IL-KUMMISSJONI EWROPEA
Brussell, 15.7.2022
COM(2022) 345 final
2022/0218(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kumitat Konġunt tal-EU-CTC stabbilit bil-Konvenzjoni tal-20 ta’ Mejju 1987 dwar is-simplifikazzjoni tal-formalitajiet fil-kummerċ tal-oġġetti u tal-Kumitat Konġunt tal-EU-CTC stabbilit bil-Konvenzjoni tal-20 ta’ Mejju 1987 dwar il-Proċedura Komuni ta’ Tranżitu fir-rigward ta’ stediniet lill-Ukrajna biex taderixxi ma’ dawk il-Konvenzjonijiet
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna d-deċiżjoni li tistabbilixxi l-pożizzjoni li trid tiġi adottata f’isem l-Unjoni fil-Kumitat Konġunt tal-EU-CTC, stabbilit bil-Konvenzjoni tal-20 ta’ Mejju 1987 dwar is-simplifikazzjoni tal-formalitajiet fil-kummerċ tal-oġġetti u fil-Kumitat Konġunt tal-EU-CTC stabbilit bil-Konvenzjoni tal-20 ta’ Mejju 1987 dwar il-Proċedura Komuni ta’ Tranżitu (“il-Kumitati Konġunti tal-EU-CTC”) li tikkonċerna l-adozzjoni prevista minn kull Kumitat Konġunt, ta’ deċiżjoni rigward l-istedina lill-Ukrajna, biex taderixxi mal-Konvenzjoni dwar is-simplifikazzjoni tal-formalitajiet fil-kummerċ tal-oġġetti u fil-Konvenzjoni dwar il-Proċedura Komuni ta’ Tranżitu (“il-Konvenzjonijiet”) rispettivament.
2.Kuntest tal-proposta
2.1.Il-Konvenzjonijiet
Il-Konvenzjonijiet għandhom l-għan li jiffaċilitaw il-moviment tal-oġġetti bejn l-Unjoni Ewropea u pajjiżi oħra li huma Partijiet Kontraenti għall-Konvenzjonijiet. Dawn daħlu fis-seħħ fl-1 ta’ Jannar 1988.
Il-Konvenzjonijiet jistabbilixxu miżuri li jiffaċilitaw il-moviment tal-oġġetti bejn l-Unjoni Ewropea, ir-Repubblika tal-Iżlanda, ir-Repubblika tal-Maċedonja ta’ Fuq, ir-Renju tan-Norveġja, il-Konfederazzjoni Żvizzera, ir-Repubblika tat-Turkija, ir-Repubblika tas-Serbja u r-Renju Unit tal-Gran Brittanja u l-Irlanda ta’ Fuq.
L-Unjoni Ewropea hija Parti Kontraenti għall-Konvenzjonijiet.
Il-pajjiżi li huma Partijiet Kontraenti għall-Konvenzjonijiet, iżda li mhumiex membri tal-Unjoni, huma pajjiżi komuni ta’ tranżitu (“CTC”).
2.2.Il-Kumitati Konġunti EU-CTC previsti
Il-kompitu tal-Kumitati Konġunti EU-CTC huwa li jamministra l-Konvenzjonijiet u li jiżgura l-implimentazzjoni xierqa tagħhom. Permezz ta’ deċiżjoni, il-Kumitati jistiednu lill-pajjiżi terzi biex jaderixxu mal-Konvenzjonijiet.
Id-deċiżjonijiet tal-Kumitati Konġunti EU-CTC jiġu adottati bil-ftehim reċiproku tal-Partijiet Kontraenti.
2.3.Id-Deċiżjonijiet tal-Kumitati Konġunti EU-CTC
L-Ukrajna xtaqet taderixxi għall-Konvenzjonijiet meta tkun ikkonformat mar-rekwiżiti legali, strutturali u tat-teknoloġija tal-informazzjoni, li huma prekundizzjonijiet għall-adeżjoni.
