Sommarju tal-Opinjoni tal-Kontrollur Ewropew għall-Protezzjoni tad-Data dwar il-Proposta għal Att dwar is-Swieq Diġitali

(It-test sħiħ ta’ din l-Opinjoni jista’ jinstab bl-Ingliż, bil-Franċiż u bil-Ġermaniż fuq is-sit web tal-EDPS www.edps.europa.eu)

(2021/C 147/04)

Fil-15 ta’ Diċembru 2020, il-Kummissjoni ppubblikat Proposta għal Regolament tal-Parlament Ewropew u tal-Kunsill dwar swieq kontestabbli u ġusti fis-settur diġitali (l-Att dwar is-Swieq Diġitali). Il-Proposta ssegwi l-Komunikazzjoni Insawru l-futur diġitali tal-Ewropa, li indikat li jistgħu jkunu meħtieġa regoli addizzjonali biex jiġu żgurati l-kontestabbiltà, il-ġustizzja u l-innovazzjoni u l-possibbiltà tad-dħul fis-suq, kif ukoll l-eżistenza ta’ interessi pubbliċi li jmorru lil hinn mill-kompetizzjoni jew mill-kunsiderazzjonijiet ekonomiċi. Il-Proposta tistabbilixxi regoli ex ante biex tiżgura li s-swieq ikkaratterizzati minn pjattaformi kbar li għandhom effetti sinifikanti tan-network (“gwardjani”), jibqgħu ġusti u kontestabbli.

B’dan il-mod, il-Proposta tistipula dispożizzjonijiet dwar id-deżinjazzjoni tal-gwardjani li tikkunsidra l-vantaġġ xprunat mid-data relatat fost oħrajn mal-aċċess tal-fornitur għad-data personali u l-ġbir tagħha; obbligi u projbizzjonijiet li l-gwardjani huma soġġetti għalihom; ir-regoli għat-twettiq tal-investigazzjonijiet tas-suq; id-dispożizzjonijiet dwar l-implimentazzjoni u l-infurzar tal-Proposta.

F’din l-Opinjoni, l-EDPS jilqa’ l-proposta, għaliex tfittex li tippromwovi swieq ġusti u miftuħa u l-ipproċessar ġust tad-data personali. Diġà fl-2014, l-EPDS indika kif il-kompetizzjoni, il-protezzjoni tal-konsumatur u l-liġi dwar il-protezzjoni tad-data huma tlett oqsma ta’ politika marbuta b’mod inseparabbli fil-kuntest tal-ekonomija tal-pjattaformi online. L-EPDS ikkunsidra li r-relazzjoni bejn dawn it-tlett oqsma għandha tkun relazzjoni ta’ kumplimentarjetà, mhux relazzjoni fejn qasam wieħed jissostitwixxi jew jidħol f’kunflitt ma’ qasam ieħor.

L-EPDS jenfasizza f’din l-Opinjoni dawk id-dispożizzjonijiet tal-Proposta li jipproduċu l-effett tal-kontestabbiltà ta’ tisħiħ reċiproku tas-suq u fl-aħħar mill-aħħar il-kontroll mill-persuna kkonċernata tad-data personali tagħha wkoll. Dan huwa l-każ, pereżempju, tal-Artikolu 5(f), li jipprojbixxi l-abbonament obbligatorju mill-utenti finali għal servizzi ewlenin tal-pjattaforma offruti mill-gwardjan; l-Artikolu 6(1)(b), li jippermettu lill-utent finali li jħassar applikazzjonijiet tas-software installati minn qabel fuq is-servizz ewlieni tal-pjattaforma; l-Artikolu 6(1)(e), li jipprojbixxi lill-gwardjan milli jillimitaw il-kapaċità tal-utenti finali li jaqilbu bejn applikazzjonijiet tas-software u servizzi differenti; u l-Artikolu 13, li jistabbilixxi l-obbligu li gwardjan jippreżenta deskrizzjoni awditjata b’mod indipendenti lill-Kummissjoni ta’ kull teknika għat-tfassil tal-profili dwar il-konsumaturi li l-gwardjan japplika għas-servizzi ewlenin tal-pjattaforma tiegħu, jew fihom.

Fl-istess ħin, l-EDPS jipprevedi rakkomandazzjonijiet speċifiċi li jgħinu biex jiġi żgurat li l-Proposta tikkumplimenta l-GDPR b’mod effettiv, billi iżżid il-protezzjoni għad-drittijiet fundamentali u l-libertajiet tal-persuni, u tevita l-kunflitti mar-regoli għall-protezzjoni tad-data attwali. F’dan ir-rigward, l-EDPS jirrakkomanda b’mod partikolari li jiġi speċifikat fl-Artikolu 5(a) tal-Proposta li l-gwardjani għandhom jipprovdu lill-utenti finali aċċessibbiltà faċli u fil-pront għall-ġestjoni tal-kunsens; li jiġi ċċarat il-kamp ta’ applikazzjoni tat-trasferibbiltà tad-data prevista fl-Artikolu 6(1)(h) tal-Proposta; u li jiġi rriformulat l-Artikolu 6(1)(i) tal-Proposta biex tiġi żgurata l-konsistenza sħiħa mal-GDPR; u titqajjem l-attenzjoni dwar il-ħtieġa għal anonimizzazzjoni effettiva u testijiet ta’ riidentifikazzjoni meta tiġi kondiviża data dwar il-klassifikazzjoni, il-klikks u l-viżjonijiet fir-rigward ta’ tiftix mingħajr ħlas u bi ħlas iġġenerati mill-utenti finali fuq il-magni tat-tiftix online tal-gwardjan.

Barra minn hekk, l-EDPS jistieden lill-koleġiżlaturi jqisu l-introduzzjoni ta’ rekwiżiti ta’ interoperabbiltà minimi għall-gwardjani u l-promozzjoni tal-iżvilupp ta’ standards tekniċi fil-livell Ewropew, f’konformità mal-leġiżlazzjoni tal-Unjoni applikabbli dwar l-istandardizzazzjoni Ewropea.

Fl-aħħar nett, billi jibni fost oħrajn fuq l-esperjenza tad-Digital Clearinghouse, l-EDPS jirrakkomanda li jiġi speċifikat taħt l-Artikolu 32(1) li l-Kumitat Konsultattiv għas-Swieq Diġitali għandu jinkludi rappreżentanti tal-EDPB, u jitlob, b’mod aktar wiesa’, kooperazzjoni istituzzjonalizzata u strutturata bejn l-awtoritajiet ta’ sorveljanza kompetenti rilevanti, inklużi l-awtoritajiet għall-protezzjoni tad-data. Din il-kooperazzjoni għandha tiżgura b’mod partikolari li l-informazzjoni rilevanti kollha tista’ tiġi skambjata mal-awtoritajiet rilevanti sabiex ikunu jistgħu jissodisfaw ir-rwol kumplimentari tagħhom, filwaqt li jaġixxu skont il-mandati istituzzjonali rispettivi tagħhom.

1.   INTRODUZZJONI U SFOND

2.   KONKLUŻJONIJIET

Fid-dawl ta’ dan imsemmi hawn fuq, l-EDPS jagħmel ir-rakkomandazzjonijiet li ġejjin:

(1)  COM(2020) 842 finali.

(2)  COM(2020) 67 final.

(3)  COM(2020) 842 final p. 1.

(4)  COM(2020) 842 final p. 2.