EUR-Lex Access to European Union law
This document is an excerpt from the EUR-Lex website
Document 52015PC0004
Proposal for a COUNCIL IMPLEMENTING DECISION authorising the United Kingdom to apply differentiated levels of taxation to motor fuels in certain geographical areas pursuant to Directive 2003/96/EC
Proposta għal DEĊIŻJONI TA’ IMPLIMENTAZZJONI TAL-KUNSILL li tawtorizza lir-Renju Unit japplika livelli ta’ tassazzjoni ddivrenzjati għall-fjuwils tal-magni f’ċerti żoni ġeografiċi skont id-Direttiva 2003/96/KE
Proposta għal DEĊIŻJONI TA’ IMPLIMENTAZZJONI TAL-KUNSILL li tawtorizza lir-Renju Unit japplika livelli ta’ tassazzjoni ddivrenzjati għall-fjuwils tal-magni f’ċerti żoni ġeografiċi skont id-Direttiva 2003/96/KE
/* COM/2015/04 final - 2015/0004 (NLE) */
Proposta għal DEĊIŻJONI TA’ IMPLIMENTAZZJONI TAL-KUNSILL li tawtorizza lir-Renju Unit japplika livelli ta’ tassazzjoni ddivrenzjati għall-fjuwils tal-magni f’ċerti żoni ġeografiċi skont id-Direttiva 2003/96/KE /* COM/2015/04 final - 2015/0004 (NLE) */
MEMORANDUM TA’ SPJEGAZZJONI 1. KUNTEST TAL-PROPOSTA Ir-raġunijiet għall-proposta u
l-għanijiet tagħha It-tassazzjoni fuq il-prodotti
tal-enerġija u fuq l-elettriku fl-Unjoni hija rregolata mid-Direttiva
tal-Kunsill 2003/96/KE ([1])
(minn hawn 'il quddiem imsejħa “id-Direttiva dwar it-Tassazzjoni fuq
l-Enerġija” jew “id-Direttiva”). Skont l-Artikolu 19(1) tad-Direttiva,
flimkien mad-dispożizzjonijiet previsti b’mod partikolari
fl-Artikoli 5, 15 u 17 tagħha, il-Kunsill, billi jaġixxi b’mod
unanimu fuq proposta tal-Kummissjoni, jista’ jawtorizza lil kwalunkwe Stat
Membru jintroduċi aktar eżenzjonijiet jew tnaqqis fil-livell
tat-tassazzjoni għal kunsiderazzjonijiet politiċi
speċifiċi. L-għan ta’ din il-proposta hu li r-Renju
Unit jitħalla jintroduċi rata mnaqqsa ta’ dazju tas-sisa fuq
il-fjuwils tal-magni użati bħala propellant (jiġifieri l-petrol
bla ċomb u ż-żejt tal-gass) fiż-żoni
ġeografiċi li ġejjin iddefiniti fit-talba tar-Renju Unit
bir-referenzi għall-kodiċi postali tagħhom: IV54 (Strathcarron,
Highland - l-Iskozja), IV26 (Ullapool, Highland - l-Iskozja), IV27 (Lairg,
Highland – l-Iskozja), NE48 (Hexham, Northumberland - l-Ingiliterra), PH41
(Mallaig, Highland - l-Iskozja), KW12 (Halkirk, Highland – l-Iskozja), PA80
(Oban, Argyll and Bute – l-Iskozja), PH36 (Acharacle, Highland – l-Iskozja),
IV22 (Achnasheen, Highland - l-Iskozja), PA38 (Appin, Argyll and Bute –
l-Iskozja), PH23 (Carrbridge, Highland - l-Iskozja), PH19 (Dalwhinnie, Highland
- l-Iskozja), IV21 (Gairloch, Highland - l-Iskozja), LA17 (Kirkby-in-Furness,
Cumbria - l-Ingilterra), EX35 (Lynton, Devon - l-Ingilterra), IV14
(Strathpeffer, Highland - l-Iskozja) u ż-żona koperta mill-belt
postali ta' Hawes (li tinsab f’North Yorkshire, l-Ingilterra). Skont l-informazzjoni mogħtija mill-awtoritajiet tar-Renju Unit,
il-kodiċijiet postali jippermettu definizzjoni ċara tal-ambitu
territorjali tal-miżura. Is-sistema tal-kodiċi postali hija l-istess
fl-Ingilterra, l-Iskozja, Wales u l-Irlanda ta’ Fuq. Fir-Renju Unit, il-bliet
postali u d-distretti tal-kodiċijiet postali jkopru għadd ta’
lokalitajiet f’żona. Fiż-żoni rurali, l-ikbar ċentru
tal-popolazzjoni f'distrett tal-kodiċi postali jew f’belt postali x’aktarx
ikun raħal. Il-bliet u d-distretti jvarjaw fid-daqs, pereżempju, iż-żona
tal-kodiċi postali IV27 hija l-akbar distrett tal-kodiċi postali
fir-Renju Unit, bi 3 397 km2, u hija ferm akbar miż-żona
koperta bil-kodiċi postali NE48, li hija ta’ madwar 750 km2.
