IL-KUMMISSJONI EWROPEA

Brussell, 5.12.2016

COM(2016) 754 final

RAPPORT TAL-KUMMISSJONI LILL-PARLAMENT EWROPEW U LILL-KUNSILL

Rapport tal-2009-2015 dwar il-qagħda finanzjarja tas-sistema ta’ assigurazzjoni kontra l-qgħad favur l-ex aġenti temporanji jew aġenti kuntrattwali u l-assistenti parlamentari akkreditati li jsibu ruħhom mingħajr impjieg wara t-tmiem tal-funzjonijiet tagħhom fi ħdan istituzzjoni tal-Unjoni Ewropea

RAPPORT MILL-KUMMISSJONI LILL-KUNSILL U LILL-PARLAMENT

Rapport tal-2009-2015 dwar il-qagħda finanzjarja tas-sistema ta’ assigurazzjoni kontra l-qgħad favur l-ex aġenti temporanji jew aġenti kuntrattwali u l-assistenti parlamentari akkreditati li jsibu ruħhom mingħajr impjieg wara t-tmiem tal-funzjonijiet tagħhom fi ħdan istituzzjoni tal-Unjoni Ewropea

SOMMARJU

F’konformità mar-Regolamenti dwar il-Kundizzjonijiet tal-impjieg ta’ impjegati oħra (CEOS), il-benefiċċju għall-qgħad huwa maħsub għall-ex membri tal-persunal kuntrattwali (CA), assistenti parlamentari (APA) jew persunal temporanju (TA)li huma involontarjament bla xogħol (u għalhekk huwa eskluż, pereżempju, persunal li jkun irriżenja). Dan jitħallas flimkien ma’ kwalunkwe benefiċċju għall-qgħad nazzjonali.

Dawn il-benefiċċji jitħallsu mill-Fond speċjali għall-qgħad. Dan il-fond huwa ffinanzjat minn naħa mill-kontribuzzjonijiet tal-aġenti potenzjalment benefiċjarji u, min-naħa l-oħra, mill-kontribuzzjonijiet ta' min iħaddem.

Il-kundizzjonijiet ta' aċċess għal dan il-benefiċċju, kif ukoll il-kategoriji tal-benefiċjarji u r-rati ta' kontribuzzjoni, kellhom tibdil sinifikanti li affettwaw is-sistema stabbilita oriġinarjament u b'mod partikolari t-teżor tal-Fond.

Ir-Riforma 2004:

Ir-riforma tar-Regolament tal-Persunal għall-Uffiċjali u l-Kundizzjonijiet tal-Impjieg Applikabbli għall-Aġenti l-Oħra (CEOS) tal-Unjoni Ewropea, li daħlet fis-seħħ fl-1 ta’ Mejju 2004, introduċiet fis-CEOS kategorija ġdida ta’ persunal impjegat b’kuntratt (jiġifieri persunal kuntrattwali — CA) flimkien ma’ regoli ġodda li jirregolaw il-kontribuzzjonijiet lill-fond għall-qgħad (b’mod partikolari żieda fis-sehem personali tal-kontribuzzjoni minn 0.4% għal 0.81%).

Perjodu 2009-2015:

Ir-Regolament tal-Kunsill Nru 160/2009 tat-23.02.2009 (ĠU L 55, 27.02.2009), estenda l-kopertura tal-Fond għall-qgħad għall-assistenti parlamentari akkreditati (APAs). F’din l-okkażjoni ma saru ebda bidliet għall-arranġamenti li jirregolaw il-Fond għall-qgħad jew għall-ammont tal-kontribuzzjoni.

