Il-proposta preżenti tikkonċerna emenda tar-Regolament (UE) Nru 654/2014 tal-Parlament Ewropew u tal-Kunsill tal-15 ta' Mejju 2014 dwar l-eżerċizzju tad-drittijiet tal-Unjoni għall-applikazzjoni u l-infurzar ta’ regoli kummerċjali internazzjonali u li jemenda r-Regolament tal-Kunsill (KE) Nru 3286/94 li jistabbilixxi l-proċeduri tal-Komunità fil-qasam ta' politika kummerċjali komuni sabiex jiżgura l-eżerċizzju tad-drittijiet tal-Komunità skont ir-regoli internazzjonali tal-kummerċ, b'mod partikolari dawk stabbiliti taħt l-awspiċji tal-Organizzazzjoni Dinjija tal-Kummerċ (“ir-Regolament ta’ Infurzar” jew “ir-Regolament”) 1 . L-għan tal-emenda huwa l-protezzjoni tal-interessi tal-Unjoni taħt ftehimiet kummerċjali internazzjonali f’sitwazzjonijiet fejn pajjiżi terzi jadottaw miżuri illegali u fl-istess ħin jimblukkaw proċess ta’ soluzzjoni tat-tilwim. Ir-Regolament ma ġiex oriġinarjament imfassal biex jindirizza sitwazzjonijiet bħal dawn iżda l-iżviluppi attwali, jiġifieri l-imblukkar tas-soluzzjonijiet ta’ tilwim skont il-Ftehim tal-Organizzazzjoni Dinjija tal-Kummerċ (id-WTO), jeħtieġu li l-Unjoni taġixxi malajr kemm jista’ jkun biex tipproteġi l-interessi tagħha.

Il-proposta hija konformi mal-prijorità tal-Unjoni li tinforza b’mod effettiv id-drittijiet tal-Unjoni skont il-ftehimiet kummerċjali internazzjonali. Il-Linji Gwida Politiċi għall-Kummissjoni jistipulaw li: “jeħtieġ li niżguraw li ninfurzaw id-drittijiet tagħna, inkluż permezz tal-użu ta’ sanzjonijiet, jekk oħrajn jimblokkaw ir-riżoluzzjoni ta’ kunflitt kummerċjali” 2 u din il-lingwa hija riflessa fl-Ittra ta’ Missjoni lill-Kummissarju għall-Kummerċ 3 .

L-emenda proposta testendi l-ambitu tar-Regolament ta’ Infurzar biex tippermetti azzjoni f’sitwazzjoni fejn il-proċeduri ta’ soluzzjoni ta’ tilwim huma bblukkati. Jeħtieġ li din l-emenda tiġi adottata malajr kemm jista’ jkun biex jiġi żgurat li d-drittijiet tal-Unjoni jkunu protetti. Biex tiġi faċilitata adozzjoni rapida mill-koleġiżlaturi, ma ġiet proposta l-ebda bidla oħra.

Għal aktar minn sentejn, il-Korp għas-Soluzzjoni tat-Tilwim tad-WTO (DSB — Dispute Settlement Body) ma setax jimla postijiet battala fil-Korp tal-Appell tad-WTO. Minħabba l-imblokk tal-ħatriet se jkun hemm Membru wieħed biss fil-Korp tal-Appell mill-11 ta’ Diċembru 2019. Konsegwentement, il-Korp tal-Appell ma jkunx jista’ jisma’ appelli ġodda minn dik id-data ‘il quddiem. Il-membri tad-WTO se jkunu jistgħu jevitaw deċiżjonijiet vinkolanti u għalhekk jaħarbu l-obbligi internazzjonali tagħhom billi jappellaw rapporti tal-panel. Meta rapport tal-panel jiġi appellat iżda l-Korp tal-Appell ma jkunx jista’ jiffunzjona, it-tilwima titpoġġa f’vojt ġuridiku u tibqa’ mhux solvuta (din ġiet imsejħa “fil-baħħ”). Dan ifisser li f’dawk is-sitwazzjonijiet is-sistema tar-riżoluzzjoni tat-tilwim tad-WTO mhux se tkun vinkolanti. Fl-aħħar mill-aħħar, l-interessi ekonomiċi tal-Unjoni jiġu kompromessi jekk ir-regoli tal-kummerċ internazzjonali ma jkunux jistgħu jiġu infurzati b’mod effettiv.

