This document is an excerpt from the EUR-Lex website
Document 52020DC0050
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS Secure 5G deployment in the EU - Implementing the EU toolbox
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Introduzzjoni sigura tal-5G fl-UE - Implimentazzjoni tas-sett ta’ għodod tal-UE
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Introduzzjoni sigura tal-5G fl-UE - Implimentazzjoni tas-sett ta’ għodod tal-UE
COM/2020/50 final
IL-KUMMISSJONI EWROPEA
Brussell, 29.1.2020
COM(2020) 50 final
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI
Introduzzjoni sigura tal-5G fl-UE - Implimentazzjoni tas-sett ta’ għodod tal-UE
1.Introduzzjoni
Il-ħames ġenerazzjoni (5G) tan-netwerks tat-telekomunikazzjoni mistennija taqdi rwol importanti fl-iżvilupp tas-soċjetà u tal-ekonomija Ewropej. Mistennija tiftaħ opportunitajiet ekonomiċi vasti u tifrex bażi importanti għat-trasformazzjoni diġitali u ekoloġika f’oqsma bħat-trasport, l-enerġija, il-manifattura, is-saħħa, l-agrikoltura u l-midja.
Għalhekk, il-5G potenzjalment se tħalli impatt li jolqot mill-qrib l-aspetti kollha tal-ħajja taċ-ċittadini tal-UE. Għalhekk iċ-ċibersigurtà tan-netwerks 5G mhix biss essenzjali biex jitħarsu l-ekonomiji, is-soċjetajiet u l-proċessi demokratiċi tagħna, iżda anki biex tiġi żgurata trasformazzjoni diġitali ta’ fiduċja għall-benefiċċju taċ-ċittadini kollha tal-UE.
Jekk ħafna servizzi kritiċi jkunu jiddependu fuq in-netwerks 5G, il-konsegwenzi kkawżati b’xi tfixkil sistematiku u mifrux ikunu partikolarment serji u, minħabba n-natura interkonnessa tal-ekosistemi diġitali, dan jaf iħalli impatti sinifikanti lil hinn mill-fruntieri nazzjonali. Għaldaqstant, li niżguraw iċ-ċibersigurtà tan-netwerks 5G hi kwistjoni ta’ importanza strateġika għall-Unjoni, issa li l-attakki ċibernetiċi qed kulma jmur jiżdiedu, qed ikunu dejjem aktar sofistikati u jsiru minn firxa wiesgħa ta’ atturi tat-theddid, b’mod partikolari minn atturi ta’ stati jew appoġġati minn stati li mhumiex fl-UE. Fir-rigward tas-sigurtà tal-infrastrutturi kritiċi bħall-5G, l-approċċ magħżul hu li għall-ewwel darba jiġi definit approċċ Ewropew komuni. Dan l-approċċ jirrispetta bis-sħiħ il-ftuħ tas-suq intern tal-UE diment li jiġu rispettati r-rekwiżiti tas-sigurtà tal-UE bbażati fuq ir-riskji.
Il-Kunsill Ewropew tat-22 ta’ Marzu 2019 appella għal approċċ miftiehem fir-rigward tas-sigurtà tan-netwerks 5G. Fis-26 ta’ Marzu 2019, il-Kummissjoni adottat ir-Rakkomandazzjoni (UE) 2019/534 dwar iċ-ċibersigurtà tan-netwerks 5G 1 . Il-Kummissjoni talbet lill-Istati Membri jlestu valutazzjonijiet tar-riskju nazzjonali u jeżaminaw mill-ġdid il-miżuri nazzjonali, u li jaħdmu flimkien fil-livell tal-UE fuq valutazzjoni tar-riskju koordinata u fuq sett ta’ għodod komuni għal miżuri ta’ mitigazzjoni possibbli. Din il-Komunikazzjoni tifforma parti integrali mill-istrateġija diġitali Ewropea komprensiva tal-Kummissjoni, kif mitlub mill-Kunsill Ewropew.
2.L-introduzzjoni tal-5G fl-UE
Għall-istrateġija industrijali u l-kompetittività Ewropej hu importanti ferm li fl-Ewropa tiġi introdotta infrastruttura tan-netwerk 5G. Il-Kummissjoni rrikonoxxiet l-introduzzjoni ta’ teknoloġiji tan-netwerk 5G bħala xprunatur ewlieni għas-servizzi diġitali futuri. Fl-2016, il-Kummissjoni adottat il-Pjan ta’ Azzjoni tal-5G biex tiżgura li l-Unjoni jkollha l-infrastruttura tal-konnettività meħtieġa għat-trasformazzjoni diġitali tagħha mill-2020 ’il quddiem u għal introduzzjoni komprensiva fiż-żoni urbani u fir-rotot ewlenin tat-trasport sal-2025 2 . Il-Komunikazzjoni dwar is-Soċjetà tal-Gigabits tistabbilixxi l-ambizzjoni li jenħtieġ ikun hemm aċċess għal konnettività mobbli tad-data kullimkien 3 , anki fiż-żoni rurali u remoti.
Fir-rigward tal-assenjament tal-frekwenzi, l-Istati Membri assenjaw 16 % tal-baned pijunieri tal-5G 4 . Fix-xhur li ġejjin mistennija jsiru konsultazzjonijiet għal għadd ta’ proċeduri ta’ assenjament fid-dawl tal-obbligu ġuridiku li jitħalla l-użu tal-baned pijunieri tal-5G kollha sa tmiem is-sena.
L-Ewropa hi waħda mill-aktar reġjuni avvanzati fid-dinja fir-rigward tat-tnedija kummerċjali tas-servizzi 5G 5 . S’issa, hemm 138 belt Ewropea li mistennija jkollhom l-ewwel servizzi 5G sa tmiem l-2020. In-netwerks 5G bikrija jibnu fuq ir-raba’ ġenerazzjoni (4G) attwali tat-teknoloġiji tan-netwerk u s-servizzi 5G huma pprovduti l-aktar għall-pubbliku ġenerali, bħala avvanz fuq il-4G mil-lat ta’ kapaċità u veloċità jew bħala alternattiva mingħajr fili kosteffikaċi għan-netwerks fissi 6 .
Fir-rigward tal-opportunitajiet fis-servizzi ġodda minn negozju għal negozju, fosthom fis-setturi tal-enerġija, tal-ikel u tal-agrikoltura, tal-kura tas-saħħa, tal-manifattura jew tat-trasport, l-Ewropa hi avvanzata sew b’investiment ta’ madwar EUR 1 biljun, li jinkludu finanzjament ta’ EUR 300 miljun mingħand l-UE fil-kuntest tas-Sħubija Pubblika Privata tal-5G permezz ta’ Orizzont 2020. Dan l-investiment jinkludi aktar minn 160 prova tal-5G fuq skala kbira li huma identifikati fl-Ewropa, fosthom għaxar kurituri ta’ awtostradi transfruntieri biex isir ittestjar fuq skala kbira ta’ servizzi tal-Mobbiltà Konnessa u Awtomatizzata abbażi tal-5G. Il-provi jinkludu applikazzjonijiet b’kapaċità tal-5G f’oqsma li jvarjaw mill-kura tas-saħħa sostenibbli, il-mobbiltà awtomatizzata u l-agrikoltura effiċjenti fl-użu tar-riżorsi, san-netwerks intelliġenti tal-elettriku u l-Industrija 4.0. Barra minn hekk, il-BEI appoġġa l-Fond Ewropew għall-Investimenti Strateġiċi li jipprovdi self biex iħaffef ir-riċerka u l-iżvilupp fit-teknoloġija 5G.