It-talba għad-deroga tirreferi għall-eqreb bliet postali
taż-żoni magħżula kif ukoll għall-awtorità lokali usa'
taż-żona. Pereżempju, it-talba għad-deroga
għaż-żona tal-kodiċi postali IV21 (Gairloch, Highland -
l-Iskozja), tfisser li l-belt postali f’din iż-żona IV21 hija
Gairloch u li l-awtorità lokali hija Highland – l-Iskozja. Il-bliet postali ta’
spiss ikunu magħmula minn raħal wieħed jew aktar, u ħafna
drabi jissemmew għal wieħed mill-irħula li jinsabu fihom. It-tabella ta’ hawn taħt turi l-ismijiet u n-numri tal-bliet
postali u tal-irħula koperti mid-distretti tal-kodiċijiet postali
elenkati fl-applikazzjoni: Distrett tal-kodiċi postali || Belt (Bliet) postali || Irħula PH36 || 1: Acharacle || 6: Acharacle, Strontian, Kilchoan, Salen, Glenborrodale, Achateny IV22 || 1: Achnasheen || 4: Achnasheen, Poolewe, Laide, Kinlochewe IV21 || 1: Gairloch || 5: Gairloch, Badachro, Melvaig, Big Sand, Port Henderson PH19 || 1: Dalwhinnie || 1: Dalwhinnie PH23 || 1: Carrbridge || 2: Carrbridge, Bogroy IV14 || 1: Strathpeffer || 3: Strathpeffer, Contin, Jamestown PA38 || 1: Appin || 3: Appin, Duror, Portnacroish LA17 || 1: Kirkby-in-Furness || 1: Kirkby-in-Furness EX35 ([2]) || 2: Lynton u Lynmouth || 3: Barbrook, Brendon, Lynmouth IV54 || 1: Strathcarron || 4: Strathcarron, Locharron, Applecross, Shieldaig IV26 || 1: Ullapool || 1: Achiltibuie IV27 || mhux applikabbli || 7: Lairg, Durness, Tongue, Scourie, Lochinver, Kinlochbervie, Talmine PH41 || mhux applikabbli || 2: Mallaig, Inverie KW12 || 1: Halkirk || 1: Halkirk PA80 || mhux applikabbli || 3: Lochaline, Morvern, Drimnin NE48 || mhux applikabbli || 7: Bellingham, Falstone, Kielder, Wark, Tarset, West Woodburn, Barrasford Distrett tal-kodiċi postali || Belt postali || Irħula mhux applikabbli || Hawes || 2: Gayle, Butterset F’xi każijiet (jiġifieri għall-kodiċijiet IV27,
PH41, PA80, NE48), id-distretti tal-kodiċijiet postali ma fihomx belt
postali sħiħa, u għalhekk ġiet ipprovduta biss il-lista
tal-irħula. Għall-biċċa l-kbira taż-żoni fuq
il-lista, il-belt postali u d-distrett tal-kodiċi postali huma l-istess. Skont l-informazzjoni pprovduta mir-Renju
Unit, il-prezz tal-fjuwil fiż-żoni li għandhom jibbenefikaw
mill-miżura bħala medja huwa ta’ GBP 100 (bejn wieħed u
ieħor EUR 128.5) ([3])
ogħla għal kull 1 000 litru mill-prezz medju tal-fjuwil
fil-bqija tar-Renju Unit. Il-prezzijiet f'dawn iż-żoni huma
ogħla minħabba li l-ispejjeż tat-trasport u tad-distribuzzjoni
fihom huma ogħla, u l-popolazzjoni hija baxxa. L-għan tal-miżura
huwa li tikkumpensa ftit għall-prezzijiet għoljin tal-fjuwils
tal-magni fiż-żoni speċifikati. Kuntest ġenerali L-Artikolu 19(1) tad-Direttiva jistipula
li l-Kunsill, filwaqt li jaġixxi unanimament fuq proposta tal-Kummissjoni,
jista’ jawtorizza lil kull Stat Membru jintroduċi aktar eżenzjonijiet
jew tnaqqis fil-livell tat-tassazzjoni minħabba konsiderazzjonijiet
politiċi speċifiċi. B’ittra tat-2 ta’ Frar 2014,
l-awtoritajiet tar-Renju Unit infurmaw lill-Kummissjoni li huma beħsiebhom
japplikaw rata mnaqqsa għall-petrol bla ċomb u
għaż-żejt tal-gass offruti għall-bejgħ bħala
propellanti fiż-żoni ġeografiċi msemmija hawn fuq. Ir-rata
mnaqqsa tad-dazju tas-sisa fuq il-fjuwils li jintużaw bħala
propellant se tkun ta’ GBP 50 (jiġifieri madwar EUR 64.3) anqas
għal kull 1 000 litru mir-rata standard fir-Renju Unit
(GBP 580 jew madwar EUR 745.3) applikabbli kemm għall-petrol kif
ukoll għaż-żejt tal-gass. Dan ifisser li r-rata mnaqqsa xorta waħda
se tkun ħafna ogħla mill-minimu attwali tal-UE għal kull
1 000 litru, li huwa ta’ EUR 359 għall-petrol bla ċomb u
ta’ EUR 330 għaż-żejt tal-gass. L-awtoritajiet tar-Renju
Unit ipprovdew informazzjoni u kjarifiki addizzjonali
fit-3 ta' Ġunju u fis-17 ta’ Settembru 2014. Ir-Renju Unit talab li jingħata permess
għat-tnaqqis għal perjodu ta' sitt snin, li hu l-perjodu massimu
indikat fl-Artikolu 19(2) tad-Direttiva. Skont l-awtoritajiet tar-Renju Unit, il-prezz