Fid-dawl ta’ din is-sitwazzjoni emerġenti, l-Unjoni qed taħdem b’mod intensiv fuq żewġ linji: i) tagħmel proposti biex jiġi indirizzat it-tħassib imqajjem mill-Membru tad-WTO li qed jibblokka l-ħatriet u l-involviment sussegwenti mas-Sħubija fid-WTO 4 , u ii) tiżviluppa miżuri ta’ kontinġenza fil-forma ta’ arranġament interim, li għandu l-għan li jirreplika l-mekkaniżmu tal-appell tad-WTO sakemm jerġa’ jiġi restawrat, permezz ta’ arbitraġġ skont l-Artikolu 25 tal-Ftehim dwar is-Soluzzjoni tat-Tilwim tad-WTO (DSU - Dispute Settlement Understanding) 5 . Tali arranġament ta’ appell interim iżomm rieżami ta’ appell u għalhekk jipproduċi mhux biss deċiżjoni finali wara t-tlestija sħiħa tal-proċess ta’ aġġudikazzjoni tad-WTO li jkun magħmul f’żewġ stadji, iżda wkoll deċiżjoni li tista’ tiġi infurzata skont ir-regoli tad-WTO. Din hija soluzzjoni temporanja maħsuba biex tiffunzjona fil-perjodu qabel it-tkomplija tal-operat tal-Korp tal-Appell. L-arranġament interim, madankollu, mhuwiex mekkaniżmu awtomatiku u se jeħtieġ il-qbil individwali ta’ Membri oħra tad-WTO.

Hemm ukoll ir-riskju li s-soluzzjoni tat-tilwim li tikkonċerna ftehimiet kummerċjali internazzjonali oħra tal-Unjoni, inklużi l-ftehimiet bilaterali u reġjonali, b’mod partikolari dawk antiki, tista’ tiġi mminata meta pajjiż terz ma jikkooperax, kif meħtieġ, biex jiffunzjona s-soluzzjoni tat-tilwim. Pereżempju, il-pajjiż terz jista’ ma jaħtarx arbitru u ma hemm previst l-ebda mekkaniżmu ta’ riżerva biex il-proċess tas-soluzzjoni tat-tilwim madankollu jkun jista’ jipproċedi. F’din is-sitwazzjoni, l-interessi ekonomiċi tal-Unjoni se jiġu kompromessi u se jkunu jeħtieġu protezzjoni bl-istess mod kif spjegat hawn fuq. Din is-sitwazzjoni tikseb rilevanza addizzjonali fid-dawl tal-enfasi dejjem akbar tal-Unjoni fuq l-infurzar. Użu akbar ta’ soluzzjoni ta’ tilwim skont il-ftehimiet ta’ kummerċ ħieles bilaterali u reġjonali tal-Unjoni huwa mistenni wkoll hekk kif aktar minn dawn il-ftehimiet isiru applikabbli u jipprevedu obbligi tad-WTO plus. Fil-fatt l-Unjoni dan l-aħħar bdiet l-ewwel tliet każijiet bħal dawn.

Wara t-Trattat ta’ Liżbona, il-Parlament Ewropew u l-Kunsill adottaw ir-Regolament ta’ Infurzar bħala qafas leġiżlattiv komuni għall-infurzar tad-drittijiet tal-Unjoni skont ftehimiet kummerċjali internazzjonali, abbażi ta’ regoli ċari u prevedibbli għal azzjoni mill-Kummissjoni. Il-koleġiżlaturi taw lill-Kummissjoni s-setgħa li tadotta atti ta’ implimentazzjoni skont l-Artikolu 291 tat-Trattat dwar il-Funzjonament tal-Unjoni Ewropea (TFUE), b’mod immedjat, fi ħdan l-ambitu stabbilit mir-Regolament u fil-limiti u skont il-kriterji espressament stabbiliti.

