This document is an excerpt from the EUR-Lex website
Document 52021DC0222
COMMUNICATION FROM THE COMMISSION TO THE EUROPEAN PARLIAMENT AND THE COUNCIL Assessment on the application of the United Kingdom of Great Britain and Northern Ireland to accede to the 2007 Lugano Convention
KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL Valutazzjoni tal-applikazzjoni tar-Renju Unit tal-Gran Brittanja u l-Irlanda ta' Fuq biex jaderixxi għall-Konvenzjoni ta' Lugano tal-2007
KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL Valutazzjoni tal-applikazzjoni tar-Renju Unit tal-Gran Brittanja u l-Irlanda ta' Fuq biex jaderixxi għall-Konvenzjoni ta' Lugano tal-2007
COM/2021/222 final
IL-KUMMISSJONI EWROPEA
Brussell, 4.5.2021
COM(2021) 222 final
KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL EMPTY
Valutazzjoni tal-applikazzjoni tar-Renju Unit tal-Gran Brittanja u l-Irlanda ta' Fuq biex jaderixxi għall-Konvenzjoni ta' Lugano tal-2007
1.INTRODUZZJONI
1.1 Il-Konvenzjoni ta’ Lugano
Il-Konvenzjoni tal-2007 dwar il-ġuriżdizzjoni u r-rikonoxximent u l-eżekuzzjoni ta’ sentenzi f’materji ċivili u kummerċjali (“il-Konvenzjoni ta’ Lugano”) 1 ġiet konkluża bejn l-Unjoni Ewropea, id-Danimarka għal rasha u tlieta mill-erba’ membri tal-Assoċjazzjoni Ewropea tal-Kummerċ Ħieles (l-Iżvizzera, in-Norveġja u l-Iżlanda, imsejħa “l-Istati tal-EFTA”) 2 .
Fl-Unjoni, iż-żona ta’ ġuriżdizzjoni u r-rikonoxximent u l-eżekuzzjoni ta’ sentenzi f’materji ċivili u kummerċjali hija rregolata mir-Regolament (UE) Nru 1215/2012 (ir-Regolament Brussell Ia riformulat). Il-Konvenzjoni ta’ Lugano tirrifletti l-istat preċedenti tad-dritt tal-Unjoni f’dak il-qasam (ir-Regolament tal-Kunsill (KE) Nru 44/2001).
Il-Konvenzjoni ta’ Lugano hija “konvenzjoni doppja”, li tirregola kemm il-ġuriżdizzjoni internazzjonali (jiġifieri l-kwistjoni dwar jekk qorti hijiex kompetenti biex tisma’ kawża transfruntiera) kif ukoll ir-rikonoxximent u l-eżekuzzjoni ta’ sentenzi barranin f’materji ċivili u kummerċjali.
Il-Konvenzjoni hija miftuħa għall-membri futuri tal-EFTA u għall-Istati Membri tal-UE fir-rigward ta’ ċerti territorji mhux Ewropej tagħhom. Skont l-Artikoli 70 sa 72 tal-Konvenzjoni ta’ Lugano l-adeżjoni mal-Konvenzjoni ta’ kwalunkwe Stat ieħor teħtieġ applikazzjoni għand id-Depożitarju li tiġi trażmessa lill-Partijiet Kontraenti. Il-Partijiet Kontraenti għandhom jagħmlu ħilithom sabiex jagħtu l-kunsens tagħhom mhux aktar tard minn sena wara l-istedina mingħand id-Depożitarju 3 . F’każ biss li jkun hemm qbil unanimu tal-Partijiet Kontraenti, id-Depożitarju jistieden lill-Istat jaderixxi mal-Konvenzjoni ta’ Lugano. Wara li l-istrument ta’ adeżjoni jkun ġie ddepożitat, xorta hemm perjodu biex il-Partijiet Kontraenti joġġezzjonaw. Il-Konvenzjoni tidħol fis-seħħ biss bejn l-Istat aderenti u dawk il-Partijiet Kontraenti li ma oġġezzjonawx qabel l-ewwel jum tat-tielet xahar wara d-depożitu tal-istrument tal-adeżjoni.