tal-fjuwil fiż-żoni msemmija hawn fuq huwa ta’ madwar GBP 100
(bejn wieħed u ieħor EUR 128.5) ogħla għal kull
1 000 litru mill-prezz medju fil-kumplament tar-Renju Unit. Il-prezz
f’dawn iż-żoni huwa konformi mal-prezzijiet tal-fjuwil mill-pompi
fil-gżejjer jekk wieħed ma jqisx it-tnaqqis fit-taxxa li r-Renju Unit
japplika għalihom kif stipulat bid-Deċiżjoni ta'
Implimentazzjoni tal-Kummissjoni 2011/776/UE [4]. It-tnaqqis ta'
GBP 50 (bejn wieħed u ieħor EUR 64.3) għal kull
1 000 litru ma jkoprix id-differenza kollha fil-prezz, iżda
jagħti lill-konsumaturi kumpens żgħir għall-prezz
ogħla li jkollhom iġarrbu. Fil-valutazzjoni tal-eliġibbiltà taż-żoni
kkonċernati għar-ribass, tqiesu żewġ fatturi ewlenin: ·
l-affordabilità tal-fjuwil, ikkawżata minn
prezzijiet għoljin tal-fjuwil mill-pompa u minn qligħ
fil-ġimgħa li huwa taħt il-medja nazzjonali fir-Renju Unit; ·
il-ħtieġa tal-fjuwil għat-trasport
bit-triq bħala parti mill-ħajja ta’ kuljum tal-individwi. Dan jidher
mid-dipendenza għolja fuq il-karozzi u mill-aċċessibilità
limitata għat-trasport pubbliku u għas-servizzi essenzjali. Skont l-informazzjoni statistika pprovduta
mill-awtoritajiet tar-Renju Unit, il-qligħ medju fil-ġimgħa
fl-awtoritajiet lokali fejn jinsabu ż-żoni magħżula jvarja
minn GBP 412.10 (EUR 528.6) għal GBP 493.30
(EUR 633.9), li huwa anqas mill-medja nazzjonali fir-Renju Unit, li hija
ta' GBP 518 ([5])
(EUR 665.6). L-awtoritajiet lokali li għalihom tinġabar id-dejta
statistika normalment ikollhom ambitu ġeografiku usa’ miż-żoni
li għalihom se tapplika l-miżura. Skont l-awtoritajiet tar-Renju
Unit, wieħed jista’ jassumi li l-qligħ medju attwali fil-ġimgħa
fiż-żoni inkwistjoni huwa saħansitra inqas miċ-ċifri
disponibbli għall-awtoritajiet lokali. Dan huwa minħabba
l-preżenza ta' korporazzjonijiet akbar fil-lokalitajiet ewlenin
fl-awtoritajiet lokali, li ħafna drabi jkunu aktar minn 100 mil (madwar
160 km) ’l bogħod miż-żoni magħżula inkwistjoni.
Il-flussi tad-dħul fiż-żoni koperti mill-miżura jiddependu
fuq l-agrikoltura u t-turiżmu. Għalhekk, l-awtoritajiet tar-Renju
Unit jassumu li l-qligħ fil-ġimgħa f’dawn iż-żoni huwa
aktar baxx mill-qligħ fil-gżejjer li attwalment japplikaw id-deroga
(li huwa ta’ GBP 463.0, jiġifieri ta’ EUR 752.8). Skont id-dejta mogħtija
mill-Uffiċċju Nazzjonali tal-Istatistika tar-Renju Unit, il-Valur
Miżjud Gross għal kull persuna fiż-żoni inkwistjoni jvarja
minn GBP 12 036 (EUR 15 466.5) għal
GBP 17 936 (EUR 23 048) u huwa anqas mill-medja tar-Renju
Unit, li hija ta’ GBP 21 674 (EUR 27 851.5) kull sena. Skont l-awtoritajiet tar-Renju Unit,
l-opportunità ekonomika limitata f’dawn iż-żoni meta mqabbla ma’
żoni aktar urbanizzati tar-Renju Unit twassal għal emigrazzjoni
tal-popolazzjoni ekonomikament attiva, li hija r-raġuni prinċipali
għar-rata stabbli tal-qgħad, li mhux neċessarjament tirrifletti
l-kwalità tal-ħajja f’dawn iż-żoni. Ekonomikament, l-impatti
ewlenin ta’ densitajiet baxxi tal-popolazzjoni fuq żoni
ġeografiċi kbar huma dawn li ġejjin: ·
id-distanzi medji bejn is-servizzi individwali u
n-negozji huma għoljin ħafna, hekk li l-ispejjeż tat-trasport
biex jitwettqu attivitajiet bażiċi wkoll huma relattivament
għoljin - kemm għall-individwi kif ukoll għan-negozji; ·
in-negozji għandhom popolazzjoni
iżgħar li tużahom fi ħdan l-istess żona
ġeografika, u għalhekk iridu joperaw b’marġnijiet li
ġeneralment ikunu ogħla għal kull unità sabiex ikunu
jistgħu jagħmlu profitt minn fatturat limitat. Barra minn hekk, fl-aħħar snin
għalqu numru ta' raffineriji fir-Renju Unit. It-tnaqqis fin-numru ta'
raffineriji wassal biex kiber in-numru ta' pompi tal-petrol li jinsabu aktar
minn 100 mil (madwar 160 km) 'il bogħod mill-eqreb raffinerija
tagħhom, u dan wassal għal żieda fl-ispejjeż tat-trasport
tal-fjuwil lejn iż-żoni inkwistjoni. Id-disponibbiltà tal-karozzi tal-linja
fiż-żoni rurali kollha kkonċernati hija ferm anqas mill-medja
għall-Gran Brittanja ([6]).
