IL-KUMMISSJONI EWROPEA
Brussell, 14.9.2016
COM(2016) 578 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
ID-9 RAPPORT FINANZJARJU MILL-KUMMISSJONI LILL-PARLAMENT EWROPEW U LILL-KUNSILL dwar il-FOND AGRIKOLU EWROPEW TA' GARANZIJA
IS-SENA FINANZJARJA 2015
{SWD(2016) 293 final}
WERREJ
1.IL-PROĊEDURA TAL-BAĠIT…….
2.IL-POŻIZZJONI TAL-LIKWIDITÀ U ĠESTJONI TAL-APPROPRJAZZJONIJIET
3.L-IMPLIMENTAZZJONI TAL-BAĠIT TAL-FAEG TAL-2015
4.IL-KUMMENTI DWAR L-IMPLIMENTAZZJONI TAL-BAĠIT TAL-FAEG TAL-2015
5.L-IMPLIMENTAZZJONI TAD-DĦUL ASSENJAT
6.ANALIŻI SKONT IT-TIP TA’ NEFQA
Anness 1
Anness 2
Anness 3
Anness 4-I
Anness 4-II
Anness 5
Anness 6
|
Il-proċedura baġitarja għall-Approprjazzjonijiet tal-FAEG tal-2015
Il-parti tal-baġit tal-FAEG fil-baġit tal-UE mill-2009 sal-2015
L-analiżi tal-eżekuzzjoni tal-baġit tal-FAEG – Is-sena finanzjarja 2015
L-analiżi tal-eżekuzzjoni baġitarja tal-FAEG – Is-sena finanzjarja 2015. Id-dħul assenjat. C4
L-analiżi tal-eżekuzzjoni baġitarja tal-FAEG – Is-sena finanzjarja 2015. Id-dħul assenjat. C5
L-eżekuzzjoni baġitarja tal-FAEG skont l-artikolu u skont l-Istat Membru – Is-sena finanzjarja 2015
L-evoluzzjoni tal-analiżi tan-nefqa tal-FAEG fis-snin finanzjarji mill-2009 sal-2015
|
Nota: Ma’ dan ir-rapport qed jiġi mehmuż Dokument ta’ Ħidma tal-Persunal tal-Kummissjoni dettaljat. It-test sħiħ ta’ dan id-Dokument ta’ Ħidma (bl-Ingliż) u t-tabelli annessi (bl-Ingliż) se jkunu disponibbli wkoll fuq is-sit web Europa tad-DĠ Agrikoltura (http://ec.europa.eu/agriculture/cap-funding/financial-reports/eagf/index_en.htm).
|
1.IL-PROĊEDURA TAL-BAĠIT
1.1.L-Abbozz tal-Baġit Inizjali tal-2015 u l-Ittra Emendatorja 1/2015
Il-Kummissjoni adottat l-Abbozz tal-Baġit inizjali tal-2015 u pproponietu lill-Awtorità Baġitarja fl-24 ta’ Ġunju 2014. L-approprjazzjonijiet ta’ impenn proposti għall-Fond Agrikolu Ewropew ta’ Garanzija (FAEG) taħt l-intestatura 2 tal-Qafas Finanzjarju Pluriennali 2014-2020 ammontaw għal EUR 43 903,8 miljun.
Il-Kunsill adotta l-pożizzjoni tiegħu dwar l-Abbozz tal-Baġit inizjali tal-2015 fit-2 ta’ Settembru 2014, filwaqt li naqqas l-approprjazzjonijiet ta’ impenn għall-FAEG bi EUR 48,5 miljun. Il-Parlament Ewropew adotta l-pożizzjoni tiegħu fit-22 Ottubru 2014, filwaqt li żied l-approprjazzjonijiet ta’ impennn għall-FAEG b’EUR 41 miljun.
Fil-15 ta’ Ottubru 2014 il-Kummissjoni adottat l-Ittra Emendatorja (AL) Nru 1 għall-Abbozz tal-Baġit tal-2015, filwaqt li naqqset l-approprjazzjonijiet ta’ impenn mitluba għall-FAEG b’EUR 448 miljun meta mqabbla mal-Abbozz tal-Baġit inizjali.
1.2.L-Adozzjoni tal-Baġit tal-2015
Fis-27 ta’ Novembru 2014 il-Kummissjoni ppreżentat Abbozz tal-Baġit ġdid tal-2015, fejn talbet l-ammont ta' EUR 43 455,8 miljun bħala approprjazzjonijiet ta’ impenn għall-FAEG . Wara l-preżentazzjoni ta’ dan l-Abbozz tal-Baġit ġdid għall-2015, fit-8 ta’ Diċembru 2014 sar trilogu intensiv bejn it-3 partijiet (il-Kummissjoni, il-Kunsill u l-Parlament Ewropew). Il-Kunsill qabel mal-pakkett ta’ kompromess fit-12 ta’ Diċembru 2014. Il-baġit tal-2015 finalment ġie adottat mill-Parlament Ewropew fis-17 ta’ Diċembru 2014. L-ammont totali tal-approprjazzjonijiet ta’ impenn fil-baġit għall-FAEG kien ta' EUR 43 455,8 miljun u l-approprjazzjonijiet ta’ pagament tiegħu ammontaw għal EUR 43 447,6 miljun.
Id-differenza bejn l-approprjazzjonijiet ta’ impenn u l-approprjazzjonijiet ta’ pagament tirriżulta mill-fatt li, għal ċerti miżuri li jiġu implimentati direttament mill-Kummissjoni, jintużaw approprjazzjonijiet differenzjati. Dawn il-miżuri għandhom x’jaqsmu l-aktar mal-promozzjoni tal-prodotti agrikoli, mal-istrateġija tal-politiki u l-miżuri ta’ koordinazzjoni għall-agrikoltura.
