This document is an excerpt from the EUR-Lex website
Document 52019PC0636
Proposal for a COUNCIL DECISION on the position to be taken on behalf of the European Union within the Administrative Committee for the Customs Convention on the International Transport of goods under cover of TIR carnets as regards the proposal to amend the Convention
Proposta għal DEĊIŻJONI TAL-KUNSILL dwar il-pożizzjoni li għandha tittieħed f’isem l-Unjoni Ewropea fi ħdan il-Kumitat Amministrattiv għall-Konvenzjoni Doganali dwar it-Trasport Internazzjonali ta’ oġġetti li jaqgħu taħt il-carnets TIR fir-rigward tal-proposta biex tiġi emendata l-Konvenzjoni
Proposta għal DEĊIŻJONI TAL-KUNSILL dwar il-pożizzjoni li għandha tittieħed f’isem l-Unjoni Ewropea fi ħdan il-Kumitat Amministrattiv għall-Konvenzjoni Doganali dwar it-Trasport Internazzjonali ta’ oġġetti li jaqgħu taħt il-carnets TIR fir-rigward tal-proposta biex tiġi emendata l-Konvenzjoni
COM/2019/636 final
IL-KUMMISSJONI EWROPEA
Brussell, 17.12.2019
COM(2019) 636 final
ANNESS
tal-
Proposta għal Deċiżjoni tal-Kunsill
dwar il-pożizzjoni li għandha tittieħed f’isem l-Unjoni Ewropea fi ħdan il-Kumitat Amministrattiv għall-Konvenzjoni Doganali dwar it-Trasport Internazzjonali ta’ oġġetti li jaqgħu taħt il-carnets TIR fir-rigward tal-proposta biex tiġi emendata l-Konvenzjoni
FAJL MEHMUŻ
Emendi għall-Konvenzjoni Doganali dwar it-Trasport Internazzjonali ta’ oġġetti li jaqgħu taħt il-carnets TIR (il-Konvenzjoni TIR tal-1975)
A. Emendi għall-Konvenzjoni TIR
1.Paragrafu (s) ġdid f’Artikolu 1
(s) It-terminu “proċedura eTIR” għandu jfisser il-proċedura TIR, implimentat permezz ta’ skambju elettroniku ta’ data, li jipprovdi l-ekwivalenti funzjonali għall-Carnet TIR. Billi japplikaw id-dispożizzjonijiet tal-Konvenzjoni TIR, l-ispeċifiċitajiet tal-proċedura eTIR huma definiti fl-Anness 11.
1bis.Artikolu 3(b)
(b) l-operazzjonijiet tat-trasport għandhom ikunu garantiti mill-assoċjazzjonijiet awtorizzati skont id-dispożizzjonijiet tal-Artikolu 6. Dawn iridu jitwettqu taħt kopertura ta’ Carnet TIR, li għandu jkun konformi mal-mudell riprodott fl-Anness 1 ta’ din il-Konvenzjoni jew jitwettqu permezz tal-proċedura eTIR.
2.Artikolu 43
In-Noti ta’ Spjegazzjoni stabbiliti fl-Anness 6, fil-Parti III tal-Anness 7, u fil-Parti II tal-Anness 11 jinterpretaw ċerti dispożizzjonijiet ta’ din il-Konvenzjoni u tal-Annessi tagħha. Huma jiddeskrivu wkoll ċerti prattiki rakkomandati.
3.Kwart ġdid tal-Artikolu 58
Għandu jiġi stabbilit Korp Tekniku ta’ Implimentazzjoni. Il-kompożizzjoni, il-funzjonijiet u r-regoli ta’ proċedura tiegħu ġew stabbiliti fl-Anness 11.
4.Artikolu 59
1. Din il-Konvenzjoni, inkluż l-Annessi tagħha, tista’ tiġi emendata fuq proposta ta’ Parti Kontraenti permezz tal-proċedura speċifikata f’dan l-Artikolu.
2. Ħlief kif hemm ipprovdut fl-Artikolu 60 bis, kwalunkwe emenda proposta għal din il-Konvenzjoni għandha titqies mill-Kumitat Amministrattiv magħmul mill-Partijiet Kontraenti kollha skont ir-regoli ta’ proċedura stabbiliti fl-Anness 8. Kwalunkwe emenda bħal din meqjusa jew ippreparata matul il-laqgħa tal-Kumitat Amministrattiv u adottata minnu b’maġġoranza ta’ żewġ terzi tal-membri preżenti u li jivvotaw għandha tkun ikkomunikata mis-Segretarju Ġenerali tan-Nazzjonjiet Uniti lill-Partijiet Kontraenti għall-aċċettazzjoni tagħhom.
3. Ħlief kif inhu pprovdut fl-Artikoli 60 u 60 bis, kwalunkwe emenda proposta li ġiet ikkomunikata skont il-paragrafu preċedenti għandha tidħol fis-seħħ fir-rigward tal-Partijiet Kontraenti kollha tliet xhur wara l-iskadenza ta’ perjodu ta’ tnax-il xahar wara d-data ta’ komunikazzjoni tal-emenda proposta, u meta matul dan il-perjodu ma tkun ġiet ikkomunikata l-ebda oġġezzjoni għall-emenda proposta lis-Segretarju Ġenerali tan-Nazzjonjiet Uniti minn Stat li huwa Parti Kontraenti.
4. Jekk, skont il-paragrafu 3 ta’ dan l-Artikolu, tkun ġiet ikkomunikata oġġezzjoni għall-emenda proposta, għandu jitqies li l-emenda ma ġietx aċċettata u m’għandu jkollha l-ebda effett.
5.Artikolu 60 bis ġdid
Proċedura speċjali għad-dħul fis-seħħ tal-Anness 11 u l-emendi tiegħu
1. L-Anness 11, ikkunsidrat skont il-paragrafi 1 u 2 tal-Artikolu 59 għandu jidħol fis-seħħ fir-rigward tal-Partijiet Kontraenti kollha tliet xhur wara l-iskadenza ta’ perjodu ta’ tnax-il xahar wara d-data ta’ komunikazzjoni mis-Segretarju Ġenerali tan-Nazzjonijiet Uniti lill-Partijiet Kontraenti, ħlief għal dawk il-Partijiet Kontraenti li nnotifikaw lis-Segretarju Ġenerali bil-miktub, matul il-perjodu msemmi qabel ta’ tliet xhur dwar in-nonaċċettazzjoni tagħhom tal-Anness 11. L-Anness 11 għandu jidħol fis-seħħ għall-Partijiet Kontraenti li jirtiraw in-notifika tagħhom ta’ nonaċċettazzjoni sitt xhur wara d-data li fiha d-depożitarju jkun irċieva l-irtirar ta’ din in-notifika.
2. Kwalunkwe emenda proposta għall-Anness 11 għandha tiġi kkunsidrata mill-Kumitat Amministrattiv. Dawn l-emendi għandhom jiġu adottati mill-maġġoranza tal-Partijiet Kontraenti marbuta bl-Anness 11 preżenti u li jivvutaw.
3. L-emendi għall-Anness 11 li jkunu kkunsidrati u adottati skont il-paragrafu 2 ta’ dan l-Artikolu għandhom jiġu kkomunikati mis-Segretarju Ġenerali tan-Nazzjonijiet Uniti lill-Partijiet Kontraenti kollha għall-informazzjoni jew, għal dawk il-Partijiet Kontraenti li huma marbuta bl-Anness 11, għall-aċċettazzjoni.
4. Id-data tad-dħul fis-seħħ ta’ dawn l-emendi għandha tiġi determinata fiż-żmien tal-adozzjoni tagħhom, b’maġġoranza tal-Partijiet Kontraenti marbuta bl-Anness 11 preżenti u li jivvutaw.