F’konformità mad-dispożizzjonijiet tal-Artikolu 11(3) tal-Konvenzjoni dwar is-simplifikazzjoni tal-formalitajiet fil-kummerċ tal-oġġetti u mad-dispożizzjonijiet tal-Artikolu 15(3) tal-Konvenzjoni dwar il-Proċedura Komuni ta’ Tranżitu, il-Kumitati Konġunti EU-CTC għandhom, permezz ta’ deċiżjoni, jistiednu pajjiż terz skont it-tifsira tal-Artikolu 1(2) u l-Artikolu 3(1)(c) rispettivament, biex jaderixxi għall-Konvenzjonijiet f’konformità mal-proċedura stabbilita, rispettivament, fl-Artikolu 11a u fl-Artikolu 15a.
Il-Kumitati Konġunti EU-CTC iniedu tali stedina fejn il-pajjiż juri li huwa f’pożizzjoni li jikkonforma mar-regoli dettaljati għall-applikazzjoni tad-dispożizzjonijiet tal-Konvenzjonijiet.
B’mandat mill-gruppi ta’ ħidma EU-CTC dwar it-tranżitu komuni u s-simplifikazzjoni tal-formalitajiet fil-kummerċ, fl-24 ta’ Ġunju 2022 tim ta’ monitoraġġ ikkonkluda li l-Ukrajna hija lesta li tingħaqad mal-Konvenzjonijiet. It-tim eżamina prinċipalment l-adattament tal-istrutturi meħtieġa għall-ġestjoni tal-proċedura u l-implimentazzjoni tas-Sistema Ġdida ta’ Tranżitu Kompjuterizzata (NCTS) li tippermetti l-applikazzjoni stabilità tal-Proċedura Komuni ta’ Tranżitu li l-kundizzjonijiet tal-istediniet ġew issodisfati, minkejja ċirkostanzi diffiċli għall-Ukrajna.
Fis-sessjonijiet tagħhom li ġejjin jew permezz ta’ proċedura bil-miktub, il-Kumitati Konġunti EU-CTC qed jippjanaw li jadottaw l-abbozz tad-Deċiżjoni Nru 1/2022 tal-Kumitat Konġunt EU-CTC fuq is-simplifikazzjoni tal-formalitajiet fil-kummerċ tal-oġġetti u l-abbozz tad-Deċiżjoni Nru 2/2022 tal-Kumitat Konġunt EU-CTC dwar it-tranżitu komuni sabiex l-Ukrajna tiġi mistiedna taderixxi għall-Konvenzjonijiet.
Id-Deċiżjonijiet tal-Kumitati Konġunti li jistiednu l-Ukrajna biex taderixxi mal-Konvenzjoni għandhom isiru vinkolanti għall-Partijiet Kontraenti f’konformità mal-Artikolu 2 ta’ dawk id-Deċiżjonijiet li jipprevedi li “Din id-Deċiżjoni għandha tidħol fil-jum tal-adozzjoni tagħha”.
F’konformità mal-Artikolu 11(3) tal-Konvenzjoni dwar is-simplifikazzjoni tal-formalitajiet fil-kummerċ tal-oġġetti u l-Artikolu 15(3) tal-Konvenzjoni dwar il-Proċedura Komuni ta’ Tranżitu, dawn it-tip ta’ deċiżjonijiet għandhom jiddaħħlu fis-seħħ mill-Partijiet Kontraenti f’konformità mal-leġiżlazzjoni tagħhom stess.
3.Pożizzjoni li għandha tittieħed f’isem l-Unjoni
Il-pożizzjoni proposta hija favorevoli għal stedina lill-Ukrajna biex taderixxi mal-Konvenzjonijiet.
Il-Komunikazzjoni tal-2001 tal-Kummissjoni Ewropea lill-Parlament Ewropew u lill-Kunsill dwar Strateġija biex il-pajjiżi kandidati jitħejjew għall-adeżjoni mal-Konvenzjonijiet KE-EFTA tal-1987 dwar il-Proċedura Komuni ta’ Tranżitu u fuq is-simplifikazzjoni tal-formalitajiet fil-kummerċ tal-oġġetti, segwita mill-Komunikazzjoni tal-2010 tal-Kummissjoni Ewropea lill-Parlament Ewropew u lill-Kunsill dwar Strateġija għat-tħejjija ta’ ċerti pajjiżi ġirien għall-adeżjoni maż-żewġ Konvenzjonijiet u mill-konklużjonijiet tal-Kunsill tal-14 ta’ April 2011 li jikkonfermaw l-approċċ adottat fiż-żewġ Komunikazzjonijiet, jipprevedu appoġġ għal għadd ta’ pajjiżi fl-isforzi tagħhom biex jissieħbu fil-Konvenzjonijiet.
