Fl-Unjoni, it-tassazzjoni fuq il-prodotti tal-enerġija u fuq l-elettriku hija regolata bid-Direttiva tal-Kunsill 2003/96/KE tas-27 ta’ Ottubru 2003 li tirriforma l-istruttura tal-Komunità dwar tassazzjoni fuq prodotti ta’ enerġija u elettriku (“id-Direttiva dwar it-Tassazzjoni fuq l-Enerġija” jew “id-Direttiva”).
Skont l-Artikolu 19(1) tad-Direttiva, flimkien mad-dispożizzjonijiet stabbiliti b’mod partikolari fl-Artikoli 5, 15 u 17 tagħha, il-Kunsill, filwaqt li jaġixxi b’mod unanimu fuq proposta tal-Kummissjoni, jista’ jawtorizza li kwalunkwe Stat Membru jintroduċi aktar eżenzjonijiet jew tnaqqis fil-livell ta’ tassazzjoni għal kunsiderazzjonijiet politiċi speċifiċi.
Bis-saħħa tad-Deċiżjoni ta’ Implimentazzjoni tal-Kunsill 2014/722/UE tal-14 ta’ Ottubru 2014 (preċeduta mid-Deċiżjoni ta’ Implimentazzjoni tal-Kunsill 2011/445/UE tat-12 ta’ Lulju 2011), il-Ġermanja diġà ġiet awtorizzata tapplika rata mnaqqsa ta’ tassazzjoni fuq l-elettriku għal elettriku pprovdut direttament lill-bastimenti, minbarra dgħajjes għall-użu privat jew għad-divertiment, irmiġġati fil-portijiet (“elettriku mill-art”).
L-objettiv ta’ din il-proposta huwa li testendi dik l-awtorizzazzjoni kif mitlub mill-Ġermanja, minħabba li d-deroga attwali tiskadi fis-16 ta’ Lulju 2020.
Permezz ta’ ittra datata d-29 ta’ Jannar 2020, l-awtoritajiet Ġermaniżi infurmaw lill-Kummissjoni bl-intenzjoni tagħhom li jtawlu l-miżura attwali sal-31 ta’ Diċembru 2025. Informazzjoni addizzjonali ġiet ipprovduta permezz ta’ ittra datata t-30 ta’ April 2020.
Il-Ġermanja qed tfittex li ġġedded l-awtorizzazzjoni biex tapplika rata ta’ taxxa mnaqqsa ta’ EUR 0,50/MWh, ugwali għar-rata minima ta’ tassazzjoni fuq l-elettriku għal użu kummerċjali kif stabbilit fid-Direttiva, għall-provvista tal-elettriku mill-art lil bastimenti li joperaw esklussivament għal skopijiet kummerċjali fil-baħar u fl-ilmijiet interni tal-Unjoni (inkluż is-sajd).
Il-perjodu ta’ validità mitlub huwa mis-17 ta’ Lulju 2020 sal-31 ta’ Diċembru 2025, u dan huwa f’kontinwità mad-deroga attwali u fi ħdan il-perjodu massimu permess mill-Artikolu 19 tad-Direttiva dwar it-Tassazzjoni fuq l-Enerġija.
Dan it-tnaqqis huwa intiż biex jagħti inċentiv ekonomiku għat-tħaddim u l-użu tal-elettriku mill-art sabiex jonqos it-tniġġis tal-arja fl-ibliet portwali, titjieb il-kwalità tal-arja lokali u jitnaqqas l-istorbju għall-benefiċċju tas-saħħa tal-abitanti.
L-objettiv tal-miżura li għandha tiġi applikata mill-Ġermanja huwa wkoll li jitnaqqas l-impatt ambjentali tat-trasport fuq l-ilma.
Bil-miżura mitluba, il-Ġermanja tixtieq iżżomm inċentiv għall-użu tal-elettriku mill-art li huwa meqjus bħala alternattiva li tniġġes inqas meta mqabbla mal-ġenerazzjoni tal-elettriku abbord il-bastimenti rmiġġati f’port. Kif indikat fit-talba, fil-Ġermanja, ir-rata standard ta’ taxxa fuq l-elettriku hija ta’ EUR 20,50/MWh. Il-benefiċċju ta’ taxxa attwalment huwa ta’ EUR 20,00/MWh. Dan ifisser li l-benefiċjarji jintalbu jħallsu r-rata minima tat-taxxa applikabbli tal-UE għall-elettriku skont id-Direttiva dwar it-Tassazzjoni fuq l-Enerġija ta’ EUR 0,50/MWh (kif speċifikat fl-Artikolu 10(1) u t-Tabella C tal-Anness I tad-Direttiva, għall-użu kummerċjali). Il-Ġermanja tippermetti li l-benefiċċju fuq it-taxxa jiġi pprovdut kemm bħala rata tat-taxxa mnaqqsa imposta mal-provvista (huwa meħtieġ permess) kif ukoll bħala rifużjoni tat-taxxa.
