Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 52020IR4163

Opinjoni tal-Kumitat Ewropew tar-Reġjuni — Approċċ ġdid tal-istrateġija marittima għall-Atlantiku — Pjan ta’ azzjoni għall-Atlantiku 2.0 — Pjan ta’ azzjoni għal ekonomija blu sostenibbli, reżiljenti u kompetittiva fiż-żona tal-Atlantiku tal-Unjoni Ewropea

COR 2020/04163

ĠU C 175, 7.5.2021, p. 1–5 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Date of document:
19/03/2021; Data tal-votazzjoni
Date of vote:
19/03/2021
Date lodged:
08/09/2020
Author:
Il-Kumitat Ewropew tar-Reġjuni, Kummissjoni għar-Riżorsi Naturali
Responsible body:
Commission for Natural Resources, COR_NAT
Form:
Opinjoni fuq inizjattiva proprja
Term of office:
VII (2020-2025)
Internal reference:
NAT-VII/012
Session:
143
Treaty:
Trattat dwar il-Funzjonament tal-Unjoni Ewropea
Legal basis:
Link
Link
Link
Select all documents mentioning this document
Earlier related instruments:
Instruments cited:
Link

7.5.2021   

MT

Il-Ġurnal Uffiċjali tal-Unjoni Ewropea

C 175/1

Opinjoni tal-Kumitat Ewropew tar-Reġjuni — Approċċ ġdid tal-istrateġija marittima għall-Atlantiku — Pjan ta’ azzjoni għall-Atlantiku 2.0

Pjan ta’ azzjoni għal ekonomija blu sostenibbli, reżiljenti u kompetittiva fiż-żona tal-Atlantiku tal-Unjoni Ewropea

(2021/C 175/01)

Relatur:

Paula FERNÁNDEZ VIAÑA (ES/Renew Europe), Ministru tal-Presidenza, l-Intern, il-Ġustizzja u l-Azzjoni Esterna, il-Gvern tal-Cantabria

RAKKOMANDAZZJONIJIET TA’ POLITIKA

IL-KUMITAT EWROPEW TAR-REĠJUNI

Il-pilastri u l-għanijiet tal-Pjan ta' azzjoni għall-Atlantiku

1.

 ifakkar li r-reġjuni tal-Atlantiku jiffaċċjaw kriżi ekonomika doppja. Il-konsegwenzi li għadhom mhux ikkwantifikati tal-Brexit se jiżdiedu fil-qasam tas-sajd, it-turiżmu, il-kummerċ u t-trasport, b’żieda mal-konsegwenzi tal-COVID-19. It-tnaqqis drastiku li qed niffaċċjaw fil-mobbiltà qed iħalli impatt partikolari fuq l-infrastrutturi, il-konnessjonijiet marittimi, il-ktajjen loġistiċi u l-attività turistika;

2.

 jitlob għalhekk miżuri ta' mitigazzjoni mfassla b'mod speċifiku fir-reġjuni kostali u marittimi tal-Atlantiku u li jitqiesu r-riżultati tan-negozjati dwar il-Brexit u l-impatt possibbli tiegħu fuq il-futur tal-istrateġija marittima u l-pjan ta' azzjoni tar-reġjun tal-Atlantiku. F'dan is-sens, jesprimi t-tħassib tiegħu dwar il-konsegwenzi possibbli tal-ħruġ tar-Renju Unit għall-politika komuni tas-sajd (PKS);

3.

 jenfasizza r-rwol tal-Atlantiku per se fil-mitigazzjoni u l-ġestjoni tat-tibdil fil-klima u l-ħtieġa li jiġi osservat, investigat u mifhum aħjar il-funzjonament tal-ekosistema oċeanika, kif ukoll ta’ kollaborazzjoni fir-riċerka;

4.

