IL-KUMMISSJONI EWROPEA
Brussell, 23.9.2020
COM(2020) 574 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
skont l-Artikolu 85(2) tar-Regolament (UE) Nru 648/2012 tal-Parlament Ewropew u tal-Kunsill tal-4 ta’ Lulju 2012 dwar derivati OTC, kontropartijiet ċentrali u repożitorji tad-data dwar it-tranżazzjonijiet, kif emendat bir-Regolament (UE) Nru 834/2019, li jivvaluta jekk ġewx żviluppati soluzzjonijiet tekniċi vijabbli għat-trasferiment mill-arranġamenti tal-iskema tal-pensjonijiet ta’ kollateral fi flus jew mhux fi flus bħala marġni ta’ varjazzjoni u l-ħtieġa għal kwalunkwe miżura biex jiġu ffaċilitati dawk is-soluzzjonijiet tekniċi vijabbli
RAPPORT TAL-KUMMISSJONI LILL-PARLAMENT EWROPEW U LILL-KUNSILL
skont l-Artikolu 85(2) tar-Regolament (UE) Nru 648/2012 tal-Parlament Ewropew u tal-Kunsill tal-4 ta’ Lulju 2012 dwar derivati OTC, kontropartijiet ċentrali u repożitorji tad-data dwar it-tranżazzjonijiet, kif emendat bir-Regolament (UE) Nru 834/2019, li jivvaluta jekk ġewx żviluppati soluzzjonijiet tekniċi vijabbli għat-trasferiment mill-arranġamenti tal-iskema tal-pensjonijiet ta’ kollateral fi flus jew mhux fi flus bħala marġni ta’ varjazzjoni u l-ħtieġa għal kwalunkwe miżura biex jiġu ffaċilitati dawk is-soluzzjonijiet tekniċi vijabbli
1.INTRODUZZJONI
Ir-Regolament dwar l-Infrastruttura tas-Suq Ewropew (EMIR, European Market Infrastructures Regulation), li fl-2012 introduċa fl-UE r-riformi tal-G20 dwar il-kuntratti tad-derivattivi barra l-Borża (OTC, over-the-counter), ta eżenzjoni temporanja lil entitajiet li joperaw arranġamenti tal-iskema tal-pensjonijiet (PSAs, pension scheme arrangements) mill-obbligu tal-ikklerjar ċentrali, fir-rigward ta’ ċerti tipi ta’ derivattivi OTC.
Skont ir-Regolament, il-PSAs jinkludu Istituzzjonijiet għall-Provvista ta’ Rtirar Okkupazzjonali (IORP, Institutions for Occupational Retirement Provisions) kif definiti skont l-Artikolu 6(a) tad-Direttiva 2003/41/KE, in-negozji tal-istituzzjonijiet għall-provvista ta’ rtirar okkupazzjonali skont l-Artikolu 3 ta’ dik id-Direttiva, il-provvista ta’ rtirar okkupazzjonali ta’ impriżi tal-assigurazzjoni koperti mid-Direttiva 2002/83/KE (sakemm l-assi u l-obbligazzjonijiet assoċjati ma’ tali negozju jiġu sseparati mill-attivitajiet l-oħra tal-impriża tal-assigurazzjoni), kif ukoll entitajiet jew arranġamenti oħra awtorizzati jew taħt superviżjoni li joperaw fuq bażi nazzjonali bl-għan ewlieni li jiġu pprovduti benefiċċji tal-irtirar.
L-eżenzjoni temporanja ngħatat sabiex jitqiesu l-karatteristiċi speċifiċi tal-mudell ta’ negozju ta’ tali entitajiet u l-impatt li l-ikklerjar obbligatorju jista’ jkollu fuq il-pensjonijiet: kif imfakkar fil-Premessa 26 tal-EMIR, l-entitajiet li joperaw arranġamenti tal-iskema tal-pensjonijiet “tipikament jimminimizzaw l-allokazzjoni tagħhom għal flus kontanti sabiex jimmassimizzaw l-effiċjenza u r-rendiment għat-titolari tal-poloz tagħhom. Għalhekk, li dawn l-entitajiet ikunu meħtieġa jikklerjaw kuntratti tad-derivati OTC f’post ċentrali, jirriżulta fl-iżvestiment ta’ proporzjon sinifikanti tal-assi tagħhom fi flus kontanti sabiex huma jkunu jistgħu jissodisfaw ir-rekwiżiti tal-marġni li għaddejjin tal-kontropartijiet ċentrali”. L-ikklerjar ta’ derivattivi OTC ċentralment jirrikjedi ammonti adegwati ta’ flus disponibbli sabiex jiġu ssodisfati r-rekwiżiti tal-marġni tal-kontropartijiet ċentrali (CCPs, central counterparties). Kif jirrikonoxxi l-qafas tal-EMIR, iż-żamma ta’ ammonti kbar ta’ flus sabiex jiġu ssodisfati l-appelli potenzjali għall-marġni ta’ varjazzjoni jista’ jkollha impatt negattiv fuq l-introjtu tal-irtirar tal-pensjonanti.
Fl-2014, studju indipendenti pprovdut lill-Kummissjoni mill-Europe Economics and Bourse Consult stima l-marġni ta’ varjazzjoni potenzjali li l-fondi tal-pensjonijiet tal-UE jistgħu jkunu meħtieġa jħallsu fil-każ ta’ bidla ta’ 1 % fir-rati. Filwaqt li l-istudju xorta kopra lir-Renju Unit, ir-riżultati li eskludew lir-Renju Unit urew li tali ammont jista’ jvarja bejn 106 u 133 biljun euro, u dan ikompli jiżdied f’xenarji ta’ kriżi aktar gravi.
Aktar reċentement, saru studji oħra mill-Eurosistema u mill-bank ċentrali Daniż. Tali studji jissuġġerixxu li l-marġni ta’ varjazzjoni potenzjali tal-fondi tal-pensjonijiet Netherlandiżi u Daniżi – li jammontaw għal madwar 52 % tal-assi finanzjarji tal-fondi tal-pensjonijiet tal-UE (eskluż ir-Renju Unit) – ikun inqas minn EUR 53 biljun u DKK 106 biljun (jew madwar EUR 14 biljun) rispettivament fl-istess xenarju ta’ kriżi (bidla ta’ 1 % fir-rati), jiġifieri ftit inqas miċ-ċifri korrispondenti tal-istudju indipendenti msemmi hawn fuq. Abbażi tal-bilanċi tal-flus disponibbli, in-nuqqas aggregat ta’ flus jista’ jammonta sa 17-il biljun euro għall-fondi tal-pensjonijiet kollha taż-żona tal-euro.
