IL-KUMMISSJONI EWROPEA
Brussell, 24.3.2021
COM(2021) 136 final
Rakkomandazzjoni għal
DEĊIŻJONI TAL-KUNSILL
li tawtorizza lill-Kummissjoni tinnegozja l-emendi għall-Konvenzjoni dwar il-Konservazzjoni tal-Ħajja Ferjali Ewropea u tal-Abitati Naturali (il-Konvenzjoni ta’ Berna) f’isem l-Unjoni Ewropea
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
Il-Konvenzjoni dwar il-konservazzjoni tal-ħajja ferjali Ewropea u tal-abitati naturali (“il-Konvenzjoni”) għandha bħala għan il-konservazzjoni tal-fawna u tal-flora selvaġġi Ewropej u tal-ħabitats naturali tagħhom, speċjalment dawk li l-konservazzjoni tagħhom teħtieġ il-kooperazzjoni ta’ diversi Stati Membri. Din hija trattat intergovernattiv, li ġie konkluż taħt l-awspiċi tal-Kunsill tal-Ewropa. Il-Konvenzjoni daħlet fis-seħħ fl-1 ta’ Ġunju 1982.
L-Unjoni Ewropea ilha Parti Kontraenti għal din il-Konvenzjoni mill-1 ta’ Settembru 1982. Bħalissa hemm 51 Parti Kontraenti għall-Konvenzjoni, inklużi l-Istati Membri kollha tal-UE.
L-allokazzjoni ordinarja tal-Kunsill tal-Ewropa għall-Konvenzjoni ta’ Berna naqset progressivament matul is-snin sal-punt li l-funzjonijiet tal-Konvenzjoni ta’ Berna ma jistgħux jiġu żgurati mingħajr kontribuzzjonijiet volontarji mill-partijiet, iżda dawn ukoll qegħdin jonqsu. Għalhekk, huwa essenzjali li jiġi stabbilit sors affidabbli ta’ finanzjament għall-Konvenzjoni.
F’konformità mar-Riżoluzzjoni Nru 9 (2019) tad-disa’ u tletin laqgħa tal-Kumitat Permanenti, adottata fis-6 ta’ Diċembru 2019, dwar il-finanzjament tal-Konvenzjoni ta’ Berna u l-istabbiliment ta’ sistema ġdida ta’ kontribuzzjonijiet finanzjarji obbligatorji mill-Partijiet, ġie stabbilit grupp ta’ ħidma ta’ esperti intersessjonali biex jassisti lis-Segretarjat jippreżenta proposti għall-inklużjoni ta’ klawsoli finanzjarji billi jiġu emendati l-artikoli tal-Konvenzjoni ta’ Berna u biex jiġi stabbilit Ftehim Parzjali Estiż, għall-konsiderazzjoni fl-erbgħin laqgħa tal-Kumitat Permanenti.
Fuq il-bażi tar-riżultati tal-grupp ta’ ħidma ta’ esperti intersessjonali stabbilit waqt id-39 laqgħa tal-Kumitat Permanenti, l-40 Kumitat Permanenti ddiskuta żewġ proposti li jikkomplementaw lil xulxin biex tiġi indirizzata l-kwistjoni tal-finanzjament. Waqt dik il-laqgħa ġiet adottata deċiżjoni li jiġi appoġġat it-twaqqif ta’ Ftehim Parzjali Estiż. Rigward il-proposta li tiġi emendata l-Konvenzjoni ta’ Berna biex tiġi tinkludi kawsoli finanzjarji, wara stqarrija mill-Unjoni u l-Istati Membri tagħha dwar il-ħtieġa ta’ aktar diskussjoni interna qabel ma jista’ jieħu deċiżjoni, il-Kumitat Permanenti aċċetta, mingħajr ebda oġġezzjoni, li jipposponi d-deċiżjoni dwar l-emendar possibbli tal-Konvenzjoni sal-41 laqgħa tiegħu.
Kif ġie propost lill-40 Kumitat Permanenti, l-emendar tal-Konvenzjoni ikun jintroduċi mekkaniżmu biex tiġi stabbilita kontribuzzjoni obbligatorja. Iżda t-test oriġinali ma għamilx distinzjoni bejn il-baġit ewlieni u l-baġit programmatiku, barra minn hekk ma speċifikax l-iskala tal-kontribuzzjonijiet previsti. Se tiġi nnegozjata proposta riveduta għall-emendar minn grupp ta’ ħidma intersessjonali li se jaħdem tul l-2021 qabel ma tittieħed deċiżjoni fil-41 laqgħa tal-Kumitat Permanenti. F’dawn in-negozjati jenħtieġ li l-Unjoni tikkontribwixxi b’mod attiv.
