This document is an excerpt from the EUR-Lex website
Document 52022IP0229
European Parliament non-legislative resolution of 8 June 2022 on the draft Council decision on the conclusion of the Sustainable Fisheries Partnership Agreement between the European Union and the Islamic Republic of Mauritania and the Implementing Protocol thereto (12208/2021 — C9-0419/2021 — 2021/0300M(NLE))
Riżoluzzjoni mhux leġiżlattiva tal-Parlament Ewropew tat-8 ta' Ġunju 2022 dwar l-abbozz ta' deċiżjoni tal-Kunsill dwar il-konklużjoni tal-Ftehim ta' Sħubija dwar is-Sajd Sostenibbli bejn l-Unjoni Ewropea u r-Repubblika Iżlamika tal-Mauritania u tal-Protokoll ta' Implimentazzjoni tiegħu (12208/2021 – C9-0419/2021 – 2021/0300M(NLE))
Riżoluzzjoni mhux leġiżlattiva tal-Parlament Ewropew tat-8 ta' Ġunju 2022 dwar l-abbozz ta' deċiżjoni tal-Kunsill dwar il-konklużjoni tal-Ftehim ta' Sħubija dwar is-Sajd Sostenibbli bejn l-Unjoni Ewropea u r-Repubblika Iżlamika tal-Mauritania u tal-Protokoll ta' Implimentazzjoni tiegħu (12208/2021 – C9-0419/2021 – 2021/0300M(NLE))
ĠU C 493, 27.12.2022, p. 152–157
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
ĠU C 493, 27.12.2022, p. 127–132
(GA)
27.12.2022 |
MT |
Il-Ġurnal Uffiċjali tal-Unjoni Ewropea |
C 493/152 |
P9_TA(2022)0229
Il-Ftehim ta' Sħubija dwar is-Sajd Sostenibbli bejn l-UE u l-Mauritania u l-Protokoll ta' Implimentazzjoni tiegħu (Riżoluzzjoni)
Riżoluzzjoni mhux leġiżlattiva tal-Parlament Ewropew tat-8 ta' Ġunju 2022 dwar l-abbozz ta' deċiżjoni tal-Kunsill dwar il-konklużjoni tal-Ftehim ta' Sħubija dwar is-Sajd Sostenibbli bejn l-Unjoni Ewropea u r-Repubblika Iżlamika tal-Mauritania u tal-Protokoll ta' Implimentazzjoni tiegħu (12208/2021 – C9-0419/2021 – 2021/0300M(NLE))
(2022/C 493/20)
Il-Parlament Ewropew,
— |
wara li kkunsidra l-abbozz ta’ deċiżjoni tal-Kunsill (12208/2021), |
— |
wara li kkunsidra d-Deċiżjoni tal-Kunsill (UE) 2021/99 tal-25 ta' Jannar 2021 dwar il-konklużjoni tal-Ftehim fil-forma ta' skambju ta' ittri bejn l-Unjoni Ewropea u r-Repubblika Iżlamika tal-Mauritania dwar l-estensjoni tal-Protokoll li jistabbilixxi l-opportunitajiet tas-sajd u l-kontribuzzjoni finanzjarja previsti fil-Ftehim ta' Sħubija fis-Settur tas-Sajd bejn il-Komunità Ewropea u r-Repubblika Iżlamika tal-Mauritania, li se jiskadi fil-15 ta' Novembru 2021 (1), |
— |
wara li kkunsidra d-Deċiżjoni tal-Kunsill (UE) 2021/2123 tal-11 ta' Novembru 2021 dwar l-iffirmar, f'isem l-Unjoni Ewropea, u l-applikazzjoni provviżorja tal-Ftehim ta' Sħubija fil-qasam tas-Sajd Sostenibbli bejn l-Unjoni Ewropea u r-Repubblika Iżlamika tal-Mauritania kif ukoll tal-Protokoll ta' Implimentazzjoni tiegħu (2), |
— |
wara li kkunsidra r-riżoluzzjoni leġiżlattiva tiegħu tat-8 ta’ Ġunju 2022 (3) dwar l-abbozz ta' deċiżjoni, |
— |
wara li kkunsidra l-Ftehim ta' Sħubija dwar is-Sajd bejn l-Unjoni Ewropea u r-Repubblika Iżlamika tal-Mauritania, li daħal fis-seħħ fit-8 ta' Awwissu 2008 (4), |
— |
wara li kkunsidra l-Ftehim ta' Sħubija fil-qasam tas-sajd sostenibbli bejn l-Unjoni Ewropea u r-Repubblika Iżlamika tal-Mauritania (5), |
— |
wara li kkunsidra r-riżoluzzjoni tiegħu tat-3 ta' Mejju 2022 lejn ekonomija blu sostenibbli fl-UE: ir-rwol tas-setturi tas-sajd u tal-akkwakultura (6). |
— |
wara li kkunsidra t-talba għal approvazzjoni ppreżentata mill-Kunsill skont l-Artikolu 43(2) u l-Artikolu 218(6) tat-Trattat dwar il-Funzjonament tal-Unjoni Ewropea (TFUE) (C9-0419/2021), |
