IL-KUMMISSJONI EWROPEA
Brussell, 13.12.2019
COM(2019) 631 final
2019/0278(NLE)
Proposta għal
DEĊIŻJONI TAL-KUNSILL
dwar il-pożizzjoni li trid tittieħed, f’isem l-Unjoni Ewropea, fit-tlieta u sittin sessjoni tal-Kummissjoni dwar id-Drogi Narkotiċi dwar l-iskedar ta’ sustanzi taħt il-Konvenzjoni Unika dwar Drogi Narkotiċi tal-1961, kif emendata mill-Protokoll tal-1972, u l-Konvenzjoni dwar is-Sustanzi Psikotropiċi tal-1971
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna d-deċiżjoni li tistabbilixxi l-pożizzjoni li għandha tiġi adottata f’isem l-Unjoni fit-63 sessjoni tal-Kummissjoni dwar id-Drogi Narkotiċi fir-rigward tal-iskedar ta’ sustanzi taħt il-Konvenzjoni Unika tan-NU dwar id-Drogi Narkotiċi tal-1961, kif emendata mill-Protokoll tal-1972, u l-Konvenzjoni tan-NU dwar is-Sustanzi Psikotropiċi tal-1971. It-63 sessjoni tal-Kummissjoni dwar id-Drogi Narkotiċi se ssir bejn it-2 u s-6 ta’ Marzu 2020.
2.Kuntest tal-proposta
2.1. Il-Konvenzjoni Unika tan-NU dwar id-Drogi Narkotiċi tal-1961, kif emendata mill-Protokoll tal-1972, u l-Konvenzjoni tan-NU dwar is-Sustanzi Psikotropiċi tal-1971
Il-Konvenzjoni Unika tan-Nazzjonijiet Uniti (NU) dwar id-Drogi Narkotiċi tal-1961, kif emendata mill-Protokoll tal-1972, (il-“Konvenzjoni dwar id-Drogi Narkotiċi”) għandha l-għan li tiġġieled l-abbuż tad-drogi permezz ta’ azzjoni kkoordinata fil-livell internazzjonali. Hemm żewġ forom ta’ intervent u ta’ kontroll li jaħdmu id f’id. L-ewwel u qabel kollox jiġi żgurat li l-pussess, l-użu, il-kummerċ, id-distribuzzjoni, l-importazzjoni, l-esportazzjoni, il-manifattura u l-produzzjoni ta’ drogi jkunu biss għal skopijiet mediċi u xjentifiċi. It-tieni, it-traffikar tad-droga jiġi miġġieled permezz ta’ kooperazzjoni internazzjonali li tkun ta’ deterrent u skuraġġament għat-traffikanti tad-droga.
Il-Konvenzjoni tan-NU dwar is-Sustanzi Psikotropiċi tal-1971 (il-“Konvenzjoni dwar is-Sustanzi Psikotropiċi”) tistabbilixxi sistema ta’ kontroll internazzjonali għas-sustanzi psikotropiċi. Hija rrispondiet għad-diversifikazzjoni u l-espansjoni tal-ispettru tad-drogi u introduċiet kontrolli fuq numru ta’ drogi sintetiċi skont l-abbuż potenzjali tagħhom, minn naħa, u l-valur terapewtiku tagħhom min-naħa l-oħra.
L-Istati Membri kollha tal-UE huma firmatarji tal-Konvenzjonijiet, iżda l-Unjoni mhijiex.
2.2.Il-Kummissjoni dwar id-Drogi Narkotiċi
Il-Kummissjoni dwar id-Drogi Narkotiċi (Commission on Narcotic Drugs - CND) hija kummissjoni tal-Kunsill Ekonomiku u Soċjali tan-NU (UN Economic and Social Council - ECOSOC) u l-funzjonijiet u s-setgħat tagħha huma mniżżla, fost l-oħrajn, fiż-żewġ Konvenzjonijiet. Hija magħmula minn 53 Stat Membru tan-NU eletti mill-ECOSOC. F’Marzu 2020, 13-il Stat Membru se jkunu membri tas-CND bid-dritt li jivvutaw. L-Unjoni għandha status ta’ osservatur fis-CND.
2.3.L-att previst tal-Kummissjoni dwar id-Drogi Narkotiċi
Is-CND temenda fuq bażi regolari l-lista ta’ sustanzi li huma annessi mal-Konvenzjonijiet abbażi tar-rakkomandazzjonijiet tal-Organizzazzjoni Dinjija tas-Saħħa (WHO) li tingħata pariri mill-Kumitat ta’ Esperti tagħha dwar id-Dipendenza fuq id-Droga.
Fil-15 ta’ Novembru 2019 id-WHO rrakkomandat lis-Segretarju Ġenerali tan-NU biex iżid 12-il sustanza minn dawk li ġew rieżaminati b’mod kritiku mill-Kumitat ta’ Esperti tad-WHO dwar id-Dipendenza fuq id-Droga mal-iskedi tal-Konvenzjonijiet.
Fit-63 sessjoni tagħha, li tentattivament se ssir fi Vjenna mit-2 sas-6 ta’ Marzu 2020, is-CND mitluba tadotta d-deċiżjonijiet dwar l-iskedar ta’ dawn is-sustanzi taħt il-Konvenzjonijiet.