L-adeżjoni għall-Konvenzjonijiet hija parti mill-Ftehim ta’ Assoċjazzjoni bejn l-UE u l-Ukrajna, kif ukoll mill-istrateġija ta’ qabel l-adeżjoni tal-Ukrajna għall-Unjoni Ewropea. F’konformità mad-dispożizzjonijiet stabbiliti fil-Ftehim ta’ Assoċjazzjoni bejn l-UE u l-Ukrajna, dan se jwassal għal allinjament tal-“aquis” tal-UE fiż-żona ta’ tranżitu doganali.
L-għan huwa li jiġi ffaċilitat il-kummerċ bejn l-Ukrajna, l-Unjoni Ewropea u pajjiżi komuni ta’ tranżitu oħra. Dawn l-istediniet jenħtieġ li jirriżultaw f’benefiċċji sostanzjali u tanġibbli għan-negozjanti u għall-amministrazzjonijiet doganali billi jissimplifikaw il-formalitajiet ta’ tranżitu u dawk doganali, inaqqsu l-kostijiet, jiffaċilitaw il-moviment tal-oġġetti u possibbilment iżidu l-kummerċ.
L-istediniet mill-Kumitati Konġunti EU-CTC huma konformi mal-opinjoni tal-Kummissjoni dwar l-applikazzjoni għas-sħubija tal-Ukrajna fl-Unjoni Ewropea u l-approvazzjoni ta’ dik l-opinjoni mill-Kunsill Ewropew fit-23 ta’ Ġunju 2022 li ta l-istatus ta’ pajjiż kandidat lill-Ukrajna. Dan se jipprovdi sinjal tanġibbli tal-perspettiva Ewropea għall-Ukrajna.
L-aggressjoni militari mhux provokata u mhux ġustifikata tar-Russja kontra l-Ukrajna tagħmilha saħansitra aktar urġenti għall-Ukrajna li taderixxi għall-Konvenzjonijiet biex tiffaċilita l-moviment tal-oġġetti mill-fruntieri tagħha b’mod effiċjenti peress li xi rotot tat-trasport huma mblukkati u, għaldaqstant, hemm oħrajn kkonġestjonati.
Għalhekk, il-Kummissjoni tipproponi lill-Kunsill pożizzjoni favorevoli min-naħa tal-Unjoni għall-adeżjoni tal-Ukrajna mal-Konvenzjonijiet.
Id-deċiżjonijiet proposti huma konsistenti mal-politiki tal-Unjoni Ewropea fl-oqsma tal-kummerċ u t-trasport.
4.Bażi ġuridika
4.1.Bażi ġuridika proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
L-Artikolu 11(3) tal-Konvenzjoni dwar is-simplifikazzjoni tal-formalitajiet fil-kummerċ tal-oġġetti u l-Artikolu 15(3) tal-Konvenzjoni dwar il-Proċedura Komuni ta’ Tranżitu jistipulaw li l-Kumitat Konġunt EU-CTC b’deċiżjoni jistiednu pajjiż terz skont l-Artikolu 1(2) u l-Artikolu 3(1)(c) rispettivament, biex jaderixxi mal-Konvenzjonijiet.
4.1.2.Applikazzjoni għall-każ preżenti
Il-Kumitat Konġunt EU-CTC huwa korp stabbilit mill-Artikolu 10 tal-Konvenzjoni dwar is-simplifikazzjoni tal-formalitajiet fil-kummerċ tal-oġġetti u l-Artikolu 14 tal-Konvenzjoni dwar il-Proċedura Komuni ta’ Tranżitu.