5. L-emendi għandhom jidħlu fis-seħħ skont il-paragrafu 4 ta’ dan l-Artikolu sakemm f'xi data qabel, determinata fiż-żmien tal-adozzjoni, ma jkunx hemm kwint inkella ħamsa mill-Istati li huma Partijiet Kontraenti marbutin bl-Anness 11, skont liema numru jkun inqas, li jinnotifikaw lis-Segretarju Ġenerali dwar l-oġġezzjoni tagħhom għall-emendi.
6. Mad-dħul fis-seħħ, kwalunkwe emenda adottata skont il-proċeduri stabbiliti fil-paragrafi 2 sa 5 ta’ dan l-Artikolu għandha għall-Partijiet Kontraenti kollha marbuta bl-Anness 11 tissostitwixxi u tieħu post kwalunkwe dispożizzjoni preċedenti li għaliha tirreferi l-emenda.
6.Artikolu 61
Is-Segretarju Ġenerali tan-Nazzjonijiet Uniti għandu jinforma lill-Partijiet Kontraenti kollha u lill-Istati kollha msemmija f’paragrafu 1 tal-Artikolu 52 ta’ din il-Konvenzjoni dwar kwalunkwe talba, komunikazzjoni, jew oġġezzjoni skont l-Artikoli 59, 60 u 60 bis hawn fuq u dwar id-data li fiha kwalunkwe emenda tidħol fis-seħħ.
7.Subparagrafu ġdid (xi) fil-paragrafu 3 tal-Parti I tal-Anness 9
(xi) jikkonferma, fil-każ ta’ proċedura alternattiva deskritta fil-paragrafu 2 tal-Anness 11 tal-Artikolu 10, għall-Partijiet Kontraenti marbutin bl-Anness 11, fuq talba tal-awtoritajiet kompetenti, li l-garanzija hija valida, li trasport TIR jitwettaq skont il-proċedura eTIR u jipprovdi informazzjoni oħra rilevanti għat-trasport TIR.
B.Anness 11 - Il-proċedura eTIR
1.Parti I
Artikolu 1
Kamp ta’ applikazzjoni
1. Id-dispożizzjonijiet f’dan l-Anness jirregolaw l-implimentazzjoni tal-proċedura eTIR kif definita f’paragrafu (s) tal-Artikolu 1 tal-Konvenzjoni u għandhom japplikaw fir-relazzjonijiet bejn il-Partijiet Kontraenti marbuta b’dan l-Anness, kif previst f’paragrafu 1 tal-Artikolu 60 bis.
2. Il-proċedura eTIR ma tistax tintuża għal trasporti li jseħħu parzjalment fit-territorju ta’ Parti Kontraenti, li mhijiex marbuta bl-Anness 11 u li hija Stat Membru ta’ unjoni doganali jew ekonomika b’territorju doganali wieħed.
Artikolu 2
Definizzjonijiet
Għall-iskopijiet ta’ dan l-Anness:
(a) It-terminu “sistema internazzjonali eTIR” għandu jfisser is-sistema tat-Teknoloġija tal-Informazzjoni u l-Komunikazzjoni (ICT) ippjanata biex tippermetti l-iskambju ta’ informazzjoni elettronika bejn il-parteċipanti involuti fil-proċedura eTIR.
(b) It-terminu “speċifikazzjonijiet eTIR” għandu jfisser l-ispeċifikazzjonijiet konċettwali, funzjonali u tekniċi tal-proċedura eTIR adottata u emendata skont id-dispożizzjonijiet tal-Artikolu 5 ta’ dan l-Anness.
(c) It-terminu “data TIR bil-quddiem” għandu jfisser id-dejta ppreżentata lill-awtoritajiet kompetenti tal-pajjiż tat-tluq, skont l-ispeċifikazzjonijiet eTIR, dwar l-intenzjoni tad-detentur li jqiegħed oġġetti skont il-proċedura eTIR.
(d) It-terminu “data dwar emendi bil-quddiem” għandu jfisser id-dejta ppreżentata lill-awtoritajiet kompetenti tal-pajjiż li fih tkun mitluba emenda għad-dejta tad-dikjarazzjoni, skont l-ispeċifikazzjonijiet eTIR, dwar l-intenzjoni tad-detentur li jemenda d-data tad-dikjarazzjoni.
(e) It-terminu “data tad-dikjarazzjoni” għandu jfisser id-data TIR bil-quddiem u d-data dwar emendi bil-quddiem li ġew aċċettati mill-awtoritajiet kompetenti.
(f) It-terminu “dikjarazzjoni” għandu jfisser l-att li bih id-detentur, jew ir-rappreżentant tiegħu jew tagħha, jindika, skont l-ispeċifikazzjonijiet eTIR, l-intenzjoni li l-merkanzija titqiegħed skont il-proċedura eTIR. Mill-mument ta’ aċċettazzjoni tad-dikjarazzjoni mill-awtoritajiet kompetenti, ibbażata fuq id-data TIR bil-quddiem jew fuq id-data dwar emendi bil-quddiem, u t-trasferiment tad-data tad-dikjarazzjoni fis-sistema internazzjonali eTIR, dan għandu jikkostitwixxi l-ekwivalenti legali ta’ Carnet TIR aċċettat.
(g) It-terminu “dokument ta’ akkumpanjament” għandu jfisser id-dokument stampat, iġġenerat b’mod elettroniku mis-sistema doganali, wara l-aċċettazzjoni tad-dikjarazzjoni, b’konformità mal-linji gwida li jinsabu fl-ispeċifikazzjonijiet tekniċi eTIR. Id-dokument ta’ akkumpanjament jista’ jintuża biex jirreġistra inċidenti waqt ir-rotta u jieħu post ir-rapport iċċertifikat skont l-Artikolu 25 ta’ din il-Konvenzjoni u għall-proċedura alternattiva.
(h) It-terminu “awtentikazzjoni” għandu jfisser proċess elettroniku li jippermetti l-identifikazzjoni elettronika ta’ persuna fiżika jew ġuridika, jew l-oriġini u l-integrità ta’ data f’forma elettronika li għandha tiġi kkonfermata.
Noti ta’ Spjegazzjoni għall-Artikolu 2 (h)
11.2 (h)-1 Sakemm ikun ġie stabbilit u deskritt approċċ armonizzat fl-ispeċifikazzjonijiet eTIR, il-Partijiet Kontraenti marbuta bl-Anness 11 jistgħu jawtentikaw lid-detentur bi kwalunkwe proċess previst fil-liġi nazzjonali tagħhom, inklużi l-isem/il-password tal-utent jew firem elettroniċi, iżda mhux limitati għalihom.
11.2. (h)-2 L-integrità tad-data skambjata bejn is-sistema internazzjonali eTIR u l-awtoritajiet kompetenti kif ukoll l-awtentikazzjoni tas-sistemi tat-Teknoloġija tal-Informazzjoni u l-Komunikazzjoni (ICT) sejrin jiġu żgurati permezz ta’ konnessjonijiet siguri, kif definit fl-ispeċifikazzjonijiet tekniċi eTIR.
Artikolu 3
Implimentazzjoni tal-proċedura eTIR
1. Il-Partijiet Kontraenti marbuta bl-Anness 11 għandhom jgħaqqdu s-sistemi doganali tagħhom mas-sistema internazzjonali eTIR skont l-ispeċifikazzjonijiet eTIR.
2. Kull Parti Kontraenti hija ħielsa li tistabbilixxi sa liema data hija tgħaqqad is-sistemi doganali tagħha mas-sistema internazzjonali eTIR. Id-data tal-konnessjoni għandha tiġi kkomunikata lill-Partijiet Kontraenti l-oħra kollha marbuta bl-Anness 11 mill-inqas sitt xhur qabel id-data effettiva tal-konnessjoni.