Ċaqliq simili fir-rati, fil-kostijiet u fir-riskji mhuwiex speċifiku għall-PSAs biss, iżda jkollu impatt fuq ditti finanzjarji oħra li jikklerjaw ċentralment ukoll (eż. il-fondi ta’ investiment, il-kumpaniji tal-assigurazzjoni), u jistgħu jinħolqu wkoll riskji ta’ inadempjenza għan-nuqqas ta’ kollateral eliġibbli fil-każ ta’ negozjar bilaterali tad-derivattivi, mhux biss fid-dinja tal-ikklerjar ċentrali. Madankollu, kif tirrikonoxxi l-ESMA fl-ewwel rapport tagħha dwar dan is-suġġett, il-PSAs jidhru li huma aktar kostretti fil-kapaċità tagħhom li jimmitigaw dawn ir-riskji permezz ta’ flessibilità fl-istrateġiji ta’ investiment, id-disponibbiltà ta’ investimenti li jaqblu mal-obbligazzjonijiet tagħhom, l-aċċess għas-sorsi ta’ likwidità, kif diskuss fit-taqsimiet li ġejjin.
L-eżenzjoni temporanja kienet maħsuba biex tipprovdi ż-żmien meħtieġ sabiex tinstab soluzzjoni teknika xierqa, li tippermetti lill-PSAs jikklerjaw ċentralment fis-CCPs filwaqt li jevitaw effetti materjalment avversi fuq l-introjtu tal-pensjonanti. Fil-qafas tal-EMIR, in-negozju tad-derivattivi OTC tal-PSAs huwa diġà soġġett – skont il-limiti stabbiliti rilevanti – għar-rekwiżiti tal-mitigazzjoni tar-riskju operazzjonali u għar-rekwiżiti tal-marġni għall-kummerċi OTC mhux ikklerjati stabbiliti fl-Artikolu 11, li bdew japplikaw fl-2017 permezz ta’ introduzzjoni gradwali
: dawn ir-rekwiżiti għandhom l-għan li jindirizzaw ir-riskji relatati ma’ derivattivi kklerjati mhux ċentralment, filwaqt li jipprovdu wkoll inċentivi għall-ikklerjar b’mod ċentrali. Il-PSAs huma soġġetti wkoll għall-obbligi ta’ rappurtar tal-EMIR.
Għalhekk id-diskussjonijiet mal-PSAs u l-partijiet ikkonċernati oħra jikkonfermaw li l-PSAs iridu jikklerjaw il-kummerċi fis-CCPs, u diġà jagħmlu dan f’ċerti każijiet, l-ikklerjar obbligatorju kompla joħloq sfidi. L-eżenzjoni tal-ikklerjar ċentrali għalhekk ġiet estiża matul is-snin, peress li ma nstabet l-ebda soluzzjoni teknika vijabbli. L-EMIR Refit, li daħal fis-seħħ f’Ġunju 2019, jestendi l-eżenzjoni sa Ġunju 2021, b’estensjoni potenzjali ulterjuri permezz ta’ atti delegati tal-Kummissjoni għal darbtejn, kull darba b’massimu ta’ sena. Madankollu l-għan aħħari tar-Regolament jibqa’ l-ikklerjar ċentrali għall-PSAs malajr kemm jista’ jkun, meta jitqies li l-iżviluppi regolatorji u tas-suq attwali jenħtieġ li jippermettu lill-parteċipanti fis-suq jiżviluppaw soluzzjonijiet xierqa (l-EMIR, Permessa 30). Is-CCPs, il-membri tal-ikklerjar u l-PSAs huma meħtieġa jagħmlu l-aħjar sforzi tagħhom biex jikkontribwixxu għall-iżvilupp ta’ tali soluzzjonijiet.
L-Artikolu 85 tal-EMIR Refit jirrikjedi li l-Kummissjoni tħejji rapporti annwali sal-estensjoni finali tal-eżenzjoni, li jivvalutaw “jekk ġewx żviluppati soluzzjonijiet tekniċi vijabbli għat-trasferiment mill-arranġamenti tal-iskema tal-pensjonijiet ta’ kollateral fi flus jew mhux fi flus bħala marġni ta’ varjazzjoni u l-ħtieġa għal kwalunkwe miżura biex jiġu ffaċilitati dawk is-soluzzjonijiet tekniċi vijabbli”.
Ir-Regolament jistabbilixxi wkoll li l-ESMA, f’kooperazzjoni mal-EBA, l-EIOPA u l-ESRB, għandha tissottometti rapporti annwali lill-Kummissjoni li jivvalutaw il-kwistjoni. L-ewwel rapport tal-ESMA wasal għand il-Kummissjoni f’April 2020. Flimkien mar-rapport, l-ESMA nediet konsultazzjoni pubblika sabiex tiġbor input ulterjuri mill-partijiet ikkonċernati u tippreżenta t-tieni rapport, aktar komprensiv lill-Kummissjoni sa Diċembru 2020. Ir-rapport komprensiv tal-ESMA għalhekk mhuwiex disponibbli fil-ħin biex jiġi inkorporat f’dan ir-rapport mill-Kummissjoni Ewropea.
L-EMIR Refit ukoll ta mandat lill-Kummissjoni biex twaqqaf grupp ta’ esperti li jinkludi rappreżentanti tal-partijiet ikkonċernati rilevanti, sabiex timmonitorja l-isforzi tagħhom u tivvaluta l-progress li sar biex jinstabu soluzzjonijiet tekniċi vijabbli. Il-grupp ta’ esperti, li jkompli l-ħidma tal-predeċessur tiegħu (il-Grupp ta’ Livell Għoli tal-Kummissjoni dwar il-Fondi tal-Pensjonijiet) jinkludi rappreżentanti tas-CCPs, membri tal-ikklerjar, PSAs, banek ċentrali u partijiet ikkonċernati rilevanti oħra; huwa ltaqa’ darbtejn, f’Ottubru 2019 u f’April 2020 (permezz ta’ telekonferenza) u se jkompli jiltaqa’ kull sitt xhur. Il-Kummissjoni tkompli tibni fuq il-ħidma tal-grupp għar-rapporti tagħha lill-koleġiżlaturi.
2.GĦAN TAR-RAPPORT
B’dan ir-Rapport, il-Kummissjoni tissodisfa l-obbligu tagħha skont l-Artikolu 85 tal-EMIR.
Dan ir-Rapport iqis kif xieraq l-ewwel rapport tal-ESMA, kif ukoll id-diskussjonijiet li saru fil-grupp ta’ esperti. Kif spjegat, ir-riżultati tal-konsultazzjoni pubblika mnedija mill-ESMA se jiddaħħlu fit-tieni rapport tal-Kummissjoni, li għandu jinħareġ is-sena d-dieħla.
