IL-KUMMISSJONI EWROPEA

Brussell, 16.8.2017

COM(2017) 427 final

2017/0193(NLE)

Proposta għal

DEĊIŻJONI TAL-KUNSILL

dwar il-konklużjoni, f’isem l-Unjoni Ewropea, ta’ Ftehim bejn l-Unjoni Ewropea u l-Konfederazzjoni Żvizzera dwar il-Kollegament tal-Iskemi għall-Iskambju ta’ Kwoti tal-Emissjonijiet ta’ Gassijiet Serra tagħhom

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet għall-proposta u l-objettivi tagħha

Is-sistemi ta’ limitu u skambju huma għodda ta’ politika li jnaqqsu b’mod kosteffettiv l-emissjonijiet ta’ gassijiet serra. Il-limitu fuq l-emissjonijiet ta’ gassijiet serra jiżgura li l-politika hija ambjentalment effettiva u l-iskambju ta’ kwoti tal-emissjonijiet jippermetti flessibilità fil-kisba ta’ tnaqqis fl-emissjonijiet. L-UE għandha aktar minn għaxar snin esperjenza fl-Iskema għall-Iskambju ta’ Kwoti tal-Emissjonijiet tal-UE, l-akbar sistema ta’ limitu u skambju fid-dinja.

Meta l-iskemi għall-iskambju ta’ kwoti tal-emissjonijiet jiġu kkollegati, jippermettu lill-parteċipanti fi skema waħda jużaw unitajiet mis-sistema kkollegata għall-konformità. Kollegament bħal dan huwa mistenni li jwassal għal ipprezzar usa’ tal-karbonju. Permezz tal-espansjoni tas-suq u ż-żieda fid-disponibbiltà ta’ opportunitajiet ta’ tnaqqis, il-kollegament isaħħaħ il-kosteffiċjenza tal-iskambju ta’ kwoti tal-emissjonijiet.

•Konsistenza ma’ dispożizzjonijiet ta’ politika eżistenti fil-qasam ta’ politika

L-iżvilupp ta’ suq internazzjonali tal-karbonju li jiffunzjona sew permezz ta’ kollegament minn isfel għal fuq tal-iskemi għall-iskambju ta’ kwoti tal-emissjonijiet huwa għan ta’ politika fit-tul tal-UE u tal-komunità internazzjonali, b’mod partikolari bħala mezz biex jintlaħqu l-objettivi klimatiċi, inkluż taħt il-Ftehim ta’ Pariġi.

L-Artikolu 25 tad-Direttiva li tistabbilixxi l-Iskema għall-Iskambju ta’ Kwoti tal-Emissjonijiet (EU ETS) 1 jippermetti l-kollegament tal-EU ETS ma’ skemi oħrajn għall-iskambju ta’ kwoti tal-emissjonijiet diment li dawn ikunu obbligatorji, ikollhom limitu massimu assolut fuq l-emissjonijiet u jkunu kompatibbli. Fl-20 ta’ Diċembru 2010, il-Kunsill adotta Deċiżjoni li tawtorizza lill-Kummissjoni tiftaħ negozjati mal-Konfederazzjoni Żvizzera għal kollegament bejn l-iskemi għall-iskambju ta’ kwoti tal-emissjonijiet tal-UE u tal-Iżvizzera.

L-Iskema Żvizzera għall-Iskambju ta’ Kwoti tal-Emissjonijiet (ETS Żvizzera) saret obbligatorja fl-2013 għal entitajiet kbar u li jużaw ħafna enerġija u tpoġġi limitu assolut fuq l-emissjonijiet ta’ gassijiet serra, u dan jissodisfa tnejn mill-kundizzjonijiet bażiċi għall-kollegament mal-EU ETS.

B’mod ġenerali, l-ETS Żvizzera għandha disinn simili ħafna għall-EU ETS. L-EU ETS u l-ETS Żvizzera jkopru l-istess gassijiet u setturi tal-industrija, b’limiti ugwali ta’ inklużjoni, u jiddefinixxu entitajiet responsabbli fil-livell ta’ installazzjoni. Il-kwantità ta’ kwoti li jinħarġu kull sena taħt l-ETS Żvizzera tonqos kull sena skont it-tnaqqis fil-kwantità ta’ kwoti madwar l-UE kollha. Il-metodoloġiji ta’ allokazzjoni huma kompatibbli: l-irkantar huwa l-metodu prestabbilit u valuri referenzjarji simili jiġu applikati fir-rigward tal-allokazzjoni lill-industriji li jirċievu allokazzjoni tranżitorja bla ħlas. L-istandards kwantitattivi u kwalitattivi għall-krediti internazzjonali huma l-istess. Il-perjodu ta’ skambju attwali taż-żewġ sistemi jkopri l-2013-2020. Fiż-żewġ sistemi, il-perjodu ta’ konformità jkopri snin kalendarji, u l-entitajiet koperti għandhom sal-31 ta’ Marzu u sat-30 ta’ April tas-sena sussegwenti biex jirrapportaw l-emissjonijiet u biex iċedu l-kwoti. Il-penali għan-nuqqas ta’ ċediment ta’ kwoti suffiċjenti huma simili fiż-żewġ sistemi.

Filwaqt li l-ETS Żvizzera għadha ma tkoprix l-avjazzjoni, l-attivitajiet tal-avjazzjoni huma wieħed mill-akbar sorsi ta’ gassijiet serra mill-Iżvizzera, u l-kopertura tal-avjazzjoni mill-ETS Żvizzera kienet meqjusa essenzjali biex tiġi kkollegata mal-EU ETS. L-Iżvizzera qed taħdem biex tinkludi l-avjazzjoni fl-ETS Żvizzera, fejn l-Iżvizzera tirrifletti r-regoli tal-EU ETS dwar l-avjazzjoni.

Bħall-EU ETS, attwalment l-ETS Żvizzera għaddejja minn reviżjoni għall-perjodu sussegwenti tagħha ta’ bejn l-2021 u l-2030. Il-ftehim għall-kollegament tal-ETS Żvizzera u l-EU ETS (il-Ftehim tal-Kollegament) jinkludi dispożizzjonijiet biex tiġi żgurata kompatibilità kontinwata bejn is-sistemi sabiex il-kollegament jinżamm għall-perjodu ta’ bejn l-2021-2030.

•Konsistenza ma’ politiki oħrajn tal-Unjoni

Minkejja ż-żieda fl-użu tal-iskambju ta’ kwoti tal-emissjonijiet fl-Asja u fl-Amerika ta’ Fuq, għalissa ma jeżisti l-ebda suq internazzjonali tal-karbonju bi prezz uniformi u globali tal-karbonju. Il-pajjiżi qegħdin jieħdu tipi differenti ta’ azzjoni ta’ mitigazzjoni, kemm politiki bbażati fis-suq kif ukoll dawk aktar tradizzjonali ta’ ‘kmand u kontroll’. Dan jikkostitwixxi riskju ta’ rilokazzjoni tal-emissjonijiet tal-karbonju għas-setturi l-aktar intensivi fl-enerġija, jiġifieri t-trasferiment tal-produzzjoni lejn pajjiżi b’miri u politiki inqas ambizzjużi. Il-kollegament ser iwassal għal konverġenza tal-prezzijiet tal-karbonju fis-sistemi kollegati, li jikkontribwixxi għal titjib fil-kondizzjonijiet ekwivalenti ta’ kompetizzjoni. Fir-rigward tal-avjazzjoni, ladarba din tkun koperta mill-ETS Żvizzera, it-titjiriet fl-Iżvizzera, it-titjiriet bejn l-Iżvizzera u l-UE u t-titjiriet bejn Stati Membri tal-UE se jiġu ttrattati b’mod simili.

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

Il-proposta qed issir skont l-Artikolu 192(1), flimkien mal-Artikolu 218 tat-Trattat dwar il-Funzjonament tal-Unjoni Ewropea (TFUE).

Skont l-Artikolu 192(1) u 191 tat-TFUE, l-Unjoni Ewropea għandha tikkontribwixxi, inter alia, għat-twettiq tal-objettivi li ġejjin: il-preservazzjoni, il-protezzjoni u t-titjib tal-kwalità tal-ambjent; il-promozzjoni ta’ miżuri fil-livell internazzjonali sabiex jiġu ttrattati problemi ambjentali reġjonali jew globali, u b’mod partikolari li jiġġieldu t-tibdil fil-klima.

L-Artikolu 218 tat-TFUE jistabbilixxi l-proċedura għan-negozjar u l-konklużjoni ta’ ftehimiet bejn l-Unjoni Ewropea u pajjiżi terzi jew organizzazzjonijiet internazzjonali. Il-paragrafu 5 tiegħu jipprevedi li, il-Kunsill, fuq proposta mill-Kummissjoni bħala negozjatur, jadotta deċiżjoni li tawtorizza l-iffirmar ta’ ftehim f’isem l-Unjoni Ewropea. Il-paragrafu 6(a) tal-Artikolu 218 tat-TFUE jipprevedi li l-Kunsill, fuq proposta mill-Kummissjoni bħala negozjatur, jadotta deċiżjoni li tawtorizza l-konklużjoni ta’ ftehim wara li jinkiseb il-kunsens tal-Parlament Ewropew.

•Sussidjarjetà (għall-kompetenza mhux esklużiva)

Id-Direttiva dwar l-EU ETS hija strument ta’ politika tal-UE eżistenti li jkompli wara l-2020. Skont il-prinċipju tas-sussidjarjetà stabbilit fl-Artikolu 5 tat-TFUE, l-objettivi tal-Ftehim tal-Kollegament jistgħu jinkisbu biss permezz ta’ proposta mill-Kummissjoni fil-livell tal-UE, għaliex il-Ftehim ser jippermetti lill-parteċipanti fis-sistema tal-UE jużaw unitajiet mis-sistema Żvizzera għall-konformità.