3.Pożizzjoni li trid tittieħed f’isem l-Unjoni
Bidliet fl-Iskedi tal-Konvenzjonijiet għandhom riperkussjonijiet diretti fil-kamp tal-applikazzjoni tad-dritt tal-Unjoni fil-qasam tal-kontroll tad-droga għall-Istati Membri kollha. L-Artikolu 1(1) tad-Deċiżjoni Kwadru tal-Kunsill 2004/757/ĠAI tal-25 ta’ Ottubru 2004 li tistabbilixxi dispożizzjonijiet minimi dwar l-elementi kostitwenti ta’ atti kriminali u ta’ pieni fil-qasam tat-traffikar illeċitu tad-drogi (id-“Deċiżjoni Kwadru”) jiddikjara li, għall-finijiet tad-Deċiżjoni Kwadru, “droga” tfisser sustanza koperta jew mill-Konvenzjoni dwar id-Drogi Narkotiċi jew mill-Konvenzjoni dwar is-Sustanzi Psikotropiċi u kwalunkwe waħda mis-sustanzi mniżżla fl-Anness tad-Deċiżjoni Kwadru. Għaldaqstant id-Deċiżjoni Kwadru tapplika għas-sustanzi elenkati fl-Iskedi tal-Konvenzjoni dwar id-Drogi Narkotiċi u tal-Konvenzjoni dwar is-Sustanzi Psikotropiċi. Għaldaqstant kwalunkwe tibdil fl-iskedi annessi ma’ dawn il-Konvenzjonijiet jaffettwa b’mod dirett ir-regoli komuni tal-UE u jibdel il-kamp ta’ applikazzjoni tagħhom skont l-Artikolu 3(2) tat-Trattat dwar il-Funzjonament tal-Unjoni Ewropea (TFUE). Dan huwa irrispettivament minn jekk is-sustanza kkonċernata kinitx diġà tqiegħdet taħt kontroll madwar l-UE.
L-ebda waħda mit-13-il sustanza, li ġew rieżaminati mill-Kumitat ta’ Esperti dwar id-Dipendenza fuq id-Droga, ma għadha suġġetta għal miżuri ta’ kontroll madwar l-Unjoni.
Il-proposta tal-Kummissjoni għall-pożizzjoni komuni tal-Unjoni tissuġġerixxi li jingħata appoġġ għar-rakkomandazzjonijiet tad-WHO billi dawn huma konformi mal-għarfien xjentifiku ta’ bħalissa. Fir-rigward tas-sustanzi psikoattivi, iż-żieda ta’ dawn is-sustanzi fl-Iskedi tal-Konvenzjonijiet hija appoġġata wkoll mill-informazzjoni li hija disponibbli mill-Bażi ta’ data Ewropea dwar Drogi Ġodda taċ-Ċentru Ewropew għall-Monitoraġġ tad-Droga u d-Dipendenza fuq id-Droga (EMCDDA).
Huwa meħtieġ li l-Kunsill jistabbilixxi l-pożizzjoni tal-Unjoni għal-laqgħa tas-CND meta din tissejjaħ biex tiddeċiedi dwar l-iskedar ta’ sustanzi. Tali pożizzjoni, minħabba l-limitazzjonijiet intrinsiċi tal-istatus ta’ osservatur tal-Unjoni, għandha tiġi espressa mill-Istati Membri li se jkunu membri tas-CND f’Marzu 2020, filwaqt li jaġixxu b’mod konġunt fl-interess tal-Unjoni fi ħdan is-CND. Għalkemm l-Unjoni mhijiex parti f’dawn il-Konvenzjonijiet hija għandha kompetenza esklużiva f’dan il-qasam.
Għal dan il-għan, il-Kummissjoni qed tipproponi li l-Istati Membri li se jkunu membri tas-CND f’Marzu 2020 jesprimu l-pożizzjoni tal-Unjoni f’isem l-Unjoni Ewropea fit-63 sessjoni tas-CND dwar l-iskedar ta’ sustanzi taħt il-Konvenzjoni dwar id-Drogi Narkotiċi u l-Konvenzjoni dwar is-Sustanzi Psikotropiċi. Din hija r-raba’ darba li l-Kummissjoni qiegħda tippreżenta tali proposta dwar il-pożizzjoni tal-Unjoni. Il-Kunsill adotta l-pożizzjonijiet tal-Unjoni u dan ippermetta lill-UE titkellem b’vuċi waħda fil-laqgħat preċedenti tas-CND dwar l-iskedar internazzjonali, billi l-Istati Membri li pparteċipaw fis-CND ivvotaw favur l-iskedar f’konformità mal-pożizzjoni tal-Unjoni.
4.Bażi ġuridika
4.1.Bażi ġuridika proċedurali
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprovdi għal deċiżjonijiet li jistabbilixxu “il-pożizzjonijiet li għandhom jiġu adottati f’isem l-Unjoni f’sede stabbilita bi ftehim, meta dik is-sede tintalab tadotta atti li jkollhom effetti ġuridiċi, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
L-Artikolu 218(9) tat-TFUE japplika irrispettivament jekk l-Unjoni tkunx membru tal-korp jew tkunx Parti għall-ftehim. Il-kunċett ta’ “atti li jkollhom effetti ġuridiċi” jinkludi l-atti li jkollhom effetti ġuridiċi skont ir-regoli tad-dritt internazzjonali li jirregola l-korp ikkonċernat. Dan jinkludi l-istrumenti li ma għandhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatura tal-Unjoni’.
Is-CND hija “korp imwaqqaf bi ftehim” fi ħdan it-tifsira ta’ dan l-Artikolu, minħabba li hija korp stabbilit mill-ECOSOC – organu tan-Nazzjonijiet Uniti — u li ngħata kompiti speċifiċi taħt il-Konvenzjoni dwar id-Drogi Narkotiċi u l-Konvenzjoni dwar is-Sustanzi Psikotropiċi.