 jinnota li l-għanijiet u l-azzjonijiet tal-erba' pilastri huma ta' natura trasversali, u li l-kisba tagħhom tiddependi fuq il-kooperazzjoni tajba bejn id-diversi servizzi tal-Kummissjoni, l-awtoritajiet nazzjonali ta' ġestjoni u l-koordinaturi tal-proġetti. Madankollu jwissi li l-pilastri attwali, għalkemm adegwati, għandhom jiġu definiti mill-ġdid minħabba li r-reviżjoni tal-politki settorjali Ewropej urew li mhumiex biżżejjed, u li jeħtieġu eżerċizzju adegwat li jikkoordinahom mal-istrateġija għall-Atlantiku;

5.

 jiddispjaċih li attivitajiet importanti ħafna fil-qasam tal-ekonomija blu huma esklużi mill-Pjan ta' azzjoni għall-Atlantiku (PAA), bħall-industriji tal-kostruzzjoni u tat-trasport navali u bil-baħar, l-isport nawtiku, is-servizzi tiegħu u l-industrija awżiljarja kif ukoll l-attivitajiet turistiċi sostenibbli relatati mal-ambjent tal-baħar, inklużi l-attivitajiet sportivi akkwatiċi, it-turiżmu tal-kruċieri u l-laneċ u li la s-sajd u lanqas is-sajd tal-miexi jew l-akkwakultura ma jingħataw l-ispazju tagħhom fil-PAA;

6.

 jitlob għalhekk li l-provvista tal-ikel li joriġina mill-baħar tiġi inkluża bħala pilastru fil-PAA, peress li hija prijorità tal-Patt Ekoloġiku Ewropew; Barra minn hekk, għandhom jiġu inklużi wkoll l-iżvilupp tal-ekosistemi tal-baħar u l-potenzjal tagħhom għal żieda fis-sekwestru tal-karbonju;

7.

 jikkunsidra, fir-rigward tal-pilastri I u III, relatati ma' setturi possibbli ta' attività fl-ekonomija blu (portijiet u enerġiji rinnovabbli), li l-fatt li dawn is-setturi jitqiesu biss bħala pilastri tal-PAA jillimita l-ambitu tiegħu billi ma jippermettix li jiġu inklużi oqsma oħra ta’ azzjoni, kemm dawk fis-seħħ kif ukoll emerġenti, li huma ta' rilevanza speċjali fir-reġjuni tal-Atlantiku;

8.

 jissuġġerixxi għalhekk li dawn iż-żewġ pilastri jinġiebu flimkien f'pilastru wieħed li jista' jissejjaħ “Attivitajiet ta' ekonomija blu bħala mutur għal żvilupp sostenibbli taż-żoni kostali” u li jiġu żviluppati ħames għanijiet fi ħdanu: Portijiet bħala katalisti tal-ekosistema reġjonali ta' ekonomija blu; Portijiet bħala ċentri ta' innovazzjoni biex jinkorporaw soluzzjonijiet teknoloġiċi ġodda; Titjib u adattament ta' attivitajiet ta' setturi maturi (sajd, trasport u loġistika marittima, eċċ.) għall-Għanijiet ta' Żvilupp Sostenibbli; Promozzjoni ta' attivitajiet ta' setturi emerġenti ta' tkabbir blu, u b'mod partikolari, tal-enerġiji rinnovabbli tal-baħar; Diġitilizzazzjoni tal-attivitajiet tal-ekonomija blu;

9.

 ifakkar li l-konnettività tal-portijiet u maż-żoni ta' influwenza tagħhom hija qasam ewlieni ieħor u jilqa' bi pjaċir l-inklużjoni ta' pilastru ddedikat għall-portijiet tal-Atlantiku fi ħdan il-PAA. Huwa essenzjali li jitneħħew il-punti ta' konġestjoni tal-ferroviji u fit-toroq ta’ konnessjoni (ċirkwit lokali), kemm jekk ikkawżati minn problemi ta' kapaċità jew minn tagħbija massima. Ir-referenza għar-rwol tal-portijiet bħala portali għall-kummerċ fl-Atlantiku u bħala katalisti għan-negozju hija utli, iżda l-importanza ewlenija tagħhom rigward il-ġenerazzjoni tal-ġid u l-impjiegi fiż-żona ta' influwenza tagħhom ma titqiesx;

