6.8.2014   

MT

Il-Ġurnal Uffiċjali tal-Unjoni Ewropea

C 255/3

1.

Ir-regolament propost huwa parti minn sforz internazzjonali usa’ aktar riċenti bi8ex jiġi żviluppat qafas regolatorju għal entitajiet tas-sistema bankarja “parallela”. Kif hemm emfasizzat fit-tweġiba tal-Eurosistema għall-Green Paper tal-Kummissjoni Ewropea dwar is-sistema bankarja “parallela” (minn hawn ‘il quddiem it-“tweġiba tal-Eurosistema”), il-BĊE huwa interessat ħafna fi żviluppi li jikkonċernaw is-sistema bankarja “parallela” minħabba l-importanza li jista’ jkollha għall-istabbiltà finanzjarja (2).

2.

Speċifikament fir-rigward tar-regolamentazzjoni tal-fondi tas-suq monetarju (MMFs), L-Organizzazzjoni Internazzjonali tal-Kummissjonijiet tat-Titoli (International Organization of Securities Commissions – IOSCO) ħarġet rakkomandazzjonijiet f’Ottubru tal-2012 (3), li sussegwentement ġew approvati mill-Bord għall-Istabbiltà Finanzjarja (FSB), filwaqt li l-Bord Ewropew dwar ir-Riskju Sistemiku (BERS) adotta rakkomandazzjonijet ta’ politika indirizzati lill-Kummissjoni f’Diċembru 2012 (4). Il-Kumitat tar-Regolaturi Ewropej tat-Titoli (Committee of European Securities Regulators- CESR), il-predeċessur tal-Awtorità Ewropea tat-Titoli u s-Swieq (ESMA – European Securities and Markets Authority), fl-2010 adotta linji gwida dwar definizzjoni komuni ta’ fondi tas-suq monetarju Ewropew (minn hawn ‘il quddiem il-Linji Gwida CESR’) (5), li l-BĊE segwa, bl-aġġustament tad-definizzjoni ta’ MMFs għal finijiet ta’ statistika (6).

2.1

Ir-regolament propost huwa konsistenti ma’ standards ta’ politika internazzjonali promossi għall-MMFs (12). Kif iddikjarat fir-risposta tal-Eurosistema, il-kriżi finanzjarja ħarġet biċ-ċar it-tħassib speċifiku relatat mal-istabilità finanzjarja u r-riskju sistemiku li jirriżulta mis-settur MMF, li jeħtieġ konsiderazzjoni b'attenzjoni.

2.2

B’mod simili għal banek li jieħdu depożiti fil-konfront tad-depożitanti tagħhom, l-MMFs jimpenjaw ruħhom fir-rigward tal-azzjonisti tagħhom li jipprovdu likwidità imemdjata fuq talba, biex b’hekk potenzjalment tiċċajpar id-distinzjoni bejnhom u banek. Peress li l-MMFs huma involuti wkoll fit-trasformazzjoni tal-maturità (13), fidi f’daqqa u kbir mill-azzjonisti jista’ jwassal biex l-MMFs ikunu mġiegħla li jnaqqsu l-kwantità tal-attivitajiet tagħhom ta’ investiment fi strumenti tas-suq monetarju. Peress li l-MMFs, b’differenza mill-banek, ma għandhomx aċċess għal xbieki ta’ sigurtà pubbliċi, bħal finanzjament mill-bank ċentrali u assigurazzjoni tad-depożiti, ix-xenarju fl-agħar każ jikkonsisti f’telf ta’ kunfidenza mill-azzjonisti ta’ MMF li jkunu qegħdin ifittxu l-vantaġġ ta' dak li jieħu l-ewwel pass. Dan eventwalment jista’ jwassal għal assalt fuq l-MMFs, bil-konsegwenza li l-assi miżmuma jkollhom jinbiegħu bi skont. Dan ir-riskju huwa partikolarment akut fil-każ ta’ MMFs b’valur nett tal-assi kostanti (CNAV MMFs) sal-punt li, minħabba l-mudell tan-negozju tagħhom, eventwalment jistgħu jitqiesu li jkunu naqsu milli jifdu l-unitajiet jew ishma tagħhom b’valur ugwali.