Id-deċiżjonijiet ta’ skedar tas-CND huma “atti li għandhom effetti ġuridiċi” skont it-tifsira tal-Artikolu 218(9) tat-TFUE. Skont il-Konvenzjoni dwar id-Drogi Narkotiċi u l-Konvenzjoni dwar is-Sustanzi Psikotropiċi, id-deċiżjonijiet tas-CND isiru vinkolanti awtomatikament, sakemm parti ma tkunx ippreżentat id-deċiżjoni għal rieżami lill-ECOSOC fil-perjodu ta’ żmien applikabbli. Id-deċiżjonijiet tal-ECOSOC dwar din il-kwistjoni huma finali. Id-deċiżjonijiet ta’ skedar tas-CND għandhom ukoll effetti ġurudiċi fl-ordinament ġuridiku tal-UE minħabba l-fatt li jistgħu jinfluwenzaw b’mod deċiżiv il-kontenut tal-leġiżlazzjoni tal-UE, jiġifieri d-Deċiżjoni Kwadru tal-Kunsill 2004/757/ĠAI. Il-bidliet fl-iskedi tal-Konvenzjonijiet għandhom riperkussjonijiet diretti għall-ambitu tal-applikazzjoni ta’ dan l-istrument legali tal-UE.
L-att previst ma jissupplimentax u ma jemendax il-qafas istituzzjonali tal-Ftehim.
Għaldaqstant, il-bażi ġuridika proċedurali tad-Deċiżjoni proposta hija l-Artikolu 218(9) tat-TFUE.
4.2.Bażi ġuridika sostantiva
Il-bażi ġuridika sostantiva biex tittieħed deċiżjoni skont l-Artikolu 218(9) tat-TFUE tiddependi primarjament mill-għan u mill-kontenut tal-att previst li dwarhom tittieħed pożizzjoni f’isem l-Unjoni.
L-objettiv ewlieni u l-kontenut tal-att previst jirrelataw mat-traffikar illeċitu tad-droga.
Għaldaqstant, il-bażi ġuridika sostantiva tad-deċiżjoni proposta hija l-Artikolu 83(1) tat-TFUE li tidentifika t-traffikar illeċitu tad-droga bħala wieħed mir-reati b’dimensjoni transfruntiera speċjali u tagħti s-setgħa lill-Parlament Ewropew u lill-Kunsill biex jistabbilixxu regoli minimi dwar id-definizzjoni ta’ reati u sanzjonijiet fil-qasam tat-traffikar illeċitu tad-droga.
4.3.Ġeometrija varjabbli
F’konformità mal-Artikolu 10(4) tal-Protokoll (Nru 36) dwar id-dispożizzjonijiet tranżitorji annessi mat-Trattati, ir-Renju Unit innotifika li ma jaċċettax is-setgħat sħaħ tal-Kummissjoni u tal-Qorti tal-Ġustizzja fir-rigward ta’ atti fil-qasam tal-kooperazzjoni tal-pulizija u dik ġudizzjarja f’materji kriminali li ġew adottati qabel id-dħul fis-seħħ tat-Trattat ta’ Lisbona. Bħala konsegwenza, id-Deċiżjoni Kwadru 2004/757 ĠAI waqfet milli tapplika għar-Renju Unit mill-1 ta’ Diċembru 2014.
Peress li d-deċiżjonijiet ta’ skedar tas-CND ma jaffettwawx ir-regoli komuni fil-qasam tat-traffikar illeċitu tad-drogi li jorbtu lir-Renju Unit, dan l-Istat Membru ma jipparteċipax fl-adozzjoni tad-Deċiżjoni tal-Kunsill li tistabbilixxi l-pożizzjoni li għandha tiġi adottata f’isem l-Unjoni meta jiġu adottati deċiżjonijiet ta’ skedar simili.
Id-Danimarka hija marbuta bid-Deċiżjoni Kwadru tal-Kunsill Nru 2004/757/ĠAI applikabbli sal-21 ta’ Novembru 2018 li tistipula fl-Artikolu 1 tagħha li “drogi” għandhom ifissru kwalunkwe waħda mis-sustanzi koperti jew mill-Konvenzjoni dwar id-Drogi Narkotiċi jew mill-Konvenzjoni dwar is-Sustanzi Psikotropiċi.
Peress li d-deċiżjonijiet ta’ skedar tas-CND ma jaffettwawx ir-regoli komuni fil-qasam tat-traffikar illeċitu tad-drogi li bih hija marbuta d-Danimarka, id-Danimarka tipparteċipa fl-adozzjoni tad-Deċiżjoni tal-Kunsill li tistabbilixxi l-pożizzjoni li għandha tiġi adottata f’isem l-Unjoni meta jiġu adottati deċiżjonijiet ta’ skedar simili.
4.4.Konklużjoni
Il-bażi ġuridika għal din il-proposta hija l-Artikolu 83(1), flimkien mal-Artikolu 218(9) TFUE.
5.IMPLIKAZZJONIJIET BAĠITARJI
Ebda implikazzjoni baġitarja.
2019/0278 (NLE)
Proposta għal
DEĊIŻJONI TAL-KUNSILL
dwar il-pożizzjoni li trid tittieħed, f’isem l-Unjoni Ewropea, fit-tlieta u sittin sessjoni tal-Kummissjoni dwar id-Drogi Narkotiċi dwar l-iskedar ta’ sustanzi taħt il-Konvenzjoni Unika dwar Drogi Narkotiċi tal-1961, kif emendata mill-Protokoll tal-1972, u l-Konvenzjoni dwar is-Sustanzi Psikotropiċi tal-1971
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 83(1) flimkien mal-Artikolu 218(9) tiegħu,
Wara li kkunsidra l-proposta mill-Kummissjoni Ewropea,
Billi:
(1)Il-Konvenzjoni Unika tan-Nazzjonijiet Uniti (NU) dwar id-Drogi Narkotiċi tal-1961, kif emendata mill-Protokoll tal-1972, (il-“Konvenzjoni dwar id-Drogi Narkotiċi”) daħlet fis-seħħ fit-8 ta’ Awwissu 1975.
