istati Membri jew il-pajjiżi assoċjati u l-interoperabbiltà tal-prodotti;

4.l-għadd ta’ Stati Membri jew pajjiżi assoċjati li jipparteċipaw fl-akkwist komuni;

5.id-daqs stmat tal-akkwist komuni u kull dikjarazzjoni mill-parteċipanti li se jużaw, jaħżnu, jippossjedu jew imantnu b’mod konġunt il-prodotti tad-difiża akkwistati;

6.l-effett katalitiku tal-appoġġ finanzjarju tal-Unjoni b’turija ta’ kif il-kontribuzzjoni tal-Unjoni tista’ tegħleb l-ostakli għall-akkwist komuni;

7.il-kwalità u l-effiċjenza tal-pjanijiet li jwettqu l-azzjoni.

Artikolu 11
Programm ta’ ħidma

1.L-Istrument għandu jiġi implimentat bi programmi ta’ ħidma kif imsemmi fl-Artikolu 110 tar-Regolament Finanzjarju.

2.Il-Kummissjoni, permezz ta’ atti ta’ implimentazzjoni, għandha tadotta l-programm ta’ ħidma msemmi fil-paragrafu 1. Dawn l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 14(3).

3.Il-programm ta’ ħidma għandu jistabbilixxi d-daqs finanzjarju minimu tal-azzjonijiet tal-akkwist konġunt u għandu jiddetermina ammont indikattiv ta’ appoġġ finanzjarju għall-azzjonijiet imwettqa mill-għadd minimu ta’ Stati Membri kif imsemmi fil-punt c) tal-Artikolu 7, il-paragrafu 1, u inċentivi għall-akkwist ta’ valur ogħla u l-inklużjoni ta’ aktar Stati Membri jew pajjiżi assoċjati.

4.Il-programm ta’ ħidma għandu jistabbilixxi l-prijoritajiet ta’ finanzjament f’konformità mal-ħtiġijiet imsemmija fl-Artikolu 3, il-paragrafu 2.

Artikolu 12
Monitoraġġ u rapportar

1.Il-Kummissjoni għandha tfassal rapport ta’ evalwazzjoni għall-Istrument sal-31 ta’ Diċembru 2024 u tippreżentah lill-Parlament Ewropew u lill-Kunsill. Ir-rapport għandu jevalwa l-impatt u l-effettività tal-azzjonijiet meħuda fl-ambitu tal-Istrument.

2.Ir-rapport għandu jkun ibbażat fuq konsultazzjonijiet mal-Istati Membri u ma’ partijiet ikkonċernati ewlenin, u għandu b’mod partikolari jevalwa l-progress li jkun sar biex jintlaħqu l-objettivi stabbiliti fl-Artikolu 3.

Artikolu 13
Informazzjoni, komunikazzjoni u pubbliċità

1.Ir-riċevituri tal-finanzjament tal-Unjoni għandhom jirrikonoxxu l-oriġini u jiżguraw il-viżibbiltà tal-finanzjament tal-Unjoni (b’mod partikolari meta jippromwovu l-azzjonijiet u r-riżultati tagħhom) billi jipprovdu informazzjoni mmirata koerenti, effettiva u proporzjonata lil diversi udjenzi, inkluż lill-midja u lill-pubbliku.

2.Il-Kummissjoni għandha timplimenta azzjonijiet ta’ informazzjoni u ta’ komunikazzjoni relatati mal-Istrument, u mal-azzjonijiet u mar-riżultati tiegħu. Ir-riżorsi finanzjarji allokati għall-Istrument għandhom jikkontribwixxu wkoll għall-komunikazzjoni korporattiva dwar il-prijoritajiet politiċi tal-Unjoni, sakemm dawn ikunu relatati mal-objettivi msemmija fl-Artikolu 3.

Artikolu 14
Proċedura ta’ Kumitat

1.Il-Kummissjoni għandha tiġi assistita minn kumitat. Dak il-kumitat għandu jkun kumitat skont it-tifsira tar-Regolament (UE) Nru 182/2011.