Fl-2009, il-Fond għall-qgħad irrapporta defiċit ta’ EUR 4.3 miljun, li naqas għal EUR 2.6 miljun fl-2010. Bejn l-2011 u l-2013 id-defiċit naqas b’mod sinifikatni, billi niżel għal EUR 1 miljun sal-aħħar tal-2013. Matul dan il-perjodu, ir-riżerva akkumulata tal-Fond għall-qgħad naqset minn EUR 16.1 miljun fil-bidu tal-2009 għal EUR 2 miljun fl-aħħar tal-2015. Ir-raġunijiet għal din il-volatilità huma diversi u jinkludu:

Żieda fin-numru ta’ membri (+ 42%)

Żieda fin-numru ta’ benefiċċji għall-qgħad ta’ kull xahar imħallsa (+ 9%)

Żieda fl-għadd ta’ persunal temporanju (TAs) li jirċievu l-benefiċċju meta mqabbel man-numru ta’ persunal TA f’impjieg attiv (minn 2.56% fl-2009 għal 2.90% fl-2015)

It-tnaqqis fl-għadd ta’ benefiċjarji aġenti kuntrattwali (CAs) meta mqabbel man-numru ta’ persunal CA f’impjieg attiv (minn 5.86% fl-2009 għal 1.83% fl-2015)

Introduzzjoni tal-kategorija APA (sehem ta’ APA benefiċjarji fl-2015: + 8.4%)

Iż-żieda medja ta’ kull xahar minn EUR 1 980 fl-2009 għal EUR 2 063 fl-2010. Din ix-xejra inqalbet fl-2011 u l-2012, u laħqet livell stabbli ta’ EUR 1 908. Din ix-xejra inqalbet għal darb’ oħra mill-2013, b’medja ta’ allokazzjoni li telgħet għal EUR 2 551 fl-2015, li laħqet il-quċċata ta’ EUR 2 582 fl-2014. Żieda qawwija fil-medja ta’ kwoti ta’ APAs tista’ tiġi osservata bejn l-2011 u l-2015. Fil-fatt din żdiedet minn EUR 2 096 fl-2011 għal EUR 2 898 fl-2014 qabel ma waqgħet lura għal EUR 2 525 fl-2015

Żieda fl-għadd medju ta’ xhur li fih riċevituri jirċievu l-benefiċċju, minn 6.9 xhur fl-2009 għal 10 xhur fl-2015, li jfisser żieda ta’ 45 % fil-ħlas tal-benefiċċji.

It-tnaqqis sinifikanti fid-defiċit fl-2012 bis-saħħa ta’ dħul eċċezzjonali mill-aġenzija EUIPO, li ħallset lura EUR 1.2 miljun wara d-dħul mill-ġdid ta’ madwar għoxrin membru tal-persunal wara ordni tal-qorti.

Riforma 2014 u perspettivi:

Ir-riforma tar-Regolamenti tal-Persunal għall-Uffiċjali u l-Kundizzjonijiet tal-Impjieg Applikabbli għall-Aġenti l-Oħra tal-Unjoni (COES) tal-Unjoni Ewropea, li daħal fis-seħħ fl-1 ta' Jannar 2014 emenda t-tul ta' żmien massimu tal-kuntratti ta' impjieg tal-CA 3c, tul li issa huwa ta' 6 snin minflok 3 snin.

Din il-modifikazzjoni tat-tul massimu tal-kuntratt kellha l-konsegwenza li tnaqqas in-numru ta' benefiċjarji tal-Fond għall-qgħad mill-2014. L-effett moderatur madanakollu se jkollu t-tendenza li jonqos mill-2017.

Dan l-impatt pożittiv madanakollu ma kkumpensax iż-żieda sostanzjali tan-numru ta' benefiċjarji li ħarġu mill-Parlament Ewropew wara t-tiġdid ta' dan tal-aħħar fl-2014. Fil-fatt, iktar minn 600 assistenti parlamentarji (APAs) u 200 TAs żdiedu mal-popolazzjoni tal-benefiċjarji tas-sistema ta' assigurazzjoni kontra l-qgħad f'Lulju 2014.

