This document is an excerpt from the EUR-Lex website
Document 52016PC0620
Proposal for a COUNCIL DECISION on the Union position to be taken in the European Union/Switzerland GNSS Committee established by the Cooperation Agreement between the European Union and its Member States, of the one part, and the Swiss Confederation, of the other, on the European Satellite Navigation Programmes
Proposta għal DEĊIŻJONI TAL-KUNSILL dwar il-pożizzjoni tal-Unjoni li għandha tittieħed fil-Kumitat tal-GNSS bejn l-Unjoni Ewropea u l-Iżvizzera stabbilit permezz tal-Ftehim ta’ Kooperazzjoni bejn l-Unjoni Ewropea u l-Istati Membri tagħha, fuq naħa, u l-Konfederazzjoni Żvizzera, fuq in-naħa l-oħra, dwar il-Programmi Ewropej ta’ Navigazzjoni bis-Satellita
Proposta għal DEĊIŻJONI TAL-KUNSILL dwar il-pożizzjoni tal-Unjoni li għandha tittieħed fil-Kumitat tal-GNSS bejn l-Unjoni Ewropea u l-Iżvizzera stabbilit permezz tal-Ftehim ta’ Kooperazzjoni bejn l-Unjoni Ewropea u l-Istati Membri tagħha, fuq naħa, u l-Konfederazzjoni Żvizzera, fuq in-naħa l-oħra, dwar il-Programmi Ewropej ta’ Navigazzjoni bis-Satellita
COM/2016/0620 final - 2016/0300 (NLE)
IL-KUMMISSJONI EWROPEA
Brussell, 12.10.2016
COM(2016) 620 final
2016/0300(NLE)
Proposta għal
DEĊIŻJONI TAL-KUNSILL
dwar il-pożizzjoni tal-Unjoni li għandha tittieħed fil-Kumitat tal-GNSS bejn l-Unjoni Ewropea u l-Iżvizzera stabbilit permezz tal-Ftehim ta’ Kooperazzjoni bejn l-Unjoni Ewropea u l-Istati Membri tagħha, fuq naħa, u l-Konfederazzjoni Żvizzera, fuq in-naħa l-oħra, dwar il-Programmi Ewropej ta’ Navigazzjoni bis-Satellita
MEMORANDUM TA’ SPJEGAZZJONI
1.KUNTEST TAL-PROPOSTA
Il-proposta mehmuża tikkostitwixxi l-istrument legali għall-awtorizzazzjoni tal-pożizzjoni tal-Unjoni li għandha tittieħed fil-Kumitat tal-GNSS bejn l-Unjoni Ewropea u l-Iżvizzera (“Kumitat Konġunt”) stabbilit permezz tal-Ftehim ta’ Kooperazzjoni bejn l-Unjoni Ewropea u l-Istati Membri tagħha, fuq naħa, u l-Konfederazzjoni Żvizzera, fuq in-naħa l-oħra, dwar il-Programmi Ewropej ta’ Navigazzjoni bis-Satellita (il-“Ftehim”).
Fit-23 ta’ Settembru 2013, il-Kunsill adotta d-Deċiżjoni tiegħu dwar l-iffirmar, f’isem l-Unjoni Ewropea, u l-applikazzjoni proviżorja ta’ ċerti dispożizzjonijiet tal-Ftehim.
Wara, il-Ftehim ġie ffirmat fi Brussell fit-18 ta’ Diċembru 2013 fil-marġni tal-Kunsill tal-Unjoni Ewropea. F’konformità mal-Artikolu 27(2) tal-Ftehim, dan japplika b’mod proviżorju mill-1 ta’ Jannar 2014.
L-Iżvizzera rratifikat il-Ftehim fis-7 ta’ Lulju 2015, filwaqt li fil-livell tal-UE r-ratifika għadha għaddejja.
Il-Ftehim stabbilixxa l-Kumitat tal-GNSS bejn l-Unjoni Ewropea u l-Iżvizzera għall-ġestjoni u l-applikazzjoni xierqa ta’ dan il-Ftehim. Il-Kumitat Konġunt għandu jadotta r-regoli ta’ proċedura tiegħu.