Azzjoni fil-livell tal-UE, u fejn possibbli fuq livell globali, hija aktar effiċjenti minn azzjoni fil-livell ta’ Stat Membru, minħabba l-effetti transkonfinali tat-tibdil fil-klima. Azzjoni fil-livell tal-UE hija l-aktar metodu effettiv biex jintlaħqu l-miri klimatiċi domestiċi u internazzjonali tal-UE filwaqt li jinżammu kondizzjonijiet ekwivalenti ta’ kompetizzjoni fis-suq intern tal-UE.

•Proporzjonalità

3.IMPLIKAZZJONIJIET BAĠITARJI

4.ELEMENTI OĦRAJN

•Spjegazzjoni dettaljata tad-dispożizzjonijiet speċifiċi tal-proposta

Il-Ftehim jiċċara li l-Iżvizzera se tirrifletti d-dispożizzjonijiet tal-EU ETS dwar l-avjazzjoni fl-ETS Żvizzera qabel ma jidħol fis-seħħ il-Ftehim. L-operaturi tal-avjazzjoni ser jiġu amministrati minn Stat taż-ŻEE jew mill-Iżvizzera skont l-approċċ ta’ ‘punt uniku ta’ servizz’, sabiex awtorità waħda tassumi r-responsabbiltà tal-implimentazzjoni taż-żewġ sistemi.

Il-Kumitat Konġunt stabbilit permezz tal-Artikolu 12 tal-Ftehim huwa l-istruttura prinċipali ta’ tmexxija tal-Ftehim. Huwa magħmul minn rappreżentanti taż-żewġ Partijiet u huwa responsabbli mill-amministrazzjoni u mill-implimentazzjoni korretta tal-Ftehim. B’mod partikolari, għandu rwol essenzjali fil-proċess għall-kondiviżjoni ta’ informazzjoni u ta’ koordinazzjoni, kif ukoll fil-valutazzjoni ta’ jekk il-Partijiet għadhomx jissodisfaw il-kriterji essenzjali. Il-Kumitat Konġunt jista’ jipproponi tibdil fl-artikoli tal-Ftehim u jagħmel emendi fl-Annessi. Il-Kumitat Konġunt isir provviżorjament funzjonali mid-data tal-iffirmar tal-Ftehim.

L-Artikolu 14 tal-Ftehim jistabbilixxi mekkaniżmu għas-soluzzjoni tat-tilwim. Kwalunkwe Parti tista’ tirreferi tilwim dwar l-interpretazzjoni jew l-applikazzjoni tal-Ftehim lill-Kumitat Konġunt għal riżoluzzjoni. Meta l-Kumitat Konġunt ma jirnexxilux isolvi t-tilwima fi żmien sitt xhur, fuq talba ta’ kwalunkwe Parti t-tilwima tista’ tiġi riferuta lill-Qorti Permanenti ta’ Arbitraġġ.

Il-Ftehim jista’ jiġi tterminat b’mod permanenti minn kwalunkwe Parti (l-Artikolu 16). Il-modalitajiet interim ta’ sospensjoni huma previsti fl-Artikolu 15 li huma kapaċi jipproteġu l-integrità tal-iskema għall-iskambju ta’ kwoti tal-emissjonijiet f’qasir żmien. Il-mekkaniżmu ta’ sospensjoni propost jipprevjeni ċ-ċediment ta’ kwoti mis-sistema kkollegata għall-konformità. Il-mekkaniżmu ta’ sospensjoni jista’ jiġi skattat biss f’ċirkostanzi limitati għal perjodu ta’ żmien fiss u jista’ jiġi estiż sat-terminazzjoni.

Minbarra l-prinċipji, l-objettivi u l-arranġamenti istituzzjonali, il-Ftehim fih dispożizzjonijiet tekniċi għall-operat tal-kollegament li jirrigwarda r-reġistri (l-Artikolu 3), il-kontabilità (l-Artikolu 4), l-irkantar (l-Artikolu 5), l-informazzjoni sensittiva u s-sigurtà (l-Artikoli 8 u 9).

Ser jiġi stabbilit kollegament dirett bejn ir-reġistri sabiex ikun jista’ jsir negozjar bejn ir-reġistri, li ser ikun ibbażat fuq Standards Tekniċi dwar il-Kollegament li jirriflettu l-prinċipji stabbiliti fl-Anness II tal-Ftehim. L-amministratur tar-reġistru Żvizzeru għall-Iżvizzera u l-amministratur ċentrali tar-reġistru għall-UE ser ikunu responsabbli mill-amministrazzjoni tal-kollegament bejn ir-reġistri. Flimkien mal-Istandards Tekniċi tal-Kollegament, l-amministraturi tar-reġistri tal-kollegament tar-reġistri għandhom jiddeterminaw proċeduri operazzjonali komuni għall-kollegament tar-reġistri. Jistgħu individwalment jew b’mod konġunt jagħlqu b’mod temporanju l-kollegament għall-manutenzjoni tas-sistema, jew minħabba ksur tas-sigurtà jew riskju għas-sigurtà.

Id-detenturi tal-kontijiet fir-reġistri ser ikunu jistgħu jidentifikaw l-oriġini tal-kwoti tal-emissjonijiet wara l-kollegament. Talanqas fuq bażi annwali, il-Partijiet għandhom jinfurmaw lil xulxin dwar l-ammont totali ta’ kwoti ta’ emissjonijiet li għandhom fl-ETS tagħhom li joriġinaw mill-ETS kollegati. Bl-istess mod, iridu jinfurmaw lil xulxin mill-inqas darba fis-sena dwar il-kwoti tal-emissjonijiet li joriġinaw mill-ETS kollegati li ġew ċeduti għall-konformità jew li ġew kanċellati volontarjament fl-ETS l-oħra. Il-Ftehim jipprovdi li l-UE u l-Iżvizzera jridu jagħtu rendikont tal-flussi netti ta’ kwoti bejn l-iskemi kollegati għall-iskambju ta’ kwoti tal-emissjonijiet skont ir-regoli futuri dwar il-kontabilità li attwalment qed jiġu żviluppati taħt il-Konvenzjoni Qafas tan-Nazzjonijiet Uniti dwar it-Tibdil fil-Klima. Hemm ukoll dispożizzjonijiet għat-trasferiment u għall-akkwist ta’ Unitajiet ta’ Ammont Assenjati fil-każ li jidħol fis-seħħ it-tieni perjodu ta’ impenn tal-Protokoll ta’ Kjoto. Il-Kumitat Konġunt għandu jiżviluppa d-dettalji dwar il-kontabilità u, jekk meħtieġ, għat-trasferiment u l-akkwist ta’ Unitajiet ta’ Ammont Assenjati fl-Annessi tal-Ftehim.

Il-Ftehim jispeċifika li l-kwoti li ma jiġux allokati bla ħlas għandhom jiġu rkantati b’mod miftuħ, trasparenti u nondiskriminatorju. L-entitajiet, inklużi l-operaturi li jiġu ammessi biex jagħmlu offerta f’irkantijiet li jsiru f’sistema waħda huma eliġibbli wkoll biex jagħmlu offerta f’irkantijiet li jsiru fis-sistema l-oħra. Il-Ftehim jippermetti t-tkomplija tal-arranġamenti attwali ta’ irkantar fl-Iżvizzera, diment li l-għadd totali ta’ kwoti Żvizzeri (installazzjonijiet stazzjonarji u l-avjazzjoni) li ser jiġi rkantat fis-sena ma jaqbiżx il-limitu ta’ 1,000,000 kwota Żvizzera. Ladarba jintlaħaq il-limitu, l-Iżvizzera se tapplika l-istess arranġamenti ta’ rkantar kif japplikaw fl-UE u li huma speċifikati fl-Anness I tal-Ftehim.

Il-Partijiet iridu jipproteġu l-informazzjoni sensittiva. Kull Parti tibqa’ responsabbli biex timmarka l-informazzjoni li tirrilaxxa bħala sensittiva u għad-deċiżjoni dwar il-livell ta’ sensittività, kif ukoll għat-tnaqqis fil-grad u għat-tneħħija tas-sensittività, u trid tinforma lill-Parti l-oħra b’dan. L-UE u l-Iżvizzera se jaqblu dwar l-immarkar u l-livell ta’ sensittività għall-informazzjoni li jkunu ħarġu b’mod konġunt.

2017/0193 (NLE)

Proposta għal

DEĊIŻJONI TAL-KUNSILL

dwar il-konklużjoni, f’isem l-Unjoni Ewropea, ta’ Ftehim bejn l-Unjoni Ewropea u l-Konfederazzjoni Żvizzera dwar il-Kollegament tal-Iskemi għall-Iskambju ta’ Kwoti tal-Emissjonijiet ta’ Gassijiet Serra tagħhom

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 192(1), flimkien mal-Artikolu 218(6)(a) tiegħu,

Wara li kkunsidra l-proposta mill-Kummissjoni Ewropea,

Wara li kkunsidra l-kunsens tal-Parlament Ewropew 2 ,

Billi:

(1)Skont id-Deċiżjoni tal-Kunsill [XXX] ta’ […], il-Ftehim bejn l-Unjoni Ewropea u l-Konfederazzjoni Żvizzera dwar il-Kollegament tal-Iskemi għall-Iskambju ta’ Kwoti tal-Emissjonijiet ta’ Gassijiet Serra tagħhom ġie ffirmat fi [… Novembru 2017], soġġett għall-konklużjoni tiegħu f’data aktar tard.