_____________________________

L-Artikolu 28a(11) u l-Artikolu 96(11) tal-Kundizzjonijiet tal-impjieg applikabbli għall-aġenti l-oħra tal-Unjoni Ewropea (CEOS), kif emendat fl-2013, jipprovdi għat-tressiq ta’ rapport mill-Kummissjoni kull sentejn dwar is-sitwazzjoni finanzjarja tal-iskema tal-assigurazzjoni għall-qgħad. Barra minn hekk, indipendentement minn dan ir-rapport, il-Kummissjoni tista’, permezz ta’ atti delegati, f’konformità mal-Artikoli 111 u 112 tar-Regolamenti tal-Persunal, taġġusta l-kontribuzzjonijiet previsti fl-Artikolu 28a(7) u l-Artikolu 96(7) tal-Kundizzjonijiet tal-impjieg applikabbli għall-aġenti l-oħra jekk meħtieġ fl-interessi tal-bilanċ tal-iskema.

1Il-qafas regolatorju 

1.1Deskrizzjoni tas-sistema

Ir-riforma tar-Regolamenti tal-Persunal għall-Uffiċjali u l-Kondizzjonijiet tal-Impjieg applikabbli għall-aġenti l-oħra tal-Unjoni Ewropea (CEOS), li daħal fis-seħħ fl-1 ta’ Mejju 2004, emenda testi legali li jirregolaw l-eliġibilità għal l-Fond għall-qgħad u r-regoli dwar kontribuzzjoni lill-Fond mill-1985. L-emendi jistgħu jinġabru fil-qosor kif ġej:

It-tabella t'hawn taħt turi l-limiti massimi u minimi skont il-popolazzjonijiet differenti:

ammonti f'EUR fl-1 ta' Jannar 2016

L-ammonti tal-benefiċċji, tal-limiti massimi u minimi huma aġġornati bl-istess mod li huma aġġornati r-rimunerazzjonijiet.

Il-benefiċċji tal-familja jiżdiedu mal-benefiċċju għall-qgħad. F'dak li jirrigwarda l-ħlas għall-assigurazzjoni medika (RKAM) tal-Unjoni Ewropea (5.1% tat-trattament bażiku referenzjarju tal-benefiċjarju), dan jitħallas mill-Fond għall-qgħad.

1.2Referenzi ġuridiċi

-L-Artikolu 28a tal-Kundizzjonijiet tal-impjieg applikabbli għall-aġenti l-oħra tal-Unjoni Ewropea (CEOS), kif emendat permezz tar-Regolament Nru 1023/2013 tal-Parlament Ewropew u tal-Kunsill tat-22 ta' Ottubru 2013.

-L-Artikolu 96 tal-Kundizzjonijiet tal-impjieg applikabbli għall-aġenti l-oħra tal-Unjoni Ewropea (CEOS) u l-Artikolu 5 tal-Anness tas-CEOS, kif emendati permezz tar-Regolament Nru 1023/2013 tal-Parlament Ewropew u tal-Kunsill tat-22 ta' Ottubru 2013.

-L-Artikoli 135 u 136 tas-CEOS kif emendati permezz tar-Regolament Nru 1239/2010 tal-Parlament Ewropew u tal-Kunsill tal-20 ta' Diċembru 2010 (ĠU L 338, 22.12.2010).

-L-Artikolu 65(1) tar-regolamenti dwar l-aġġornament tar-rimunerazzjoni u ta' ċerti ammonti.

-Ir-Regolament Nru 91/88 tal-Kummissjoni tat-13.01.1988, li jistabbilixxi d-dispożizzjonijiet għall-implimentazzjoni tal-Artikolu 28a tal-Kundizzjonijiet ta’ Impjieg tal-Impjegati l-Oħra tal-Unjoni Ewropea (ĠU L 11, 15.01.1989).

-Ir-Regolament tal-Kummissjoni tal-14.07.1988, wara ftehim komuni stabbilit mill-president tal-Qorti tal-Ġustizzja fl-04.07.1989 li jistabbilixxi l-arranġamenti ta’ applikazzjoni tad-dispożizzjonijiet għall-allokazzjoni tal-benefiċċju għall-qgħad lill-aġenti temporanji b’implimentazzjoni tal-Artikolu 28a(10), tal-kundizzjonijiet applikabbli għall-impjegati l-oħra tal-Unjoni Ewropea.