10.

 huwa favur it-twessigħ tal-ambitu tal-Awtostradi tal-Baħar fl-Atlantiku, li jippermetti konnessjonijiet ġodda bejn il-portijiet tan-network globali tat-TEN-T, u jiddefendi li l-kriterji għall-inklużjoni fit-TEN-T tal-portijiet Ewropej b'mod ġenerali u tal-Atlantiku b'mod partikolari għandhom ikunu bbażati fuq l-importanza strateġika tagħhom għall-UE u t-territorji tagħha. Jenfasizza, f'dan ir-rigward, il-valur strateġiku li għandhom l-awtostradi tal-baħar biex jgħaqqdu l-Irlanda mal-kontinent fil-kuntest ta' wara l-Brexit;

11.

 jitlob li dawk il-portijiet tal-Atlantiku strateġikament importanti fl-istrutturar tas-sistema Ewropea tat-trasport, li attwalment jinsabu barra n-network ewlieni tat-TEN-T, jiġu inklużi fiha. Min-naħa l-oħra, jitlob li jiġu ffinanzjati azzjonijiet li jippermettu l-iżvilupp ta' Awtostradi tal-Baħar u t-titjib tas-servizzi tat-trasport tal-baħar fuq distanza qasira bħas-servizzi tat-trasport li huma sostenibbli u li jintegraw it-territorju. Dawn l-investimenti għandhom jitwettqu kemm fil-qasam portwarju kif ukoll fil-konnessjoni fuq l-art, kemm fir-rigward tat-toroq ta’ konnessjoni (ċirkwit lokali) kif ukoll, b'mod partikolari, fil-modernizzazzjoni u t-titjib tal-linji ferrovjarji li huma fundamentali għall-ġenerazzjoni ta' network ta' trasport sostenibbli u għall-koeżjoni tat-territorji periferali;

12.

 jappoġġja l-iżvilupp tal-Awtostrada Ferrovjarja tal-Atlantiku u l-konnessjonijiet ferrovjarji u tat-toroq prinċipali ta’ konnessjoni (ċirkwit lokali), kemm bejn l-infrastrutturi eżistenti kif ukoll bejn il-kurituri tat-TEN-T u linji oħra fiż-Żona tal-Atlantiku;

13.

 ifaħħar il-fatt li wieħed mill-pilastri tal-PAA l-ġdid huwa relatat mal-enerġija rinnovabbli tal-baħar li fiha r-reġjuni tal-Atlantiku għandhom potenzjal enormi u esperjenza ta' xogħol; iżda, min-naħa l-oħra, jiddispjaċih li, peress li l-iżvilupp tal-enerġiji rinnovabbli tal-baħar fil-modalitajiet differenti tagħhom huwa prijorità għar-reġjuni tal-Atlantiku, twaqqfu investimenti ewlenin għall-iżvilupp tagħhom fil-kuntest tal-kriżi attwali;

14.

 jikkunsidra li l-Istrateġija għall-Atlantiku għandha tagħti spinta lil proġetti ta' enerġija rinnovabbli tal-baħar f'sens wiesa', inkluż l-inċentiv ta' katina ta' valur kompetittiva u l-wirja u l-validazzjoni ta' teknoloġiji emerġenti ġodda li jikkontribwixxu għall-ippjanar u l-koordinazzjoni ta' parks ta' ġenerazzjoni futuri;

15.