Il-Kodiċi Ewropew għall-Komunikazzjoni Elettronika (“Il-Kodiċi”) 7 li se jibda japplika mill-21 ta’ Diċembru 2020 hu bażi importanti biex jinħoloq ambjent favorevoli għall-investiment għan-netwerks 5G u aktar minn hekk. Barra minn hekk, anki l-programmi ta’ finanzjament pubbliku, bħall-Faċilità Nikkollegaw l-Ewropa Diġitali 8 jew il-Fondi Strutturali u ta’ Investiment Ewropej, se jkunu essenzjali biex jappoġġaw l-introduzzjoni futura tan-netwerks 5G, b’mod partikolari biex jissawru konnessjonijiet bejn il-komunitajiet u s-servizzi b’kapaċità tal-5G, bħall-iskejjel, l-isptarijiet, il-bliet u l-amministrazzjonijiet lokali.
Meta wieħed iqis l-opportunitajiet strateġiċi tal-Ewropa fis-servizzi 5G għad-diversi industriji, hu ferm importanti li l-operaturi u l-fornituri tas-servizzi jinvestu f’soluzzjonijiet avvanzati ta’ netwerks u servizzi 5G. Dawn mhux biss se jkunu jeħtieġu netwerks ġodda tar-radju 5G iżda wkoll netwerks ewlenin 5G imsejħa “awtonomi”, biex jiġu pprovduti funzjonalitajiet avvanzati tal-5G bħall-partizzjoni tan-netwerks (in-network slicing) 9 u l-edge computing 10 .
Il-Kummissjoni se tibqa’ tappoġġa bis-sħiħ l-introduzzjoni b’suċċess tal-5G fl-UE, inkluż b’involviment mal-Istati Membri u mal-partijiet konċernati ħalli jaħtfu l-opportunitajiet tal-5G. Se jitqiesu kif xieraq l-aspetti tas-saħħa rilevanti, abbażi tal-prinċipju ta’ prekawzjoni 11 , b’kooperazzjoni mal-organizzazzjonijiet internazzjonali rilevanti u mal-komunità xjentifika.
3. Il-Valutazzjoni tar-Riskju Koordinata tal-UE dwar iċ-Ċibersigurtà tan-Netwerks 5G
Fil-Grupp ta’ Kooperazzjoni tal-NIS 12 , kull Stat Membru lesta l-valutazzjoni tar-riskju nazzjonali tiegħu tal-infrastrutturi tan-netwerks 5G tiegħu u bagħat ir-riżultati lill-Kummissjoni u lill-ENISA, lill-Aġenzija tal-Unjoni Ewropea għaċ-Ċibersigurtà, sal-bidu ta’ Lulju 2019.
Abbażi ta’ dawn il-valutazzjonijiet tar-riskju nazzjonali, fid-9 ta’ Ottubru 2019, il-Grupp ta’ Kooperazzjoni tal-NIS, magħmul minn rappreżentanti tal-Istati Membri, tal-Kummissjoni u tal-ENISA, ippubblika rapport dwar il-Valutazzjoni tar-Riskju Koordinata tal-UE dwar iċ-Ċibersigurtà tan-Netwerks 5G 13 . Ir-rapport jidentifika t-theddidiet u l-atturi ewlenin tat-theddid, l-aktar assi sensittivi, u l-vulnerabbiltajiet ewlenin (inkluż dawk tekniċi u tipi oħra ta’ vulnerabbiltajiet) li jaffettwaw in-netwerks 5G. Abbażi ta’ dan, ir-rapport jidentifika wkoll għadd ta’ kategoriji ta’ riskji b’importanza strateġika minn perspettiva tal-UE murija b’xenarji ta’ riskji konkreti, li jirriflettu l-kombinazzjonijiet rilevanti ta’ parametri differenti (vulnerabbiltajiet, theddid u atturi tat-theddid) fir-rigward tal-assi differenti (ara l-Anness).
Biex tikkumplimenta dan ir-rapport u bħala kontribut ulterjuri għas-sett ta’ għodod, l-ENISA wettqet immappjar apposta għax-xenarji tat-theddid 14 , li jikkonsisti minn analiżi dettaljata ta’ ċerti aspetti tekniċi, b’mod partikolari l-identifikazzjoni ta’ assi tan-netwerks u tat-theddid li jaffettwahom.
Ir-rapport tal-Valutazzjoni tar-Riskju Koordinata tal-UE joħroġ fid-dieher bosta aspetti ta’ importanza għan-netwerks 5G. Speċifikament:
a) Il-bidliet teknoloġiċi introdotti bil-5G se jżidu s-superfiċje ġenerali suxxettibbli għall-attakki u l-għadd ta’ punti potenzjali tad-dħul għall-aggressuri:
- B’funzjonalità msaħħa fit-tarf tan-netwerk u arkitettura inqas ċentralizzata mill-ġenerazzjonijiet preċedenti tan-netwerks mobbli jfisser li xi funzjonijiet tan-netwerks ewlenin jistgħu jiġu integrati f’partijiet oħra tan-netwerks u b’hekk it-tagħmir korrispondenti jsir aktar sensittiv (eż. stazzjonijiet bażi jew funzjonijiet MANO);
- Il-parti miżjuda tas-softwer fit-tagħmir 5G twassal għal aktar riskji marbuta mal-proċessi tal-iżvilupp u tal-aġġornament tas-softwer, toħloq riskji ġodda ta’ erruri tal-konfigurazzjoni, u fl-analiżi tas-sigurtà tagħti rwol aktar importanti lill-għażliet li jagħmel kull operatur tan-netwerk mobbli waqt il-fażi tal-introduzzjoni tan-netwerk;
b) Dawn il-karatteristiċi teknoloġiċi ġodda se jagħtu tifsira akbar lill-dipendenza tal-operaturi tan-netwerk mobbli fuq fornituri terzi u r-rwol tagħhom fil-katina tal-forniment tal-5G.
Dan, min-naħa l-oħra, iżid l-għadd ta’ mogħdijiet tal-attakki li jistgħu jisfruttaw l-atturi tat-theddid, b’mod partikolari l-atturi ta’ stati jew appoġġati minn stati li mhumiex fl-UE, minħabba l-kapaċitajiet tagħhom (l-intenzjoni u r-riżorsi) biex iwettqu attakki kontra n-netwerks tat-telekomunikazzjoni tal-Istati Membri tal-UE, kif ukoll il-gravità potenzjali tal-impatt ta’ attakki bħal dawn.
F’dan il-kuntest ta’ esponiment akbar għall-attakki ffaċilitati minn fornituri terzi, il-profil individwali tar-riskji tal-fornituri se jkollu importanza kbira, b’mod partikolari meta l-fornitur ikollu preżenza sinifikanti fin-netwerks jew fiż-żoni.
c) Jekk ikollok dipendenza kbira fuq fornitur wieħed, jiżdiedu l-esponiment u l-konsegwenzi ta’ falliment potenzjali ta’ dan il-fornitur. Din taggrava wkoll il-konsegwenzi potenzjali tad-dgħjufijiet jew tal-vulnerabbiltajiet, u tal-isfruttament possibbli tagħhom mill-atturi tat-theddid, l-aktar meta d-dipendenza jkollha x’taqsam ma’ fornitur li għandu livell għoli ta’ riskju.
d) Jekk uħud mill-każijiet ġodda tal-użu previsti għall-5G jiksbu riżultati pożittivi, in-netwerks 5G isiru parti importanti mill-katina tal-forniment ta’ ħafna applikazzjonijiet kritiċi tal-IT, u għaldaqstant mhux jkunu affettwati biss ir-rekwiżiti tal-kunfidenzjalità u tal-privatezza, iżda anki l-integrità u d-disponibbiltà ta’ dawk in-netwerks se jsiru kwistjoni nazzjonali ewlenija ta’ tħassib għas-sigurtà, u sfida kbira għas-sigurtà minn perspettiva tal-UE.