Dan ir-Rapport jipprovdi analiżi tal-kwistjonijiet ewlieni identifikati mill-partijiet ikkonċernati dwar l-ikklerjar ċentrali tal-PSAs, kif ukoll tas-soluzzjonijiet esplorati sa issa. Kif imsemmi, l-eżenzjoni tal-PSA mill-ikklerjar ċentrali hija fis-seħħ sa Ġunju 2021: fid-dawl ta’ dik l-iskadenza, dan ir-rapport għandu l-għan li jaġġorna lill-Parlament Ewropew u lill-Kunsill dwar il-progress li sar f’dan il-qasam, kif ukoll bil-ħsieb li jiġu identifikati l-aspetti li għandhom jiġu esplorati ulterjorment favur soluzzjoni tal-ikklerjar ċentrali fattibbli u sostenibbli.
3.KWISTJONIJIET EWLENIN IDENTIFIKATI
3.1
Sfond dwar il-mudell ta’ negozju tal-PSAs u l-użu tad-derivattivi
Il-PSAs Ewropej, speċjalment f’xi Stati Membri bħan-Netherlands u d-Danimarka, huma parteċipanti attivi fis-suq tad-derivattivi OTC. Huma jużaw dawn id-derivattivi biex jiħħeġġjaw l-obbligazzjonijiet tagħhom minn għadd ta’ riskji, inklużi r-rata tal-imgħax u l-volatilità tal-inflazzjoni, u fl-aħħar mill-aħħar biex jipproteġu lilhom infushom minn riskji ta’ solvenza finanzjarja. L-obbligazzjonijiet tal-fondi tal-pensjonijiet lejn pensjonanti attwali u futuri għandhom maturitajiet fit-tul, li jeħtieġ li jkunu mqabbla ma’ assi fit-tul; tali assi huma tipikament bonds korporattivi u tal-gvern; madankollu, l-iħħeġġjar sħiħ tal-obbligazzjonijiet mal-bonds ma jidhirx fattibbli għall-PSAs tal-UE, minħabba d-disponibbiltà limitata ta’ bonds bil-karatteristiċi xierqa; barra minn hekk, id-derivattivi jistgħu joffru tqabbil aħjar għall-obbligazzjonijiet tal-PSAs minħabba li t-tpartit ta’ spiss jintuża biex dawn l-obbligazzjonijiet jiġu skontati għall-finijiet ta’ valutazzjoni. Kif irrappurtat mill-ESMA, is-sitwazzjoni tal-PSAs tal-UE f’dan ir-rigward hija differenti minn dik tal-fondi tal-pensjonijiet tal-Istati Uniti, li jiddependu aktar fuq assi b’data twila bħal bonds korporattivi u tal-gvern għal skopijiet ta’ ħħeġġjar: Il-fondi tal-pensjonijiet tal-Istati Uniti għandhom tendenza li jkollhom durata iqsar ta’ obbligazzjonijiet relattivi għall-PSAs tal-UE, l-obbligazzjonijiet tagħhom huma tipikament skontati bl-użu ta’ rendimenti tal-bonds korporattivi AA, u s-suq tal-bonds korporattivi tal-Istati Uniti huwa aktar profond. Hekk kif tirrikonoxxi l-ESMA, il-PSAs jidhru li għandhom ħtieġa strutturali għal involviment f’derivattivi OTC.
Il-portafoll tad-derivattivi tal-PSAs huwa tipikament kbir, b’data twila u unidirezzjonali, b’pożizzjoni aggregata tal-industrija li tirrappreżenta, skont l-ESMA, riskju sistemiku potenzjali.
Fir-rigward tat-tipi tad-derivattivi, il-PSAs huma utenti estensivi ta’ swaps tar-rati tal-imgħax fit-tul: skont data tal-EMIR tal-2015 mid-DTCC, madwar 20 % tal-iswaps tar-rati tal-imgħax b’mill-inqas kontroparti waħda bħala assiguratur jew fond tal-pensjoni fl-UE kellhom maturità ta’ 30 sena, meta mqabbla ma’ medja globali ta’ inqas minn 10 %. L-iswaps tar-rati tal-imgħax huma l-klassi tad-derivattivi soġġetti għall-obbligu tal-ikklerjar skont l-EMIR. Il-PSAs jikkummerċjaw id-derivattivi tagħhom b’mod bilaterali jew jikklerjaw ċentralment fis-CCPs b’mod ġenerali bħala klijenti ta’ membri tal-ikklerjar.
Ta’ min jinnota li l-iskemi tal-pensjonijiet u s-swieq huma pjuttost diversi madwar l-UE: f’xi Stati Membri s-sistemi tal-pensjonijiet tat-tieni pilastru huma aktar żviluppati minn oħrajn, u l-fondi tal-pensjonijiet b’benefiċċji definiti huma aktar mifruxa; f’oħrajn, il-mudell ta’ kontribuzzjoni definita huwa prevalenti. L-ikbar swieq tal-PSAs fl-UE jinsabu fin-Netherlands, b’proporzjon medju ta’ assi għal PDG ta’ 173.3 % u d-Danimarka, b’proporzjon ta’ 198.6 %, skont id-data ta’ tmiem l-2018. L-Irlanda għandha wkoll skemi simili fis-seħħ. F’dawn il-pajjiżi, l-iskemi privati tal-pensjonijiet għandhom rwol importanti biex jipprovdu introjtu għall-irtirar lill-pensjonanti.
3.2
Il-kwistjoni tal-ikklerjar ċentrali tal-PSAs
Il-kwistjoni ewlenija identifikata fir-rigward tal-ikklerjar ċentrali tal-PSAs tikkonċerna l-fatt li l-ikklerjar fis-CCPs jirrikjedi li jiġi depożitat marġni ta’ varjazzjoni fi flus; id-diskussjonijiet li saru fil-grupp tal-partijiet ikkonċernati tal-Kummissjoni wrew li dan huwa problematiku għall-PSAs f’każ ta’ kundizzjonijiet ta’ stress fis-suq.
Fil-mudell tal-ikklerjar ċentrali, is-CCPs jitolbu marġni ta’ varjazzjoni lill-parteċipanti tagħhom sabiex jikkumpensaw għall-bidliet fil-valur tas-suq tal-pożizzjonijiet derivattivi li jiġġestixxu. B’dan il-mod, is-CCPs ikunu dejjem koperti minn movimenti tas-suq u l-parteċipanti fis-suq ma jġemmgħux telf kbir matul iż-żmien fir-rigward tal-portafoll ikklerjat ċentralment tagħhom. It-telf u l-qligħ huma kkalkulati mis-CCP u skambjati kuljum permezz tal-proċess tal-valwazzjoni skont is-suq. Il-flus jistgħu jservu bl-aħjar mod l-għan tal-marġni ta’ varjazzjoni, minħabba li jnaqqsu kwalunkwe riskju ta’ telf ta’ valur u t-trasferiment tagħhom huwa finali. Il-flus bħala marġni ta’ varjazzjoni huma wkoll operazzjonalment inqas kumplessi u huma kompatibbli mal-approċċ għall-ġestjoni tar-riskju ta’ likwidità tas-CCP stabbilit mill-EMIR.