— |
wara li kkunsidra l-Ftehim ta' Sħubija tat-23 ta' Ġunju 2000 bejn il-membri tal-gruppi tal-Istati Afrikani, tal-Karibew u tal-Paċifiku, minn banda waħda, u l-Komunità Ewropea u l-Istati Membri tagħha, minn naħa l-oħra (7) (il-Ftehim Cotonou), |
— |
wara li kkunsidra l-pubblikazzjoni tal-Organizzazzjoni tal-Ikel u l-Agrikoltura tan-NU (FAO) tal-2015 bit-titolu “Voluntary Guidelines for Securing Sustainable Small-Scale Fisheries in the Context of Food Security and Poverty Eradication” (Linji Gwida Volontarji biex jiġi Żgurat is-Sajd Sostenibbli fuq Skala Żgħira fil-Kuntest tas-Sigurtà tal-Ikel u l-Qerda tal-Faqar), |
— |
wara li kkunsidra r-rapport ta' sinteżi 2020 tal-Grupp ta' Ħidma tal-FAO dwar il-valutazzjoni tal-ħut pelaġiku żgħir lil hinn mill-kosta tal-Afrika tal-Majjistral 2019, |
— |
wara li kkunsidra l-politika komuni tas-sajd, speċjalment id-dimensjoni esterna tagħha, |
— |
wara li kkunsidra l-Konvenzjoni tan-NU dwar il-Liġi tal-Baħar, |
— |
wara li kkunsidra l-impenn tal-UE għall-koerenza tal-politiki għall-iżvilupp, kif minqux fl-Artikolu 208 tat-TFUE, |
— |
wara li kkunsidra l-valutazzjonijiet ex ante u ex post tal-Kummissjoni tal-ftehim u l-protokoll preċedenti, |
— |
wara li kkunsidra r-rapport tal-laqgħa straordinarja tal-Kumitat Xjentifiku Konġunt dwar il-Ftehim dwar is-Sajd iffirmat bejn ir-Repubblika Iżlamika tal-Mauritania u l-Unjoni Ewropea, li saret bejn l-10 u t-12 ta' Frar 2021, |
— |
wara li kkunsidra r-riżoluzzjoni tiegħu tal-20 ta' Ottubru 2021 dwar l-istrateġija mill-għalqa sal-platt għal sistema tal-ikel ġusta, tajba għas-saħħa u favur l-ambjent (8), |
— |
wara li kkunsidra l-Artikolu 105(2) tar-Regoli ta' Proċedura tiegħu, |
— |
wara li kkunsidra l-opinjonijiet tal-Kumitat għall-Kummerċ Internazzjonali u tal-Kumitat għall-Iżvilupp, |
— |
wara li kkunsidra r-rapport tal-Kumitat għas-Sajd (A9-0154/2022), |
A. |
billi l-implimentazzjoni tal-ftehimiet ta' sħubija dwar is-sajd sostenibbli (SFPAs) trid tkun konformi mal-aħjar parir xjentifiku disponibbli biex jiġu żgurati operazzjonijiet tas-sajd sostenibbli li jużaw biss is-surplus permissibbli fil-pajjiż sieħeb; billi l-appoġġ settorjali għandu jikkontribwixxi għall-iżvilupp sostenibbli tas-settur tas-sajd, b'mod partikolari permezz ta' appoġġ għal sajd fuq skala żgħira, filwaqt li jsaħħaħ ukoll is-sigurtà tal-ikel lokali u l-komunitajiet lokali; |
B. |
billi l-ewwel ftehim dwar is-sajd bejn l-Unjoni Ewropea u r-Repubblika Iżlamika tal-Mauritania jmur lura għall-1987 u billi l-aħħar protokoll ta' implimentazzjoni, li kellu durata inizjali ta' erba' snin mill-2015 sal-2019, ġie estiż darbtejn b'sena u skada fil-15 ta' Novembru 2021; |
C. |
billi l-Unjoni u l-Mauritania qablu dwar Ftehim ta' Sħubija dwar is-Sajd Sostenibbli u Protokoll ġodda fit-28 ta' Lulju 2021; |
D. |
billi diversi SFPAs ġew iffirmati mill-Unjoni Ewropea u mill-pajjiżi Afrikani; |
E. |
billi l-protokoll il-ġdid ikopri perjodu ta' ħames snin u jipprovdi opportunitajiet tas-sajd simili għall-protokoll preċedenti, bil-kontribuzzjoni finanzjarja tal-Unjoni għall-aċċess għas-sajd li tammonta għal EUR 57,5 miljun fis-sena u l-kontribuzzjoni tagħha għall-appoġġ settorjali li tammonta għal EUR 16,5 miljun; |
F. |