2.3

Mill-perspettiva ta’ stabilità finanzjarja, assalt tal-investituri fuq MMFs jagħmel ħsara lill-funzjonament tas-swieq monetarji, u jikkontribwixxi għat-tixrid u l-amplifikazzjoni ta’ riskji finanzjarji fis-sistema kollha, u jkollu impatt prinċipali fuq dawk l-intermedjarji finanzjarji, bħal banek, li jiddependu b’mod sinifikanti fuq MMFs bħala sors ta’ finanzjament għal żmien qasir.

2.4

Barra minn hekk, għadd ta’ banek Ewropej kbar qegħdin jisponsorjaw l-MMFs. Din iċ-ċirkustanza toħloq riskji kemm finanzjarji kif ukoll għar-reputazzjoni għall-istituzzjonijiet sponsorizzanti li jistgħu konsegwentement ikolhom bżonn jappoġġaw, u eventwalment isalvaw, lil dawn l-MMFs. Din il-forma ta’ interkonnessjoni ta’ MMFs ma’ intermedjarji finanzjarji oħrajn tipprovdi wkoll ir-razzjonal biex jiġi rriformat il-qafas regolatorju tal-MMF.

3.1

Kontra dan l-isfond, hemm kunsens internazzjonali dwar l-importanza li jiġu indirizzati riskji li jirriżultaw minn CNAV MMFs (14). L-FSB approva l-ħidma tal-IOSCO (15), u ppropona żewġ għażliet alternattivi sabiex jiġu indirizzati r-riskji msemmija hawn fuq: (a) jitneħħew il-karatteristiċi tal-MMFs li jżidu s-suxxettibbiltà tagħhom għal assalti mill-investituri billi tkun meħtieġa l-konverżjoni tal-mudell CNAV; jew (b) li l-MMFs jitħallew jużaw il-mudell CNAV, kemm-il darba dawn jikkonformaw mar-rekwiżiti li huma funzjonalment ekwivalenti għar-regolament dwar servizzi bankarji prudenti.

3.2.

B’mod ġenerali, waqt li l-miżuri konkreti ta’ politika mwettqa jistgħu jvarjaw skont il-karatteristiċi speċifiċi tas-swieq, huwa importanti li tinkiseb konverġenza sostanzjali fuq livell internazzjonali sabiex jiġi evitat li differenzi fir-regolamenti bejn ġurisdizzjonijiet prinċipali, b’mod partikolari bejn l-Unjoni Ewropea u l-Istati Uniti (fejn jinsab stabbilit porzjon kbir ħafna tal-industrija dinjija tal-MMF), jagħtu lok għal arbitrage regolatorju. Fl-Istati Uniti, l-awtoritajiet responsabbli għadhom qegħdin jivvalutaw approċċi alternattivi, li jvarjaw minn konverżjoni mandatorja ta’ fondi CNAV għall-introduzzjoni ta’ tariffi ta’ likwidità u kontrolli fuq il-fidi (16).