Nota ta’ Spjegazzjoni għall-paragrafu 2 tal-Artikolu 3
11.3.2 Il-Partijiet Kontraenti marbuta bl-Anness 11 huma rrakkomandati li jkollhom is-sistema doganali nazzjonali tagħhom aġġornata u li l-konnessjoni tagħha mas-sistema internazzjonali eTIR tiġi żgurata malli l-Anness 11 jidħol fis-seħħ għalihom. L-unjonijiet doganali jew ekonomiċi jistgħu jiddeċiedu f’data aktar tard, u b’hekk ikollhom żmien biex jgħaqqdu s-sistemi doganali nazzjonali tal-Istati Membri kollha tagħhom mas-sistema internazzjonali TIR.
Artikolu 4
Kompożizzjoni, funzjonijiet u regoli ta’ proċedura tal-Korp Tekniku ta’ Implimentazzjoni
1. Il-Partijiet Kontraenti marbuta bl-Anness 11 għandhom ikunu membri tal-Korp Tekniku ta’ Implimentazzjoni. Is-sessjonijiet tiegħu għandhom jitlaqqgħu f’intervalli regolari jew fuq talba tal-Kumitat Amministrattiv, kif meħtieġ għaż-żamma tal-ispeċifikazzjonijiet eTIR. Il-Kumitat Amministrattiv għandu jiġi infurmat regolarment dwar l-attivitajiet u l-kunsiderazzjonijiet tal-Korp Tekniku ta’ Implimentazzjoni.
2. Il-Partijiet Kontraenti li m’aċċettawx l-Anness 11 kif previst f’paragrafu 1 tal-Artikolu 60 bis u r-rappreżentanti ta’ organizzazzjonijiet internazzjonali jistgħu jattendu sessjonijiet tal-Korp Tekniku ta’ Implimentazzjoni bħala osservaturi.
3. Il-Korp Tekniku ta’ Implimentazzjoni għandu jimmonitorja l-aspetti tekniċi u funzjonali tal-implimentazzjoni tal-proċedura eTIR, kif ukoll jikkoordina u jrawwem l-iskambju ta’ informazzjoni dwar kwistjonijiet li jaqgħu fi ħdan il-kompetenza tiegħu.
4. Il-Korp Tekniku ta’ Implimentazzjoni għandu, fl-ewwel sessjoni tiegħu, jadotta r-regoli ta’ proċedura tiegħu u jissottomettihom lill-Kumitat Amministrattiv għall-approvazzjoni mill-Partijiet Kontraenti marbuta bl-Anness 11.
Artikolu 5
Proċeduri ta’ adozzjoni u ta’ emenda għall-ispeċifikazzjonijiet eTIR
Il-Korp Tekniku ta’ Implimentazzjoni għandu:
(a) jadotta l-ispeċifikazzjonijiet tekniċi tal-proċedura eTIR, u l-emendi għalihom, biex jiġi żgurat l-allinjament tagħhom mal-ispeċifikazzjonijiet funzjonali tal-proċedura eTIR. Fiż-żmien tal-adozzjoni, huwa għandu jiddeċiedi dwar il-perjodu tranżitorju xieraq għall-implimentazzjoni tagħhom.
(b) iħejji l-ispeċifikazzjonijiet funzjonali tal-proċedura eTIR, u l-emendi għaliha, biex jiġi żgurat l-allinjament tagħhom mal-ispeċifikazzjonijiet kunċettwali tal-proċedura eTIR. Huma għandhom jiġu trażmessi lill-Kumitat Amministrattiv għall-adozzjoni mill-maġġoranza tal-Partijiet Kontraenti marbuta bl-Anness 11 preżenti u li jivvutaw, kif ukoll jiġu implimentati u, meta meħtieġ, jiġu żviluppati fi speċifikazzjonijiet tekniċi f’data li trid tiġi determinata fiż-żmien tal-adozzjoni.
(c) jikkunsidra emendi għall-ispeċifikazzjonijiet konċettwali tal-proċedura eTIR jekk ikun mitlub mill-Kumitat Amministrattiv. L-ispeċifikazzjonijiet kunċettwali tal-proċedura eTIR, u l-emendi għaliha, għandhom jiġu adottati minn maġġoranza tal-Partijiet Kontraenti marbuta bl-Anness 11 preżenti u li jivvutaw, kif ukoll jiġu implimentati u, meta meħtieġ, jiġu żviluppati fi speċifikazzjoni funzjonali f’data li għandha tiġi determinata fi żmien l-adozzjoni.
Artikolu 6
Sottomissjoni ta’ data TIR bil-quddiem u data dwar emendi bil-quddiem
1. Id-data TIR bil-quddiem u d-data dwar emendi bil-quddiem għandhom jiġu ppreżentati mid-detentur, jew mir-rappreżentant tiegħu jew tagħha, lill-awtoritajiet kompetenti tal-pajjiż tat-tluq u tal-pajjiż li fih tkun qiegħda tintalab emenda għad-data tad-dikjarazzjoni. Ladarba d-dikjarazzjoni, jew l-emenda, tkun ġiet aċċettata b’konformità mal-liġi nazzjonali, l-awtoritajiet kompetenti għandhom jgħaddu d-data tad-dikjarazzjoni, jew l-emenda tagħha, lis-sistema internazzjonali eTIR.
2. Id-data TIR bil-quddiem u d-data dwar emendi bil-quddiem imsemmija f’paragrafu 1 jistgħu jiġu ppreżentati jew direttament lill-awtoritajiet kompetenti jew permezz tas-sistema internazzjonali eTIR.
3. Partijiet Kontraenti marbuta bl-Anness 11 għandhom jaċċettaw is-sottomissjoni tad-data TIR bil-quddiem u tad-data dwar emendi bil-quddiem permezz tas-sistema internazzjonali eTIR.
Nota ta’ Spjegazzjoni għall-paragrafu 3 tal-Artikolu 6
11.6.3 Il-Partijiet Kontraenti marbuta bl-Anness 11 huma rrakkomandati li jirrikonoxxu, kemm jista' jkun, is-sottomissjoni tad-data TIR bil-quddiem u tad-data dwar emendi bil-quddiem permezz tal-metodi indikati fl-ispeċifikazzjonijiet funzjonali u tekniċi.
4. L-awtoritajiet kompetenti għandhom jippubblikaw il-lista tal-mezzi elettroniċi kollha li bihom tista’ tiġi ppreżentata d-dejta TIR bil-quddiem u d-data dwar emendi bil-quddiem.
Artikolu 7
Awtentifikazzjoni tad-detentur
1. Waqt li jaċċettaw id-dikjarazzjoni fil-pajjiż tat-tluq jew emenda tad-data tad-dikjarazzjoni fi kwalunkwe pajjiż tul l-itinerarju, l-awtoritajiet kompetenti għandhom jawtentikaw id-data TIR bil-quddiem, jew id-data dwar emendi bil-quddiem, u d-detentur, f’konformità mal-liġi nazzjonali.
2. Il-Partijiet Kontraenti marbuta bl-Anness 11 għandhom jaċċettaw l-awtentikazzjoni tad-detentur imwettqa mis-sistema internazzjonali eTIR.
Nota ta’ Spjegazzjoni għall-paragrafu 2 tal-Artikolu 7
11.7.2 Is-sistema internazzjonali eTIR tiżgura, permezz ta’ mezzi deskritti fl-ispeċifikazzjonijiet eTIR, l-integrità tad-data TIR bil-quddiem, jew tad-dejta dwar emendi bil-quddiem, u li d-dejta ntbagħtet mid-detentur.
3. L-awtoritajiet kompetenti għandhom jippubblikaw lista ta’ mekkaniżmi ta’ awtentikazzjoni minbarra dawk speċifikati fil-paragrafu 2 ta’ dan l-Artikolu li jistgħu jintużaw għall-awtentikazzjoni.
4. Il-Partijiet Kontraenti marbutin bl-Anness 11 għandhom jaċċettaw id-data tad-dikjarazzjoni li jirċievu mill-awtoritajiet kompetenti tal-pajjiż tat-tluq u tal-pajjiż li fih tintalab emenda għad-data tad-dikjarazzjoni permezz tas-sistema internazzjonali eTIR bħala l-ekwivalenti legali għal Carnet TIR aċċettat.