(2)Skont l-Artikolu 3 tal-Konvenzjoni dwar id-Drogi Narkotiċi, il-Kummissjoni dwar id-Drogi Narkotiċi tista’ tiddeċiedi li żżid sustanzi mal-Iskedi ta’ dik il-Konvenzjoni. Tista’ biss tagħmel tibdiliet fl-Iskedi skont ir-rakkomandazzjonijiet tal-Organizzazzjoni Dinjija tas-Saħħa (WHO), iżda tista’ wkoll tiddeċiedi li ma tagħmilx il-bidliet irrakkomandati mill-Organizzazzjoni Dinjija tas-Saħħa (WHO).
(3)Il-Konvenzjoni tan-NU dwar is-Sustanzi Psikotropiċi tal-1971 (il-“Konvenzjoni dwar is-Sustanzi Psikotropiċi”) daħlet fis-seħħ fis-16 ta’ Awwissu 1976.
(4)Skont l-Artikolu 2 tal-Konvenzjoni dwar is-Sustanzi Psikotropiċi, il-Kummissjoni dwar id-Drogi Narkotiċi tista’ tiddeċiedi li żżid sustanzi mal-Iskedi ta’ dik il-Konvenzjoni, jew li tneħħihom, abbażi tar-rakkomandazzjonijiet tad-WHO. Hija għandha setgħat diskrezzjonali estensivi biex tieħu kont ta’ fatturi ekonomiċi, soċjali, legali, amministrattivi u ta’ fatturi oħra, iżda ma tistax taġixxi b’mod arbitrarju.
(5)Il-bidliet fl-Iskedi taż-żewġ Konvenzjonijiet għandhom riperkussjonijiet diretti fuq l-ambitu tal-applikazzjoni tad-dritt tal-Unjoni fil-qasam tal-kontroll tad-drogi. Id-Deċiżjoni Kwadru tal-Kunsill 2004/757/ĠAI tapplika għas-sustanzi elenkati fl-Iskedi ta’ dawn il-Konvenzjonijiet. Għaldaqstant kwalunkwe tibdil fl-Iskedi annessi mal-Konvenzjonijiet jaffettwa b’mod dirett ir-regoli komuni tal-Unjoni u jibdel il-kamp ta’ applikazzjoni tagħhom skont l-Artikolu 3(2) tat-Trattat dwar il-Funzjonament tal-Unjoni Ewropea (TFUE).
(6)Matul it-tlieta u sittin sessjoni, li tentattivament se ssir bejn it-2 u s-6 ta’ Marzu 2020 fi Vjenna, il-Kummissjoni dwar id-Drogi Narkotiċi se tadotta deċiżjonijiet dwar iż-żieda ta’ 12-il sustanza ġdida mal-Iskedi tal-Konvenzjonijiet tan-NU.
(7)L-Unjoni mhijiex Parti għall-Konvenzjonijiet rilevanti tan-NU. Hija għandha status ta’ osservatur fi ħdan il-Kummissjoni dwar id-Drogi Narkotiċi li f’Marzu 2020 se tkun tinkludi tlettax-il Stat Membru bħala membri bid-dritt għall-vot. Għaldaqstant huwa meħtieġ li l-Kunsill jawtorizza lill-Istati Membri biex jesprimu l-pożizzjoni tal-Unjoni dwar l-iskedar ta’ sustanzi taħt il-Konvenzjoni dwar id-Drogi Narkotiċi u l-Konvenzjoni dwar is-Sustanzi Psikotropiċi peress li d-deċiżjonijiet dwar iż-żieda ta’ sustanzi ġodda mal-Iskedi tal-Konvenzjonijiet jaqgħu fil-kompetenza esklużiva tal-Unjoni.
(8)Id-WHO irrakkomandat iż-żieda ta’ żewġ sustanzi ġodda fl-Iskeda I tal-Konvenzjoni dwar id-Drogi Narkotiċi, sustanza ġdida fl-Iskeda I, seba’ sustanzi ġodda fl-Iskeda II u żewġ sustanzi ġodda fl-Iskeda IV tal-Konvenzjoni dwar is-Sustanzi Psikotropiċi.
(9)Is-sustanzi l-ġodda li ġew rieżaminati mill-Kumitat tal-Esperti tad-WHO dwar id-Dipendenza fuq id-Droga (“il-Grupp ta’ Esperti”) u li ġew irrakkomandati biex jiġu skedati mid-WHO huma mmonitorjati miċ-Ċentru Ewropew għall-Monitoraġġ tad-Droga u d-Dipendenza fuq id-Droga (“EMCDDA”) bħala sustanzi psikoattivi skont it-termini tar-Regolament (KE) Nru 1920/2006 tal-Parlament Ewropew u tal-Kunsill. L-ebda waħda minn dawn is-sustanzi ma ġiet suġġetta la għal rapport inizjali u lanqas għal valutazzjoni tar-riskju fil-livell tal-Unjoni.