3.3

F’dan il-kuntest, ir-regolament propost jintroduċi bafer tal-valur nett tal-assi (bafer NAV) għal CNAV MMFs sabieex jindirizza riskji għall-istabilità finanzjarja, sabiex b'hekk tiġi evitata konverżjoni għal valutazzjoni varjabbli tal-assi netti. Il-BĊE jinnota li l-bafer NAV meħtieġ mir-regolament propost (17) huwa maħsub biex itejjeb ir-reżiljenza ta’ CNAV MMFs u l-kapaċità tagħhom li jħallsu lura lill-investituri li jitolbu ġbid ta’ fondi b’avviż qasir. Il-BĊE jfakkar li l-BERS aktar kmieni kien irrakkomanda konverżjoni obbligatorja ta’ CNAV MMFs (18) u elimina l-alternattiva li jiġu applikati rekwiżiti kapitali peress li dawn tal-aħħar aktarx li jirriżultaw f’konsolidazzjoni ulterjuri ta’ industrija li diġà hija kkonċentrata b’mod sinifikanti, u b’hekk f’konċentrazzjoni ta’ riskju akbar minn perspettiva makro-prudenzjali (19). Il-BĊE jinnota li l-għażla ta’ bafer tal-NAV hija mmotivata mill-Kummissjoni mill-ħtieġa li jiġi evitat li l-kwotazzjoni ġenerali tal-NAV tas-CNAV MMF’s kollha tikkawża tfixkil potenzjali għall-finanzjament tal-ekonomija reali (u b'mod partikolari għal entitajiet li jdidependu fuq il-ħruġ ta' dejn għal żmien qasir miżmum minn MMFs) (20). Il-BĊE jikkunsidra din il-proposta bħala pass biex jiġu indirizzati r-riskji li jirriżultaw minn CNAV MMFs, li huwa konsistenti ma’ rakkomandazzjonijiet tal-IOSCO approvati mill-FSB, u jinnota li r-reviżjoni prevista mill-Kummissjoni tal-adegwatezza tar-regoli proposti tliet snin wara d-dħul fis-seħħ tar-Regolament (21) tipprovdi opportunità biex din il-kwistjoni tiġi kkunsidrata mil-ġdid u biex tiġi implimentata r-rakkomandazzjoni tal-BERS.

3.4

Madankollu, hemm xi aspetti tal-bafer li jistgħu jeħtieġu valutazzjoni ulterjuri.

4.1

Il-BĊE jilqa’ l-fatt li r-regolament propost jirrestrinġi l-għoti ta’ appoġġ estern għal CNAV MMFs għall-bafer tan-NAV (23). Il-BĊE jilqa’ wkoll il-fatt li MMFs minbarra CNAV MMFs jistgħu jirċievu biss appoġġ estern sabiex tiġi ggarantita l-likwidità tagħhom f’ċerti ċirkustanzi eċċezzjonali bil-ftehim tal-awtorità kompetenti tal-MMF ikkonċernat u, fil-każ fejn il-fornitur ta’ servizz ikun soġġett għal regolament prudenzjali, il-ftehim min-naħa tal-awtorità prudenzjali ta’ din tal-aħħar (24).

F’dan il-kuntest, għandu jiġi żgurat li s-sistemi ta’ ġestjoni tar-riskju ta’ kumpaniji parent jirċievu informazzjoni kif suppost u regolari mill-maniġers tal-MMFs tal-grupp tagħhom, u li kull informazzjoni dwar problema ta' likwidità relevanti li tkun tista' tiskatta l-ħtieġa ta' appoġġ tiġi żvelata fil-pront lill-awtoritajiet prudenzjali kompetenti.

Il-BĊE jikkunsidra li dak l-appoġġ estern għandu jkun strettament eċċezzjonali. Sabiex jiġu evitati effetti ta’ kontaġju, id-diffikultajiet ma’ MMFs fil-fidi ta’ unitajiet jew ishma għandhom jiġu indirizzati primarjament permezz ta’ mezzi oħrajn, bħas-sospensjoni temporanja ta’ talbietgħal fidi kif ipprovdut fid-Direttiva UCITS (25), jew permezz tal-hekk imsejħa kontrolli tal-fidi (26).

4.2

Barra minn hekk, l-awtoritajiet nazzjonali jista’ jkollhom evalwazzjoni differenti ta’ ċirkustanzi eċċezzjonali li taħtha l-MMFs minbarra CNAV MMFs jistgħu jitħallew jirċievu appoġġ estern (27), speċifikament meta r-riskju jkollhu ambitu sovranazzjonali jew wiesa’. Għall-awtorità kompetenti tal-MMF, konsiderazzjonijiet li jirrigwardaw l-istabilità tal-MMF jistgħu jipprevalu fuq dawk relatati mal-istabilità tal-bank li jkun l-isponsor. Sabiex tiġi żgurata konsistenza fl-applikazzjoni ta’ din id-dispożizzjoni fl-Istati Membri kollha, tista’ tiġi kkunsidrata l-introduzzjoni ta’ element ta’ koordinazzjoni fil-livell tal-Unjoni.