 jipproponi li, peress li hemm diversi studji dwar ir-riżorsa tal-mewġ, il-kurrenti u r-riħ fiż-żona tal-Atlantiku, dawn għadhom jiġu integrati f'mappa ta' riżorsi potenzjali u li fil-Pilastru III, hemm bżonn li titqies il-kompatibbiltà tal-attività tal-produzzjoni tal-enerġija rinnovabbli minn sorsi tal-baħar jew minn żoni ta' attivitajiet pre-eżistenti, bħas-sajd, is-sajd tal-frott tal-baħar jew l-akkwakultura, kif ukoll jitqiesu l-ekosistemi tal-baħar u l-bijodiversità;

16.

 jiddenunzja li l-ebda wieħed mill-pilastri ma jirreferi għall-qasam turistiku u għall-wirt kulturali, simbolu taż-żona tal-Atlantiku Ewropea minħabba l-mod li jikkontribwixxu għall-iżvilupp tal-immaġini tal-kontinent Ewropew.

Kompetenzi għall-promozzjoni tat-tkabbir blu fil-livell tal-Unjoni Ewropea u l-programmi ta' fondi

17.

 jikkunsidra li huwa meħtieġ li jiġi żviluppat strument ekonomiku u baġitarju speċifiku għall-Istrateġija għall-Atlantiku li jwassal għall-implimentazzjoni tagħha u l-iżvilupp tal-azzjonijiet marbuta tagħha b'mod aktar attraenti. L-integrazzjoni tal-għanijiet tal-Istrateġija u l-PAA fil-Qafas Finanzjarju Pluriennali (QFP) hija relevanti speċjalment minħabba d-deċiżjoni tar-Renju Unit li joħroġ mill-Unjoni Ewropea;

18.

 itenni li l-politika ta' koeżjoni, permezz tal-FEŻR u l-FSE, kienet l-aktar għodda ta' investiment importanti tal-UE fl-aħħar perjodu ta' programmazzjoni. L-użu sħiħ tal-politika ta' koeżjoni, flimkien mal-opportunitajiet ta' finanzjament disponibbli permezz tal-FEMSA u l-FAEŻR, se jkun essenzjali għas-suċċess futur tal-proġetti fil-qafas tal-Istrateġija għall-Atlantiku. Is-semplifikazzjoni tal-Fondi SIE se tgħin biex tingħata spinta lid-disponibbiltà tal-finanzjament għall-proġetti lokali;

19.

 ifakkar li l-kalendarju tal-PAA huwa mfassal biex jispira lill-awtoritajiet ta' ġestjoni tal-Istati Membri tal-UE u lir-reġjuni kostali meta jkunu qed ifasslu l-ftehimiet ta' sħubija u l-programmi għall-perjodu 2021-2027 u li ħafna mill-azzjonijiet li jinsabu f'dawn il-programmi relatati mal-PAA se jikkontribwixxu għall-kisba tal-għanijiet klimatiċi tal-UE. Għalhekk, jinnota d-dewmien li diġà jeżisti bħala konsegwenza tal-pandemija tal-COVID-19 u jenfasizza l-ħtieġa li l-Fondi Strutturali u ta' Investiment Ewropej u l-programmi operattivi nazzjonali jkunu disponibbli u operattivi fil-bidu tal-perjodu ta' programmazzjoni bejn l-2021 u l-2027;

20.

 jindika li l-implimentazzjoni tal-PAA tiddependi, fil-biċċa l-kbira, fuq l-investimenti magħmula b'finanzjament pubbliku u b'fondi privati. Barra minn hekk, il-proġetti emblematiċi li joħorġu mill-Istrateġija għall-Atlantiku għandhom jiġu akkomodati b’mod aħjar fil-programmi tal-UE;

21.

 fid-dawl tan-numru dejjem akbar ta' strumenti finanzjarji disponibbli, jistieden lill-Kummissjoni Ewropea biex torganizza, possibbilment flimkien mal-Kumitat Ewropew tar-Reġjuni, kampanji ta' informazzjoni għall-awtoritajiet lokali u reġjonali dwar l-aħjar prattiki għall-aċċess u l-użu ta' dawk l-istrumenti finanzjarji.