billi l-Ftehim ta' Sħubija dwar is-Sajd mal-Mauritania huwa l-akbar ftehim imħallat tal-UE; billi dan jipprovdi opportunitajiet tas-sajd għal bastimenti minn 10 Stati Membri li jistadu għall-ispeċijiet demersali u pelaġiċi li, bħat-tonn, huma speċijiet migratorji ħafna, fil-limiti tas-surplus disponibbli kif definit fl-Artikolu 62 tal-Konvenzjoni tan-NU dwar il-Liġi tal-Baħar, filwaqt li titqies il-kapaċità tas-sajd tal-flotot Mauritanjani; |
G. |
billi s-sajd eċċessiv ta' stokkijiet pelaġiċi żgħar, speċjalment is-Sardinella, u l-ipproċessar tagħhom fi frakass tal-fdal tal-ħut u żejt tal-ħut jikkawżaw ħsara enormi mhux biss lill-ilmijiet lokali, pereżempju permezz tat-tniġġis tal-ilma mormi, iżda wkoll lis-sigurtà tal-ikel tal-popolazzjonijiet lokali fir-reġjun kollu tal-Afrika tal-Punent; billi fl-2017, il-Mauritania impenjat ruħha li tnaqqas u telimina gradwalment il-produzzjoni tal-frakass tal-fdal tal-ħut u taż-żejt tal-ħut sal-2020; billi mill-2010 'l hawn, il-produzzjoni tagħhom ittriplat u kien hemm espansjoni tal-fabbriki tal-frakass tal-fdal tal-ħut fil-Mauritania u fil-pajjiżi ġirien; |
H. |
billi data xjentifika robusta, sistemi effiċjenti ta' monitoraġġ u kontroll u trasparenza rigward il-qabdiet u l-liċenzji tas-sajd huma meħtieġa biex l-istati kostali jiddeterminaw is-surplus disponibbli tal-istokkijiet kondiviżi ta' ħut pelaġiku żgħir, u biex jiżguraw li d-deċiżjonijiet maniġerjali għall-istokkijiet ikunu jistgħu jittieħdu b'mod li l-istokkijiet ma jaqbżux il-limiti xjentifiċi; billi fir-rigward tal-ġestjoni ta' ħut pelaġiku żgħir fil-Mauritania, ir-rapport tal-2021 tal-laqgħa straordinarja tal-Kumitat Xjentifiku Konġunt appoġġja miżuri addizzjonali biex jitnaqqsu l-isforzi tas-sajd fiż-żona tas-sajd ta' 15-il mil nawtiku tal-pajjiż, bħall-introduzzjoni ta' kwoti għal stokkijiet li jkunu ġew ikkonfermati xjentifikament li huma sfruttati żżejjed; |
I. |
billi l-appoġġ settorjali skont il-protokoll il-ġdid huwa mmirat lejn tmien oqsma ta' intervent; billi dawn jinkludu, fost l-oħrajn, l-appoġġ għas-sajd artiġjanali u l-komunitajiet kostali, it-tisħiħ tar-riċerka xjentifika, u t-tisħiħ tal-attivitajiet ta' kontroll u sorveljanza u l-appoġġ tekniku lill-awtoritajiet Mauritanjani; billi l-kumitat konġunt għandu japprova programm settorjali multiannwali għall-użu ta' tali appoġġ; billi l-awtoritajiet Mauritanjani għandhom l-obbligu li jippreżentaw rapport finali dwar l-implimentazzjoni tal-appoġġ settorjali; |
J. |
billi l-protokoll il-ġdid jistabbilixxi korp ġdid ta' koordinazzjoni (cellule de coordination) biex jappoġġja l-implimentazzjoni tal-proġetti definiti fil-programm u li għandu jkun responsabbli għall-monitoraġġ tad-deċiżjonijiet tal-kumitat konġunt; |
K. |
billi l-Artikolu 7 tal-protokoll il-ġdid jippermetti lill-Unjoni u lill-Mauritania jirrevedu l-opportunitajiet tas-sajd fit-tielet sena ta' implimentazzjoni, filwaqt li jirrispettaw is-sostenibbiltà tar-riżorsi fiż-żona tas-sajd u jinvolvu aġġustament tal-kontribuzzjoni finanzjarja tal-UE; |
L. |
billi l-protokoll il-ġdid jintroduċi tariffi differenti tas-sidien tal-bastimenti għall-kategorija 6 (bastimenti tat-tkarkir mgħammra bi friża użati għas-sajd għall-ħut pelaġiku) li huma aktar skont il-valur tas-suq ta' kull speċi pelaġika speċifika mistada; |
M. |