Dan ifisser li l-parteċipanti tal-ikklerjar għandhom ikunu jistgħu jindirizzaw tali talbiet permezz ta’ ammonti xierqa ta’ flus: jekk dan ma jkunx il-każ, u membru tal-ikklerjar ma jistax jiddepożita l-marġni ta’ varjazzjoni meħtieġ fi żmien xieraq, dan jiġi ddikjarat f’inadempjenza mis-CCP, li mbagħad jiskatta l-proċeduri ta’ inadempjenza sabiex jerġa’ jiġi rikonċiljat il-valur kontabilistiku. Barra minn hekk, jeħtieġ li l-marġni ta’ varjazzjoni jiġi ppubblikat fis-CCPs f’perjodu ta’ żmien qasir, u dan iqajjem aktar diffikultajiet operazzjonali.
Il-flus għandhom kost tal-opportunità għoli, peress li mhumiex profittabbli daqs assi oħra u mhumiex adegwati biex jibbilanċjaw l-maturitajiet tal-obbligazzjonijiet tal-PSAs, u b’hekk huma esposti għal spariġġi bejn l-assi u l-obbligazzjonijiet. Iż-żamma ta’ ammonti kbar ta’ flus minflok ta’ assi oħra b’rendiment ogħla tikkontribwixxi għat-tnaqqis tar-redditi għall-pensjonanti u tħalli impatt fuq l-allokazzjoni tal-assi tal-PSAs, u fil-fatt, il-fondi tal-pensjonijiet tipikament ma jkollhomx ammont kbir ta’ flus, kif jidher ukoll fl-istatistiċi annwali dwar il-pensjonijiet globali ppubblikati mill-OECD.
Il-kwistjoni tal-marġni ta’ varjazzjoni fi flus tista’ tkun diffiċli speċjalment fi żminijiet ta’ kundizzjonijiet ta’ stress fis-suq, flimkien ma’ livelli ogħla ta’ rati tal-imgħax, meta it-talbiet għal marġni ta’ varjazzjoni mis-CCPs jistgħu jiżdiedu b’mod sinifikanti għall-PSAs.
Fil-fatt, appelli kbar għall-marġni ta’ varjazzjoni jistgħu jseħħu wkoll fil-kuntest ta’ kummerċi kklerjati mhux ċentralment, li fihom attwalment jipparteċipaw il-PSAs. Madankollu, f’dak il-kuntest il-PSAs jistgħu ukoll jiddepożitaw il-marġni ta’ varjazzjoni fi flus f’forom oħra għajr il-flus, pereżempju bl-użu ta’ bonds tal-gvern ta’ kwalità għolja (assi li l-fondi tal-pensjonijiet huma tipikament rikki fihom) - anki jekk il-limitu li għalih il-PSAs huma mitluba li jiddepożitaw il-marġni ta’ varjazzjoni fi flus ukoll fil-kummerċi bilaterali tagħhom jista’ jkun li żdied reċentement.
Għandu jiġi nnutat li r-raġunament tal-qafas regolatorju tal-EMIR huwa li jippromwovi l-ikklerjar ċentrali wkoll billi jagħmel il-kummerċi bilaterali inqas konvenjenti, f’konformità mar-riskji assoċjati: dan u żviluppi regolatorji oħra, flimkien mal-forzi tas-suq, huma mistennija jwasslu għal żieda fil-volumi ta’ derivattivi kklerjati ċentralment, b’ipprezzar potenzjalment aħjar fis-segment ikklerjat relattiv ma’ dak ikklerjat mhux ċentralment. Kif imsemmi, uħud mill-fondi tal-pensjonijiet diġà bdew jikklerjaw ċentralment fuq bażi volontarja u selettiva.
Għandu jiġi nnutat li ġeneralment il-PSAs huma aktar probabbli li jikklerjaw indirettament bħala klijenti ta’ membri tal-ikklerjar milli li jsiru membri tal-ikklerjar diretti tas-CCP, kif diskuss aktar fit-taqsimiet li ġejjin.
Dan ta’ fuq jipprovdi l-isfond għall-karatteristiċi li soluzzjoni potenzjali għall-kwistjoni tal-ikklerjar ċentrali jenħtieġ li jkollha: jenħtieġ li tkun dik li ssib il-bilanċ it-tajjeb bejn l-objettiv ta’ stabbiltà finanzjarja u l-ħtieġa li tkun vijabbli għall-PSAs f’termini tal-kost, sabiex ma jkunx hemm impatt eċċessiv fuq il-benefiċċji ta’ dawk li rtiraw u jenħtieġ ukoll li tkun robusta biżżejjed f’kundizzjonijiet ta’ stress fis-suq.
3.3
Soluzzjonijiet potenzjali li ġew esplorati s’issa
Id-dibattitu dwar l-ikklerjar ċentrali tal-PSAs wassal biex jiġu esplorati mezzi ġodda matul is-snin. Deskrizzjoni ġenerali ta’ wħud mis-soluzzjonijiet potenzjali ġiet inkluża fir-rapport li l-Kummissjoni wettqet skont l-EMIR fl-2015 dwar din il-kwistjoni, li kkonkludiet li l-ebda soluzzjoni teknika vijabbli ma ġiet żviluppata.
L-opzjonijiet esplorati s’issa ffokaw fuq kif il-PSAs jistgħu jiddepożitaw il-marġni ta’ varjazzjoni lis-CCPs b’mod sikur u kosteffettiv. Fl-ewwel stadju, kif deskritt fir-rapport tal-Kummissjoni tal-2015, ġie meqjus jekk is-CCPs jistgħux jaċċettaw marġni ta’ varjazzjoni f’forom oħra għajr il-flus, bħal bonds tal-gvern ta’ kwalità għolja: madankollu, b’mod ġenerali ġie rikonoxxut li tali mezz ikun diffiċli li jiġi segwit, minħabba li jirrikjedi s-CCPs jiġġestixxu portafoll ta’ bonds li jiġu kkonvertiti fi flus bir-riskju relatat, li jista’ jwassal għal distorsjoni tar-rwol tagħhom bħala intermedjarji li jiġġestixxu kont newtrali.
Għalhekk qed tiġi esplorata t-tieni firxa ta’ opzjonijiet, li permezz tagħhom il-PSAs jistgħu jiskambjaw il-bonds tagħhom ma’ flus sabiex jissodisfaw l-appell għall-marġni (trasformazzjoni tal-kollateral) tas-CCPs. Is-soluzzjonijiet potenzjali esplorati u żviluppati matul l-aħħar snin mill-partijiet ikkonċernati tal-industrija ffokaw fuq mezzi li jippermettu trasformazzjoni tal-kollateral effiċjenti mill-PSAs.