Nota ta’ Spjegazzjoni għall-paragrafu 4 tal-Artikolu 7
11.7.4 Is-sistema internazzjonali TIR tiżgura, permezz ta’ mezzi deskritti fl-ispeċifikazzjonijiet eTIR, l-integrità tad-data tad-dikjarazzjoni u li d-data ntbagħtet mill-awtoritajiet kompetenti tal-pajjiżi involuti fit-trasport.
Artikolu 8
Rikonoxximent reċiproku tal-awtentikazzjoni tad-detentur
L-awtentikazzjoni tad-detentur imwettqa mill-awtoritajiet kompetenti tal-Partijiet Kontraenti marbutin bl-Anness 11 li jaċċettaw id-dikjarazzjoni, jew it-tibdil fid-data tad-dikjarazzjoni, għandha tiġi rikonoxxuta mill-awtoritajiet kompetenti tal-Partijiet Kontraenti sussegwenti kollha marbutin bl-Anness 11 matul it-trasport TIR.
Nota ta’ spjegazzjoni għall-Artikolu 8
11.8 Is-sistema internazzjonali eTIR tiżgura, permezz ta’ mezzi deskritti fl-ispeċifikazzjonijiet eTIR, l-integrità tad-data tad-dikjarazzjoni, inkluża r-referenza għad-detentur, awtentikata mill-awtoritajiet kompetenti li jaċċettaw id-dikjarazzjoni, irċevuta mill-awtoritajiet kompetenti u trażmessa lilhom.
Artikolu 9
Rekwiżiti addizzjonali tad-data
1. Minbarra d-data speċifikata fl-ispeċifikazzjonijiet funzjonali u tekniċi, l-awtoritajiet kompetenti jistgħu jitolbu data addizzjonali stipulata mil-leġiżlazzjoni nazzjonali.
2. L-awtoritajiet kompetenti għandhom, kemm jista' jkun, jillimitaw ir-rekwiżiti tad-data għal dawk li jinsabu fl-ispeċifikazzjonijiet funzjonali u tekniċi u għandhom jagħmlu ħilithom biex jiffaċilitaw is-sottomissjoni ta’ data addizzjonali sabiex ma jfixklux it-trasport TIR imwettaq skont dan l-Anness.
Article 10
Proċedura alternattiva
1. Fejn il-proċedura eTIR ma tistax tinbeda għal raġunijiet tekniċi fl-uffiċċju doganali tat-tluq, id-detentur tal-Carnet TIR jista’ jerġa’ lura għall-proċedura TIR.
2. Fejn proċedura eTIR tkun bdiet iżda l-kontinwazzjoni tagħha tkun imfixkla għal raġunijiet tekniċi, l-awtoritajiet kompetenti għandhom jaċċettaw id-dokument u l-proċess ta’ akkumpanjament li jkun konformi mal-proċedura deskritta fl-ispeċifikazzjonijiet eTIR, soġġetti għad-disponibbiltà ta’ informazzjoni addizzjonali minn sistemi elettroniċi alternattivi kif deskritt fl-ispeċifikazzjonijiet funzjonali u tekniċi.
3. L-awtoritajiet kompetenti tal-Partijiet Kontraenti huma intitolati wkoll li jitolbu lill-assoċjazzjonijiet garanti nazzjonali jikkonfermaw li l-garanzija hija valida, li trasport TIR jitwettaq skont il-proċedura eTIR, u jipprovdu informazzjoni oħra rilevanti għat-trasport TIR.
4. Il-proċedura deskritta f’paragrafu 3 għandha tiġi stabbilita fil-ftehim bejn l-awtoritajiet kompetenti u l-assoċjazzjoni garanti nazzjonali, kif stipulat f’paragrafu 1 (d) tal-Parti I tal-Anness 9.
Artikolu 11
Ospitar tas-sistema internazzjonali eTIR
1. Is-sistema internazzjonali eTIR għandha tkun ospitata u amministrata taħt l-awspiċi tal-Kummissjoni Ekonomika għall-Ewropa (KEE) tan-Nazzjonijiet Uniti.
2. Il-KEE għandha tassisti lill-pajjiżi biex jgħaqqdu s-sistemi doganali tagħhom mas-sistema internazzjonali eTIR, inkluż permezz ta’ testijiet ta’ konformità biex ikun żgurat it-tħaddim kif suppost tagħhom qabel il-konnessjoni operazzjonali.
3. Ir-riżorsi meħtieġa għandhom ikunu disponibbli għall-KEE sabiex jiġu ssodisfati l-obbligi stabbiliti f’paragrafi 1 u 2 ta’ dan l-Artikolu. Sakemm is-sistema internazzjonali eTIR ma tkunx iffinanzjata minn riżorsi mill-baġit regolari tan-Nazzjonijiet Uniti, ir-riżorsi meħtieġa għandhom ikunu soġġetti għar-regoli u r-regolamenti finanzjarji għall-fondi extrabaġitarji u għall-proġetti tan-Nazzjonijiet Uniti. Il-mekkaniżmu ta’ finanzjament għat-tħaddim tas-sistema internazzjonali eTIR fil-KEE għandu jiġi deċiż u approvat mill-Kumitat Amministrattiv.
Nota ta’ Spjegazzjoni għall-paragrafu 3 tal-Artikolu 11
11.11.3 Jekk ikun meħtieġ, il-Partijiet Kontraenti jistgħu jiddeċiedu li jiffinanzjaw l-ispejjeż operazzjonali tas-sistema internazzjonali eTIR permezz ta’ ammont għal kull trasport TIR. F’każijiet bħal dawn, il-Partijiet Kontraenti għandhom jiddeċiedu dwar iż-żmien xieraq biex jiġu introdotti mekkaniżmi alternattivi ta’ finanzjament u dwar il-modalitajiet tagħhom. Il-baġit meħtieġ għandu jitħejja mill-KEE, rivedut mill-Korp Tekniku ta’ Implimentazzjoni u approvat mill-Kumitat Amministrattiv.
Artikolu 12
Amministrazzjoni tas-sistema internazzjonali eTIR
1. Il-KEE għandha tagħmel l-arranġamenti xierqa għall-ħżin u l-arkivjar tad-data fis-sistema internazzjonali eTIR għal perjodu minimu ta’ 10 snin.
2. Id-data kollha maħżuna fis-sistema internazzjonali eTIR tista’ tintuża mill-KEE f’isem il-korpi kompetenti ta’ din il-Konvenzjoni għall-iskop ta’ estrazzjoni ta’ statistika aggregata.
3. L-awtoritajiet kompetenti tal-Partijiet Kontraenti li fit-territorju tagħhom jitwettaq trasport TIR skont il-proċedura eTIR, li jsir is-suġġett ta’ proċeduri amministrattivi jew legali rigward l-obbligu ta’ ħlas tal-persuna jew persuni direttament responsabbli jew tal-assoċjazzjoni garanti nazzjonali, jistgħu jitolbu lill-KEE u jiksbu informazzjoni maħżuna fis-sistema internazzjonali eTIR li jappartjeni għat-talba fit-tilwima għal finijiet ta’ verifika. Din l-informazzjoni tista’ tingħata bħala evidenza fi proċeduri nazzjonali amministrattivi jew legali.
4. F’każijiet oħra minbarra dawk speċifikati f’dan l-Artikolu, it-tixrid jew id-divulgazzjoni ta’ informazzjoni maħżuna fis-sistema internazzjonali eTIR lil persuni jew entitajiet mhux awtorizzati għandhom ikunu pprojbiti.
Artikolu 13
Pubblikazzjoni tal-uffiċċji doganali li jistgħu jimmaniġġaw eTIR
L-awtoritajiet kompetenti għandhom jiżguraw li l-lista ta’ uffiċċji doganali tat-tluq, ta’ uffiċċji doganali waqt ir-rotta u ta’ uffiċċji doganali tad-destinazzjoni approvata għat-twettiq ta’ operazzjonijiet TIR skont il-proċedura eTIR, tkun f’kull ħin preċiża u aġġornata fil-bażi tad-data elettronika għal uffiċċji doganali approvati, żviluppata u miżmuma mill-Bord Eżekuttiv TIR.