Flimkien mal-użu limitat tal-ferroviji fiż-żoni kkonċernati
u l-użu għoli tal-karozzi minkejja l-prezzijiet għoljin
tal-fjuwil mill-pompa, dan jenfasizza l-ħtieġa tal-karozzi bħala
mezz ta’ trasport f’dawn iż-żoni. Is-servizzi f’żoni remoti u rurali
tar-Renju Unit bħaż-żoni magħżula x’aktarx li jaqdu
żona ġeografika akbar minn dawk f'lokalitajiet urbani, parzjalment
minħabba d-densità baxxa tal-popolazzjoni f'dawn iż-żoni. Dan
ifisser li d-distanzi medji bejn l-akkomodazzjonijiet individwali,
il-lokalitajiet, is-servizzi u n-negozji huma kbar ħafna, hekk li
l-ispejjeż tat-trasport biex wieħed iwettaq attivitajiet
bażiċi wkoll huma relattivament għolja. Pereżempju,
vjaġġ miż-żona koperta mill-kodiċi postali IV27
għall-eqreb supermarket ta' daqs standard jista' jinvolvi vjaġġ
bir-ritorn ta’ distanza li tlaħħaq il-135 mil (madwar 220 km). L-isfidi deskritti hawn fuq jirriflettu kemm
in-neċessità tal-użu tal-karozzi fil-ħajja ta’ kuljum
tar-residenti fiż-żoni magħżula, kif ukoll l-impatt ta’
prezzijiet għolja tal-fjuwil fuqhom. Ir-Renju Unit iqis li r-ribass fuq
id-dazju tal-fjuwil jgħin biex dawn il-komunitajiet rurali fraġli u
mbiegħda jiġu sostnuti billi jtaffilhom xi ftit mill-piż ta'
dawn l-ispejjeż partikolarment għoljin. Huwa importanti li dawn
il-fatturi ma jitqisux f'iżolament, iżda bħala taħlita ta’
kwistjonijiet li wasslu għal ħtieġa ekonomika u soċjali
reali għar-ribass fiż-żoni elenkati. L-eżekuzzjoni tal-miżura Fir-Renju Unit, id-dazju tas-sisa fuq
il-fjuwils tat-triq jibda jitħallas minn meta l-fjuwil jinħareġ
mir-raffinerija, minn meta jiġi impurtat jew minn meta dan
jinħareġ minn xi maħżen tas-sisa ("excise
warehouse"). Sa dan il-punt, ikun għadu diffiċli li wieħed
jidentifika l-ammont ta' fjuwil li huwa maħsub għar-reġjuni
eliġibbli. Għalhekk, l-eżenzjoni se
tingħata fil-punt tal-bejgħ fiż-żoni eliġibbli, u
għaldaqstant se jiġi evitat kwalunkwe riskju li jirriżulta
mid-diverżjoni tal-fjuwil li huwa soġġett għal rata
tal-fjuwil imnaqqsa. Il-bejjiegħa tal-fjuwil bl-imnut fiż-żoni
kkonċernati jkunu rreġistrati mad-dipartiment tad-dħul mit-taxxi
u tad-dwana msejjaħ “HM Revenue and Customs” (HMRC) bħala
bejjiegħa bl-imnut approvati u jkunu mitluba jnaqqsu l-prezz ta' kull
litru tal-fjuwil bl-ammont tal-eżenzjoni mid-dazju. Min-naħa
tagħhom, huma jkunu intitolati jitolbu rifużjoni tad-dazju mingħand
l-HMRC, fuq bażi perjodika, skont kemm-il litru ta' fjwuil ikunu
biegħu. Benefiċjarji Il-miżura
hija maħsuba għal individwi privati iżda x-xirjiet kollha
tal-fjuwil, inklużi dawk kummerċjali, se jibbenefikaw mill-prezz
aktar baxx. Is-27 pompa
tal-petrol li jistgħu jibbenefikaw mill-iskema kollha huma indipendenti. L-argumenti tal-awtoritajiet tar-Renju
Unit dwar l-impatt tal-miżura fuq is-suq intern L-awtoritajiet
tar-Renju Unit ma jaħsbux li l-miżura se taffettwa l-funzjonament
xieraq tas-suq intern. Meta l-prezzijiet
mitluba mill-pompi tal-petrol li jinsabu fiż-żoni affettwati
mit-tnaqqis tat-taxxa propost ta’ GBP 50 għal kull 1 000 litru
(EUR 64.3) jitqabblu ma’ dawk mitluba mill-eqreb kompetituri tagħhom
barra mill-iskema, jinstab li: għall-petrol, id-differenza medja
tonqos għal GBP 10 (EUR 12.9). Bħala medja, il-prezzijiet
fis-siti koperti minn din l-iskema jkunu GBP 10 (EUR 12.9) ogħla
minn dawk fl-eqreb kontropartijiet tagħhom li ma jkunux fl-iskema. Għad-diżil, id-differenza
medja ssir ta’ GBP 6 (EUR 7.7). Bħala medja, il-prezzijiet
fis-siti koperti minn din l-iskema jkunu GBP 6 orħos għal kull
1 000 litru (EUR 7.7) minn dawk fl-eqreb kontropartijiet tagħhom
li ma jkunux fl-iskema. Permezz
tar-ribass, il-pompi tal-petrol affettwati b’mod ġenerali se jiġu
konformi mal-istazzjonijiet f’żoni fil-qrib li mhumiex fl-iskema.