Id-Deċiżjonijiet li l-Kumitat Konġunt EU-CTC huwa mitlub jadotta jikkostitwixxi att li għandu effetti legali. Dawk id-Deċiżjonijiet se jkunu vinkolanti skont id-dritt internazzjonali f’konformità mal-Artikolu 15 tal-Konvenzjoni dwar is-simplifikazzjoni tal-formalitajiet fil-kummerċ tal-oġġetti u l-Artikolu 20 tal-Konvenzjoni dwar il-Proċedura Komuni ta’ Tranżitu.
L-atti previsti ma jissupplimentawx u ma jemendawx il-qafas istituzzjonali tal-Konvenzjonijiet.
Għalhekk, il-bażi ġuridika proċedurali għad-deċiżjoni proposta hija l-Artikolu 218(9) tat-TFUE.
4.2.Bażi ġuridika sostantiva
4.2.1.Prinċipji
Il-bażi ġuridika sostantiva biex tittieħed deċiżjoni skont l-Artikolu 218(9) tat-TFUE tiddependi primarjament mill-objettiv u mill-kontenut tal-att previst li dwarhom tittieħed pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawk l-għanijiet jew komponenti jkun jista’ jiġi identifikat bħala dak ewlieni, filwaqt li l-ieħor ikun sempliċement inċidentali, id-deċiżjoni skont l-Artikolu 218(9) tat-TFUE trid tkun imsejsa fuq bażi ġuridika sostantiva waħda, jiġifieri dik meħtieġa mill-għan jew mill-komponent ewlieni jew predominanti.
4.2.2.Applikazzjoni għall-każ preżenti
L-objettiv ewlieni u l-kontenut tal-att previst huma relatati mal-politika kummerċjali komuni.
Għalhekk, il-bażi ġuridika sostantiva tad-deċiżjoni proposta hija l-Artikolu 207 tat-TFUE.
4.3.Konklużjoni
Jenħtieġ li l-bażi ġuridika tad-deċiżjoni proposta tkun l-Artikolu 207 tat-TFUE, flimkien mal-Artikolu 218(9) tat-TFUE.
2022/0218 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kumitat Konġunt tal-EU-CTC stabbilit bil-Konvenzjoni tal-20 ta’ Mejju 1987 dwar is-simplifikazzjoni tal-formalitajiet fil-kummerċ tal-oġġetti u tal-Kumitat Konġunt tal-EU-CTC stabbilit bil-Konvenzjoni tal-20 ta’ Mejju 1987 dwar il-Proċedura Komuni ta’ Tranżitu fir-rigward ta’ stediniet lill-Ukrajna biex taderixxi ma’ dawk il-Konvenzjonijiet
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207, flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)Il-Konvenzjoni tal-20 ta’ Mejju 1987 dwar is-simplifikazzjoni tal-formalitajiet fil-kummerċ tal-oġġetti u l-Konvenzjoni tal-20 ta’ Mejju 1987 dwar il-Proċedura Komuni ta’ Tranżitu (“il-Konvenzjonijiet”) ġew konklużi bejn il-Komunità Ekonomika Ewropea, ir-Repubblika tal-Awstrija, ir-Repubblika tal-Finlandja, Ir-Repubblika tal-Iżlanda, ir-Renju tan-Norveġja, ir-Renju tal-Iżvezja u l-Konfederazzjoni Żvizzera fl-20 ta’ Mejju 1987 u daħlu fis-seħħ fl-1 ta’ Jannar 1988.
(2)L-Ukrajna esprimiet ix-xewqa tagħha li taderixxi għall-Konvenzjonijiet ladarba tkun ikkonformat mar-rekwiżiti marbuta mal-adeżjoni tagħha.
(3)Skont l-Artikolu 11(3) tal-Konvenzjoni dwar is-simplifikazzjoni tal-formalitajiet fil-kummerċ tal-oġġetti, il-Kumitat Konġunt EU-CTC stabbilit minn dik il-Konvenzjoni b’deċiżjoni jista’ jadotta stediniet lil pajjiżi terzi biex jaderixxu ma’ dik il-Konvenzjoni.