(2)Is-sistemi ta’ limitu u skambju huma għodda ta’ politika li jnaqqsu b’mod kosteffettiv l-emissjonijiet ta’ gassijiet serra. Il-kollegament ta’ sistemi ta’ limitu u skambju huwa mistenni li jwassal għal ipprezzar usa’ tal-karbonju, tiżdied id-disponibbiltà ta’ opportunitajiet ta’ tnaqqis u titjieb il-kosteffiċjenza tal-iskambju ta’ kwoti tal-emissjonijiet. L-iżvilupp ta’ suq internazzjonali tal-karbonju li jiffunzjona sew permezz ta’ kollegament minn isfel għal fuq tal-iskemi għall-iskambju ta’ kwoti tal-emissjonijiet huwa għan tal-politika fit-tul tal-UE u tal-komunità internazzjonali, b’mod partikolari bħala mezz biex jintlaħqu l-objettivi klimatiċi inkluż taħt il-Ftehim ta’ Pariġi.

(3)Il-Ftehim jenħtieġ li jiġi approvat f’isem l-Unjoni,

ADOTTA DIN ID-DEĊIŻJONI:

Artikolu 1

Il-Ftehim bejn l-Unjoni Ewropea u l-Konfederazzjoni Żvizzera dwar il-kollegament tal-iskemi għall-iskambju ta’ kwoti tal-emissjonijiet ta’ gassijiet serra tagħhom huwa b’dan approvat f’isem l-Unjoni.

It-test tal-Ftehim huwa mehmuż ma’ din id-Deċiżjoni.

Artikolu 2

Il-President tal-Kunsill għandu jaħtar il-persuna li jkollha s-setgħa li tipproċedi, f’isem l-Unjoni, biex tiskambja l-istrumenti ta’ approvazzjoni kif previst fl-Artikolu 21 tal-Ftehim, sabiex tesprimi l-kunsens tal-Unjoni li tkun marbuta bil-Ftehim.

Artikolu 3

Din id-Deċiżjoni għandha tidħol fis-seħħ fi […] 32.

Magħmul fi Brussell,

(1) Id-Direttiva 2003/87/KE tal-Parlament Ewropew u tal-Kunsill tat-13 ta’ Ottubru 2003 li tistabbilixxi skema għall-iskambju ta’ kwoti ta’ emissjonijiet ta’ gassijiet serra ġewwa l-Komunità u li temenda d-Direttiva tal-Kunsill 96/61/KE

(2)

2 Id-data tad-dħul fis-seħħ tal-Ftehim ser tiġi pubblikata f’Il-Ġurnal Uffiċjali tal-Unjoni Ewropea mis-Segretarjat Ġenerali tal-Kunsill.

IL-KUMMISSJONI EWROPEA

Brussell, 16.8.2017

COM(2017) 427 final

ANNESS

tal-

Proposta għal Deċiżjoni tal-Kunsill

dwar il-konklużjoni, f’isem l-Unjoni Ewropea, ta’ Ftehim bejn l-Unjoni Ewropea u l-Konfederazzjoni Żvizzera dwar il-Kollegament tal-Iskemi għall-Iskambju ta’ Kwoti tal-Emissjonijiet ta’ Gassijiet Serra tagħhom

FTEHIM bejn l-Unjoni Ewropea u l-Konfederazzjoni Żvizzera dwar il-kollegament tal-Iskemi għall-Iskambju ta’ Kwoti tal-Emissjonijiet ta’ gassijiet serra tagħhom

L-UNJONI EWROPEA,

(minn hawn ’il quddiem ‘l-Unjoni’)

minn naħa waħda, u

IL-KONFEDERAZZJONI ŻVIZZERA

(minn hawn ’il quddiem ‘l-Iżvizzera’)

min-naħa l-oħra,

(minn issa ’l quddiem ‘il-Partijiet’),

KONXJI TAL-isfida globali li tirriżulta mit-tibdil fil-klima u l-isforzi internazzjonali meħtieġa biex jitnaqqsu l-emissjonijiet ta’ gassijiet serra fil-ġlieda kontra t-tibdil fil-klima;

FILWAQT LI JINNUTAW l-impenji internazzjonali, b’mod partikolari l-Konvenzjoni Qafas tan-Nazzjonijiet Uniti dwar it-Tibdil fil-Klima u l-Protokoll ta’ Kjoto tagħha, biex jitnaqqsu l-emissjonijiet ta’ gassijiet serra;

FILWAQT LI JQISU LI l-Iżvizzera u l-Unjoni jikkondividu l-objettiv ta’ tnaqqis sinifikanti fl-emissjonijiet ta’ gassijiet serra sal-2020 u lil hinn;

KONXJI LI r-reviżjonijiet għall-perjodi futuri ta’ negozjar tal-Iskemi għall-Iskambju ta’ Kwoti tal-Emissjonijiet tal-Unjoni u tal-Iżvizzera jistgħu jkunu jeħtieġu reviżjonijiet tal-Ftehim sabiex, bħala minimu, tiġi ppreservata l-integrità tal-impenji ta’ mitigazzjoni tal-Partijiet;

FILWAQT LI JIRRIKONOXXU LI l-Iskemi għall-Iskambju ta’ Kwoti tal-Emissjonijiet huma għodda effettiva għat-tnaqqis tal-emissjonijiet ta’ gassijiet serra b’mod kosteffettiv;

FILWAQT LI JQISU LI l-kollegament tal-Iskemi għall-Iskambju ta’ Kwoti tal-Emissjonijiet sabiex ikun jista’ jsir skambju ta’ kwoti tal-emissjonijiet bejn is-sistemi ser jgħin sabiex jinbena suq internazzjonali robust tal-karbonju u jkomplu jissaħħu l-isforzi tal-Partijiet li jkunu kkollegaw is-sistemi tagħhom għat-tnaqqis fl-emissjonijiet;

FILWAQT LI JQISU LI permezz tal-kollegament tal-Iskemi għall-Iskambju ta’ Kwoti tal-Emissjonijiet għandha tiġi evitata r-rilokazzjoni tal-emissjonijiet tal-karbonju u d-distorsjoni tal-kompetizzjoni bejn is-sistemi kollegati u jiġi żgurat funzjonament kif suppost tas-swieq tal-karbonju kollegati;

WARA LI KKUNSIDRAW l-Iskema għall-Iskambju ta’ Kwoti tal-Emissjonijiet tal-Unjoni, stabbilita permezz tad-Direttiva 2003/87/KE kif emendata, u l-Iskema għall-Iskambju ta’ Kwoti tal-Emissjonijiet tal-Iżvizzera, stabbilita permezz tal-Att tas-CO2 u l-Ordinanza tiegħu;

FILWAQT LI JFAKKRU li n-Norveġja, l-Iżlanda u l-Liechtenstein jipparteċipaw fl-Iskema għall-Iskambju ta’ Kwoti tal-Emissjonijiet tal-Unjoni;

FILWAQT LI JQISU LI, skont iż-żmien tar-ratifika, il-kollegament għandu jkun operattiv mill-1 ta’ Jannar 2019 jew mill-1 ta’ Jannar 2020 mingħajr preġudizzju għall-applikazzjoni aktar bikrija tal-kriterji essenzjali mill-Iżvizzera jew mill-Unjoni, u għall-applikazzjoni proviżorja;

KONXJI LI l-kollegament ta’ Skemi għall-Iskambju ta’ Kwoti tal-Emissjonijiet jeħtieġ aċċess għal informazzjoni sensittiva kif ukoll l-iskambju tagħha bejn il-Partijiet u għalhekk miżuri xierqa ta’ sigurtà;

FILWAQT LI JINNUTAW LI dan il-Ftehim ma jaffettwax id-dispożizzjonijiet li permezz tagħhom il-Partijiet jistabbilixxu l-objettivi tagħhom għat-tnaqqis tal-emissjonijiet ta’ gassijiet serra li mhumiex koperti mill-Iskemi għall-Iskambju ta’ Kwoti tal-Emissjonijiet tagħhom;

FILWAQT LI JIRROKONOXXU LI dan il-Ftehim għandu jkun mingħajr preġudizzju għal kwalunkwe ftehim bilaterali bejn l-Iżvizzera u Franza – fir-rigward tal-istatus binazzjonali tal-EuroAiport Basel-Mulhouse-Freiburg kif stabbilit permezz tal-“Convention franco-suisse du 4 juillet 1949 relative à la construction et à l’exploitation de l’aéroport de Bâle-Mulhouse”, diment li l-ftehim bilaterali jirrispetta l-kriterji essenzjali u d-dispożizzjonijiet tekniċi definiti f’dan il-Ftehim;

FILWAQT LI JIRRIKONOXXU LI d-dispożizzjonijiet ta’ dan il-Ftehim huma mfassla fid-dawl tar-rabtiet mill-qrib u tar-relazzjoni speċjali li teżisti bejn l-Iżvizzera u l-Unjoni;

Filwaqt li jilqgħu l-Ftehim li ntlaħaq waqt il-21 konferenza tal-partijiet għall-Konvenzjoni Qafas tan-Nazzjonijiet Uniti dwar it-Tibdil fil-Klima li saret f’Pariġi fit-12 ta’ Diċembru 2015, u jirrikonoxxu li l-kwistjonijiet ta’ kontabilità li jirriżultaw minnu ser jiġu eżaminati fi żmien debitu. 

