52014PC0560

MEMORANDUM TA’ SPJEGAZZJONI

KUNTEST TAL-PROPOSTA

1.           Ir-regoli li japplikaw għall-kontribuzzjonijiet finanzjarji mill-Fond Ewropew ta’ Aġġustament għall-Globalizzazzjoni (FEG) huma stabbiliti fir-Regolament (UE) Nru 1309/2013 tal-Parlament Ewropew u tal-Kunsill tas-17 ta’ Diċembru 2013 dwar il-Fond Ewropew ta’ Aġġustament għall-Globalizzazzjoni (2014-2020) u li jħassar ir-Regolament (KE) Nru 1927/2006[1] (ir-'Regolament tal-FEG').

2.           L-awtoritajiet Franċiżi ressqu l-applikazzjoni EGF/2014/006 FR/PSA għal kontribuzzjoni finanzjarja mill-FEG, wara s-sensji li ngħataw f’Peugeot Citroën Automobiles (minn hawn 'il quddiem 'PSA') fi Franza.

3.           Din l-applikazzjoni fiha xi nuqqasijiet, li huma stabbiliti fil-paragrafi 32 u 33 ta’ dan il-Memorandum. Minkejja dawn in-nuqqasijiet, il-Kummissjoni tista’ tivvaluta l-applikazzjoni minn Franza. Wara l-valutazzjoni tagħha ta’ din l-applikazzjoni, il-Kummissjoni kkonkludiet li, skont id-dispożizzjonijiet kollha applikabbli tar-Regolament tal-FEG, il-kundizzjonijiet għall-għoti ta’ kontribuzzjoni finanzjarja mill-FEG huma ssodisfati.

SOMMARJU TAL-APPLIKAZZJONI

Applikazzjoni tal-FEG: || EGF/2014/006 FR/PSA

Stat Membru: || Franza

Reġjun(i) kkonċernat(i) (il-livell NUTS 2): || L-Ile de France (FR10) Il-Bretanja (FR52)

Data ta’ sottomissjoni tal-applikazzjoni: || 25 ta’ April 2014

Data ta’ konferma tal-wasla tal-applikazzjoni: || 7 ta’ Mejju 2014

Data tat-talba għal informazzjoni addizzjonali: || 8 ta’ Mejju 2014

Data ta’ skadenza għall-għoti tal-informazzjoni addizzjonali: || 19 ta' Ġunju 2014

Data ta’ skadenza għat-tlestija tal-valutazzjoni: || 11 ta' Settembru 2014

Kriterju ta’ intervent: || L-Artikolu 4(1)(a) tar-Regolament tal-FEG

Intrapriża primarja: || Peugeot Citroën Automobile (PSA)

Settur(i) tal-attività ekonomika (Diviżjoni ta’ NACE Rev. 2)[2]: || Diviżjoni 29 ('Manifattura ta' vetturi bil-mutur, trejlers u semitrejlers')

Numru ta’ sussidjarji, fornituri u produtturi fl-istadju aħħari tal-produzzjoni: || 0

Perjodu ta’ referenza (erba’ xhur): || 1 ta’ Ottubru 2013 - 31 ta’ Jannar 2014

Numru ta’ sensji jew waqfiet ta’ attivitajiet matul il-perjodu ta’ referenza (a): || 1 989

Numru ta’ sensji jew waqfiet ta’ attivitajiet qabel u wara l-perjodu ta’ referenza (b): || 4 131

Numru totali ta’ sensji (a + b): || 6 120

Numru totali stmat ta’ benefiċjarji fil-mira: || 2 357

Numru ta’ żgħażagħ fil-mira barra mill-edukazzjoni, impjieg jew taħriġ (NEETs): || 0

Baġit għas-servizzi personalizzati (EUR) || 21 133 946

Baġit għall-implimentazzjoni tal-FEG[3] (EUR) || 40 396

Baġit totali (EUR) || 21 174 342

Kontribuzzjoni tal-FEG (60 %) (EUR) || 12 704 605

VALUTAZZJONI TAL-APPLIKAZZJONI

Proċedura

4.           Fil-25 ta’ April 2014, l-awtoritajiet Franċiżi ssottomettew l-applikazzjoni EGF/2014/006 FR/PSA fi żmien 12-il ġimgħa mid-data li fiha l-kriterji ta’ intervent stabbiliti fil-paragrafi minn 6 sa 8 hawn taħt ġew issodisfati. Il-Kummissjoni rrikonoxxiet il-wasla tal-applikazzjoni fi żmien ġimagħtejn mid-data tas-sottomissjoni tal-applikazzjoni, fis-7 ta’ Mejju 2014 u talbet informazzjoni addizzjonali mingħand l-awtoritajiet Franċiżi fil-jum ta’ wara (it-8 ta’ Mejju 2014). Din l-informazzjoni addizzjonali ngħatat fi żmien sitt ġimgħat mid-data tat-talba. L-iskadenza ta' 12-il ġimgħa mill-wasla tal-applikazzjoni kompluta li fiha l-Kummissjoni għandha tiffinalizza l-valutazzjoni tagħha tal-konformità tal-applikazzjoni mal-kundizzjonijiet għall-għoti ta’ kontribuzzjoni finanzjarja, tiskadi fil-11 ta’ Settembru 2014.

Eliġibbiltà tal-applikazzjoni

L-intrapriżi u l-benefiċjarji kkonċernati

5.           L-applikazzjoni tikkonċerna 6 120 ħaddiem li ngħataw is-sensja f’PSA. L-intrapriża topera fis-settur ekonomiku kklassifikat taħt id-diviżjoni 29 ta’ NACE Rev. 2 ('Manifattura ta' vetturi bil-mutur, trejlers u semitrejlers'). Is-sensji jirrigwardaw prinċipalment l-impjant ta' Aulnay (li ngħalaq) fir-reġjun tal-livell NUTS[4]2 tal-Ile de France (FR10) u l-impjant ta' Rennes (fejn twettqet il-biċċa l-kbira tas-sensji) fil-Bretanja (FR52).

Kriterji ta’ intervent

6.           L-awtoritajiet Franċiżi ssottomettew l-applikazzjoni skont il-kriterju ta’ intervent tal-Artikolu 4(1)(a) tar-Regolament tal-FEG, li jeħtieġ li tal-inqas 500 ħaddiem jingħataw is-sensja jew li titwaqqaf l-attività ta’ persuni li jaħdmu għal rashom, fuq perjodu ta’ referenza ta’ erba’ xhur, f’intrapriża fi Stat Membru, inklużi l-ħaddiema li jingħataw is-sensja fost il-fornituri u l-produtturi fl-istadju aħħari tal-produzzjoni tagħha.

7.           Il-perjodu ta’ referenza ta’ erba’ xhur huwa mill-1 ta’ Ottubru 2013 sal-31 ta’ Jannar 2014.

8.           L-applikazzjoni tikkonċerna 1 989 ħaddiem li ngħataw is-sensja[5] f’PSA matul il-perjodu ta’ referenza ta’ erba’ xhur.

Kalkolu tas-sensji u tal-waqfiet tal-attività

9.           It-total ta' 1 989 sensja ġie kkalkolat mid-data tan-notifika individwali tal-impjegatur dwar it-tkeċċija jew it-terminazzjoni tal-kuntratt tal-impjieg tal-ħaddiem.

Benefiċjarji eliġibbli

10.         Minbarra l-1 989 ħaddiem li diġà ssemmew, il-benefiċjarji eliġibbli jinkludu 4 131 ħaddiem li ngħataw is-sensja qabel jew wara l-perjodu ta’ referenza ta’ erba’ xhur. Dawn il-ħaddiema ngħataw is-sensja wara t-tħabbira ġenerali tas-sensji mbassra fil-25 ta’ Lulju 2012. Tista’ tiġi stabbilita rabta kawżali ċara mal-avveniment li wassal għas-sensji matul il-perjodu ta’ referenza.

11.         Għaldaqstant, in-numru totali ta’ benefiċjarji eliġibbli huwa ta’ 6 120.

Rabta bejn is-sensji u l-bidliet strutturali ewlenin fix-xejriet kummerċjali dinjija minħabba l-globalizzazzjoni

12.         Sabiex tiġi stabbilita r-rabta bejn is-sensji u l-bidliet strutturali ewlenin fix-xejriet kummerċjali dinjija minħabba l-globalizzazzjoni, Franza tikkwota "L'industrie Automobile Francaise, Analyse et statistiques 2013[6]", u targumenta li bejn is-snin 2000 u 2012, il-produzzjoni dinjija tal-vetturi żdiedet b’25 miljun unità jew 44 %. Minkejja l-effetti tal-kriżi finanzjarja u ekonomika globali, it-tkabbir tal-produzzjoni fil-livell globali ssokta (u għadu għaddej) b'aktar minn 3 % fis-sena.

13.         Fi ħdan dan it-tkabbir kontinwu, tfaċċaw inugwaljanzi kbar bejn il-pajjiżi fejn il-produzzjoni tal-vetturi bil-mutur ilha li ġiet stabbilita, u l-produtturi aktar reċenti. Għalhekk, matul l-istess perjodu (mill-2000 sal-2012), il-produzzjoni fl-Istati Uniti tal-Amerika naqset bi 11 %, dik fl-Ewropa tal-Punent b’25 % u dik fil-Ġappun bi 2 %. Fl-istess waqt, il-produzzjoni fil-Korea t’Isfel, iċ-Ċina, it-Turkija, l-Indoneżja, l-Iran, il-Malasja, it-Tajlandja u l-Amerika t’Isfel kibret b’mod sinifikanti u issa tikkostitwixxi 47 % tal-produzzjoni dinjija tal-vetturi ('il fuq minn 15 % fl-2000). Skont l-istatistika tal-OICA[7], l-UE-27 immanifatturat 16,2 miljun vettura fl-2013, minn total dinji ta’ 87,3 miljuni (18,54 %), inqas mis-17,1 miljun vettura mmanifatturati mill-UE-15 fis-sena 2000, minn total dinji ta’ 58,3 miljuni (29,41 %).

14.         "L'industrie Automobile Francaise, Analyse et statistiques 2013" tiddikjara wkoll li, min-naħa tad-domanda, l-UE issa saret suq matur bi tkabbir relattivament bil-mod, filwaqt li s-sehem tal-pajjiżi BRIC fid-domanda dinjija totali żdied minn 8,4 % fl-2000 għal 33,5 % fl-2010. Il-manifatturi bbażati fl-UE mhumiex f’pożizzjoni tajba biex jibbenefikaw minn dan it-tkabbir fid-domanda. Anki fi ħdan l-UE, il-manifatturi ta’ pajjiżi terzi qegħdin jieħdu sehem dejjem akbar mis-suq.

15.         Sal-lum, is-settur tal-karozzi kien is-suġġett ta’ 21 applikazzjoni tal-FEG, li 12 minnhom huma bbażati fuq il-globalizzazzjoni relatata mal-kummerċ u 9 fuq il-kriżi finanzjarja u ekonomika globali.

Avvenimenti li wasslu għas-sensji u l-waqfien tal-attivitajiet

16.         L-avvenimenti li wasslu għas-sensji fil-PSA huma telf li jammonta għal EUR 560 miljun fi ħdan il-grupp fl-2012, minħabba tnaqqis fid-domanda, pressjoni tal-prezzijiet u s-sospensjoni f’Marzu 2012 tal-attivitajiet ta' PSA fl-Iran (dan minħabba sanzjonijiet internazzjonali u tal-UE). Fl-2011, il-bejgħ fl-Iran kien jammonta għal 12 % tal-bejgħ globali, u għalhekk dan l-avveniment kellu impatt negattiv sinifikanti fuq il-grupp. It-terremot u t-tsunami fil-Grigal tal-Ġappun f’Marzu 2011 ġab miegħu wkoll xi diffikultajiet ta’ provvista għall-inputs għal xi vetturi diżil tal-Grupp.

17.         Il-pjan ta’ azzjoni tal-Grupp tal-2009, biex itejjeb il-prestazzjoni u jikseb il-kompetittività, kien segwit fl-2012 minn pjan komplementari mmirat lejn it-tnaqqis fl-ispejjeż, inkluża t-tkeċċija tal-persunal.

18.         L-impjant tal-produzzjoni f’Aulnay (l-Ile de France) se jingħalaq għal kollox fl-2014, filwaqt li f’Rennes (il-Bretanja), it-tnaqqis tal-persunal qed iseħħ flimkien ma’ investimenti ġodda. F'impjanti oħra, il-kumpanija talbet għal sensji volontarji.

L-impatt mistenni tas-sensji fir-rigward tal-ekonomija u l-impjieg lokali, reġjonali jew nazzjonali

19.         Is-sensji għandhom impatt negattiv sinifikanti fuq l-ekonomija lokali u reġjonali fiż-żoni milquta. Bi ftehim mal-awtoritajiet pubbliċi relevanti, il-kumpanija wettqet studji tal-impatt reġjonali għaż-żoni madwar l-impjanti ta' Aulnay u Rennes. Fil-komun tiegħu, l-impjant ta' Aulnay kien it-tmien l-akbar impjegatur, u s-sensji jnaqqsu l-għadd ta’ persuni impjegati fiż-żona bi 13,6 %. It-tnaqqis huwa inqas qawwi f'Rennes, iżda għandu jiġi nnutat li din iż-żona diġà ntlaqtet minn tnaqqis ekonomiku ġenerali, li wassal biex l-għadd ta’ persuni qiegħda fil-Bretanja b'mod ġenerali jirdoppja f'dawn l-aħħar ħames snin.

20.         Il-liġi Franċiża tistipula li l-kumpanija li tat is-sensji, jekk tissodisfa ċerti kriterji minimi, trid twettaq sensiela ta’ miżuri biex tiżgura li n-nisġa ekonomika tar-reġjuni milquta terġa' tieħu l-ħajja bl-għajnuna tagħha. Fis-27 ta' Settembru 2013 ġie ffirmat pjan għal dan l-għan bejn l-Istat Franċiż u Peugeot Citroën Automobiles (PSA). Għaldaqstant, pereżempju, il-kumpanija qed tittama li tattira impjegaturi ġodda għas-siti li qed tiżvojtja, bl-għan li l-ħaddiema preċedenti tagħha jsibu impjiegi ġodda hemmhekk. Qed tgħin ukoll lill-ħaddiema biex ibiddlu r-residenza tagħhom sabiex jaċċettaw offerti ta’ xogħol f’impjanti ta’ produzzjoni oħra tal-PSA jew ma’ impjegaturi oħra. Qed tipprovdi fondi għall-iżvilupp lokali u reġjonali tan-negozju, kif ukoll qed tipprovdi taħriġ u parir espert dwar in-negozju. Barra minn hekk, hu previst xi appoġġ għall-fornituri tagħha.

Benefiċjarji fil-mira u azzjonijiet proposti

Benefiċjarji fil-mira

21.         It-tqassim tal-ħaddiema fil-mira skont is-sess, iċ-ċittadinanza u l-grupp ta’ età huwa kif ġej:

Kategorija || Għadd ta' benefiċjarji fil-mira

Sess: || Irġiel: || 1 896 || (80,44 %)

|| Nisa: || 461 || (19,56 %)

Nazzjonalità: || Ċittadini tal-UE: || 2 135 || (90,58 %)

|| Mhux ċittadini tal-UE: || 222 || (9,42 %)

Grupp ta’ età: || bejn 15 u 24 sena: || 2 || (0,08 %)

|| bejn 25 u 29 sena: || 47 || (1,99 %)

|| bejn 30 u 54 sena: || 921 || (39,08 %)

|| bejn 55 u 64 sena: || 1 387 || (58,85 %)

|| iktar minn 64 sena: || 0 || (0,00 %)

22.         L-għadd stmat ta’ ħaddiema li mistennija jipparteċipaw fil-miżuri huwa ta' 2 357.

Eliġibbiltà tal-azzjonijiet proposti

23.         Is-servizzi personalizzati li jridu jiġu pprovduti lill-ħaddiema li ngħataw is-sensja jikkonsistu mill-azzjonijiet li ġejjin.

– Ċentru ta’ akkoljenza u għajnuna individwali: L-awtoritajiet Franċiżi se jkunu responsabbli għal 23 "espaces de mobilite et de developpement professionnel (EMDP)" u żewġ "poles de mobilite professionnel (PMP)" f’Aulnay u f'Rennes. Dawn iċ-ċentri se jiggwidaw u jagħtu pariri lill-ħaddiema u jgħinuhom bil-pjanijiet ta’ karriera tagħhom. Il-funzjoni tagħhom hija li jagħtu konsulenza lill-ħaddiema, jipprovdulhom l-għażliet disponibbli u jippreparawhom bil-ħiliet meħtieġa għat-tiftitx tax-xogħol. Dawn iċ-ċentri huma ggwidati minn struttura globali li tiżgura li dawn jiffunzjonaw b’mod ikkoordinat. Se tiġi żviluppata websajt interna, b’diversi testi ta’ referenza, kif ukoll fatti u ċifri.

– Esperti esterni u konsulenti biex jiggwidaw lill-ħaddiema fil-pjanijiet speċifiċi tagħhom.

– Sessjonijiet ta' ħidma tematiċi, eż. kif titħejja CV, tekniki tal-intervisti, eċċ.

– Informazzjoni regolari għall-ħaddiema miċ-ċentri ta’ akkoljenza u mill-assistenti (websajts u mezzi oħra).

– Spejjeż tat-taħriġ: Bl-għajnuna tal-parir riċevut, il-ħaddiema se jaqblu dwar il-perkors tat-taħriġ biex jiksbu l-pjanijiet individwali tal-karriera tagħhom u jibdew dan it-taħriġ.

– Allowances għat-taħriġ: Dawn l-allowances ("allocations dans le cadre du conge de reclassement") jitħallsu biss mill-kumpanija li tat is-sensji għall-ewwel erba’ xhur u huma parti mill-applikazzjoni għall-FEG għax-xhur ta’ wara (mill-ħames xahar sa total ta’ 12-il xahar). Il-Kummissjoni vverifikat li dawn l-allowances jibqgħu fi ħdan il-limitu ta’ 35 % tal-ispejjeż totali għall-pakkett ikkoordinat ta’ servizzi personalizzati, kif speċifikat fl-Artikolu 7(1) tar-Regolament tal-FEG.

– Għotjiet għall-ħolqien ta’ negozju: Il-ħaddiem eliġibbli jista' jagħżel il-parir, it-taħriġ u l-gwida rilevanti, segwit minn bidu ta' negozju, jew hu/hi jista'/tista' jibda/tibda n-negozju mingħajr aktar pariri u gwida, jekk diġà jeżisti pjan u l-ħaddiem ikun imħejji biżżejjed. L-għotjiet jitħallsu mal-preżentazzjoni tad-dokumenti rilevanti li juru l-ispejjeż tal-ħolqien ta’ negozju.

– L-awtoritajiet Franċiżi jippjanaw ukoll li jagħtu self mingħajr imgħax għall-ħolqien ta’ negozji ġodda. Għal sostenn possibbli ma’ dan, huma jistgħu jiddeċiedu li jagħmlu użu mill-Faċilità Ewropea ta’ Mikrofinanzjament.

24.         L-azzjonijiet proposti, deskritti hawnhekk, jikkostitwixxu miżuri attivi fis-suq tax-xogħol fi ħdan l-azzjonijiet eliġibbli stabbiliti fl-Artikolu 7 tar-Regolament tal-FEG. Dawn l-azzjonijiet ma jiħdux post il-miżuri passivi ta’ protezzjoni soċjali.

25.         L-awtoritajiet Franċiżi pprovdew l-informazzjoni meħtieġa dwar azzjonijiet li huma obbligatorji għall-intrapriża kkonċernata permezz tal-liġi nazzjonali jew skont l-arranġamenti kollettivi. Huma kkonfermaw li kontribuzzjoni finanzjarja mill-FEG mhux se tieħu post azzjonijiet bħal dawn.

Baġit stmat

26.         L-ispejjeż totali stmati huma ta’ EUR 21 174 342, li jinkludu nefqa għal servizzi personalizzati ta’ EUR 21 133 946 u nefqa għal attivitajiet preparatorji, ta’ ġestjoni, informazzjoni u pubbliċità, kontroll u rapportar ta’ EUR 40 396.

27.         Il-kontribuzzjoni finanzjarja totali mitluba mill-FEG hija ta’ EUR 12 704 605 (60 % tal-ispejjeż totali). Fit-tabella ta' hawn taħt, l-ispiża stmata għal kull ħaddiem ġiet imqarrba sal-eqreb Euro sħiħ.

Azzjonijiet || Numru stmat ta’ parteċipanti || Spiża stmata għal kull parteċipant (f’EUR) || Spejjeż totali stmati (f’EUR)

Servizzi personalizzati (Azzjonijiet skont l-Artikolu 7(1)(a) u (c) tar-Regolament tal-FEG)

Iċ-ċentru ta' akkoljenza u t-trattament tal-fajls (structures d'accueil et traitement des dossiers) || 2 357 || 461 || 1 086 275

Esperti esterni u konsulenti (cabinets de conseil) || 2 041 || 982 || 2 003 278

Sessjonijiet ta' ħidma tematiċi (ateliers thematiques) || 148 || 243 || 35 925

Informazzjoni regolari tal-ħaddiema (information des salaries) || 2 357 || 11 || 26 600

Spejjeż tat-taħriġ (depenses des formations) || 1 075 || 3 129 || 3 363 675

Għotjiet għall-ħolqien ta' negozju (aides a la creation d'entreprises -- primes) || 1 120 || 6 448 || 7 221 312

Subtotal (a): || – || 13 737 065

(65 %)

Allowances u inċentivi (Azzjonijiet skont l-Artikolu 7(1)(b) tar-Regolament tal-FEG)

Allowances għat-taħriġ || 1 075 || 6 881 || 7 396 881

Subtotal(b): || – || 7 396 881

(35 %)

Azzjonijiet skont l-Artikolu 7(4) tar-Regolament FEG

1. Attivitajiet preparatorji || – || 0

2. Ġestjoni || – || 10 396

3. Informazzjoni u pubbliċità || – || 0

4. Kontroll u rapportar || – || 30 000

Subtotal (c): || – || 40 396

(0,19 % )

Spejjeż totali (a + b + c): || – || 21 174 342

Kontribuzzjoni tal-FEG (60 % tal-ispejjeż totali) || – || 12 704 605

28.         L-ispejjeż tal-azzjonijiet identifikati fit-tabella ta’ hawn fuq bħala azzjonijiet skont l-Artikolu 7(1)(b) tar-Regolament tal-FEG ma jaqbżux il-35 % tal-ispejjeż totali tal-pakkett ikkoordinat ta’ servizzi personalizzati. L-awtoritajiet Franċiżi kkonfermaw li dawn l-azzjonijiet jiddependu fuq il-parteċipazzjoni attiva tal-benefiċjarji fil-mira fl-attivitajiet ta’ tiftix ta’ impjieg jew taħriġ.

29.         L-awtoritajiet Franċiżi kkonfermaw li l-ispejjeż tal-investimenti għall-impjieg indipendenti, il-bidu ta’ negozji u l-akkwiżizzjoni minn impjegati mhumiex se jaqbżu l-EUR 15 000 għal kull benefiċjarju.

Perjodu ta’ eliġibbiltà tan-nefqa

30.         L-awtoritajiet Franċiżi bdew jipprovdu s-servizzi personalizzati lill-benefiċjarji fil-mira fit-3 ta’ Ġunju 2013. Għaldaqstant, in-nefqa fuq l-azzjonijiet imsemmija fil-punt 24 għandha tkun eliġibbli għal kontribuzzjoni finanzjarja mill-FEG mit-3 ta’ Ġunju 2013 sal-25 ta’ April 2016.

31.         L-awtoritajiet Franċiżi bdew iġarrbu n-nefqa amministrattiva biex jimplimentaw il-FEG fit-2 ta’ Jannar 2014. Għaldaqstant, in-nefqa għal attivitajiet preparatorji, ta’ ġestjoni, informazzjoni u pubbliċità, kontroll u rapportar għandha tkun eliġibbli għal kontribuzzjoni finanzjarja mill-FEG mit-2 ta’ Jannar 2014 sal-25 ta’ Ottubru 2016.

Komplementarjetà ma’ azzjonijiet iffinanzjati minn fondi nazzjonali jew tal-Unjoni

32.         Is-sorsi ta’ prefinanzjament jew ta’ kofinanzjament nazzjonali ma ġewx ikkomunikati mill-awtoritajiet Franċiżi la fl-applikazzjoni tagħhom u lanqas bi tweġiba għall-mistoqsijiet tal-Kummissjoni.

33.         L-awtoritajiet Franċiżi ddikjaraw li, minbarra l-miżuri li l-intrapriża li tat is-sensji hi obbligata li tipprovdi għall-ħaddiema bħala riżultat tal-obbligi ġuridiċi jew tal-ftehimiet kollettivi, l-uniċi miżuri oħra favur il-ħaddiema li ngħataw is-sensja se jkunu dawk ipprovduti bl-appoġġ tal-FEG. Huma żiedu l-informazzjoni dwar id-diversi azzjonijiet li qiegħda twettaq l-intrapriża li tat is-sensji sabiex tgħin fir-rivitalizzazzjoni industrijali tar-reġjuni milquta.

Proċeduri għall-konsultazzjoni tal-benefiċjarji fil-mira jew ir-rappreżentanti tagħhom jew l-imsieħba soċjali kif ukoll l-awtoritajiet lokali u reġjonali

34.         L-awtoritajiet Franċiżi indikaw li l-pakkett ikkoordinat ta’ servizzi personalizzati tfassal b’konsultazzjoni mar-rappreżentanti tal-benefiċjarji fil-mira u mal-imsieħba soċjali. Bejn it-12 ta' Lulju 2012 u Diċembru 2013 saru bosta laqgħat bejn il-maniġment ta' PSA u rappreżentanti tat-trejdjunjins u l-kunsilli tax-xogħol f’diversi livelli dwar il-miżuri li jridu jittieħdu sabiex jissalvagwardjaw l-impjiegi.

Sistemi ta’ ġestjoni u kontroll

35.         L-applikazzjoni tinkludi deskrizzjoni tas-sistema ta’ ġestjoni u kontroll li tispeċifika r-responsabbiltajiet tal-korpi involuti. Franza nnotifikat lill-Kummissjoni li l-kontribuzzjoni finanzjarja se tkun ġestita mid-Délégation générale à l’emploi et à la formation professionnelle (DGEFP, id-Delegazzjoni Ġenerali għall-Impjiegi u t-Taħriġ Vokazzjonali) tal-Ministeru tax-Xoghol, l-Impjiegi u s-Saħħa. Il-pagamenti se jkunu ġestiti mill-Mission des Affaires Financieres (MAFI -- Missjoni għal Kwistjonijiet Finanzjarji) fi ħdan is-Subdirettorat għall-Finanzi u l-Modernizzazzjoni tal-istess Ministeru. Iċ-ċertifikazzjoni se tiġi pprovduta mill-Pôle de Certification (iċ-Ċentru taċ-Ċertifikazzjoni) tad-Direttorat Ġenerali tal-Finanzi f'Nantes.

Impenji pprovduti mill-Istat Membru kkonċernat

36.         L-awtoritajiet Franċiżi pprovdew il-garanziji kollha meħtieġa rigward dawn li ġejjin:

– il-prinċipji ta’ ugwaljanza tat-trattament u n-nondiskriminazzjoni ser jiġu rrispettati fl-aċċess għall-azzjonijiet proposti u l-implimentazzjoni tagħhom;

– ir-rekwiżiti stabbiliti fil-leġiżlazzjoni nazzjonali u tal-UE dwar is-sensji kollettivi ġew irrispettati;

– l-azzjonijiet proposti mhumiex se jirċievu appoġġ finanzjarju minn fondi jew strumenti finanzjarji oħra tal-Unjoni u se jiġi evitat kwalunkwe finanzjament doppju;

– l-azzjonijiet proposti se jkunu komplementari mal-azzjonijiet iffinanzjati mill-Fondi Strutturali;

– il-kontribuzzjoni finanzjarja mill-FEG se tikkonforma mar-regoli proċedurali u materjali tal-Unjoni dwar l-għajnuna mill-Istat.

Billi PSA ssoktat bl-attivitajiet tagħha wara li tat is-sensji, l-awtoritajiet Franċiżi żguraw ukoll lill-Kummissjoni li hija rrispettat l-obbligi ġuridiċi tagħha li jirregolaw l-għoti tas-sensji u pprovdiet għall-ħaddiema tagħha skont dan.

IMPLIKAZZJONI BAĠITARJA

Proposta baġitarja

37.         Il-FEG ma għandux jaqbeż ammont annwali massimu ta’ EUR 150 miljun (prezzijiet tal-2011), kif stabbilit fl-Artikolu 12 tar-Regolament tal-Kunsill (UE, Euratom) Nru 1311/2013 tat-2 ta’ Diċembru 2013 li jistabbilixxi l-qafas finanzjarju pluriennali għas-snin 2014-2020[8].

38.         Wara li eżaminat l-applikazzjoni fir-rigward tal-kundizzjonijiet stabbiliti fl-Artikolu 13(1) tar-Regolament tal-FEG, u wara li qieset in-numru ta’ benefiċjarji fil-mira, l-azzjonijiet proposti u l-ispejjeż stmati, il-Kummissjoni tipproponi li jiġi mobilizzat il-FEG għall-ammont ta’ EUR 12 704 605, li jirrappreżenta 60 % tal-ispejjeż totali tal-azzjonijiet proposti, sabiex tiġi pprovduta kontribuzzjoni finanzjarja għall-applikazzjoni.

39.         Id-deċiżjoni proposta biex jiġi mmobilizzat il-FEG se tittieħed b’mod konġunt mill-Parlament Ewropew u mill-Kunsill, kif stabbilit fil-punt 13 tal-Ftehim Interistituzzjonali tat-2 ta’ Diċembru 2013 bejn il-Parlament Ewropew, il-Kunsill u l-Kummissjoni dwar dixxiplina baġitarja, dwar kooperazzjoni f’materji ta' baġit u dwar ġestjoni finanzjarja tajba[9].

Atti relatati

40.         Filwaqt li tippreżenta din il-proposta għal deċiżjoni biex jiġi mmobilizzat il-FEG, il-Kummissjoni se tippreżenta proposta lill-Parlament Ewropew u lill-Kunsill għal trasferiment tal-ammont ta’ EUR 12 704 605 fl-intestatura baġitarja rilevanti.

41.         Filwaqt li tadotta din il-proposta għal deċiżjoni biex jiġi mmobilizzat il-FEG, il-Kummissjoni se tadotta deċiżjoni dwar kontribuzzjoni finanzjarja, permezz ta’ att ta’ implimentazzjoni, li se jidħol fis-seħħ fid-data li fiha l-Parlament Ewropew u l-Kunsill jadottaw id-deċiżjoni proposta biex jiġi mmobilizzat il-FEG.

Proposta għal

DEĊIŻJONI TAL-PARLAMENT EWROPEW U TAL-KUNSILL

dwar il-mobilizzazzjoni tal-Fond Ewropew ta’ Aġġustament għall-Globalizzazzjoni, skont il-Punt 13 tal-Ftehim Interistituzzjonali tat-2 ta’ Diċembru 2013 bejn il-Parlament Ewropew, il-Kunsill u l-Kummissjoni dwar dixxiplina baġitarja, dwar kooperazzjoni f’materji ta' baġit u dwar ġestjoni finanzjarja tajba (applikazzjoni EGF/2014/006 FR/PSA)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea,

Wara li kkunsidraw ir-Regolament (UE) Nru 1309/2013 tal-Parlament Ewropew u tal-Kunsill tas-17 ta’ Diċembru 2013 dwar il-Fond Ewropew ta’ Aġġustament għall-Globalizzazzjoni (2014-2020) u li jħassar ir-Regolament (KE) Nru 1927/2006[10], u b’mod partikolari l-Artikolu 15(4) tiegħu,

Wara li kkunsidraw il-proposta mill-Kummissjoni Ewropea,

Filwaqt li jaġixxu skont il-proċedura stabbilita fil-punt 13 tal-Ftehim Interistituzzjonali tat-2 ta’ Diċembru 2013 bejn il-Parlament Ewropew, il-Kunsill u l-Kummissjoni dwar dixxiplina baġitarja, dwar kooperazzjoni f’materji ta' baġit u dwar ġestjoni finanzjarja tajba[11],

Billi:

(1)       Il-Fond Ewropew ta’ Aġġustament għall-Globalizzazzjoni (FEG) ġie stabbilit biex jipprovdi appoġġ lil ħaddiema li jingħataw is-sensja u persuni li jaħdmu għal rashom li l-attività tagħhom waqfet minħabba bidliet strutturali kbar fix-xejriet kummerċjali dinjija minħabba l-globalizzazzjoni, b'riżultat tal-issoktar tal-kriżi finanzjarja u ekonomika globali indirizzata fir-Regolament (KE) Nru 546/2009[12], jew minħabba kriżi finanzjarja u ekonomika globali ġdida u biex jassistihom fir-riintegrazzjoni tagħhom fis-suq tax-xogħol.

(2)       Il-FEG ma għandux jaqbeż l-ammont massimu annwali ta' EUR 150 miljun (prezzijiet tal-2011), kif stabbilit fl-Artikolu 12 tar-Regolament tal-Kunsill (UE, Euratom) Nru 1311/2013 li jistabbilixxi l-qafas finanzjarju pluriennali għas-snin 2014-2020[13].

(3)       Franza ssottomettiet applikazzjoni għall-mobilizzazzjoni tal-FEG, fir-rigward tas-sensji[14] f’Peugeot Citroën Automobiles fi Franza, fil-25 ta’ April 2014 u ssupplimentatha b’informazzjoni addizzjonali kif previst fl-Artikolu 8.3 tar-Regolament (UE) Nru 1309/2013. Din l-applikazzjoni tikkonforma mar-rekwiżiti għad-determinazzjoni ta’ kontribuzzjoni finanzjarja mill-FEG kif stabbilit fl-Artikolu 13 tar-Regolament (UE) Nru 1309/2013.

(4)       Għaldaqstant, il-FEG għandu jiġi mmobilizzat sabiex tiġi pprovduta kontribuzzjoni finanzjarja li tammonta għal EUR 12 704 605 għall-applikazzjoni ssottomessa minn Franza,

ADOTTAW DIN ID-DEĊIŻJONI:

Artikolu 1

Għall-baġit ġenerali tal-Unjoni Ewropea għas-sena finanzjarja 2014, il-FEG għandu jiġi mmobilizzat biex jipprovdi s-somma ta’ EUR 12 704 605 f’approprjazzjonijiet ta’ impenn u pagament.

Artikolu 2

Din id-Deċiżjoni għandha tiġi ppubblikata f’Il-Ġurnal Uffiċjali tal-Unjoni Ewropea.

Magħmul fi Brussell,

Għall-Parlament Ewropew                            Għall-Kunsill

Il-President                                                    Il-President

[1]               ĠU L 347, 20.12.2013, p. 855.

[2]               Ir-Regolament (KE) Nru 1893/2006 tal-Parlament Ewropew u tal-Kunsill tal-20 ta’ Diċembru 2006 li jistabbilixxi l-klassifikazzjoni tal-istatistika ta' attivitajiet ekonomiċi tan-NACE Reviżjoni 2 u li jemenda r-Regolament tal-Kunsill (KEE) Nru 3037/90 kif ukoll ċerti Regolamenti tal-KE dwar setturi speċifiċi tal-istatistika (ĠU L 393, 30.12.2006, p. 1).

[3]               Skont ir-raba' paragrafu tal-Artikolu 7 tar-Regolament (UE) Nru 1309/2013.

[4]               Ir-Regolament tal-Kummissjoni (UE) Nru 1046/2012 tat-8 ta’ Novembru 2012 li jimplimenta r-Regolament (KE) Nru 1059/2003 tal-Parlament Ewropew u tal-Kunsill dwar l-istabbiliment ta’ klassifikazzjoni komuni ta’ unitajiet territorjali għall-istatistika (NUTS), fejn tidħol it-trażmissjoni tas-serje kronoloġiċi għat-tqassim reġjonali l-ġdid (ĠU L 310, 9.11.2012, p. 34).

[5]               Skont it-tifsira tal-Artikolu 3(a) tar-Regolament tal-FEG.

[6]               http://www.ccfa.fr/IMG/pdf/ccfa_ra2012_fr_web-2.pdf

[7]               http://www.oica.net/category/production-statistics/

[8]               ĠU L 347, 20.12.2013, p. 884.

[9]               ĠU C 373, 20.12.2013, p. 1.

[10]             ĠU L 347, 20.12.2013, p. 855.

[11]             ĠU C 373, 20.12.2013, p. 1.

[12]             ĠU L 167, 29.6.2009, p.26.

[13]             ĠU L 347, 20.12.2013, p. 884.

[14]             Skont it-tifsira tal-Artikolu 3(a) tar-Regolament tal-FEG.