L-ekonomija blu u l-importanza tad-data għall-iżvilupp metodoloġiku tagħha fil-livell lokali u reġjonali

22.

 jinnota li l-impatt tal-ekonomija blu fil-livell reġjonali u lokali għadu ma ġiex evalwat kollu, peress li trid tiġi żviluppata sistema ta' indikaturi appoġġjati minn data affidabbli biex tkejjel l-impatt preċiż tal-attivitajiet li jiddependu direttament jew indirettament mill-baħar;

23.

 jiddikjara li, fil-qasam tal-ekonomija blu, minbarra l-attivitajiet imsemmija qabel, hemm esperjenza kbira f'żoni oħra b'attività bħall-kostruzzjoni u t-trasport navali, il-ġenerazzjoni ta' strutturi għall-produzzjoni tal-enerġija tal-baħar jew l-iżvilupp ta' bijokomponenti minn elementi naturali tal-baħar;

24.

 jirrakkomanda l-adozzjoni ta' strateġiji reġjonali ta' speċjalizzazzjoni għall-iżvilupp metodoloġiku tal-ekonomija blu fil-livell lokali u reġjonali, minħabba l-kumplessità u l-kwantità konsiderevoli ta' riżorsi eżistenti, sabiex jgħinu fl-identifikazzjoni tal-azzjonijiet l-aktar xierqa;

25.

 jipproponi li l-Kumitat Ewropew tar-Reġjuni jiġbor Inventarju bl-attivitajiet tal-ekonomija blu f'kull wieħed mir-reġjuni u t-territorji tiegħu, u b'hekk ifassal mappa reali tal-iżvilupp tal-ekonomija blu fl-Unjoni Ewropea, li tiġi aġġornata perjodikament fil-qasam tal-Kummissjoni NAT mill-aġenti speċifiċi ta' kull reġjun, sabiex tkun taf il-prattiki tajbin ta' suċċess f'dan il-qasam

Il-governanza b'diversi livelli fl-Atlantiku

26.

 jappoġġja l-istruttura ta' governanza u l-qafas ta' monitoraġġ ġdid u jipproponi l-integrazzjoni ta' pjani direzzjonali jew stadji importanti speċifiċi f'kull għan, sabiex tingħata aktar speċifiċità lill-azzjonijiet indikati;

27.

 jikkunsidra xieraq li jiġu rikonoxxuti l-importanza u l-appoġġ mogħti biex jiġi applikat l-approċċ LEADER għall-iżvilupp tal-Istrateġija għall-Atlantiku, permezz tal-Istrateġiji ta' Żvilupp Lokali mmexxija mill-Komunità marbuta mal-Gruppi ta' Azzjoni Lokali tas-Sajd, strument speċifiku marbut mal-kosta u l-atturi ekonomiċi u soċjali tagħha, fejn hemm esperjenza u għarfien;

28.

 jiddefendi bis-sħiħ governanza effettiva b'diversi livelli, filwaqt li jirrispetta l-qafas istituzzjonali ta' kull Stat Membru, u jemmen li l-istrateġija marittima mġedda għandha tippermetti l-parteċipazzjoni attiva tar-reġjuni fil-governanza tal-Atlantiku;

29.

 jisħaq dwar il-ħtieġa li jiġu allinjati l-aġendi u l-għanijiet tal-proċessi u l-politiki multipli tal-UE, peress li, ta' spiss, dak li m'għadux prijorità fuq aġenda li tispiċċa f'ċerta data jsir prijorità fuq l-aġenda ta' proċess ieħor b'data ta' finalizzazzjoni differenti. Din il-problema ta' governanza tirrifletti l-eżistenza ta' struttura frammentata u n-nuqqas ta' koordinazzjoni adegwata u informazzjoni korretta u aġġornata.