Min-naħa l-oħra, skont l-Artikolu 14(1)(c) tad-Direttiva dwar it-Tassazzjoni fuq l-Enerġija, l-Istati Membri għandhom jeżentaw il-prodotti tal-enerġija użati għall-produzzjoni tal-elettriku abbord il-bastimenti rmiġġati fil-portijiet. Jistgħu jagħmlu dan ukoll fil-każ ta’ elettriku prodott abbord bastimenti għan-navigazzjoni fuq passaġġi fuq l-ilma interni skont l-Artikolu 15(1)(f) tad-Direttiva. Il-Ġermanja kkonfermat it-traspożizzjoni ta’ din l-aħħar eżenzjoni fakultattiva.
L-awtoritajiet Ġermaniżi indikaw li t-tnaqqis fit-taxxa japplika għall-bastimenti kollha minbarra d-dgħajjes għall-użu privat jew għad-divertiment, jiġifieri li l-bastimenti kollha involuti fin-navigazzjoni kummerċjali, irrispettivament mid-daqs jew mill-bandiera li jtajru, se jibbenefikaw mit-tnaqqis fit-taxxa. Madankollu, m’hemm l-ebda obbligu għall-bastimenti li jużaw l-elettriku mill-art.
Kif indikat fit-talba, mid-dħul fis-seħħ tal-iskema fl-2011, in-numru ta’ benefiċjarji żdied b’mod sostanzjali; fis-settur tal-passaġġi fuq l-ilma interni, kważi l-bastimenti kollha huma kapaċi jixtru l-elettriku mill-art; bħalissa hemm ftit biss installazzjonijiet fis-settur marittimu, li mhumiex maħsuba għal mezzi ta’ trasport bejn il-gżejjer. Barra minn hekk, skont id-data disponibbli, fl-ilmijiet interni, hemm 454 faċilità operattiva, 385 faċilità ppjanata u l-potenzjal għal 115 faċilità oħra. Fil-portijiet marittimi, hemm 240 faċilità operattiva (li minnhom 237 huma għal servizzi ta’ trasport bejn gżejjer), 30 faċilitajiet ippjanati (prinċipalment għal bastimenti tal-kruċiera u bastimenti tal-kontejners) u l-potenzjal għal 32 faċilità oħra.
Bħala stima tan-nefqa tat-taxxa mill-miżura, l-awtoritajiet Ġermaniżi kkalkulaw it-telf tad-dħul mit-taxxa bbażat fuq l-ammont ta’ elettriku kkonsmat għall-benefiċċju u l-ammont tal-vantaġġ. Il-ħelsien mit-taxxa attwalment jammonta għal EUR 20,00/MWh (ir-rata standard tat-taxxa, kif imsemmi qabel, hija EUR 20,50/MWh). Fl-2019, 79 302 MWh ta’ elettriku ttieħdu mill-elettriku mill-art fil-portijiet. Meta jitqies il-ħelsien mit-taxxa, dan jirriżulta f’telf ta’ dħul mit-taxxa għall-2019 li jammonta għal EUR 1 586 miljun. Jekk wieħed jassumi li fil-futur se jkun hemm użu akbar tal-elettriku mill-art minħabba l-miżuri ta’ appoġġ, huwa stmat li fis-snin li ġejjin se jkun hemm telf ta’ EUR 2 miljun fis-sena.
Il-Ġermanja talbet li l-awtorizzazzjoni tingħata sal-31 ta’ Diċembru 2025, li tibda mis-17 ta’ Lulju 2020, mingħajr interruzzjoni bid-deroga attwali u fi ħdan il-perjodu massimu indikat fl-Artikolu 19(2) tad-Direttiva.
Bit-tnaqqis fit-taxxa, il-Ġermanja tixtieq tagħti inċentiv lill-operaturi tal-bastimenti biex jużaw l-elettriku mill-art sabiex jitnaqqsu l-emissjonijiet u l-ħsejjes fl-ajru mill-kombustjoni tal-fjuwils minn bastimenti rmiġġati u emissjonijiet tas-CO2. L-applikazzjoni ta’ rata ta’ taxxa mnaqqsa għandha ssaħħaħ il-kompetittività tal-elettriku mill-art meta mqabbla mal-konsum ta’ fjuwils tal-bastimenti abbord, li huwa eżentat mit-taxxa.