Sors: il-Valutazzjoni tar-Riskju Koordinata tal-UE
Barra minn hekk, ir-rapport tal-Valutazzjoni tar-Riskju Koordinata tal-UE jikkonkludi li dawn l-isfidi joħolqu paradigma ġdida tas-sigurtà, u għaldaqtant ikun meħtieġ li ssir valutazzjoni mill-ġdid tal-qafas tal-politika u tas-sigurtà attwali li japplika għas-settur tal-5G u għall-ekosistema tiegħu, u li jsir essenzjali li l-Istati Membri jieħdu l-miżuri tal-mitigazzjoni meħtieġa.
Biex jiġu indirizzati r-riskji identifikati b’mod effettiv u jissaħħu s-sigurtà u r-reżiljenza tan-netwerks 5G, hemm bżonn approċċ komprensiv, jiġifieri li jiddaħħlu fis-seħħ sett ta’ miżuri ewlenin u l-azzjonijiet ta’ appoġġ relatati li jistgħu jindirizzaw ir-riskji fl-istess ħin. Il-Valutazzjoni tar-Riskju Koordinata tal-UE firxet il-bażi biex jiġu identifikati miżuri tal-mitigazzjoni li jistgħu jiġu applikati fil-livell nazzjonali u Ewropew.
Il-Konklużjonijiet tal-Kunsill tat-3 ta’ Diċembru 2019 appoġġaw is-sejbiet tal-Valutazzjoni tar-Riskju Koordinata u saħqu fuq “l-importanza ta’ approċċ koordinat u l-implimentazzjoni effettiva tar-Rakkomandazzjoni biex tkun evitata l-frammentazzjoni fis-Suq Uniku” 15 . Għal dan il-għan, il-Kunsill appella lill-Istati Membri, lill-Kummissjoni u lill-ENISA, biex “jieħdu l-miżuri meħtieġa kollha fil-kompetenzi tagħhom biex jiżguraw is-sigurtà u l-integrità tan-netwerks tal-komunikazzjoni elettronika, b’mod partikolari n-netwerks 5G u biex ikomplu jikkonsolidaw approċċ koordinat ħalli jindirizzaw l-isfidi tas-sigurtà relatati mat-teknoloġiji 5G.”
4. Is-sett ta’ għodod tal-UE dwar iċ-ċibersigurtà tal-5G
Fid-29 ta’ Jannar 2020, il-Grupp ta’ Kooperazzjoni tal-NIS ippubblika s-sett ta’ għodod tal-UE għal miżuri tal-mitigazzjoni tar-riskji 16 . Dan jindirizza r-riskji kollha identifikati fir-rapport tal-Valutazzjoni tar-Riskju Koordinata.
Is-sett ta’ għodod tal-UE jidentifika u jiddeskrivi sett ta’ miżuri strateġiċi u tekniċi, kif ukoll azzjonijiet ta’ appoġġ korrispondenti biex isaħħu l-effettività tagħhom, li jeħtieġ jiddaħħlu fis-seħħ biex itaffu r-riskji identifikati. Il-miżuri strateġiċi jkopru l-miżuri li jikkonċernaw is-setgħat regolatorji miżjuda għall-awtoritajiet biex iwettqu skrutinju tal-akkwist u tal-introduzzjoni tan-netwerks, miżuri speċifiċi li jindirizzaw ir-riskji relatati mal-vulnerabbiltajiet mhux tekniċi, u inizjattivi possibbli li jippromwovu katina tal-forniment u tal-valur sostenibbli u diversi tal-5G biex ikunu evitati riskji sistemiċi u ta’ dipendenza fit-tul. Il-miżuri tekniċi jinkludu miżuri li jsaħħu s-sigurtà tan-netwerks u tat-tagħmir 5G billi jindirizzaw ir-riskji li jinħolqu permezz ta’ teknoloġiji, proċessi, fatturi umani u fiżiċi. Barra minn hekk, għal kull qasam tar-riskju identifikat fil-Valutazzjoni tar-Riskju Koordinata tal-UE, dan jipprovdi pjanijiet ta’ mitigazzjoni tar-riskju bbażati fuq l-aqwa miżuri ta’ effettività.
Fosthom, il-konklużjonijiet tas-sett ta’ għodod tal-UE, kif maqbul mill-Grupp ta’ Kooperazzjoni tal-NIS, jirrakkomanda sett ta’ miżuri ewlenin li jrid jiġi jimplimentat mill-Istati Membri kollha u mill-Kummissjoni, kif ġej:
Il-konklużjonijiet tas-sett ta’ għodod tal-UE
Is-sett ta’ għodod tal-UE jistabbilixxi firxa ta’ miżuri u azzjonijiet li, jekk jiġu kkombinati sew u implimentati b’mod effettiv, dawn jiffurmaw il-bażi għal approċċ koordinat f’dan il-qasam. Fil-fatt, minħabba l-firxa wiesgħa ta’ oqsma tar-riskju identifikati fil-Valutazzjoni tar-Riskju Koordinata tal-UE u n-natura differenti tagħhom, l-ebda tip ta’ miżura ma tkun biżżejjed u minflok se jkun hemm bżonn tintuża taħlita xierqa ta’ firxa ta’ miżuri biex jiġu indirizzati l-oqsma tar-riskju ewlenin kollha.
Abbażi tal-valutazzjoni tal-pjanijiet ta’ mitigazzjoni possibbli u l-identifikazzjoni tal-aqwa miżuri ta’ effettività, dan is-sett ta’ għodod jirrakkomanda li:
1. L-Istati Membri kollha jenħtieġ jiżguraw li daħħlu miżuri fis-seħħ (inkluż setgħat lill-awtoritajiet nazzjonali) biex iwieġbu b’mod xieraq u proporzjonat għar-riskji identifikati bħalissa u r-riskji futuri, u b’mod partikolari jiżguraw li jkunu kapaċi jillimitaw, jipprojbixxu, u/jew jimponu rekwiżiti jew kundizzjonijiet speċifiċi, b’approċċ ibbażat fuq ir-riskji, għall-forniment, l-introduzzjoni u t-tħaddim tat-tagħmir tan-netwerk 5G abbażi ta’ firxa ta’ raġunijiet relatati mas-sigurtà.