QABLU FUQ DAN LI ĠEJ:

KAPITOLU I

DISPOŻIZZJONIJIET ĠENERALI

Artikolu 1

Objettiv

Dan il-Ftehim jikkollega l-Iskema għall-Iskambju ta’ Kwoti tal-Emissjonijiet tal-Unjoni (minn hawn ’il quddiem l-“EU ETS”) ma’ dik tal-Iżvizzera (minn hawn ’il quddiem l-“ETS tal-Iżvizzera”).

Artikolu 2

Kriterji Essenzjali

L-Iskemi għall-Iskambju ta’ Kwoti tal-Emissjonijiet (minn hawn ’il quddiem l-“ETS”) tal-Partijiet għandhom tal-anqas jissodisfaw il-kriterji essenzjali stabbiliti fl-Anness I.

KAPITOLU II

DISPOŻIZZJONIJIET TEKNIĊI

Artikolu 3

Reġistri

1.Ir-reġistri tal-Partijiet għandhom jissodisfaw il-kriterji definiti fl-Anness, il-Parti C.

2.Biex jitħaddem il-kollegament bejn l-EU ETS u l-ETS tal-Iżvizzera, għandu jiġi stabbilit kollegament dirett bejn ir-Reġistru tat-Tranżazzjonijiet tal-Unjoni Ewropea (EUTL) tar-reġistru tal-Unjoni u r-Reġistru Supplimentari tat-Tranżazzjonijiet Żvizzeru (SSTL) tar-reġistru Żvizzeru, li se jippermetti t-trasferiment bejn ir-reġistri ta’ kwoti tal-emissjonijiet li jkunu nħarġu taħt waħda mis-sistemi.

3.Il-kollegament bejn ir-reġistri għandu, inter alia:

a.jiġi amministrat mill-amministratur tar-reġistru Żvizzeru fil-każ tal-Iżvizzera, u mill-amministratur ċentrali tal-Unjoni fil-każ tal-Unjoni,

b.jopera skont il-liġijiet applikabbli f’kull ġurisdizzjoni,

c.ikun sostnut minn proċessi awtomatizzati integrati kemm fir-reġistru Żvizzeru kif ukoll fir-reġistru tal-Unjoni sabiex ikunu jistgħu jsiru t-tranżazzjonijiet,

d.jiġi implimentat b’tali modi sabiex tiġi żgurata funzjonalità konsistenti, kemm jista’ jkun possibbli, għall-utenti tar-reġistru Żvizzeru u tar-reġistru tal-Unjoni.

4.L-amministratur tar-reġistru Żvizzeru, l-amministratur ċentrali tal-Unjoni jew iż-żewġ amministraturi flimkien jistgħu jagħlqu il-kollegament bejn ir-reġistri temporanjament, għall-manutenzjoni tas-sistema, minħabba ksur tas-sigurtà jew riskju għas-sigurtà skont il-leġiżlazzjoni Żvizzera u dik tal-Unjoni Ewropea applikabbli. Il-Partijiet għandhom javżaw, malajr kemm jista’ jkun, dwar għeluq temporanju tal-kollegament bejn ir-reġistri minħabba manutenzjoni tas-sistema, ksur tas-sigurtà jew riskju għas-sigurtà u għandhom iżommu l-għeluq temporanju qasir kemm jista’ jkun.

5.Il-Partijiet għandhom jaġixxu minnufih u f’kooperazzjoni mill-qrib billi jużaw miżuri disponibbli fil-ġurisdizzjonijiet rispettivi tagħhom għall-prevenzjoni tal-frodi u għall-preservazzjoni tal-integrità tas-suq tal-ETS kollegati. Fil-kuntest tal-ETS kollegati, l-amministratur tar-reġistru Żvizzeru, l-amministratur ċentrali tal-Unjoni u l-amministraturi nazzjonali mill-Istati Membri tal-Unjoni Ewropea għandhom jaħdmu flimkien biex jiġi minimizzat ir-riskju ta’ frodi, l-użu ħażin jew l-attività kriminali li tinvolvi r-reġistri, sabiex jirreaġixxu għal inċidenti bħal dawn, u sabiex tiġi mħarsa l-integrità tal-kollegament bejn ir-reġistri. Il-miżuri miftiehma mill-amministraturi sabiex jiġi indirizzat ir-riskju ta’ frodi, l-użu ħażin jew l-attività kriminali għandhom jiġu adottati permezz ta’ deċiżjoni mill-Kumitat Konġunt.

6.L-amministratur tar-reġistru Żvizzeru u l-amministratur ċentrali tal-Unjoni għandhom jiddeterminaw proċeduri operazzjonali komuni (COP) relatati ma’ kwistjonijiet tekniċi jew oħrajn meħtieġa għall-operat tal-kollegament u b’konsiderazzjoni tal-prijoritajiet tal-leġiżlazzjoni domestika. Il-COP żviluppati mill-amministraturi għandhom jidħlu fis-seħħ meta jiġu adottati permezz ta’ deċiżjoni mill-Kumitat Konġunt.

7.L-amministratur tar-reġistru Żvizzeru u l-amministratur ċentrali tal-Unjoni għandhom jiżviluppaw Standards Tekniċi tal-Kollegament (LTS) abbażi tal-prinċipji stabbiliti fl-Anness II li jiddeskrivu r-rekwiżiti dettaljati għall-istabbiliment ta’ konnessjoni robusta u sigura bejn l-SSTL u l-EUTL. L-LTS żviluppati mill-amministraturi għandhom jidħlu fis-seħħ meta jiġu adottati permezz ta’ deċiżjoni mill-Kumitat Konġunt.

8.Il-kwistjonijiet li jeħtieġu riżoluzzjoni li tirriżulta mill-implimentazzjoni u mill-operat tal-kollegament bejn ir-reġistri se jiġu solvuti permezz ta’ konsultazzjoni f’waqtha bejn l-amministratur tar-reġistru Żvizzeru u l-amministratur ċentrali tal-Unjoni u skont il-COP determinati.

Artikolu 4

Kwoti tal-emissjonijiet u kontabilità

1.Il-kwoti tal-emissjonijiet li jistgħu jintużaw għall-konformità taħt l-ETS ta’ Parti waħda għandhom jiġu rikonoxxuti għall-konformità taħt l-ETS tal-Parti l-oħra.

Il-kwota tal-emissjonijiet tfisser kwota għall-emissjoni ta’ tunnellata ta’ ekwivalenti għad-diossidu tal-karbonju matul perjodu speċifiku, li tkun inħarġet taħt l-EU ETS jew taħt l-ETS tal-Iżvizzera valida għall-finijiet li tissodisfa r-rekwiżiti taħt l-ETS tal-Iżvizzera jew tal-UE.

2.Ir-restrizzjonijiet eżistenti dwar l-użu ta’ kwoti speċifiċi f’sistema waħda jistgħu jiġu applikati fis-sistema l-oħra.

3.L-ETS li fiha tkun inħarġet kwota tal-emissjonijiet għandha tkun tista’ tiġi identifikata mill-amministraturi tar-reġistru u mid-detenturi tal-kontijiet abbażi ta’ mill-inqas il-kodiċi tal-pajjiż tan-numru tas-serje tal-kwota tal-emissjonijiet.

4.Kull Parti għandha tgħarraf lill-oħra tal-anqas fuq bażi annwali dwar iż-żamma totali ta’ kwoti ta’ emissjonijiet maħruġa taħt is-sistema l-oħra u l-għadd ta’ kwoti ta’ emissjonijiet maħruġa taħt is-sistema l-oħra ċeduti għall-konformità jew ikkanċellati volontarjament.

5.Il-partijiet għandhom jagħtu rendikont tal-flussi netti ta’ kwoti skont il-prinċipji u r-regoli approvati tal-UNFCCC għall-kontabilità wara d-dħul fis-seħħ tagħhom. Dan il-mekkaniżmu għandu jiġi stabbilit f’Anness għal dan il-Ftehim u għandu jiġi adottat permezz ta’ deċiżjoni mill-Kumitat Konġunt.

6.Mad-dħul fis-seħħ tat-tieni perjodu ta’ impenn tal-Protokoll ta’ Kjoto, il-Partijiet għandhom jittrasferixxu jew jakkwistaw għadd suffiċjenti ta’ Unitajiet ta’ Ammont Assenjat (AAUs) validi għat-tieni perjodu ta’ impenn tal-Protokoll ta’ Kjoto f’intervall maqbul u fil-każ ta’ terminazzjoni skont l-Artikolu 16 biex jagħtu rendikont tal-flussi netti ta’ kwoti bejn il-Partijiet sal-punt li dawn il-kwoti ikunu ġew ċeduti mill-operaturi tal-ETS għall-konformità u sal-punt li tali kwoti jirrappreżentaw l-emissjonijiet inklużi fl-Anness A tal-Protokoll ta’ Kjoto. Il-mekkaniżmu għal dawn it-tranżazzjonijiet għandu jiġi determinat f’Anness għal dan il-Ftehim, adottat permezz ta’ deċiżjoni mill-Kumitat Konġunt wara d-dħul fis-seħħ tal-emenda tal-Protokoll ta’ Kjoto. L-Anness għandu jinkludi wkoll ftehim dwar il-ġestjoni tas-sehem tar-rikavat applikat għall-ewwel trasferiment internazzjonali tal-AAUs. 

Artikolu 5

Irkantar

1.Il-kwoti għandhom jinbiegħu biss mill-Partijiet permezz ta’ rkantar.