billi l-Artikolu 3 tal-ftehim il-ġdid jiddikjara li l-flotta tal-UE għandha tibbenefika mill-istess kundizzjonijiet tekniċi għas-sajd u l-aċċess għar-riżorsi bħall-flotot l-oħra kollha; billi l-istess artikolu jirrikjedi li jissaħħaħ l-iskambju ta' informazzjoni u jobbliga lill-Mauritania tippubblika l-ftehimiet kollha li jippermettu bastimenti barranin fiż-żona tas-sajd tagħha; |
N. |
billi l-protokoll il-ġdid jimmodifika u jkabbar iż-żona tas-sajd għall-ħut pelaġiku żgħir għall-bastimenti tal-UE; billi l-Artikolu 9 tal-protokoll jirrikjedi li l-Mauritania tfassal, fi żmien sitt xhur mill-implimentazzjoni tal-protokoll, pjan ta' ġestjoni sostenibbli għas-sajd pelaġiku żgħir, applikabbli għall-flotot kollha li jistadu fl-ilmijiet tal-Mauritania bħala kundizzjoni għall-istabbiliment taż-żona tas-sajd il-ġdida; billi EUR 7,5 miljun mill-kontribuzzjoni finanzjarja tal-Unjoni jiddependu mill-approvazzjoni ta' dan il-pjan ta' ġestjoni min-naħa tal-kumitat konġunt; |
O. |
billi l-protokoll il-ġdid jippermetti lill-bastimenti tal-UE jħottu l-qabda tagħhom barra mill-portijiet tal-Mauritania f'ċirkostanzi eċċezzjonali, talba li ilha ssir mill-bastimenti tas-sajd tal-UE li huma attivi fil-Mauritania; |
P. |
billi l-valutazzjoni tal-Kummissjoni tal-protokoll preċedenti appellat għall-istabbiliment ta' qafas ta' ġestjoni reġjonali għall-isfruttament ta' stokkijiet kondiviżi ta' ħut pelaġiku żgħir u merluzz iswed, kif meħtieġ mill-Arikolu 63 tal-Konvenzjoni tal-NU dwar il-Liġi tal-Baħar; |
1. |
Jilqa' l-konklużjoni ta' Ftehim ta' Sħubija dwar is-Sajd Sostenibbli u Protokoll ġodda bejn l-Unjoni u l-Mauritania, maħsuba biex itejbu u jimmodernizzaw il-ftehim eżistenti; iqis li huwa pożittiv li l-ebda estensjoni addizzjonali ta' sena għall-protokoll preċedenti mhi se tkun, minn issa 'l quddiem, meħtieġa jew se tissolva jekk ma tkunx strettament meħtieġa, mingħajr ma ssir ħsara lill-flotta Ewropea; |
2. |
Jilqa' bl-istess mod l-aġġornament tal-ftehim ta' sħubija għal SFPA sħiħ u jirrimarka li dawn it-tipi ta' ftehimiet huma pedament tajjeb għall-kooperazzjoni dwar il-governanza tal-oċeani u l-ġestjoni sostenibbli tal-istokkijiet tal-ħut; jisħaq fuq l-importanza li jiġi żgurat li l-prinċipji ta' ġestjoni sostenibbli kif minquxa fil-politika komuni tas-sajd jiġu riflessi fil-ftehimiet tas-sajd tal-Unjoni, inkluż fl-implimentazzjoni tagħhom; |
3. |
Jirrimarka li dan il-ftehim isaħħaħ il-kooperazzjoni ambjentali, ekonomika, soċjali, amministrattiva u xjentifika sabiex isaħħaħ is-sajd sostenibbli, jikkontribwixxi għal governanza mtejba tal-oċeani, jiġġieled is-sajd illegali, mhux irrappurtat u mhux irregolat, jimmonitorja u jikkontrolla l-attivitajiet tas-sajd u jikkontribwixxi kemm għall-implimentazzjoni trasparenti tal-ftehim kif ukoll għall-ħolqien tal-impjiegi f'konformità mal-Konvenzjoni tal-2007 tal-Organizzazzjoni Internazzjonali tax-Xogħol (ILO) dwar ix-Xogħol fis-Sajd (Nru 188); jissottolinja li s-sħubija trid toffri garanziji u protezzjoni għall-ħaddiema kollha fuq il-bastimenti tal-UE; jenfasizza l-importanza ta' kompetizzjoni ġusta għas-sajjieda kollha li joperaw fl-ilmijiet tal-Mauritania; |
4. |
Jirrikonoxxi l-importanza tal-ftehim u l-protokoll il-ġodda f'termini tal-opportunitajiet tas-sajd konsiderevoli li għandhom il-flotta tal-UE u bħala pjattaforma għal kooperazzjoni strutturata kontinwa bejn l-Unjoni u l-Mauritania, speċjalment fil-qasam tal-ġestjoni sostenibbli tas-sajd u biex tinżamm il-flotta Ewropea; |