2Is-sitwazzjoni tal-bilanċ u l-eżerċiżżju 2009-2015 tal-Fond għall-qgħad

Iż-żewġ taqsimiet segwenti jippreżentaw l-evoluzzjonijiet tal-Fond għall-Qgħad u b'mod partikolari n-nefqa u d-dħul.

L-ammonti elenkati taħt “Benefiċċji għall-Qgħad” fihom b’mod sistematiku l-benefiċċju għall-qgħad bażiku, il-benefiċċji għall-familja kollha u l-effett tal-koeffiċjent korrettiv (għas-sistema l-qadima biss). Sar tnaqqis tal-benefiċċji soċjali kollha riċevuti fuq livell nazzjonali (benefiċċji għall-qgħad, benefiċċji għall-familja, benefiċċji għall-mard, benefiċċji għat-tqala, eċċ.). F'dak li jirrigwarda l-kontribuzzjoni tal-RKAM, kif indikat taħt il-punt "1.1  Description du régime ", din ma titħallasx mill-benefiċjarju għall-benefiċċju għall-qgħad, hija ffinanzjata mill-Fond għall-Qgħad (5.1% tas-salarju bażi ta' referenza tal-benefiċjarju).

Il-Fond għall-Qgħad juża żewġ strumenti għall-ġestjoni tal-infiq u d-dħul tiegħu:

kont kurrenti għad-dħul u l-ħlas tal-benefiċċji;

kontijiet ta' depożitu b'terminu għall-ammonti akkumulati.

2.1Is-sitwazzjoni tal-"fond" riżultati attwali u bilanċi akkumulati 2009-2015

Mill-perpettiva tal-kontabbiltà ta' fond, id-dħul u l-infiq huma rreġistrati fil-mument fejn jidħlu jew jiġu impenjati.

It-Tabella 1 tagħti sommarju tad-dħul u l-infiq kif kienu rreġistrati fil-kontabilità kif ukoll il-bilanċ attwali li jirriżulta minnhom. Ta' min jinnota, għall-2014, regolarizzazzjoni tal-kontribuzzjonijiet RKAM dovuti għall-perjodu 2009-2013.

It-Tabella 2 turi l-evoluzzjoni tal-assi finanzjarji tal-Fond għall-qgħad kemm fil-kont kurrenti inkorporat tas-sistema ta’ kontabilità tal-Kummissjoni Ewropea (Parti I) kif ukoll fil-kontijiet ta’ investiment ġestiti mid-DĠ ECFIN (parti II). It-tielet parti tagħti l-eċċess akkumulat konsolidat fuq dawn iż-żewġ kontijiet (parti III).

Meta mqabbel mas-sena referenzjarja (2009), huwa evidenti li l-bilanċ favorevoli akkumulat kien qed jonqos sena wara sena. L-istabbiltà relattiva tal-Fond fl-2012 hija dovuta għal rimborż minn EUIPO tal-benefiċċji għall-qgħad riċevuti mill-persunal li reġa' ddaħħal.

Bejn l-2009 u l-2015, il-bilanċ favorevoli kumulattiv naqas bi 87 %.

It-Tabella 3 tippreżenta ħarsa ġenerali lejn il-bilanċ kumulattiv bejn l-2008 u l-2015.

2.2Il-pożizzjoni finanzjarja: Riżultati attwali 2009-2015

Fil-perspettiva tal-kontabbiltà tal-baġit, it-tranżazzjonijiet huma rreġistrati sabiex ikunu jistgħu jiġu marbuta mas-sena li fiha jiġu rrapurtati. B'hekk, ċertu dħul riċevut u rreġistrat fil-kontabilità fil-bidu tas-sena N huwa tnaqqis minn salarji fl-aħħar tas-sena N-1 u ċerti ħlasijiet ta’ benefiċċji għall-qgħad imwettqa u rreġistrati fil-bidu tas-sena N ikopru perjodi ta’ qgħad tal-aħħar tas-sena N-1. Fil-kontabbiltà, it-tranżazzjonijiet jiġu kkalkulati fuq l-eżerċizzju N-1.