Il-kompetenza esterna biex tiġi konkluża l-Konvenzjoni ta’ Lugano tal-2007 u b’hekk ukoll dik li jkun hemm qbil dwar l-adeżjoni ta’ Parti ġdida u li ssir oġġezzjoni għad-dħul fis-seħħ tal-Konvenzjoni bejn l-Unjoni u Parti ġdida hija esklussivament tal-Unjoni Ewropea.
1.2 L-applikazzjoni tar-Renju Unit
Il-Konvenzjoni ta’ Lugano kienet tapplika għar-Renju Unit tal-Gran Brittanja u l-Irlanda ta’ Fuq (“ir-Renju Unit”) sal-31 ta’ Jannar 2020 permezz tas-sħubija tiegħu fl-UE. Għat-tul tal-perjodu ta’ tranżizzjoni, li ntemm fil-31 ta’ Diċembru 2020, l-UE nnotifikat lill-Partijiet l-oħra għall-Konvenzjoni ta’ Lugano li r-Renju Unit kellu jiġi ttrattat bħala Stat Membru għall-finijiet ta’ ftehimiet internazzjonali li għalihom l-Unjoni kienet Parti tagħhom, u li dan ikopri l-Konvenzjoni ta’ Lugano 4 .
Fit-8 ta’ April 2020, ir-Renju Unit applika biex jaderixxi ruħu mal-Konvenzjoni ta’ Lugano tal-2007 għal rasu. Din l-applikazzjoni ġiet ippreżentata lid-Depożitarju tal-Konvenzjoni ta’ Lugano 5 . Ir-Renju Unit ippropona li jestendi l-applikazzjoni tal-Konvenzjoni għal Ġibiltà 6 .
B’ittra tal-14 ta’ April 2020, id-Depożitarju bagħat uffiċjalment l-applikazzjoni u l-informazzjoni relatata lill-Partijiet Kontraenti ta’ Lugano, inkluża l-Unjoni Ewropea, irrappreżentata mill-Kummissjoni Ewropea.
2.ANALIŻI TAL-KUMMISSJONI
Fid-dawl tan-natura tal-Konvenzjoni ta’ Lugano (ara hawn taħt, it-Taqsima 2.1.) u l-qafas eżistenti ta’ kooperazzjoni ġudizzjarja ma’ pajjiżi terzi (ara hawn taħt, it-Taqsima 2.2.), il-Kummissjoni tqis li jenħtieġ li l-UE ma tagħtix l-kunsens tagħha għall-adeżjoni tar-Renju Unit mal-Konvenzjoni ta’ Lugano.
2.1 In-Natura tal-Konvenzjoni ta’ Lugano
Il-Konvenzjoni ta’ Lugano tirrifletti r-regoli tal-UE dwar il-ġuriżdizzjoni internazzjonali u s-sistema kważi awtomatika tagħha ta’ rikonoxximent u eżekuzzjoni ta’ sentenzi ċivili u kummerċjali 7 fil-konfront tal-Istati tal-EFTA. Għalhekk hija testendi l-benefiċċji tal-qafas tal-UE ta’ rikonoxximent u eżekuzzjoni tas-sentenzi lil dawn il-pajjiżi kif ukoll lill-Istati Membri tal-UE fir-rigward ta’ dawk il-pajjiżi. B’konsegwenza ta’ hekk, hija tiffaċilita ħafna l-aċċess għas-sentenzi ċivili tal-Istati tal-EFTA liż-żona tal-ġustizzja tal-UE f’materji ċivili u kummerċjali u viċi versa.