Kooperazzjoni fl-Atlantiku

30.

 jirrimarka li l-kisba tal-għanijiet u l-azzjonijiet tal-erba' pilastri tal-PAA proposti mill-Kummissjoni Ewropea, għalkemm meqjusa insuffiċjenti, se jkollhom effetti pożittivi u se jkunu ta' benefiċċju għar-reġjuni mhux tal-Atlantiku, u jirrakkomanda bil-qawwa l-iżvilupp ta' kooperazzjoni estiża ma' dawk ir-reġjuni;

31.

 jitlob li l-kooperazzjoni transfruntiera lil hinn mil-limiti marittimi u fit-territorji tissaħħaħ bl-iżvilupp ta' sejħiet aktar sempliċi għal proġetti transfruntiera, bit-tisħiħ tal-programmi Interreg u għodod baġitarji oħra;

32.

 ifakkar li l-programmi ta' kooperazzjoni territorjali li fihom jipparteċipaw ir-reġjuni taż-żona tal-Atlantiku kkontribwixxew u se jikkontribwixxu b'mod intelliġenti għall-implimentazzjoni tal-għanijiet tal-PAA l-ġdid, u jisħaq dwar il-possibbiltà ta' impatt akbar jekk ikun hemm sejħa speċifika għall-għajnuna għal proġetti transfruntiera fi ħdan il-qafas baġitarju proprju tal-istrateġija marittima għall-Atlantiku, b'għanijiet definiti u xierqa għall-Pjan u b'indikaturi ta' kejl proprji li huma faċli biex jiġu mmaniġġjati;

33.

 jiddikjara li sabiex tittejjeb il-kooperazzjoni huwa meħtieġ it-titjib tal-għarfien reċiproku; għalhekk, minn naħa, ikun utli ħafna li titfassal lista ta' atturi, problemi u opportunitajiet u titqassam fost l-aġenti ta' kull pajjiż u/jew it-territorji; jeħtieġ ukoll li jiġu stabbiliti linji ta' azzjoni jew ta' teknoloġija għas-setturi differenti tal-ekonomija blu bbażati fuq l-ispeċjalizzazzjoni konkreta ta' kull reġjun, waqt li tiġi promossa kollaborazzjoni reċiproka u tiġi pprovduta offerta konġunta, mingħajr il-ħtieġa għal kompetizzjoni;

34.

 jikkunsidra li, sabiex tinkiseb u tissaħħaħ il-kooperazzjoni transfruntiera, għandhom jinħolqu kundizzjonijiet li jiffavorixxu s-sinerġiji u jinkoraġġixxu x-xogħol f'timijiet multidixxiplinarji u multikulturali li jallinjaw l-interessi u l-aġendi, fi prijoritajiet xjentifiċi u fi strumenti ta' ġestjoni u governanza, waqt li jippromovu l-kollaborazzjoni ġusta bejn timijiet ta' nies fit-territorji differenti, li jistabbilixxu mekkaniżmi ta' finanzjament sempliċi u kontinwu biex ikunu jistgħu jwettqu l-azzjonijiet f'perjodi ta' żmien realistiċi u li jiffavorixxu żieda fil-parteċipazzjoni tas-soċjetà fi ħdanhom stess, għall-benefiċċju tas-suċċess tagħhom;

35.

 juri b'mod ċar li l-fatt li jkollok numru kbir ta' programmi paralleli iżda mhux relatati joħloq konfużjoni u probabbilment ineffiċjenza fl-użu tal-fondi pubbliċi. Huma meħtieġa l-armonizzazzjoni tal-finanzjament pubbliku tar-riċerka u l-innovazzjoni biex jiġu massimizzati l-koerenza u l-impatt tal-investimenti u biex tiġi ottimizzata d-disponibbiltà tal-ħin tar-riċerkaturi. Jirrakkomanda l-allinjament tal-miżuri u l-għajnuna reġjonali, nazzjonali u Ewropej biex jiġi ġġenerat impatt ferm ogħla minn dak miksub b'diversi programmi mhux relatati u b'hekk jikkontribwixxi b'mod effettiv għal Żona Ewropea tar-Riċerka ta' prestazzjoni għolja fil-qasam tal-ekonomija blu;

36.

 jemmen li l-kooperazzjoni m'għandhiex tkun limitata għal kwistjonijiet marittimi u portwarji, iżda pjuttost tqis l-interazzjoni tal-baħar/tal-art u tagħti attenzjoni lill-mitigazzjoni u l-adattament għat-tibdil fil-klima (ekonomija ċirkolari, mobbiltà sostenibbli, ekosistemi tal-baħar, eċċ.);

37.

 jenfasizza l-importanza tal-kooperazzjoni bbażata fuq l-istrateġiji rispettivi ta' speċjalizzazzjoni intelliġenti (S3) tar-reġjuni tal-Atlantiku u l-iżvilupp ta' proġetti emblematiċi f'żoni ta' Speċjalizzazzjoni Marittima Intelliġenti tal-Atlantiku;

38.

 jixtieq jinsisti li, fil-kuntest tal-irkupru ta' wara l-COVID-19 u fid-dawl ta' wara l-Brexit, il-kollaborazzjoni fiż-żona tal-Atlantiku hija saħansitra aktar meħtieġa minħabba d-deterjorament prevedibbli tas-sitwazzjoni soċjoekonomika u l-impatt tagħha fuq l-impjiegi u fuq it-tkabbir blu u l-konsegwenzi tal-ħruġ tar-Renju Unit mill-Unjoni Ewropea u l-ambitu li finalment se jkollu l-Fond ta' Aġġustament għall-Brexit;

39.

 jixtieq iħares lejn il-futur, f'dan ir-rigward, u jikkunsidra li t-tfixkil ikkawżat mill-pandemija u l-Brexit jista' jinbidel f'opportunità jekk is-setturi ewlenin tagħna jaġġornaw il-kapaċitajiet teknoloġiċi tagħhom. Għal din ir-raġuni, jilqa' strumenti ġodda li jistgħu jippromovu katini ta' valur Ewropej ġodda, ibbażati fuq il-prijoritajiet tal-istrateġiji reġjonali ta' speċjalizzazzjoni intelliġenti;

40.

 jikkunsidra li, waqt li jitqiesu l-konklużjonijiet tal-Kunsill dwar “l-implimentazzjoni tal-istrateġiji makroreġjonali tal-UE”, huwa l-mument li tinħoloq u tiġi żviluppata din l-istrateġija makroreġjonali għall-baċir tal-Atlantiku, b'qafas baġitarju u ta' implimentazzjoni speċifiku u xieraq għar-realtà u l-potenzjal tiegħu;

41.

 jifhem li l-ħolqien ta' makroreġjun tal-Atlantiku huwa l-aħjar mod biex tiġi approfondita l-kooperazzjoni, jiġu indirizzati l-isfidi marittimi flimkien ma' oħrajn marbuta mat-territorju, titjieb il-koordinazzjoni bejn ir-reġjuni u l-Istati Membri, u jiġi razzjonalizzat l-użu tal-finanzjament;

42.

 jifhem li n-natura marittima tal-makroreġjun għandha tkun ikkomplementata mill-potenzjal tal-innovazzjoni marbut mal-oqsma ta' speċjalizzazzjoni intelliġenti komuni għar-reġjuni tal-Atlantiku u għandha tiġi promossa l-kooperazzjoni trans-Alantika li tippermetti l-parteċipazzjoni tar-reġjuni ultraperiferiċi, il-pajjiżi u r-reġjuni terzi, skont mudell ta' governanza b'diversi livelli tal-Makroreġjun tal-Alpi ta' parteċipazzjoni diretta u attiva tar-reġjuni.

Brussell, id-19 ta’ Marzu 2021.

Apostolos TZITZIKOSTAS

Il-President tal-Kumitat Ewropew tar-Reġjuni

Top