It-Tabella 4 turi d-dħul u l-infiq skont din il-loġika u b’hekk turi l-qagħda “finanzjarja” annwali tad-dħul u l-infiq tal-Fond għall-qgħad.

Id-dħul u l-infiq żdiedu b'mod sostanzjali mill-2009. Din il-bidla fid-dħul u l-infiq hija spjegata b'mod partikolari:

bil-ħolqien ta' aġenziji ġodda u ż-żieda fil-persunal tal-aġenziji b'mod ġenerali;

l-introduzzjoni mill-2004 ta' kategorija ġdida ta' persunal (jiġifieri aġenti kuntrattwali - CA);

l-impjieg tal-assistenti parlamentari fl-2009.

L-impatt fuq in-nefqa huwa sinifikanti biss mill-2007, meta spiċċaw l-ewwel kuntratti tal-membri tal-persunal bil-kuntratt u għalhekk l-ewwel ftuħ ta' dritt għall-benefiċċju għall-qgħad. Din iż-żieda fin-nefqa imbagħad kompliet sal-2014, u naqset xi ftit fl-2015.

Id-defiċit tal-Fond laħaq EUR 4.3 miljun fl-2009, u naqas b’mod gradwali fis-snin sussegwenti: EUR 2.6 miljun fl-2010, għal EUR 1.5 miljun fl-2011, EUR 1.2 miljun fl-2012 u EUR 1 miljun fl-2013. Fl-2014, id-defiċit kiber għal EUR 4.8 miljun. Dan kien dovut għal żieda fl-għadd ta’ APAs li jirċievu benefiċċju għall-qgħad. Dan l-effett naqas gradwalment fl-2015, meta d-defiċit naqas għal EUR 3 miljun.

Il-grafika ta’ hawn taħt turi s-sitwazzjoni deskritta hawn fuq.

2.3Il-pożizzjoni finanzjarja: tqassim tal-infiq u d-dħul għal kull istituzzjoni u għall-aġenziji kollha 2009-2015

It-Tabella 5 tagħti rendikont tal-infiq u d-dħul għal kull istituzzjoni kif ukoll għall-aġenziji u l-Uffiċċji kollha. L-ewwel parti tat-tabella turi l-ammonti assoluti u t-tieni parti turi l-perċentwali meta mqabbla mat-total tan-nefqa u d-dħul. L-effett tat-tmiem tal-mandat tal-PE huwa evidenti ħafna, b'qabża tan-nefqa f'isem il-PE ta' iktar minn EUR 8 miljun bejn l-2013 u l-2014. Fl-2015, in-nefqa tibqa għolja iżda madanakollu inqas minn dik tal-2014.

Mingħajr ma jittieħed kont tas-Servizz Ewropew għall-Azzjoni Esterna (SEAE) li għalih għadu diffiċli li tingħata analiżi dettaljata minħabba n-nuqqas ta' perspettiva, bħalissa l-aġenziji biss għandhom livell ta' kontribuzzjoni iktar għoli min-nefqa. Din is-sitwazzjoni hija l-iktar minħabba l-fatt li l-parti l-kbira tal-persunal tagħhom jibbenefika minn kuntratti b'limitu ta' żmien indeterminat. Madanakollu għandu jiġi nnutat li n-nefqa marbuta mal-persunal tal-aġenziji żdiedet b'mod qawwi matul il-perjodu bejn l-2013 u l-2015.

3Analiżi tal-membri, il-benefiċjarji u l-benefiċċji mogħtija

3.1Numru ta' membri u l-medja tal-kontribuzzjoni

It-tabella Nru 6 turi n-numru ta' impjegati TAs u CAs li jikkontribwixxu għall-Fond għall-qgħad fil-31 ta' Diċembru ta' kull sena.

In-numru ta' CAs u ta' TAs żdied, bejn l-2009 u l-2015, b'40% u 23% rispettivament. Fir-rigward tal-APAs, l-ewwel benefiċjarji dehru fl-2011.

Meta wieħed iqis il-kategoriji kollha flimkien, in-numru ta' membri żdied b'43% bejn l-2009 u l-2015.