Il-Konvenzjoni ta’ Lugano tirrappreżenta karatteristika essenzjali ta’ żona komuni ta’ ġustizzja u hija miżura ta’ akkumpanjament għar-relazzjonijiet ekonomiċi tal-UE mal-pajjiżi tal-EFTA/ŻEE. Man-Norveġja u l-Iżlanda, dawn ir-relazzjonijiet huma bbażati fuq il-Ftehim ŻEE 8 , li jgħaqqad flimkien l-Istati Membri tal-UE u l-Istati tal-EFTA/ŻEE 9 fis-suq intern. Ir-relazzjonijiet ekonomiċi u kummerċjali tal-Iżvizzera mal-UE huma rregolati permezz ta’ sensiela ta’ ftehimiet bilaterali fejn l-Iżvizzera qablet li tieħu f’idejha ċerti aspetti tal-leġiżlazzjoni tal-UE bi skambju għall-aċċess għal parti mis-suq uniku tal-UE. Il-Partijiet Kontraenti attwali kollha jirrappreżentaw dan il-kuntest. Dawn il-pajjiżi jipparteċipaw, tal-anqas parzjalment, fis-suq intern tal-UE, li jinkludi l-moviment liberu tal-merkanzija, tas-servizzi, tal-kapital u tal-persuni.
Għalhekk, il-Konvenzjoni ta’ Lugano tappoġġa r-relazzjoni tal-UE ma’ pajjiżi terzi li għandhom integrazzjoni regolatorja partikolarment mill-qrib mal-UE, inkluż billi huma allinjati mal-acquis tal-UE (jew partijiet minnu). Għalkemm il-Konvenzjoni hija, fil-prinċipju, miftuħa għall-adeżjoni ta’ “kwalunkwe Stat ieħor” fuq stedina mid-Depożitarju bi qbil unanimu tal-Partijiet Kontraenti (ara hawn fuq), u mhijiex il-qafas ġenerali xieraq għall-kooperazzjoni ġudizzjarja ma’ kwalunkwe pajjiż terz partikolari. Hija mhijiex maħsuba għall-pajjiżi terzi kollha, kif jidher mill-fatt li mill-1988 (meta ġiet miftiehma l-ewwel Konvenzjoni ta’ Lugano), il-Polonja biss ingħaqdet mal-Konvenzjoni bħala pajjiż terz, iżda ngħaqdet mal-Konvenzjoni fi triqtha lejn l-adeżjoni mal-UE. Ma hemm l-ebda pajjiż terz għajr il-pajjiżi tal-EFTA/ŻEE li huma Parti fil-Konvenzjoni. Ir-Renju Unit ilu, mill-1 ta’ Jannar 2021, pajjiż terz bi Ftehim ta’ Kummerċ Ħieles “ordinarju” li jiffaċilita l-kummerċ iżda li ma jinkludi l-ebda libertà u politika fundamentali tas-suq intern. Il-Konvenzjoni hija bbażata fuq livell għoli ta’ fiduċja reċiproka fost il-Partijiet Kontraenti u tirrappreżenta karatteristika essenzjali ta’ żona komuni ta’ ġustizzja proporzjonata għall-grad għoli ta’ interkonnessjoni ekonomika bbażata fuq l-applikabbiltà tal-erba’ libertajiet.
2.2 Qafas internazzjonali għall-kooperazzjoni tal-ġustizzja ċivili tal-UE ma’ pajjiżi terzi
L-approċċ fit-tul tal-UE huwa li l-qafas xieraq għall-kooperazzjoni ma’ pajjiżi terzi fil-qasam tal-kooperazzjoni ġudizzjarja ċivili huwa pprovdut mill-Konvenzjonijiet multilaterali tal-Aja, jiġifieri l-Konvenzjoni tal-Aja tal-2005 dwar l-Għażla tal-Forum 10 u l-Konvenzjoni tal-Aja tal-2019 dwar is-Sentenzi 11 . L-UE kkonkludiet il-Konvenzjoni tal-2005 dwar l-Għażla tal-Forum fl-2014 12 . Il-Konvenzjoni tal-Aja tal-2005 dwar l-Għażla tal-Forum hija wkoll “konvenzjoni doppja”, iżda tapplika biss meta l-partijiet ikunu għamlu għażla kuntrattwali esklużiva tal-qorti f’materji ċivili u kummerċjali. Il-Konvenzjoni tal-Aja tal-2019 dwar is-Sentenzi hija konvenzjoni sempliċi li tirregola biss ir-rikonoxximent u l-eżekuzzjoni. Ma tirregolax il-ġuriżdizzjoni diretta tal-qrati.
