52014PC0034

MEMORANDUM TA’ SPJEGAZZJONI

1.           KUNTEST TAL-PROPOSTA

Ftehim bejn il-Komunità Ewropea u l-Konfederazzjoni Svizzera dwar in-Negozju fi Prodotti Agrikoli (minn hawn ’il quddiem "il-Ftehim") daħal fis-seħħ fl-1 ta' Ġunju 2002.

Fl-2011, iż-żewġ partijiet adottaw l-Anness 12 tal-Ftehim li jikkonċerna l-protezzjoni tad-denominazzjonijiet ta' oriġini u l-indikazzjonijiet ġeografiċi tal-prodotti agrikoli u tal-oġġetti tal-ikel.

Skont l-Artikolu 15(6) tal-Anness 12 tal-Ftehim, il-grupp ta' ħidma " DPO/IĠP " għandu jassisti l-Kumitat Konġunt għall-Agrikoltura (minn hawn 'il quddiem " Kumitat " fuq talba ta' dan tal-aħħar.

Id-deċiżjoni tal-Kumitat Nru 2/2003 waqqfet il-gruppi ta' ħidma u adottat il-mandati ta' dawn il-gruppi.

Wara l-adozzjoni tal-Anness 12 tal-Ftehim, huwa xieraq li d-deċiżjoni tal-Kumitat Nru 2/2003 tiġi mmodifikata, b'mod partikolari f'dak li għandu x'jaqsam mal-bażi fil-Ftehim u l-mandat tal-grupp ta' ħidma " DPO/IĠP ".

2.           RIŻULTATI TA’ KONSULTAZZJONIJIET MAL-PARTIJIET INTERESSATI U VALUTAZZJONIJIET TAL-IMPATT

Is-suġġett tal-proposta huwa sempliċiment l-emenda tad-deċiżjoni tal-Kumitat Nru 2/2003 f'dak li għandu x'jaqsam, b'mod partikolari, mal-bażi tal-Ftehim u l-mandat tal-grupp ta' ħidma " DPO/IĠP ". It-test tad-deċiżjoni tal-Kumitat Konġunt kien ġie ppreparat f'kollaborazzjoni mal-awtoritajiet Svizzeri. Ma saret l-ebda evalwazzjoni tal-impatt.

3.           ELEMENTI LEGALI TAL-PROPOSTA

Id-Deċiżjoni kienet ibbażata fuq it-Trattat dwar il-Funzjonament tal-Unjoni Ewropea, u b’mod partikolari l-Artikolu 207(4) flimkien mal-Artikolu 218(9) tiegħu,

2014/0015 (NLE)

Proposta għal

DEĊIŻJONI TAL-KUNSILL

dwar il-pożizzjoni li għandha tittieħed mill-Unjoni Ewropea fi ħdan il-Kumitat Konġunt għall-Agrikoltura mwaqqaf skont il-Ftehim bejn il-Komunità Ewropea u l-Konfederazzjoni Svizzera dwar in-Negozju fi Prodotti Agrikoli , fir-rigward tal-emenda tad-Deċiżjoni Nru 2/2003 għall-imsemmi Kumitat

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207(4) flimkien mal-Artikolu 218(9) tiegħu,

Wara li kkunsidra l-proposta tal-Kummissjoni Ewropea,

Billi:

(1)       Il-Ftehim bejn il-Komunità Ewropea u l-Konfederazzjoni Svizzera dwar in-Negozju fi Prodotti Agrikoli[1] (minn hawn ’il quddiem " il-Ftehim ") daħal fis-seħħ fl-1 ta' Ġunju 2002.

(2)       L-Artikolu 6 tal-Ftehim iwaqqaf Kumitat Konġunt għall-Agrikoltura (minn hawn 'il quddiem " il-Kumitat ") li hu responsabbli għall-ġestjoni tal-Ftehim u jiżgura l-funzjonament xieraq tiegħu.

(3)       Skont l-Artikolu 6(4) u (7) tal-Ftehim, fil-21 ta' Ottubru 2003, il-Kumitat adotta r-Regoli ta' Proċedura tiegħu[2] u waqqaf il-gruppi ta' ħidma meħtieġa għall-ġestjoni tal-annessi għall-Ftehim[3].