5. |
Jistieden lill-Mauritania tiżgura li ma jsir l-ebda sajd żejjed ta' ħut pelaġiku żgħir u twaqqaf u telimina gradwalment l-impatti negattivi kkawżati mill-industrija tal-frakass tal-fdal tal-ħut u taż-żejt tal-ħut fil-Mauritania; jistieden lill-UE, fil-qafas tal-SFPA, tikkontribwixxi għal dawn l-objettivi; jinnota li l-ħut għandu jintuża primarjament għall-konsum mill-bniedem u mhux bħala materja prima għall-industrija tal-ipproċessar tal-ikel, u li huwa importanti li l-awtoritajiet lokali jkunu involuti u jikkooperaw f'dan; |
6. |
Jilqa' b'sodisfazzjon ir-rekwiżit fil-protokoll il-ġdid li l-Mauritania tippubblika pjan għall-ġestjoni sostenibbli ta' ħut pelaġiku żgħir li se japplika għall-bastimenti kollha li jistadu fl-ilmijiet tal-Mauritania; iħeġġeġ lill-Mauritania tislet mill-konklużjonijiet tar-rapport tal-2021 tal-laqgħa straordinarja tal-Kumitat Xjentifiku Konġunt u tapplika, fejn meħtieġ, approċċ prekawzjonarju bbażat fuq ix-xjenza meta tfassal pjan bħal dan; |
7. |
Jisħaq fuq l-impenn tal-partijiet li jippromwovu l-ġestjoni tas-sajd abbażi tan-nondiskriminazzjoni bejn il-flotot differenti preżenti fiż-żona u jisħaq li l-bastimenti tal-Unjoni għandu jkollhom aċċess għal sehem xieraq tas-surplus tar-riżorsi tas-sajd f'konformità mal-aħjar pariri xjentifiċi disponibbli; |
8. |
Jilqa' l-klawżoli ta' trasparenza u nondiskriminazzjoni fil-ftehim u l-protokoll il-ġodda u jħeġġeġ lill-Kummissjoni tiżgura li dawn il-klawżoli jiġu implimentati u rispettati bis-sħiħ; jinnota li r-regoli ta' trasparenza diġà kienu jeżistu fil-ftehim preċedenti iżda ma ġewx irrispettati bis-sħiħ; |
9. |
Jeżiġi li l-Mauritania tinforma lill-Kummissjoni dwar il-ftehimiet pubbliċi jew privati kollha ma' bastimenti barranin li joperaw fiż-żona tas-sajd tagħha, inklużi bastimenti minn pajjiżi terzi, u li din l-informazzjoni tiġi inkluża fir-rapport annwali li għandu jintbagħat mill-Kummissjoni lill-Parlament; jesprimi tħassib li, s'issa, xi ftehimiet tas-sajd ma' pajjiżi terzi għadhom ma ġewx ippubblikati mill-Mauritania; |
10. |
Jinnota l-iskambju ta' informazzjoni meħtieġ mill-protokoll fir-rigward ta' rapporti dwar l-attivitajiet ta' flotot barranin u flotot domestiċi ta' proprjetà barranija li joperaw fl-ilmijiet tal-Mauritania; jistieden lill-Mauritania tipprovdi informazzjoni kompluta lill-Kummissjoni dwar il-bastimenti kollha li jistadu fl-ilmijiet tagħha f'format ċar u faċli għall-utent li jippermetti stampa ġenerali ċara tal-isforz tas-sajd totali, tal-qabdiet għal kull speċi u tal-istatus tal-istokkijiet; jistieden lill-Mauritania tagħmel din l-informazzjoni disponibbli għall-pubbliku. jinnota li din hija kundizzjoni għall-kalkolu tas-“surplus” fl-ispirtu tal-Konvenzjoni tan-NU dwar il-Liġi tal-Baħar; |
11. |
Jilqa' l-pubblikazzjoni tal-ewwel rapport għall-Inizjattiva għat-Trasparenza fis-Sajd min-naħa tal-Mauritania; jinnota li r-rapport huwa bbażat fuq informazzjoni mis-sena kalendarja 2018; jistieden lill-Mauritania tippubblika data aktar reċenti; |
12. |
Jesprimi tħassib rigward il-prattika ta' bdil tal-bandiera fl-ilmijiet tal-Mauritania, b'mod partikolari, u fir-reġjun b'mod ġenerali; |
13. |