(10)Skont il-valutazzjoni tal-Kumitat ta’ Esperti, il-krotonilfentanil (isem kimiku: N-fenil-N-[1-(2-feniletil)-4-piperidinil]-2-butenamid) hija oppjojde sintetika u hija strutturalment simili għall-fentanil, sustanza kkontrollata użata b’mod wiesa’ fil-mediċina għal anestesija ġenerali waqt il-kirurġija u għall-immaniġġjar tal-uġigħ. Il-krotonilfentanil ma għandha l-ebda użu terapewtiku u lanqas ma ġiet awtorizzata titqiegħed fis-suq bħala prodott mediċinali. Hemm biżżejjed evidenza li l-krotonilfentanil qed tiġi, jew x’aktarx qed tiġi, abbużata, u tista’ tikkostitwixxi problema soċjali u tas-saħħa pubblika li tiġġustifika t-tqegħid tas-sustanza taħt kontroll internazzjonali. Għaldaqstant, id-WHO tirrakkomanda li l-krotonilfentanil titqiegħed fl-Iskeda I tal-Konvenzjoni dwar id-Drogi Narkotiċi.
(11)Kien biss fil-ħarifa tal-2019 li l-krotonilfentanil ġiet identifikata għall-ewwel darba fl-UE (fin-Netherlands). Għadhom ma ġew assoċjati l-ebda mewta jew intossikazzjoni akuta ma’ din is-sustanza.
(12)L-Istati Membri għandhom jieħdu l-pożizzjoni li jżidu l-krotonilfentanil fl-Iskeda I tal-Konvenzjoni dwar id-Drogi Narkotiċi.
(13)Skont il-valutazzjoni tal-Kumitat ta’ Esperti, il-valerilfentanil (magħrufa wkoll bħala analoġija tal-fentanil pentanamid; isem kimiku: N-fenil-N-[1-(2-feniletil)-4-piperidil]pentanamid) hija oppjojde sintentika. Il-valerilfentanil ma għandha l-ebda użu terapewtiku u lanqas ma ġiet awtorizzata li titqiegħed fis-suq bħala prodott mediċinali. Hemm biżżejjed evidenza li l-valerilfentanil qed tiġi jew x’aktarx qed tiġi abbużata, u tista’ tikkostitwixxi problema soċjali u tas-saħħa pubblika li tiġġustifika t-tqegħid tas-sustanza taħt kontroll internazzjonali. Għaldaqstant, id-WHO tirrakkomanda li l-valerilfentanil titqiegħed fl-Iskeda I tal-Konvenzjoni dwar id-Drogi Narkotiċi.
(14)Il-valerilfentanil instabet f’ħames Stati Membri u hija kkontrollata f’mill-anqas erba’ Stati Membri. Għadhom ma ġew assoċjati l-ebda mewta jew intossikazzjoni akuta ma’ din is-sustanza.
(15)Għaldaqstant, l-Istati Membri għandhom jieħdu l-pożizzjoni li jżidu l-valerilfentanil fl-Iskeda I tal-Konvenzjoni dwar id-Drogi Narkotiċi.
(16)Skont il-valutazzjoni tal-Kumitat ta’ Esperti, id-DOC (magħrufa wkoll bħala 2,5-Dimetossi-4-kloroamfetamina; isem kimiku: 1-(4-kloro-2,5-dimetossifenil)propan-2-ammina) hija fenetilamina. Id-DOC ma għandha l-ebda użu terapewtiku u lanqas ma rċeviet awtorizzazzjoni biex titqiegħed fis-suq bħala prodott mediċinali. Hemm biżżejjed evidenza li d-DOC qed tiġi jew x’aktarx qed tiġi abbużata, u tista’ tikkostitwixxi problema soċjali u tas-saħħa pubblika li tiġġustifika t-tqegħid tas-sustanza taħt kontroll internazzjonali. Għaldaqstant, id-WHO tirrakkomanda li d-DOC titqiegħed fl-Iskeda I tal-Konvenzjoni dwar is-Sustanzi Psikotropiċi.
(17)Id-DOC instabet f’27 Stat Membru u hija kkontrollata f’mill-anqas tnax-il Stat Membru. Ġiet assoċjata ma’ tal-anqas mewta waħda u erba’ intossikazzjonijiet akuti.
(18)Għaldaqstant, l-Istati Membri jenħtieġ li jieħdu l-pożizzjoni li jżidu d-DOC fl-Iskeda I tal-Konvenzjoni dwar is-Sustanzi Psikotropiċi.
(19)Skont il-valutazzjoni tal-Kumitat Espert, l-AB-FUBINACA (magħrufa wkoll bħala FUB-AMB; isem kimiku: N-(1-ammino-3-metil-1-ossobutan-2-yl)-1-(4-fluworobenżil)-1H-indażolu-3-karbossammid) hija kannabinojdi sintetika. AB-FUBINACA ma għandha l-ebda użu terapewtiku u lanqas ma rċeviet awtorizzazzjoni biex titqiegħed fis-suq bħala prodott mediċinali. Hemm biżżejjed evidenza li AB-FUBINACA qed tiġi jew x’aktarx qed tiġi abbużata, u tista’ tikkostitwixxi problema soċjali u tas-saħħa pubblika li tiġġustifika t-tqegħid tas-sustanza taħt kontroll internazzjonali. Għaldaqstant, id-WHO tirrakkomanda li AB-FUBINACA titqiegħed fl-Iskeda II tal-Konvenzjoni dwar is-Sustanzi Psikotropiċi.
(20)AB-FUBINACA nstabet f’24 Stat Membru u hija kkontrollata f’mill-anqas 13-il Stat Membru. Ġiet assoċjata ma’ tal-anqas 20 mewt u 19-il intossikazzjoni akuta.
(21)Għaldaqstant, l-Istati Membri jeħtieġ li jieħdu l-pożizzjoni li jżidu AB-FUBINACA fl-Iskeda II tal-Konvenzjoni dwar is-Sustanzi Psikotropiċi.