2.L-operaturi taħt kwalunkwe ETS għandhom ikunu eliġibbli japplikaw għal ammissjoni biex jissottomettu offerta fl-irkanti għall-kwoti. L-aċċess għall-irkanti tal-kwoti għall-operaturi taħt kwalunkwe ETS għandu jingħata fuq bażi nondiskriminatorja. Sabiex tiġi żgurata l-integrità tal-irkanti, l-eliġibbiltà għall-applikazzjoni għal ammissjoni għall-irkanti tista’ tiġi estiża biss għal kategoriji oħra ta’ parteċipanti li huma regolati taħt il-liġi ta’ Parti jew li huma speċifikament awtorizzati jipparteċipaw fl-irkanti.

3.L-irkant għandu jsir b’mod miftuħ, trasparenti u nondiskriminatorju u skont il-kriterji ppreżentati fl-Anness I, il-Parti D.

KAPITOLU III

AVJAZZJONI

Artikolu 6

Inklużjoni tal-attivitajiet tal-avjazzjoni

Il-Partijiet għandhom jinkludu l-attivitajiet tal-avjazzjoni fl-ETS rispettivi tagħhom skont il-kriterji essenzjali stabbiliti fl-Anness I, il-Parti B. L-inklużjoni tal-attivitajiet tal-avjazzjoni fl-ETS Żvizzera għandha tirrifletti l-istess prinċipji bħal dawk tal-EU ETS, b’mod partikolari fir-rigward tar-regoli ta’ kopertura, ta’ limitu u ta’ allokazzjoni.

Artikolu 7

Reviżjoni tal-ftehim fil-każ ta’ tibdil li jikkonċerna l-attivitajiet tal-avjazzjoni

1.Fil-każ ta’ tibdil li jittratta l-attivitajiet tal-avjazzjoni fl-EU ETS, il-Kumitat Konġunt għandu jirrevedi l-Anness I, il-Parti B korrispondenti, skont l-Artikolu 13(2).

2.Fi kwalunkwe każ, il-Kumitat Konġunt għandu jiltaqa' sal-aħħar tal-2018 biex jirrevedi d-dispożizzjonijiet rilevanti tal-ftehim fir-rigward tal-kamp ta’ applikazzjoni tal-kopertura tal-attivitajiet tal-avjazzjoni skont l-Artikolu 13(2).

KAPITOLU IV

INFORMAZZJONI SENSITTIVA U SIGURTÀ

Artikolu 8

Informazzjoni sensittiva

1.‘Informazzjoni sensittiva’ tfisser informazzjoni u materjal kemm jekk f’forma verbali, viżiva, elettronika, manjetika jew dokumentata, inkluż tagħmir u teknoloġija, li tkun ingħatat jew ġiet skambjata bejn il-Partijiet b’rabta ma’ dan il-Ftehim u (i) li l-iżvelar mhux awtorizzat tagħha jista’ jikkawża diversi gradi ta’ ħsara jew dannu għall-interessi tal-Iżvizzera, tal-Unjoni jew ta’ Stat Membru wieħed jew aktar tal-Unjoni; (ii) li teħtieġ protezzjoni kontra żvelar mhux awtorizzat fl-interessi tas-sigurtà ta’ waħda mill-Partijiet; u (iii) li ġġorr marka tas-sensittività assenjata minn waħda mill-Partijiet.

2.Mingħajr preġudizzju għal-liġijiet u r-regolamenti rispettivi tal-Partijiet, kull Parti għandha tipproteġi l-informazzjoni sensittiva, b’mod partikolari kontra żvelar mhux awtorizzat jew telf ta’ integrità, skont ir-rekwiżiti tas-sigurtà u l-livelli ta’ sensittività u l-istruzzjonijiet ta’ trattament definiti fl-Annessi II, III, u IV rispettivament. ‘Trattament’ tinkludi l-ġenerazzjoni, l-ipproċessar, il-ħżin, it-trażmissjoni jew il-qerda tal-informazzjoni sensittiva jew ta’ kwalunkwe informazzjoni li tinsab fiha.

Artikolu 9

Livelli ta’ sensittività

1.Kull Parti hija unikament responsabbli għall-immarkar tal-informazzjoni li tirrilaxxa bħala sensittiva u għat-tnaqqis fil-grad jew għat-tneħħija tal-livell ta’ sensittività tal-informazzjoni li tkun irrilaxxat. Fejn l-informazzjoni sensittiva tiġi rilaxxata b’mod konġunt mill-Partijiet, il-Partijiet għandhom jaqblu flimkien dwar l-immarkar u l-livell ta’ sensittività, kif ukoll dwar it-tnaqqis fil-grad u t-tneħħija tal-livell ta’ sensittività.

2.L-informazzjoni sensittiva għandha tiġi mmarkata ETS KRITIKA, ETS SENSITTIVA jew ETS LIMITATA skont il-livell ta’ sensittiva tagħha elenkat fl-Anness III.

3.L-oriġinatur tal-informazzjoni sensittiva tal-Parti li tirrilaxxaha għandu jnaqqas il-grad tal-informazzjoni sensittiva għal livell aktar baxx ta’ sensittività hekk kif l-informazzjoni ma tibqax teħtieġ grad ogħla ta’ protezzjoni jew ineħħi l-istatus ta’ sensittività hekk kif l-informazzjoni ma tibqax teħtieġ protezzjoni kontra żvelar mhux awtorizzat jew telf ta’ integrità.

4.Il-Parti li tirrilaxxaha għandha tinforma lill-Parti riċeventi dwar kwalunkwe informazzjoni sensittiva ġdida u l-livell assoċjat ta’ sensittività tagħha, kif ukoll dwar kwalunkwe tnaqqis fil-grad tal-livell ta’ sensittività jew it-tneħħija ta’ status ta’ sensittività.

5.Il-Partijiet għandhom jistabbilixxu u jżommu lista kondiviża ta’ informazzjoni sensittiva.

KAPITOLU V

ŻVILUPP TAL-LIĠI

Artikolu 10

Żvilupp tal-Liġi

1.Dan il-Ftehim ma jippreġudikax id-dritt ta’ kull Parti li temenda jew li tadotta leġiżlazzjoni ta’ rilevanza għal dan il-Ftehim, inkluż id-dritt li tadotta miżuri protettivi aktar stretti.

2.Il-Partijiet għandhom jinnotifikaw lil xulxin bil-miktub, b’mod f’waqtu meta waħda mill-Partijiet tkun qed tiżviluppa leġiżlazzjoni f’qasam ta’ rilevanza għal dan il-Ftehim. Għal dan il-għan, il-Kumitat Konġunt għandu jwaqqaf proċess ta’ tagħrif u konsultazzjoni regolari.

3.Wara notifika skont il-paragrafu 2, kwalunkwe Parti tista’ titlob skambju ta’ fehmiet dwar dan fi ħdan il-Kumitat Konġunt skont l-Artikolu 13(4), b’mod partikolari biex jiġi vvalutat jekk il-leġiżlazzjoni hijiex ser taffettwa b’mod dirett il-kriterji stabbiliti fl-Anness I.

4.Mal-adozzjoni ta’ proposta għal att leġiżlattiv ta’ rilevanza għal dan il-Ftehim minn Parti waħda, għandha tintbagħat kopja tagħha lir-rappreżentant(i) tal-Parti l-oħra u lill-Kumitat Konġunt.

5.Mal-adozzjoni ta’ att leġiżlattiv ta’ rilevanza għal dan il-Ftehim minn Parti waħda, għandha tintbagħat kopja tiegħu lir-rappreżentant(i) tal-Parti l-oħra u lill-Kumitat Konġunt.

6.Fejn il-Kumitat Konġunt jikkonkludi li l-leġiżlazzjoni qed taffettwa direttament il-kriterji stabbiliti fl-Anness I, il-Kumitat Konġunt għandu jieħu deċiżjoni li tikkonċerna emenda korrispondenti tal-parti rilevanti tal-Anness I. Din id-deċiżjoni għandha tittieħed qabel ma jiskadu sitt xhur mid-data ta’ riferiment lill-Kumitat Konġunt.

7.Fejn deċiżjoni dwar emenda tal-Anness I ma tkunx tista’ tintlaħaq fiż-żmien imsemmi fil-paragrafu 6, il-Kumitat Konġunt għandu jeżamina, fi żmien tmien xhur mir-riferiment, il-possibiltajiet l-oħrajn kollha biex jinżamm il-funzjonament tajjeb tal-Ftehim u jieħu kwalunkwe deċiżjoni meħtieġa għal dan il-għan.

Artikolu 11

Koordinazzjoni

1.Il-Partijiet għandhom jikkoordinaw f’oqsma ta’ rilevanza għal dan il-Ftehim, u, b’mod partikolari, dwar il-kriterji stabbiliti fl-Annessi, sabiex tiġi żgurata l-implimentazzjoni xierqa tal-Ftehim u l-integrità kontinwa tal-ETS tal-Partijiet, kif ukoll tiġi evitata r-rilokazzjoni tal-emissjonijiet tal-karbonju u d-distorsjoni bla bżonn tal-kompetizzjoni bejn l-ETS kollegati.

2.Tali koordinazzjoni għandha, b’mod partikolari, issir permezz tal-iskambju formali u informali jew l-għoti ta’ informazzjoni u, fuq talba ta’ Parti, permezz ta’ konsultazzjonijiet fil-Kumitat Konġunt.

KAPITOLU VI

KUMITAT KONĠUNT

Artikolu 12

Kompożizzjoni u funzjonament tal-Kumitat Konġunt

1.Huwa stabbilit Kumitat Konġunt magħmul minn rappreżentanti tal-Partijiet.

