IL-KUMMISSJONI EWROPEA
Brussell, 20.11.2017
COM(2017) 671 final
RAPPORT TAL-KUMMISSJONI LILL-PARLAMENT EWROPEW, LILL-KUNSILL U LILL-KUMITAT EKONOMIKU U SOĊJALI EWROPEW
Rapport dwar l-implimentazzjoni tar-Rakkomandazzjoni tal-Kummissjoni għat-tisħiħ tal-prinċipju ta' paga ugwali għall-irġiel u n-nisa permezz tat-trasparenza
Rapport dwar l-implimentazzjoni tar-Rakkomandazzjoni tal-Kummissjoni għat-tisħiħ tal-prinċipju ta’ paga ugwali għall-irġiel u n-nisa permezz tat-trasparenza
1.Introduzzjoni
Il-prinċipju ta’ paga ugwali ilu mnaqqax fit-trattati tal-UE sa mill-1957 u huwa inkorporat fid-Direttiva 2006/54/KE tal-Parlament Ewropew u tal-Kunsill dwar l-implimentazzjoni tal-prinċipju ta’ opportunitajiet indaqs u ta’ trattament ugwali tal-irġiel u n-nisa fi kwistjonijiet ta’ impjiegi u xogħol (tfassil mill-ġdid) (“id-Direttiva”).
F’konformità mal-Artikoku 157 tat-Trattat dwar il-Funzjonament tal-Unjoni Ewropea (TFUE), id-Direttiva tistipula li għall-istess xogħol, jew għal xogħol li lilu jiġi attribwit l-istess valur, id-diskriminazzjoni diretta u indiretta abbażi ta’ sess għar-rigward tal-aspetti u l-kundizzjonijiet kollha ta’ remunerazzjoni jridu jiġu eliminati. Dan il-prinċipju japplika wkoll għas-sistemi ta’ klassifikazzjoni tal-impjiegi użati biex tiġi determinata l-paga u ġie inkorporat fis-sistemi legali nazzjonali tal-Istati Membri kollha.
Filwaqt li l-prinċipju ta’ paga ugwali ilu parti integrali mit-Trattati għal kważi 60 sena u minn dak iż-żmien ġie żviluppat aktar fil-liġi tal-UE u l-liġijiet nazzjonali, ir-Rapport tal-Kummissjoni tal-2013 li analizza l-applikazzjoni tad-Direttiva fl-Istati Membri
kkonkluda li l-applikazzjoni prattika tad-dispożizzjonijiet dwar il-paga ugwali fl-Istati Membri hija waħda mill-aktar oqsma problematiċi tad-Direttiva. Ir-Rapport iddikjara li l-ostakli ewlenin quddiem l-implimentazzjoni effettiva tal-prinċipju ta’ paga ugwali huma: in-nuqqas ta’ trasparenza fis-sistemi tal-pagi; in-nuqqas ta’ ċertezza legali fir-rigward tal-kunċett ta’ xogħol ta’ valur ugwali jew minħabba li t-terminu mhuwiex definit jew minħabba li ma hemmx kriterji ta’ valutazzjoni ċari biex jiġu mqabbla impjiegi differenti; kif ukoll hemm ostakoli proċedurali.
In-nuqqas ta’ implimentazzjoni adegwata tal-prinċipju ta’ paga ugwali jalimenta d-differenzi konsistentement kbar fil-pagi bejn is-sessi, li bħalissa hi ta’ 16.3 % madwar l-UE.
Id-diskriminazzjoni fil-pagi bejn is-sessi, jiġifieri li n-nisa jitħallsu anqas mill-irġiel għall-istess xogħol jew għal xogħol ta’ valur ugwali, hija waħda mill-fatturi importanti li jikkontribwixxu għad-diskrepanza globali fil-pagi bejn is-sessi, flimkien ma’ fatturi oħra bħal, pereżempju, is-segregazzjoni professjonali u vertikali.
F’Marzu 2014, il-Kummissjoni Ewropea adottat Rakkomandazzjoni dwar it-tisħiħ tal-prinċipju ta’ paga ugwali għall-irġiel u n-nisa permezz tat-trasparenza (“ir-Rakkomandazzjoni”).
Hija tipprovdi gwida li għandha l-għan li tgħin lill-Istati Membri jimplimentaw il-prinċipju ta’ paga ugwali b’mod aktar effettiv sabiex tkun miġġielda d-diskriminazzjoni fil-pagi u li tikkontribwixxi biex tiġi indirizzata d-differenza persistenti bejn il-pagi tal-irġiel u n-nisa billi tiffoka fuq, iżda ma tkunx esklussivament limitata għal, miżuri li jtejbu t-trasparenza fil-pagi.
L-Istati Membri ġew mistiedna jinnotifikaw lill-Kummissjoni bil-miżuri meħuda biex jimplimentaw ir-Rakkomandazzjoni sal-31 ta’ Diċembru 2015.
Dan ir-rapport huwa bbażat fil-biċċa l-kbira tiegħu fuq l-informazzjoni pprovduta minnhom.
Huwa jinkludi wkoll informazzjoni minn partijiet interessati ewlenin, b’mod partikolari l-Imsieħba Soċjali Ewropej
li ġew ikkonsultati dwar l-implimentazzjoni tar-Rakkomandazzjoni fuq livell nazzjonali f’Ottubru 2015.
Barra minn dan, dan ir-rapport huwa bbażat fuq informazzjoni dwar l-implimentazzjoni tar-Rakkomandazzjoni li waslet mingħand entitajiet tal-ugwaljanza nazzjonali stabbiliti taħt din id-Direttiva
, kif ukoll fuq informazzjoni pprovduta min-netwerk tal-Kummissjoni ta’ esperti legali fil-qasam tal-ugwaljanza ta’ bejn is-sessi.
Seminar ta’ tagħlim reċiproku dwar id-differenza bejn il-pagi tal-irġiel u n-nisa, li sar fl-20 u l-21 ta’ Ottubru 2016, ipprovda iżjed għarfien profond dwar l-implimentazzjoni prattika tar-Rakkomandazzjoni u l-impatt tal-miżuri nazzjonali fil-ġlieda kontra d-diskriminazzjoni fil-pagi u d-differenza bejn il-pagi tal-irġiel u n-nisa, inklużi miżuri dwar it-trasparenza fil-pagi.