Trasformazzjoni tal-kollateral mill-membri tal-ikklerjar
Il-membri tal-ikklerjar bħal banek jistgħu tipikament jipprovdu lill-klijenti tagħhom, inklużi l-fondi tal-pensjonijiet, is-servizzi ta’ trasformazzjoni tal-kollateral
, permezz ta’ repos. Fil-fatt, illum ħafna mill-PSAs li huma involuti fl-ikklerjar ċentrali jagħmlu dan bħala klijenti ta’ membri tal-ikklerjar, u jistgħu jkomplu jagħmlu dan anki taħt l-ikklerjar obbligatorju. Tranżazzjoni repo hija waħda li fiha parti tbiegħ ass lil parti oħra u timpenja ruħha li tixtri mill-ġdid l-ass bi prezz miftiehem f’data futura. L-ass tipikament ikun bond u jservi bħala kollateral biex jiġi assigurat is-sellief ta’ flus kontra r-riskju ta’ kreditu tal-kontroparti. Ir-repos jistgħu għalhekk jintużaw bħala mezz għat-trasformazzjoni ta’ bonds fi flus u għad-depożitar tal-marġni ta’ varjazzjoni, bil-vantaġġ addizzjonali li l-fornitur tal-bonds iżomm is-sjieda tal-bonds infushom u jkompli jieħdu r-rendimenti fit-tul.
Gruppi bankarji kbar huma tipikament attivi fis-suq repo. Madankollu, tqajmu xi fatturi li jiddiżinċentivaw lill-membri tal-ikklerjar milli jinvolvu ruħhom f’dawn it-tranżazzjonijiet. Kif issemma minn ħafna parteċipanti fis-suq, il-kunċett ta’ proporzjon ta’ ingranaġġ skont il-qafas ta’ Basel III għamilha inqas konvenjenti li jkun hemm involviment f’repos, għaliex tali tranżazzjonijiet għandhom marġnijiet baxxi, u jespandu l-karti tal-bilanċ tal-banek u b’hekk jikkontribwixxu biex iżidu d-denominatur tal-proporzjon. Għalhekk, il-banek jeħtieġ li jkollhom ammont ikbar ta’ kapital tal-grad 1 biex jirrispettaw ir-rekwiżit. Kunsiderazzjonijiet simili ġew żviluppati mill-analiżi tas-swieq repo li saret fl-2017 mill-Kumitat dwar is-Sistema Finanzjarja Globali, li indikat kompromess possibbli bejn ir-riformi regolatorji li jiffokaw fuq id-daqs tal-karti tal-bilanċ tal-banek (immirati biex jillimitaw l-ingranaġġ eċċessiv) u l-konsegwenzi, inkluż għall-utenti finali, f’termini tad-disponibbiltà repo. F’dan ir-rigward, il-volumi tas-suq repo fl-UE komplew madankollu jiżdiedu f’dawn l-aħħar snin, u skont l-analiżi tal-BĊE, il-konsegwenzi mhux intenzjonati tar-riformi regolatorji fuq il-provvista ta’ servizzi repo mill-banek taż-żona tal-euro ma kinux materjali.
Barra minn hekk, il-mod ta’ kif il-proporzjon ta’ ingranaġġ kien oriġinarjament maħsub għamilha inqas konvenjenti għall-banek biex jipprovdu servizzi tal-ikklerjar tal-klijenti, peress li l-marġnijiet li ġew depożitati mill-klijenti ma setgħux jintużaw għat-tpaċija tal-ammont tal-iskopertura (li jista’ jiddaħħal fid-denominatur tal-proporzjon). Fl-2019 il-Kumitat ta’ Basel ippropona li jiġu introdotti bidliet fil-kalkolu tal-proporzjon ta’ ingranaġġ, b’hekk l-ikklerjar tal-klijenti ma jiġix ippenalizzat b’mod mhux xieraq. Dawn il-bidliet kienu riflessi fir-Regolament rivedut dwar ir-Rekwiżiti ta’ Kapital (CRR2), li daħal fis-seħħ f’Ġunju tas-sena li għaddiet.
Ġiet introdotta wkoll emenda għall-proporzjon ta’ ingranaġġ rigward it-trattament tar-repos inversi. Dawn il-bidliet jistgħu jikkontribwixxu biex jinkoraġġixxu l-banek biex jinvolvu ruħhom fl-ikklerjar tal-klijenti u possibbilment f’intermedjazzjoni repo u b’hekk jappoġġaw ukoll il-likwidità fis-suq repo. L-impatt ta’ tali bidliet se jkollu jiġi vvalutat.
Barra minn hekk, tqajjem tħassib dwar il-kapaċità tas-swieq repo li jissodisfaw id-domanda fi flus għall-PSAs kollha flimkien, speċjalment fi żminijiet ta’ stress, kif diskuss f’aktar dettall hawn taħt.
Trasformazzjoni tal-kollateral permezz ta’ swieq repo kklerjati
F’dawn l-aħħar snin, uħud mis-CCPs żviluppaw mudelli ġodda biex jappoġġaw l-ikklerjar ċentrali tal-PSAs ibbażat fuq l-iffaċilitar tal-aċċess mill-PSAs għas-CCPs u għas-swieq repo kklerjati; dan jista’ jinvolvi wkoll aċċess għas-suq OTC ikklerjat. Dawn il-mudelli ġew żviluppati fl-Unjoni Ewropea b’mill-inqas CCP wieħed u mill-għarfien tal-Kummissjoni mudelli simili huma probabbli li jiġu adottati wkoll minn CCPs oħra. F’dan il-qafas, il-PSAs għandhom relazzjoni kuntrattwali diretta mas-CCP u huma “assistiti” (jew inkella “sponsorizzati”) minn membru tal-ikklerjar (tipikament, bank) li jaġixxi bħala aġent tal-ikklerjar u jiffaċilita l-ikklerjar ċentrali tal-PSAs, pereżempju billi jikkontribwixxi għall-fond ta’ inadempjenza tas-CCP u jinvolvi ruħu f’ġestjoni ta’ inadempjenza u servizzi oħra (ġestjoni tal-kollaterali eċċ.).
Dawn il-mudelli ma jeliminawx per se l-ħtieġa li l-marġni ta’ varjazzjoni jiġi ddepożitat fi flus għad-derivattivi OTC ikklerjati, madankollu dawn jipprovdu PSAs b’aċċess addizzjonali għas-swieq repo. Tali mudelli ta’ “sħubija ffaċilitata” jkollhom ukoll l-għan li jtaffu wħud mil-limitazzjonijiet tal-ikklerjar tal-klijenti, bħall-konċentrazzjoni tal-ikklerjar tal-klijenti fl-UE għal uħud mill-membri tal-ikklerjar jew il-kwistjoni tal-portabilità tal-pożizzjonijiet tal-klijenti fil-każ ta’ inadempjenza ta’ membru tal-ikklerjar. Mil-lat tal-banek, jenħtieġ li tali mudelli jkunu inqas esiġenti f’termini ta’ rekwiżit kapitali mill-attivitajiet tradizzjonali tal-ikklerjar tal-klijenti.