Għalhekk, mhuwiex mistenni li l-konsumaturi jibdlu r-rotot tas-sewqan
tagħhom jew li l-pompi tal-petrol f'żoni li jmissu
mal-benefiċjarji jiġu riallokati għaż-żoni
inklużi. Barra minn hekk, id-densità baxxa tal-popolazzjoni u d-distanzi
minn lokalitajiet kbar, flimkien mal-ispejjeż kapitali sinifikanti ta’
pompi tal-petrol ġodda, ma jagħmluhiex kummerċjalment attraenti
għall-pompi tal-petrol li jirrilokaw, anke bir-ribass. Id-dispożizzjonijiet eżistenti
fil-qasam tal-proposta Id-Direttiva tal-Kunsill 2003/96/KE
tas-27 ta’ Ottubru 2003 li tirriforma l-istruttura tal-Komunità
dwar tassazzjoni fuq prodotti ta’ enerġija u elettriku. Il-valutazzjoni tal-miżura skont
l-Artikolu 19 tad-Direttiva 2003/96/KE Konsiderazzjonijiet politiċi
speċifiċi L-ewwel subparagrafu tal-Artikolu 19(1)
tad-Direttiva jgħid hekk: "Flimkien
ma’ dawn id-dispożizzjonijiet imsemmija fl-Artikoli ta' qabel, b'mod
partikolari l-Artikoli 5, 15 u 17, il-Kunsill, li jaġixxi
b'mod unanimu fuq xi proposta tal-Kummissjoni, jista' jawtorizza lil kwalunkwe
Stat Membru biex jintroduċi iktar eżenzjonijiet u tnaqqis
għall-konsiderazzjonijiet politiċi speċifiċi." Il-miżura prevista mir-Renju Unit
tikkonsisti fit-tnaqqis tad-dazju tas-sisa fuq il-fjuwils tal-magni forniti
f’ċerti partijiet tat-territorju tiegħu, iddefiniti permezz ta’
kodiċi postali, jiġifieri fiż-żoni koperti
mill-kodiċijiet postali PH36, IV22, IV21, PH19, PH23, IV14, PA38, LA17,
Hawes, EX35, IV54, IV26, IV27, PH41, KW12, PA80 u NE48. L-għan huwa li l-prezzijiet tal-fjuwil
mill-pompi f'dawn it-territorji jitqarrbu lejn il-prezzijiet medji tar-Renju
Unit. Ir-raġunijiet għaliex f'dawn iż-żoni kemm
l-ispejjeż għal kull unità ta' fjuwil kif ukoll il-prezzijiet
tal-fjuwil mill-pompi huma ogħla huma l-fatt li fihom hemm spejjeż
ogħla tat-trasport u tad-distribuzzjoni u l-fatt li fihom hemm ekonomiji
tal-iskala iżgħar. Wieħed jista' jikkonkludi li x-xewqa li
tiġi applikata rata mnaqqsa ta' dazju tas-sisa fuq il-fjuwils tal-magni
fiż-żoni kkonċernati minħabba l-kundizzjonijiet
soċjali u ekonomiċi speċifiċi tagħhom hija msejsa fuq
kunsiderazzjonijiet politiċi speċifiċi b'mod partikolari
fir-rigward tal-politika soċjali u reġjonali. Konsistenza mal-politiki u
l-għanijiet l-oħra tal-Unjoni L-għan tal-miżura huwa li
tikkontrobilanċja parzjalment l-ispiża ogħla għal kull
unità ta' fjuwil, u għaldaqstant il-prezzijiet tal-fjuwil mill-pompa
fiż-żoni kkonċernati, permezz ta' eżenzjoni diretta
mid-dazju fil-punt tal-bejgħ. Il-miżura hija limitata għal dak li
hu meħtieġ biex dan iseħħ. B’mod partikolari,
l-eżenzjoni hija limitata għall-ammont (relattivament
żgħir) ta’ fjuwil mibjugħ f’dawn iż-żoni, u l-volum totali
użat fiż-żoni postali huwa ta’ inqas minn 50 miljun litru
fis-sena, li jammonta għal 0.1 % tal-konsum totali tal-fjuwil
fir-Renju Unit. Il-Kummissjoni tinnota li r-rata tad-dazju
tas-sisa se titnaqqas b’GBP 50 (jiġifieri EUR 64.3) għal
kull 1 000 litru tal-prodott. Il-prezz tal-fjuwil fiż-żoni
magħżulin elenkati hawn fuq huwa madwar GBP 100 (EUR 128.5)
ogħla mill-prezz medju fil-kumplament tar-Renju Unit. Fl-aħħar
tliet xhur tal-2012, il-prezzijiet f’dawn l-ibliet kienu ogħla mill-prezz
minimu fuq il-gżejjer li attwalment japplikaw tnaqqis tat-taxxa
abbażi tad-Deċiżjoni ta' Implimentazzjoni tal-Kummissjoni
2011/776/UE. Il-karatteristiċi tal-prezzijiet f’dawn l-ibliet huma simili
għal dawk ta’ fuq il-gżejjer fejn japplika t-tnaqqis tat-taxxa. Eżenzjoni
ta’ GBP 50 (EUR 64) x’aktarx li mhix se tkopri d-differenza kollha li
hemm bejn dawn il-prezzijiet għoljin u l-prezz medju tar-Renju Unit,