(22)Skont il-valutazzjoni tal-Kumitat ta’ Esperti, il-5F-AMB-PINACA (magħrufa ukoll bħala 5F-AMB, 5F-MMB-PINACA, 5-fluworo AMB, 5-fluworo AMP jew 5F-AMP; isem kimiku: Il-Metil 2-({[1-(5-fluworopentil)-1H-indażol-3-yl]karbonil}ammino)-3-metilbutanoat) hija kannabinojdi sintetika. 5F-AMB-PINACA ma għandha l-ebda użu terapewtiku u lanqas ma ġiet awtorizzata li titqiegħed fis-suq bħala prodott mediċinali. Hemm biżżejjed evidenza li 5F-AMB-PINACA qed tiġi jew x’aktarx qed tiġi abbużata, u tista’ tikkostitwixxi problema soċjali u tas-saħħa pubblika li tiġġustifika t-tqegħid tas-sustanza taħt kontroll internazzjonali. Għaldaqstant, id-WHO tirrakkomanda li l-5F-AMB-PINACA titqiegħed fl-Iskeda II tal-Konvenzjoni dwar is-Sustanzi Psikotropiċi.
(23)Il-5F-AMB-PINACA instabet fi 17-il Stat Membru u hija kkontrollata f’mill-anqas tmien Stati Membri. Ġiet assoċjata ma’ tal-anqas żewġ imwiet u tliet intossikazzjonijiet akuti.
(24)Għaldaqstant, l-Istati Membri għandhom jieħdu l-pożizzjoni li jżidu l-5F-AMB-PINACA fl-Iskeda II tal-Konvenzjoni dwar is-Sustanzi Psikotropiċi.
(25)Skont il-valutazzjoni tal-Kumitat ta’ Esperti, il-5F-MDMB-PICA (magħrufa wkoll bħala 5F-MDMB-2201 jew MDMB-2201; isem kimiku: metil 2-[[1-(5-fluworopentil)indol-3-karbonil]ammino]-3,3-dimetil-butanoat) hija kannabinojdi sintetika. 5F-MDMB-PICA ma għandha l-ebda użu terapewtiku u lanqas ma rċeviet awtorizzazzjoni biex titqiegħed fis-suq bħala prodott mediċinali. Hemm biżżejjed evidenza li 5F-MDMB-PICA qed tiġi jew x’aktarx qed tiġi abbużata, u tista’ tikkostitwixxi problema soċjali u tas-saħħa pubblika li tiġġustifika t-tqegħid tas-sustanza taħt kontroll internazzjonali. Għaldaqstant, id-WHO tirrakkomanda li l-5F-MDMB-PICA titqiegħed fl-Iskeda II tal-Konvenzjoni dwar is-Sustanzi Psikotropiċi.
(26)Il-5F-MDMB-PICA instabet fi 22-il Stat Membru u hija kkontrollata f’mill-anqas tliet Stati Membri. Ġiet assoċjata ma’ tal-anqas tmien imwiet u intossikazzjoni akuta waħda.
(27)Għaldaqstant, l-Istati Membri għandhom jieħdu l-pożizzjoni li jżidu l-5F-MDMB-PICA fl-Iskeda II tal-Konvenzjoni dwar is-Sustanzi Psikotropiċi.
(28)Skont il-valutazzjoni tal-Kumitat ta’ Esperti, il-4-F-MDMB-BINACA (magħrufa wkoll bħala 4F-ADB, 4F-MDMB-BINACA jew 4F-MDMB-BUTINACA; isem kimiku: metil 2-(1-(4-fluworobutil)-1H-indazol-3-karbosammid)-3,3-dimetilbutanoat) hija kannabinojdi sintetika. 4-F-MDMB-BINACA ma għandha l-ebda użu terapewtiku u lanqas ma ġiet awtorizzata li titqiegħed fis-suq bħala prodott mediċinali. Hemm biżżejjed evidenza li 4-F-MDMB-BINACA qed tiġi jew x’aktarx qed tiġi abbużata, u tista’ tikkostitwixxi problema soċjali u tas-saħħa pubblika li tiġġustifika t-tqegħid tas-sustanza taħt kontroll internazzjonali. Għaldaqstant, id-WHO tirrakkomanda li l-4-F-MDMB-BINACA titqiegħed fl-Iskeda II tal-Konvenzjoni dwar is-Sustanzi Psikotropiċi.
(29)Il-4-F-MDMB-BINACA instabet fi 14-il Stat Membru u hija kkontrollata f’mill-anqas Stat Membru wieħed. Ġiet assoċjata ma’ tal-anqas intossikazzjoni akuta waħda. L-4-F-MDMB-BINACA kienet is-suġġett ta’ briefing Sistema ta’ Twissija Bikrija tal-UE f’April 2019.
(30)Għaldaqstant, l-Istati Membri għandhom jieħdu l-pożizzjoni li jżidu l-4-F-MDMB-BINACA fl-Iskeda II tal-Konvenzjoni dwar is-Sustanzi Psikotropiċi.
(31)Skont il-valutazzjoni tal-Kumitat ta’ Esperti, il-4-CMC (magħrufa wkoll bħala 4-klorometkatinon jew klefedron; isem kimiku: 1-(4-klorofenil)-2-(metilammin)propan-1-one) hija katinon sentetika, li strutturalment hija relatata mal-mefedron, li hija skedata fil-Konvenzjoni dwar is-Sustanzi Psikotropiċi. 4-CMC ma għandha l-ebda użu terapewtiku u lanqas ġiet awtorizzata li titqiegħed fis-suq bħala prodott mediċinali. Hemm biżżejjed evidenza li 4-CMC qed tiġi jew x’aktarx qed tiġi abbużata, u tista’ tikkostitwixxi problema soċjali u tas-saħħa pubblika li tiġġustifika t-tqegħid tas-sustanza taħt kontroll internazzjonali. Għaldaqstant, id-WHO tirrakkomanda li l-4-CMC titqiegħed fl-Iskeda II tal-Konvenzjoni dwar is-Sustanzi Psikotropiċi.