2.L-Aġenzija Ewropea għad-Difiża għandha tiġi mistiedna tagħti l-fehmiet u l-għarfien espert tagħha lill-kumitat bħala osservatur. Anki s-Servizz Ewropew għall-Azzjoni Esterna għandu jiġi mistieden biex jassisti fil-kumitat.

3.Meta ssir referenza għal dan il-paragrafu, għandu japplika l-Artikolu 5 tar-Regolament (UE) Nru 182/2011.

Artikolu 15
Dħul fis-seħħ

Dan ir-Regolament għandu jidħol fis-seħħ l-għada tal-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

DIKJARAZZJONI FINANZJARJA LEĠIŻLATTIVA

1.QAFAS TAL-PROPOSTA/TAL-INIZJATTIVA 

1.1.Titolu tal-proposta/tal-inizjattiva

1.2.Qasam/Oqsma ta’ politika kkonċernat(i) 

1.3.Il-proposta/l-inizjattiva hija relatata ma’: 

☑ azzjoni ġdida 

◻ azzjoni ġdida b’segwitu għal proġett pilota/azzjoni preparatorja 11  

◻ l-estensjoni ta’ azzjoni eżistenti 

◻ fużjoni jew ridirezzjonar ta’ azzjoni waħda jew aktar lejn azzjoni oħra/ġdida 

1.4.Objettiv(i)

1.4.1.Objettiv(i) ġenerali

1.4.2.Objettiv(i) speċifiku/speċifiċi

1.4.3.Riżultat(i) u impatt mistennija

Speċifika l-effetti li l-proposta/l-inizjattiva jenħtieġ li jkollha fuq il-benefiċjarji/il-gruppi fil-mira.

1.4.4.Indikaturi tal-prestazzjoni

Speċifika l-indikaturi għall-monitoraġġ tal-progress u tal-kisbiet.

1.5.Raġunijiet għall-proposta/għall-inizjattiva 

1.5.1.Rekwiżit(i) li jrid(u) jiġi/u ssodisfat(i) fuq terminu qasir jew twil inkluża kronoloġija dettaljata għat-tnedija tal-implimentazzjoni tal-inizjattiva

1.5.2.Valur miżjud tal-involviment tal-Unjoni (dan jista’ jirriżulta minn fatturi differenti, eż. il-gwadanji mill-koordinazzjoni, iċ-ċertezza legali, effettività akbar jew il-kumplimentarjetajiet). Għall-finijiet ta’ dan il-punt, il-“valur miżjud tal-involviment tal-Unjoni” huwa l-valur li jirriżulta mill-intervent tal-Unjoni li jkun addizzjonali għall-valur illi kieku kien jinħoloq mill-Istati Membri waħedhom.

1.5.3.Tagħlimiet meħuda minn esperjenzi simili fl-imgħoddi

1.5.4.Kompatibbiltà mal-Qafas Finanzjarju Pluriennali u sinerġiji possibbli ma’ strumenti xierqa oħrajn

1.5.5.Valutazzjoni tal-alternattivi differenti ta’ finanzjament disponibbli, inkluż l-ambitu għar-riallokazzjoni

1.6.Durata u impatt finanzjarju tal-proposta/tal-inizjattiva

☑ durata limitata

–☑    b’effett mill-2022 sal-31/12/2024

–☑    Impatt finanzjarju mill-2022 sal-2024 għall-approprjazzjonijiet tal-impenji u mill-2023 sal-2027 għall-approprjazzjonijiet tal-pagamenti.

◻ durata mhux limitata

–Implimentazzjoni b’perjodu ta’ tnedija minn SSSS sa SSSS,

–segwita b’operazzjoni fuq skala sħiħa.

