This document is an excerpt from the EUR-Lex website
Document 52017PC0628
Proposal for a COUNCIL DECISION on the position to be taken on behalf of the European Union in the thirty-seventh meeting of the Standing Committee of the Convention on the conservation of European wildlife and natural habitats with regard to an amendment to Appendix II thereto
Proposta għal DEĊIŻJONI TAL-KUNSILL dwar il-pożizzjoni li għandha tiġi adottata f’isem l-Unjoni Ewropea fis-sebgħa u tletin laqgħa tal-Kumitat Permanenti tal-Konvenzjoni dwar il-konservazzjoni tal-ħajja ferjali Ewropea u tal-abitati naturali fir-rigward ta’ emenda għall-Appendiċi II tagħha
Proposta għal DEĊIŻJONI TAL-KUNSILL dwar il-pożizzjoni li għandha tiġi adottata f’isem l-Unjoni Ewropea fis-sebgħa u tletin laqgħa tal-Kumitat Permanenti tal-Konvenzjoni dwar il-konservazzjoni tal-ħajja ferjali Ewropea u tal-abitati naturali fir-rigward ta’ emenda għall-Appendiċi II tagħha
COM/2017/0628 final - 2017/0277 (NLE)
IL-KUMMISSJONI EWROPEA
Brussell, 30.10.2017
COM(2017) 628 final
2017/0277(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tiġi adottata f’isem l-Unjoni Ewropea fis-sebgħa u tletin laqgħa tal-Kumitat Permanenti tal-Konvenzjoni dwar il-konservazzjoni tal-ħajja ferjali Ewropea u tal-abitati naturali fir-rigward ta’ emenda għall-Appendiċi II tagħha
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna d-deċiżjoni li tistabbilixxi l-pożizzjoni li għandha tiġi adottata f’isem l-Unjoni, waqt is-sebgħa u tletin laqgħa annwali tal-Kumitat Permanenti għall-Konvenzjoni dwar il-konservazzjoni tal-ħajja ferjali Ewropea u tal-abitati naturali, fi Strasburgu, Franza, bejn il-5 u t-8 ta’ Diċembru 2017, b’rabta mal-adozzjoni prevista ta’ deċiżjoni li tikkonċerna emenda tal-Appendiċi II tal-Konvenzjoni.
2.Kuntest tal-proposta
2.1.Il-Konvenzjoni dwar il-konservazzjoni tal-ħajja ferjali Ewropea u tal-abitati naturali
Il-Konvenzjoni tal-1979 dwar il-konservazzjoni tal-ħajja ferjali Ewropea u tal-abitati naturali (il-Konvenzjoni ta’ Berna) (“il-Ftehim”) għandha bħala għan il-konservazzjoni tal-fawna u l-flora selvaġġa Ewropej u tal-ħabitats naturali tagħhom, speċjalment dawk li l-konservazzjoni tagħhom teħtieġ il-kooperazzjoni ta’ diversi Stati Membri. Hija trattat intergovernattiv, konkluż taħt l-awspiċi tal-Kunsill tal-Ewropa. Il-Ftehim daħal fis-seħħ fl-1 ta’ Ġunju 1982. Il-Komunità Ewropea ilha Parti Kontraenti għall-Ftehim mill-1 ta’ Settembru 1982 1 . Bħalissa hemm 51 Parti Kontraenti għall-Ftehim, inklużi l-Istati Membri kollha tal-UE.
2.2.Il-Kumitat Permanenti
Il-Kumitat Permanenti huwa l-korp li jieħu d-deċiżjonijiet tal-Konvenzjoni bis-setgħat li jevalwa l-istat ta’ konservazzjoni tal-ispeċijiet u, sussegwentement, li jrrevedi l-elenki tagħhom fl-Appendiċijiet tal-Konvenzjoni. Il-funzjonijiet tiegħu huma enumerati fl-Artikoli 13-15 ta’ dan il-Ftehim. Dan jiltaqa’ mill-anqas darba kull sentejn u kull meta maġġoranza tal-Partijiet Kontraenti hekk titlob. Saret drawwa għall-Kumitat Permanenti li jiltaqa’ kull sena.
Il-mandat għall-pożizzjoni tal-Unjoni fir-rigward tal-emendi tal-appendiċijiet jingħata permezz ta’ Deċiżjoni tal-Kunsill abbażi ta’ proposta mill-Kummissjoni. Il-pożizzjonijiet komuni tal-UE dwar abbozzi ta’ deċiżjonijiet u riżoluzzjonijiet oħra jiġu miftiehma f’laqgħat preliminari tal-grupp ta’ ħidma rilevanti tal-Kunsill inkella f’laqgħat ta’ koordinazzjoni tal-UE fuq il-post.