Mill-aħjar għarfien tal-Kummissjoni, tali mudell ilu jiżviluppa matul iż-żmien b’aptit li żdied kemxejn mis-suq, madankollu wħud biss mill-PSAs – tipikament dawk il-kbar biss – bdew jużaw tali servizz sa issa. Raġuni ovvja tista’ tkun il-fatt li relazzjoni diretta ma’ CCP tista’ tirrikjedi tħejjija operattiva u legali addizzjonali u investiment mill-parteċipanti fis-suq, kemm mill-PSAs kif ukoll mill-membri tal-ikklerjar. Barra minn hekk, il-fondi tal-pensjonijiet li jipparteċipaw fil-grupp tal-partijiet ikkonċernati tal-Kummissjoni rrappurtaw li tali mudelli huma ġeneralment disponibbli biss għal PSAs kbar, numru żgħir biss ta’ banek attwalment jappoġġawhom, u xorta waħda jimplikaw dipendenza mill-PSAs fuq ir-rieda ta’ membru tal-ikklerjar li jipprovdi servizzi relatati.
Skont dokument konġunt mill-International Swaps and Derivatives Association (ISDA) u l-Pensions Europe tal-2018, sħubija diretta jew il-mudelli ta’ sħubija “iffaċilitata” jitqiesu b’interess mis-suq, ukoll minħabba li jistgħu jkunu aktar interessanti għall-banek mir-relazzjonijiet tradizzjonali tal-ikklerjar tal-klijenti. Is-sħubija diretta sħiħa tidher li hija ta’ sfida għal għadd ta’ raġunijiet (inklużi l-ħtieġa li jiġu ssodisfati r-rekwiżiti ta’ parteċipazzjoni tas-CCPs u l-kontribuzzjonijiet għall-fond ta’ inadempjenza, kif ukoll li jkun hemm kapaċità operazzjonali); mudelli ta’ aċċess iffaċilitat jistgħu jkunu mod kif joqorbu lejha. Skont il-fondi tal-pensjonijiet li qed jipparteċipaw fil-grupp tal-partijiet ikkonċernati tal-Kummissjoni, titjib ulterjuri huwa xorta waħda rikjest.
Diskussjoni dwar is-suq repo
Is-suq repo huwa ġeneralment meqjus mill-PSAs bħala għodda utli għall-ħtiġijiet ta’ likwidità tagħhom, u f’diskussjonijiet tal-grupp ta’ esperti stabbilit mill-Kummissjoni Ewropea ġeneralment ġie deskritt bħala parti potenzjali mis-soluzzjoni globali għall-kwistjoni tal-marġni ta’ varjazzjoni.
Madankollu, it-tħassib tal-industrija jibqa’ fir-rigward tal-kapaċità tas-swieq repo li jissodisfaw id-domanda globali għal flus li tirriżulta mill-PSAs kollha li jkollhom jikklerjaw taħt kundizzjonijiet ta’ stress fis-suq, meta s-swieq repo x’aktarx ikunu taħt pressjoni biex jassorbu d-domanda kbira ta’ likwidità – mhux mill-PSAs biss. Barra minn hekk, il-banek jistgħu ma jkunux dejjem lesti jipprovdu repos lill-PSAs, jew sal-istess punt, fi żminijiet ta’ stress. Kif tirrimarka l-ESMA, uħud minn dawn l-aspetti u aspetti oħra għandhom ukoll x’jaqsmu mar-relazzjoni kummerċjali globali bejn il-banek u l-klijenti tal-PSA tagħhom. Jekk il-PSAs mhumiex f’pożizzjoni li jużaw is-suq repo f’kundizzjonijiet ta’ stress, dawn jistgħu ma jkunx kapaċi jissodisfaw l-appell għall-marġni tas-CCPs u anki jkunu sors ta’ kwistjonijiet usa’ ta’ stabbiltà finanzjarja. F’dan ir-rigward, il-possibbiltà li jiġi stabbilit sett diversifikat ta’ arranġamenti ta’ likwidità bejn il-banek u l-PSAs tista’ tkun ta’ għajnuna.
Jenħtieġ li s-swieq repo kklerjati jkollhom il-vantaġġ li jkunu aktar likwidi mis-swieq bilaterali, peress li l-banek huma fil-prinċipju aktar lesti li jikkummerċjaw repos kklerjati milli repos bilaterali — mhux mill-inqas minħabba li jistgħu jżidu l-pożizzjonijiet tagħhom mas-CCP. Skont is-CGFS (2017), fiż-żona tal-euro “is-sehem tal-kummerċ tas-suq repo permezz tas-CCPs żdied matul dawn l-aħħar snin, li jammonta għal 50-60 % tal-volumi tas-suq repo fiż-żona tal-euro, minħabba l-attrattività tagħhom għall-ġestjoni tal-karta tal-bilanċ”. L-isforzi żviluppati minn uħud mis-CCPs biex jippermettu l-parteċipazzjoni diretta ta’ utenti finali għall-pjattaforma repo kklerjati għandhom jitqiesu f’din il-perspettiva wkoll. Il-PSAs irrappurtaw li s-suq repo kklerjat jista’ joffri kapaċità repo addizzjonali relattiva mar-repos bilaterali, iżda għandu wkoll il-limitazzjonijiet imsemmija hawn fuq.
Ħarsa ġenerali lejn il-funzjonament tas-swieq repo Ewropej hija pprovduta mill-Assoċjazzjoni Internazzjonali tas-Suq Kapitali (ICMA), li fl-istħarriġ tagħha tas-Suq Repo tal-2019 tistma d-daqs kumplessiv tas-suq għal EUR 8 310 biljun L-istħarriġiet tas-Suq Repo Ewropew tal-2018 u l-2019 tal-ICMA jikkonfermaw li s-suq repo Ewropew jitqies li b’mod ġenerali jaħdem tajjeb, u b’hekk huwa potenzjalment mezz għal trasformazzjoni tal-kollateral; madankollu, is-swieq repo huma inqas likwidi fi tmiem it-trimestru u fi tmiem is-sena, minħabba li l-banek għandhom it-tendenza li jagħlqu l-pożizzjonijiet repo tagħhom meta jkunu qed joqorbu l-iskadenzi tar-rappurtar. Il-firxa ta’ tali tnaqqis regolari ilha tonqos f’dawn l-aħħar snin u hija mistennija li tonqos aktar fil-futur, anki bis-saħħa tal-implimentazzjoni fl-UE tar-rakkomandazzjonijiet reċenti tal-BCBS immirati biex inaqqsu l-volatilità ta’ tmiem it-trimestru u ta’ tmiem is-sena.