Skont ir-Regolament, il-Kummissjoni tista' tadotta dawn it-tipi ta' miżuri ta' politika kummerċjali: dazji tad-dwana, ir-restrizzjonijiet kwantitattivi fuq importazzjonijiet jew esportazzjonijiet ta' oġġetti, u miżuri fil-qasam tal-akkwist pubbliku. Tali miżuri għandhom jintgħażlu u jiġu mfassla abbażi ta' kriterji oġġettivi inkluż l-effettività tal-miżuri li jwasslu għall-konformità ta' pajjiżi terzi ma' regoli kummerċjali internazzjonali, il-potenzjal tagħhom li jipprovdu għajnuna lil operaturi ekonomiċi fl-Unjoni affettwati mill-miżuri tal-pajjiż terz, u l-objettiv li jiġu minimizzati l-impatti ekonomiċi negattivi fuq l-Unjoni, inkluż fir-rigward ta' materja prima essenzjali.

L-ambitu tar-Regolament jestendi għall-adozzjoni, is-sospensjoni, il-modifika u t-terminazzjoni ta’ atti ta’ implimentazzjoni fir-rigward ta’:

B’mod partikolari fir-rigward tal-infurzar tad-drittijiet tal-Unjoni taħt soluzzjoni tat-tilwim multilaterali u bilaterali vinkolanti, il-Kummissjoni għandha s-setgħa li tintroduċi miżuri ta’ politika kummerċjali fil-każ ta’ miżura illegali miżmuma minn pajjiż terz, b’mod partikolari biex twassal għall-konformità mill-pajjiż terz fil-protezzjoni tal-interessi tal-Unjoni. Tali miżuri huma madankollu possibbli biss abbażi tat-tlestija b’suċċess ta’ proċeduri ta’ soluzzjoni ta’ tilwim fir-rigward tal-miżura tal-pajjiż terz.

Għalhekk ir-Regolament ma jipprovdix setgħat għas-sitwazzjonijiet li fihom il-proċeduri għas-soluzzjoni tat-tilwim ma jaħdmux u għalhekk ma jistgħux jiġu kkompletati, bħal sitwazzjonijiet ta’ imblokk ta’ mekkaniżmi għas-soluzzjoni tat-tilwim. Din il-proposta għal emenda tar-Regolament ta’ Infurzar tirrimedja din il-lakuna permezz ta’ estensjoni tal-iskattaturi għal azzjoni skont ir-Regolament ta’ Infurzar għal sitwazzjonijiet bħal dawn.

Il-fokus prinċipali tal-emenda proposta huwa li jiġu indirizzati sitwazzjonijiet fejn, wara li l-Unjoni tkun irnexxielha tikseb deċiżjoni favorevoli minn bord ta’ soluzzjoni tat-tilwim tad-WTO, il-proċess jiġi mblukkat minħabba li l-parti l-oħra tappella rapport tal-bord tad-WTO “fil-baħħ” u ma tkunx qablet ma’ arbitraġġ ta’ appell interim skont l-Artikolu 25 tad-WTO DSU. F’sitwazzjoni bħal din, mhux se jkun hemm eżitu vinkolanti għall-proċess ta’ soluzzjoni tat-tilwim.

Barra minn hekk, l-emenda proposta taħseb għal sitwazzjonijiet simili li jistgħu jirriżultaw minn ftehimiet kummerċjali internazzjonali oħra, b’mod partikolari ftehimiet reġjonali jew bilaterali, meta pajjiż terz ma jikkooperax, kif meħtieġ, biex tiffunzjona s-soluzzjoni tat-tilwim. Pereżempju, il-pajjiż terz jista’ ma jaħtarx arbitru u ma hemm previst l-ebda mekkaniżmu ta’ riżerva biex madankollu jkun jista’ jipproċedi l-arbitraġġ.