2.RIŻULTATI TAN-NEGOZJATI
L-Artikolu 20(2) tal-Ftehim jipprevedi li l-Kumitat Konġunt għandu jadotta r-regoli ta’ proċedura tiegħu li għandhom jinkludu, fost l-oħrajn, id-dispożizzjonijiet għas-sejħa tal-laqgħat kif ukoll il-ħatra u l-mandat tal-president.
L-abbozz ta’ regoli mehmuż huwa r-riżultat tan-negozjati mal-Iżvizzera.
3.ELEMENTI ĠURIDIĊI TAL-PROPOSTA
Il-bażi ġuridika għall-awtorizzazzjoni tal-pożizzjoni tal-Unjoni li għandha tittieħed fil-Kumitat Konġunt stabbilit permezz tal-Ftehim ta’ Kooperazzjoni huwa l-Artikolu 172 flimkien mal-Artikolu 218(9) tat-Trattat dwar il-Funzjonament tal-Unjoni Ewropea.
Fid-dawl tan-negozjati msemmija hawn fuq, il-Kummissjoni Ewropea tipproponi li l-Kunsill jadotta d-Deċiżjoni li tawtorizza l-pożizzjoni tal-Unjoni li għandha tittieħed fil-Kumitat Konġunt fir-rigward tar-regoli ta’ proċedura tiegħu.
2016/0300 (NLE)
Proposta għal
DEĊIŻJONI TAL-KUNSILL
dwar il-pożizzjoni tal-Unjoni li għandha tittieħed fil-Kumitat tal-GNSS bejn l-Unjoni Ewropea u l-Iżvizzera stabbilit permezz tal-Ftehim ta’ Kooperazzjoni bejn l-Unjoni Ewropea u l-Istati Membri tagħha, fuq naħa, u l-Konfederazzjoni Żvizzera, fuq in-naħa l-oħra, dwar il-Programmi Ewropej ta’ Navigazzjoni bis-Satellita
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-ewwel paragrafu tal-Artikolu 172 flimkien mal-Artikolu 218(9) tiegħu,
Wara li kkunsidra l-proposta mill-Kummissjoni Ewropea,
Billi:
(1)Il-Ftehim ta’ Kooperazzjoni bejn l-Unjoni Ewropea u l-Istati Membri tagħha, fuq naħa, u l-Konfederazzjoni Żvizzera, fuq in-naħa l-oħra, dwar il-Programmi Ewropej ta’ Navigazzjoni bis-Satellita (“il-Ftehim”) japplika b’mod proviżorju mill-1 ta’ Jannar 2014.
(2)L-Artikolu 20 tal-Ftehim jistabbilixxi Kumitat Konġunt magħruf bħala l-“Kumitat tal-GNSS bejn l-Unjoni Ewropea u l-Iżvizzera” (“il-Kumitat Konġunt”) u jipprevedi li dan il-Kumitat għandu jistabbilixxi r-regoli ta’ proċedura tiegħu.
(3)Għalhekk, huwa xieraq li tiġi stabbilita l-pożizzjoni tal-Unjoni fir-rigward tar-regoli ta' proċedura li għandhom jiġu adottati mill-Kumitat Konġunt.
ADOTTA DIN ID-DEĊIŻJONI:
Artikolu 1
1.Il-pożizzjoni li għandha tittieħed mill-Unjoni fil-Kumitat Konġunt stabbilit permezz tal-Ftehim ta’ Kooperazzjoni bejn l-Unjoni Ewropea u l-Istati Membri tagħha, fuq naħa, u l-Konfederazzjoni Żvizzera, fuq in-naħa l-oħra, dwar il-Programmi Ewropej ta’ Navigazzjoni bis-Satellita fir-rigward tal-adozzjoni tar-regoli ta’ proċedura tal-Kumitat Konġunt għandha tkun ibbażata fuq l-abbozz tad-Deċiżjoni mehmuż ma’ din id-Deċiżjoni.
2.Ir-rappreżentanti tal-Unjoni fil-Kumitat Konġunt jistgħu jaqblu dwar bidliet żgħar fl-abbozz tad-Deċiżjoni mingħajr ebda deċiżjoni oħra tal-Kunsill.