•Konsistenza mad-dispożizzjonijiet eżistenti fil-qasam ta’ politika
L-introduzzjoni ta’ sistema ta’ kontribuzzjonijiet obbligatorji għal din il-Konvenzjoni tkun konsistenti mal-politika li tintuża f’oqsma oħra. Tabilħaqq, l-Unjoni hija Parti f’għadd ta’ ftehimiet ambjentali multilaterali, u fil-kuntest ta’ dawn tagħti kontribuzzjonijiet finanzjarji obbligatorji skont ir-rekwiżiti tal-ftehim u/jew skont ir-regolamenti finanzjarji adottati abbażi tad-dispożizzjonijiet fil-ftehim. Fil-kuntest ta’ dawn il-ftehimiet normalment issir distinzjoni bejn il-baġit ewlieni u l-baġit programmatiku, fejn tal-ewwel biss ikun suġġett għal kontribuzzjonijiet obbligatorji. Iżda l-emendar propost tal-Konvenzjoni ma jiċċarax jekk il-mekkaniżmu li se jiġi stabbilit huwiex se jsegwi dan il-preċedent. L-emendar propost lanqas ma jispeċifika l-iskala tal-kontribuzzjonijiet previsti. Fi ftehimiet ambjentali multilaterali oħrajn, il-kontribuzzjoni tal-Unjoni normalment tiġi ffissata għal mhux iżjed minn 2,5 % tal-kontribuzzjonijiet globali.
Għalhekk jixraq li l-Unjoni taċċerta li l-Partijiet ma jkunux obbligati jagħtu kontribuzzjonijiet għall-baġit programmatiku, u li l-kontribuzzjoni tal-Unjoni ma tistax tiġi stabbilita għal aktar minn 2,5 % tal-baġit.
Din ir-Rakkomandazzjoni taqbel kompletament mad-Deċiżjoni tal-Kunsill 2020/1830, li stabbilixxiet il-pożizzjoni tal-Unjoni għall-40 Kumitat Permanenti tal-Konvenzjoni, u tabilħaqq hija riżultat tagħha.
•Konsistenza ma’ politiki oħra tal-Unjoni
Din il-proposta hija konsistenti mal-objettivi tal-Unjoni marbutin mal-ambjent u mar-relazzjonijiet internazzjonali.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
L-Artikolu 218(3) tat-Trattat dwar il-Funzjonament tal-Unjoni Ewropea (TFUE) jipprevedi li l-Kummissjoni tippreżenta rakkomandazzjonijiet lill-Kunsill, li għandu jadotta deċiżjoni li tawtorizza l-ftuħ ta’ negozjati u tinnomina lin-negozjatur tal-Unjoni. Skont l-Artikolu 218(4) tat-TFUE, il-Kunsill jista’ jindirizza d-direttivi lin-negozjatur.
Billi n-negozjati se jkunu jikkonċernaw att li jissupplimenta jew jemenda l-qafas istituzzjonali tal-ftehim, l-Artikolu 218(9) tat-TFUE ma jistax jiġi applikat f’dan il-kuntest.
Għalhekk, il-bażi ġuridika proċedurali għad-deċiżjoni proposta hija l-Artikolu 218(3) u (4) tat-TFUE.
L-objettiv u l-kontenut ewlenin tal-att previst huma marbuta mal-ambjent.
Għaldaqstant, il-bażi ġuridika sostantiva tad-deċiżjoni proposta hija l-Artikolu 192(1) tat-TFUE.
•Sussidjarjetà (għall-kompetenza mhux esklużiva)
L-ambjent huwa kompetenza kondiviża skont l-Artikolu 192 tat-TFUE. Il-finanzjament ta’ din il-Konvenzjoni ambjentali jinvolvi l-kompetenza kondiviża tal-Unjoni u tal-Istati Membri għall-kontribuzzjonijiet rispettivi bħala Partijiet. Għalhekk, jeħtieġ li l-Unjoni tipparteċipa f’dan ir-rigward.
•Proporzjonalità
Hija meħtieġa Deċiżjoni tal-Kunsill biex l-Unjoni tipparteċipa f’dawn in-negozjati, li huma essenzjali biex tiġi stabbilita bażi finanzjarja prevedibbli għall-Konvenzjoni li hija Parti tagħha l-Unjoni.