L-ICMA tipprovdi wkoll analiżi tal-iżviluppi l-aktar reċenti li seħħew fis-suq matul il-kriżi tal-COVID-19. Skont dan l-istħarriġ, is-suq repo Ewropew fil-parti l-kbira żamm tajjeb matul il-pandemija tal-COVID-19 li bdiet minn tmiem Frar/bidu ta’ Marzu 2020. L-attività tas-suq repo żdiedet matul l-ewwel ġimagħtejn ta’ Marzu, minħabba ż-żieda fit-talbiet ta’ trasformazzjoni tal-kollateral biex jiġu ssodisfati l-appelli għall-marġni u l-abbandun ta’ assi aktar riskjużi lejn assi ta’ terminu qasir. Madankollu, il-klijenti rrappurtaw li l-banek bilkemm setgħu jlaħħqu maż-żieda fid-domanda għar-repos u wħud bdew iservu biss klijenti tal-ogħla livell. Skont l-istħarriġ, “Filwaqt li d-domanda għal aċċess għas-suq repo żdiedet matul il-kriżi, il-kapaċità tal-banek li jkunu intermedjarji f’dan l-aċċess ma żdiditx. Il-parteċipanti fuq in-naħa tax-xiri jirrappurtaw żieda fid-dipendenza fuq is-suq repo hekk kif il-flussi tal-fond wasslu għall-bżonn li jiġu ġġenerati flus li jkopru l-parteċipazzjoni, kif ukoll biex jissodisfaw l-appelli għall-marġni kontra l-pożizzjonijiet tad-derivattivi hekk kif tiżdied il-volatilità. Madankollu, jidher li l-banek kellhom diffikultà biex ilaħħqu mad-domanda tal-klijent. Ħafna rrappurtaw li illimitaw in-negozji għall-klijenti tal-ogħla livell, mingħajr kapaċità għal negozju ġdid. Barra minn hekk, il-banek jirrappurtaw li fid-dawl tal-volatilità kbira, kien aktar il-każ li l-limiti tar-RWA (assi mwieżna għar-riskju) saru restrizzjoni vinkolanti fuq in-negozju, milli l-Proporzjon ta’ Ingranaġġ, b’mod partikolari għal flussi ta’ negozji b’direzzjoni waħda (bħal debituri netti ta’ flus).”
Ġie rrappurtat li l-interventi tal-bank ċentrali taffew tali tensjonijiet billi lliberaw il-linji ta’ kreditu tal-banek u reġġgħu lura l-bejgħ tal-assi riskjużi.
L-iżviluppi tas-suq matul il-kriżi tal-COVID-19 ġew diskussi wkoll fil-kuntest tal-grupp tal-partijiet ikkonċernati tal-Kummissjoni. Is-CCPs irrappurtaw prestazzjoni kontinwa bla xkiel tas-swieq repo kklerjati matul il-kriżi, b’volumi kbar ta’ attività. Mill-memorja tagħhom, l-aċċess ma kienx ristrett għad-ditti fuq in-naħa tax-xiri li jipparteċipaw fis-suq repo kklerjat. Ġiet enfasizzata wkoll reżiljenza globali tal-infrastruttura tas-suq, inkluż fir-rigward tal-mudelli ta’ marġni, u b’hekk tikkontribwixxi għall-prevedibbiltà ta’ talbiet marġinali għall-parteċipanti. L-arranġamenti tal-iskema tal-pensjonijiet irrappurtaw li kienu jbatu minn volatilità konsiderevoli tas-suq, b’appelli kbar għall-marġni minn kontropartijiet bilaterali u minn membri tal-ikklerjar għal klijenti. Huma rrappurtaw li kemm kemm setgħu jlaħħqu ma’ tali sitwazzjoni, iżda jekk is-swieq marru għall-agħar, huma kienu jaffaċċjaw diffikultajiet serji ħafna. Huma kkonfermaw ukoll li l-banek sabuha bi tqila li jinvolvu ruħhom f’intermedjazzjoni repo u batew biex jiksbu aċċess għall-karti tal-bilanċ tal-banek membri tal-ikklerjar biex ikollhom aċċess għas-swieq repo. Bħala konsegwenza, il-PSAs iħossu li wieħed ma jistax jiddependi mis-suq repo fil-kundizzjonijiet kollha tas-suq; Il-PSAs ta’ spiss jiddependu ħafna fuq il-banek biex jaċċessawh, u l-banek għandhom linji repo limitati għall-klijenti tagħhom fi żminijiet ta’ stress.
Fid-dawl tad-diffikultajiet bi swieq repo fi żminijiet ta’ stress, il-parteċipanti fis-suq ta’ spiss qajmu l-kwistjoni dwar il-ħtieġa ta’ garanzija ta’ kontinġenza tal-likwidità tal-banek ċentrali fi żminijiet ta’ stress. Skont il-parteċipanti fis-suq, dan ir-rwol ta’ garanzija ta’ kontinġenza tal-banek ċentrali jista’ jiġi mfassal b’tali mod li l-banek ċentrali jipprovdu likwidità lil entità regolata li mbagħad tipprovdiha lill-PSAs: tali entità tista’ tkun banek jew CCPs. Wara li jirċievu l-likwidità mingħand il-banek jew is-CCPs, il-PSAs ikunu jistgħu jissodisfaw l-appelli għall-marġni ta’ varjazzjoni fi flus.
Għandu jiġi nnutat li, minħabba li l-banek ċentrali huma esklużivament kompetenti għall-istabbiliment ta’ faċilitajiet tal-banek ċentrali u għall-interpretazzjoni tal-użu maħsub tagħhom, kwalunkwe opzjoni bbażata fuq garanzija ta’ kontinġenza tal-likwidità tal-banek ċentrali jeħtieġ li tiġi approvata u appoġġata mill-banek ċentrali.
Il-BĊE ta l-perspettiva tiegħu dwar il-kwistjoni. Fir-rigward tal-banek, naturalment huma kontropartijiet tal-politika monetarja u huma awtorizzati li jipprovdu servizzi ta’ trasformazzjoni tal-kollateral soġġetti għar-regolamentazzjoni bankarja rilevanti. Għalhekk, huma f’pożizzjoni li jkunu intermedjarji fis-suq repo, inkluż abbażi tal-użu tagħhom ta’ faċilitajiet tal-banek ċentrali.
Skont il-BĊE, madankollu, ir-rwol ta’ garanzija ta’ kontinġenza tal-banek ċentrali ma jidhirx li huwa sempliċi, jew saħansitra jista’ ma jkunx fattibbli għas-CCPs, anki meta dawn tal-aħħar ikollhom liċenzja bankarja: it-teħid tas-servizzi ta’ trasformazzjoni tal-kollateral mis-CCPs jidher li hu barra min-negozju ewlieni tagħhom, għalhekk jista’ jqajjem tħassib fir-rigward tal-konsegwenzi tar-riskji. Barra minn hekk, skont il-BĊE, jekk is-CCPs jassumu t-trasformazzjoni tal-kollateral abbażi tal-liċenzja bankarja addizzjonali tagħhom (jekk permessa), l-eżenzjonijiet attwali mogħtija lilhom minn ċerti rekwiżiti bankarji prudenzjali fuq il-bażi li s-CCPs ma jkunux involuti f’attivitajiet bankarji tipiċi u li jkollhom mudell kummerċjali differenti, ma jidhrux li huma aktar raġonevoli. Għalhekk, analiżi ulterjuri tkun meħtieġa biex taċċerta n-natura legali, l-impatt tal-ġestjoni tar-riskju tas-CCP u l-konformità regolatorja ta’ kwalunkwe arranġament bħal dan. L-ewwel reazzjonijiet minn uħud mis-CCP urew ukoll ċertu xettiċiżmu.