B’mod speċifiku, mill-approprjazzjonijiet ta’ impenn tal-FAEG ivvutati għall-qasam ta’ politika 05 li jammontaw għal EUR 43 455,8 miljun, EUR 2 400,7 miljun kienu previsti għall-miżuri tas-suq fil-Kapitolu 05 02, EUR 40 908,6 miljun għall-għajnuniet diretti fil-Kapitolu 05 03, EUR 87.3 miljun għall-awditjar tan-nefqa agrikola fil-Kapitolu 05 07, u EUR 50,9 miljun għall-istrateġija u l-koordinazzjoni ta’ politika fil-Kapitolu 05 08.
Għad-dettalji, jekk jogħġbok ara l-Anness 1.
Sussegwentement, matul is-sena finanzjarja 2015, l-approprjazzjonijiet tal-FAEG għall-Artikoli 05 08 06 (it-tisħiħ tal-għarfien pubbliku tal-politika agrikola komuni) u 05 08 09 (FAEG – assistenza teknika operattiva) tnaqqsu b’EUR 0,1 miljun u EUR 0,8 miljun rispettivament permezz tal-Baġit Emendatorju 7.
1.3.Id-dħul allokat għall-FAEG
Skont l-Artikolu 43 tar-Regolament (UE) Nru 1306/2013 dwar il-finanzjament tal-Politika Agrikola Komuni
, id-dħul li joriġina mill-korrezzjonijiet finanzjarji skont id-deċiżjonijiet tal-approvazzjoni tal-konformità, minn irregolaritajiet u mill-imposta fuq il-ħalib huwa indikat bħala dħul allokat għall-finanzjament tan-nefqa tal-FAEG. Skont dawn ir-regoli, id-dħul assenjat jista’ jintuża biex ikopri l-finanzjament ta’ kwalunkwe nefqa tal-FAEG. F’każ li xi parti minn dan id-dħul ma tintużax, din tiġi riportata awtomatikament għas-sena baġitarja ta’ wara.
Fiż-żmien li ġie stabbilit il-baġit għall-2015, saret stima ta’ dan id-dħul għall-ammont li kien mistenni li jinġabar matul is-sena baġitarja 2015, kif ukoll għall-ammont li kien mistenni jiġi riportat mis-sena baġitarja 2014 għall-2015. Din l-istima kienet tammonta għal EUR 1 768,6 miljun, u tqieset meta l-Awtorità Baġitarja adottat il-baġit għall-2015. B’mod speċifiku:
–Id-dħul mill-korrezzjonijiet tal-approvazzjoni tal-konformità u mill-irregolaritajiet kien stmat għal EUR 868,6 miljun u EUR 165 miljun rispettivament, filwaqt li d-dħul mill-imposta fuq il-ħalib kien stmat għal EUR 405 miljun. B’hekk, l-ammont totali ta’ dħul assenjat li mistenni jinġabar matul is-sena baġitarja 2015 kien stmat għal EUR 1 438,6 miljun.
–Ġie stmat li d-dħul assenjat li mistenni jiġi riportat mis-sena baġitarja 2014 għall-2015 kien stmat għal EUR 330 miljun.
Fil-baġit tal-2015, dan id-dħul li oriġinarjament kien stmat għal EUR 1 768,6 miljun ġie allokat għal sitt skemi b’dan il-mod:
–EUR 362,4 għall-fondi operattivi għall-organizzazzjonijiet tal-produtturi fis-settur tal-frott u l-ħxejjex inklużi l-miżuri ta’ appoġġ eċċezzjonali għall-membri ta’ dawn l-organizzazzjonijiet,
–EUR 106,9 miljun għall-miżuri eċċezzjonali ta’ appoġġ għal dawk li mhumiex membri ta’ organizzazzjonijiet ta’ produtturi taħt miżuri oħra għas-settur tal-frott u l-ħxejjex,
–EUR 0,9 miljun għall-miżuri ta’ ħżin għat-trab tal-ħalib xkumat fis-settur tal-ħalib u l-prodotti tal-ħalib,
–EUR 2,9 miljun għall-miżuri ta’ ħżin għall-butir u l-krema fis-settur tal-ħalib u l-prodotti tal-ħalib,
–EUR 50,5 miljun għall-miżuri eċċezzjonali ta’ appoġġ għall-produtturi tal-ħalib u għall-ħżin privat għal ġobon taħt miżuri oħra għas-settur tal-ħalib u l-prodotti tal-ħalib,
–EUR 1 245 miljun għall-iskema ta’ pagament uniku (l-għajnuniet diretti).
Għall-iskemi msemmija qabel, is-somma tal-approprjazzjonijiet ivvutati mill-Awtorità Baġitarja u d-dħul assenjat imsemmi hawn fuq jikkorrispondu għal stima totali tal-approprjazzjonijiet disponibbli ta’:
–EUR 903,9 miljun għall-fondi operattivi għall-organizzazzjonijiet tal-produtturi fis-settur tal-frott u l-ħxejjex inklużi l-miżuri ta’ appoġġ eċċezzjonali għall-membri ta’ dawn l-organizzazzjonijiet,
–EUR 107,6 miljun għall-miżuri eċċezzjonali ta’ appoġġ għal dawk li mhumiex membri ta’ organizzazzjonijiet ta’ produtturi taħt miżuri oħra għas-settur tal-frott u l-ħxejjex,
–EUR 50,6 miljun għall-miżuri eċċezzjonali ta’ appoġġ għall-produtturi tal-ħalib u għall-ħżin privat għal ġobon taħt miżuri oħra għas-settur tal-ħalib u l-prodotti tal-ħalib,
–EUR 29 587 miljun għall-iskema ta’ pagament uniku (l-għajnuniet diretti).
Għandu jiġi nnutat li l-Awtorità Baġitarja ma vvutat għall-ebda approprjazzjonijiet għall-miżuri ta’ ħżin għat-trab tal-ħalib xkumat u għall-butir u l-krema fis-settur tal-ħalib u l-prodotti tal-ħalib.