2.3.L-att previst tal-Kumitat Permanenti
Bejn il-5 u t-8 ta’ Diċembru 2017, is-sebgħa u tletin laqgħa annwali tal-Kumitat Permanenti tal-Ftehim fi Strasburgu, Franza, għandu jadotta deċiżjoni dwar emenda tal-Appendiċi II tal-Ftehim (“l-att previst”).
F’konformità mal-Artikolu 17 tal-Ftehim, emenda għall-Appendiċijiet għandha tiġi adottata b’maġġoranza ta’ żewġ terzi tal-Partijiet Kontraenti. Din tidħol fis-seħħ għall-Partijiet kollha tliet xhur wara l-adozzjoni mill-Kumitat Permanenti sakemm terz tal-Partijiet Kontraenti ma jkunux innotifikaw xi oġġezzjonijiet, ħlief għal dawk il-Partijiet li jagħmlu oġġezzjoni (riżerva) waqt il-laqgħa tal-Kumitat Permanenti.
L-għan tal-att previst huwa li jiġi emendat l-Appendiċi II tal-Ftehim, kif previst fl-Artikolu 17 tal-Ftehim.
L-att previst għandu jsir vinkolanti fuq il-Partijiet Kontraenti skont l-Artikolu 6 tal-Ftehim, li jipprevedi li kull Parti Kontraenti għandha tieħu l-miżuri leġiżlattivi u amministrattivi xierqa u meħtieġa sabiex tiżgura l-protezzjoni speċjali tal-ispeċijiet tal-fawna ferjali kif speċifikati fl-Appendiċi II.
3.Pożizzjoni li għandha tiġi adottata f’isem l-Unjoni
Il-Kumitat Permanenti huwa korp imwaqqaf permezz tal-Ftehim. Is-sebgħa u tletin laqgħa tal-Kumitat Permanenti għall-Ftehim se ssir fi Strasburgu, Franza, mill-5 sat-8 ta’ Diċembru 2017.
Ir-Repubblika tal-Albanija ressqet proposta biex jiġi emendat l-Appendiċi II tal-Ftehim biex jinkludi l-linċi tal-Balkani, Lynx lynx spp. balcanicus, li hija sottospeċi tal-linċi Ewrasjatika Lynx lynx, diġà elenkata fl-Appendiċi III tal-Ftehim (“l-ispeċje ta’ fawna protetti”).
Jenħtieġ li l-Unjoni tappoġġa l-proposta minħabba li hija bbażata fuq ix-xjenza u hija f’konformità mal-impenn tal-Unjoni fil-kooperazzjoni internazzjonali għall-protezzjoni tal-bijodiversità.
Għalhekk jeħtieġ li l-Kunsill jieħu deċiżjoni bil-għan li tkun stabbilita l-pożizzjoni li għandha tiġi adottata f’isem l-Unjoni fil-kuntest tas-sebgħa u tletin laqgħa tal-Kumitat Permanenti rigward il-proposta għal emenda.
Il-proposta għal emenda mhux se teħtieġ bdil fil-liġi eżistenti tal-Unjoni.
4.Bażi ġuridika
4.1.Il-bażi ġuridika proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “l-pożizzjonijiet li għandhom jiġu adottati f’ isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
Il-kunċett ta’ “atti li jkollhom effetti legali” jinkludi atti li jkollhom effetti legali skont ir-regoli tad-dritt internazzjonali li jirregolaw il-korp inkwistjoni. Jinkludi wkoll strumenti li ma għandhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatur tal-Unjoni” 2 .
4.1.2.Applikazzjoni għall-każ preżenti
Il-Kumitat Permanenti huwa korp imwaqqaf permezz tal-Ftehim. Is-sebgħa u tletin laqgħa annwali tal-Kumitat Permanenti għall-Konvenzjoni se ssir fi Strasburgu (Franza) mill-5 sat-8 ta’ Diċembru, 2017.
L-att li l-Kumitat Permanenti huwa mitlub jadotta, jikkostitwixxi att li jkollu effetti legali. L-att previst se jkun vinkolanti skont id-dritt internazzjonali f’konformità mal-Artikolu 6 tal-Konvenzjoni sabiex tkun żgurata l-protezzjoni speċjali tal-ispeċijiet tal-fawna selvaġġa elenkati fl-Appendiċi II. L-att previst ma jissupplimentax jew jemenda l-qafas istituzzjonali tal-ftehim.
Għalhekk, il-bażi ġuridika proċedurali għad-deċiżjoni proposta, hija l-Artikolu 218(9) tat-TFUE.
4.2.Bażi ġuridika sostantiva
4.2.1.Prinċipji
Il-bażi ġuridika sostantiva għal deċiżjoni skont l-Artikolu 218(9) TFUE tiddependi primarjament fuq l-objettiv u l-kontenut tal-att previst li fir-rigward tiegħu tiġi adottata pożizzjoni f’isem l-Unjoni. Jekk l-att previst ikollu żewġ għanijiet jew ikollu żewġ komponenti u jekk wieħed minn dawn l-għanijiet jew komponenti jkun identifikabbli bħala l-ewlieni, filwaqt li l-ieħor ikun sempliċiment inċidentali, id-deċiżjoni skont l-Artikolu 218(9) TFUE trid tkun imsejsa fuq bażi ġuridika sostantiva waħda, jiġifieri dik rikjesta mill-għan jew mill-komponent ewlieni jew predominanti.