1.7.Mod(i) ta’ ġestjoni ppjanat(i) 12   

☑ Ġestjoni diretta mill-Kummissjoni

–☑    mid-dipartimenti tagħha, inkluż mill-persunal tagħha fid-delegazzjonijiet tal-Unjoni; 

–◻    mill-aġenziji eżekuttivi 

◻ Ġestjoni kondiviża mal-Istati Membri 

◻ Ġestjoni indiretta billi jiġu fdati kompiti ta’ implimentazzjoni baġitarja:

–◻ lill-pajjiżi terzi jew lill-korpi nnominati minnhom;

–◻ lill-organizzazzjonijiet internazzjonali u lill-aġenziji tagħhom (iridu jiġu speċifikati);

–◻ lill-BEI u lill-Fond Ewropew tal-Investiment;

–◻ lill-korpi msemmija fl-Artikoli 70 u 71 tar-Regolament Finanzjarju;

–◻ lill-korpi tal-liġi pubblika;

–◻ lill-korpi regolati mil-liġi privata b’missjoni ta’ servizz pubbliku sakemm dawn jipprovdu garanziji finanzjarji adegwati;

–◻ lill-korpi regolati mil-liġi privata ta’ Stat Membru li jkunu fdati bl-implimentazzjoni ta’ sħubija pubblika privata u li jipprovdu garanziji finanzjarji adegwati;

–◻ lill-persuni fdati bl-implimentazzjoni ta’ azzjonijiet speċifiċi fil-PESK skont it-Titolu V tat-TUE, u identifikati fl-att bażiku rilevanti.

–Jekk jiġi indikat iżjed minn mod ta’ ġestjoni wieħed, jekk jogħġbok ipprovdi d-dettalji fit-taqsima "Kummenti".

Kummenti

2.MIŻURI TA’ ĠESTJONI 

2.1.Regoli ta’ monitoraġġ u ta’ rapportar 

Speċifika l-frekwenza u l-kundizzjonijiet.

2.2.Sistema/i ta’ ġestjoni u ta’ kontroll 

2.2.1.Ġustifikazzjoni tal-mod(i) ta’ ġestjoni, tal-mekkaniżmu/i għall-implimentazzjoni tal-finanzjament, tal-modalitajiet ta’ pagament u tal-istrateġija ta’ kontroll proposta

2.2.2.Informazzjoni dwar ir-riskji identifikati u s-sistema/i ta’ kontroll intern stabbilita/i għall-mitigazzjoni tagħhom

2.2.3.Stima u ġustifikazzjoni tal-kosteffettività tal-kontrolli (proporzjon tal-“kostijiet tal-kontroll ÷ il-valur tal-fondi relatati ġestiti”) u valutazzjoni tal-livelli mistennija tar-riskju ta’ errur (mal-ħlas u fl-għeluq) 

2.3.Miżuri għall-prevenzjoni ta’ frodi u ta’ irregolaritajiet 

Speċifika l-miżuri ta’ prevenzjoni u ta’ protezzjoni eżistenti jew previsti, eż. mill-Istrateġija Kontra l-Frodi.

3.IMPATT FINANZJARJU STMAT TAL-PROPOSTA/TAL-INIZJATTIVA 

3.1.Intestatura/i tal-qafas finanzjarju pluriennali u l-linja/i baġitarja/i tan-nefqa affettwata/i 

·Linji baġitarji eżistenti (ara t-tabella taħt it-taqsima 3.2)

Skont l-ordni tal-intestaturi tal-qafas finanzjarju pluriennali u tal-linji baġitarji.

·Linji baġitarji ġodda mitluba

Skont l-ordni tal-intestaturi tal-qafas finanzjarju pluriennali u tal-linji baġitarji.

3.2.Sorsi ta’ finanzjament għall-proposta

3.2.1.Sors ta’ finanzjament tal-approprjazzjonijiet skont il-proposta

3.2.2.Sommarju tal-impatt stmat fuq l-approprjazzjonijiet operazzjonali 

–◻    Il-proposta/l-inizjattiva ma teħtieġx l-użu ta’ approprjazzjonijiet operazzjonali 

–☑    Il-proposta/l-inizjattiva teħtieġ l-użu ta’ approprjazzjonijiet operazzjonali, kif spjegat hawn taħt:

miljuni ta’ EUR (aġġustati ’l fuq għal tliet pożizzjonijiet deċimali)

Jenħtieġ li din it-taqsima timtela billi tintuża d-“data baġitarja ta’ natura amministrattiva” li, qabel kollox, trid tiġi introdotta fl- Anness tad-Dikjarazzjoni Finanzjarja Leġiżlattiva (l-Anness V tar-regoli interni), li jittella’ fid-DECIDE għall-finijiet ta’ konsultazzjoni bejn is-servizzi.

miljuni ta’ EUR (aġġustati ’l fuq għal tliet pożizzjonijiet deċimali)

miljuni ta’ EUR (aġġustati ’l fuq għal tliet pożizzjonijiet deċimali)

3.2.3.Sommarju tal-impatt stmat fuq l-approprjazzjonijiet amministrattivi 

–◻    Il-proposta/l-inizjattiva ma teħtieġx l-użu ta’ approprjazzjonijiet ta’ natura amministrattiva 

–☑    Il-proposta/l-inizjattiva teħtieġ l-użu ta’ approprjazzjonijiet ta’ natura amministrattiva, kif spjegat hawn taħt:

miljuni ta’ EUR (aġġustati ’l fuq għal tliet pożizzjonijiet deċimali)

L-approprjazzjonijiet amministrattivi meħtieġa se jiġu ssodisfati mill-approprjazzjonijiet diġà assenjati għall-ġestjoni tal-azzjoni u/jew li ġew riallokati, flimkien, jekk ikun meħtieġ, ma’ kwalunkwe allokazzjoni addizzjonali li tista’ tingħata lid-DĠ maniġerjali skont il-proċedura tal-allokazzjoni annwali u fid-dawl tal-limitazzjonijiet baġitarji eżistenti.

3.2.3.1.Rekwiżiti stmati ta’ riżorsi umani

–◻    Il-proposta/l-inizjattiva ma teħtieġx l-użu ta’ riżorsi umani. 

–✓    Il-proposta/l-inizjattiva teħtieġ l-użu ta’ riżorsi umani, kif spjegat hawn taħt:

L-istima trid tiġi espressa f’unitajiet ekwivalenti għall-full-time

Ir-riżorsi umani meħtieġa se jiġu koperti mill-persunal tad-DĠ li diġà jkun assenjat għall-ġestjoni tal-azzjoni u/jew li diġà jkun ġie riassenjat fid-DĠ, flimkien, jekk ikun meħtieġ, ma’ kwalunkwe allokazzjoni addizzjonali li tista’ tingħata lid-DĠ tal-ġestjoni skont il-proċedura tal-allokazzjoni annwali u fid-dawl tal-limitazzjonijiet baġitarji.”

Deskrizzjoni tal-kompiti li jridu jitwettqu:

3.2.4.Kompatibbiltà mal-qafas finanzjarju pluriennali attwali 

Il-proposta/l-inizjattiva:

–◻    tista’ tiġi ffinanzjata kompletament permezz ta’ riallokazzjoni fl-intestatura rilevanti tal-Qafas Finanzjarju Pluriennali (QFP).

–☑    teħtieġ l-użu tal-marġni mhux allokat taħt l-intestatura rilevanti tal-QFP u/jew l-użu tal-istrumenti speċjali ddefiniti fir-Regolament dwar il-QFP.

–◻    teħtieġ reviżjoni tal-QFP.

3.2.6.Kontribuzzjonijiet ta’ partijiet terzi 

Il-proposta/l-inizjattiva:

–☑    ma tipprevedix kofinanzjament minn partijiet terzi

–◻    tipprevedi l-kofinanzjament minn partijiet terzi kif stmat hawn taħt:

Approprjazzjonijiet f’miljuni ta’ EUR (aġġustati ’l fuq għal tliet pożizzjonijiet deċimali)

3.3.Impatt stmat fuq id-dħul 

–☑    Il-proposta/l-inizjattiva ma għandha l-ebda impatt finanzjarju fuq id-dħul.

–◻    Il-proposta/l-inizjattiva għandha l-impatt finanzjarju li ġej:

fuq ir-riżorsi proprji 

fuq dħul ieħor

indika, jekk id-dħul hux assenjat għal-linji tan-nefqa

miljuni ta’ EUR (aġġustati ’l fuq għal tliet pożizzjonijiet deċimali)

Għal dħul assenjat, speċifika l-linja/i baġitarja/i tan-nefqa affettwata/i.

Rimarki oħra (eż. il-metodu/il-formula li ntużaw biex jiġi kkalkolat l-impatt fuq id-dħul jew kwalunkwe informazzjoni oħra).

(1)    ĠU C , , p. .

(2)    ĠU L 433I, 22.12.2020, p. 28.

(3)    Ir-Regolament (UE, Euratom) Nru 883/2013 tal-Parlament Ewropew u tal-Kunsill tal-11 ta’ Settembru 2013 dwar investigazzjonijiet immexxija mill-Uffiċċju Ewropew Kontra l-Frodi (OLAF) u li jħassar ir-Regolament tal-Parlament Ewropew u tal-Kunsill (KE) Nru 1073/1999 u r-Regolament tal-Kunsill (Euratom) Nru 1074/1999 (ĠU L 248, 18.9.2013, p. 1).

(4)    Ir-Regolament tal-Kunsill (KE, Euratom) Nru 2988/95 tat-18 ta’ Diċembru 1995 dwar il-protezzjoni tal-interessi finanzjarji tal-Komunità Ewropea (ĠU L 312, 23.12.95, p. 1).

(5)    Ir-Regolament tal-Kunsill (Euratom, KE) Nru 2185/96 tal-11 ta’ Novembru 1996 dwar il-verifiki u l-ispezzjonijiet fuq il-post imwettqa mill-Kummissjoni sabiex tipproteġi l-interessi finanzjarji tal-Komunità Ewropea kontra l-frodi u irregolaritajiet oħra (ĠU L 292, 15.11.1996, p.2).

(6)    Ir-Regolament tal-Kunsill (UE) 2017/1939 tat-12 ta’ Ottubru 2017 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”) (ĠU L 283, 31.10.2017, p. 1).

(7)    Id-Direttiva (UE) 2017/1371 tal-Parlament Ewropew u tal-Kunsill tal-5 ta’ Lulju 2017 dwar il-ġlieda kontra l-frodi tal-interessi finanzjarji tal-Unjoni permezz tal-liġi kriminali (ĠU L 198, 28.7.2017, p. 29).

(8)    Id-Deċiżjoni tal-Kunsill 2013/755/UE tal-25 ta’ Novembru 2013 dwar l-assoċjazzjoni tal-pajjiżi u t-territorji barranin mal-Unjoni Ewropea (“Deċiżjoni dwar l-Assoċjazzjoni Barranija”) (ĠU L 344, 19.12.2013, p. 1).

(9)    Id-Direttiva 2014/24/UE tal-Parlament Ewropew u tal-Kunsill tas-26 ta’ Frar 2014 dwar l-akkwist pubbliku u li tħassar id-Direttiva 2004/18/KE (ĠU L 94, 28.3.2014, p. 65).

(10)    Id-Direttiva 2014/25/UE tal-Parlament Ewropew u tal-Kunsill tas-26 ta’ Frar 2014 dwar l-akkwist minn entitajiet li joperaw fis-setturi tas-servizzi tal-ilma, l-enerġija, it-trasport u postali u li tħassar id-Direttiva 2004/17/KE (ĠU L 94, 28.3.2014, p. 243).

(11)    Kif imsemmi fl-Artikolu 58(2)(a) jew (b) tar-Regolament Finanzjarju.

(12)    Id-dettalji tal-modi ta’ ġestjoni u r-referenzi għar-Regolament Finanzjarju jinsabu fuq is-sit BudgWeb: https://myintracomm.ec.europa.eu/budgweb/EN/man/budgmanag/Pages/budgmanag.aspx  

(13)    Diff. = Approprjazzjonijiet differenzjati / Mhux diff. = Approprjazzjonijiet mhux differenzjati.

(14)    EFTA: Assoċjazzjoni Ewropea tal-Kummerċ Ħieles.

(15)    Pajjiżi kandidati u, meta applikabbli, kandidati potenzjali mill-Balkani tal-Punent.

(16)    Fir-rigward tar-riżorsi proprji tradizzjonali (id-dazji doganali, l-imposti fuq iz-zokkor), l-ammonti indikati jridu jkunu ammonti netti, jiġifieri l-ammonti grossi wara tnaqqis ta’ 20% għall-kostijiet tal-ġbir.