B’mod konsistenti ma’ dan l-approċċ, id-Dikjarazzjoni Politika dwar il-qafas għar-relazzjoni futura bejn l-Unjoni Ewropea u r-Renju Unit tas-17 ta’ Ottubru 2019 tirreferi għall-qafas tal-Konvenzjonijiet tal-Aja 13 ; l-għażla li r-Renju Unit jaderixxi mal-Konvenzjoni ta’ Lugano la tissemma fid-Dikjarazzjoni Politika, u lanqas f’xi dokument konġunt ieħor bejn l-UE u r-Renju Unit ieħor dwar il-qafas tar-relazzjoni futura. Lanqas ma huwa msemmi fil-Ftehim ta’ Kummerċ u Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa, u r-Renju Unit min-naħa l-oħra, li ġie maqbul fl-24 ta’ Diċembru 2020 u li ilu jiġi applikat b’mod proviżorju mill-1 ta’ Jannar 2021 14 .
Qabel tmiem il-perjodu ta’ tranżizzjoni, il-Konvenzjoni tal-Aja tal-2005 dwar l-Għażla tal-Forum kienet tapplika fir-Renju Unit, abbażi tas-sħubija tiegħu fl-UE u, wara, abbażi tal-perjodu ta’ tranżizzjoni previst fil-Ftehim dwar il-Ħruġ. Mill-1 ta’ Jannar 2021, ir-Renju Unit huwa parti ta’ din il-Konvenzjoni
15
għal rasu
16
. Għalhekk, din il-Konvenzjoni tkopri r-relazzjonijiet bejn l-UE u r-Renju Unit fil-kamp ta’ applikazzjoni tagħha. Il-Kummissjoni qed tippjana li fil-futur qrib tipproponi l-konklużjoni mill-UE tal-Konvenzjoni tal-Aja tal-2019 dwar is-Sentenzi. F’każ li r-Renju Unit jikkonkludi dik il-Konvenzjoni, din tkun tapplika għall-kooperazzjoni ġudizzjarja futura mal-UE.
3.KONKLUŻJONI
Fid-dawl ta’ li ntqal fuq, il-Kummissjoni hija tal-fehma li jenħtieġ li l-Unjoni Ewropea ma tagħtix il-kunsens tagħha għall-adeżjoni tar-Renju Unit mal-Konvenzjoni ta’ Lugano tal-2007. Għall-Unjoni Ewropea, il-Konvenzjoni ta’ Lugano hija miżura ta’ akkumpanjament tas-suq intern u hija relatata mal-kuntest UE-EFTA/ŻEE. Fir-rigward tal-pajjiżi terzi l-oħrajn kollha, il-politika konsistenti tal-Unjoni Ewropea hija li tippromwovi l-kooperazzjoni fil-qafas tal-Konvenzjonijiet multilaterali tal-Aja. Ir-Renju Unit huwa pajjiż terz mingħajr rabta speċjali mas-suq intern. Għalhekk, ma hemm l-ebda raġuni biex l-Unjoni Ewropea titlaq l-approċċ ġenerali tagħha fir-rigward tar-Renju Unit. Għaldaqstant, jenħtieġ li l-Konvenzjonijiet tal-Aja jipprovdu l-qafas għall-kooperazzjoni futura bejn l-Unjoni Ewropea u r-Renju Unit fil-qasam tal-kooperazzjoni ġudizzjarja ċivili.
Il-partijiet ikkonċernati, u b’mod partikolari jenħtieġ li l-prattikanti involuti f’materji kuntrattwali transfruntieri li jinvolvu l-Unjoni Ewropea jżommu dan f’moħħhom meta jagħmlu għażla ta’ ġuriżdizzjoni internazzjonali 17 .
B’din il-komunikazzjoni, il-Kummissjoni tinforma lill-Parlament Ewropew u lill-Kunsill bil-valutazzjoni tagħha u tagħtihom l-opportunità li jesprimu fehmiethom, qabel ma tinforma lid-Depożitarju ta’ Lugano b’dan.