Artikolu 14
Rekwiżiti legali għas-sottomissjoni tad-data skont l-Anness 10 tal-Konvenzjoni TIR
Ir-rekwiżiti legali għas-sottomissjoni tad-data, kif stipulati f’paragrafi 1, 3 u 4 tal-Anness 10 ta’ din il-Konvenzjoni, jitqiesu li ġew issodisfati bl-implimentazzjoni tal-proċedura eTIR.
IL-KUMMISSJONI EWROPEA
Brussell, 17.12.2019
COM(2019) 636 final
2019/0279(NLE)
eTIR Package
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fi ħdan il-Kumitat Amministrattiv għall-Konvenzjoni Doganali dwar it-Trasport Internazzjonali ta’ oġġetti li jaqgħu taħt il-carnets TIR fir-rigward tal-proposta biex tiġi emendata l-Konvenzjoni
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna d-Deċiżjoni li tistabbilixxi l-pożizzjoni li għandha tittieħed f’isem l-Unjoni fil-Kumitat Amministrattiv stabbilit mill-Konvenzjoni Doganali dwar it-Trasport Internazzjonali ta’ oġġetti koperti b’carnets TIR 1 (“il-Konvenzjoni TIR”) b’rabta mal-adozzjoni prevista ta’ emendi li jikkonċernaw l-introduzzjoni tal-bażi ġuridika għall-proċedura elettronika TIR (eTIR).
2.Kuntest tal-proposta
2.1.Il-Konvenzjoni Doganali dwar it-Trasport Internazzjonali ta’ oġġetti koperti b’carnets TIR
Il-Konvenzjoni Doganali dwar it-Trasport Internazzjonali ta’ oġġetti koperti b’carnets TIR tal-14 ta’ Novembru 1975 (il-Konvenzjoni TIR”) għandha l-għan li tiffaċilita l-ġarr internazzjonali ta’ oġġetti minn uffiċċji doganali tat-tluq lejn uffiċċji doganali tad-destinazzjoni u minn ġol-pajjiżi kollha meħtieġa.
Il-Konvenzjoni TIR daħlet fis-seħħ fl-1978. Minn Jannar 2019, hemm 76 parti għall-Konvenzjoni, li jinkludu 75 stat u l-Unjoni Ewropea. L-Unjoni Ewropea ilha parti għall-Konvenzjoni TIR 2 mill-20 ta’ Ġunju 1983. L-Istati Membri kollha huma wkoll partijiet għall-Konvenzjoni TIR.
2.2.Il-Kumitat Amministrattiv
Il-Kumitat Amministrattiv jaġixxi fi ħdan il-qafas tal-Konvenzjoni TIR. Ir-rwol tiegħu huwa li jikkunsidra u jadotta emendi għall-Konvenzjoni TIR. Issir votazzjoni rigward il-proposti u kull Stat, li huwa parti u jiġi rrappreżentat f’sessjoni tal-Kumitat Amministrattiv, għandu vot wieħed. L-Unjoni għandha kompetenza esklussiva fil-qasam tad-dwana regolata mill-Konvenzjoni TIR. Madankollu, l-Unjoni, bħala orgnaizzazzjoni internazzjonali, m’għandhiex drittijiet tal-vot; l-Istati Membri kollha huma partijiet kontraenti bi drittijiet tal-vot.
L-emendi għall-Konvenzjoni TIR jiġu adottati minn maġġoranza ta’ żewġ terzi tal-partijiet preżenti u li jivvotaw. Biex tittieħed deċiżjoni, huwa meħtieġ kworum li jikkonsisti minn mhux inqas minn terz tal-Istati li huma partijiet.
2.3.L-att previst tal-Kumitat Amministrattiv
Fis-sessjoni ta’ Frar 2020, il-Kumitat Amministrattiv huwa probabbli li jieħu deċiżjoni dwar l-adozzjoni tal-emendi proposti għall-Konvenzjoni TIR (“l-att previst”).
L-għan tal-att previst huwa li jipprovdi l-bażi ġuridika meħtieġa għall-proċedura eTIR. Din il-bażi ġuridika se tkun magħmula minn Anness 11 ġdid tal-Konvenzjoni TIR u minn diversi emendi relatati mal-korp u l-Anness 9 tal-Konvenzjoni.
L-att previst se jkun vinkolanti għall-partijiet f’konformità mal-Artikolu 59 tal-Konvenzjoni TIR li jipprevedi: “Ħlief kif inhu pprovdut fl-Artikolu 60, kwalunkwe emenda proposta li ġiet ikkomunikata skont il-paragrafu preċedenti għandha tidħol fis-seħħ rigward il-Partijiet Kontraenti kollha tliet xhur wara l-iskadenza ta’ perjodu ta’ tnax-il xahar wara d-data ta’ komunikazzjoni tal-emenda proposta, fejn matul dan il-perjodu ma tkun ġiet ikkomunikata l-ebda oġġezzjoni għall-emenda proposta lis-Segretarju Ġenerali tan-Nazzjonjiet Uniti minn Stat li huwa Parti Kontraenti. Jekk, skont il-paragrafu 3 ta’ dan l-Artikolu, tkun ġiet ikkomunikata oġġezzjoni għall-emenda proposta għandu jitqies li l-emenda ma ġietx aċċettata u m’għandu jkollha l-ebda effett.”
3.Il-pożizzjoni li trid tittieħed f’isem l-Unjoni
3.1 Deskrizzjoni tal-emendi proposti għall-Konvenzjoni TIR
Billi l-Konvenzjoni TIR taqa’ taħt il-kompetenza esklussiva tal-Unjoni, l-Unjoni għandha tadotta pożizzjoni komuni għall-Istati Membri kollha tagħha li huma Partijiet Kontraenti għall-Konvenzjoni TIR dwar l-emendi proposti tagħha. Id-deċiżjoni li trid tittieħed hija jekk tintrabatx jew le mal-Anness 11 il-ġdid propost li huwa mmirat li jipprovdi l-bażi ġuridika għall-possibbiltà li tintuża proċedura elettronika TIR minflok il-Carnet TIR tal-karta. Madankollu, għandu jiġi nnutat li, anki jekk l-Unjoni ddeċidiet li tkun marbuta bl-Anness 11 il-ġdid propost, l-Unjoni u l-Istati Membri tagħha xorta jkollhom il-flessibilità li jiddeċiedu meta jgħaqqdu s-sistemi tal-IT tagħhom mas-sistema eTIR ospitata min-Nazzjonijiet Uniti.
Hawn taħt hawn spjegazzjoni dettaljata tal-kontenut tal-Anness 11 il-ġdid propost kif ukoll tal-bidliet proposti għall-korp tal-Konvenzjoni TIR li huma konsegwenza tal-introduzzjoni tal-Anness 11 il-ġdid propost.
Artikoli tal-Konvenzjoni relatati mal-Anness 11
L-Anness 11 il-ġdid ma jistax jiġi implimentat mingħajr ma jiġu emendati l-korp u l-Anness 9 tal-Konvenzjoni TIR.
Il-proposta għal paragrafu (s) ġdid f’Artikolu 1 tal-Konvenzjoni TIR ġiet elaborata sabiex tagħti definizzjoni tal-“proċedura eTIR” li hija proċedura TIR, implimentata permezz ta’ skambju elettroniku ta’ data, li tipprovdi l-ekwivalenti funzjonali għall-Carnet TIR. Dan l-Artikolu jistipula wkoll li l-“proċedura TIR” hija definita legalment fl-Anness 11 il-ġdid tal-Konvenzjoni TIR.