(4)       Permezz tad-Deċiżjoni tal-Kumitat Konġunt Nru 2/2003 twaqqfu ħafna gruppi ta' ħidma, fosthom il-grupp ta' ħidma " DPO/IĠP " u ġew adottati l-mandati tagħhom. Skont l-Anness ta' din id-Deċiżjoni, il-grupp ta' ħidma " DPO u IĠP " kellu bħala missjoni ewlenija l-analiżi tal-protezzjoni reċiproka tad-DPO u tal-IĠP.

(5)       Fl-2011 l-Unjoni Ewropea u l-Konfederazzjoni Svizzera kkonkludew Ftehim rigward il-protezzjoni tad-denominazzjonijiet ta' oriġini u l-indikazzjonijiet ġeografiċi[4] fejn emendaw il-Ftehim billi żiedu l-Anness 12 ġdid rigward il-protezzjoni tad-denominazzjonijiet ta' oriġini u l-indikazzjonijiet ġeografiċi tal-prodotti agrikoli u tal-oġġetti tal-ikel.

(6)       Il-grupp ta' ħidma bilaterali " DPO u IĠP " ltaqa' biex jeżamina b'mod partikolari l-emenda tad-Deċiżjoni tal-Kumitat Konġunt Nru 2/2003 dwar il-mandat tal-grupp ta' ħidma " DPO u IĠP " sabiex iqis l-emenda tal-Ftehim.

(7)       Għaldaqstant, għandha tiġi emendata d-Deċiżjoni tal-Kumitat Konġunt Nru 2/2003 rigward il-kostituzzjoni tal-gruppi ta' ħidma u l-adozzjoni tal-mandati ta' dawn il-gruppi.

ADOTTA DIN ID-DEĊIŻJONI:

Artikolu 1

Il-pożizzjoni tal-Unjoni Ewropea fi ħdan il-Kumitat Konġunt għall-Agrikoltura mwaqqaf bl-Artikolu 6 tal-Ftehim bejn il-Komunità Ewropea u l-Konfederazzjoni Svizzera dwar in-Negozju fi Prodotti Agrikoli għandha tkun ibbażata fuq l-abbozz tad-Deċiżjoni tal-Kumitat Konġunt għall-Agrikoltura anness ma' din id-Deċiżjoni.

Ir-rappreżentanti tal-Unjoni fil-Kumitat Konġunt għall-Agrikoltura jistgħu jilħqu ftehim dwar emendi minimi fl-abbozz tad-Deċiżjoni mingħajr ma jkun hemm bżonn li tittieħed  deċiżjoni ulterjuri min-naħa tal-Kunsill.

Artikolu 2

Id-deċiżjoni tal-Kumitat Konġunt għall-Agrikoltura għandha tiġi pubblikata f'Il-Ġurnal Uffiċjali ta’ l-Unjoni Ewropea.

Artikolu 3

Din id-Deċiżjoni għandha tidħol fis-seħħ fil-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Magħmul fi Brussell,

                                                                       Għall-Kunsill

                                                                       Il-President

[1]               ĠU L 114, 30.4.2002, p. 132.

[2]               Pożizzjoni komuni adottata mill-Kunsill fil-21 ta' Lulju 2003; Deċiżjoni tal-Kumitat Konġunt Nru 1/2003 tal-21 ta’ Ottubru 2003 dwar l-adozzjoni tar-Regoli ta’ Proċedura (ĠU L 303, 21.11.2003, p. 24).

[3]               Pożizzjoni komuni adottata mill-Kunsill fil-21 ta' Lulju 2003; Deċiżjoni tal-Kumitat Konġunt Nru 2/2003 tal-21 ta' Ottubru 2003 dwar it-twaqqif tal-gruppi ta' ħidma u l-adozzjoni tal-mandati ta' dawn il-gruppi (ĠU L 303, 21.11.2003 p. 27).

[4]               ĠU L 297, 16.11.2011, p.3.