1.4.Il-parti tal-baġit tal-FAEG fil-baġit totali tal-UE
Il-parti finali tal-baġit tal-FAEG (approprjazzjonijiet ta’ impenn) fil-baġit totali tal-UE għal kull sena tal-perjodu 2009-2015 tidher fl-Anness 2.
2.IL-POŻIZZJONI TAL-LIKWIDITÀ U ĠESTJONI TAL-APPROPRJAZZJONIJIET
2.1.Il-ġestjoni tal-approprjazzjonijiet
2.1.1.Approprjazzjonijiet disponibbli għas-sena finanzjarja 2015
F’Euro
|
It-taqsima tan-nefqa tal-
baġit (1)
|
Approprjazzjonijiet ta’ impenn
|
Approprjazzjonijiet ta’ pagament
|
It-taqsima tad-dħul tal-baġit (AR) (2)
|
Previżjonijiet
|
1 Approprjazzjonijiet inizjali tal-FAEG, li minnhom
|
43 455 780 762
|
43 447 624 585
|
1 Deċiżjonijiet ta’ approvazzjoni
|
868 600 000
|
1a. Approprjazzjonijiet b’ġestjoni kondiviża
|
43 388 597 789
|
43 388 597 789
|
2. Irregolaritajiet
|
165 000 000
|
1b. Approprjazzjonijiet b’ġestjoni diretta
|
67 182 973
|
59 026 796
|
3. Imposta addizzjonali mill-produtturi tal-ħalib
|
405 000 000
|
2. Baġit Emendatorju
|
-900 000
|
-900 000
|
Previżjoni totali ta’ AR
|
1 438 600 000
|
3. Trasferimenti lejn/mill-FAEG matul is-sena
|
|
-107 268
|
|
|
4. Approprjazzjonijiet finali tal-FAEG, li minnhom
|
43 454 880 762
|
43 446 617 317
|
|
|
4a. Approprjazzjonijiet taħt ġestjoni kondiviża
|
43 388 791 789
|
43 388 791 789
|
|
|
4b. Approprjazzjonijiet taħt ġestjoni diretta
|
66 088 973
|
57 825 528
|
|
|
(1)
L-approprjazzjonijiet li ddaħħlu fil-baġit tal-2015 wara li tnaqqas id-dħul allokat li mistenni jinġabar fl-2015, kif ukoll id-dħul li ġie riportat mill-2014 għall-2015 skont l-Artikolu 14 tar-Regolament (UE, EURATOM) Nru 966/2012.
(2)
AR: Dħul assenjat li għandu jinġabar. Ma hemm l-ebda ammont ta’ dħul li ddaħħal fil-linja tad-dħul (p.m.)
, iżda l-ammont tal-previżjoni huwa indikat fil-kummenti baġitarji.
|
2.1.2.Eżekuzzjoni tal-baġit tal-approprjazzjonijiet disponibbli għas-sena finanzjarja 2015
F’Euro
|
|
Eżekuzzjoni tal-approprjazzjonijiet ta’ impenn
|
Eżekuzzjoni tal-approprjazzjonijiet ta’ pagament
|
Ġestjoni kondiviża (1)
|
44 883 460 321,82
|
44 883 460 321,82
|
Nefqa b’ġestjoni diretta
|
64 654 779,75
|
56 154 302,09
|
TOTAL
|
44 948 115 101,57
|
44 939 614 623,91
|
(1) Ammonti impenjati. Impenji u pagamenti minbarra d-dħul assenjat ta’ EUR 1 631 635 502,23 (ara l-punt 5 u l-Anness 4-I) li waslu għal ġestjoni kondiviża: EUR 43 251 824 819,59.
Għas-sena finanzjarja 2015, l-ammont proprju tal-approprjazzjonijiet ta’ impenn li ntużaw kien jammonta għal EUR 44 948 115 101,57 filwaqt li dak għall-approprjazzjonijiet ta’ pagament kien jammonta għal EUR 44 939 614 623,91.
2.1.3.L-eżekuzzjoni tal-baġit tal-approprjazzjonijiet ivvutati – In-nefqa ta’ ġestjoni diretta li għamlet il-Kummissjoni
F’Euro
|
Nefqa taħt ġestjoni diretta
|
Approprjazzjonijiet ta’ impenn
|
Diżimpenji
|
Approprjazzjonijiet ta’ pagament
|
Riport għall-2016 (2)
|
Approprjazzjonijiet (C1) (1)
|
66 088 973,00
|
-
|
57 825 528,22
|
-
|
Eżekuzzjoni (C1)
|
64 654 779,75
|
-
|
41 675 092,27
|
13 821 274,51
|
Approprjazzjonijiet ikkanċellati
|
1 434 193,25
|
-
|
2 329 161,44
|
-
|
(1) C1 jirreferi għall-approprjazzjonijiet ivvutati tal-baġit. Dan l-ammont jinkludi trasferimenti lejn “ ġestjoni kondiviża” għal ammont totali ta’ EUR 194 000,00 għall-approprjazzjonijiet ta’ impenn u ta’ pagament, trasferiment “’il barra” tal-FAEG ta’ EUR -107 267,78 għall-approprjazzjonijiet ta’ pagament u Baġit Emendatorju ta’ EUR - 900 000,00 għall-approprjazzjonijiet ta’ impenn u ta’ pagament.
(2) L-approprjazzjonijiet mhux differenzjati biss jiġu riportati għall-2016.
|
L-approprjazzjonijiet ta’ impenn disponibbli għan-nefqa taħt ġestjoni diretta fil-baġit tal-2015 kienu EUR 66,1 miljun. Fl-2015 ġie impenjat ammont ta’ EUR 64,7 miljun. Il-bilanċ ta’ dawn l-approprjazzjonijiet, EUR 1,4 miljun, ġie kkanċellat.
Il-parti l-kbira tal-approprjazzjonijiet ta’ impenn tal-FAEG għan-nefqa taħt ġestjoni diretta tal-Kummissjoni huma approprjazzjonijiet differenzjati.