(4)Skont l-Artikolu 15(3) tal-Konvenzjoni dwar il-Proċedura Komuni ta’ Tranżitu, il-Kumitat Konġunt EU-CTC stabbilit minn dik il-Konvenzjoni, b’deċiżjoni jista’ jadotta stediniet lil pajjiżi terzi biex jaderixxu ma’ dik il-Konvenzjoni.
(5)Huwa xieraq li tiġi stabbilita l-pożizzjoni li għandha tittieħed f’isem l-Unjoni fil-Kumitati Konġunti stabbiliti mill-Konvenzjonijiet, peress li d-Deċiżjonijiet li jistiednu lill-Ukrajna taderixxi għall-Konvenzjonijiet se jkunu vinkolanti għall-Unjoni.
(6)Il-Konvenzjonijiet huma parti mill-acquis tal-Unjoni u huma parti mill-istrateġija ta’ qabel l-adeżjoni għall-Ukrajna. Il-Konvenzjonijiet se jiżguraw proċeduri effiċjenti għall-qsim tal-fruntieri bejn l-Ukrajna u l-partijiet għall-Konvenzjonijiet.
(7)L-istediniet huma konformi mal-opinjoni tal-Kummissjoni dwar l-applikazzjoni għas-sħubija tal-Ukrajna għall-Unjoni Ewropea u l-approvazzjoni ta’ dik l-opinjoni mill-Kunsill Ewropew fit-23 ta’ Ġunju 2022 li tat l-istatus ta’ pajjiż kandidat lill-Ukrajna.
(8)Għalhekk, il-pożizzjoni tal-Unjoni fil-Kumitati Konġunti stabbiliti mill-Konvenzjonijiet jenħtieġ li tkun favorevoli għal stedina għall-adeżjoni ma’ dawk il-Konvenzjonijiet u tkun ibbażata fuq l-abbozzi tad-Deċiżjonijiet li jirriflettu dik il-pożizzjoni,
(9)F’konformità mal-Konvenzjonijiet, il-pajjiż terz li jiġi mistieden isir parti kontraenti għandu jagħmel dan billi jiddepożita strument ta’ adeżjoni u li l-adeżjoni għandha ssir effettiva fl-ewwel jum tat-tieni xahar wara d-depożitu tal-istrument tal-adeżjoni.
(10)Sabiex tiġi ffaċilitata l-adeżjoni f’waqtha tal-Ukrajna, huwa meħtieġ li din id-deċiżjoni tiġi adottata mingħajr dewmien.
ADOTTA DIN ID-DEĊIŻJONI
Artikolu 1
Il-pożizzjoni li għandha tittieħed f’isem l-Unjoni fil-Kumitat Konġunt tal-EU-CTC stabbilit bil-Konvenzjoni tal-20 ta’ Mejju 1987 dwar is-simplifikazzjoni tal-formalitajiet fil-kummerċ tal-oġġetti fir-rigward ta’ stedina lill-Ukrajna biex taderixxi ma’ dik il-Konvenzjoni, għandha tkun ibbażata fuq l-abbozz tad-Deċiżjoni ta’ dak il-Kumitat Konġunt stabbilita fl-Anness I ta’ din id-Deċiżjoni.
Artikolu 2
Il-pożizzjoni li għandha tittieħed f’isem l-Unjoni fil-Kumitat Konġunt tal-EU-CTC stabbilit bil-Konvenzjoni tal-20 ta’ Mejju 1987 dwar il-Proċedura Komuni ta’ Tranżitu fir-rigward ta’ stedina lill-Ukrajna biex taderixxi ma’ dik il-Konvenzjoni, għandha tkun ibbażata fuq l-abbozz tad-Deċiżjoni ta’ dak il-Kumitat Konġunt stabbilit fl-Anness II ta’ din id-Deċiżjoni.
Artikolu 3
Wara l-adozzjoni tagħhom, id-Deċiżjonijiet tal-Kumitati Konġunti msemmija fl-Artikoli 1 u 2 għandhom jiġu ppubblikati f’Il-Ġurnal Uffiċjali tal-Unjoni Ewropea.
Artikolu 4
Din id-deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President