Il-proposta tkopri ż-żewġ sitwazzjonijiet flimkien għal raġunijiet ta’ koerenza u effiċjenza. Iż-żewġ sitwazzjonijiet jikkondividu l-istess kawżi fundamentali u jġibu l-istess konsegwenzi negattivi għall-interessi ekonomiċi tal-Unjoni. Il-karatteristika komuni hija li l-Unjoni għandha tkun tista’ tinforza d-drittijiet tagħha, u dan għandu jsir kemm jista’ jkun possibbli permezz ta’ aġġudikazzjoni indipendenti. Fejn dan ma jkunx possibbli u l-parti l-oħra tkun responsabbli biex timblokka l-operazzjoni ta’ aġġudikazzjoni indipendenti vinkolanti, l-Unjoni għandha madankollu tkun tista’ tinforza d-drittijiet tagħha.

Il-proposta preżenti tiżgura li l-Unjoni tkun mgħammra bl-għodod meħtieġa biex tipproteġi l-interessi ekonomiċi tagħha, jekk dan ikun meħtieġ. L-azzjoni hija riflessjoni tal-impenn tal-Unjoni favur il-multilateraliżmu u l-aġġudikazzjoni indipendenti vinkolanti.

Kieku l-Unjoni għażlet li ma tiħux din l-azzjoni, il-konsegwenza fis-sitwazzjonijiet ta’ soluzzjoni ta’ tilwim imblukkati deskritta hawn fuq tkun li l-Unjoni ma tkunx tista’ tipproteġi d-drittijiet tagħha fil-ħin. Dan jista’ joħloq ukoll inċentiv għal pajjiżi terzi li jfixklu l-aġġudikazzjoni meta l-Unjoni jkollha drittijiet skont ftehim internazzjonali, li l-pajjiż terz ikun kiser.

Il-ħidma fuq il-qafas li diġà jeżisti fil-forma tar-Regolament tista’ tiżgura l-kapaċità tal-Unjoni li taġixxi malajr. Il-ħeffa tal-azzjoni hija vitali. Din l-azzjoni, skont il-loġika tar-Regolament stess, hija għalhekk preferibbli milli tiġi prevsita proċedura leġiżlattiva ordinarja għall-adozzjoni ta’ miżuri ta’ politika kummerċjali f’kull każ individwali li fih pajjiż terz iżomm miżura tat-tip li regolarment tmur għal soluzzjoni ta’ tilwim iżda jimblokka l-proċedura ta’ aġġudikazzjoni.

Il-miżuri ta’ politika kummerċjali meħuda skont ir-Regolament iservu b’mod partikolari biex iġiegħlu lil pajjiż terz itemm ksur ta’ ftehim kummerċjali tal-Unjoni wara r-rikors li l-Unjoni għamlet b’suċċess għas-soluzzjoni ta’ tilwim. L-emenda proposta toħloq il-possibbiltà li l-Unjoni timponi miżuri skont ir-Regolament b’mod partikolari biex twassal għat-terminazzjoni ta’ ksur anke mingħajr rikors sħiħ għal proċedura ta’ soluzzjoni ta’ tilwim fejn il-pajjiż terz jipprevjeni dak ir-rikors.