B’mod partikolari, jenħtieġ li:
Issaħħu r-rekwiżiti tas-sigurtà għall-operaturi tan-netwerks mobbli (eż. kontrolli stretti tal-aċċess, regoli dwar it-tħaddim sikur u l-monitoraġġ, limitazzjonijiet fuq l-esternalizzazzjoni ta’ funzjonijiet speċifiċi, eċċ.);
Jivvalutaw il-profil tar-riskju tal-fornituri; u bħala konsegwenza, japplikaw restrizzjonijiet rilevanti għall-fornituri meqjusa li għandhom riskju kbir – inkluż l-esklużjonijiet meħtieġa biex ir-riskji jittaffew b’mod effettiv – għall-assi ewlenin definiti bħala kritiċi u sensittivi fil-Valutazzjoni tar-Riskju Koordinata tal-UE (eż. funzjonijiet tan-netwerk ewlieni, ġestjoni tan-netwerk u funzjonijiet ta’ orkestrazzjoni, u funzjonijiet tan-netwerk tal-aċċess);
Jiżguraw li kull operatur ikollu strateġija xierqa bejn diversi bejjiegħa biex jevita jew jillimita kull dipendenza qawwija fuq fornitur wieħed (jew fornituri bi profil tar-riskju simili), jiżguraw bilanċ adegwat tal-fornituri fil-livell nazzjonali u jevitaw id-dipendenza fuq fornituri meqjusa li għandhom riskju kbir; jeħtieġ ukoll jiġu evitati s-sitwazzjoni ta’ lock-in ma’ xi fornitur partikolari, fosthom billi tiġi promossa interoperabbiltà akbar tat-tagħmir.
2. Il-Kummissjoni Ewropea, flimkien mal-Istati Membri, jenħtieġ tikkontribwixxi biex:
Tinżamm katina tal-forniment tal-5G diversifikata u sostenibbli biex tiġi evitata d-dipendenza fit-tul, inkluż billi:
o Jintużaw għalkollox l-għodod u l-istrumenti eżistenti tal-UE, b’mod partikolari permezz tal-iskrinjar ta’ investimenti diretti barranin (FDIs) potenzjali li jaffettwaw l-assi ewlenin tal-5G u billi jiġu evitati distorsjonijiet fis-suq tal-forniment tal-5G li jirriżultaw minn dumping jew sussidji potenzjali; kif ukoll
o Ikomplu jissaħħu l-kapaċitajiet tal-UE fit-teknoloġiji 5G u post-5G, bl-użu ta’ programmi u finanzjament rilevanti tal-UE.
Teħfief il-koordinazzjoni bejn l-Istati Membri rigward l-istandardizzazzjoni biex jinkisbu objettivi speċifiċi tas-sigurtà u jiġu żviluppati skema/i taċ-ċertifikazzjoni rilevanti għall-UE kollha għall-promozzjoni ta’ prodotti u proċessi aktar siguri.
3. Biex ikun żgurat li dan l-approċċ koordinat jitħaddem fit-tul, jenħtieġ jiġu estiżi l-mandat tal-Fluss ta’ Ħidma tal-Grupp ta’ Kooperazzjoni tal-NIS u l-kooperazzjoni ma’ korpi u entitajiet rilevanti oħra, b’mod partikolari biex:
Isir rieżami minn żmien għal żmien – bl-appoġġ tal-Kummissjoni u tal-ENISA – tal-valutazzjonijiet tar-riskju nazzjonali u tal-UE dwar is-sigurtà tan-netwerks 5G u post-5G, u tibqa’ tiġi elaborata u allinjata l-metodoloġija segwita għall-valutazzjoni, u adattata għat-teknoloġija 5G li qed tevolvi;
Isiru monitoraġġ u evalwazzjoni dettaljati u regolari tal-implimentazzjoni tas-sett ta’ għodod, abbażi tar-rappurtar strutturat mill-Istati Membri;
Tiġi kkoordinata u appoġġata l-implimentazzjoni tal-azzjonijiet ta’ appoġġ, li jeħtieġu kooperazzjoni fil-livell tal-UE, b’mod partikolari fir-rigward tal-elaborazzjoni ta’ gwida u l-iskambju tal-awqa prattiki dwar id-diversi miżuri;
Tiġi appoġġata aktar koordinazzjoni possibbli fil-livell tal-UE fejn xieraq, b’mod partikolari biex tinkiseb aktar konverġenza fir-rigward tar-rekwiżiti tas-sigurtà tekniċi u organizzattivi għall-operaturi tan-netwerk.
Sors: is-sett ta’ għodod tal-UE.
Il-konklużjonijiet tas-sett ta’ għodod juru r-rieda qawwija tal-Istati Membri li jirrispondu b’mod konġunt għall-isfidi tas-sigurtà tan-netwerks 5G. Dan għandu importanza fundamentali għas-sigurtà fi ħdan l-Istati Membri u madwar l-UE, għall-ekonomiji nazzjonali kif ukoll għas-suq intern tal-UE u s-sovranità teknoloġika tal-Ewropa. Kemm il-Valutazzjoni tar-Riskju Koordinata tal-UE kif ukoll is-sett ta’ għodod tal-UE juru l-valur għoli tal-ħidma kollettiva li saret fil-Grupp ta’ Kooperazzjoni tal-NIS, bil-kollaborazzjoni intensiva bejn ir-rappreżentanti mill-Istati Membri kollha, il-Kummissjoni u l-ENISA.
Bis-sett ta’ għodod jista’ jitħaddem approċċ komuni tal-UE għaċ-ċibersigurtà tal-5G, li jappoġġa l-konsistenza fis-suq intern kollu permezz ta’ politiki u koordinazzjoni tal-UE, u li jiġu eżerċitati l-kompetenzi tal-Istati Membri, b’mod partikolari fir-rigward tas-sigurtà nazzjonali. Bil-miżuri tal-mitigazzjoni u bil-pjanijiet ta’ mitigazzjoni li dan jinkludi, ikun jista’ jsir rispons xieraq, effettiv u proporzjonat tal-UE għall-isfidi komuni taċ-ċibersigurtà tal-5G.
Il-Kummissjoni tilqa’ l-pubblikazzjoni tas-sett ta’ għodod tal-UE dwar iċ-ċibersigurtà tal-5G u tappoġġa bis-sħiħ il-konklużjonijiet kollha tiegħu msemmija hawn fuq.
Il-Kummissjoni tappella lill-Istati Membri u lill-istituzzjonijiet, lill-aġenziji u lill-korpi l-oħra rilevanti tal-Unjoni biex:
(i) jiżguraw l-implimentazzjoni rapida ta’ strateġiji effettivi u xierqa ta’ mitigazzjoni tar-riskji madwar l-UE skont is-sett ta’ għodod tal-UE, u
(ii) jieħdu kull passi ulterjuri meħtieġ biex jiżguraw il-koordinazzjoni fil-livell tal-Unjoni, inkluż permezz ta’ ħidma kontinwa fi ħdan il-Grupp ta’ Kooperazzjoni tal-NIS u t-twaqqif ta’ mekkaniżmu sod għall-monitoraġġ tal-implimentazzjoni tas-sett ta’ għodod tal-UE, biex tiġi żgurata l-effettività tal-miżuri u l-funzjonament bla xkiel tas-suq intern.
5. L-implimentazzjoni tas-sett ta’ għodod
Id-determinazzjoni tal-Istati Membri li jużaw bis-sħiħ is-sett ta’ għodod hi essenzjali għal approċċ Ewropew kredibbli u ta’ suċċess għas-sigurtà tal-5G. Filwaqt li l-Istati Membri se jiddeċiedu dwar l-adegwatezza ta’ miżura partikolari abbażi taċ-ċirkostanzi nazzjonali, hu assolutament essenzjali li f’kull Stat Membru jiddaħħal fis-seħħ sett ta’ miżuri ewlenin, kif rakkomandat mill-Grupp ta’ Kooperazzjoni tal-NIS (ara l-konklużjonijiet tas-sett ta’ għodod imsemmija hawn fuq), u wħud mill-miżuri jittieħdu fil-livell tal-UE, biex jiġu indirizzati r-riskji identifikati.