3.2Numru ta' benefiċjarji ta' benefiċċju għall-qgħad f'termini assoluti u b'rapport għan-numru ta' membri: rata tal-qgħad fil-31 ta' Diċembru tas-sena

It-tabella Nru 7 turi n-numru ta' persuni fil-qgħad li rċevew benefiċċju sħiħ jew kumplimentari għas-sistema nazzjonali għax-xahar ta' Diċembru ta' kull sena.

Meta wieħed jgħaqqad id-data dwar it-TAs u s-CAs impjegati fil-31 ta' Diċembru fit-tabella Nru 6 u n-numru ta' benefiċjarji li rċevew benefiċċju għall-qgħad murija fit-tabella Nru 7, huwa possibbli li jiġi kkalkulat il-proporzjoni bejn in-numru ta' benefiċjarji tal-Fond għall-qgħad u n-numru ta' membri tal-istess fond. Ir-riżultat huwa spjegat fit-tabella Nru 8.

F'dak li jirrigwarda l-aġenti temporanji, in-numru tagħhom qed jiżdied bi ftit minkejja t-tnaqqis sinifikanti għall-Kummissjoni. L-effett ta' dan it-tnaqqis huwa kontrobilanċjat minħabba ż-żieda qawwija tan-numru tagħhom fl-aġenziji. Il-perċentwali ta' persuni li jirċievu benefiċċju meta mqabbla mal-membri għadu mhux kostanti.

Fir-rigward tal-aġent kuntrattwali, in-numru tagħhom qed jiżdied b'mod kostanti, b'mod partikolari fl-aġenziji u fil-Parlament Ewropew. Il-perċentwali tal-benefiċjarji meta mqabbel mal-membri qed tonqos b'mod drastiku. Dan it-tnaqqis huwa marbut mal-prolongazzjoni possibbli tal-kuntratti konklużi minn 3 sa 6 snin bejn l-2010 u l-2013.

Fl-2014, wieħed jinnota wkoll numru għoli ta' ex APAs li jibbenefikaw mill-benefiċċju, minħabba li l-2014 kienet is-sena ta' tmiem il-mandat tal-Parlament.

Numru ta' benefiċċji għall-qgħad fix-xahar, ammont medju, benefiċjarji u pajjiżi ta' residenza ta' dawn tal-aħħar

Il-benefiċċju għall-qgħad jista' jitħallas tul bosta xhur. It-tabella Nru 9 turi n-numru ta' benefiċċju għall-qgħad ta' kull xahar imħallsa fis-sena.

In-nefqa annwali totali skont it-tip ta' benefiċjarju (TA tas-sistema preċedenti, TA tas-sistema l-ġdida u CA) diviża bin-numru ta' pagamenti ta' kull xahar imħallsa tirriżulta fl-ammont medju tal-benefiċċju għall-qgħad skont il-kategorija tal-benefiċjarji. It-tabella Nru 10 turi dan ir-riżultat. Ta' min jinnota li benefiċċju marbut ma' xahar determinat jista' jkun sħiħ jew ikun biss parti prorata tan-numru ta' ġranet li matulhom il-persuna tkun fil-fatt f'sitwazzjoni ta' qgħad.

Il-medja fix-xahar tal-benefiċċju żdiedet bejn l-2009 u l-2010; minn EUR 1 980 għal EUR 2 063. Din ix-xejra inqalbet fl-2011 u kompliet fl-2012, u laħqet livell stabbli ta’ EUR 1 908. Din ix-xejra inqalbet għal darb’oħra mill-2013, b’medja ta’ allokazzjoni li telgħet għal EUR 2 551 fl-2015, li laħqet il-quċċata ta’ EUR 2 582 fl-2014. Jekk wieħed jikkunsidra biss is-CAs u t-TAs, il-medja fix-xahar tal-benefiċċju hija ta' EUR 2 562.30 fl-2015.