•L-għażla tal-istrument
L-għażla tal-istrument hija stipulata fl-Artikolu 218(3) u (4) tat-TFUE.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
•Konsultazzjonijiet mal-partijiet ikkonċernati
•Ġbir u użu tal-għarfien espert
•Valutazzjoni tal-impatt
•Idoneità regolatorja u simplifikazzjoni
•Drittijiet fundamentali
4.IMPLIKAZZJONIJIET BAĠITARJI
Fil-preżent l-Unjoni tikkontribwixxi s-somma ta’ EUR 24 700 fis-sena lill-Konvenzjoni ta’ Berna, ibbażata fuq skala suġġerita ta’ kontribuzzjonijiet volontarji. X’aktarx li kontribuzzjoni obbligatorja ta’ 2,5 % tal-baġit ewlieni mhux se taqbeż dan l-ammont, għaldaqstant din l-inizjattiva ma tinvolvix implikazzjonijiet baġitarji.
5.ELEMENTI OĦRA
•Pjanijiet għall-implimentazzjoni u arranġamenti għall-monitoraġġ, l-evalwazzjoni u r-rappurtar
Jenħtieġ li minnufih wara li jiġu adottati d-direttivi tan-negozjar, dawn jiġu ppubblikati.
•Dokumenti ta’ spjegazzjoni (għad-direttivi)
•Spjegazzjoni fid-dettall tad-dispożizzjonijiet speċifiċi tal-proposta
Rakkomandazzjoni għal
DEĊIŻJONI TAL-KUNSILL
li tawtorizza lill-Kummissjoni tinnegozja l-emendi għall-Konvenzjoni dwar il-Konservazzjoni tal-Ħajja Ferjali Ewropea u tal-Abitati Naturali (il-Konvenzjoni ta’ Berna) f’isem l-Unjoni Ewropea
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 218(3) u (4) tiegħu,
Wara li kkunsidra r-rakkomandazzjoni tal-Kummissjoni Ewropea,
BILLI ġie propost li tiġi emendata l-Konvenzjoni dwar il-Konservazzjoni tal-Ħajja Ferjali Ewropea u tal-Abitati Naturali (il-Konvenzjoni ta’ Berna) biex jiddaħħlu klawsoli dwar il-finanzjament,
BILLI jeħtieġ li jiġi aċċertat li dan l-emendar ikun konsistenti mal-leġiżlazzjoni u mal-interessi tal-Unjoni, b’mod partikolari biex l-Unjoni ma tkunx obbligata tikkontribwixxi aktar minn 2,5 % tal-kontribuzzjonijiet globali.
BILLI jenħtieġ li l-Kummissjoni tkun awtorizzata tinnegozja l-emendi għall-Konvenzjoni f’isem l-Unjoni Ewropea.
ADOTTA DIN ID-DEĊIŻJONI:
Artikolu 1
(1)B’dan il-Kummissjoni hija awtorizzata tinnegozja f’isem l-Unjoni l-emendi għall-Konvenzjoni dwar il-Konservazzjoni tal-Ħajja Ferjali Ewropea u tal-Abitati Naturali (il-Konvenzjoni ta’ Berna) biex tiġi stabbilita sistema ġdida ta’ kontribuzzjonijiet finanzjarji obbligatorji mingħand il-Partijiet, fil-laqgħa tal-Kumitat Permanenti tal-Konvenzjoni u fil-laqgħat tal-grupp ta’ ħidma ta’ esperti intersessjonali rilevanti.
(2)Il-Kummissjoni għandha twettaq in-negozjati f’isem l-Unjoni b’konsultazzjoni ma’ [isem il-kumitat speċjali, li jrid jiddaħħal mill-Kunsill] u abbażi tad-direttivi tan-negozjar stabbiliti fl-Anness ta’ din id-Deċiżjoni.
(3)Safejn is-suġġett tal-emendi msemmijin fl-Artikolu 1 jaqa’ fil-kompetenza komuni tal-Unjoni u tal-Istati Membri, jenħtieġ li l-Kummissjoni u l-Istati Membri jikkooperaw mill-qrib matul il-proċess tan-negozjar, bil-ħsieb li tiġi żgurata l-unità fir-rappreżentanza internazzjonali tal-Unjoni u l-Istati Membri tagħha.
(4)Il-Kummissjoni għandha tirrapporta lill-Kunsill dwar l-eżitu tan-negozjati u, fejn xieraq, dwar kwalunkwe problema li tista’ tinqala’ waqt in-negozjati.
Artikolu 2
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President