6.1

Il-BĊE jinnota l-eżenzjonijiet fil-kriterji tal-eliġibbiltà għal strumenti bi kwalità ta’ kreditu għolja li jinħarġu jew jiġu ggarantiti minn awtorità ċentrali jew bank ċentrali ta’ Stat Membru, il-BĊE, l-Unjoni, il-Mekkaniżmu Ewropew ta’ Stabbiltà jew il-Bank Ewropew tal-Investiment (28). Dawn l-eżenzjonijiet huma wkoll allinjati ma’ oħrajn simili li saru għal entitajiet relatati mal-gvern imħeġġa mill-proposti riċenti tal-FSB dwar l-istandards minimi tat-tnaqqis impost li jridu jiġu applikati lit-tranżazzjonijiet ta’ finanzjament ta' titoli (29). Il-BĊE jinnota illi dawn l-eżenzjonijiet iridu jkunu ġew trasposti b’mod konsistenti fil-proċeduri interni tal-maniġers għall-valutazzjoni tal-kreditu (30).

6.2

Filwaqt illi jilqa’ r-regolament propost minn perspettiva ta’ stabbiltà finanzjarja, il-BĊE madankollu jirrileva l-ħtieġa għal evalwazzjoni tal-impatt ikkombinat tal-miżuri proposti fuq ir-rwol ta’ intermedjazzjoni tal-MMFs fis-sistema finanzjarja tal-Unjoni. B’mod partikolari, jista’ jiġi maħsub illi l-kapaċità ta’ intermedjazzjoni tal-MMFs potenzjalment titnaqqas, peress illi l-MMFs ser jintalbu jżommu parti sinifikanti tal-assi tagħhom (30 %) f’assi li jimmaturaw ta’ kuljum u ta’ kull ġimgħa (31), filwaqt illi preżentement ma jeżistu ebda limitazzjonijiet bħal dawn. Barra minn dan, il-Proporzjon tal-Kopertura tal-Liquidità (Liquidity Coverage Ratio) (32), li jittratta l-finanzjament minn impriżi b’mod aktar favorevoli mill-finanzjament iġġenerat permezz tal-maniġers tal-assi, jista’ jżid l-inċentivi għall-banek biex jiġġeneraw il-finanzjament direttament mill-impriżi. Regoli futuri dwar il-finanzjament stabbli nett jista’ jeffettwa wkoll il-konnessjoni bejn il-banek u l-MMFs. F’dan il-kuntest, il-BĊE jissuġġerixxi evalwazzjoni ulterjuri tal-impatt tar-regolament propost fuq ix-xejriet tal-intermedjazzjoni bankarja u l-kwistjonijiet li jistgħu jinqalgħu matul it-tranżizzjoni minn reġim ta' intermedjazzjoni għal ieħor. B’mod partikolari, għandu jiġi evalwat jekk ir-riallokazzjoni ta’ fondi minn MMFs għas-sistema bankarja hijiex sostanzjali u jekk dan fil-fatt ikollux impatt fuq is-swieq monetarji għal żmien qasir (33).