(32)Il-4-CMC instabet fi 24-il Stat Membru u hija kkontrollata f’mill-anqas tmien Stati Membri. Ġiet assoċjata ma’ tal-anqas erbat imwiet u tliet intossikazzjonijiet akuti.
(33)Għaldaqstant, l-Istati Membri għandhom jieħdu l-pożizzjoni li jżidu l-4-CMC fl-Iskeda II tal-Konvenzjoni dwar is-Sustanzi Psikotropiċi.
(34)Skont il-valutazzjoni tal-Kumitat ta’ Esperti, N-etilessedron (magħrufa wkoll bħala NEH, Essen, Etil-Ess, Etil-essedron jew HEX-EN; isem kimiku: 2-(etilamin)-1-fenilessan-1-one) hija katinon sintetika. L-N-etilessedron ma għandha l-ebda użu terapewtiku u lanqas ma ġiet awtorizzata li titqiegħed fis-suq bħala prodott mediċinali. Hemm biżżejjed evidenza li l-N-etilessedron qed tiġi jew x’aktarx qed tiġi abbużata, u tista’ tikkostitwixxi problema soċjali u tas-saħħa pubblika li tiġġustifika t-tqegħid tas-sustanza taħt kontroll internazzjonali. Għaldaqstant, id-WHO tirrakkomanda li l-N-etilessedron titqiegħed fl-Iskeda II tal-Konvenzjoni dwar is-Sustanzi Psikotropiċi.
(35)L-N-etilessedron instabet f’23 Stat Membru u hija kkontrollata f’mill-anqas sitt Stati Membri. Ġiet assoċjata ma’ tal-anqas 31 mewt u disa’ intossikazzjonijiet akuti.
(36)Għaldaqstant, l-Istati Membri għandhom jieħdu l-pożizzjoni li jżidu N-etilessedron fl-Iskeda II tal-Konvenzjoni dwar is-Sustanzi Psikotropiċi.
(37)Skont il-valutazzjoni tal-Kumitat ta’ Esperti, l-alfa-PHP (magħrufa wkoll bħala PV-7, α-PHP, α-pirrolidinoessanofenon; isem kimiku: il-1-Fenil-2-(pirrolidin-1-yl)essan-1-one) hija katinon sintetiku. Hija omologu ogħla tal-alfa-PVP, li hija skedata taħt il-Konvenzjoni dwar is-Sustanzi Psikotropiċi. L-alfa-PHP ma għandha l-ebda użu terapewtiku u lanqas ma rċeviet awtorizzazzjoni biex titqiegħed fis-suq bħala prodott mediċinali. Hemm biżżejjed evidenza li l-alfa-PHP qed tiġi jew x’aktarx qed tiġi abbużata, u tista’ tikkostitwixxi problema soċjali u tas-saħħa pubblika li tiġġustifika t-tqegħid tas-sustanza taħt kontroll internazzjonali. Għaldaqstant, id-WHO tirrakkomanda li l-alfa-PHP titqiegħed fl-Iskeda II tal-Konvenzjoni dwar is-Sustanzi Psikotropiċi.
(38)L-alfa-PHP instabet f’21 Stat Membru u hija kkontrollata f’mill-anqas seba’ Stati Membri. Ġiet assoċjata ma’ tal-anqas 27 mewt u żewġ intossikazzjonijiet akuti.
(39)Għaldaqstant, l-Istati Membri jeħtieġ li jieħdu l-pożizzjoni li jżidu l-alfa-PHP fl-Iskeda II tal-Konvenzjoni dwar is-Sustanzi Psikotropiċi.
(40)Skont il-valutazzjoni tal-Kumitat ta’ Esperti, il-fluwalprazolam (magħrufa wkoll bħala Ro 11-5073/000; isem kimiku: 8-kloro-6-(2-fluworofenil)-1-metil-4H-[1,2,4]triażol[4,3-a][1,4]benżodiażepina) hija benżodiażepina. Il-fluwalprażolam ma għandha l-ebda użu terapewtiku u lanqas ma ġiet awtorizzata li titqiegħed fis-suq bħala prodott mediċinali. Hemm biżżejjed evidenza li l-fluwalprażolam qed tiġi, jew x’aktarx qed tiġi, abbużata, u tista’ tikkostitwixxi problema soċjali u tas-saħħa pubblika li tiġġustifika t-tqegħid tas-sustanza taħt kontroll internazzjonali. Għaldaqstant, id-WHO tirrakkomanda li l-fluwalprażolam titqiegħed fl-Iskeda IV tal-Konvenzjoni dwar is-Sustanzi Psikotropiċi.
(41)Il-fluwalprażolam instabet fi tmien Stati Membri u hija kkontrollata f’mill-anqas żewġ Stati Membri. Ġiet assoċjata ma’ tal-anqas 26 mewt. Il-fluwalprażolam kienet is-suġġett ta’ briefing tas-Sistema ta’ Twissija Bikrija tal-UE f’Marzu 2019.
(42)Għaldaqstant, l-Istati Membri għandhom jieħdu l-pożizzjoni li jżidu l-fluwalprażolam fl-Iskeda IV tal-Konvenzjoni dwar is-Sustanzi Psikotropiċi.