2.Kwalunkwe Parti tista’ titlob li tissejjaħ laqgħa; il-Kumitat Konġunt għandu jiltaqa’ fi żmien 30 jum minn tali talba.

3.Id-deċiżjonijiet li jittieħdu mill-Kumitat Konġunt fil-każijiet previsti f’dan il-Ftehim għandhom, mad-dħul fis-seħħ tagħhom, jorbtu lill-Partijiet, li għandhom jieħdu l-passi meħtieġa biex tiġi żgurata l-implimentazzjoni u l-applikazzjoni tagħhom.

4.Il-Kumitat Konġunt għandu jistabbilixxi r-regoli ta’ proċedura tiegħu. Għandu jkun hemm il-qbil taż-żewġ Partijiet dwar id-deċiżjonijiet li jittieħdu mill-Kumitat Konġunt.

5. Il-Kumitat Konġunt jista’ jiddeċiedi li jistabbilixxi kwalunkwe sottokumitat jew grupp ta’ ħidma li jista’ jgħinu fil-ħidma tiegħu.

Artikolu 13

Funzjonijiet tal-Kumitat Konġunt

1.Il-Kumitat Konġunt huwa responsabbli mill-amministrazzjoni u l-implimentazzjoni korretta ta’ dan il-Ftehim.

2.Il-Kumitat Konġunt jista’ jiddeċiedi li jadotta Anness ġdid jew li jemenda Anness eżistenti ta’ dan il-Ftehim.

3.Il-Kumitat Konġunt għandu jiddiskuti emendi għall-Artikoli ta’ dan il-Ftehim proposti minn waħda mill-Partijiet. Jekk il-Kumitat Konġunt jaqbel mal-proposta, għandu jissottometti l-proposta lill-Partijiet għall-adozzjoni skont il-proċeduri interni rispettivi tagħhom.

4.Fuq talba magħmula skont l-Artikolu 10(3), il-Kumitat Konġunt għandu jżomm skambju ta’ fehmiet dwar il-leġiżlazzjoni proposta, b’mod partikolari jekk din il-leġiżlazzjoni hijiex ser twassal biex l-ETS tal-Parti rispettiva ma tibqax tissodisfa l-kriterji stabbiliti fl-Annessi.

5.Mas-sospensjoni jew qabel in-notifika ta’ terminazzjoni ta’ dan il-Ftehim skont l-Artikoli 15 u 16, il-Kumitat Konġunt għandu jżomm skambju ta’ fehmiet u għandu jfittex li jintlaħaq ftehim biex tintemm is-sospensjoni jew tiġi evitata t-terminazzjoni.

6.Il-Kumitat Konġunt għandu jimmira li t-tilwim riferut lilu mill-Partijiet jiġi solvut, f’konformità mal-Artikolu 14.

7.Il-Kumitat Konġunt għandu jwettaq reviżjonijiet perjodiċi tal-Ftehim fid-dawl ta’ kwalunkwe żviluppi maġġuri fi kwalunkwe mill-ETS, inkluż dwar is-sorveljanza tas-suq jew il-bidu ta’ perjodu ta’ skambju ġdid, sabiex b’mod partikolari jiġi żgurat li l-kollegament ma jkunx qed jimmina l-miri tat-tnaqqis fl-emissjonijiet domestiċi ta’ kwalunkwe waħda mill-Partijiet jew l-integrità u l-funzjonament ordnat tas-swieq tal-karbonju tagħhom.

8.Il-funzjonijiet tal-Kumitat Konġunt għandhom ikunu limitati għal dawk previsti f’dan il-Ftehim.

KAPITOLU VII

SOLUZZJONI TAT-TILWIM

Artikolu 14

Soluzzjoni tat-Tilwim

1.Il-Partijiet għandhom jirreferu t-tilwim dwar l-interpretazzjoni jew l-applikazzjoni ta’ dan il-Ftehim li jirriżulta bejniethom lill-Kumitat Konġunt għal riżoluzzjoni.

2.Fejn il-Kumitat Konġunt ma jirnexxilux isolvi t-tilwim b’suċċess fi żmien sitt xhur mir-referenza tiegħu, it-tilwim għandu jiġi riferut, fuq talba ta’ kwalunkwe waħda mill-Partijiet, lill-Qorti Permanenti ta’ Arbitraġġ għal riżoluzzjoni skont ir-Regoli tal-Qorti Permanenti tal-Arbitraġġ tal-2012.

3.Il-mekkaniżmu għas-soluzzjoni tat-tilwim għandu jkompli japplika wara s-sospensjoni jew it-terminazzjoni tal-Ftehim, skont il-paragrafu 1, fil-każ ta’ tilwim li jkun inqala’ matul l-applikazzjoni tal-Ftehim.

KAPITOLU VIII

SOSPENSJONI U TERMINAZZJONI

Artikolu 15

Sospensjoni tal-Artikolu 4(1)

1.Mingħajr preġudizzju għall-Artikolu 16, Parti tista’ tissospendi l-applikazzjoni tal-Artikolu 4(1) ta’ dan il-Ftehim fiċ-ċirkostanzi li ġejjin:

a.Fejn Parti waħda tqis li l-Parti l-oħra mhix konformi, kompletament jew parzjalment, mal-obbligi stabbiliti skont l-Artikoli 2, 3(1), 4(1), 5(3), 6, 8(2), 10(2), 10(4)-(5) u 18(2) skont dan il-Ftehim.

b.Fejn il-Parti l-oħra tinnotifika lil dik tal-ewwel bil-miktub bl-intenzjoni tagħha li tikkollega l-ETS tagħha ma’ dik ta’ Parti terza.

c.Fejn il-Parti l-oħra tinnotifika lil dik tal-ewwel bil-miktub bl-intenzjoni tagħha li tittermina dan il-Ftehim.

2.Parti għandha tinnotifika d-deċiżjoni tagħha li tissospendi l-Artikolu 4(1) tal-Ftehim bil-miktub lill-Parti l-oħra flimkien ma’ ġustifikazzjoni għal din is-sospensjoni. Id-deċiżjoni għandha ssir pubblika minnufih wara li tkun saret in-notifika lill-Parti l-oħra.

3.Is-sospensjoni tal-Artikolu 4(1) tal-Ftehim għandha tkun ta’ durata temporanja. Fejn l-Artikolu 4(1) jiġi sospiż skont il-paragrafu 1(a) ta’ dan l-Artikolu, is-sospensjoni għandha tintemm bir-riżoluzzjoni tat-tilwim skont l-Artikolu 14. Fejn l-Artikolu 4(1) jiġi sospiż skont il-paragrafu 1(b) jew il-paragrafu 1(c) ta’ dan l-Artikolu, is-sospensjoni għandha tkun ta’ durata temporanja ta’ 3 xhur. Il-Parti tista’ tiddeċiedi li tqassar jew li testendi d-durata tas-sospensjoni.

4.Waqt is-sospensjoni, ma jistgħux jiġu ċeduti kwoti għall-konformità f’ETS li ma joriġinawx minnha. It-tranżazzjonijiet l-oħrajn kollha jibqgħu possibbli.

5.Jekk ma jkun intalab l-ebda skambju ta’ fehmiet fil-Kumitat Konġunt mill-mument tat-trażmissjoni tal-proposta leġiżlattiva skont l-Artikolu 10(3) sal-limitu ta’ żmien stabbilit fl-Artikolu 10(6), jew fejn tali skambju jkun sar u l-Kumitat Konġunt ikun ikkonkluda li l-leġiżlazzjoni l-ġdida ma taffettwax direttament il-kriterji, Parti ma tistax tissospendi l-applikazzjoni tal-Artikolu 4(1) għar-raġuni li l-Parti l-oħra ma għadhiex konformi mal-obbligu tagħha li tissodisfa l-kriterji stabbiliti fl-Anness I.

Artikolu 16

Terminazzjoni

1.Parti tista’ tittermina dan il-Ftehim fi kwalunkwe ħin billi tinnotifika lill-Parti l-oħra bid-deċiżjoni tagħha bil-miktub u wara konsultazzjoni fi ħdan il-Kumitat Konġunt. It-terminazzjoni għandha tidħol fis-seħħ 6 xhur wara li tkun saret in-notifika lill-Parti l-oħra. Id-deċiżjoni għandha ssir pubblika wara li tkun saret in-notifika lill-Parti l-oħra.

2.Fil-każ li ma jkunx hemm estensjoni jew abolizzjoni ta’ ETS ta’ Parti, il-ftehim attwali għandu jiġi terminat b’mod awtomatiku fl-aħħar jum operattiv tal-ETS inkwistjoni.

3.Fil-każ ta’ terminazzjoni, il-Partijiet għandhom jilħqu ftehim dwar it-tkomplija tal-użu u tal-ħżin tal-informazzjoni li diġà ġiet ikkomunikata bejniethom ħlief għal dejta miżmuma fir-reġistru rispettiv. Jekk ma jintlaħaq l-ebda ftehim, kwalunkwe Parti hija intitolata li titlob li titħassar l-informazzjoni li tkun ġiet ikkomunikata.

KAPITOLU IX

   DISPOŻIZZJONIJIET FINALI

Artikolu 17

Implimentazzjoni

1.Il-Partijiet għandhom jieħdu l-miżuri xierqa kollha biex jiġi żgurat li jiġu ssodisfati l-obbligi li jirriżultaw minn dan il-Ftehim, inkluż id-deċiżjonijiet tal-Kumitat Konġunt.

2.Il-Partijiet għandhom jastjenu minn kwalunkwe miżura li tista’ tipperikola l-ilħuq tal-objettivi ta’ dan il-Ftehim.