Il-Kummissjoni lesta tibqa’ tipprovdi l-appoġġ sħiħ tagħha tul il-fażijiet li jmiss u tappella lill-Istati Membri biex:
- sat-30 ta’ April 2020, jieħdu passi konkreti u miżurabbli biex jiġi implimentat is-sett ta’ miżuri ewlenin rakkomandat fil-konklużjonijiet tas-sett ta’ għodod tal-UE;
- sat-30 ta’ Ġunju 2020, iħejju rapport mill-Grupp ta’ Kooperazzjoni tal-NIS dwar l-istat tal-implimentazzjoni ta’ dawn il-miżuri ewlenin f’kull Stat Membru, abbażi tar-rappurtar u l-monitoraġġ regolari mwettqa b’mod partikolari fil-Grupp ta’ Kooperazzjoni tal-NIS, bl-appoġġ tal-Kummissjoni u tal-ENISA.
5.1. Approċċ miftiehem abbażi tar-riskji għall-fornituri tal-5G
Minħabba l-objettiv aħħari li jiżguraw is-sigurtà u r-reżiljenza tan-netwerks 5G u s-sostenibbiltà tagħhom, l-Istati Membri qablu dwar il-ħtieġa li jivvalutaw il-profil tar-riskju tal-fornituri individwali u, għaldaqstant li japplikaw restrizzjonijiet rilevanti għall-fornituri meqjusa li għandhom riskju kbir, inkluż l-esklużjonijiet meħtieġa biex ir-riskji jittaffew b’mod effettiv, għall-assi ewlenin, kif indikat fis-sett ta’ għodod. Il-Kummissjoni lesta tappoġġa lill-Istati Membri fl-implimentazzjoni ta’ dawn il-miżuri.
Biex jappoġġaw l-implimentazzjoni tagħhom madwar l-UE, il-Valutazzjoni tar-Riskju Koordinata tal-UE u s-sett ta’ għodod tal-UE jipprovdu gwida dwar (1) il-valutazzjoni tal-profil tar-riskju tal-fornituri 17 u (2) is-sensittività tal-elementi u l-funzjonijiet tan-netwerks 18 , kif ukoll ta’ assi oħrajn. Il-Valutazzjoni tar-Riskju Koordinata tal-UE u l-miżuri tas-sett ta’ għodod ikopru r-riskji relatati mal-fornituri tat-tagħmir tan-netwerk 5G u tas-servizzi tan-netwerk 5G. Dawn ma jkoprux il-prodotti jew is-servizzi l-oħra li dawn il-fornituri jew fornituri oħra jistgħu jipprovdu.
Kif definit fil-paragrafu 2.37 tal-Valutazzjoni tar-Riskju Koordinata tal-UE, il-profili tar-riskju tal-fornituri individwali jistgħu jiġu vvalutati abbażi ta’ diversi fatturi.
Jenħtieġ li l-valutazzjoni tal-profili tar-riskju tal-fornituri ssir biss minħabba raġunijiet ta’ sigurtà u abbażi ta’ kriterji oġġettivi. Biex jiġi ffaċilitat approċċ koordinat dwar l-implimentazzjoni ta’ dawn il-miżuri, is-sett ta’ għodod jirrakkomanda li l-Istati Membri jiskambjaw l-informazzjoni dwar approċċi nazzjonali u l-aqwa prattiki. Barra minn hekk, il-Kummissjoni hi tal-fehma li din l-azzjoni jenħtieġ tkun waħda mill-ewwel prijoritajiet tal-fażi li jmiss tal-ħidma fi ħdan il-Grupp ta’ Kooperazzjoni tal-NIS, flimkien mal-Kummissjoni u mal-ENISA.
Hu importanti li r-restrizzjonijiet li jikkonċernaw il-fornituri meqjusa li għandhom riskju kbir, inkluż l-esklużjonijiet meħtieġa biex jittaffew ir-riskji b’mod effettiv, kif ukoll il-miżuri biex tkun evitata d-dipendenza fuq dawn il-fornituri, jittieħdu fil-ħin opportun. Meta dan isir fl-aktar stadju bikri, inkluż meta possibbli b’rabta mal-proċessi ta’ liċenzjar tal-frekwenzi 5G, dan iżid ukoll il-prevedibbiltà għall-operaturi tas-suq, u b’hekk jikkontribwixxi għal introduzzjoni rapida tan-netwerks 5G, u jiżgura s-sigurtà fit-tul tan-netwerks 5G u r-reżiljenza tal-katina tal-forniment tal-5G.
Fl-istess ħin, l-implimentazzjoni nazzjonali ta’ dawn il-miżuri tista’ tispeċifika skedi taż-żmien differenti, meta meħtieġ u ġustifikat, b’mod partikolari fil-każ ta’ livell għoli ta’ dipendenza eżistenti fuq it-tagħmir jew s-servizzi ta’ fornituri valutati li għandhom riskju kbir ( eż. billi jitqiesu ċ-ċikli ta’ aġġornament tat-tagħmir, b’mod partikolari l-migrazzjoni minn netwerks 5G “mhux awtonomi” għal netwerks 5G “awtonomi”). L-Istati Membri jistgħu jqisu li jiddefinixxu pjanijiet ta’ implimentazzjoni li jistgħu jinkludu perjodi xierqa tat-tranżizzjoni għall-operaturi tan-netwerk konċernati. F’dan il-kuntest, il-perjodi tat-tranżizzjoni jenħtieġ jiġu definiti b’tali mod li jippriżervaw jew saħansitra jsaħħu l-inċentivi għal investimenti f’tagħmir tan-netwerk modern, inkluż li jħaffu l-introduzzjoni ta’ netwerks ewlenin 5G (“awtonomi”) kompluti li jissostitwixxu t-tagħmir 4G eżistenti f’partijiet oħra tan-netwerks (eż. fin-Netwerk tal-Aċċess bir-Radju ), f’konformità mal-objettivi tal-Pjan ta’ Azzjoni tal-5G 19 .
Barra minn hekk, minħabba l-kumplessità tan-netwerks 5G bbażati fuq is-softwer, l-operaturi tat-telekomunikazzjoni jistgħu jiddependu dejjem aktar fuq entitajiet ta’ parti terza biex iwettqu ċerti kompiti, bħall-manutenzjoni u l-aġġornament tan-netwerks 5G u tas-softwer 5G, kif ukoll servizzi oħra ġestiti b’kuntratt estern, apparti l-forniment tat-tagħmir tan-netwerk. Kif deskritt fil-Valutazzjoni tar-Riskju Koordinata tal-UE, dan jikkostitwixxi sors ta’ riskju serju għas-sigurtà. Għalhekk jenħtieġ tingħata attenzjoni partikolari lil dan l-aspett. Hu essenzjali li ssir ukoll valutazzjoni bir-reqqa tas-sigurtà tal-profil tar-riskju tal-fornituri inkarigati b’dawn is-servizzi, b’mod partikolari meta dawn il-kompiti ma jsirux fl-UE. Jenħtieġ jittieħdu miżuri xierqa, fosthom li jiġu applikati restrizzjonijiet b’mod partikolari fil-partijiet sensittivi tan-netwerks 5G jew l-esklużjoni meħtieġa ta’ entitajiet li għandhom riskju kbir, f’konformità mal-miżuri tal-mitigazzjoni tas-sett ta’ għodod, biex tinżamm l-integrità fit-tul tal-infrastruttura 5G.