iżda se tipprovdi lill-individwi b’kumpens żgħir
għall-prezz ogħla li huma jkollhom iġarrbu. Fl-aħħar nett, minkejja
l-eżenzjoni, il-piż tat-taxxa li jġorr il-fjuwil ikkunsmat
fiż-żoni ġeografiċi kkonċernati se jibqa’ 'l fuq sew
mil-livelli minimi tat-tassazzjoni stabbiliti fid-Direttiva 2003/96/KE. Għaldaqstant, jista’ jiġi
konkluż li filwaqt li l-miżura inkwistjoni tikkostitwixxi tnaqqis
tat-taxxa fuq il-fjuwils fossili li, fil-prinċipju, għandu jiġi
analizzat b’mod kritiku, bil-kundizzjonijiet speċifiċi
ġeografiċi u soċjali ta’ dawn iż-żoni, hija tista’
titqies bħala aċċettabbli fil-kuntest usa’ tal-politiki
tas-saħħa, tal-ambjent, tal-enerġija u tat-trasport tal-Unjoni. Fiċ-ċirkostanzi deskritti,
il-miżura tidher li hija aċċettabbli wkoll mill-aspett
tal-funzjonament xieraq tas-suq intern u tal-ħtieġa li tkun
żgurata l-kompetizzjoni ġusta. B'mod partikolari, minħabba li ż-żoni
li tapplika għalihom huma mbiegħda u minħabba t-tnaqqis moderat
fir-rata, mhuwiex mistenni li din se twassal għal tibdil fil-konsum
tal-fjuwil billi tattira konsumaturi minn barra dawn iż-żoni. Il-perjodu ta’ applikazzjoni
tal-miżura u l-iżvilupp tal-qafas tal-UE dwar it-Tassazzjoni fuq
l-Enerġija Il-Kummissjoni qed tissuġġerixxi li
l-perjodu ta’ applikazzjoni jkun il-perjodu massimu permess
mid-Direttiva 2003/96/KE, jiġifieri perjodu ta’ sitt snin. Dan
il-perjodu jidher li huwa adattat biex l-awtoritajiet tar-Renju Unit ikunu
jistgħu jiġbru l-informazzjoni biex jivvalutaw ir-riżultati
tal-miżura u biex joffru lin-negozji u lill-konsumaturi li jkunu qed
jibbenefikaw minnha livell suffiċjenti ta' ċertezza. Regoli dwar l-għajnuna mill-Istat Wara t-tnaqqis previst mill-awtoritajiet
tar-Renju Unit, ir-rati tat-taxxa fuq il-petrol bla ċomb u
ż-żejt tal-gass fir-reġjuni kkonċernati xorta waħda se
jibqgħu jirrispettaw il-livell minimu ta' tassazzjoni f'konformità
mal-Artikolu 7 tad-Direttiva 2003/96/KE. Dejjem jekk il-miżura
tirrispetta l-kundizzjonijiet stabbiliti fl-Artikolu 44 tar-Regolament
għal Eżenzjoni Ġenerali Sħiħa (ir-Regolament (KE)
Nru 651/2014) [7]),
din tkun eżentata mill-ħtieġa ta’ notifika minn qabel. 2. RIŻULTATI
TAL-KONSULTAZZJONIJIET MAL-PARTIJIET INTERESSATI U TAL-VALUTAZZJONIJIET
TAL-IMPATT Konsultazzjoni
mal-partijiet interessati Din il-proposta hija bbażata fuq talba li
saret mir-Renju Unit u tikkonċerna biss lil dan l-Istat Membru. Ġbir u
użu tal-għarfien espert Ma kienx hemm bżonn ta’ għarfien
espert estern. Valutazzjoni
tal-impatt Din il-proposta tikkonċerna
awtorizzazzjoni mogħtija lil Stat Membru individwali fuq talba tiegħu
stess. 3. ELEMENTI LEGALI TAL-PROPOSTA Il-prinċipju tas-sussidjarjetà Il-qasam tat-tassazzjoni indiretta kopert
mill-Artikolu 113 tat-TFUE fih innifsu ma jaqax taħt il-kompetenza
esklużiva tal-Unjoni Ewropea skont it-tifsira tal-Artikolu 3
tat-TFUE. Madankollu, l-eżerċizzju mill-Istati
Membri tal-kompetenzi tagħhom f’dan il-qasam huwa rregolat u limitat
ħafna mil-liġijiet eżistenti tal-UE. Skont l-Artikolu 19
tad-Direttiva 2003/96/KE, il-Kunsill biss għandu s-setgħa
jawtorizza lil Stat Membru jintroduċi aktar eżenzjonijiet jew tnaqqis
skont it-tifsira ta’ dik id-dispożizzjoni. L-Istati Membri ma jistgħux
jieħdu post il-Kunsill. Għalhekk, il-proposta tirrispetta
l-prinċipju tas-sussidjarjetà. Madanakollu, il-proposta attwali, bħala
proposta mhux leġiżlattiva, mhix soġġetta
għall-mekkaniżmu ta' analiżi tal-Protokoll Nru. 2 tat-TFUE, li japplika
biss għal abbozzi ta' atti leġiżlattivi. Il-prinċipju
tal-proporzjonalità Il-proposta tirrispetta l-prinċipju