Il-proposta għal emenda tal-paragrafu b) tal-Artikolu 3 tal-Konvenzjoni TIR hija meħtieġa sabiex tispeċifika li t-trasport TIR li jitwettaq mill-proċedura eTIR irid ikun garantit minn assoċjazzjoni awtorizzata.
Il-proposta għal emenda tal-Artikolu 43 tal-Konvenzjoni TIR għandha l-għan li tqis in-nota ta’ Spjegazzjoni l-ġdida fil-Parti II tal-Anness 11, li tinterpreta ċerti dispożizzjonijiet tal-Konvenzjoni u tal-Annessi tagħha. Din l-emenda tista’ titqies bħala waħda ta’ natura editorjali.
Il-proposta għal kwart ġdid fl-Artikolu 58 tal-Konvenzjoni TIR ġiet elaborata biex jiġi stabbilit il-Korp Tekniku ta’ Implimentazzjoni. Dan il-korp se jkun responsabbli għall-adozzjoni u l-emenda tal-ispeċifikazzjonijiet tekniċi eTIR f’konformità mal-ispeċifikazzjonijiet kunċettwali u funzjonali adottati mill-Kumitat Amministrattiv.
Il-proposta għal emenda tal-Artikolu 59, għal Artikolu 60 bis ġdid u għal emenda tal-Artikolu 61 tal-Konvenzjoni TIR tinkludi l-proċedura għad-dħul fis-seħħ tal-Anness 11 u ta’ emendi futuri. L-Anness 11 għandu jidħol fis-seħħ fir-rigward tal-Partijiet Kontraenti kollha ħlief għal dawk li se jinnotifikaw in-nonaċċettazzjoni tagħhom lis-Segretarju Ġenerali tan-Nazzjonijiet Uniti. Għalhekk, dan se jwassal għal sitwazzjoni fejn xi Partijiet Kontraenti għall-Konvenzjoni TIR se jkunu marbuta b’dan l-Anness il-ġdid u oħrajn le.
Il-proposta għal subparagrafu (xi) ġdid f’paragrafu 3 tal-Parti I tal-Anness 9 toħloq dazju ġdid għall-assoċjazzjonijiet awtorizzati f’każ ta’ sitwazzjoni ta’ riżerva waqt proċedura eTIR. Fuq talba tal-awtoritajiet kompetenti, l-assoċjazzjonijiet se jkollhom jikkonfermaw li t-trasport jitwettaq skont il-proċedura eTIR, li l-garanzija hija valida u jipprovdu kwalunkwe informazzjoni rilevanti oħra relatata mat-trasport TIR.
L-Anness 11 il-Ġdid
L-ewwel parti tal-Anness 11 hija komposta minn erbatax-il Artikolu li jiddeskrivu fid-dettall il-funzjonament tal-proċedura eTIR futura.
L-Artikolu 1 jenfasizza li d-dispożizzjonijiet ta’ dan l-Anness għandhom japplikaw biss għall-Partijiet Kontraenti marbuta bl-Anness 11 kif previst fil-paragrafu 1 il-ġdid tal-Artikolu 60 bis tal-Konvenzjoni TIR u li l-proċedura eTIR ma tistax tintuża għal trasporti li jseħħu parzjalment fit-territorju ta’ Parti Kontraenti li mhijiex marbuta bl-Anness 11 u li hija Stat Membru ta’ unjoni doganali jew ekonomika b’territorju doganali wieħed.
L-Artikolu 2 jipprovdi għad-definizzjonijiet meħtieġa sabiex is-sistema eTIR il-ġdida tiġi deskritta b’mod korrett. F’dan l-artikolu, qiegħda tiġi pprovduta d-definizzjoni tat-termini li ġejjin: “sistema internazzjonali TIR”, “speċifikazzjonijiet TIR”, “data TIR bil-quddiem”, “data dwar emendi bil-quddiem”, “data ta’ dikjarazzjoni”, “dikjarazzjoni”, “dokument ta’ akkumpanjament” u “awtentikazzjoni”.
In-Noti ta’ Spjegazzjoni għall-paragrafu (h) tal-Artikolu 2 jenfasizzaw li sakemm jiġi stabbilit u deskritt approċċ armonizzat fl-ispeċifikazzjonijiet eTIR, il-Partijiet Kontraenti se jkollhom ċerta flessibbiltà biex jawtentikaw lid-detentur tal-proċedura eTIR skont il-liġi nazzjonali tagħhom. Huma jiddikjaraw ukoll li s-sigurtà tad-data skambjata bejn is-sistema internazzjonali eTIR u l-awtoritajiet kompetenti se tiġi żgurata kif definit fl-ispeċifikazzjonijiet tekniċi eTIR.
L-Artikolu 3 jittratta l-implimentazzjoni konkreta tas-sistema eTIR li teħtieġ li l-Partijiet Kontraenti jgħaqqdu s-sistemi tal-IT tagħhom mas-sistema Internazzjonali eTIR. Madankollu, dan l-artikolu, f’konformità mal-formulazzjoni proposta mill-Unjoni, jagħti lill-Partijiet Kontraenti marbuta bl-Anness 11 il-flessibbiltà li jistabbilixxu sa liema data s-sistemi doganali tagħhom ikunu konnessi mas-sistema internazzjonali eTIR. Dan il-punt huwa kruċjali għall-Unjoni għaliex se jkollu impatt fuq is-sistemi tal-IT Doganali tal-Istati Membri kollha u fuq il-komponenti ċentrali ospitati mill-Kummissjoni Ewropea (u l-ispeċifikazzjonijiet komuni tas-sistema tal-UE). Bħala konsegwenza, anke jekk l-Unjoni u l-Istati Membri tagħha kienu marbuta bl-Anness 11 u kellhom vuċi fl-emendi futuri tagħha, dawn ikunu liberi li jagħżlu meta jgħaqqdu s-sistemi tagħhom mas-sistema internazzjonali eTIR il-ġdida.
In-Nota ta’ Spjegazzjoni għall-paragrafu 2 tal-Artikolu 3 tirrakkomanda lill-Partijiet Kontraenti marbuta bl-Anness 11 li s-sistemi doganali nazzjonali tagħhom jiġu aġġornati u l-konnessjonijiet tagħhom mas-sistema internazzjonali eTIR jiġu żgurati hekk kif l-Anness 11 jidħol fis-seħħ. Madankollu, f’konformità mat-talba magħmula mill-Unjoni, din tħalli lill-unjonijiet doganali jew ekonomiċi l-flessibbiltà li jiddeċiedu aktar tard, u b’hekk ikollhom żmien biex jgħaqqdu s-sistemi doganali nazzjonali tal-Istati Membri kollha tagħhom mas-sistema internazzjonali eTIR.
L-Artikolu 4 jistabbilixxi l-kompożizzjoni, il-funzjonijiet u d-dispożizzjonijiet għar-regoli ta’ proċedura tal-Korp Tekniku ta’ Implimentazzjoni l-ġdid stabbilit mill-kwart il-ġdid tal-Artikolu 58 tal-Konvenzjoni TIR. Huwa importanti li jiġi enfasizzat li l-Partijiet Kontraenti marbuta bl-Anness 11 biss se jkunu membri ta’ dan il-korp. Il-Partijiet Kontraenti li m’aċċettawx l-Anness 11 jistgħu biss jattendu sessjonijiet tal-Korp Tekniku ta’ Implimentazzjoni bħala osservaturi.
L-Artikolu 5 jispjega kif il-Korp Tekniku ta’ Implimentazzjoni l-ġdid se jħejji għall-adozzjoni u l-emenda tal-ispeċifikazzjoni kunċettwali u funzjonali tas-sistema internazzjonali eTIR mill-Kumitat Amministrattiv. Dan l-artikolu jispeċifika wkoll kif il-Korp Tekniku ta’ Implimentazzjoni jipprepara u jadotta jew jemenda l-ispeċifikazzjoni teknika tal-proċedura eTIR f’konformità mal-ispeċifikazzjonijiet kunċettwali u funzjonali.