Ir-riport awtomatiku għall-2016, li jirrigwarda biss approprjazzjonijiet mhux differenzjati, jammonta għal EUR 13,8 miljun.
2.2.Il-pagamenti ta’ kull xahar
2.2.1.Pagamenti ta’ kull xahar lill-Istati Membri taħt ġestjoni kondiviża
2.2.1.1.Pagamenti ta’ kull xahar għall-provvediment għan-nefqa
L-Artikolu 18(1) tar-Regolament (UE) Nru 1306/2013 jiddikjara li “il-pagamenti ta’ kull xahar għandhom isiru mill-Kummissjoni għal infiq magħmul mill-aġenziji tal-pagamenti akkreditati tal-Istati Membri matul ix-xahar ta’ referenza”. Il-pagamenti ta’ kull xahar għandhom isiru lil kull Stat Membru mhux aktar tard mit-tielet jum tax-xogħol tat-tieni xahar wara dak li fih tkun saret in-nefqa.
Il-pagamenti ta’ kull xahar huma rimborż tan-nefqa netta (wara t-tnaqqis tad-dħul) li tkun diġà saret, u jkunu disponibbli abbażi tad-dikjarazzjonijiet ta’ kull xahar mibgħuta mill-Istati Membri
. L-aġġornament tan-nefqa u tad-dħul li jsir kull xahar fil-kotba huwa suġġett għal kontrolli u korrezzjonijiet abbażi ta’ dawn id-dikjarazzjonijiet. Barra minn hekk, dawn il-pagamenti jsiru finali wara l-verifiki tal-Kummissjoni skont il-proċedura tal-approvazzjoni tal-kontabilità tal-kontijiet.
Il-pagamenti li jkunu saru mill-Istati Membri mis-16 ta’ Ottubru 2014 sal-15 ta’ Ottubru 2015 huma koperti mis-sistema ta’ pagamenti ta’ kull xahar.
Għas-sena finanzjarja 2015, l-ammont nett totali tal-pagamenti ta’ kull xahar imwettqa, wara t-tnaqqis tal-approvazzjoni u korrezzjonijiet oħra, kien EUR 43 251 824 819,59.
2.2.1.2.Deċiżjonijiet dwar il-pagamenti ta’ kull xahar għall-2015
Għas-sena finanzjarja 2015, il-Kummissjoni adottat tnax-il deċiżjoni dwar il-pagamenti ta’ kull xahar. Barra minn hekk, f’Diċembru 2015 ġiet adottata deċiżjoni addizzjonali dwar pagamenti ta’ kull xahar, li taġġusta dawk li ngħataw diġà għan-nefqa totali li saret matul is-sena.
3.L-IMPLIMENTAZZJONI TAL-BAĠIT TAL-FAEG TAL-2015
3.1.L-użu tal-approprjazzjonijiet tal-baġit tal-FAEG
L-implimentazzjoni tal-baġit kienet tammonta għal EUR 44 948,1 miljun. Din in-nefqa kienet iffinanzjata mill-approprjazzjonijiet inizjali tal-baġit u bl-użu tad-dħul allokat għall-qasam tal-politika numru 05-L-Agrikoltura u l-Iżvilupp Rurali, li kien magħmul mill-ammont kollu ta’ EUR 341,3 miljun riportat mill-2014 u minn parti mid-dħul allokat miġbur fl-2015, li kien jammonta għal EUR 735,2 miljun minn total ta’ EUR 1 631,6 miljun.
Fil-qasam tal-politika 05-Agrikoltura u Żvilupp Rurali, in-nefqa għall-miżuri tas-suq kienet tammonta għal EUR 2 666,9 miljun, u għall-għajnuniet diretti għal
EUR 42 168 miljun. In-nefqa mġarrba għal ċerti miżuri tas-suq u għajnuniet diretti qabżet l-approprjazzjonijiet ivvotati tal-baġit, u kienet parzjalment koperta bi trasferimenti ta’ approprjazzjonijiet minn partiti oħra tal-baġit, u parzjalment mid-dħul li kien assenjat lill-baġit tal-FAEG.
Għal dettalji dwar l-implimentazzjoni tal-baġit skont il-qasam ta’ politika, jekk jogħġbok irreferi għall-Anness 3.
L-Anness 5 jippreżenta rendikont tan-nefqa għall-miżuri tas-suq, il-pagamenti diretti u l-awditjar tan-nefqa agrikola, skont l-artikolu u skont l-Istat Membru.
4.IL-KUMMENTI DWAR L-IMPLIMENTAZZJONI TAL-BAĠIT TAL-FAEG TAL-2015
Hawn taħt qed jingħata kumment fil-qosor dwar l-implimentazzjoni tal-approprjazzjonijiet tal-baġit tal-FAEG tal-2015, kif ukoll dwar l-użu tad-dħul allokat disponibbli fl-2015 għall-iktar oqsma importanti, ibbażati fuq id-dettalji mogħtija fl-Annessi 3, 4-I u 4-II.
4.1.Il-Kapitolu 05 02: L-interventi fis-swieq agrikoli
4.1.1.Daħla
Il-pagamenti totali għal dan il-kapitolu tal-baġit tal-2015 kienu jammontaw għal EUR 2 666,9 miljun u ġew iffinanzjati mill-approprjazzjonijiet ivvotati li jammontaw għal EUR 2 343 miljun u minn dħul assenjat li jammonta għal EUR 323,8 miljun. Dan id-dħul allokat intuża biex ikopri n-nefqa mġarrba fis-setturi tal-frott u l-ħxejjex u tal-ħalib u l-prodotti tal-ħalib (NB: għad-dettalji, ara l-punti 4.1.3 u 4.1.6). Approprjazzjonijiet li jammontaw għal EUR 54,9 miljun ġew ittrasferiti għal partijiet oħra tal-baġit tal-FAEG. Il-bilanċ li kien għad fadal mid-dħul allokat miġbur fl-2015 kien jammonta għal EUR 199,8 miljun, u dan ġie riportat għall-2016. Fil-każ ta’ partiti li għalihom il-ħtiġijiet qabżu l-approprjazzjonijiet baġitarji, in-nefqa addizzjonali ġiet koperta billi saru trasferimenti minn partiti oħra tal-baġit. Bl-istess mod, għall-miżuri tas-suq fejn intużaw anqas approprjazzjonijiet tal-baġit milli mistenni, l-approprjazzjonijiet disponibbli li rriżultaw minn dan ġew ittrasferiti għal partiti oħra tal-baġit sabiex ikopru n-nefqa addizzjonali skont kif kien meħtieġ.