Artikolu 18

Kollegament ma’ Partijiet Terzi

1.Il-Partijiet għal dan il-Ftehim jistgħu jinnegozjaw ma’ Parti terza bil-ħsieb li jikkollegaw l-Iskemi għall-Iskambju ta’ Kwoti tal-Emissjonijiet rispettivi tagħhom.

2.Fejn Parti għal dan il-Ftehim tinnegozja kollegament ma’ Parti terza, tal-ewwel għandha tinnotifika lill-Parti l-oħra għal dan il-Ftehim b’dan u taġġornaha regolarment dwar l-istatus tan-negozjati.

3.Qabel iseħħ il-kollegament ta’ Parti waħda għal dan il-Ftehim ma’ Parti terza, il-Parti l-oħra għal dan il-Ftehim għandha tiddeċiedi jekk taċċettax il-Ftehim tal-Kollegament l-ieħor jew jekk titterminax il-Ftehim attwali. Meta taċċetta l-Ftehim tal-Kollegament l-ieħor, tintemm is-sospensjoni tal-Artikolu 4(1).

4.Mal-kollegament ma’ Parti terza, id-dispożizzjonijiet ta’ dan il-Ftehim jistgħu jiġu riveduti.

Artikolu 19

Annessi

L-Annessi ta’ dan il-Ftehim huma parti integrali minnu.

Artikolu 20

Lingwi

Dan il-Ftehim għandu jitħejja f’żewġ kopji bil-lingwa Bulgara, Kroata, Ċeka, Daniża, Olandiża, Ingliża, Estonjana, Finlandiża, Franċiża, Ġermaniża, Griega, Ungeriża, Irlandiża, Taljana, Latvjana, Litwana, Maltija, Pollakka, Portugiża, Rumena, Slovakka, Slovena, Spanjola u Żvediża, u kull wieħed minn dawn it-testi jkun ugwalment awtentiku.

Artikolu 21

Ratifika u Dħul fis-Seħħ

1.Dan il-Ftehim għandu jiġi konkluż għal perjodu indefinit, sakemm ma jiġix terminat f’konformità mal-Artikolu 16.

2.Dan il-Ftehim għandu jiġi ratifikat jew approvat mill-Partijiet skont il-proċeduri interni rispettivi tagħhom.

3.Il-Partijiet għandhom jirratifikaw jew jiskambjaw biss l-istrumenti ta’ ratifika tagħhom ladarba jqisu li jkunu ġew sodisfati l-kundizzjonijiet kollha għall-kollegament kif definit f’dan il-Ftehim.

4.Dan il-Ftehim għandu jidħol fis-seħħ fl-1 ta’ Jannar wara l-iskambju tal-istrumenti ta’ ratifika mill-Partijiet. 

5.Id-dħul fis-seħħ tal-Artikolu 4(6) għandu, għaż-żewġ Partijiet, jiddependi fuq ir-ratifika u fuq id-dħul fis-seħħ tal-emenda ta’ Doha għall-Protokoll ta’ Kjoto adottata waqt it-8 laqgħa tal-Partijiet (id-Deċiżjoni 1/CMP.8; it-tieni perjodu ta’ impenn).

Artikolu 22

Applikazzjoni provviżorja

Qabel id-dħul fis-seħħ tiegħu, l-Artikoli 11 sa 13 għandhom jiġu applikati provviżorjament mid-data tal-iffirmar ta’ dan il-Ftehim.

Magħmul fi … fi ...

Għall-Konfederazzjoni Żvizzera: Għall-Unjoni Ewropea:

Anness I

Kriterji Essenzjali

A.Kriterji Essenzjali għal Installazzjonijiet Stazzjonarji

B.Kriterji essenzjali għall-Avjazzjoni

C.Kriterji Essenzjali għar-Reġistri

L-ETS ta’ kull parti għandha tinkludi reġistru u reġistru tat-tranżazzjonijiet, li għandhom jissodisfaw il-kriterji essenzjali li ġejjin fir-rigward ta’ mekkaniżmi u proċeduri ta’ sigurtà u għall-ftuħ tal-kontijiet.

Kriterji Essenzjali dwar Mekkaniżmi u Proċeduri tas-Sigurtà:

Ir-reġistri u r-reġistri tat-tranżazzjonijiet għandhom jipproteġu l-kunfidenzjalità, l-integrità, id-disponibbiltà u l-awtentiċità tad-dejta maħżuna fis-sistema. Għal dan il-għan, il-Partijiet għandhom jimplimentaw il-mekkaniżmi ta’ sigurtà li ġejjin:

Kriterji Essenzjali dwar il-Ftuħ u l-Ġestjoni tal-Kontijiet:

Il-kriterji essenzjali li ġejjin għandhom jiġu rispettati fir-rigward tal-ftuħ ta’ kontijiet:

D.Kriterji Essenzjali għall-Pjattaformi tal-Irkantar u għall-Attivitajiet ta’ Irkantar

L-entitajiet li jwettqu l-irkanti tal-kwoti fl-ETS tal-Partijiet għandhom jissodisfaw il-kriterji essenzjali li ġejjin u jwettqu l-irkanti skont dan.

Anness II

Standards Tekniċi tal-Kollegament

L-Istandards Tekniċi tal-Kollegament (LTS) għandhom jispeċifikaw:

·L-arkitettura tal-kollegament komunikattiv;

·Is-sigurtà tat-trasferiment tad-dejta;

·Il-lista ta’ funzjonijiet (tranżazzjonijiet, rikonċiljazzjoni ...);

·Id-definizzjoni ta’ servizzi web;

·Ir-rekwiżiti dwar ir-reġistrazzjoni tad-dejta;

·L-arranġamenti operattivi (Uffiċċju ta’ informazzjoni, appoġġ);

·Il-pjan dwar l-attivazzjoni ta’ komunikazzjoni u l-proċedura tal-ittestjar;

·Il-proċedura tal-ittestjar tas-sigurtà.

L-LTS għandhom jispeċifikaw li l-amministraturi għandhom jieħdu passi raġonevoli biex jiġi żgurat li l-SSTL u l-EUTL kif ukoll il-kollegament ikunu operattivi 24 siegħa kuljum, 7 ijiem fil-ġimgħa u li dawk l-interruzzjonijiet fl-operat tal-SSTL u tal-EUTL u fil-kollegament jinżammu għall-minimu.

L-LTS għandhom jispeċifikaw li l-komunikazzjonijiet bejn ir-Reġistru Supplimentari tat-Tranżazzjonijiet Żvizzeru (SSTL) u r-Reġistru tat-Tranżazzjonijiet tal-Unjoni Ewropea (EUTL) jikkonsistu fi skambji siguri ta’ messaġġi skont il-Protokoll dwar l-Aċċess Sempliċi ta’ Oġġett (SOAP) abbażi tat-teknoloġiji li ġejjin 1 :

·Servizzi Web li jużaw SOAP;

·Network Privat Virtwali (VPN) ibbażat fuq il-hardware;

·XML (Lingwaġġ tal-Immarkar Estensibbli);

·Firma Diġitali; u

·Protokolli ta’ sinkronizzazzjoni tal-ħin fuq network

L-LTS għandhom jistabbilixxu rekwiżiti addizzjonali ta’ sigurtà għar-reġistru Żvizzeru, għall-SSTL, għar-reġistru tal-Unjoni u għall-EUTL u dawn għandhom jiġu dokumentati fi ‘pjan ta’ ġestjoni tas-sigurtà’. B’mod partikolari, l-LTS għandhom jispeċifikaw li:

·Jekk ikun hemm suspett li tkun ġiet kompromessa s-sigurtà tar-reġistru Żvizzeru, tal-SSTL, tar-reġistru tal-Unjoni jew tal-EUTL allura ż-żewġ Partijiet għandhom minnufih javżaw lil xulxin u jissospendu l-konnessjoni bejn l-SSTL u l-EUTL.

·Fil-każ ta’ ksur tas-sigurtà, il-Partijiet jintrabtu li jikkondividu l-informazzjoni ma’ xulxin mingħajr dewmien. Skont l-estent tad-dettalji tekniċi disponibbli, għandu jiġi kondiviż rapport li jiddeskrivi l-inċident (id-data, il-kawża, l-impatt, ir-rimedji) bejn l-amministratur tar-reġistru Żvizzeru u l-amministratur ċentrali tal-Unjoni fi żmien 24 siegħa wara l-ksur tas-sigurtà.

Il-proċedura dwar l-ittestjar tas-sigurtà stabbilita fl-LTS għandha titlesta qabel jiġi stabbilit il-kollegament ta’ komunikazzjoni bejn l-SSTL u l-EUTL u meta jkun hemm bżonn ta’ verżjoni jew rilaxx ġdid tal-SSTL jew tal-EUTL.

Minbarra l-Ambjent ta’ produzzjoni l-LTS għandhom jipprovdu żewġ ambjenti għall-ittestjar. ambjent għall-ittestjar għall-iżviluppaturi u ambjent ta’ aċċettazzjoni.

Permezz tal-amministratur tar-reġistru Żvizzeru u l-amministratur ċentrali tal-Unjoni l-Partijiet għandhom jipprovdu evidenza li turi li matul l-aħħar 12-il xahar tkun saret valutazzjoni indipendenti tas-sigurtà tas-sistemi tagħhom skont ir-rekwiżiti ta’ sigurtà stabbiliti fl-LTS. L-ittestjar tas-sigurtà u b’mod partikolari l-ittestjar tal-penetrazzjoni għandu jsir fuq kull rilaxx ġdid maġġuri tas-software skont ir-rekwiżiti ta’ sigurtà stabbiliti fl-LTS. L-ittestjar tal-penetrazzjoni ma għandux isir mill-iżviluppatur tas-software jew minn sottokuntrattur tal-iżviluppatur tas-software.