Fir-rigward tal-ħtieġa għal garanzija ta’ kontinġenza tal-banek ċentrali potenzjali “dedikata” għall-PSAs (bil-PSAs isiru kontropartijiet għal banek ċentrali u jirċievu likwidità mingħandhom direttament), il-BĊE kkontribwixxa għad-dibattitu tal-grupp tal-partijiet ikkonċernati tal-Kummissjoni mill-perspettiva tal-Eurosistema, jiġifieri ffoka fuq il-ħtiġijiet ta’ finanzjament iddenominati f’euro ta’ entitajiet domiċiljati fiż-żona tal-euro. Il-valutazzjoni kwantitattiva tal-Eurosistema stmat il-ħtiġijiet ta’ likwidità tal-PSAs taż-żona tal-euro biex jissodisfaw il-marġni ta’ varjazzjoni f’xenarju ta’ stress abbażi ta’ bidla ta’ 1 % fir-rati (ara ukoll hawn fuq). Fiż-żona tal-euro, skont id-data disponibbli għall-Eurosistema, il-PSAs Netherlandiżi huma dawk l-aktar involuti fid-derivattivi, billi huma daħlu f’89 % tal-iswaps tar-rati tal-imgħax tal-fondi tal-pensjonijiet kollha. L-analiżi tal-Eurosistema sabet li l-ħtiġijiet ta’ likwidità attwali tal-PSAs taż-żona tal-euro f’tali ċirkostanza jkunu ġestibbli (jiġifieri inqas minn 2 %) meta mqabbla mad-daqs kumplessiv tas-suq repo Ewropew (irrappreżentati mill-ammont pendenti ta’ repos inversi), li tissuġġerixxi li s-suq repo per se jista’ joffri soluzzjonijiet għall-ħtiġijiet tal-PSAs taż-żona tal-euro. Abbażi tas-sejbiet, ġie konkluż li l-qafas tal-politika monetarja tal-Eurosistema, inkluż il-qafas tal-kontroparti tiegħu, huwa adegwat għall-finijiet ta’ implimentazzjoni tal-politika monetarja u ma jiġġustifikax bidliet biex tiġi stabbilita garanzija ta’ kontinġenza tal-likwidità dedikata tal-Eurosistema għall-PSAs.
4.KONKLUŻJONI
Il-kwistjoni tal-ikklerjar ċentrali tal-PSA ilha żmien twil, u matul l-aħħar negozjati tal-EMIR deher li l-koleġiżlaturi fittxu li jinkoraġġixxu kemm jista’ jkun soluzzjoni li permezz tagħha tali atturi jkunu jistgħu jaċċessaw is-sistema tal-ikklerjar ċentrali mfassla mir-riformi tal-G20 fl-2009, filwaqt li titqies il-ħtieġa li jkun hemm soluzzjonijiet adegwati fis-seħħ biex jakkomodaw it-tħassib f’sitwazzjoni ta’ stress fis-suq.
Saru diskussjonijiet twal fil-grupp tal-partijiet ikkonċernati tal-Kummissjoni, fejn irriżulta li l-PSAs diġà bdew jikklerjaw uħud mid-derivattivi volontarjament, u jista’ jiġi konkluż li l-kwistjoni ewlenija li għad trid tiġi solvuta hija l-kwistjoni tal-marġni ta’ varjazzjoni fi flus fi żminijiet ta’ kundizzjonijiet ta’ stress fis-suq.
Il-Kummissjoni ilha tissorvelja b’mod kostanti l-iżviluppi tas-suq u ffaċilitat l-iskambji u d-diskussjonijiet fost il-partijiet ikkonċernati rilevanti biex jinstabu soluzzjonijiet possibbli. Matul is-snin saru sforzi minn partijiet ikkonċernati tal-industrija. B’mod partikolari, ladarba l-opzjoni tad-depożitar tal-marġni ta’ varjazzjoni f’bonds direttament mas-CCPs eventwalment tneħħiet minħabba kwistjonijiet ta’ kompatibbiltà man-natura u l-mudell ta’ negozju tas-CCPs, ġew esplorati mezzi oħra sabiex il-PSAs ikunu jistgħu jittrasformaw aħjar il-kollateral.
Kif spjegat f’dan ir-rapport, matul dawn l-aħħar snin ġew żviluppati mudelli ta’ aċċess iffaċilitat sabiex jiġi esplorat mezz potenzjalment vijabbli għall-ikklerjar ċentrali tal-PSAs. Mill-aħjar għarfien tal-Kummissjoni, tali opzjoni diġà qed tintuża minn ftit PSAs. Il-Kummissjoni għandha l-intenzjoni li tesplora aktar din l-opzjoni mal-partijiet ikkonċernati rilevanti, inkluż il-kost tagħha għall-PSAs. Il-fatt li aktar minn CCP wieħed qed jadotta tali mudell jidher li huwa żvilupp pożittiv, anki f’termini ta’ promozzjoni ta’ aktar għażla.
Is-sejba ta’ soluzzjoni xierqa x’aktarx se tirrikjedi sforzi f’għadd ta’ oqsma differenti. Minn naħa, jenħtieġ li uħud mill-aspetti tar-regolamentazzjoni bankarja jiġu vvalutati aktar, inkluż jekk il-bidliet riċenti fil-kalkoli tal-proporzjon ta’ ingranaġġ ma għenux. Min-naħa l-oħra, jenħtieġ li jitqies liema modi ta’ żgurar ta’ faċilitajiet ta’ likwidità jistgħu jiġu esplorati għall-PSAs fi żminijiet ta’ stress.
Jenħtieġ li r-riżultati tal-konsultazzjoni pubblika mnedija mill-ESMA jipprovdu għarfien ulterjuri dwar l-iżviluppi riċenti tas-suq u possibbilment data kwantitattiva ulterjuri li se tiġi eżaminata bir-reqqa. Il-Kummissjoni hija impenjata wkoll li tesplora kwalunkwe inizjattiva xierqa u fattibbli sabiex timxi ’l quddiem lejn soluzzjoni tal-ikklerjar ċentrali vijabbli u robusta.
Dawn l-analiżijiet matul ix-xhur li ġejjin se jinformaw id-deċiżjoni tal-Kummissjoni fir-rigward tal-eżenzjoni tal-ikklerjar ċentrali.