Artikolu 2
Din id-Deċiżjoni għandha tidħol fis-seħħ fil-jum tal-adozzjoni tagħha.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 12.10.2016
COM(2016) 620 final
ANNESS
tal-
Proposta għal DEĊIŻJONI TAL-KUNSILL
dwar il-pożizzjoni tal-Unjoni li għandha tittieħed fil-Kumitat tal-GNSS bejn l-Unjoni Ewropea u l-Iżvizzera stabbilit permezz tal-Ftehim ta’ Kooperazzjoni bejn l-Unjoni Ewropea u l-Istati Membri tagħha, fuq naħa, u l-Konfederazzjoni Żvizzera, fuq in-naħa l-oħra, dwar il-Programmi Ewropej ta’ Navigazzjoni bis-Satellita
Abbozz ta'
DEĊIŻJONI 1/2016 TAL-KUMITAT TAL-GNSS BEJN L-UNJONI EWROPEA U L-IŻVIZZERA
(IL-KUMITAT KONĠUNT)
ta' XXX 2016
li tadotta r-regoli ta' proċedura tiegħu
ANNESS
tal-
Proposta għal DEĊIŻJONI TAL-KUNSILL
dwar il-pożizzjoni tal-Unjoni li għandha tittieħed fil-Kumitat tal-GNSS bejn l-Unjoni Ewropea u l-Iżvizzera stabbilit permezz tal-Ftehim ta’ Kooperazzjoni bejn l-Unjoni Ewropea u l-Istati Membri tagħha, fuq naħa, u l-Konfederazzjoni Żvizzera, fuq in-naħa l-oħra, dwar il-Programmi Ewropej ta’ Navigazzjoni bis-Satellita
Abbozz ta'
DEĊIŻJONI 1/2016 TAL-KUMITAT TAL-GNSS BEJN L-UNJONI EWROPEA U L-IŻVIZZERA
(IL-KUMITAT KONĠUNT)
ta' XXX 2016
li tadotta r-regoli ta' proċedura tiegħu
IL-KUMITAT KONĠUNT,
Wara li kkunsidra l-Ftehim ta’ Kooperazzjoni bejn l-Unjoni Ewropea u l-Istati Membri tagħha, fuq naħa, u l-Konfederazzjoni Żvizzera (minn hawn ’il quddiem imsejħa “l-Iżvizzera”), fuq in-naħa l-oħra, dwar il-programmi Ewropej ta’ navigazzjoni bis-satellita (minn hawn ’il quddiem imsejjaħ “il-Ftehim”), u b’mod partikolari l-Artikolu 20 tiegħu,
Billi:
(1)Il-Ftehim japplika b’mod proviżorju bejn l-Iżvizzera u l-Unjoni Ewropea mill-1 ta’ Jannar 2014 fir-rigward tal-elementi li jaqgħu taħt il-kompetenza tal-Unjoni Ewropea.
(2)F'konformità mal-Artikolu 20(2) tal-Ftehim, il-Kumitat Konġunt għandu jistabbilixxi r-regoli ta’ proċedura tiegħu.
(3)Il-Kumitat Konġunt jista’ jiddeċiedi li jistabbilixxi gruppi ta’ ħidma jew gruppi ta’ esperti sabiex jassistuh fit-twettiq tal-kompiti tiegħu.
(4)F’konformità mal-Artikolu 27(2) tal-Ftehim, matul l-applikazzjoni proviżorja tal-Ftehim il-Kumitat Konġunt għandu jkun magħmul minn delegati tal-Iżvizzera u tal-Unjoni Ewropea.
IDDEĊIEDA KIF ĠEJ:
Artikolu Uniku
Ir-regoli ta’ proċedura tal-Kumitat Konġunt mehmuża ma' din id-Deċiżjoni huma b’dan adottati.
Magħmul bl-Ingliż fi Brussell u f'Berna, XXXXX 2016 u XXXX 2016, rispettivament
Għall-Kumitat Konġunt
Il-President Is-Segretarju għall-UE Is-Segretarju għall-Iżvizzera
Regoli ta' proċedura
tal-
KUMITAT TAL-GNSS BEJN L-UNJONI EWROPEA U L-IŻVIZZERA (IL-KUMITAT KONĠUNT)
Artikolu 1
Kompożizzjoni tal-Kumitat Konġunt
1. Il-Kumitat Konġunt għandu jkun magħmul, għall-Unjoni Ewropea u l-Istati Membri tagħha, fuq naħa, minn delegati tal-Kummissjoni Ewropea (minn hawn ’il quddiem imsejħa “Kummissjoni”) u tal-gvernijiet tal-Istati Membri tal-Unjoni Ewropea, u għall-Iżvizzera, fuq in-naħa l-oħra, minn delegati tal-Gvern Federali Żvizzeru. Iż-żewġ naħat, minn hawn ’il quddiem, għandhom jissejħu b'mod individwali bħala “l-Parti” jew b’mod konġunt bħala “l-Partijiet”.