4.1.2.Żejt taż-żebbuġa
Is-sottoeżekuzzjoni ta’ EUR 2 miljun kienet dovuta għan-nefqa ftit aktar baxxa mġarrba minn xi Stati Membri għall-programmi ta’ ħidma 2014/2015 inklużi fil-miżuri tat-titjib tal-kwalità tagħhom meta mqabbla man-nefqa prevista fil-baġit tal-2015 għal dawn il-programmi.
4.1.3.Frott u ħxejjex
Il-baġit tal-2015 ippreveda approprjazzjonijiet totali disponibbli li jammontaw għal EUR 1 305,5 miljun sabiex jiġu koperti l-ħtiġijiet tal-miżuri kollha ta’ dan is-settur. L-Awtorità Baġitarja vvutat approprjazzjonijiet ta’ EUR 836,2 miljun għal dan minħabba li qieset id-dħul stmat allokat lil dan is-settur li kien jammonta għal EUR 469,3 miljun. In-nefqa mġarrba mill-Istati Membri fl-2015 kienet tammonta għal EUR 1 118,6 miljun. L-iskemi kollha ffinanzjati minn dan l-artikolu ġew implimentati f’livell li kien anqas milli mistenni meta mqabbel mal-ħtiġijiet totali stmati fil-baġit tal-2015. Il-bilanċ ta’ EUR 147 miljun tad-dħul allokat li ma ntużax ġie riportat għas-sena baġitarja tal-2016 biex ikopri l-ħtiġijiet ta’ dik is-sena (NB: id-dokument ta’ ħidma tal-persunal jagħti aktar dettalji dwar dan il-punt).
4.1.4.Prodotti tas-settur tal-vitikultura
Is-sottoeżekuzzjoni ta’ EUR 63,2 miljun meta mqabbla mal-ħtiġijiet previsti tal-baġit tal-2015 fir-rigward ta’ programmi nazzjonali ta’ appoġġ kienet dovuta għan-nefqa aktar baxxa mġarrba minn xi Stati Membri għall-komponenti ta’ promozzjoni u ta’ investiment tal-programmi tal-inbid nazzjonali tagħhom meta mqabbla mal-limiti massimi tal-baġit rispettivi tagħhom previsti fil-baġit tal-2015 għal dawn il-programmi.
1.1.1.Promozzjoni
Fir-rigward tal-pagamenti ta’ miżuri tal-promozzjoni mill-Istati Membri, l-eżekuzzjoni żejda ta’ EUR 2,3 miljuni meta mqabbla mal-ħtiġijiet previsti tal-baġit tal-2015 kienet dovuta għan-nefqa ogħla mġarrba minn xi Stati Membri għall-programmi ta’ promozzjoni tagħhom li huma approvati mill-Kummissjoni meta mqabbla man-nefqa prevista fil-baġit tal-2015 għal dawn il-programmi.
Fir-rigward tal-pagamenti diretti li saru mill-Unjoni Ewropea, il-Kummissjoni wettqet approprjazzjonijiet ta’ madwar EUR 1,2 miljun li kienu kważi ugwali għall-ammont previst fil-baġit tal-2015 għal dawn il-pagamenti.
4.1.6.Ħalib u prodotti tal-ħalib
Il-baġit tal-2015 ippreveda approprjazzjonijiet totali disponibbli ta’ EUR 131,4 miljun sabiex jiġu koperti l-ħtiġijiet tal-miżuri kollha ta’ dan is-settur. L-Awtorità Baġitarja vvutat approprjazzjonijiet ta’ EUR 77,1 miljun għal dan minħabba li qieset id-dħul stmat allokat lil dan l-artikolu tal-baġit, li kien jammonta għal EUR 54,3 miljun. In-nefqa mġarrba mill-Istati Membri fl-2015 kienet ta’ EUR 119,6 miljun. L-iskemi kollha ffinanzjati minn dan l-artikolu ġew implimentati f’livell li kien anqas milli mistenni meta mqabbel mal-ħtiġijiet totali stmati fil-baġit tal-2015. Il-bilanċ ta’ EUR 52.7 miljun tad-dħul allokat li ma ntużax ġie riportat għas-sena baġitarja tal-2016 biex ikopri l-ħtiġijiet ta’ dik is-sena (NB: id-dokument ta’ ħidma tal-persunal jagħti aktar dettalji dwar dan il-punt).
4.1.7.Il-laħam tal-majjal, il-bajd u l-pollam, it-trobbija tan-naħal u prodotti oħrajn li ġejjin mill-annimali
Il-baġit tal-2015 ippreveda approprjazzjonijiet totali disponibbli ta’ EUR 40,8 miljun sabiex jiġu koperti l-ħtiġijiet tal-miżuri kollha ta’ dan is-settur. In-nefqa mġarrba mill-Istati Membri fl-2015 kienet tammonta għal EUR 44,2 miljun u kienet iffinanzjata kemm mill-approprjazzjonijiet ivvutati ta’ EUR 40.8 miljun kif ukoll mit-trasferimenti ta’ approprjazzjonijiet li jammontaw għal EUR 3,4 miljun minn oqsma oħra tal-baġit tal-2015 (NB: id-dokument ta’ ħidma tal-persunal jagħti aktar dettalji dwar dan il-punt).