6.3

Barra minn dan, l-MMFs għandhom rwol importanti bħala wieħed mill-investituri ewlenin fis-suq tal-assi titolizzati ta’ terminu qasir, bħal ma huma l-Karti Kummerċjali Garantiti b'Assi (Asset Backed Commercial Papers, ABCPs). Is-suq tal-ABCP huwa importanti għall-intermedjazzjoni ta’ kreditu ta’ terminu qasir lill-ekonomija reali, eż. il-kreditu tan-negozju. Ir-regolament propost jistipula r-rekwiżiti għall-eliġibbiltà ta’ assi titolizzati għall-investiment minn MMFs, inkluż ir-rekwiżiti għall-pul sottostanti ta’ assi fir-rigward tat-tip, ir-riskju tal-kreditu u tal-likwidità, u l-limitu tal-maturità (34). Filwaqt illi l-BĊE jirrikonoxxi illi dawn ir-rekwiżiti ser iżidu t-trasparenza tal-portafolji ta’ investiment tal-MMFs u jtejbu l-ġestjoni tar-riskju tal-kreditu u tal-likwidità, huwa jissuġġerixxi l-valutazzjoni tal-benefiċċji tar-restrizzjonijiet għall-investiment fl-ABZPs ikkontemplati fil-konfront tal-impatt tagħhom fuq il-funzjonament u l-profondità tas-swieq tat-titolizzazzjoni.

6.4

Il-Kummissjoni diġà nnotat illi l-kost tal-implimentazzjoni tar-riforma tista’ twassal biex numru ta’ fondi eżistenti joħorġu mis-suq (35), li jista’ jwassal għal aktar konċentrazzjoni f’suq li huwa diġà kkonċentrat (36). Jekk din is-sitwazzjoni sseħħ, l-MMFs rimanenti jistgħu jsiru aktar sistemikament importanti, partikolarment fir-rigward tal-mekkaniżmu ta’ trażmissjoni tal-politika monetarja, minħabba l-involviment tal-MMFs fil-finanzjament tal-banek għal żmien qasir. Dawn l-aspetti jeħtieġu wkoll evalwazzjoni ulterjuri.

8.1

Bid-dħul fis-seħħ tar-regolament propost, jistgħu jiġu stabbiliti, innegozjati jew ġestiti fl-Unjoni bħala MMFs biss dawk l-impriżi ta’ investiment kollettiv awtorizzati skont ir-reġim ipprovdut fih (40). Id-definizzjoni preżenti ta’ MMFs għall-finijiet tal-ġbir ta’ statistika ta’ istituzzjonijiet finanzjarji monetarji hija allijata mal-Linji Gwida CESR, li jiżgura t-trattament konsistenti ta’ MMFs għal finijiet statistiċi u superviżorji. Għaldaqstant, wara d-dħul fis-seħħ tar-regolament propost (41) u sakemm ikun hemm emendi ulterjuri għall-qafas statistiku tal-BĊE, jista’ potenzjalment ikun hemm perijodu li matulu japplikaw definizzjonijiet differenti għal finijiet superviżorji u statistiċi tal-BĊE. F’dan ir-rigward, ir-Regolament (UE) Nru 1071/2013 (BĊE/2013/33) fih kriterji għall-identifikazzjoni ta’ MMFs li huma obbligatorji għal finijiet statistiċi, irrispettivament minn jekk humiex applikati għal finijiet superviżorji fil-livell nazzjonali.

8.2

Ir-regolament propost jitlob li l-maniġers ta’ MMF jirrapportaw informazzjoni lill-awtoritajiet kompetenti fuq bażi trimestrali. Din l-informazzjoni għandha mbagħad tkun disponibbli lill-ESMA għall-finijiet li tinħoloq bażi ta’ dejta ċentrali tal-MMFs kollha stabbiliti, ġestiti jew kummerċjalizzati fl-Unjoni. Il-BĊE għandu jkollu aċċess għal din il-bażi ta’ dejta għal finijiet statistiċi biss (42). Filwaqt li l-BĊE jappoġġja din ir-referenza espressa, jista’ jkun meħtieġ aċċess usa’ għal dejta oħra tal-MMF sabiex jiġi żgurat il-kontribut tas-Sistema Ewropea tal-Banek Ċentrali lil (i) it-tmexxija mingħajr xkiel ta’ politiki relatati mal-istabbiltà tas-sistema finanzjarja u (ii) l-appoġġ analitiku u statistiku tal-BĊE lill-BERS (43).