2. Id-delegati tal-Partijiet jistgħu jkunu akkumpanjati minn uffiċjali oħra.
3. Matul l-applikazzjoni proviżorja tal-Ftehim il-Kumitat Konġunt għandu jkun magħmul minn delegati tal-Iżvizzera u tal-Unjoni Ewropea, rappreżentata mill-Kummissjoni.
Artikolu 2
Presidenza
1. Il-Partijiet għandhom iżommu l-Presidenza tal-Kumitat Konġunt b'mod alternattiv, għal perjodu ta' sena kalendarja.
Il-Presidenza għandha tinżamm mill-Iżvizzera matul l-ewwel sena mid-dħul fis-seħħ tal-Ftehim.
2.Il-Parti li jkollha l-Presidenza għandha taħtar il-persuna jew id-delegat tagħha bħala President tal-Kumitat Konġunt.
3. Il-President imexxi x-xogħol tal-Kumitat Konġunt.
4. Matul l-applikazzjoni proviżorja tal-Ftehim, id-dispożizzjonijiet tal-Presidenza għandhom japplikaw mutatis mutandis.
Artikolu 3
Osservaturi u esperti
Il-Kumitat Konġunt jista’ jiddeċiedi, bi ftehim komuni bejn il-Partijiet, li jistieden persuni fil-kapaċità tagħhom ta’ esperti jew rappreżentanti ta’ korpi oħra biex jattendu l-laqgħa tal-Kumitat Konġunt bħala osservaturi sabiex jipprovdu informazzjoni dwar suġġetti speċifiċi. Il-Kumitat Konġunt għandu jaqbel dwar it-termini u l-kundizzjonijiet li bihom dawn l-osservaturi jkunu jistgħu jattendu l-laqgħat.
Artikolu 4
Segretarjat
1.Uffiċjal tal-Kummissjoni Ewropea u uffiċjal tal-Gvern tal-Iżvizzera għandhom jaġixxu b’mod konġunt bħala Segretarji tal-Kumitat Konġunt.
2.Is-Segretarjat għandu jkun responsabbli għall-komunikazzjoni bejn il-Partijiet, inkluża t-trażmissjoni ta’ dokumenti.
3. Il-funzjonijiet tas-segretarjat jaqgħu taħt ir-responsabbiltà tal-Parti li jkollha l-Presidenza.
Artikolu 5
Laqgħat tal-Kumitat Konġunt
1.Il-Kumitat Konġunt għandu jiltaqa’ kif u meta meħtieġ, fil-prinċipju darba fis-sena.
Il-President għandu jsejjaħ, wara konsultazzjoni mal-Partijiet, il-laqgħa tal-Kumitat Konġunt f’ħin u f’post miftiehma b’mod reċiproku. Jekk il-Partijiet jaqblu li jsir hekk jistgħu jsiru wkoll konferenzi telefoniċi u vidjokonferenzi.
Il-President għandu jsejjaħ sessjoni speċjali tal-Kumitat Konġunt kemm fuq talba tal-Unjoni Ewropea kif ukoll tal-Iżvizzera.
Il-Kumitat Konġunt għandu jiltaqa’ fi żmien 15-il jum kalendarju minn meta ssir talba skont l-Artikolu 22(2) tal-Ftehim.
2.Il-Kumitat Konġunt għandu jiltaqa’ fi Brussell jew fl-Iżvizzera, skont il-Parti li jkollha l-Presidenza, sakemm il-Partijiet ma jiftehmux mod ieħor.