4.2.Il-Kapitolu 05 03: L-għajnuniet diretti
Il-pagamenti totali għal dan il-kapitolu tal-baġit kienu jammontaw għal EUR 42 168 miljun u ġew iffinanzjati mill-approprjazzjonijiet ivvutati tal-baġit li kienu jammontaw għal EUR 40 561,4 miljun u minn dħul assenjat li kien jammonta għal EUR 752,7 miljun. Dan tal-aħħar intuża biex ikopri n-nefqa mġarrba għall-iskema ta’ pagament uniku (NB: għad-dettalji, ara l-punt 4.2.1). L-approprjazzjonijiet ivvutati li ma ntużawx kienu jammontaw għal EUR 347,2 miljun kif turi d-differenza bejn l-approprjazzjonijiet ivvutati ta EUR 40 561,4 miljun użati għar-rimborż lill-Istati Membri u l-approprjazzjonijiet ivvutati inizjali ta’ EUR 40 908,6 miljun inklużi fil-baġit tal-2015. Dawn l-approprjazzjonijiet ivvutati li ma ntużawx ġew imsaħħa bi trasferiment ta’ approprjazzjonijiet ivvutati li kienu jammontaw għal EUR 85,8 miljun minn partijiet oħra tal-baġit tal-FAEG, u b’hekk, ippermettew ir-rikostituzzjoni tal-ammont mhux użat tar-riżerva għall-kriżijiet ta’ EUR 433 miljun, li kien stabbilit mid-dixxiplina finanzjarja proposta fl-2015, u li ġie trasferit għall-artikolu tal-baġit 05 03 09 sabiex, l-ammont tad-dixxiplina finanzjarja applikata b’mod effettiv ta’ EUR 409,8 miljun, ikun jista’ jiġi riportat fl-2016 għar-rimborż tiegħu lill-Istati Membri kkonċernati. Il-bilanċ li kien għad fadal mid-dħul allokat miġbur fl-2015 kien ta’ EUR 696,6 miljun, u dan ġie riportat għall-2015. Fil-każ ta’ partiti li għalihom il-ħtiġijiet qabżu l-approprjazzjonijiet ivvutati tal-baġit, in-nefqa addizzjonali ġiet koperta billi saru trasferimenti tal-approprjazzjonijiet ivvutati minn partiti oħra tal-baġit jew ta’ dħul assenjat. Bl-istess mod, għall-għajnuniet diretti, fejn intużaw anqas approprjazzjonijiet tal-baġit milli mistenni, l-approprjazzjonijiet disponibbli li rriżultaw minn dan ġew ittrasferiti għal partiti oħra tal-baġit sabiex ikopru n-nefqa addizzjonali skont kif kien meħtieġ.
4.2.1.L-Artikolu 05 03 01: L-għajnuniet diretti diżakkoppjati
L-iskemi ewlenin iffinanzjati mill-approprjazzjonijiet ta’ dan l-Artikolu huma l-iskema ta’ pagament uniku (SPU), l-iskema ta’ pagament uniku skont l-erja (SPUE) u l-appoġġ speċifiku diżakkoppjat skont l-Artikolu 68 tar-Regolament tal-Kunsill (KE) Nru 73/2009. L-iskemi ta’ għajnuna kollha li jidħlu f’dan l-artikolu jitħallsu b’mod indipendenti mill-produzzjoni iżda b’ċerti kundizzjonijiet, pereżempju l-fatt li titħares il-kundizzjonalità. Il-ħtiġijiet baġitarji tal-2015 għal għajnuniet diretti diżakkoppjati kienu jammontaw għal EUR 38 642 miljun li għalihom l-Awtorità Baġitarja vvutat approprjazzjonijiet li kienu jammontaw għal EUR 37 397 miljun wara li tqies id-dħul assenjat għal dan is-settur li kien jammonta għal EUR 1 245 miljun. In-nefqa mġarrba mill-Istati Membri għall-iskemi kollha li jidħlu f’dan l-artikolu kienet ta’ EUR 38 293,5 miljun u b’hekk qabżet l-approprjazzjonijiet ta’ EUR 37 397 miljun ivvutati għall-2015 b’EUR 896,5 miljun. Dan l-aħħar ammont tan-nefqa ddikjarata kien kopert parzjalment bit-trasferimenti minn partiti oħra tal-baġit li kienu jammontaw għal EUR 143,8 miljun u parzjalment bid-dħul assenjat li kien jammonta għal EUR 752,7 miljun. (NB: id-dokument ta’ ħidma tal-persunal jagħti aktar dettalji dwar dan il-punt).
4.2.2.L-Artikolu 05 03 02: Għajnuniet diretti oħra
L-approprjazzjonijiet ta’ dan l-artikolu jkopru n-nefqa għal għajnuniet diretti oħra li għalihom l-Istati Membri għażlu li jżommu ċertu rabta bejn il-pagament ta’ dawn l-għajnuniet u l-produzzjoni għal għadd ta’ setturi, b’kundizzjonijiet iddefiniti sewwa u b’limiti ċari, sabiex ma tiġix abbandunata din il-produzzjoni. Tlettax-il skema huma ffinanzjati permezz ta’ dan l-artikolu.
Għal dawn l-iskemi, il-Kummissjoni kienet stmat li kien se jkun hemm bżonn ta’ approprjazzjonijiet li jammontaw għal EUR 3 078,4 miljun fl-2015. L-Istati Membri nefqu EUR 3 020,5 miljun għalihom (NB: id-dokument ta’ ħidma tal-persunal jagħti aktar dettalji dwar dan il-punt).
4.2.3.L-Artikolu 05 03 09: Ir-rimborż tal-għajnuniet diretti b’rabta mad-dixxiplina finanzjarja
L-Awtorità Baġitarja ma allokat l-ebda approprjazzjoni għal dan l-artikolu. Dan l-artikolu ġie stabbilit għall-ewwel darba fis-sena baġitarja tal-2014 biex jiffaċilita l-ġbir ta’ approprjazzjonijiet ivvutati mhux impenjati li jinvolvu biss is-sena baġitarja tal-2014 supplimentati mill-approprjazzjonijiet tar-riżerva mhux użata għal kriżijiet sabiex jiġu riportati għas-sena baġitarja li jmiss tal-2015 u jiffinanzjaw ir-rimborż tad-dixxiplina finanzjarja applikata għall-għajnuniet diretti fir-rigward tas-sena kalendarja tal-2014
.
Mill-ammont ta’ EUR 868,2 miljun, li jikkorrispondi għad-dixxiplina finanzjarja applikata matul is-sena finanzjarja tal-2014, li ġie riportat għall-baġit tal-2015 għal rimborż, l-Istati Membri ħallsu lura EUR 854 miljun. Id-differenza ta’ EUR 14,2 miljun terġa' tmur lura fil-baġit tal-2015 biex tiġi rritornata lill-Istati Membri permezz tal-ewwel Baġit Emendatorju tas-sena baġitarja ta’ wara (NB: id-dokument ta’ ħidma tal-persunal jagħti aktar dettalji dwar dan il-punt; ara wkoll il-punt 4.2.4 hawn taħt).
4.2.4.L-Artikolu 05 03 10: Ir-riżerva għall-kriżijiet fis-settur agrikolu
L-approprjazzjonijiet ta’ dan l-artikolu huma maħsuba biex ikopru n-nefqa għall-miżuri li jridu jittieħdu biex jiġu ffaċċjati l-kriżijiet il-kbar li jolqtu l-produzzjoni jew id-distribuzzjoni agrikola. Ir-riżerva għandha tiġi stabbilita billi, fil-bidu ta’ kull sena, jiġi applikat tnaqqis għall-għajnuniet diretti permezz tal-mekkaniżmu ta’ dixxiplina finanzjarja skont l-Artikoli 25 u 26 tar-Regolament (UE) Nru 1306/2013, kif ukoll skont l-Artikolu 8 tar-Regolament (UE) Nru 1307/2013. Din ir-riżerva ma tistax taqbeż ammont annwali massimu ta’ EUR 400 miljun (fi prezzijiet tal-2011). Għas-sena baġitarja tal-2015, l-ammont ekwivalenti tar-riżerva għall-kriżijiet fi prezzijiet attwali kien ta’ EUR 433 miljun. Ir-riżerva ma ntużatx fis-sena finanzjarja tal-2015.
Għas-sena tat-talba tal-2015, id-dixxiplina finanzjarja ġiet ikkalkulata esklussivament għall-kostituzzjoni tar-riżerva tal-kriżi ta’ EUR 433 miljun. Madankollu, sa tmiem is-sena finanzjarja, approprjazzjonijiet ivvutati mhux impenjati li jikkorrispondu għall-ammont ta’ dixxiplina finanzjarja applikata effettivament għas-sena tat-talba tal-2015 (filwaqt li jitqies l-ammont mhux użat tar-riżerva) ġew ittrasferiti għall-artikolu tal-baġit 05 03 09 biex jiġi riportat għas-sena finanzjarja li jmiss u, b’dan il-mod, jiffinanzja r-rimborż ta’ dixxiplina finanzjarja imposta fuq il-bdiewa fis-sena kalendarja tal-2015.
4.3.Il-Kapitolu 05 07: L-awditjar tan-nefqa agrikola
4.3.1.L-Artikolu 05 07 01: Il-kontroll tan-nefqa agrikola
Dan l-artikolu jinvolvi l-miżuri li ttieħdu sabiex jissaħħu l-mezzi ta’ kontroll fuq il-post u biex jittejbu s-sistemi ta’ verifika sabiex jiġi limitat ir-riskju ta’ frodi u ta’ irregolaritajiet b’dannu għall-baġit tal-Unjoni. Huwa jinkludi wkoll in-nefqa li tista’ tkun meħtieġa sabiex jiġu ffinanzjati ċerti korrezzjonijiet li jista’ jkun hemm bżonn favur l-Istati Membri, li jkunu marbutin mal-kontabbiltà u mal-konformità (NB: id-dokument ta’ ħidma tal-persunal jagħti aktar dettalji dwar dan il-punt).
4.3.2.L-Artikolu 05 07 02: Is-soluzzjoni ta’ tilwim
L-approprjazzjonijiet ta’ dan l-artikolu huma maħsuba biex ikopru n-nefqa li għaliha l-Kummissjoni tista’ tinżamm responsabbli permezz ta’ deċiżjoni ta’ qorti tal-ġustizzja, fosthom l-ispejjeż tal-ħlas tat-talbiet għad-danni u l-imgħax. Fis-27 ta’ Settembru 2012, il-Qorti Ewropea tal-Ġustizzja qatgħet is-sentenza fil-Każijiet Magħquda C-113/10, C-147/10 u C-234/10 (is-sentenza fil-każ ta’ Jülich-II). Il-baġit tal-2015 ippreveda approprjazzjonijiet ta’ EUR 60,5 miljun għall-pagament tal-imgħax kumpensatorju lill-operaturi skont din is-sentenza. Madankollu, l-Istati Membri ġarrbu u ddikjaraw nefqa li tammonta għal madwar EUR 1,7 miljun għal dawn il-pagamenti. Għalhekk, l-approprjazzjonijiet li jammontaw għal EUR 58,8 miljun ġew ittrasferiti għal partiti oħra tal-baġit tal-2015 sabiex jiffinanzjaw il-ħtiġijiet ta’ dawn il-partiti.
5.L-IMPLIMENTAZZJONI TAD-DĦUL ASSENJAT
5.1.Id-dħul allokat għall-FAEG
Id-dħul allokat li ġie riportat fir-realtà mill-2014 għall-2015 ammonta għal EUR 341,3 miljun, u dan intuża kompletament għall-finanzjament tan-nefqa tas-sena baġitarja tal-2015, skont l-Artikolu 14 tar-Regolament Finanzjarju. Kif ippreżentat fl-Anness 4-II, dan l-ammont kopra n-nefqa ta’ EUR 280,6 miljun għall-fondi operattivi għall-organizzazzjonijiet tal-produtturi u għal miżuri oħra (miżuri eċċezzjonali temporanji) fis-settur tal-frott u l-ħxejjex, ta’ EUR 11 miljun għal miżuri ta’ ħżin għat-trab xkumat u butir kif ukoll għall-miżuri oħra (miżuri eċċezzjonali temporanji) fis-settur tal-ħalib u l-prodotti tal-ħalib u ta’ EUR 49,7 miljun għall-iskema ta’ pagament uniku.
F’dak li għandu x’jaqsam mad-dħul allokat miġbur fl-2015, l-Anness 4-I juri li dan id-dħul kien jammonta għal EUR 1 631,6 miljun, u li dan kien ġej mill-affarijiet li ġejjin:
–Il-korrezzjonijiet tal-proċedura tal-approvazzjoni tal-konformità, li kienu jammontaw għal EUR 1 066,6 miljun;
–Id-dħul mill-irregolaritajiet, li kien jammonta għal EUR 155,5 miljun.
–Il-ġbir tal-imposti fuq il-ħalib, li kien jammonta għal EUR 409,6 miljun.
Id-dħul assenjat miġbur fl-2015 intuża biex ikopri n-nefqa mġarrba għall-miżuri li ġejjin:
–EUR 30,7 miljun għall-miżuri eċċezzjonali ta’ appoġġ għal dawk li mhumiex membri ta’ organizzazzjonijiet ta’ produtturi taħt miżuri oħra għas-settur tal-frott u l-ħxejjex,
–EUR 0,2 miljun u EUR 0,9 miljun għall-miżuri ta’ ħżin għat-trab tal-ħalib xkumat u tal-butir u l-krema korrispondenti fis-settur tal-ħalib u l-prodotti tal-ħalib,
–EUR 0,5 miljun għall-miżuri eċċezzjonali ta’ appoġġ għall-produtturi tal-ħalib u għall-ħżin privat għal ġobon taħt miżuri oħra għas-settur tal-ħalib u l-prodotti tal-ħalib,
–EUR 703 miljun ġew assenjati għall-iskema ta’ pagament uniku (għajnuniet diretti).
Il-bilanċ tad-dħul assenjat miġbur fl-2015, li jammonta għal EUR 896,4 miljun, ġie riportat awtomatikament fil-baġit tal-2016 sabiex jiffinanzja l-ħtiġijiet baġitarji ta’ dik is-sena.
Għad-dettalji tista’ tara l-Annessi 4-I u 4-II.
6.ANALIŻI SKONT IT-TIP TA’ NEFQA
In-nefqa totali tal-FAEG tammonta għal EUR 44 948,1 miljun. Minn hawn ’il quddiem, din in-nefqa hija mqassma skont il-kategoriji ewlenin tar-rappurtar, flimkien mal-perċentwali li dawn jirrappreżentaw fin-nefqa totali tal-FAEG għall-2015:
Il-ħżin
In-nefqa għall-ħżin tammonta għal EUR 18,4 miljun, jiġifieri 0,04 % tan-nefqa totali. Dan l-ammont jirrappreżenta l-aktar in-nefqa mġarrba għall-ħżin privat tal-butir.
Ir-rifużjonijiet fuq l-esportazzjoni
In-nefqa għar-rifużjonijiet fuq l-esportazzjoni kienet tammonta għal EUR 0,3 miljun, jiġifieri għal 0,001 % tan-nefqa totali, u kellha x’taqsam l-aktar mal-ħlas tal-bilanċi pendenti għall-esportazzjonijiet taċ-ċereali u tat-tjur li saru fl-imgħoddi.
Miżuri oħra tas-suq
Minbarra l-ħżin u r-rifużjonijiet fuq l-esportazzjoni, in-nefqa għall-miżuri l-oħra tas-suq ammontat għal EUR 2 698 miljun, jiġifieri għal 6 % tal-ammont totali għas-sena. Din il-kategorija tkopri n-nefqa li hija marbuta b’mod ewlieni maż-żejt taż-żebbuġa, mal-frott u l-ħaxix, mal-inbid, mal-pjanti tessili, mal-POSEI, mal-miżuri ta’ promozzjoni, mal-ħalib u l-prodotti tal-ħalib u mat-trobbija tan-naħal. Din in-nefqa tinkorpora ammonti żgħar oħra u tinkludi l-korrezzjonijiet li ġejjin mill-approvazzjoni tal-kontijiet u mis-soluzzjoni tat-tilwim.
L-għajnuniet diretti
In-nefqa għall-għajnuniet diretti ammontat għal EUR 42 168 miljun, jiġifieri ta’ 93.8 % mill-ammont totali.
In-nefqa b’ġestjoni diretta
Din in-nefqa kienet tammonta għal EUR 64,7 miljun (f’approprjazzjonijiet ta’ impenn), jiġifieri ta’ 0,1 % mill-ammont totali, u tħallset direttament mill-Kummissjoni. Din kienet tkopri l-aktar in-nefqa marbuta mal-kontabilità tal-azjendi agrikoli, l-istħarriġ dwar l-istrutturi tal-azjendi agrikoli, l-informazzjoni dwar il-PAK, l-għajnuna teknika, eċċ.
L-Iżvilupp rurali taħt l-ex-Garanzija tal-FAEG
Ma tista’ ssir l-ebda approprjazzjoni oħra ta’ impenn għal dawn il-programmi. L-Istati Membri issa qed jagħlqu dawn il-programmi u qed jirkupraw ammonti li ma tħallsux meta suppost. L-ammont finali nett irkuprat f’dan l-artikolu jammonta għal madwar EUR 1,3 miljun.
L-evoluzzjoni tal-analiżi tan-nefqa tal-FAEG skont it-tip għall-perjodu mill-2009 sal-2015 hija mogħtija fl-Anness 6.