Il-miżuri previsti jkunu kompatibbli mal-obbligi internazzjonali tal-Unjoni. Il-liġi pubblika internazzjonali ġenerali tippermetti, taħt ċerti kundizzjonijiet tali proporzjonalità u avviż minn qabel, l-impożizzjoni ta’ kontromiżuri, jiġifieri ta’ miżuri li inkella jkunu kontra l-obbligi internazzjonali ta’ parti inġurjata vis-à-vis il-pajjiż responsabbli għal ksur tad-dritt internazzjonali, u li huma mmirati li jiksbu l-waqfien tal-ksur jew il-kumpens għalih. Din il-liġi internazzjonali konswetudinarja ġiet ikkodifikata mill-Kummissjoni tad-Dritt Internazzjonali, korp tan-Nazzjonijiet Uniti, fl-Abbozz tagħha ta’ Artikoli dwar ir-Responsabbiltà tal-Istati għal Atti Internazzjonali Ħżiena 6 . Fil-prinċipju, parti li tieħu kontromiżuri mhix eżentata milli tissodisfa l-obbligi tagħha skont kwalunkwe proċedura ta’ soluzzjoni ta’ tilwim applikabbli 7 . Dawn id-dispożizzjonijiet jikkostitwixxu lex specialis fir-rigward tad-dispożizzjonijiet tad-dritt internazzjonali ġenerali dwar kontromiżuri 8 . Madankollu, fejn il-parti responsabbli tonqos milli tikkoopera in bona fede fil-proċeduri ta’ soluzzjoni ta’ tilwim, u b’hekk tipprevjeni lill-parti danneġġjata milli tlesti tali proċeduri, il-possibbiltà li tirrikorri għal kontromiżuri skont ir-rekwiżiti tal-liġi internazzjonali pubblika ġenerali trid tiddaħħal neċessarjament fis-seħħ mill-ġdid. Il-Kummissjoni tad-Dritt Internazzjonali tinnota li d-dħul mill-ġdid ta’ dik il-possibbiltà jfiġġ meta Parti waħda “tonqos milli timplimenta l-proċeduri għas-soluzzjoni ta’ tilwim in bona fide” jew “fejn Stat parti jonqos milli jikkoopera fl-istabbiliment tat-tribunal rilevanti” 9 . Dawn huma s-sitwazzjonijiet li fihom topera l-emenda attwali.

Il-proposta hija konformi mal-prijorità tal-Unjoni li tinforza b’mod effettiv id-drittijiet tal-Unjoni skont il-ftehimiet kummerċjali internazzjonali, fl-interess li jiġu salvagwardjati l-impjiegi u tal-promozzjoni tat-tkabbir fl-Unjoni. Hija tadatta l-qafas leġiżlattiv komuni eżistenti għal din is-sitwazzjoni l-ġdida.

Il-proposta hija konformi ma’ politiki oħra tal-Unjoni u tafferma mill-ġdid l-impenn tal-Unjoni favur il-multilateraliżmu u l-aġġudikazzjoni indipendenti. Il-proposta hija li jiġi emendat ir-Regolament eżistenti dwar l-Infurzar li diġà kien konsistenti ma’ politiki oħra tal-Unjoni.

L-objettiv ewlieni u l-kontenut tal-att previst jirrigwardaw il-politika kummerċjali komuni minħabba n-natura tal-miżuri adottati u minħabba li l-għan tagħhom li huwa l-infurzar tal-ftehimiet kummerċjali internazzjonali tal-Unjoni. Għalhekk, il-bażi ġuridika sostantiva tal-emenda proposta huwa l-Artikolu 207 tat-TFUE.

Mhux applikabbli. Il-politika kummerċjali komuni hija qasam ta’ kompetenza esklussiv tal-Unjoni. Il-prinċipju tas-sussidjarjetà ma japplikax f’oqsma ta’ kompetenza esklussiva.

L-objettiv tal-protezzjoni mgħaġġla tal-interessi tal-Unjoni taħt ftehimiet kummerċjali internazzjonali f’sitwazzjonijiet fejn pajjiżi terzi jadottaw miżuri illegali u fl-istess ħin jimblukkaw proċess ta’ soluzzjoni tat-tilwim jinkiseb l-aħjar permezz tal-emenda proposta tar-Regolament ta’ Infurzar. L-emenda hija limitata għall-introduzzjoni ta’ żewġ skattaturi ġodda għall-Unjoni biex taġixxi u ma tmurx lil hinn minn dak li hu meħtieġ biex jintlaħaq l-għan tagħha. Barra minn hekk, il-miżuri adottati skont ir-Regolament iridu huma stess ikunu proporzjonati. Għall-każijiet fejn dan ma jirriżultax mid-dispożizzjonijiet tal-ftehim internazzjonali inkwistjoni, l-emenda żżid dispożizzjoni espliċita f’dan is-sens. Dan huwa konformi mar-rekwiżit tal-liġi internazzjonali ġenerali li l-kontromiżuri jkunu proporzjonati.