ANNESS

ABBOZZ DEĊIŻJONI Nru 2/2014 TAL-KUMITAT KONĠUNT GĦALL-AGRIKOLTURA

tal-... dwar l-emenda tad-Deċiżjoni tal-Kumitat Konġunt għall-Agrikoltura Nru 2/2003

IL-KUMITAT KONĠUNT GĦALL-AGRIKOLTURA,

wara li kkunsidra l-Ftehim bejn il-Komunità Ewropea u l-Konfederazzjoni Svizzera dwar in-Negozju fi Prodotti Agrikoli, u b'mod partikulari l-Artikolu 6(7) tiegħu,

Billi:

(1)          l-Ftehim bejn il-Komunità Ewropea u l-Konfederazzjoni Svizzera dwar in-Negozju fi Prodotti Agrikoli (minn hawn ’il quddiem " il-Ftehim ") daħal fis-seħħ fl-1 ta' Ġunju 2002.

(2)          L-Anness 12 tal-Ftehim dwar il-protezzjoni tad-denominazzjonijiet tal-oriġini u tal-indikazzjonijiet ġeografiċi tal-prodotti agrikoli u l-oġġetti tal-ikel.

(3)          Skont l-Artikolu 15(6) tal-Anness 12 tal-Ftehim, il-grupp ta' ħidma " DPO/IĠP " għandu jassisti l-Kumitat Konġunt għall-Agrikoltura (minn hawn 'il quddiem " il-Kumitat " fuq it-talba ta' dan tal-aħħar.

(4)          Id-Deċiżjoni tal-Kumitat Nru 2/2003 waqqfet il-gruppi ta' ħidma u adottat il-mandati ta' dawn il-gruppi.

(5)          Wara l-adozzjoni tal-Ftehim rigward il-protezzjoni tad-denominazzjonijiet ta' oriġini u l-indikazzjonijiet ġeografiċi tal-prodotti agrikoli u l-oġġetti tal-ikel tal-1 ta' Diċembru 2011, flimkien mal-Anness 12 tal-Ftehim, huwa xieraq li d-deċiżjoni tal-Kumitat Nru 2/2003 tiġi mmodifikata, b'mod partikolari f'dak li għandu x'jaqsam mal-bażi tal-Ftehim u l-mandat tal-grupp ta' ħidma " DPO/IĠP ". 

IDDEĊIEDA KIF ĠEJ:

Artikolu 1

L-Anness tad-Deċiżjoni Nru 2/2003 tal-Kumitat Konġunt għall-Agrikoltura tal-21 ta' Ottubru 2003 rigward il-ħolqien tal-gruppi ta' ħidma u l-adozzjoni tal-mandati ta' dawn il-gruppi li għandhom x'jaqsmu mal-grupp ta' ħidma " DPO u IĠP " huwa emendat kif ġej:

(1) Il-parti "Grupp ta' ħidma " DPO u IĠP " jinbidel bi:

"Grupp ta' ħidma " DPO u IĠP "

Bażi fil-Ftehim (Anness 12)

L-Artikolu 15, subparagrafu 6 tal-Anness 12 dwar il-protezzjoni tad-denominazzjonijiet tal-oriġini u tal-indikazzjonijiet ġeografiċi għall-prodotti agrikoli u l-oġġetti tal-ikel

Il-mandat tal-grupp ta' ħidma skont l-Artikolu 15

1. Għandha tiġi eżaminata kull kwistjoni dwar l-Anness 12 u l-implimentazzjoni tiegħu.

2. L-evoluzzjoni tal-liġijiet u regolamenti interni tal-Partijiet fl-oqsma koperti mill-Anness 12 għandhom jiġu eżaminati perjodikament.

3. B'mod partikolari, għandhom jiġu formulati l-proposti għall-preżentazzjoni lill-Kumitat Konġunt bil-għan li l-appendiċijiet għall-Anness 12 jiġu adattati u aġġornati.

Artikolu 2

Din id-Deċiżjoni għandha tidħol fis-seħħ fi ….2013.

Magħmul fi …, fil-… .

Għall-Kumitat Konġunt għall-Agrikoltura

Il-Kap tad-Delegazzjoni tal-Unjoni Ewropea || Il-President u l-Kap tad-delegazzjoni Svizzera || Is-Segretarju tal-Kumitat             

Susana MARAZUELA-AZPIROZ || Jacques CHAVAZ || Ioannis VIRVILIS