3.Il-President għandu jibgħat l-avviż tal-laqgħa, flimkien mal-abbozz tal-aġenda u d-dokumenti għal-laqgħa, lid-delegati tal-Partijiet sa mhux aktar tard minn 21 jum kalendarju qabel il-laqgħa. Id-dokumenti għal-laqgħat imsejħa f’konformità mal-Artikolu 22(2) tal-Ftehim, għandhom jintbagħtu sa mhux aktar tard minn 7 ijiem kalendarji qabel il-laqgħa.
4.Il-President jista', bi ftehim mal-Partijiet, iqassar il-limiti ta' żmien stipulati fil-paragrafu 3 sabiex jitqiesu l-ħtiġijiet ta' kwistjoni partikolari.
5. Mill-inqas 7 ijiem kalendarji qabel kull laqgħa, il-President għandu jiġi infurmat dwar il-kompożizzjoni tad-delegazzjoni ta’ kull Parti.
6.Il-laqgħat tal-Kumitat Konġunt ma għandhomx ikunu pubbliċi sakemm il-Partijiet ma jiddeċidux mod ieħor.
Artikolu 6
Aġenda
1.Il-President, assistit mis-Segretarjat, għandu jfassal l-aġenda proviżorja għal kull laqgħa.
2.Kull Parti tista’ tipproponi elementi addizzjonali sabiex jiġu inklużi fl-aġenda mill-inqas 7 ijiem kalendarji qabel il-laqgħa. Kull talba għall-inklużjoni ta' elementi addizzjonali fl-aġenda trid tkun debitament sostanzjata u tintbagħat bil-miktub lill-President.
3.Il-Kumitat Konġunt għandu japprova l-aġenda fil-bidu tal-laqgħa.
Artikolu 7
Gruppi ta’ ħidma tal-Kumitat Konġunt
1.Il-kompożizzjoni u l-funzjonament tal-gruppi ta’ ħidma jew tal-gruppi ta’ esperti li għandhom jiġu stabbiliti f'konformità mal-Artikolu 20(4) tal-Ftehim għandhom jiġu miftiehma abbażi ta’ mandat stabbilit mill-Kumitat Konġunt.
2. Il-gruppi ta’ ħidma jew il-gruppi ta’ esperti għandhom japplikaw dawn ir-regoli ta' proċedura mutatis mutandis.
3.Il-gruppi ta’ ħidma jew il-gruppi ta’ esperti għandhom jaħdmu taħt l-awtorità tal-Kumitat Konġunt u jibagħtulu rapport wara kull laqgħa li jkollhom. Dawn mhumiex awtorizzati li jieħdu deċiżjonijiet, iżda jistgħu jressqu rakkomandazzjonijiet għall-attenzjoni tal-Kumitat Konġunt.
4.Il-Kumitat Konġunt jista’ jiddeċiedi li jemenda jew li jtemm il-mandat tal-gruppi ta’ ħidma jew tal-gruppi ta’ esperti.
Artikolu 8
Deċiżjonijiet u rakkomandazzjonijiet
1.Il-Kumitat Konġunt għandu jieħu d-Deċiżjonijiet u jfassal ir-Rakkomandazzjonijiet permezz ta' ftehim komuni bejn il-Partijiet f'konformità mad-dispożizzjonijiet stabbiliti fil-Ftehim. Dawn għandhom ikollhom it-titolu “Rakkomandazzjoni” jew “Deċiżjoni”, segwiti b’numru ta’ sekwenza, id-data tal-adozzjoni u referenza għas-suġġett tagħhom.
2. Id-Deċiżjonijiet u r-Rakkomandazzjonijiet tal-Kumitat Konġunt għandhom jiġu ffirmati mill-President u mis-Segretarji u għandhom jiġu ċċirkolati lill-Partijiet.
3.Kull Parti tista’ tiddeċiedi li tippubblika kwalunkwe Deċiżjoni jew Rakkomandazzjoni adottata mill-Kumitat Konġunt fil-ġurnal uffiċjali rispettiv tagħha. Il-Partijiet għandhom jinfurmaw lil xulxin dwar l-intenzjoni tagħhom li jippubblikaw Deċiżjoni jew Rakkomandazzjoni.