Iqis li l-Unjoni, minħabba n-network tagħha ta' ftehimiet ta' sħubija dwar is-sajd u SFPAs fis-seħħ fil-Majjistral tal-Afrika, għandha rwol x'taqdi biex tħeġġeġ lill-Mauritania u lill-pajjiżi ġirien tagħha jintensifikaw il-kooperazzjoni fil-ġestjoni tal-istokkijiet kondiviżi, speċifikament fl-identifikazzjoni tal-istokkijiet u l-opportunitajiet tas-sajd, bħal stokkijiet importanti għas-sigurtà tal-ikel lokali; jindika b'mod speċifiku l-importanza għall-Unjoni li tinvolvi ruħha b'mod attiv mas-sħab tagħha fiż-żona sabiex tiżgura deċiżjonijiet ta' ġestjoni sostenibbli fl-organizzazzjoni reġjonali tal-ġestjoni tas-sajd rilevanti; jistieden lill-UE, il-Mauritania u l-pajjiżi ġirien jappoġġjaw l-implimentazzjoni ta' qafas ta' ġestjoni reġjonali komprensiv għal stokkijiet kondiviżi, permezz tal-istabbiliment ta' organizzazzjoni għall-ġestjoni tas-sajd reġjonali għal dawk l-istokkijiet u billi jibdew djalogu internazzjonali mal-pajjiżi kkonċernati; |
14. |
Jilqa' l-impenn mill-partijiet kollha li jimplimentaw il-ftehim b'mod trasparenti u bi qbil mal-Ftehim ta' Cotonou fir-rigward tad-drittijiet tal-bniedem, il-prinċipji demokratiċi, l-istat tad-dritt u l-governanza tajba; jitlob li tingħata attenzjoni speċifika lid-drittijiet tal-bniedem fil-Mauritania, inkluż fis-settur tas-sajd, b'enfasi speċifika fuq il-kundizzjonijiet tax-xogħol; jinnota li n-nuqqas ta' implimentazzjoni tal-Ftehim ta' Cotonou fir-rigward tar-rispett tad-drittijiet tal-bniedem jista' jwassal għal sospensjoni skont l-Artikolu 21 u l-Artikolu 14 tal-protokoll ta' implimentazzjoni l-ġdid; |
15. |
Jinnota li l-evalwazzjoni ex post tal-protokoll preċedenti tikkonkludi li b'mod ġenerali, il-Mauritania u l-UE qabdu sehem simili ta' valur miżjud ta' bejn 40 u 45 % kull wieħed; jinnota li tiddikjara li, madankollu, fin-nuqqas ta' interazzjonijiet ekonomiċi fuq l-art, il-valur miżjud prodott għall-Mauritania mill-attivitajiet tal-bastimenti tal-UE huwa relattivament baxx; jitlob, f'dan ir-rigward, li l-UE tesplora modi biex ittejjeb din is-sitwazzjoni skont il-protokoll il-ġdid; |
16. |
Jinnota li l-Mauritania kellha diffikultà biex tassorbi l-appoġġ settorjali; jistieden lill-Kummissjoni, għalhekk, tipprovdi assistenza teknika għat-tħejjija u l-implimentazzjoni tal-programm settorjali pluriennali u ssaħħaħ il-kapaċitajiet amministrattivi fil-Mauritania, b'mod partikolari għall-korp ta' koordinazzjoni l-ġdid; |
17. |
Iqis l-appoġġ settorjali bħala element importanti li jiżviluppa s-settur tas-sajd tal-Mauritania u jipprovdi impjiegi fil-komunitajiet kostali; |
18. |
Jilqa' l-appoġġ settorjali taħt l-assi 6 u 7; jistieden lill-kumitat konġunt jippromwovi proġetti ta' infrastruttura li jwasslu għal żieda fil-konsum lokali ta' prodotti tal-ħut u jiffinanzja proġetti li jkunu ta' benefiċċju dirett għall-katina tal-valur kollha tas-sajd fuq skala żgħira tal-Mauritania; |
19. |
Jitlob li aktar proġetti ta' appoġġ settorjali jgħinu lin-nisa fis-settur tas-sajd tal-Mauritania, b'mod partikolari dawk involuti fl-ipproċessar; jirrikonoxxi l-importanza ta' tali proġetti għas-sigurtà tal-ikel lokali u jitlob li n-nisa jkunu mistiedna jipparteċipaw fil-workshops għall-preżentazzjoni u l-ipprogrammar ta' azzjonijiet ta' appoġġ. |
20. |
Jisħaq li waħda mill-problemi ġenerali tal-appoġġ settorjali fl-SFPAs tal-Unjoni hija n-nuqqas ta' viżibbiltà, aċċessibbiltà u trasparenza; jilqa', għalhekk, il-miżuri ta' viżibbiltà u pubbliċità meħuda fir-rigward tal-attivitajiet assoċjati mal-implimentazzjoni tal-protokoll, li jippermettu li l-benefiċċji tiegħu jkunu kompletament viżibbli u aċċessibbli għal dawk kollha kkonċernati; jinnota li hemm bżonn ta' implimentazzjoni u użu mtejba sabiex jiżdied l-appoġġ settorjali, inkluża l-effikaċja tiegħu; |