Anness III

Livelli ta’ sensittività u struzzjonijiet dwar il-ġestjoni

Il-Partijiet jaqblu li jagħmlu użu mil-livelli ta’ sensittività li ġejjin biex tiġi identifikata l-informazzjoni sensittiva ttrattata u skambjata fil-ftehim:

·ETS Limitata

·ETS Sensittiva

·ETS Kritika

L-informazzjoni immarkata bħala “ETS Kritika” hija aktar sensittiva mill-informazzjoni mmarkata bħala “ETS Sensittiva” li hija nfisha hija aktar sensittiva mill-informazzjoni mmarkata bħala “ETS Limitata”.

Il-Partijiet jaqblu li jiżviluppaw struzzjonijiet dwar il-ġestjoni abbażi tal-politika eżistenti tal-UE dwar il-klassifikazzjoni tal-informazzjoni tal-ETS u abbażi tal-Ordinanza dwar il-Protezzjoni tal-Informazzjoni (IPO) u l-Att Federali dwar il-Protezzjoni tad-Dejta (FADP) għall-Iżvizzera. Dawn l-istruzzjonijiet dwar il-ġestjoni se jiġu sottomessi lill-Kumitat Konġunt għall-approvazzjoni. Wara l-approvazzjoni, l-informazzjoni kollha se tiġi trattata skont il-livell ta’ sensittività tagħha f’konformità ma’ dawn l-istruzzjonijiet dwar il-ġestjoni.

Fil-każ li l-Partijiet jagħtu valutazzjonijiet differenti dwar livell, għandu jiġi applikat l-ogħla livell.

Il-leġiżlazzjoni ta’ kull Parti għandha tinkludi rekwiżiti ekwivalenti ta’ sigurtà essenzjali għall-passi dwar il-ġestjoni li ġejjin, filwaqt li jitqiesu l-livelli ta’ sensittività tal-ETS:

·Ġenerazzjoni ta’ dokument

oRiżorsi

oLivell ta’ Sensittività

·Ħżin

oDokument elettroniku fuq network

oDokument elettroniku f’ambjent lokali

oDokument fiżiku

·Trażmissjoni elettronika

oTelefon u telefon mobbli

oFax

oE-mail

oTrażmissjoni tad-dejta

·Trażmissjoni Fiżika

oOrali

oTrasferiment personali

oSistema postali

·Użu

oIpproċessar b’applikazzjonijiet tal-IT

oStampar

oIkkuppjar

oTneħħija minn post permanenti

·Ġestjoni ta’ informazzjoni

oEvalwazzjoni regolari tal-klassifikazzjoni u tar-riċevituri

oArkivjar

oTħassir u qerda

Anness IV

Definizzjoni ta’ Livelli ta’ Sensittività tal-ETS

A.1- Klassifikazzjoni tal-Kunfidenzjalità u tal-Integrità

Kunfidenzjalità tfisser il-karattru riżervat tal-informazzjoni jew ta’ sistema ta’ informazzjoni kollha jew parti minnha (bħal algoritmi, programmi u dokumentazzjoni) li l-aċċess għaliha huwa limitat għal persuni, korpi u proċeduri awtorizzati.

Integrità tfisser il-garanzija li s-sistema ta’ informazzjoni u l-informazzjoni pproċessata jistgħu jiġu alterati biss b’azzjoni intenzjonata u leġittima u li s-sistema se tipproduċi r-riżultat mistenni b’mod preċiż u b’mod sħiħ.

Għal kull informazzjoni fl-ETS li titqies bħala sensittiva, l-aspett ta’ kunfidenzjalità (li jirrispetta l-integrità) għandu jitqies mill-impatt potenzjali fil-livell ta’ negozju f’każ li din l-informazzjoni tiġi żvelata (fir-rigward ta’ modifikazzjoni mhux intenzjonata, qerda parzjali jew kompleta).

Għal kull aspett ta’ sigurtà dwar il-kunfidenzjalità u l-integrità, il-klassifikazzjoni tiġi vvalutata abbażi tad-definizzjoni pprovduta fit-taqsima A.2 u mbagħad il-livell ta’ sensittività globali tal-informazzjoni jiġi evalwat permezz tal-grilja mogħtija fit-taqsima A.3

A.2- Klassifikazzjoni tal-Kunfidenzjalità u tal-Integrità

A.2.1- Definizzjoni ta’ “Baxxa”

Kwalunkwe informazzjoni relatata mal-Iskema għall-Iskambju ta’ Kwoti tal-Emissjonijiet li d-divulgazzjoni lil persuni mhux awtorizzati u/jew it-telf ta’ integrità tagħha jikkawżaw ħsara moderata lill-Partijiet jew lil istituzzjonijiet oħra li tista’:

–taffettwa moderatament ir-relazzjonijiet politiċi jew diplomatiċi;

–tikkawża pubbliċità lokali negattiva għall-immaġni jew għar-reputazzjoni tal-Partijiet jew ta’ istituzzjonijiet oħra;

–tikkawża imbarazzament lill-individwi;

–taffettwa l-moral/produttività tal-persunal,

–tikkawża telf finanzjarju limitat jew tiffaċilita moderatament qligħ jew vantaġġ mhux xieraq għall-individwi jew għall-kumpaniji;

–taffettwa moderatament l-iżvilupp jew l-operat effettiv tal-politiki tal-Partijiet;

–taffettwa moderatament il-ġestjoni xierqa tal-Partijiet u tal-operazzjonijiet tagħhom.

A.2.2- Definizzjoni ta’ “Medja”

Kwalunkwe informazzjoni relatata mal-Iskema għall-Iskambju ta’ Kwoti tal-Emissjonijiet li d-divulgazzjoni lil persuni mhux awtorizzati u/jew it-telf ta’ integrità tagħha jikkawżaw ħsara lill-Partijiet jew lil istituzzjonijiet oħra li tista’:

–tikkawża imbarazzament lir-relazzjonijiet politiċi jew diplomatiċi;

–tagħmel ħsara lill-immaġni jew lir-reputazzjoni tal-Partijiet jew ta’ istituzzjonijiet oħra;

–tikkawża tbatija għall-individwi;

–tikkawża tnaqqis konsegwenzjali fil-moral/produttività tal-persunal;

–timbarazza lill-Partijiet jew lil istituzzjonijiet oħra f’negozjati kummerċjali jew politiċi ma’ oħrajn;

–tikkawża telf finanzjarju jew tiffaċilita qligħ jew vantaġġ mhux xieraq għall-individwi jew għall-kumpaniji;

–taffettwa l-investigazzjoni ta’ reat;

–tikser obbligi legali jew kuntrattwali dwar il-kunfidenzjalità tal-informazzjoni;

–taffettwa l-iżvilupp jew l-operat tal-politiki tal-Partijiet;

–taffettwa l-ġestjoni xierqa tal-Partijiet u tal-operazzjonijiet tagħhom.

A.2.3- Definizzjoni ta’ “Għolja”

Kwalunkwe informazzjoni relatata mal-Iskema għall-Iskambju ta’ Kwoti tal-Emissjonijiet li d-divulgazzjoni lil persuni mhux awtorizzati u/jew it-telf ta’ integrità tagħha jikkawżaw ħsara katastrofika u/jew inaċċettabbli lill-Partijiet jew lil istituzzjonijiet oħra li tista’:

—Taffettwa b’mod avvers ir-relazzjonijiet diplomatiċi;

—Tikkawża tbatija sostanzjali lill-individwi;

—Tagħmilha aktar diffiċli li tinżamm l-effikaċja operattiva jew is-sigurtà tal-Partijiet jew ta’ forzi ta’ kontributuri oħra;

—Tikkawża telf finanzjarju jew tiffaċilita qligħ jew vantaġġ mhux xieraq għall-individwi jew għall-kumpaniji;

—Tikser l-impenji xierqa għaż-żamma tal-kunfidenzjalità tal-informazzjoni pprovduta minn partijiet terzi;

—Tikser restrizzjonijiet statutorji dwar id-divulgazzjoni ta’ informazzjoni;

—Tippreġudika l-investigazzjoni jew tiffaċilita t-twettiq ta’ reat kriminali;

—Tpoġġi lill-Partijiet fi żvantaġġ f’negozjati kummerċjali jew ta’ politika ma’ oħrajn;

—Timpedixxi l-iżvilupp effettiv jew l-operat tal-politiki tal-Partijiet;

—Tfixkel il-ġestjoni xierqa tal-Partijiet u tal-operazzjonijiet tagħhom.

A.3 – Valutazzjoni tal-livell ta’ informazzjoni sensittiva tal-ETS

Abbażi taż-żewġ klassifikazzjonijiet għall-Kunfidenzjalità u għall-Integrità kompluti kif deskritt fit-taqsima preċedenti, is-sensittività tal-informazzjoni tiġi stabbilita permezz tat-tabella tal-immappjar li ġejja:

* Varjazzjoni possibbli li għandha tiġi vvalutata fuq bażi ta’ każ b’każ.

(1)

Attwalment dawk it-teknoloġiji qed jintużaw biex tiġi stabbilita konnessjoni bejn ir-Reġistru tal-Unjoni u r-Reġistru Internazzjonali tat-Tranżazzjonijiet kif ukoll bejn ir-Reġistru Żvizzeru u r-Reġistru Internazzjonali tat-Tranżazzjonijiet.