5.2. Ir-rwol tal-Kummissjoni fejn jidħol l-appoġġ tal-implimentazzjoni tas-sett ta’ għodod
Il-Kummissjoni se tibqa’ tappoġġa l-implimentazzjoni tal-approċċ tal-UE dwar iċ-ċibersigurtà tal-5G b’mod ġenerali, u se tieħu inizjattivi speċifiċi b’rabta mal-miżuri u l-objettivi tas-sett ta’ għodod fejn din tista’ żżid il-valur. Il-Kummissjoni se tuża bis-sħiħ il-kompetenzi u l-istrumenti rilevanti tagħha sa fejn ikun meħtieġ biex jiġu indirizzati l-kunsiderazzjonijiet tas-sigurtà identifikati. Billi tagħmel dan, u billi taġixxi b’mod kollettiv flimkien mal-Istati Membri u mas-settur privat, il-Kummissjoni se tagħmel il-parti tagħha biex tappoġġa miżuri strateġiċi li se jikkontribwixxu biex jiżguraw is-sovranità u t-tmexxija teknoloġiċi tal-UE fl-iżvilupp futur tat-teknoloġiji tan-netwerk, fit-teknoloġiji taċ-ċibersigurtà u f’kull elementi kostitwenti rilevanti li fuqu jiddependu l-ekonomija u s-sigurtà kollha tagħna.
B’mod aktar speċifiku, il-Kummissjoni se twettaq dan li ġej biex tiżgura l-implimentazzjoni tal-miżuri tal-mitigazzjoni korrispondenti fis-sett ta’ għodod fl-oqsma li huma fil-kompetenza tagħha:
Nissalvagwardjaw iċ-ċibersigurtà tan-netwerks 5G u katina tal-valur diversa tal-5G:
- Kooperazzjoni fiċ-ċibersigurtà: Tibqa’ tipprovdi appoġġ lill-Istati Membri għall-implimentazzjoni effettiva, koordinata u fil-ħin tal-miżuri nazzjonali permezz tal-Grupp ta’ Kooperazzjoni tal-NIS.
- Ir-regoli dwar it-telekomunikazzjoni u ċ-ċibersigurtà: Tipprovdi appoġġ għall-implimentazzjoni tal-miżuri tas-sett ta’ għodod li għandhom x’jaqsmu mar-rekwiżiti tas-sigurtà, l-aktar fir-rigward tad-dispożizzjonijiet rilevanti skont ir-regoli Ewropej dwar il-komunikazzjoni elettronika, u tikkunsidra l-valur miżjud ta’ atti possibbli tal-implimentazzjoni li jagħti dettalji dwar miżuri tekniċi u organizzattivi tas-sigurtà biex ikunu jikkumplimentaw ir-regoli nazzjonali u jissaħħu l-effettività u l-konsistenza tal-miżuri tas-sigurtà imposti fuq l-operaturi.
- L-istandardizzazzjoni: Tieħu azzjoni ħalli tgħin biex tinżamm u, meta meħtieġ, iżżid il-parteċipazzjoni Ewropea fil-korpi tal-istandardizzazzjoni rispettivi, biex jintlaħqu l-objettivi tal-Ewropa dwar is-sigurtà u l-interoperabbiltà. B’mod partikolari, il-Kummissjoni, flimkien mal-Istati Membri, se tivvaluta u tippromwovi l-ispeċifikazzjonijiet tekniċi u l-istandards li jippermettu l-interoperabbiltà bejn il-fornituri tat-tagħmir 5G f’partijiet differenti tan-netwerk, fosthom fin-netwerks tal-legat, biex ikun jista’ jinħoloq ambjent ta’ ħafna bejjiegħa bl-imnut, pereżempju permezz ta’ interfaċċji interoperabbli u miftuħa.
- Iċ-ċertifikazzjoni: Tappoġġa l-iżvilupp ta’ skemi taċ-ċertifikazzjoni tal-5G li jindirizzaw il-ħtiġijiet tan-netwerks 5G skont il-qafas taċ-ċertifikazzjoni taċ-ċibersigurtà tal-UE.
- L-iskrinjar tal-Investiment Dirett Barrani (FDI): Tappoġġa l-implimentazzjoni tal-qafas tal-iskrinjar tal-UE billi timmappja l-katina tal-valur tal-5G, inkluż l-assi sensittivi tan-netwerk u l-monitoraġġ regolari tal-Investiment Dirett Barrani tul il-katina tal-valur. F’konformità mal-iskeda taż-żmien tal-iskrinjar tal-Investiment Dirett Barrani (minn Ottubru 2020), il-Kummissjoni se twettaq skrutinju tal-investimenti barranin fil-qasam tal-5G f’konformità mal-linji gwida pprovduti fir-Regolament (UE) 2019/452, filwaqt li tqis il-Valutazzjoni tar-Riskju Koordinata tal-UE u s-sett ta’ għodod tal-UE.
- L-istrumenti tad-difiża kummerċjali: Twettaq monitoraġġ tal-iżviluppi rilevanti kollha tas-suq fl-UE u f’pajjiżi terzi, u tipproteġi lill-atturi tal-UE fis-suq Ewropew tal-5G b’miżuri tad-difiża kummerċjali biex tindirizza prattiki potenzjali ta’ distorsjoni tal-kummerċ (dumping jew sussidjar), inkluż billi tniedi investigazzjoni preliminari fejn xieraq.
- Ir-regoli dwar il-kompetizzjoni: Twettaq monitoraġġ tal-funzjonament tas-swieq għall-forniment ta’ ħardwer u softwer 5G bil-ħsieb li jkun żgurat li dawn jiksbu riżultati kompetittivi, inkluż rigward sitwazzjonijiet kuntrattwali jew tekniċi possibbli ta’ “lock-in”.
- Il-programmi ta’ finanzjament tal-UE: Tiżgura li l-parteċipazzjoni fil-programmi ta’ finanzjament tal-UE fid-dominji rilevanti tat-teknoloġija jkunu jiddependu fuq il-konformità mar-rekwiżiti tas-sigurtà, billi jsir użu sħiħ u aktar implimentazzjoni tal-kundizzjonijiet tas-sigurtà fil-programmi tar-riċerka u l-iżvilupp, b’mod partikolari f’Orizzont Ewropa, fil-Programm Ewropa Diġitali u fil-Faċilità Nikkollegaw l-Ewropa 2, fil-Fondi Strutturali u ta’ Investiment Ewropej u fi programmi rilevanti oħrajn. Jenħtieġ jitħaddem ukoll approċċ simili fil-programmi ta’ finanzjament u l-istrumenti finanzjarji esterni tal-UE, inkluż fir-rigward tal-finanzjament mogħti permezz ta’ istituzzjonijiet finanzjarji internazzjonali.
- L-akkwist pubbliku: Twettaq ingranaġġ fl-akkwisti pubbliċi fil-qasam tan-netwerks 5G biex tappoġġa l-objettivi identifikati tas-sigurtà, id-diversità tal-fornituri u s-sostenibbiltà fit-tul tan-netwerks 5G; b’mod partikolari, tara li tiżgura li jitqiesu kif xieraq l-aspetti tas-sigurtà fl-għoti tal-kuntratti tal-akkwist pubbliku relatati mal-qasam tan-netwerks 5G, f’konformità mar-regoli tal-akkwist pubbliku tal-UE.