21. |
Jistieden lill-Kummissjoni u lill-Mauritania jtejbu u jħaffu l-implimentazzjoni tal-appoġġ settorjali u jżidu t-trasparenza, speċjalment fil-qasam tal-liċenzji tas-sajd; jilqa', għalhekk, il-pubblikazzjoni ta' rapporti annwali dwar il-modi li bihom jintuża l-appoġġ settorjali u jitlob li dawn isiru pubbliċi; jissuġġerixxi li l-Parlament jiġi ppreżentat bl-azzjonijiet jew bil-miżuri bl-akbar rilevanza jew impatt fuq il-partijiet tat-territorju jew tas-soċjetà tal-Mauritania li huma eliġibbli għal din l-għajnuna settorjali; |
22. |
Jirrimarka li hemm bżonn ta' ġbir aħjar tad-data dwar l-istokkijiet fl-ilmijiet tal-Mauritania u li l-implimentazzjoni tal-SFPA trid tkun ibbażata fuq l-aħjar parir xjentifiku disponibbli; jemmen li l-appoġġ settorjali għandu jintuża biex jappoġġja s-sajd artiġanali u bħala prijorità biex tittejjeb id-data xjentifika dwar l-istokkijiet tal-ħut, speċjalment dwar l-istokkijiet kondiviżi ta' ħut pelaġiku żgħir bħall-ispeċijiet tas-Sardinella u s-sawrell, u dwar l-attivitajiet ta' kontroll u sorveljanza tal-flotot kollha tas-sajd fiż-żoni tas-sajd tagħhom; |
23. |
Jisħaq fuq l-importanza tad-data xjentifika dwar l-istokkijiet, il-ġbir xieraq tad-data u monitoraġġ aħjar sabiex il-protokoll il-ġdid ikun jista' jżid u jtejjeb il-kopertura mill-osservaturi xjentifiċi, li għandu jkun speċjalment l-objettiv għall-bastimenti tas-sajd ta' pajjiżi terzi; |
24. |
Iħeġġeġ lill-Kummissjoni tiffaċilita l-parteċipazzjoni u l-iskambju bejn l-esperti u x-xjentisti fil-qafas ta' dan il-ftehim u matul l-implimentazzjoni tiegħu, jekk ikun meħtieġ għall-valutazzjoni tal-ispeċijiet differenti u t-tħaddim tal-ftehim; |
25. |
Jilqa' l-fatt li, fit-tielet sena ta' applikazzjoni tiegħu, il-protokoll il-ġdid jippermetti aġġustament tal-kontribuzzjoni finanzjarja tal-UE u tal-opportunitajiet tas-sajd; jistieden lill-Kummissjoni tagħmel użu minn din il-flessibbiltà jekk ikun meħtieġ; |
26. |
Jilqa' r-regoli l-ġodda dwar it-tariffi tas-sidien tal-bastimenti u jittama li dan it-titjib u titjib ieħor fil-protokoll, inkluża l-possibbiltà li, f'ċirkostanzi eċċezzjonali, il-bastimenti tal-UE jħottu l-art il-qabdiet tagħhom f'portijiet mhux tal-Mauritania, iwasslu għal użu aħjar tal-opportunitajiet tas-sajd disponibbli fil-futur; |
27. |
Jilqa' u jirrikonoxxi l-fatt li s-sidien tal-Unjoni ta' bastimenti tat-tkarkir mgħammra bi friża għas-sajd ta' ħut pelaġiku u ta' bastimenti għas-sajd ta' gambli li jistadu fl-ambitu tal-Protokoll, għandhom ikomplu jikkontribwixxu, bħala tariffa in natura, għall-politika ta' distribuzzjoni tal-ħut lill-persuni fil-bżonn billi jirriżervaw 2 % tal-qabdiet pelaġiċi tagħhom trasbordati jew żbarkati fi tmiem vjaġġ għal Société nationale de distribution de poisson (il-Kumpanija Nazzjonali tad-Distribuzzjoni tal-Ħut); jinnota li l-konsum lokali tal-ħut qed jiżdied fil-Mauritania; jistieden lill-Kummissjoni u lill-awtoritajiet tal-Mauritania jiżguraw li din il-kontribuzzjoni fil-fatt tilħaq il-popolazzjoni u ma tispiċċax fil-fabbriki tal-frakass tal-fdal tal-ħut; |
28. |