4.Il-Kumitat Konġunt jista’ jadotta d-Deċiżjonijiet jew ir-Rakkomandazzjonijiet tiegħu permezz ta' proċedura bil-miktub jekk il-Partijiet jaqblu li jsir hekk. Il-proċedura bil-miktub għandha tikkonsisti minn skambju ta' noti bejn is-Segretarji, li jaġixxu bi qbil mal-Partijiet. Għal dak il-għan, it-test tal-proposta għandu jiġi ċċirkolat skont l-Artikolu 5 ta' dawn ir-Regoli ta' Proċedura, f'limitu ta' żmien ta' mhux anqas minn 21 jum kalendarju li fih għandha tiġi mgħarrfa kull riżerva jew emenda. Il-President jista' jnaqqas dak il-limitu ta' żmien, b'konsultazzjoni mal-Partijiet, sabiex jiġu meqjusa ċ-ċirkostanzi speċjali. Ladarba jkun hemm qbil dwar it-test, id-deċiżjoni jew ir-rakkomandazzjoni għandhom jiġu ffirmati mill-President u mis-Segretarji.
5. Id-Deċiżjonijiet tal-Kumitat Konġunt li jemendaw l-Anness I tal-Ftehim għandhom ikunu adottati fil-lingwi awtentiċi tal-Ftehim.
Artikolu 9
Minuti
1.Is-Segretarjat għandu jfassal abbozz tal-minuti ta' kull laqgħa. L-abbozz għandu jindika d-deċiżjonijiet meħuda u r-rakkomandazzjonijiet imfassla. L-abbozz tal-minuti għandu jiġi ppreżentat lill-Kumitat Konġunt għall-adozzjoni. Ladarba dawn ikunu ġew adottati mill-Kumitat Konġunt, il-minuti għandhom jiġu ffirmati mill-President u mis-Segretarji.
2.L-abbozz tal-minuti għandu jitfassal fi żmien 21 jum kalendarju mid-data tal-laqgħa u jiġi ppreżentat għall-approvazzjoni tal-Kumitat Konġunt jew permezz ta’ proċedura bil-miktub jew fil-laqgħa sussegwenti tal-Kumitat Konġunt.
Artikolu 10
Kunfidenzjalità
Meta Parti tippreżenta informazzjoni li tkun indikata bħala kunfidenzjali lill-Kumitat Konġunt, il-Partijiet l-oħra għandhom jittrattaw dik l-informazzjoni bħala tali.
Artikolu 11
Spejjeż
1.Kull Parti għandha tħallas kwalunkwe spiża li ġġarrab marbuta mal-parteċipazzjoni tagħha fil-laqgħat tal-Kumitat Konġunt u tal-gruppi ta’ ħidma jew tal-gruppi ta’ esperti.
2.Il-Kumitat Konġunt għandu jaqbel dwar it-tqassim tal-ispejjeż relatati ma’ kwalunkwe missjoni assenjata lill-esperti.
3. L-ispejjeż marbuta mal-organizzazzjoni tal-laqgħat u mar-riproduzzjoni ta' dokumenti għandhom jitħallsu mill-Parti li tkun qed tospita l-laqgħa.
4. L-ispejjeż marbuta mas-servizzi tal-interpretazzjoni waqt il-laqgħat u mat-traduzzjoni ta' dokumenti għal jew mill-Ingliż, il-Franċiż u l-Ġermaniż għandhom jitħallsu mill-Parti li tkun qed tospita l-laqgħa.
Artikolu 12
Korrispondenza
Il-korrispondenza kollha indirizzata lill-President tal-Kumitat Konġunt jew mibgħuta minnu għandha tintbagħat lis-Segretarjat tal-Kumitat Konġunt.
Artikolu 13
Lingwi
Il-lingwi ta' ħidma tal-Kumitat Konġunt għandhom ikunu l-Ingliż, il-Franċiż u l-Ġermaniż. Mingħajr preġudizzju għall-Artikolu 8(5) ta’ dawn ir-Regoli ta’ Proċedura, il-Kumitat Konġunt għandu jibbaża d-deċiżjonijiet u d-deliberazzjonijiet tiegħu fuq id-dokumentazzjonijiet imfassla f’waħda minn dawn il-lingwi, sakemm ma jkunx ġie deċiż mod ieħor mill-Partijiet.
Artikolu 14
Emenda tar-Regoli ta' Proċedura
Dawn ir-Regoli ta’ Proċedura jistgħu jiġu emendati f'konformità mal-Artikolu 8 ta’ dawn ir-Regoli ta’ Proċedura.