- Ir-rispons għall-inċident u l-ġestjoni tal-kriżijiet (Pjan ta’ Azzjoni) u ċ-ċibereżerċizzji: Tuża għalkollox l-iżvilupp tal-Pjan ta’ Azzjoni 20 tal-UE dwar ir-rispons koordinat għal inċidenti taċ-ċibersigurtà fuq skala kbira. Barra minn hekk, flimkien mal-ENISA tqis il-possibbiltà li malli l-maturità tas-suq tkun tippermetti, isir ċibereżerċizzju tal-5G.
U, bir-responsabbiltà tar-Rappreżentant Għoli tal-Unjoni għall-Affarijiet Barranin u l-Politika tas-Sigurtà u Viċi President tal-Kummissjoni, u l-Kunsill:
- Qafas għal Rispons Diplomatiku Konġunt tal-UE għal attivitajiet ċibernetiċi malizzjużi (Sett ta’ Għodod tad-Diplomazija Ċibernetika) 21 : Fil-każ ta’ attivitajiet ċibernetiċi malizzjużi li jheddu l-integrità u s-sigurtà tal-UE, l-Istati Membri huma mħeġġa jużaw miżuri rilevanti tal-Politika Estera u tas-Sigurtà Komuni, li huma parti mis-Sett ta’ Għodod tad-Diplomazija Ċibernetika tal-UE (inkluż, jekk ikun meħtieġ, miżuri restrittivi) biex jinkoraġġixxu l-kooperazzjoni, jiffaċilitaw il-mitigazzjoni tat-theddid u jinfluwenzaw l-imġiba ta’ aggressuri potenzjali.
Barra minn hekk, hemm għadd ta’ programmi li se jikkontribwixxu għall-objettivi li jkun evitat jew limitat ir-riskju ta’ dipendenza fit-tul, billi jippromwovu suq divers u sostenibbli tal-5G, inkluż billi jżommu l-kapaċitajiet tal-UE fil-katina tal-valur tal-5G u jinvestu fl-innovazzjoni, f’konformità mal-obbligi internazzjonali tal-UE.
Nippromwovu l-innovazzjoni u ninvestu fiċ-ċibersigurtà u fit-teknoloġiji tal-infrastruttura tan-netwerks:
- Il-programmi ta’ finanzjament tal-UE: Iżżid l-investimenti fir-riċerka, fl-innovazzjoni u fl-introduzzjoni ta’ teknoloġiji tan-netwerk u l-elementi kostitwenti sottostanti rilevanti. Fil-baġit li jmiss tal-UE 2021-27, il-Kummissjoni pproponiet kważi EUR 3 biljun għall-investimenti fit-teknoloġiji taċ-ċibersigurtà. Dawn jinkludu r-riċerka u l-innovazzjoni permezz ta’ Orizzont Ewropa u l-appoġġ għall-kapaċitajiet taċ-ċibersigurtà permezz tal-Programm Ewropa Diġitali. Anki InvestEU jista’ jipprovdi appoġġ finanzjarju għar-riċerka u l-iżvilupp fil-qasam tal-5G kif ukoll appoġġ għall-introduzzjoni tagħha.
Barra minn hekk, permezz ta’ Orizzont Ewropa li jmiss 22 , il-Kummissjoni pproponiet it-twaqqif ta’ sħubija istituzzjonalizzata tal-UE NGI/6G (“Netwerks u Servizzi Intelliġenti”), bi sħubija mal-industrija u b’koordinazzjoni mal-Istati Membri biex titlesta l-introduzzjoni tal-5G u speċjalment bħala tħejjija għas-6G, il-ġenerazzjoni li jmiss tat-teknoloġija mobbli. Mill-baġit tal-UE (2021-27) ġew proposti aktar minn EUR 2,5 biljun għall-investimenti tal-UE li jridu jiġu kumplimentati b’investimenti privati ta’ mill-inqas EUR 7,5 biljun f’din l-inizjattiva.
- L-iżvilupp industrijali u l-introduzzjoni: Tevalwa l-lakuni jew l-fallimenti potenzjali tas-suq tul il-katina tal-valur tal-5G, li jiġġustifikaw interventi mmirati permezz tal-baġit fit-tul li jmiss jew IPCEIs (Proġetti Importanti ta’ Interess Ewropew Komuni) possibbli fiċ-ċibersigurtà, bi qbil mas-suġġerimenti tal-forum ta’ livell għoli tal-IPCEI. Id-deċiżjoni dwar it-tfassil u l-istabbiliment tal-IPCEIs hi f’idejn l-Istati Membri u l-kumpaniji. Ir-regoli tal-UE jipprovdu qafas ta’ abilitazzjoni, u l-Kummissjoni lesta tiffaċilita l-kuntatti meħtieġa u tipprovdi gwida.
6. Konklużjoni
In-netwerks 5G mistennija jiftħu l-bibien beraħ tal-opportunitajiet għaċ-ċittadini, is-soċjetà u l-ekonomija Ewropej. Għalhekk hu essenzjali li niżguraw is-sigurtà u r-reżiljenza tan-netwerks 5G. Fl-istess ħin, it-theddid għaċ-ċibersigurtà (inkluż ir-riskju ta’ interferenza minn atturi ta’ stati jew appoġġati minn stati li mhumiex fl-UE) hu sfida li qed tevolvi, li qed tikseb aktar rilevanza daqskemm qed tiżdied id-dipendenza miżjuda fuq it-teknoloġija u d-data. Jekk nittraskuraw iċ-ċibersigurtà, inkunu qed ndgħajfu l-fiduċja fl-iżvilupp tal-ekonomija u tas-soċjetà diġitali u nxekklu lill-UE milli taqta’ l-frott kollu tagħha. Dan jeħtieġ rispons korrispondenti li jevolvi u jissaħħaħ kontinwament.
Hu essenzjali li jkollna approċċ koordinat u konsistenti għaċ-ċibersigurtà fl-UE fejn jidħlu t-teknoloġiji u n-netwerks kritiċi, ħalli l-UE tiżgura s-sovranità teknoloġika tagħha, u żżomm u tiżviluppa l-kapaċitajiet industrijali. Il-Kummissjoni se tappoġġa bis-sħiħ l-implimentazzjoni tal-approċċ taċ-ċibersigurtà tal-UE għan-netwerks 5G filwaqt li tiżgura li s-swieq tal-UE jibqgħu miftuħa għall-prodotti u s-servizzi li jirrispettaw il-ħtiġijiet li qed jevolvu għaċ-ċibersigurtà u l-fiduċja.
Għaldaqstant, hu importanti li l-impenn tal-partijiet konċernati kollha dwar is-sigurtà tal-5G jibqa’ sħiħ u jkun jeħtieġ kollaborazzjoni kontinwa bejn l-Istati Membri, il-Kummissjoni u l-ENISA.
Il-pass immedjat li jmiss, kif spjegat hawn fuq, hu li l-Kummissjoni tappella lill-Istati Membri jieħdu azzjoni malajr biex jimplimentaw b’mod effettiv u oġġettiv il-miżuri maqbula bħala parti mis-sett ta’ għodod, u biex jissoktaw jaħdmu flimkien, bl-appoġġ tal-Kummissjoni u tal-ENISA, ħalli jiżguraw il-koordinazzjoni fil-livell tal-UE. Fl-istess waqt, il-Kummissjoni se tniedi l-azzjonijiet rilevanti kollha fil-kompetenza tagħha biex tappoġġa l-implimentazzjoni tas-sett ta’ għodod mill-Istati Membri u biex issaħħaħ l-impatt tiegħu.