L-Artikolu 6 jiddeskrivi s-sottomissjoni tad-data TIR bil-quddiem. Din id-data se tiġi ppreżentata minn operaturi bil-quddiem b’mezzi elettroniċi. L-awtoritajiet kompetenti se jkollhom jippubblikaw il-lista tal-mezzi elettroniċi kollha li bihom jistgħu jiġu ppreżentati d-data TIR u d-data dwar emendi bil-quddiem. Dan l-artikolu għandu jinqara b’konnessjoni mal-abbozz tal-Artikolu 9 tal-Anness 11 li jiddeskrivi kif rekwiżiti addizzjonali tad-data, imposti mil-leġiżlazzjoni, jistgħu jiżdiedu mad-dejta TIR bil-quddiem. Barra minn hekk, dan l-artikolu jistipula li l-Partijiet Kontraenti għandhom jiffaċilitaw is-sottomissjoni ta’ data addizzjonali bħal din flimkien mad-dejta TIR bil-quddiem.
In-Nota ta’ Spjegazzjoni għall-paragrafu 3 tal-Artikolu 6 tirrakkomanda lill-Parti Kontraenti marbuta bl-Anness 11 li tirrikonoxxi l-metodi indikati fl-ispeċifikazzjonijiet biex tiġi ppreżentata d-data TIR bil-quddiem.
L-Artikolu 7 jiddefinixxi l-mekkaniżmi meħtieġa biex jiġi awtentikat id-detentur, jew ir-rappreżentant tiegħu, li jippreżenta d-data TIR bil-quddiem lill-awtoritajiet kompetenti. Huwa importanti li jiġi enfasizzat li l-Partijiet Kontraenti marbuta bl-Anness 11 se jkollhom jaċċettaw id-data tad-dikjarazzjoni li jirċievu mill-awtoritajiet kompetenti tal-pajjiż tat-tluq u tal-pajjiż li fih tintalab emenda għad-data tad-dikjarazzjoni permezz tas-sistema internazzjonali eTIR.
In-Nota ta’ Spjegazzjoni għall-paragrafu 2 tal-Artikolu 7 tiżgura li s-sistema internazzjonali eTIR tkun tista’ tikkonferma l-integrità tad-data TIR bil-quddiem jew tal-emenda bil-quddiem mibgħuta mid-detentur.
In-Nota ta’ Spjegazzjoni għall-paragrafu 4 tal-Artikolu 7 tiżgura li s-sistema internazzjonali eTIR tkun tista’ tikkonferma l-integrità tad-data tad-dikjarazzjoni mibgħuta mill-awtoritajiet kompetenti.
L-Artikolu 8 ifakkar prinċipju fundamentali għall-Konvenzjoni TIR li huwa r-rikonoxximent reċiproku tal-awtentikazzjoni tad-detentur imwettaq mill-awtoritajiet kompetenti tal-Partijiet Kontraenti marbuta bl-Anness 11.
In-Nota ta’ Spjegazzjoni għall-Artikolu 8 tiżgura li s-sistema internazzjonali eTIR tkun tista’ tikkonferma l-integrità tar-referenza għad-detentur li tirċievi mill-awtoritajiet kompetenti li aċċettaw id-dikjarazzjoni.
L-Artikolu 10 jintroduċi proċedura alternattiva fil-każ li proċedura eTIR tiġi mxekkla għal raġunijiet tekniċi u jfakkar fid-dmirijiet tal-assoċjazzjonijiet garanti nazzjonali f’dik is-sitwazzjoni.
L-Artikolu 11 u l-Artikolu 12 jiddeskrivu kif is-sistema internazzjonali eTIR ser tiġi ospitata, iffinanzjata u amministrata. Sa mill-bidu tad-diskussjoni dwar din il-kwistjoni, l-Unjoni kienet favur is-soluzzjoni proposta li jkun hemm sistema eTIR li tiġi ospitata u amministrata direttament skont l-awspiċji tal-Kummissjoni Ekonomika għall-Ewropa tan-Nazzjonijiet Uniti sabiex tiġi żgurata l-indipendenza tas-sistema Internazzjonali eTIR mill-organizzazzjoni internazzjonali (bħalissa l-IRU).
In-Nota ta’ Spjegazzjoni għall-paragrafu 3 tal-Artikolu 11 tiċċara r-regoli biex jiġu ffinanzjati l-ispejjeż operattivi tas-sistema internazzjonali eTIR f’każ li l-ispejjeż għandhom jiġu koperti permezz ta’ ammont għal kull trasport TIR. F’dan il-każ, il-Partijiet Kontraenti għandhom ir-responsabbiltà li jiddeċiedu dwar il-mekkaniżmi ta’ finanzjament xierqa u dwar il-modalitajiet tagħhom. Il-baġit se jiġi approvat mill-Kumitat Amministrattiv.
L-Artikolu 13 jistabbilixxi r-regoli li jikkonċernaw il-pubblikazzjoni tal-uffiċċji doganali li jistgħu jimmaniġġjaw operazzjonijiet eTIR. L-awtoritajiet kompetenti għandhom jiżguraw li l-lista tal-uffiċċji doganali għat-twettiq tal-operazzjonijiet TIR skont il-proċedura eTIR hija preċiża u aġġornata fil-bażi tad-data elettronika għall-uffiċċji doganali approvati żviluppati u miżmuma mill-Bord Eżekuttiv TIR.
L-Artikolu 14 jispeċifika li s-sottomissjoni tad-data għat-tmiem tal-operazzjoni TIR hija meqjusa bħala li għandha tiġi ssodisfata permezz tal-applikazzjoni tal-proċedura eTIR.
3.2 Pożizzjoni proposta
L-Unjoni tikkondividi l-objettiv tal-Anness 11 il-ġdid propost tal-Konvenzjoni TIR: wara aktar minn ħmistax-il sena ta’ xogħlijiet preparatorji, wasal iż-żmien li jsir pass lejn ambjent elettroniku TIR. Dan huwa għalkollox konformi mal-politika u l-leġiżlazzjoni tal-UE dwar id-dwana elettronika li hija bbażata fuq il-pass min-naħa tad-dwana lejn ambjent mingħajr karti u kompletament elettroniku u interoperabbli b’valuri ewlenin ta’ sempliċità, servizz u ħeffa.
Saru konsultazzjonijiet dwar l-emendi proposti mal-Istati Membri fi ħdan il-Grupp ta’ Esperti Doganali għal TIR (koordinazzjoni ta’ Ġinevra). Saru aktar konsultazzjonijiet matul is-sessjonijiet tal-Grupp ta’ Ħidma dwar Kwistjonijiet Doganali li Jaffettwaw it-Trasport tal-Kummissjoni Ekonomika għall-Ewropa tan-Nazzjonijiet Uniti (UNECE). Il-Kummissjoni Ewropea f’isem l-Unjoni u n-numru tal-Istati Membri tagħha pparteċipaw ukoll fi gruppi ta’ esperti taħt l-awspiċju tal-UNECE li ġew stabbiliti biex jitfasslu dispożizzjonijiet kemm legali kif ukoll tekniċi għal eTIR.
Il-koordinazzjoni interna kif ukoll id-diskussjonijiet konġunti mal-Istati Membri wrew biċ-ċar li hemm appoġġ wiesa’ għall-Anness 11 il-ġdid propost.
Huwa għalhekk propost li l-Unjoni tappoġġja l-adozzjoni tal-emendi li jikkonċernaw l-introduzzjoni tal-bażi ġuridika għall-proċedura elettronika TIR (eTIR).
4.4. Bażi ġuridika
4.1.Bażi ġuridika proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jistipula deċiżjonijiet li jistabbilixxu “il-pożizzjonijiet li għandhom jiġu adottati f’isem l-Unjoni f’sede stabbilita bi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
L-Artikolu 218(9) tat-TFUE japplika irrispettivament minn jekk l-Unjoni hix membru tas-sede jew parti għall-ftehim 3 .
Il-kunċett ta’ “atti li jkollhom effetti ġuridiċi” jinkludi l-atti li jkollhom effetti ġuridiċi skont ir-regoli tad-dritt internazzjonali li jirregola s-sede kkonċernata. Dan jinkludi wkoll l-istrumenti li ma għandhomx effett vinkolanti skont id-dritt internazzjonali, iżda li "jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatura tal-Unjoni” 4 .
4.1.2.Applikazzjoni għall-każ preżenti
Il-Kumitat Amministrattiv huwa korp stabbilit permezz ta’ ftehim, jiġifieri l-Konvenzjoni Doganali dwar it-Trasport Internazzjonali ta’ oġġetti li jaqgħu taħt il-carnets TIR.
L-att li l-Kumitat Amministrattiv huwa mitlub jadotta jikkostitwixxi att b’effetti legali. L-att previst se jkun vinkolanti skont id-dritt internazzjonali f’konformità mal-Artikoli 59 u 60 tal-Konvenzjoni Doganali dwar it-Trasport Internazzjonali ta’ oġġetti li jaqgħu taħt il-carnets TIR.
Għaldaqstant, il-bażi ġuridika proċedurali għad-deċiżjoni proposta hija l-Artikolu 218(9) tat-TFUE.
4.2.Bażi ġuridika sostantiva
4.2.1.Prinċipji
Il-bażi ġuridika sostantiva biex tittieħed deċiżjoni skont l-Artikolu 218(9) tat-TFUE tiddependi primarjament mill-għan u mill-kontenut tal-att previst li dwarhom tittieħed pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawn l-għanijiet jew komponenti jkun jista’ jiġi identifikat bħala dak ewlieni, filwaqt li l-ieħor ikun sempliċiment inċidentali, id-deċiżjoni skont l-Artikolu 218(9) tat-TFUE trid tkun imsejsa fuq bażi ġuridika sostantiva waħda, jiġifieri dik rikjesta mill-għan jew mill-komponent ewlieni jew predominanti.
4.2.2.Applikazzjoni għall-każ preżenti
L-objettiv ewlieni u l-kontenut tal-att previst jirrigwardaw id-dwana.
Għalhekk, il-bażi ġuridika sostantiva tad-Deċiżjoni proposta hija l-Artikolu 207 tat-TFUE.
4.3.Konklużjoni
Il-bażi ġuridika tad-Deċiżjoni proposta jenħtieġ li tkun l-Artikolu 207 flimkien mal-Artikolu 218(9) tat-TFUE.
5.Il-pubblikazzjoni tal-att previst
Peress li l-att tal-Kumitat Amministrattiv se jemenda l-Konvenzjoni Doganali dwar it-Trasport Internazzjonali ta’ oġġetti li jaqgħu taħt il-carnets TIR u l-Annessi tagħha, huwa xieraq li dan jiġi ppubblikat f'Il-Ġurnal Uffiċjali tal-Unjoni Ewropea wara l-adozzjoni tiegħu.
2019/0279 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fi ħdan il-Kumitat Amministrattiv għall-Konvenzjoni Doganali dwar it-Trasport Internazzjonali ta’ oġġetti li jaqgħu taħt il-carnets TIR fir-rigward tal-proposta biex tiġi emendata l-Konvenzjoni
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207, flimkien mal-Artikolu 218(9) tiegħu,
Wara li kkunsidra l-proposta mill-Kummissjoni Ewropea,
Billi:
(1)Il-Konvenzjoni Doganali dwar it-Trasport Internazzjonali ta’ oġġetti li jaqgħu taħt il-carnets TIR tal-14 ta’ Novembru 1975 (“il-Konvenzjoni TIR”) ġiet konkluża mill-Unjoni permezz tar-Regolament tal-Kunsill(KEE) Nru 2112/78 5 u daħlet fis-seħħ fil-Komunità fl-20 ta’ Ġunju 1983 6 .
(2)Skont l-Artikolu 59 tal-Konvenzjoni TIR, il-Kumitat Amministrattiv jista’ jadotta emendi b’maġġoranza ta’ żewġ terzi tal-Partijiet Kontraenti preżenti u li jivvutaw.
(3)Il-Kumitat Amministrattiv , waqt sessjoni fi Frar 2020, għandu jadotta Anness 11 ġdid u emendi relatati mal-Konvenzjoni TIR.
(4)Ikun xieraq li tiġi stabbilita l-pożizzjoni li għandha tittieħed f’isem l-Unjoni fil-Kumitat Amministrattiv, peress li l-emendi għall-Konvenzjoni TIR se jkunu vinkolanti fuq l-Unjoni.
(5)L-Unjoni tappoġġa l-Anness 11 il-ġdid tal-Konvenzjoni TIR u l-emendi meħtieġa għall-korp tal-Konvenzjoni TIR għaliex din issegwi l-politika stabbilita mir-Regolament (UE) Nru 952/2013 tal-Parlament Ewropew u tal-Kunsill 7 skont liema, fil-prinċipju, il-komunikazzjonijiet kollha mal-awtoritajiet doganali għandhom ikunu elettroniċi.
(6)Paragrafu (s) ġdid tal-Artikolu 1 tal-Konvenzjoni TIR għandu jiddefinixxi l-“proċedura eTIR” applikabbli għall-iskambju elettroniku tad-data bejn l-awtoritajiet doganali.
(7)Artikolu 58 ġdid tal-Konvenzjoni TIR għandu jistabbilixxi korp tekniku ta’ implimentazzjoni li għandu jadotta l-ispeċifikazzjoni teknika tas-sistema Internazzjonali eTIR.
(8)Artikolu 60 bis ġdid għandu jistabbilixxi l-proċedura speċjali għad-dħul fis-seħħ tal-Anness 11 il-ġdid tal-Konvenzjoni TIR u tal-emendi futuri tagħha.
(9)L-emendi għall-Artikoli 43, 59 u 61 jagħmlu l-adattamenti meħtieġa għall-introduzzjoni tal-Anness 11 il-ġdid.
(10)L-Anness 11 il-ġdid tal-Konvenzjoni TIR għandu jippermetti lill-Partijiet Kontraenti marbuta minnu jużaw l-operazzjonijiet TIR. Għandu jippermetti lill-Unjoni u lill-Istati Membri tagħha jagħżlu b’mod flessibbli f’liema ħin jistgħu jgħaqqdu s-sistemi tagħhom mas-sistema internazzjonali eTIR.
(11)Għalhekk, il-pożizzjoni li trid tiġi adottata f’isem l-Unjoni fi ħdan il-Kumitat Amministrattiv, jeħtieġ li tkun ibbażata fuq l-abbozz ta’ emendi mehmuż ma’ din id-Deċiżjoni,
ADOTTA DIN ID-DEĊIŻJONI:
Artikolu 1
Il-pożizzjoni li trid tittieħed f’isem l-Unjoni fit-tnejn u sebgħin jew fis-sessjoni sussegwenti tal-Kumitat Amministrattiv għandha tkun ibbażata fuq l-abbozzi ta’ emendi mehmuża ma’ din id-Deċiżjoni.
Artikolu 2
Il-pożizzjoni msemmija fl-Artikolu 1 għandha tiġi espressa mill-Istati Membri tal-Unjoni li huma membri tal-Kumitat Amministrattiv, li jaġixxu b’mod konġunt.
Artikolu 3
Aktar bidliet fl-abbozz ta’ emendi tal-Artikolu 1 jistgħu jiġu miftiehma mir-rappreżentant tal-Unjoni fil-Kumitat Amministrattiv, jekk in-negozjati jirrikjedu dan.
Artikolu 4
Din id-Deċiżjoni għandha tidħol fis-seħħ fid-data tal-adozzjoni tagħha.
Din id-Deċiżjoni hija indirizzata lill-Istati Membri.
Magħmul fi Brussell,
Għall-Kunsill
Il-President