It-tnaqqis tad-diskrepanza fil-pagi bejn in-nisa u l-irġiel huwa prijorità importanti għall-Kummissjoni, kif stabbilit fil-pjan ta’ Impenn Strateġiku għall-ugwaljanza bejn is-sessi 2016–2019.
Bħala waħda mill-azzjonijiet ewlenin biex jintlaħaq dan l-objettiv, l-Impenn Strateġiku jsemmi t-titjib tal-implimentazzjoni u l-infurzar tal-prinċipju ta’ paga ugwali bit-twettiq ta’ valutazzjoni tad-Direttiva u billi jittieħdu f’konsiderazzjoni, fost affarijiet oħra, it-titjib tat-trasparenza fil-pagi abbażi ta’ rapport dwar il-miżuri tal-Istati Membri biex jimplimentaw ir-Rakkomandazzjoni.
Il-Kummissjoni tinnota li t-trasparenza fil-pagi mhijiex l-unika miżura li tista’ tikkontribwixxi biex tnaqqas id-differenza bejn il-pagi tal-irġiel u n-nisa. Sabiex tiġi affrontata d-differenza fil-pagi bejn is-sessi mill-angoli kollha possibbli, dan ir-rapport huwa parti minn Pjan ta’ Azzjoni usa’ li fih il-Kummissjoni tikkonverti l-impenn tagħha li tindirizza d-differenza fil-pagi bejn in-nisa u l-irġiel. Il-Pjan ta’ Azzjoni jinkludi firxa wiesgħa u koerenti ta’ attivitajiet sabiex tiġi affrontata d-differenza fil-pagi bejn is-sessi, inizjattivi kemm leġiżlattivi kif ukoll mhux leġiżlattivi, li jirrinforzaw lil xulxin reċiprokament.
Barra minn hekk, il-Kummissjoni żżomm għajnejha fuq is-sitwazzjoni ekonomika fl-Istati Membri permezz tal-eżerċizzju tas-Semestru Ewropew u tappoġġa x-xogħol tal-Istati Membri sabiex tiġi affrontata d-differenza fil-pagi bejn is-sessi, billi tirrakkomanda eventwalment lil xi Stat Membru sabiex jindirizza din il-kwistjoni speċifika jew xi wħud mill-kawżi fl-għeruq tagħha, bħan-nuqqas ta’ investiment f’faċilitajiet tal-kura tat-tfal jew id-diżinċentivi fiskali li ma jħallux lil persuni li huma t-tieni sors ta’ dħul – li l-aktar li jkunu huma nisa – milli jaħdmu jew jaħdmu aktar. Fl-2017, id-differenza bejn il-pagi tal-irġiel u n-nisa u l-problemi li jikkontribwixxu għaliha ġew indirizzati f’rapporti speċifiċi għall-pajjiżi ta’ disa’ Stati Membri.
F’Mejju 2017, il-Kummissjoni ħarġet rakkomandazzjonijiet speċifiċi għall-pajjiż b’enfasi fuq l-investiment f’faċilitajiet għall-kura tat-tfal, u d-diżinċentivi fiskali, kif ukoll miżuri oħra li jindirizzaw id-differenza bejn il-pagi tal-irġiel u n-nisa.
Dan ir-rapport jivvaluta l-implimentazzjoni mill-Istati Membri tal-miżuri proposti f’din ir-Rakkomandazzjoni u dwar l-effettività tal-applikazzjoni tagħhom.
2.L-implimentazzjoni ta’ miżuri dwar it-trasparenza fil-pagi fl-Istati Membri
It-trasparenza fil-pagi hija strumentali fl-applikazzjoni effettiva tal-prinċipju ta’ paga ugwali fil-prattika. Dan jixkef il-posibbiltà ta’ xi xaqliba abbażi tal-ġeneru, jew xi diskriminazzjoni, fl-istrutturi tal-pagi ta’ kumpanija jew industrija. Dan jista’ jippermetti lill-impjegati, lil min iħaddem jew lill-imsieħba soċjali biex jieħdu azzjoni xierqa. Għarfien ta’ livelli differenti ta’ pagi fi ħdan kumpanija waħda jista’ jagħmilha iżjed faċli għall-individwi li jikkontestaw diskriminazzjoni fil-paga miġjuba quddiem il-qrati nazzjonali.
Din ir-Rakkomandazzjoni tressaq sett ta’ miżuri speċifiċi biex jgħinu lill-Istati Membri u partijiet interessati oħra fit-tfassil ta’ approċċ imfassal b’mod speċifiku għat-titjib tat-trasparenza fil-pagi. L-erba’ miżuri ewlenin proposti relatati mat-trasparenza fil-pagi huma: id-dritt tal-individwi li jitolbu aktar informazzjoni dwar il-livell tal-pagi; ir-rappurtar fil-livell ta’ kumpanija; awditi tal-pagi; u paga ugwali indirizzata fin-negozjar kollettiv.
L-Istati Membri huma mħeġġa biex jimplimentaw il-miżuri l-aktar xierqa għaċ-ċirkustanzi speċifiċi tagħhom u jenħtieġ li jinkludu mill-inqas waħda minn dawn il-miżuri ewlenin.
Minkejja l-adozzjoni tar-Rakkomandazzjoni, huma biss ħdax-il Stat Membru li bħalissa għandhom leġiżlazzjoni dwar it-trasparenza fil-pagi
. Fost dawn l-Istati Membri, sitta biss minnhom jew adottaw miżuri ġodda ta’ trasparenza fil-pagi jew tejbu l-miżuri eżistenti wara l-adozzjoni tar-Rakkomandazzjoni.
Il-biċċa l-kbira minnhom inkludew waħda mill-erba’ miżuri ewlenin tar-Rakkomandazzjoni dwar it-trasparenza fil-pagi. Ħamsa minnhom daħħlu aktar minn waħda mill-miżuri ewlenin, bi Stat Membru wieħed biss li naqqax l-erba’ miżuri kollha fil-qafas legali nazzjonali tiegħu. Fi tliet Stati Membri,
qegħdin jitħejjew miżuri ġodda dwar it-trasparenza fil-pagi, bi wħud minnhom fl-istadji inzjali ta’ negozjar u oħrajn li waslu biex jiġu adottati mill-parlamenti nazzjonali.
2.1.Id-dritt tal-impjegati li jiksbu informazzjoni dwar il-livelli tal-pagi
Meta l-impjegati jkunu jistgħu jitolbu aktar informazzjoni dwar il-livell tal-pagi għal kategoriji ta’ impjegati li jagħmlu l-istess xogħol jew għal xogħol ta’ valur ugwali, maqsuma skont il-ġeneru, inklużi komponenti kumplimentari jew varjabbli bħalma huma pagamenti mhux fi flus u bonusijiet,
il-politika dwar il-pagi ta’ kumpanija jew organizzazzjoni ssir aktar trasparenti. Tali informazzjoni hija siewja għal min iħaddem, għat-trejdjunjins u għall-ħaddiema, u tgħinhom jidentifikaw differenzi mhux spjegati bejn il-pagi għall-irġiel u n-nisa u biex dawn jiġu riżolti permezz tad-djalogu. Dan jagħmilha wkoll aktar faċli għall-impjegati biex ipoġġu l-livelli tas-salarju tagħhom f’perspettiva fi ħdan il-kategorija tagħhom stess u bi tqabbil ma’ kategoriji simili. F’każi ta’ diskriminazzjoni, dan itejjeb il-prospetti ta’ suċċess ta’ azzjoni legali quddiem il-qrati nazzjonali u konsegwentament ikollu effett dissważiv.
Dritt għal informazzjoni dwar il-pagi għal impjegati individwali
F’każi ta’ allegazzjonijiet ta’ diskriminazzjoni fil-paga, fi tliet Stati Membri min iħaddem huwa obbligat jipprovdi informazzjoni fuq il-paga lill-impjegat. Fil-Finlandja u fl-Irlanda, l-individwi għandhom tali dritt għall-informazzjoni, iżda min iħaddem irid ikollu l-kunsens tal-individwi li dwaru tiġi żvelata d-data dwar il-paga. Fl-Irlanda, id-dritt ta’ informazzjoni jista’ jintalab abbażi ta’ kwestjonarju standardizzat li fih l-ilmentatur jiddikjara li kien hemm ksur tal-prinċipju ta’ paga ugwali.
Fil-Ġermanja, liġi reċenti daħħlet id-dritt individwali għall-informazzjoni għall-impjegati ta’ kumpaniji b’iktar minn 200 impjegat.
Fl-Estonja u l-Portugall, għalkemm hemm drittijiet nazzjonali għall-informazzjoni għall-impjegati, li jobbligaw lil min iħaddem jinforma lill-impjegati dwar il-kundizzjonijiet ewlenin tal-kuntratt ta’ impjieg tagħhom, inkluż l-ammont ta’ paga, l-informazzjoni dwar pagi li tista’ tinkiseb hija limitata għar-remunerazzjoni tal-individwu stess.
Dritt għal informazzjoni dwar il-pagi għal ċerti korpi
F’xi Stati Membri, ir-rappreżentanti tal-impjegati u t-trejdjunjins għandhom id-dritt li jaċċessaw l-informazzjoni dwar il-paga u t-termini u l-kundizzjonijiet tal-impjieg ta’ grupp ta’ impjegati, jew ta’ impjegat individwali bil-kunsens tagħhom.
F’bosta Stati Membri,
hemm korpi ta’ ugwaljanza li huma intitolati li jitolbu informazzjoni dwar il-pagi, f’każijiet fejn ikun hemm allegazzjoni ta’ diskriminazzjoni fil-paga.
Miżuri oħra relatati
F’ċerti Stati Membri, il-paga minima legali trid tiġi indikata meta jiġu reklamati impjiegi.
Fir-Renju Unit, huwa kontra l-liġi li min iħaddem ma jħallix lill-impjegati tiegħu — permezz ta’ xi klawżoli kuntrattwali jew ta’ penali — jiżvelaw jew li jippruvaw jiżvelaw il-paga tagħhom lil ħaddieħor, jekk l-iskop ta’ dan l-iżvelar ikun biex tiġi stabbilita diskriminazzjoni fil-pagi bejn il-ġeneri.
2.2.Rappurtar dwar il-paga fil-livell tal-kumpaniji
Ir-Rakkomandazzjoni tħeġġeġ lill-Istati Membri biex jistabbilixxu miżuri li jiżguraw li min iħaddem, f’kumpaniji u organizzazzjonijiet li jkollhom mill-inqas 50 impjegat, jinforma regolarment lill-impjegati, lir-rappreżentanti tal-ħaddiema u lill-imsieħba soċjali bir-remunerazzjoni medja skont il-kategorija ta’ impjegat jew pożizzjoni, imqassma skont il-ġeneru.
Rappurtar bħal dan itejjeb it-trasparenza tal-pagi u jikkostitwixxi bażi affidabbli għal diskussjonijiet dwar miżuri għall-implimentazzjoni tal-prinċipju ta’ pagi ugwali.
F’xi Stati Membri, dawk li jħaddmu huma obbligati li jipprovdu regolarment rapport bil-miktub dwar is-sitwazzjoni tal-ugwaljanza bejn il-ġeneri fil-kumpanija jew organizzazzjoni tagħhom, inklużi dettalji dwar il-pagi.
Pereżempju, fid-Danimarka, min iħaddem mill-inqas 35 impjegat irid kull sena jiġbor statistika dwar il-pagi, imqassma skont il-ġeneru, għal gruppi ta’ mill-anqas 10 persuni minn kull ġeneru, li jkollhom l-istess pożizzjoni. Din l-informazzjoni tiġi pprovduta lill-impjegati permezz tar-rappreżentanti tagħhom.
Fi Franza, il-kumpaniji jridu jipprovdu data dwar paga ugwali lir-rappreżentanti tal-persunal f’rapporti annwali, b’mod partikolari fir-“rapport dwar l-ugwaljanza bejn il-ġeneri” li huwa obbligatorju għal kumpaniji li jħaddmu mill-anqas 300 impjegat, u fir-“rapport dwar is-sitwazzjoni ekonomika tal-kumpanija”, li huwa obbligatorju għal kumpaniji li jħaddmu mill-anqas 50 impjegat. Dawn ir-rapporti għandhom jinkludu ċ-ċifri tal-pagi mqassma skont il-ġeneru u skont il-kategorija professjonali.
Fil-Belġju, kull sentejn il-kumpaniji għandhom iħejju rapporti dwar id-differenzi fil-pagi fil-livell tal-kumpaniji. Kumpaniji li jħaddmu mill-anqas 50 impjegat għandhom iwettqu analiżi dettaljata tal-istruttura tal-pagi tal-kumpanija tagħhom kull sentejn, skont il-ġeneru kif ukoll l-istatus, il-pożizzjoni, l-anzjanità u l-livell ta’ kwalifika jew l-edukazzjoni. Barra minn hekk, il-Belġju jobbliga lill-kumpaniji biex iħejju analiżi abbażi tal-ġeneru f’diversi sezzjonijiet tar-rapporti soċjali annwali tagħhom. Fl-Italja, il-kumpaniji b’aktar minn 100 impjegat għandhom jirrapportaw informazzjoni relatata mal-ugwaljanza tas-sessi, b’referenza espliċita għal-livelli tal-pagi, kull sentejn.
Fil-Ġermanja, liġi reċenti daħħlet regola ġenerali ta’ obbligu tar-rappurtar għal kumpaniji kbar b’rabta mal-avvanz fil-karriera tan-nisa u l-paga ugwali. Fir-Renju Unit, dawk li jħaddmu 250 impjegat jew iktar għandhom jippubblikaw ċerta informazzjoni dwar id-differenzi fil-pagi bejn in-nisa u l-irġiel, b’mod partikolari r-rata ta’ paga fis-siegħa, il-bonusijiet u d-distribuzzjoni ġenerali tal-paga. Fil-Litwanja, liġi li daħlet fl-2017 tobbliga lill-kumpaniji b’aktar minn 20 impjegat li kull sena jipprovdu lill-kunsilli tax-xogħol u lit-trejdjunjins b’data anonima dwar il-paga medja tal-impjegati tagħhom, bl-esklużjoni tal-maniġers, skont il-grupp professjonali u l-ġeneru. Barra minn hekk, il-kumpaniji b’aktar minn 50 impjegat għandhom iħejju rapport dwar ir-remunerazzjoni li jispeċifika r-remunerazzjoni tal-impjegati skont il-kategorija u skont il-pożizzjoni u l-kwalifiki tagħhom, u għandhom jagħmlu din l-informazzjoni disponibbli għall-impjegati.
Bosta Stati Membri għandhom xi obbligu aktar estensiv għal min iħaddem li b’mod regolari jivvaluta l-prattiki tal-pagi u d-differenzi fil-pagi fil-kuntest usa’ tal-konformità tagħhom ma’ obbligu li jfasslu pjan ta’ azzjoni għal pagi ugwali.
Tali obbligi jinkludu r-rappurtar mill-kumpaniji dwar ir-remunerazzjoni medja ta’ kategoriji differenti ta’ impjegati jew pożizzjonijiet iżda jmorru lil hinn mir-rappurtar billi jitlobu wkoll analiżi aktar profonda tal-istrutturi tal-pagi kif ukoll azzjoni ta’ segwitu biex jiġu indirizzati inugwaljanzi fil-pagi. Tali miżuri nazzjonali huma diskussi f’aktar dettall fit-taqsima dwar l-awditu tal-pagi ta’ dan ir-rapport.
Bosta Stati Membri għandhom obbligi ta’ rappurtar li japplikaw esklussivament għas-settur pubbliku.
F’żewġ Stati Membri,
qegħdin isiru diskussjonijiet dwar miżuri leġiżlattivi ġodda li jipprovdu għal obbligi ta’ rappurtar mill-kumpaniji.
2.3.Awditi tal-pagi fil-livell tal-kumpanija
Ir-Rakkomandazzjoni tinkoraġġixxi lill-Istati Membri biex jieħdu l-miżuri xierqa biex jiżguraw li l-awditi tal-pagi jitwettqu f’kumpaniji u organizzazzjonijiet b’mill-inqas 250 impjegat. Jenħtieġ li dawn l-awditi jinkludu analiżi tal-proporzjon tan-nisa u l-irġiel f’kull kategorija ta’ impjegati jew pożizzjoni, analiżi tas-sistema ta’ evalwazzjoni u klassifikazzjoni tax-xogħol użata u informazzjoni ddettaljata dwar il-pagi u d-differenzjali tal-pagi abbażi tal-ġeneru. Huma għandhom ikunu disponibbli għar-rappreżentanti tal-ħaddiema u għall-imsieħba soċjali fuq talba.
Bl-awditi tal-pagi jista’ jsir eħfef li ssir l-analiżi tal-aspetti marbutin mal-ugwaljanza bejn il-ġeneri fir-rigward tal-paga, biex jintlaħqu konklużjonijiet dwar l-applikazzjoni tal-prinċipju ta’ paga ugwali, u biex jiġu identifikati għażliet possibbli biex jiġu indirizzati l-problemi identifikati. Dawn jistgħu jkunu l-bażi ta’ diskussjoni bejn min iħaddem u r-rappreżentanti tal-ħaddiema dwar kif għandha tkun eliminata d-diskriminazzjoni bejn il-ġeneri fil-pagi.
Ir-rapporti dwar il-pagi ta’ spiss jintużaw bħala bażi għal analiżi aktar bir-reqqa li tmur ferm lil hinn milli tipprovdi ċifri statistiċi u tibni fuq informazzjoni fattwali dwar l-istrutturi tal-pagi. Bħala tali, ir-rapporti dwar il-pagi jistgħu jkunu ta’ kontribut għal azzjonijiet ta’ segwitu, bħalma huma pjanijiet ta’ azzjoni biex jiġu indirizzati l-inugwaljanzi identifikati fil-pagi bejn il-ġeneri.
Pereżempju, fi Franza, persuni privati li jimpjegaw iktar minn 50 impjegat huma obbligati jipproduċu rapporti annwali li fihom għandhom jinkludu ċifri maqsumin skont il-ġeneru u skont il-kategorija okkupazzjonali li jirrigwardaw il-paga reali. Barra minn hekk, fuq il-bażi tal-informazzjoni miġbura, tkun trid issir analiżi tas-sitwazzjoni tan-nisa u l-irġiel għal kull kategorija professjonali fil-kumpanija fejn jidħlu sistemi ta’ klassifikazzjoni tal-impjiegi u d-differenzjali tal-pagi. Il-ftehimiet kollettivi u l-pjanijiet ta’ azzjoni unilaterali jridu jistabbilixxu miri ta’ ugwaljanza bejn il-ġeneri, kif ukoll miżuri speċifiċi biex dawn jintlaħqu.
Fl-Iżvezja, dawk li jħaddmu mill-anqas 25 impjegat huma obbligati li jwettqu stħarriġ dwar il-pagi kull tliet snin, li jivvalutaw il-prattiki tal-pagi u d-differenza bejn il-pagi tal-irġiel u n-nisa fil-kumpanija. Abbażi ta’ dan, huma għandhom ifasslu pjan ta’ azzjoni biex jirrimedjaw u jimpedixxu differenzi inġusti bejn is-sessi fejn jidħlu pagi u kundizzjonijiet oħra tal-impjieg. Fil-Finlandja, kumpaniji bi 30 impjegat jew iktar għandhom jippreparaw pjani ta’ ugwaljanza, inkluż stħarriġ dwar il-pagi bil-għan li jiġi stabbilit jekk ikunx hemm differenzi fil-pagi abbażi ta’ ġeneru fuq il-post tax-xogħol; il-pjan ta’ ugwaljanza għandu jipprovdi suġġerimenti dwar kif jistgħu jitneħħew differenzi mhux ġustifikati. Fil-Ġermanja, il-kumpaniji b’aktar minn 500 impjegat ikollhom iwettqu awditi tal-pagi.
Fir-Renju Unit, il-qrati industrijali jistgħu jordnaw lil min iħaddem biex iwettaq awditi dwar pagi ugwali f’każijiet fejn xi individwu jressaq b’suċċess rikors quddiem tribunal rigward il-liġijiet dwar paga ugwali.
Fid-Danimarka, min iħaddem għandu l-għażla li jistabbilixxi b’mod voluntarju analiżi dwar l-ugwaljanza fil-pagi jew li jagħmel rapporti dwar l-istatistika dwar il-pagi.
Fl-Estonja u fl-Italja qegħdin isiru diskussjonijiet dwar miżuri ġodda f’dan il-qasam. Pereżempju, fl-Estonja, il-gvern għandu l-ħsieb li jipproponi l-introduzzjoni ta’ obbligu legali biex isiru awditi tal-pagi minn żmien għal żmien fis-settur pubbliku u biex jitħejjew pjanijiet ta’ azzjoni dwar l-ugwaljanza bejn il-ġeneri, abbażi tar-riżultati.
2.4.Il-paga ugwali, inkluż l-awditi tal-paga, isiru parti mill-proċess tan-negozjar kollettiv
L-inkoraġġiment jew l-obbligu biex l-imsieħba soċjali jiddiskutu l-pagi ugwali fin-negozjar kollettiv huwa mod ieħor kif tiżdied it-trasparenza fil-pagi u kif jiġu indirizzati d-differenzi bejn il-pagi tal-irġiel u n-nisa. Ir-Rakkomandazzjoni għalhekk tinkoraġġixxi lill-Istati Membri biex jiżguraw li l-kwistjoni ta’ paga ugwali, inkluż l-awditi tal-paga, tkun diskussa fil-livell xieraq waqt in-negozjar kollettiv.
L-inklużjoni ta’ paga ugwali fil-ftehim kollettiv huwa appoġġat bis-sħiħ mit-trejnunjons.
Ħames Stati Membri
għandhom miżuri leġiżlattivi biex jiżguraw li l-kwistjoni ta’ paga ugwali tkun parti mill-proċess tan-negozjar kollettiv.
Fil-Belġju, ftehimiet transindustrijali, iffirmati mill-maniġment u mir-rappreżentanti tal-impjegati kull sentejn, għandhom jinkludu miżuri mmirati biex inaqqsu d-differenza bejn il-pagi tal-irġiel u n-nisa, prinċipalment billi s-sistemi ta’ klassifikazzjoni tal-impjiegi ssir newtrali fejn jidħol ġeneru. Fil-livell settorjali, il-liġi tagħmilha wkoll obbligatorja li jiġu nnegozjati miżuri li jkollhom l-għan li titnaqqas id-differenza bejn il-pagi tal-irġiel u n-nisa matul in-negozjar kollettiv. Fi Franza, il-kumpaniji għandhom jinkludu l-ugwaljanza bejn il-ġeneri fin-negozjati kollettivi. L-individwi privati li jimpjegaw huma obbligati li jinnegozjaw miri ta’ pagi ugwali għall-irġiel u n-nisa fil-livell ta’ fergħa kull tliet snin u fil-livell ta’ kumpanija kull sena. L-implimentazzjoni ta’ dawn il-miżuri tiġi sorveljata mill-Uffiċjal Nazzjonali dwar in-Negozjar Kollettiv (CNNC). Il-liġi Żvediża tistipula li min iħaddem u l-impjegati għandhom jikkoperaw sabiex jipprevjenu u jindirizzaw id-differenzi fil-paga. Sa mill-2007, meta l-partijiet soċjali fil-livell federali nnegozjaw oqfsa speċifiċi tal-pagi għan-nisa, id-differenza bejn il-pagi tal-irġiel u n-nisa kienet kwistjoni kruċjali matul kull sessjoni ta’ negozjar.
Tliet Stati Membri oħra
jipprovdu għal miżuri volontarji li jħeġġu l-inklużjoni ta’ pagi ugwali fil-ftehim kollettiv. Dawn il-miżuri jinkludu l-pubblikazzjoni ta’ linji gwida għan-negozjar kollettiv u l-provvediment ta’ taħriġ dwar l-ugwaljanza bejn il-ġeneri lill-imsieħba soċjali.
3.L-implimentazzjoni ta’ dispożizzjonijiet oħra dwar paga ugwali pprovduti fir-rakkomandazzjoni
Ir-Rakkomandazzjoni tipprovdi għal diversi miżuri oħra li wkoll jikkontribwixxu biex titjieb l-ugwaljanza fil-pagi lil hinn mill-qasam strett ta’ aktar trasparenza fil-pagi
. Din it-taqsima tipprovdi informazzjoni dwar l-implimentazzjoni, kif inhi llum, ta’ wħud minn dawn il-miżuri fl-Istati Membri.
Statistiċi aħjar
Diversi Stati Membri rrapportaw li l-uffiċċji nazzjonali tal-istatistika tagħhom jipprovdu data komprensiva dwar id-diskrepanza fil-pagi bejn in-nisa u l-irġiel fuq bażi annwali.
Fi Spanja, l-obbligu li tiġi pprovduta statistika mqassma skont il-ġeneru hija prevista mil-liġi għall-awtoritajiet pubbliċi, filwaqt li l-leġiżlazzjoni Daniża tinkludi regoli dwar l-istatistika tal-pagi, imqassma skont il-ġeneru, applikabbli għall-kumpaniji.
Id-definizzjoni tal-kunċett ta’ “xogħol ta’ valur ugwali”
Ir-Rakkomandazzjoni tinkoraġġixxi lill-Istati Membri biex jiċċaraw il-kunċett ta’ “xogħol ta’ valur ugwali” fil-leġiżlazzjoni tagħhom.
Bosta Stati Membri
diġà jipprovdu definizzjoni tal-kunċett ta’ “xogħol ta’ valur ugwali” fil-leġiżlazzjoni tagħhom, bl-indikazzjoni ta’ qafas analitiku jew tal-aktar kriterji importanti biex jitqabbel il-valur ta’ impjiegi differenti. Fil-biċċa l-kbira ta’ dawn il-każijiet, f’konformità mal-ġurisprudenza tal-Qorti tal-Ġustizzja dwar il-kunċett ta’ paga ugwali,
il-leġiżlazzjoni telenka l-ħiliet, l-isforz, ir-responsabbiltà u l-kundizzjonijiet tax-xogħol bħala l-fatturi ewlenin għall-evalwazzjoni tal-valur tax-xogħol.
Żewġ Stati Membri infurmaw dwar il-pjanijiet tagħhom li jintroduċu definizzjoni espliċita ta’ “xogħol ta’ valur ugwali” fil-leġiżlazzjoni tagħhom.
Sistemi ta’ evalwazzjoni u klassifikazzjoni tax-xogħol
Ir-Rakkomandazzjoni tinkoraġġixxi lill-Istati Membri jippromwovu l-iżvilupp u l-użu ta’ sistemi ta’ evalwazzjoni u klassifikazzjoni tax-xogħol li jkunu newtrali fir-rigward tal-ġeneru.
F’xi Stati Membri, il-leġiżlazzjoni tipprovdi b’mod espliċitu għal rekwiżit li s-sistemi tal-evalwazzjoni u l-klassifikazzjoni tal-impjiegi użati biex tiġi ddeterminata l-paga għandhom ikunu newtrali fir-rigward tal-ġeneru.
Xi Stati Membri stabbilew għodod prattiċi, bħal gwidi u listi ta’ evalwazzjoni għal evalwazzjoni tal-impjiegi ħielsa minn kull preġudizzju fejn jidħol ġeneru, u programmi ta’ taħriġ għal min iħaddem; dawn għandhom l-għan li jappoġġjaw l-implimentazzjoni mill-kumpaniji ta’ sistemi ta’ evalwazzjoni u klassifikazzjoni tax-xogħol newtrali fir-rigward tal-ġeneru.
Monitoraġġ u infurzar
Ir-Rakkomandazzjoni tħeġġeġ lill-Istati Membri biex jiżguraw li l-implimentazzjoni tal-prinċipju ta’ paga ugwali tkun sorveljata b’mod konsistenti u li r-rimedji kollha disponibbli biex tiġi miġġielda d-diskriminazzjoni fil-pagi jiġu infurzati.
F’diversi Stati Membri, l-ispettorati tax-xogħol fil-livell reġjonali jew federali jżommu għajnejhom fuq id-diskriminazzjoni fil-pagi
. Bħala parti mill-amministrazzjoni nazzjonali, dawn l-ispettorati huma responsabbli għat-twettiq ta’ dawn l-ispezzjonijiet biex tiġi żgurata l-konformità mal-leġiżlazzjoni. F’xi pajjiżi, l-ispettorati tax-xogħol jistgħu jimponu pieni amministrattivi fil-każ ta’ nuqqas ta’ osservanza tal-prinċipju ta’ pagi ugwali.
Fil-Belġju, kumpanija b’mill-inqas 50 impjegat tista’ taħtar membru minn fost l-impjegati tagħha biex ikun medjatur li jagħti pariri dwar it-tfassil u l-implimentazzjoni tal-pjan li jkollu l-għan li jiżviluppa fil-kumpanija struttura tal-pagi newtrali fir-rigward tal-ġeneru, kif ukoll dwar rimedji possibbli biex ikunu indirizzati allegazzjonijiet ta’ diskriminazzjoni fil-pagi bejn il-ġeneri.
Żewġ Stati Membri rrappurtaw l-introduzzjoni ta’ sanzjonijiet speċifiċi li jiskoraġġixxu d-diskriminazzjoni. B’mod partikolari, Franza timponi piena ta’ massimu ta’ 1 % tas-salarji totali għal kumpaniji b’aktar minn ħamsin impjegat jekk ikun hemm ksur tal-obbligi ta’ paga ugwali. Fin-Netherlands, il-kumpaniji li jipprattikaw diskriminazzjoni huma esklużi minn proċeduri ta’ akkwist pubbliku u l-kuntratti eżistenti tagħhom mal-gvern jistgħu jiġu tterminati.
Korpi ta’ ugwaljanza
Skont id-dispożizzjonijiet tad-Direttiva 2006/54/KE, il-korpi ta’ ugwaljanza kollha jipprovdu assistenza indipendenti lill-vittmi ta’ diskriminazzjoni fil-pagi. Madankollu, il-kompiti u s-setgħat tal-korpi ta’ ugwaljanza jvarjaw ħafna bejn Stat Membru u ieħor. Huwa biss f’xi wħud mill-Istati Membri
li r-rwol tal-korpi ta’ ugwaljanza bejn il-ġeneri jinkludi r-rappreżentazzjoni/l-għoti ta’ għajnuna lill-individwi f’tali pretensjonijiet quddiem il-qrati nazzjonali. Fi wħud mill-Istati Membri,
li l-korpi ta’ ugwaljanza jkollhom kompetenzi wisgħin li jisimgħu u jiddeċiedu dwar ilmenti ta’ diskriminazzjoni bbażata fuq il-ġeneru. Jekk il-korpi tal-ugwaljanza bejn il-ġeneri jeżerċitaw aktar mill-poter li għandhom biex jipprovdu assistenza indipendenti lill-vittmi ta’ diskriminazzjoni, ikun aktar faċli għall-vittmi ta’ diskriminazzjoni li jkollhom aċċess għall-ġustizzja, u l-effettività tal-qafas legali għall-pagi ugwali jkun żgurat.
Ir-Rakkomandazzjoni għalhekk tinkoraġġixxi lill-Istati Membri biex jiżguraw li s-setgħat u l-mandati tal-korpi nazzjonali għall-ugwaljanza tagħhom ikopru kwistjonijiet relatati mad-diskriminazzjoni fil-pagi bejn il-ġeneri, inklużi obbligi ta’ trasparenza. Barra minn hekk, fejn applikabbli, l-Istati Membri huma mitluba li jagħtu lill-korpi għall-ugwaljanza d-dritt ta’ aċċess għall-informazzjoni dwar il-pagi u l-awditi tal-pagi.
F’xi Stati Membri,
il-mandat tal-korp tal-ugwaljanza jkopri wkoll l-obbligi ta’ trasparenza ta’ min iħaddem, relatati mad-diskriminazzjoni fil-pagi bejn il-ġeneri, b’mod partikolari d-dritt ta’ aċċess għal informazzjoni dwar il-pagi u l-awditi tal-pagi.
4.L-applikazzjoni prattika u l-impatt tal-miżuri ta’ trasparenza fil-pagi fil-livell nazzjonali
Ma hemm l-ebda analiżi ekonomika dettaljata disponibbli dwar l-impatt preċiż tal-introduzzjoni ta’ miżuri ta’ trasparenza fil-pagi fil-livell nazzjonali. Għalhekk huwa diffiċli li tiġi pprovduta data kwantifikabbli tal-impatti ta’ kull miżura konkreta.
Madankollu, ir-riċerka mwettqa fil-livell nazzjonali turi relazzjoni bejn tali miżuri u t-titjib tas-sitwazzjoni ġenerali fejn jidħlu paga ugwali u opportunitajiet ugwali bejn l-irġiel u n-nisa fl-impjiegi b’mod ġenerali. Xi eżempji li ispiraw ir-Rakkomandazzjoni tal-2014 juru xi ftit minn dawn l-impatti:
Eżempju wieħed marbut mal-kwistjoni tad-dritt tal-impjegati għall-informazzjoni dwar il-pagi huwa tal-Portugall fejn fl-2009 ddaħħal l-obbligu li min iħaddem jipprovdi lill-impjegati informazzjoni dwar is-salarji medji għal kull kategorija ta’ ħaddiema. Il-partijiet interessati jqisu dan bħala raġuni sinifikanti għad-diskrepanza relattivament żgħira bejn il-pagi tal-irġiel u n-nisa f’dak il-pajjiż.
Il-leġiżlazzjoni Żvediża dwar it-trattament ugwali daħħlet obbligu li min iħaddem, b’mod regolari, joħroġ rapport dwar is-sitwazzjoni fil-pagi, li tkun tinkludi analiżi tal-prattiki fejn jidħlu l-pagi u d-differenzi fil-pagi bejn il-ġeneri. Studju nazzjonali li sar fl-2011 jistqarr li, mill-miżuri differenti introdotti mill-gvern, l-obbligu tas-sorveljanza fuq il-pagi kellu l-akbar effett fuq il-ġlieda kontra d-diskriminazzjoni fil-pagi. Barra minn hekk, analiżi li saret mill-Ombudsman għall-Ugwaljanza tikkonkludi li bejn l-2006 u l-2008, madwar 6 000 persuna rċevew aġġustamenti tal-pagi b’segwitu ta’ dan l-obbligu.
Franza hija eżempju fejn il-paga ugwali qiegħda tiġi inkluża fin-negozjar kollettiv: il-leġiżlazzjoni li ddaħħlet fl-2006 tobbliga lil min iħaddem u lit-trejdunjons biex darba f’sena, jiddiskutu l-kwistjoni tad-differenza fil-pagi bejn l-irġiel u n-nisa matul in-negozjati tal-ftehim kollettiv fil-livell tal-kumpaniji kif ukoll fil-livell tas-setturi. Bħala riżultat tal-introduzzjoni ta’ dan l-obbligu, il-proporzjon ta’ ftehimiet kollettivi li jindirizzaw id-differenza bejn il-pagi tal-irġiel u n-nisa żdied b’mod sostanzjali (minn 3 % fl-2007 għal 10 % fl-2010). Barra minn hekk, ħafna minn dawn il-ftehimiet kollettivi jinkludu mhux biss dijanjożi qasira tas-sitwazzjoni, iżda jippreżentaw ukoll indikaturi speċifiċi u lista ta’ miżuri biex tiġi eliminata d-differenza bejn il-pagi tal-irġiel u n-nisa.
Dawn l-eżempji konkreti tal-implimentazzjoni f’konformità ma’ tlieta mill-erba’ miżuri ewlenin ta’ trasparenza ssuġġeriti fir-Rakkomandazzjoni u l-impatti tagħhom juru li l-miżuri taħt ir-Rakkomandazzjoni għandhom il-potenzjal li jkunu ta’ kontribut għal tnaqqis ġenerali fid-diskriminazzjoni fil-pagi kif ukoll fid-differenza bejn il-pagi tal-irġiel u n-nisa.
5.Il-konklużjonijiet u l-progress li jrid isir
Ir-Rakkomandazzjoni tipprovdi l-ewwel sett ta’ strumenti ta’ miżuri speċifiċi ta’ trasparenza fil-pagi li jimmiraw biex jiġu indirizzati inugwaljanzi fil-pagi u d-differenza persistenti bejn il-pagi tal-irġiel u n-nisa. Hija tinkoraġġixxi lill-Istati Membri jintroduċu mill-anqas waħda minn dawn il-miżuri li jsaħħu t-trasparenza biex jindirizzaw id-diskriminazzjoni fil-pagi. Huwa strument legali mhux vinkolanti li ma jimponi l-ebda obbligu formali fuq l-Istati Membri.
L-analiżi tat-tagħrif ipprovdut mill-Istati Membri u minn partijiet interessati oħra juri li għalkemm il-biċċa l-kbira tal-Istati Membri qegħdin iħaddmu xi miżuri mmirati lejn iż-żieda tat-trasparenza fil-pagi, f’terz tal-Istati Membri miżuri bħal dawn huma kompletament nieqsa.
Barra minn hekk, huma biss grupp żgħir ta’ Stati Membri li użaw din l-opportunità tar-Rakkomandazzjoni biex jirrevedu s-sistemi legali nazzjonali tagħhom biex isaħħu l-prinċipju ta’ paga ugwali bejn l-irġiel u n-nisa permezz tal-introduzzjoni ta’ miżuri ta’ trasparenza fil-pagi, kif issuġġerit fir-Rakkomandazzjoni jew b’xi mod ieħor.
L-ugwaljanza bejn il-ġeneri hija waħda mill-valuri fundamentali tal-Unjoni Ewropea, iżda għadha mhix realtà fuq il-post tax-xogħol. In-nisa fl-UE jaqilgħu kważi 16 % inqas fis-siegħa mill-irġiel, fis-setturi ekonomiċi kollha. Din id-diskrepanza fil-pagi bejn in-nisa u l-irġiel baqgħet stabbli f’dawn l-aħħar ħames snin u bir-ritmu attwali mhix se tgħib qabel il-bidu tal-millennju li jmiss. Studju tal-Istitut Ewropew għall-Ugwaljanza bejn il-Ġeneru jenfasizza li paga inugwali hija ta’ dannu mhux biss għan-nisa iżda hija kost għas-soċjetà b’mod ġenerali. Hemm rabta qawwija bejn id-differenza fil-pagi bejn il-ġeneri, il-faqar fost it-tfal u n-nuqqas ta’ ħiliet. Barra minn hekk, meta l-ħiliet tan-nisa fis-soċjetà ma jkunux qegħdin jintużaw bis-sħiħ, dan ukoll ikun ta’ dannu għall-ekonomija b’mod ġenerali.
Illum, minkejja l-prinċipju ta’ pagi ugwali, id-diskriminazzjoni għadha mifruxa fuq il-postijiet tax-xogħol: jista’ jkun li mara titħallas anqas minn raġel għall-istess xogħol eżatt, u xogħol li tipikament isir min-nisa jitħallas anqas minn xogħol tipikament magħmul mill-irġiel, anki meta dan ikun ta’ valur ugwali. Is-segretezza madwar il-livelli tal-pagi tagħmilha diffiċli biex jiġu identifikati każi ta’ diskriminazzjoni. Anki jekk il-biċċa l-kbira tal-Ewropej (69%) huma konxji mill-eżistenza ta’ differenza fil-pagi bejn is-sessi fl-ekonomija, l-impjegati ma jaħsbux li tali diskrepanza teżisti fi ħdan il-kumpanija tagħhom stess, u 26% biss tal-Ewropej huma konxji tal-garanzija legali ta’ paga ndaqs għal xogħol indaqs. Terz tal-impjegati ma jkunux jafu l-pagi tal-kollegi tagħhom, u din iċ-ċifra hija saħansitra iktar baxxa għan-nisa. Studju riċenti juri li l-Ewropej jappoġġjaw aktar trasparenza fuq ix-xogħol: kważi żewġ terzi tal-persuni jkunu favur il-pubblikazzjoni tal-pagi medji li wieħed jista’ jaqla’ fl-organizzazzjoni jew il-kumpanija li fiha jaħdmu, skont il-ġeneru u t-tip ta’ xogħol.
Sabiex tiġi indirizzata d-differenza bejn il-pagi tal-irġiel u n-nisa u l-prinċipju ta’ paga ugwali jsir realtà, il-Kummissjoni se tkompli tissorvelja l-konformità tal-Istati Membri mal-prinċipju ta’ paga ugwali, inkluż billi tinforza miżuri fejn ikun meħtieġ u fil-kuntest tal-eżerċizzju annwali tas-Semestru Ewropew.
Madankollu, in-nuqqas ta’ progress li jidher fil-ġlieda kontra d-diskriminazzjoni fil-pagi, kif ukoll id-diskrepanza persistenti fil-pagi bejn in-nisa u l-irġiel u s-segwitu limitat għar-Rakkomandazzjoni jindikaw li possibbilment hemm il-ħtieġa ta’ aktar miżuri mmirati fil-livell tal-UE. Li t-trasparenza fil-pagi ssir realtà tagħti liċ-ċittadini l-għodda biex ikunu konxji ta’ kwalunkwe diskriminazzjoni li jistgħu jsofru u ttejjeb l-applikazzjoni tal-prinċipju ta’ paga ugwali fil-prattika.