(43)Skont il-valutazzjoni tal-Kumitat ta’ Esperti, l-etiżolam (magħrufa wkoll bħala Y-7131 jew Depas; isem kimiku: 4-(2-klorofenil)-2-etil-9-metil-6H-tjeno[3,2-f][1,2,4]triażol[4,3-a][1,4]diażepina) hija sustanza tat-tip benżodiażepina. L-etiżolam ġiet rieżaminata minn Kumitat ta’ Esperti fi tliet okkażjonijiet, l-aħħar darba fl-2017. Hemm biżżejjed evidenza li l-etiżolam qed tiġi, jew x’aktarx qed tiġi, abbużata, u tista’ tikkostitwixxi problema soċjali u tas-saħħa pubblika li tiġġustifika t-tqegħid tas-sustanza taħt kontroll internazzjonali. Għaldaqstant, id-WHO tirrakkomanda li l-etiżolam titqiegħed fl-Iskeda IV tal-Konvenzjoni dwar is-Sustanzi Psikotropiċi.
(44)L-etizolam instabet f’21 Stat Membru u hija kkontrollata f’mill-anqas seba’ Stati Membri. Ġiet assoċjata ma’ 43 mewt. Filwaqt li l-etizolam hija mediċina awtorizzata f’diversi pajjiżi (fil-Ġappun, fl-Italja, fl-Indja), huwa maħsub li l-parti l-kbira tas-sustanza li tinbiegħ fis-suq tad-drogi fl-Ewropa ma tiġix minn mediċini li jiġu ddevjati iżda tinxtara f’forma ta’ trab fi kwantitajiet bl-ingrossa mingħand kumpaniji tal-kimiki li huma bbażati barra mill-Ewropa. Imbagħad tiġi importata fl-Unjoni permezz tal-posta rapida jew tas-servizzi tal-merkanzija u tipikament wara tiġi ppressati f’pilloli li jew jinbiegħu bħala etiżolam jew inkella bħala diażepam u alprażolam foloz. Ta’ sikwit l-etiżolam tinbiegħ bħala l-”valium tat-triq”. L-għadd ta’ każi spontanji fl-Ewropa li ġew irrapportati lil EudraVigilance (EV) fir-rigward tal-etiżolam li jistgħu jiġu identifikati permezz tal-Mistoqsija Standardizzata tal-MedDRA “Abbuż mid-droga, id-dipendenza u l-astinenza” huwa żgħir. Fl-2017, l-etiżolam kienet l-aktar benzodiazepina li nqabdet u li ġiet irrappurtata lis-Sistema ta’ Twissija Bikrija ta’ sikwit, kemm f’dak li huwa għadd ta’ każi kif ukoll b’rabta mal-ammont. L-etiżolam kienet is-suġġett ta’ Briefing tas-Sistema ta’ Twissija Bikrija tal-Unjoni f’Marzu 2019.
(45)Għaldaqstant, l-Istati Membri għandhom jieħdu l-pożizzjoni li jżidu l-etiżolam fl-Iskeda IV tal-Konvenzjoni dwar is-Sustanzi Psikotropiċi.
(46)Huwa xieraq li tiġi stabbilita l-pożizzjoni li għandha tittieħed f’isem l-Unjoni fil-Kummissjoni dwar id-Drogi Narkotiċi, peress li d-deċiżjonijiet dwar id-deċiżjonijiet differenti dwar l-iskedar fir-rigward tat-12-il sustanza se jkunu jistgħu jinfluwenzaw b’mod deċiżiv il-kontenut tad-dritt tal-Unjoni, jiġifieri d-Deċiżjoni Kwadru 2004/757/ĠAI.
(47)Il-pożizzjoni tal-Unjoni għandha tiġi espressa mill-Istati Membri li huma membri tal-Kummissjoni dwar id-Drogi Narkotiċi f’azzjoni konġunta.
(48)Id-Danimarka hija marbuta bid-Deċiżjoni Kwadru 2004/757/ĠAI kif applikabbli sal-21 ta’ Novembru 2018 u għalhekk qed tieħu sehem fl-adozzjoni u l-applikazzjoni ta’ din id-Deċiżjoni.
(49)L-Irlanda hija marbuta bid-Deċiżjoni Kwadru 2004/757/ĠAI u għalhekk qed tieħu sehem fl-adozzjoni u l-applikazzjoni ta’ din id-Deċiżjoni.
(50)Ir-Renju Unit mhuwiex marbut bid-Deċiżjoni Kwadru 2004/757/ĠAI u għalhekk mhuwiex qed jieħu sehem fl-adozzjoni ta’ din id-Deċiżjoni, u mhuwiex marbut biha jew suġġett għall-applikazzjoni tagħha,
ADOTTA DIN ID-DEĊIŻJONI:
Artikolu 1
Il-pożizzjoni li għandha tiġi adottata f’isem l-Unjoni fit-tlieta u sittin sessjoni tal-Kummissjoni dwar id-Drogi Narkotiċi mit-2 sas-6 ta’ Marzu 2020, meta dak il-korp jintalab jadotta deċiżjonijiet dwar iż-żieda ta’ sustanzi fl-Iskedi tal-Konvenzjoni Unika tan-Nazzjonijiet Uniti dwar id-Drogi Narkotiċi tal-1961 kif emendata bil-Protokoll tal-1972 u l-Konvenzjoni tan-Nazzjonijiet Uniti dwar is-Sustanzi Psikotropiċi tal-1971, hija stabbilita fl-Anness ta’ din id-Deċiżjoni.
Artikolu 2
Il-pożizzjoni msemmija fl-Artikolu 1 għandha tiġi espressa mill-Istati Membri li huma membri tal-Kummissjoni dwar id-Drogi Narkotiċi, filwaqt li dawn jaġixxu b’mod konġunt.
Artikolu 3
Din id-Deċiżjoni hija indirizzata lill-Istati Membri b’konformità mat-Trattati.
Magħmul fi Brussell,
Għall-Kunsill
Il-President