Il-Kummissjoni tqis li din l-emenda leġiżlattiva hija xierqa minħabba li temenda Regolament eżistenti diġà adottat fuq il-bażi tal-Artikolu 207 tat-TFUE.

Mhux applikabbli.

Ma saret l-ebda konsultazzjoni pubblika għal din l-inizjattiva. L-emendi proposti għandhom idaħħlu biss skattaturi ġodda għall-użu tar-Regolament f’dak li għandu x’jaqsam mal-emerġenza li tinħoloq fid-WTO.

Għall-adozzjoni ta’ kwalunkwe miżura ta’ politika kummerċjali skont ir-Regolament, il-Kummissjoni diġà għandha l-obbligu li twettaq eżerċizzju ta’ ġbir ta’ informazzjoni u ssegwi proċedura ta’ att ta’ implimentazzjoni f’kull każ individwali ta’ applikazzjoni. Permezz tal-eżerċizzju ta’ ġbir ta’ informazzjoni l-Kummissjoni se tfittex u tikseb informazzjoni u fehmiet mill-partijiet interessati rigward l-interessi ekonomiċi tal-Unjoni f’setturi speċifiċi li fihom jistgħu jiġu kkontemplati kontromiżuri. Il-Kummissjoni għandha tieħu kont tal-kontribut riċevut. Il-Kumitat stabbilit bir-Regolament (UE) Nru 2015/1843 10 se jassisti lill-Kummissjoni fl-applikazzjoni tar-Regolament ta’ Infurzar. Il-Kumitat jikkonsisti minn rappreżentanti tal-Istati Membri tal-Unjoni.

Mhux applikabbli. Id-dettalji rilevanti huma pprovduti hawn taħt.

Ma saret l-ebda valutazzjoni tal-impatt għal din l-inizjattiva minħabba n-natura tas-suġġett li huwa l-infurzar u l-implimentazzjoni tad-drittijiet skont il-ftehimiet kummerċjali internazzjonali. Din l-inizjattiva ma għandhiex impatt ekonomiku, soċjali jew ambjentali dirett u n-natura tal-miżuri li jistgħu jiġu adottati (fuq każ b’każ) ma tippermetti fl-ebda każ valutazzjoni ex-ante.

Kif spjegat hawn fuq, għall-adozzjoni ta’ kwalunkwe miżura ta’ politika kummerċjali, il-Kummissjoni diġà għandha l-obbligu li twettaq eżerċizzju ta’ ġbir ta’ informazzjoni u ssegwi proċedura f’kull każ individwali ta’ applikazzjoni. Permezz tal-eżerċizzju ta’ ġbir ta’ informazzjoni l-Kummissjoni se tfittex u tikseb informazzjoni u fehmiet mill-partijiet interessati rigward l-interessi ekonomiċi tal-Unjoni f’setturi speċifiċi.

Il-proposta ġġedded l-obbligu tal-Kummissjoni li tirrevedi l-ambitu tar-Regolament wara ċertu perjodu ta’ żmien. Għalhekk, il-Kummissjoni se tkun tista’ teżamina l-impatt tal-emenda skont dan.

Barra minn hekk, il-proposta preżenti tindirizza sitwazzjoni urġenti u għalhekk teħtieġ azzjoni rapida.

Mhux applikabbli.

Mhux applikabbli.

Xejn.

L-emenda proposta tipprovdi mekkaniżmu biex jiġu infurzati d-drittijiet tal-Unjoni.

Mhux applikabbli.

Il-proposta hija limitata għall-introduzzjoni ta’ numru limitat ta’ emendi għar-Regolament eżistenti dwar l-Infurzar.

Id-dispożizzjonijiet il-ġodda huma kif ġej: