IL-KUMMISSJONI EWROPEA

Brussell, 5.7.2016

COM(2016) 439 final

RAPPORT TAL-KUMMISSJONI LILL-PARLAMENT EWROPEW U LILL-KUNSILL

DWAR IL-FOND TA' GARANZIJA GĦALL-AZZJONIJIET ESTERNI U L-ĠESTJONI TIEGĦU FL-2015

{SWD(2016) 220 final}

Werrej

1.Introduzzjoni

2.Il-Qagħda Finanzjarja tal-Fond fil-31 ta' Diċembru 2015

2.1.Flussi finanzjarji tal-Fond

2.2.Tranżazzjonijiet sinifikanti

2.3.Tranżazzjoni sinifikanti wara d-data tar-rapportar

2.4.Preżentazzjoni tal-kontijiet

2.4.1.Bażi tal-preparazzjoni

2.4.2.Dikjarazzjonijiet finanzjarji prekonsolidati għall-Fond il-Ħamis, 31 ta' Diċembru 2015

3.Pagamenti lill-Fond jew minnu

3.1.Bażi ġuridika għall-pagamenti lill-Fond mill-baġit ġenerali

3.2.Pagamenti lill-baġit ġenerali jew minnu matul is-sena finanzjarja

3.2.1.Proviżjonament tal-Fond

3.2.2.Imgħax mill-investiment tal-assi likwidi tal-Fond

3.2.3.Dħul mill-operazzjonijiet finanzjarji

3.2.4.Dħul u nfiq minn attivitajiet operattivi

4.L-obbligazzjonijiet tal-Fond

4.1.Inadempjenzi fil-pagament

4.2.Rimunerazzjoni tal-BEI

1.Introduzzjoni

Ir-Regolament tal-Kunsill (KE, Euratom) Nru 480/2009 tal-25 ta' Mejju 2009 (verżjoni kodifikata) ("ir-Regolament") 1 stabbilixxa Fond ta' Garanzija għall-azzjonijiet esterni ("il-Fond") biex jitħallsu lura l-kredituri tal-Unjoni fil-każ ta’ inadempjenza mill-benefiċjarji ta’ self maħruġ jew garantit mill-Unjoni Ewropea. Skont l-Artikolu 7 tar-Regolament, il-Kummissjoni fdat il-ġestjoni finanzjarja tal-Fond lill-Bank Ewropew tal-Investiment (BEI) skont ftehim iffirmat bejn il-Komunità u l-BEI datat il-25 ta' Novembru 1994 u sussegwentement emendat fit-23 ta' Settembru 1996, fit-8 ta' Mejju 2002, fil-25 ta' Frar 2008 u fid-9 ta' Novembru 2010 ("il-Ftehim").

L-Artikolu 8 tar-Regolament jitlob lill-Kummissjoni tibgħat rapport lill-Parlament Ewropew, lill-Kunsill u lill-Qorti tal-Awdituri dwar is-sitwazzjoni tal-Fond u l-ġestjoni tiegħu għal kull sena finanzjarja sa mhux aktar tard mill-31 ta' Mejju tas-sena ta' wara.

Dan ir-rapport flimkien mad-Dokument ta' Ħidma tal-Persunal tal-Kummissjoni (SWD) jipprovdi din l-informazzjoni. Huwa bbażat fuq dejta li waslet mill-BEI, b'konformità mal-ftehim.

2.Il-Qagħda Finanzjarja tal-Fond fil-31 ta' Diċembru 2015

Il-qagħda finanzjarja tal-Fond hija s-somma tal-flussi finanzjarji kollha minn mindu twaqqaf il-Fond fl-1994.

2.1.Flussi finanzjarji tal-Fond

Il-Fond kien jammonta għal total ta' EUR 2,343,091,110.14 (ara l-Anness tal-SWD: Dikjarazzjonijiet Finanzjarji tal-Fond ta' Garanzija fil-31 ta’ Diċembru 2015, kif mogħtija mill-BEI). Dan huwa l-ammont tal-flussi minn mindu ġie stabbilit il-Fond:

Il-valur tal-kontabilità tal-Fond żdied b’madwar EUR 205 miljun fl-2015. Dan jiġi spjegat kif ġej:

B'żieda

Fil-kontribuzzjoni mill-baġit (ammont ta’ proviżjonament) ta’ EUR 257 miljuni biex jiġi aġġustat il-Fond għall-ammont fil-mira ta’ 9%

Id-dħul nett fuq l-operazzjonijiet finanzjarji li ammontaw għal EUR 32 miljun

Bi tnaqqis

Fl-Intervent tal-Fond biex ikopri l-inadempjenzi fil-pagament mis-Sirja għal ammont totali ta’ EUR 60 miljun.

L-istima tal-portafoll żdiedet b' EUR 24 miljun minħabba l-ipprezzar skont il-valur fis-suq.

2.2.Tranżazzjonijiet sinifikanti

(1)Minn Novembru 2011, il-BEI qed jiffaċċa arretrati fuq self sovran Sirjan. B’konsegwenza ta’ dan, u f’konformità mal-ftehim ta' garanzija bejn l-UE u l-BEI, il-BEI għamel 29 sejħa fuq il-Fond ta’ Garanzija tal-UE sal-31 ta' Diċembru 2015 għal ammont totali ta’ EUR 225,1 miljun (ara l-punt 4.1 Inadempjenza fil-pagamenti).

(2)Fi Frar 2015, il-kontribuzzjoni mill-baġit lill-Fond kienet ikkalkulata b’segwitu tal-Artikolu 3 u tal-Artikolu 5 tar-Regolament:

L-Artikolu 3 tar-Regolament 2 jistabbilixxi ammont fil-mira għall-Fond ta’ 9% tat-total tal-obbligazzjonjiet tal-kapital pendenti li jirriżultaw minn kull operazzjoni, flimkien ma' kwalunkwe mgħax dovut mhux imħallas.

Skont l-Artikolu 5 tar-Regolament, l-ammont li jrid jiġi trasferit mill-baġit għall-Fond fis-sena n + 1 huwa kkalkulat fuq il-bażi tad-differenza bejn l-ammont fil-mira u l-valur tal-assi netti tal-Fond fi tmiem is-sena n - 1, ikkalkulat fil-bidu tas-sena n.

Biex il-Fond jiġi aġġustat għal 9% tat-total tal-obbligazzjonijiet tal-kapital pendenti, ammont ta’ EUR 257,1 miljun iddaħħal fil-baġit tal-2016 għall-proviżjonament tal-Fond. Fil-31.12.2014, l-ammont fil-mira kien ta' EUR 2,371,8 miljuni li jikkorrispondi għal 9 % tat-total ta' operazzjonijiet ta' garanzija pendenti (EUR 26,353.2 miljun). Id-differenza bejn l-ammont fil-mira u l-assi netti tal-Fond ta' EUR 2,114.7 miljun fil-31.12.2014 kienet ugwali għal EUR 257,1 miljun.

Dan l-ammont intalab għall-proviżjonament tal-Fond fl-2016 u ġie approvat mill-Kunsill u l-Parlament Ewropew bħala parti mill-approvazzjoni tal-baġit tal-2016 f’Novembru tal-2015. Sussegwentement ġie rikonoxxut bħala riċevibbli tal-Fond mill-baġit.

(3)Fi Frar tal-2015 l-ammont ta’ EUR 144,4 miljun ġie trasferit mill-baġit għall-Fond li jikkorrispondi għal ammont ta’ proviżjonament għall-2014 (ara d-dettallji fil-paragrafu 3.2.1 proviżjonament tal-Fond).

2.3.Tranżazzjoni sinifikanti wara d-data tar-rapportar

Fi Frar 2016 ammont ta' EUR 257,1 miljun ġie trasferit mill-baġit għall-Fond li jikkorrispondi għall-proviżjonament għall-2016.

2.4.Preżentazzjoni tal-kontijiet

2.4.1.Bażi tal-preparazzjoni

Id-dikjarazzjonijiet finanzjarji tal-Fond (kif ukoll id-dikjarazzjonijiet finanzjarji prekonsolidati) tħejjew skont ir-regoli tal-kontabilità adottati mill-Uffiċjal tal-Kontabilità tal-Kummissjoni Ewropea, b’mod partikolari “Ir-Regola tal-Kontabilità 11 – Strumenti finanzjarji” kif spjegat fl-SWD.

2.4.2.Dikjarazzjonijiet finanzjarji prekonsolidati għall-Fond il-Ħamis, 31 ta' Diċembru 2015

Id-dikjarazzjonijiet finanzjarji prekonsolidati tal-Fond jitħejjew biex jiġu inklużi l-operazzjonijiet tal-kontijiet li ma jkunux inklużi fid-dikjarazzjonijiet finanzjarji tal-Fond imħejjija mill-BEI (ara l-SWD), li timplika differenza bejn il-valur totali tal-assi tal-Fond fir-rapporti finanzjarji mħejjija mill-BEI (EUR 2,343,091,110.14) u l-valur tal-assi totali fid-dikjarazzjonijiet finanzjarji prekonsolidati tal-Fond (EUR 2 107 985 583). Id-dikjarazzjonijiet finanzjarji prekonsolidati jinkludu kwalunkwe arretrati dovuti flimkien mal-imgħax akkumulat fuq pagament tardiv (imwaqqaf kompletament mill-31.12.2015) u dovuti kontabilistiċi oħrajn 3 sakemm isiru r-rimborżi sħaħ tal-ammonti dovuti lill-Fond. Għaldaqstant, se jkun hemm sett sħiħ ta' dikjarazzjonijiet finanzjarji għall-Fond fl-aħħar tas-sena li jridu jiġu kkonsolidati fid-dikjarazzjonijiet finanzjarji kkonsolidati tal-UE. L-assi kurrenti fid-dikjarazzjonijiet finanzjarji prekonsolidati jinkludu wkoll riċevibbli temporanji mal-BEI ta' EUR 22,016,265 għal sejħiet ta' garanzija li għadhom mhux imħallsa flimkien ma' ammonti relatati, fejn il-BEI jibqa' kreditur tas-Sirja sakemm titħallas is-sejħa. L-obbligazzjonijiet kurrenti jinkludu wkoll ammont pagabbli lill-BEI ta' EUR 22,763,789 għal sejħiet ta' garanzija li għadhom mhux imħallsa flimkien ma' ammonti relatati.

Fond ta’ Garanzija: Karta tal-bilanċ prekonsolidata

Il-karta tal-bilanċ prekonsolidata hija t-tħejjija tal-karta tal-bilanċ għall-konsolidazzjoni tagħha fid-dikjarazzjonijiet finanzjarji konsolidati tal-UE. L-entrati ewlenin huma spjegati fin-noti dwar il-karta tal-bilanċ.

Karta tal-bilanċ — Assi

Karta tal-bilanċ — Obbligazzjonijiet

Noti għall-karta tal-bilanċ:

"Riċevibbli kurrenti" tinkludi ammonti ta’ self li ssejħu iżda għadhom ma tħallsux (pagament f’Jannar - Marzu 2016), flimkien ma’ ammonti relatati.

Id-differenza fil-"Qligħ imfaddal" fl-ekwità meta mqabbla mal-qagħda finanzjarja tal-Fond ippreżentata fl-SWD hija spjegata permezz ta’ rimborżi suċċessivi ta' sejħiet u penali għall-Fond.

“Kontijiet pagabbli” jinkludu sejħiet għal garanziji mhux imħallsa fid-data tal-karta tal-bilanċ flimkien mal-ammonti relatati, l-akkumulazzjoni tat-tariffi għall-irkupru dovuti lill-BEI, il-kummissjoni għall-ġestjoni tal-BEI u t-tariffi tal-awditjar.

Fond ta’ Garanzija: Kont tar-riżultat ekonomiku prekonsolidat

Hekk kif isir għall-karta tal-bilanċ, il-kont tar-riżultat ekonomiku prekonsolidat jitħejja biex ikun inkluż fir-rapporti finanzjarji kkonsolidati tal-UE.

Noti mal-kont tal-eżitu ekonomiku:

"Spejjeż finanzjarji" jikkonsistu f’telf minn indeboliment fuq self surrogat, relatat mal-inadempjenzi fil-pagament (ara t-taqsima 4.1)

3.Pagamenti lill-Fond jew minnu

Din it-taqsima tispjega l-flussi finanzjarji lejn il-Fond jew 'il barra minnu.

3.1.Bażi ġuridika għall-pagamenti lill-Fond mill-baġit ġenerali

Ir-Regolament jiżgura użu aktar effiċjenti tar-riżorsi baġitarji permezz tal-proviżjonament tal-Fond fuq il-bażi tal-ammonti osservati ta' self garantit pendenti. Hekk kif l-ammont ta' obbligazzjonijiet pendenti jiżdied, il-kontribuzzjoni tal-baġit tal-UE meħtieġa biex jinżamm l-ammont fil-mira għall-Fond jiżdied ukoll.

L-ammont fil-mira huwa dak ta’ 9% tat-total tal-obbligazzjonijiet kapitali pendenti tal-Komunitajiet li jkun ġej minn kull operazzjoni, miżjud minn interess dovut mhux imħallas, inklużi t-tipi kollha ta’ operazzjonijiet koperti (self tal-BEI, tal-MFA u tal-Euratom) barra mill-UE. Id-differenza bejn l-ammont fil-mira u l-valur tal-assi netti tal-Fond se tirriżulta fi proviżjonament mill-intestatura tal-baġit 01.03.06 "Proviżjonament tal-Fond ta’ Garanzija" lill-Fond jew permezz ta’ pagament mill-Fond lill-baġit fil-każ ta’ bilanċ pożittiv.

3.2.Pagamenti lill-baġit ġenerali jew minnu matul is-sena finanzjarja

3.2.1.Proviżjonament tal-Fond

Abbażi tal-operazzjonijiet garantiti pendenti ta' EUR 23,609.2 miljun mill-31.12.2012, ammont ta' EUR 144,4 miljun, iddaħħal fl-intestatura tal-baġit 01.03.06 "Proviżjonament tal-Fond ta' Garanzija" fid-dikjarazzjoni tan-nefqa fil-baġit ġenerali tal-Unjoni Ewropea għall-2015. Dan l-ammont tħallas fi tranżazzjoni waħda mill-Baġit għall-Fond fi Frar 2015.

3.2.2.Imgħax mill-investiment tal-assi likwidi tal-Fond

Politika ta’ investiment

L-assi likwidi tal-Fond huma investiti skont il-prinċipji ta’ ġestjoni stipulati fl-Anness tal-Ftehim, kif emendat 4 . Għaldaqstant, 20% tal-Fond irid jiġi investit f'investimenti għal perjodu qasir (sa sena). Dawn l-investimenti jinkludu titoli b'rata varjabbli, irrispettivament mid-dati tal-maturità tagħhom, u titoli b'rati fissi b'massimu ta' sena għad-data tal-maturità, irrispettivament mill-perjodu ta' maturità inizjali tagħhom. Biex jinżamm ekwilibriju bejn l-istrumenti varji li jipprovdu l-likwidità meħtieġa, jinżamm minimu ta' EUR 100 miljun fi strumenti tas-suq tal-flus, partikolarment f'depożiti bankarji.

Sa 80% tal-Fond jista' jitqiegħed f'portafoll ta' bonds b'maturità li jifdal ta' mhux iktar minn 10 snin u 6 xhur mid-data tal-pagament. Id-dewmien medju tal-kollokamenti tal-assi kollha tal-Fond ma jistax jaqbeż il-5 snin. L-investimenti f'bonds għandhom jirrispettaw xi kriterji speċifiċi bħal-likwidità, il-kwalità kreditizja, l-eliġibilità tal-kontropartijiet u l-limiti ta’ konċentrazzjoni. Sabiex tiġi żgurata diversifikazzjoni tajba tar-riskju, l-ammont totali investit fil-bonds għal kull emittent ma jridx jaqbeż l-10% tal-ammont nominali totali tal-portafoll.

Prestazzjoni

Matul is-sena 2015, il-kundizzjonijiet makroekonomiċi u l-ambjent ta' politika monetarja akkomodanti ħafna wasslu fi tnaqqis fir-rati tal-imgħax li ta' sikwit kienu negattivi

Il-Fond ta redditu assolut ta’ +0,47% tul l-2015, bi prestazzjoni aqwa mill-punt ta' riferiment b' 0,9 bps. Il-punt ta’ riferiment tal-Fond huwa taħlita magħmula l-aktar minn indiċijiet iBoxx (b’mod partikolari indiċijiet EUR tas-Sovrani taż-Żona Euro u EUR Kollateralizzati Koperti) u Euribid għall-iskopertura ta' terminu qasir. 

Il-Prestazzjoni pożittiva tal-Fond fl-2015 ġiet spjegata l-aktar mit-tnaqqis tal-parti l-qasira tal-kurvi tar-rendiment (ara t-taqsima 1.4.2 "Prestazzjoni" tal-SWD għal aktar dettalji li seħħew matul is-sena).

3.2.3.Dħul mill-operazzjonijiet finanzjarji

Fl-2015, id-dħul fuq l-imgħax minn flus kontanti u ekwivalenti, fuq it-titoli ammonta għal EUR 40 109 123, imqassam kif ġej:

3.2.4.Dħul u nfiq minn attivitajiet operattivi

L-ispejjeż tal-operazzjonijiet finanzjarji ammontaw għal EUR -1,113,894, li jinkludu t-tariffi ta' ġestjoni tal-BEI għal EUR 861,228, tariffi finanzjarji oħrajn (l-aktar tariffi tal-kustodja) għal EUR 190,955, it-tariffi esterni tal-awditjar għal EUR 39,500, telf mill-kambju mhux realizzat fuq Self surrogat għal EUR 477,789 u t-tariffi akkumulati ta' rkupru EUR 500,000 (l-ammont massimu miftiehem).

4.L-obbligazzjonijiet tal-Fond

L-obbligazzjonijiet tal-Fond jikkorrispondu għall-impenji kollha finanzjarji dovuti mill-Fond.

4.1.Inadempjenzi fil-pagament

Talbiet għall-Fond ta’ Garanzija wara inadempjenzi fil-pagament

Fid-dawl tad-deterjorament tas-sitwazzjoni fis-Sirja, il-Kunsill Affarijiet Barranin, il-Parlament Ewropew u l-Kunsill kienu ħadu xi deċiżjonijiet fl-2011 favur il-pajjiż. B’mod partikolari, huma pprojbixxew żborzi mill-BEI b’rabta ma’ ftehimiet ta’ self eżistenti kif ukoll huma sospiżi kuntratti ta’ assistenza teknika tal-BEI għal proġetti sovrani fis-Sirja. Il-miżuri restrittivi ġew suċċessivament minquxa fir-Regolament tal-Kunsill (UE) Nru 36/2012 tat-18 ta’ Jannar 2012, kif emendat.

Bħala konsegwenza, mhi awtorizzata l-ebda operazzjoni ta’ finanzjament ġdid mill-BEI minn Mejju 2011 u l-iżborżamenti kollha li għaddejjin bħalissa u s-servizzi ta’ assistenza teknika lir-Repubblika Għarbija tas-Sirja ġew sospiżi minn Novembru 2011 sa ma jingħata avviż ieħor.

Filwaqt li fis-snin reċenti s-Sirja kienet ħallset kompletament u fil-ħin is-self lill-Bank, minn Novembru 2011, il-BEI qed jiffaċċa arretrati fuq self sovran Sirjan. B’konsegwenza ta’ dan, u f’konformità mal-ftehim ta' garanzija bejn l-UE u l-BEI, il-BEI għamel 29 sejħa lill-UE dwar il-Fond ta’ Garanzija sal-31 ta' Diċembru 2015 għal ammont totali ta’ EUR 225,1 miljun. Il-pagament tal-aħħar 3 sejħiet (EUR 22,1 miljun) huwa dovut fl-ewwel trimestru tal-2016.

Avvenimenti wara d-data tar-rappurtar

Sa Frar 2016, saret sejħa addizzjonali għal inadempjenzi fil-pagament fis-Sirja għal ammont totali ta’ EUR 7.8 miljun.

4.2.Rimunerazzjoni tal-BEI

Ir-rimunerazzjoni tal-BEI hija komposta mit-tariffi ta' ġestjoni u t-tariffi tal-irkupru. It-tariffi ta' ġestjoni jkompru l-ġestjoni tal-Fond. It-tariffi ta' rkupru jkopru l-isforzi ta' rkupru tal-BEI rigward talbiet wara inadempjenzi koperti mill-garanzija tal-UE għall-operazzjonijiet finanzjarji tal-BEI barra mill-Unjoni.

It-tieni Ftehim Supplimentari għall-Ftehim iffirmat fit-8 ta' Mejju 2002 jistipula li r-rimunerazzjoni tal-Bank trid tiġi kkalkulata bl-applikazzjoni ta’ rati ta' tariffi annwali digressivi għal kull saff tal-assi tal-Fond. Din ir-rimunerazzjoni hija kkalkulata fuq il-bażi tal-medja annwali tal-assi tal-Fond.

Ir-rimunerazzjoni tal-Bank għall-2012 ġiet stabbilita għal EUR 861,228 u ddaħħlet fil-kont tar-riżultat ekonomiku u bħala dovuti (obbligazzjonijiet) fil-karta tal-bilanċ.

It-tariffi ta' rkupru dovuti mill-BEI huma kkalkulati fuq il-bażi tal-Ftehim ta' Rkupru ffirmat bejn il-Kummissjoni u l-Bank f'Lulju 2014. Fi tmiem l-2015 l-ammont akkumulat tat-tariffi rkuprati kien ta' EUR 1,560,285.

(1) ĠU L 145, 10.6.2009, p. 10; ir-Regolament ikkodifika u ħassar ir-Regolament (KE Euratom) Nru 2728/94 tal-31 t'Ottubru 1994 li jistabbilixxi Fond ta' Garanzija għall-azzjonijiet esterni.

(2) Ir-Regolament jistipula li l-operazzjonijiet li jikkonċernaw il-pajjiżi kandidati għall-adeżjoni koperti mill-Fond jibqgħu koperti mill-garanzija tal-UE wara d-data tal-adeżjoni. Madankollu, minn dik id-data ma jibqgħux azzjonijiet esterni tal-UE u jkunu koperti direttament mill-baġit ġenerali tal-Unjoni Ewropea u mhux aktar mill-Fond.

(3) Dovuti kontabilistiċi oħrajn jinkludu differenzi fir-rata tal-kambju, u tariffi ta' rkupru dovuti lill-BEI.

(4) Kif emendat bil-Ftehim Supplimentari Nru 1 tat-23 ta’ Settembru 1996, il-Ftehim Supplimentari Nru 2 tat-8 ta’ Mejju 2002, il-Ftehim Supplimentari Nru 3 tal-25 ta’ Frar 2008 u l-Ftehim Supplimentari Nru 4 tad-9 ta’ Novembru 2010.