Wieħed jinnota li l-medja tal-ammonti mħassa għall-APAs qed jiżdiedu wkoll b'mod sostanzjali fl-2014, b'kważi 50% meta mqabbla mal-2013, b'EUR 2 897.99. Il-medja fix-xahar tal-benefiċċju tonqos b'mod ċar fl-2015 biex tilħaq EUR 2 550.67.

L-erba elementi l-iktar importanti ta' din it-tabella huma:

iż-żieda tal-medja tal-ammont fix-xahar imħallas lit-TAs u CAs bejn l-2013 u l-2015: + 31%;

iż-żieda tal-medja tal-ammont fix-xahar imħallas lill-APAs bejn l-2013 u l-2015: + 28%;

iż-żieda tal-medja tal-ammont fix-xahar imħallas lill-APAs bejn l-2013 u l-2015: + 385%;

il-piż tan-nefqa għall-APAs bħala parti min-nefqa totali bejn l-2013 u l-2015: minn 6% sa 31%.

It-tabella Nru 11 turi l-medja tat-tul ta' żmien tal-benefiċċju għall-qgħad. Dan il-perjodu huwa kkalkulat bl-akkumulazzjoni tan-numru totali ta' ġranet imħallsa sal-31 ta' Diċembru tas-sena indikata u billi jiġi diviż it-total bin-numru ta' benefiċjarji għall-qgħad. Ir-riżultat huwa diviż bi 30 biex tinkiseb il-medja tat-tul ta' żmien f'xhur tal-benefiċċju għall-qgħad.

Huwa nnutat li l-medja tat-tul ta' żmien tal-benefiċċju għall-qgħad żdied minn 6,9 xhur fl-2009 għal 10 xhur fl-2015. Dan jirrappreżenta żieda fit-tul ta' żmien tal-benefiċċji ta' 45%. Din iż-żieda hija dovuta l-iktar minħabba l-impatt tal-APAs.

Sadanittant, in-numru ta' benefiċjarji li rċevew benefiċċju mill-inqas matul xahar fis-sena naqas xi ftit minn 7.6% bejn l-2009 u l-2015 (minn 701 għal 648, ara t-tabella Nru 7).

It-tabelli li ġejjin juru t-tul tal-perjodu tad-dritt għall-benefiċċju għall-qgħad skont il-kategorija ta’ persunal (CA/TAs u APAs).

CA/TA:

APA:

Wieħed jinnota li s-sehem għoli tan-nefqa dwar l-APAs meta mqabbel ma’ nefqa globali fl-2015 (31%) huwa kemm minħabba l-għadd kbir ta’ persunal f’din il-kategorija kif ukoll minħabba l-medja għolja tal-ammont tal-benefiċċju ta’ kull xahar imħallas lil dawn l-individwi. Il-medja tul il-perjodu ta’ benefiċċju għall-qgħad għall-assistenti parlamentari akkreditati żdied sew fl-2015 u mar lil hinn mit-tul medju tal-benefiċċji għall-qgħad għal persunal CA/TA. Din hija konsegwenza diretta ta’ żieda sostanzjali fin-numru ta’ APAs li jirċievu l-benefiċċji għall-qgħad minħabba tmiem il-leġiżlatura tal-Parlament Ewropew fi tmiem l-2014.

Fid-dawl tal-prinċipju tal-kumplimentarjetà fir-rigward tal-iskema tal-assigurazzjoni kontra l-qgħad, il-pajjiż tar-residenza tal-persuna li tirċievi l-benefiċċju għall-qgħad huwa sinifikanti, b’mod partikolari f’termini ta’ firxa wiesgħa ħafna tal-kriterji ta' eliġibbiltà ta’ benefiċċju nazzjonali għall-qgħad fl-Istati Membri differenti.

It-tabella 12 turi n-numru ta' benefiċjarji li rċevew mill-inqas benefiċċju kull xahar matul is-sena, skont il-pajjiż ta' residenza.

It-tabella dwar il-postijiet ta' residenza tal-benefiċjarji turi li fl-2015 iktar minn 44% minnhom kien rreġistrati għax-xogħol fil-Belġju.