Appendiċi: Kategoriji tar-Riskju (sors: il-Valutazzjoni tar-Riskju Koordinata tal-UE).
|
Kategoriji tar-riskju |
|
|
Xenarji tar-riskju relatati ma’ miżuri tas-sigurtà insuffiċjenti |
R1: Konfigurazzjoni żbaljata tan-netwerks |
|
R2: Nuqqas ta’ kontrolli tal-aċċess |
|
|
Xenarji tar-riskju relatati mal-katina tal-forniment tal-5G |
R3: Kwalità baxxa tal-prodotti |
|
R4: Dipendenza fuq xi fornitur wieħed fi ħdan netwerks individwali jew in-nuqqas ta’ diversità fuq bażi nazzjonali: |
|
|
Xenarji tar-riskju relatati mal-mod kif joperaw l-atturi ewlenin tat-theddid |
R5: Interferenza mill-Istat permezz tal-katina tal-forniment tal-5G |
|
R6: L-isfruttament tan-netwerks 5G mill-kriminalità organizzata, jew Grupp ta’ kriminalità organizzata li jimmira għall-utenti finali: |
|
|
Xenarji tar-riskju relatati ma’ interdipendenzi bejn in-netwerks 5G u sistemi kritiċi oħra |
R7: Tfixkil sinifikanti f’infrastrutturi jew servizzi kritiċi |
|
R8: Falliment kbir tan-netwerks minħabba interruzzjoni tal-provvista tal-elettriku jew sistemi oħra ta’ appoġġ |
|
|
Xenarji tar-riskju relatati mal-apparati tal-utent finali |
R9: L-isfruttament tal-IoT (l-Internet tal-Oġġetti) |
Ir-Rakkomandazzjoni (UE) 2019/534 dwar iċ-ċibersigurtà tan-netwerks 5G, ĠU L 88, 29.3.2019, p. 42-47.
COM(2016) 588 tal-14 ta’ Ġunju 2016 dwar il-5G għall-Ewropa: Pjan ta’ Azzjoni.
COM(2016)587 “Konnettività għal Suq Uniku Diġitali Kompetittiv – Lejn Soċjetà Ewropea tal-Gigabits”.
Uħud mill-funzjonalitajiet il-ġodda tal-5G se jiġu introdotti b’approċċ maqsum f’fażijiet. Fl-ewwel fażi (fi żmien qasir jew immedjat), l-introduzzjoni tal-5G se tkun tikkonsisti l-aktar f’netwerks “mhux awtonomi”, jiġifieri li n-netwerk tal-aċċess bir-radju biss jiġi aġġornat għat-teknoloġija 5G, u l-bqija tkun xorta tiddependi fuq in-netwerks 4G ewlenin eżistenti, li se jipprovdu prestazzjonijiet tal-broadband mobbli mtejba lill-utenti finali. Fil-fażijiet sussegwenti (fi żmien qasir/medju jew fit-tul), l-introduzzjoni tan-netwerks 5G “awtonomi”, inkluż il-funzjonijiet tan-netwerk 5G ewlieni, se tkun teħtieġ u matul iż-żmien se twassal għal bidla ferm aktar estensiva fl-arkitettura tan-netwerk.
Id-Direttiva (UE) 2018/1972 tal-Parlament Ewropew u tal-Kunsill li tistabbilixxi l-Kodiċi Ewropew għall-Komunikazzjonijiet Elettroniċi (Riformulazzjoni).
Proposta għal Regolament tal-Parlament Ewropew u tal-Kunsill li jistabbilixxi l-Faċilità Nikkollegaw l-Ewropa u li jħassar ir-Regolamenti (UE) Nru 1316/2013 u (UE) 283/2014
Il-partizzjoni tan-netwerks 5G tippermetti livell għoli ta’ separazzjoni bejn saffi differenti tas-servizzi fl-istess netwerk fiżiku, u b’hekk jiżdiedu l-possibbiltajiet li jiġu offruti servizzi differenzjati fuq in-netwerk kollu.
L-edge computing hu paradigma tal-komputazzjoni distribwita li tqarreb il-komputazzjoni u l-ħżin tad-data lejn il-post fejn ikunu meħtieġa, biex jitjieb il-ħin tar-rispons u tiġi ffrankata l-wisa’ tal-banda.
Ir-Rakkomandazzjoni tal-Kunsill tat-12 ta’ Lulju 1999 dwar il-limitazzjoni tal-espożizzjoni tal-pubbliku ġenerali għall-kampijiet elettromanjetiċi (0 Hz sa 300 GHz) (1999/519/KE).
Id-Direttiva (UE) 2016/1148 tal-Parlament Ewropew u tal-Kunsill tas-6 ta’ Lulju 2016 dwar miżuri għal livell għoli komuni ta’ sigurtà tan-netwerks u tas-sistemi tal-informazzjoni madwar l-Unjoni (id-Direttiva NIS). Il-Grupp ta’ Kooperazzjoni tal-NIS ġie stabbilit bid-Direttiva NIS biex jiżgura l-kooperazzjoni strateġika u l-iskambju tal-informazzjoni bejn l-Istati Membri tal-UE fejn tidħol iċ-ċibersigurtà.
Ix-Xenarji tat-Theddid tal-ENISA għan-netwerks tal-5G: https://www.enisa.europa.eu/publications/enisa-threat-landscape-for-5g-networks.
Il-Konklużjonijiet dwar is-sinifikat tal-5G għall-ekonomija Ewropea u l-ħtieġa li jitnaqqsu r-riskji tas-sigurtà marbuta mal-5G. It-3 ta’ Diċembru 2019, 14517/19 https://www.consilium.europa.eu/media/41595/st14517-en19.pdf .
Iċ-Ċibersigurtà tan-Netwerks 5G – Għodod tal-UE għal miżuri tal-mitigazzjoni tar-riskji, 29 ta’ Jannar 2020. https://ec.europa.eu/digital-single-market/en/nis-cooperation-group.
Il-paragrafu 2.37 tal-Valutazzjoni tar-Riskju Koordinata tal-UE.
Il-paragrafu 2.21 tal-Valutazzjoni tar-Riskju Koordinata jippreżenta l-kategoriji ewlenin tal-elementi u tal-funzjonijiet u l-livell ġenerali tas-sensittività tagħhom, u jelenka għadd ta’ elementi ewlenin identifikati mill-Istati Membri għal kull kategorija, u l-paragrafi 2.28 u 2.29 jidentifikaw għadd ta’ tipi oħra ta’ assi jew żoni sensittivi (eż. entitajiet jew żoni ġeografiċi speċifiċi).
COM(2016)588 tal-14 ta’ Settembru 2016 dwar il-5G għall-Ewropa: Pjan ta’ Azzjoni.
Ir-Rakkomandazzjoni tal-Kummissjoni dwar rispons koordinat għal inċidenti taċ-ċibersigurtà u l-kriżijiet fuq skala kbira (UE 2017/1584).
Il-Konklużjonijiet tal-Kunsill tal-20 ta’ Ġunju 2017, 9916/17.
Il-finanzjament jista’ jingħata wkoll permezz tas-CEF 2.0 u l-Programm Ewropa Diġitali.