4.2.2.Applikazzjoni għall-każ preżenti
L-objettiv ewlieni u l-kontenut tal-att previst jirrigwardaw l-ambjent.
Għalhekk il-bażi ġuridika sostantiva tad-deċiżjoni proposta, hija l-Artikolu 192(1).
4.3.Konklużjoni
Jenħtieġ li l-bażi ġuridika tad-deċiżjoni proposta tkun l-Artikolu 192(1) flimkien mal-Artikolu 218(9) tat-TFUE.
2017/0277 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tiġi adottata f’isem l-Unjoni Ewropea fis-sebgħa u tletin laqgħa tal-Kumitat Permanenti tal-Konvenzjoni dwar il-konservazzjoni tal-ħajja ferjali Ewropea u tal-abitati naturali fir-rigward ta’ emenda għall-Appendiċi II tagħha
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 192(1), flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)Il-Konvenzjoni dwar il-konservazzjoni tal-ħajja ferjali Ewropea u tal-abitati naturali (Il-Konvenzjoni ta’ Berna) (“il-Ftehim”) kienet konkluża mill-Unjoni bid-Deċiżjoni tal-Kunsill 82/72/KEE 3 u daħlet fis-seħħ fl-1 ta’ Ġunju 1982. Dan il-Ftehim għandu bħala għan il-konservazzjoni tal-ħajja ferjali Ewropea u tal-ħabitats naturali tagħhom, speċjalment dawk li l-konservazzjoni tagħhom teħtieġ il-kooperazzjoni ta’ diversi Stati Membri. Hija trattat intergovernattiv, konkluż taħt l-awspiċi tal-Kunsill tal-Ewropa.
(2)Skont l-Artikolu 17 tal-Ftehim, il-Kumitat Permanenti jista’ jadotta deċiżjoni biex jiġu emendati l-appendiċijiet tal-Ftehim.
(3)Waqt is-sebgħa u tletin laqgħa tiegħu bejn il-5 u t-8 ta’ Diċembru 2017, il-Kumitat Permanenti se jadotta deċiżjoni dwar l-emendar tal-Appendiċi II tal-Ftehim.
(4)Huwa xieraq li tiġi stabbilita l-pożizzjoni li għandha tiġi adottata f’isem l-Unjoni fil-Kumitat Permanenti, peress li d-deċiżjoni se tkun vinkolanti għall-Unjoni.
(5)Jenħtieġ li l-Unjoni tappoġġa l-proposta li mal-Appendiċi II tal-Ftehim, tiżdied il-linċi tal-Balkani Lynx lynx spp. balcanicus, sottospeċi tal-linċi Ewrasjatika, Lynx lynx li diġà tinsab fl-Appendiċi III tal-Ftehim, għaliex hija bbażata fuq ix-xjenza, f’konformità mal-impenn tal-Unjoni favur il-kooperazzjoni internazzjonali għall-protezzjoni tal-bijodiversità skont l-Artikolu 5 tal-Konvenzjoni tan-NU dwar id-Diversità Bijoloġika u mad-deċiżjonijiet meħuda fil-Konferenza tal-Partijiet skont din il-Konvenzjoni, b’mod partikolari mal-mira globali miftiehma waqt l-Għaxar laqgħa dwar il-prevenzjoni sal-2020 tal-estinzjoni ta’ speċijiet mhedda magħrufin u għat-titjib u ż-żamma tal-istatus ta’ konservazzjoni tagħhom, b’mod partikolari ta’ dawk li l-għadd tagħhom qed jonqos l-aktar.
(6)Il-linċi Ewrasjatika, Lynx lynx hija diġà elenkata fl-Anness II u fl-Anness IV tad-Direttiva tal-Kunsill 92/43/1992 4 , u għalhekk iż-żieda tas-sottospeċi linċi tal-Balkani Lynx lynx spp. balcanicus mal-Appendiċi II tal-Ftehim ma tkun teħtieġ l-ebda bidla fil-liġi tal-Unjoni,
ADOTTA DIN ID-DEĊIŻJONI:
Artikolu 1
Il-pożizzjoni li għandha tiġi adottata f’isem l-Unjoni fis-sebgħa u tletin laqgħa tal-Kumitat Permanenti tal-Konvenzjoni dwar il-konservazzjoni tal-ħajja ferjali Ewropea u tal-abitati naturali, għandha tkun li tappoġġa ż-żieda ta’ Lynx lynx spp. balcanicus mal-Appendiċi II tagħha.
Artikolu 2
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