Jissottolinja l-impenn għall-implimentazzjoni tal-prinċipji u d-drittijiet tal-ILO għas-sajjieda kollha fuq il-bastimenti tal-UE sabiex tiġi eliminata d-diskriminazzjoni fl-impjieg u fix-xogħol; iqis li din l-implimentazzjoni għandha tiġi mmonitorjata; |
29. |
Jilqa' l-impjieg ta' sajjieda Mauritanjani kwalifikati fuq bastimenti tal-UE b'kuntratti li jikkonformaw mal-istandards tal-ILO u li jinkludu kopertura soċjali; jitlob li jsir sforz akbar biex jiġu impjegati trainees sabiex jiżdied in-numru ta' persuni kwalifikati fil-programm settorjali. |
30. |
Jistieden lill-Kummissjoni tinkludi l-SFPAs bħala element ewlieni fis-sħubija tal-UE mal-Afrika; |
31. |
Jilqa' l-proġetti ffinanzjati mill-għajnuna għall-iżvilupp tal-UE fil-Mauritania bħall-“Promopeche”, li għandha l-għan li toħloq impjiegi u tħarreġ liż-żgħażagħ fil-qasam tas-sajd artiġjanali; jistieden lill-Kummissjoni ttejjeb l-allinjament u l-konsistenza bejn l-SFPA u l-Għanijiet ta' Żvilupp Sostenibbli (SDGs) tan-NU; |
32. |
Jisħaq li s-sajd, inkluż is-sajd fuq skala żgħira, huwa settur importanti għall-ekonomija tal-Mauritania u huwa essenzjali għall-iżvilupp ekonomiku tal-pajjiż, is-sigurtà tal-ikel, in-nutrizzjoni u l-opportunitajiet ta' impjieg, b'mod partikolari għan-nisa u ż-żgħażagħ, u għall-iżgurar ta' żvilupp ekonomiku inklużiv u sostenibbli għal kulħadd; jappoġġja, għalhekk, miżuri biex tiżdied b'mod sinifikanti r-reżiljenza tal-atturi lokali, inklużi n-negozji żgħar tal-familja u l-komunitajiet kostali, għall-konsegwenzi tat-tibdil fil-klima u l-erożjoni kostali; jinsisti li l-investimenti fis-sajd iridu jkunu allinjati b'mod ċar mal-SDGs u ma jipperikolawx il-ħtiġijiet tal-komunitajiet kostali; jinsisti li l-kontribuzzjoni finanzjarja prevista fil-ftehim il-ġdid għandha titqassam b'mod li jqis ir-rwol fundamentali tal-komunitajiet kostali; |
33. |
Jitlob li jitrawwem l-iżvilupp ekonomiku lokali u reġjonali u li jissaħħu l-komunitajiet kostali li huma dipendenti mir-riżorsi tal-baħar u li għalhekk iridu jiġu integrati bis-sħiħ fil-ġestjoni taż-żoni tal-baħar u dawk kostali; ifakkar li r-restawr tal-bijodiversità tal-baħar u dik kostali jsostni l-komunitajiet kostali u jikkontribwixxi għall-mitigazzjoni tat-tibdil fil-klima u l-adattament għalih; jissottolinja l-ħtieġa għal konsultazzjoni regolari mal-komunitajiet kostali matul il-proċess ta' implimentazzjoni; |
34. |
Jirrikonoxxi li s-swieq u l-produtturi tal-UE jiddependu mill-importazzjonijiet ta' ħut mill-Mauritania, fost pajjiżi oħra, biex jiggarantixxu d-disponibbiltà tal-ikel lill-konsumaturi tal-UE; |
35. |
Jeżiġi li sforzi ulterjuri tal-UE fil-qafas ta' dan l-SFPA jridu jiffokaw fuq it-tmiem ta' sussidji tal-ħut dannużi u mhux sostenibbli fi ħdan l-Organizzazzjoni Dinjija tal-Kummerċ u korpi internazzjonali oħra, billi tingħata attenzjoni partikolari għas-sajd illegali; |
36. |
Jitlob li l-acquis legali tal-UE, inklużi s-sentenzi tal-Qorti tal-Ġustizzja tal-UE, jiġu rispettati u applikati kif xieraq fis-sajd fil-Mauritania u fiż-żona ta' madwarha; |
37. |
Jagħti istruzzjonijiet lill-President tiegħu sabiex tgħaddi din ir-riżoluzzjoni lill-Kunsill, lill-Kummissjoni, lill-gvernijiet u l-parlamenti tal-Istati Membri u lill-Gvern u l-Parlament tar-Repubblika Iżlamika tal-Mauritania. |
(2) ĠU L 439, 8.12.2021, p. 1.
(3) Testi adottati, P9_TA(2022)0228.
(4) ĠU L 343, 8.12.2006, p. 4.
(5) ĠU L 439, 8.12.2021, p. 3.
(6) Testi adottati, P9_TA(2022)0135.