tal-proporzjonalità. It-tnaqqis fit-taxxa ma jmurx lil hinn minn dak li hu
neċessarju biex jintlaħaq l-għan inkwistjoni (ara
l-kunsiderazzjonijiet dwar l-aspetti tas-suq intern u l-kompetizzjoni
ġusta mogħtija hawn fuq). Għażla
tal-istrumenti Strument(i) propost(i): Deċiżjoni
ta' Implimentazzjoni tal-Kunsill. L-Artikolu 19
tad-Direttiva 2003/96/KE jipprovdi għal din it-tip ta’ miżura
biss. 4. IMPLIKAZZJONI BAĠITARJA Il-miżura ma twassal għall-ebda
piż finanzjarju jew amministrattiv fuq l-Unjoni. Għalhekk,
il-proposta ma għandha l-ebda impatt fuq il-baġit tal-Unjoni. 2015/0004 (NLE) Proposta għal DEĊIŻJONI TA’ IMPLIMENTAZZJONI
TAL-KUNSILL li tawtorizza lir-Renju Unit japplika livelli
ta’ tassazzjoni ddivrenzjati għall-fjuwils tal-magni f’ċerti
żoni ġeografiċi skont id-Direttiva 2003/96/KE IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, Wara li kkunsidra d-Direttiva
tal-Kunsill 2003/96/KE tas-27 ta’ Ottubru 2003 li
tirriforma l-istruttura tal-Komunità dwar tassazzjoni fuq prodotti ta’
enerġija u elettriku ([8]),
u b’mod partikolari l-Artikolu 19 tagħha, Wara li kkunsidra l-proposta tal-Kummissjoni
Ewropea, Billi: (1) Permezz ta’ ittra
tat-2 ta’ Frar 2014, ir-Renju Unit talab li jingħata l-permess japplika rata mnaqqsa
ta’ dazju tas-sisa fuq iż-żejt tal-gass u l-petrol bla ċomb,
f’konformità mal-Artikolu 19 tad-Direttiva 2003/96/KE
fiż-żoni ġeografiċi li ġejjin, iddefiniti permezz ta’
kodiċi postali fejn xieraq: IV54 (Strathcarron, Highland - l-Iskozja),
IV26 (Ullapool, Highland - l-Iskozja), IV27 (Lairg, Highland – l-Iskozja), NE48
(Hexham, Northumberland - l-Ingilterra), PH41 (Mallaig, Highland - l-Iskozja),
KW12 (Halkirk, Highland – l-Iskozja), PA80 (Oban, Argyll and Bute – l-Iskozja),
PH36 (Acharacle, Highland – l-Iskozja), IV22 (Achnasheen, Highland -
l-Iskozja), PA38 (Appin, Argyll and Bute – l-Iskozja), PH23 (Carrbridge,
Highland - l-Iskozja), PH19 (Dalwhinnie, Highland - l-Iskozja), IV21 (Gairloch,
Highland - l-Iskozja), LA17 (Kirkby-in-Furness, Cumbria - l-Ingilterra), EX35
(Lynton, Devon - l-Ingilterra), IV14 (Strathpeffer, Highland - l-Iskozja) u
ż-żona koperta mill-belt postali ta' Hawes (li tinsab f’North
Yorkshire, l-Ingilterra). Ir-Renju Unit ipprovda informazzjoni u kjarifiki
addizzjonali fit-3 ta’ Ġunju u
fis-17 ta’ Settembru 2014. (2) F’dawn il-gżejjer,
il-prezzijiet taż-żejt
tal-gass u tal-petrol bla ċomb huma ogħla mill-prezzijiet medji fil-kumplament tat-territorju tar-Renju Unit, u dan
ipoġġi lill-konsumaturi lokali tal-fjuwil fi żvantaġġ.
Id-differenza fil-prezzijiet tirriżulta mill-ispejjeż addizzjonali
għal kull unità kkawżati mill-pożizzjoni ġeografika
taż-żoni, il-popolazzjoni żgħira tagħhom u l-kunsinna
ta’ volumi relattivament baxxi ta’ fjuwil. (3) Ir-rati mnaqqsa ta’
tassazzjoni se jkunu ogħla mir-rati minimi stabbiliti fl-Artikolu 7
tad-Direttiva 2003/96/KE. (4) Fid-dawl tan-natura
speċifika taż-żoni fil-mira u tat-tnaqqis moderat fir-rata, li
jtaffi parzjalment biss l-ispejjeż ogħla mġarrba
fiż-żoni ġeografiċi inkwistjoni, il-miżura mhix
mistennija twassal għal xi moviment speċifikament marbut
mal-provvista tal-fjuwil. (5) Konsegwentement,
il-miżura hija aċċettabbli mill-perspettiva tal-funzjonament
xieraq tas-suq intern u tal-ħtieġa li tkun żgurata
l-kompetizzjoni ġusta u hija kompatibbli mal-politiki tal-Unjoni Ewropea
fl-oqsma tas-saħħa, l-ambjent, l-enerġija u t-trasport. (6) F'konformità
mal-Artikolu 19(2) tad-Direttiva 2003/96/KE, kull awtorizzazzjoni
mogħtija skont dak l-Artikolu jrid ikollha żmien strettament limitat.
Sabiex tipprovdi lin-negozji u lill-konsumaturi kkonċernati b’livell
suffiċjenti ta’ ċertezza, l-awtorizzazzjoni għandha
tingħata perjodu ta’ sitt snin. Madankollu, sabiex ma jiġux
ippreġudikati l-iżviluppi ġenerali futuri tal-qafas legali
eżistenti, huwa xieraq li jiġi previst li, jekk il-Kunsill, huwa u
jaġixxi skont l-Artikolu 113 tat-Trattat, jintroduċi sistema
ġenerali mmodifikata għat-tassazzjoni tal-prodotti tal-enerġija
li għalihom ma tkunx adattata l-awtorizzazzjoni mogħtija f’din
id-Deċiżjoni, din id-Deċiżjoni għandha tiskadi
dakinhar li jsiru applikabbli r-regoli ta’ dik is-sistema mmodifikata. (7) Din id-Deċiżjoni
hija mingħajr ħsara għall-applikazzjoni tar-regoli tal-Unjoni
dwar l-għajnuna mill-Istat, ADOTTA DIN ID-DEĊIŻJONI: Artikolu 1 1. Ir-Renju Unit b’dan huwa awtorizzat
japplika rati mnaqqsa tat-tassazzjoni għall-petrol bla ċomb u
għaż-żejt tal-gass forniti bħala fjuwil tal-magni
għall-karozzi tat-triq fis-17-il żona li ġejjin, li huma ddefiniti
permezz ta’ kodiċi postali fejn xieraq: IV54 (Strathcarron, Highland -
l-Iskozja), IV26 (Ullapool, Highland - l-Iskozja), IV27 (Lairg, Highland –
l-Iskozja ), NE48 (Hexham, Northumberland - l-Ingilterra), PH41 (Mallaig,
Highland - l-Iskozja), KW12 (Halkirk, Highland – l-Iskozja), PA80 (Oban, Argyll
and Bute – l-Iskozja), PH36 (Acharacle, Highland – l-Iskozja), IV22
(Achnasheen, Highland - l-Iskozja), PA38 (Appin, Argyll and Bute – l-Iskozja),
PH23 (Carrbridge, Highland - l-Iskozja), PH19 (Dalwhinnie, Highland -
l-Iskozja), IV21 (Gairloch, Highland - l-Iskozja), LA17 (Kirkby-in-Furness,
Cumbria - l-Ingilterra), EX35 (Lynton, Devon - l-Ingilterra), IV14
(Strathpeffer, Highland - l-Iskozja) u ż-żona koperta mill-belt
postali ta' Hawes (li tinsab f'North Yorkshire, l-Ingilterra). Sabiex jiġi evitat kull kumpens
żejjed, it-tnaqqis mir-rata nazzjonali standard ta' tassazzjoni
għall-petrol bla ċomb jew għaż-żejt tal-gass
rispettivament ma għandux jeċċedi l-ispiża addizzjonali tal-bejgħ
bl-imnut f'dawn iż-żoni ġeografiċi, meta mqabbel
mal-ispiża medja tal-bejgħ bl-imnut imġarrba fir-Renju Unit, u
ma għandux ikun ta’ aktar minn GBP 50 (EUR 64) għal kull
1 000 litru tal-prodott. 2. Ir-rati mnaqqsa jridu jkunu
konformi mar-rekwiżiti tad-Direttiva 2003/96/KE, u b’mod partikolari
mar-rati minimi stabbiliti fl-Artikolu 7 tagħha. Artikolu 2 Din id-Deċiżjoni għandha
tidħol fis-seħħ dakinhar tan-notifika tagħha. Għandha
tapplika mill-1 ta’ Frar 2015 u tiskadi
fil-31 ta’ Jannar 2021. Madankollu,
jekk il-Kunsill, huwa u jaġixxi skont l-Artikolu 113 tat-Trattat,
jintroduċi sistema ġenerali mmodifikata għat-tassazzjoni
tal-prodotti tal-enerġija li għalihom ma tkunx adattata din
l-awtorizzazzjoni, din id-Deċiżjoni għandha tiskadi dakinhar li
jsiru applikabbli r-regoli ta' din is-sistema mmodifikata. Artikolu 3 Din id-Deċiżjoni hija indirizzata
lir-Renju Unit tal-Gran Brittanja u l-Irlanda ta’ Fuq. Magħmul fi Brussell, Għall-Kunsill Il-President [1] Id-Direttiva tal-Kunsill 2003/96/KE
tas-27 ta' Ottubru 2003 li tirriforma l-istruttura tal-Komunità
dwar tassazzjoni fuq prodotti ta' enerġija u elettriku (ĠU
L 283, 31.10.2003 p. 51). [2] Id-distrett tal-kodiċi postali EX35 jikludi
żewġ bliet postali – Lynton u Lynmouth. Dawn iż-żewġt
ibliet postali t-tnejn se jgawdu mir-ribass. [3] Il-kalkoli kollha huma bbażati fuq ir-rata
tal-kambju tal-1 ta’ Ottubru 2014, jiġifieri
GBP 0.77820 għal kull EUR 1. Ara l-ĠU C 344,
2.10.2014. [4] Id-Deċiżjoni ta’ Implimentazzjoni tal-Kunsill
2011/776/UE tal-24 ta’ Novembru 2011 li tawtorizza lir-Renju
Unit japplika livelli mnaqqsa ta’ tassazzjoni fuq karburanti użati
fil-Gżejjer kollha Hebrides ta’ ġewwa u ta’ barra, fin-Northern
Isles, fil-gżejjer fiż-żona Clyde u fil-Gżejjer ta’ Scilly,
f’konformità mal-Artikolu 19 tad-Direttiva 2003/96/KE (ĠU L 317,
30.11.2011, p. 34–35). [5] Ara l-informazzjoni mogħtija
mill-Uffiċċju Nazzjonali tal-Istatistika tar-Renju Unit:
'http://www.nomisweb.co.uk/default.asp'. [6] Ara s-sit tal-internet li ġej:
"https://www.gov.uk/government/statistical-data-sets/nts99-travel-by-region-and-area-type-of-residence". [7] Ir-Regolament tal-Kummissjoni (UE) Nru 651/2014 li
jiddikjara li ċerti kategoriji ta’ għajnuna huma kompatibbli mas-suq
intern skont l-Artikoli 107 u 108 tat-Trattat (ĠU L 187,
26.6.2014, p. 1–78). [8] ) ĠU L 283, 31.10.2003, p. 51.