4KONKLUŻJONI

4.1Perjodu 2009-2015

Dan ir-rapport juri li, mill-2008, il-Fond għall-qgħad jippreżenta defiċit annwali persistenti. Id-defiċit kien diġà partikolarment għoli fl-2009 meta laħaq EUR 4.2 miljun, qabel ma naqas gradwalment għal EUR 1 miljun fl-2013.

Fl-2014 il-Fond għall-qgħad sofra tnaqqis serju ieħor meta d-defiċit żdied għal aktar minn EUR 4.8 miljun. Id-defiċit trażżan xi ftit fl-2015 u laħaq EUR 3 miljun

Wara dawn id-defiċits suċċessivi bejn l-2009 u l-2015, l-eċċess akkumulat (jiġifieri r-riżervi + qligħ annwali) fil-31 ta’ Diċembru 2015 kien jammonta għal biss EUR 2 miljun meta mqabbel ma’ EUR 16.15 miljun fil-1 ta’ Jannar 2009.

4.2Evoluzzjoni tal-Fond għall-qgħad f’terminu qasir u medju:

Il-livell għoli ta’ nefqa fl-2015 ikkontribwixxa biex tispiċċa r-riżerva.

Madankollu, is-sena 2016 hija mistennija li turi bilanċ favorevoli grazzi għal tnaqqis qawwi fin-numru ta’ benefiċjarji APA (li mistennija tkompli fl-2017 u l-2018) u l-effett ta’ mitigazzjoni tal-estensjoni għal 6 snin tad-durata massima tal-kuntratti ta’ persunal kuntrattwali prevista fl-Artikolu 3b tal-Kundizzjonijiet tal-impjieg. Dan jista’ jippermetti li tiġi rikostitwita riżerva sinifikanti.

Fi kwalunkwe każ, is-sitwazzjoni ta’ terminu medju hija inċerta — anke allarmanti — minħabba l-fatturi ta’ riskju li ġejjin:

1.It-tkabbir sostanzjali ħafna ta’ benefiċċju mħallas kull xahar fl-2015 meta mqabbel mal-2013 (+ 30%);

2.Iż-żieda sostanzjali fin-numru ta’ benefiċjarji CA mill-2017 ’il quddiem, meta l-ewwel lott ta’ benefiċjarji CA jaslu għas-sitt sena tal-kuntratt tagħhom li jintemm;

3.Il-kontinwazzjoni possibbli ta’ din iż-żieda kostanti sa mill-2013 tal-benefiċjarji TA mill-aġenziji;

4.Livell għoli ġdid ta' nefqa mistenni fl-2019-2020 b’rabta ma’ tmiem il-mandat tal-Parlament Ewropew tal-2014-2019;

5.Għandu jiġi nnutat ukoll li l-introduzzjoni ta’ assistenti parlamentari akkreditati fl-2009 ma kienx akkumpanjat b’kontribuzzjoni ogħla, għall-kuntrarju tal-2004 meta ġew introdotti l-aġenti kuntrattwali. Matul il-perjodu 2011-2015, il-bilanċ nett ta’ kontribuzzjonijiet u benefiċċji li jitħallsu għall-kategorija APA kellu defiċit ta’ madwar EUR 11.4 miljun.

Fid-dawl ta’ dak li ntqal hawn fuq, il-Kummissjoni qed tikkunsidra , bħala l-ewwel pass, żieda limitata (madwar 0.1% tas-salarju bażiku, b’kunsiderazzjoni partikolari tal-bilanċ kumulattiv tal-Fond matul il-perjodu eżaminat f’dan ir-rapport) fil-kontribuzzjonijiet għall-iskema tal-assigurazzjoni għall-qgħad permezz ta’ att delegat, skont l-Artikolu 28a(11) u l-Artikolu 96(11) CEOS, sabiex jiġi assigurat l-ekwilibriju finanzjarju tiegħu.

Il-Kummissjoni se tistabbilixxi grupp ta’ ħidma biex jiġi żgurat, bħala t-tieni pass, monitoraġġ regolari tas-sitwazzjoni finanzjarja tas-sistema.