14.6.2013   

MT

Il-Ġurnal Uffiċjali tal-Unjoni Ewropea

C 168/2

1.

L-Artikoli 165 u 166 tat-Trattat dwar il-Funzjonament tal-Unjoni Ewropea.

2.

L-Istrateġija Ewropa 2020, b'mod partikolari, il-mira ewlenija li jiżdied il-proporzjon ta' persuni ta' bejn it-30 u l-34 sena li jkunu temmew l-edukazzjoni terzjarja jew ekwivalenti għal mill-inqas 40 %.

3.

Il-Konklużjonijiet tal-Kunsill tat-12 ta' Mejju 2009 li jistabbilixxu qafas strateġiku għall-kooperazzjoni Ewropea fl-edukazzjoni u t-taħriġ (“ET 2020”) (1) li identifikaw il-promozzjoni tal-ekwità, il-koeżjoni soċjali u ċ-ċittadinanza attiva bħala wieħed mill-erba' objettivi strateġiċi tiegħu u li enfasizzaw li l-politika dwar l-edukazzjoni u t-taħriġ għandha tippermetti liċ-ċittadini kollha, irrispettivament miċ-ċirkostanzi personali, soċjali jew ekonomiċi tagħhom, jiksbu, jaġġornaw u jiżviluppaw tul ħajjithom kemm ħiliet speċifiċi għall-impjieg kif ukoll ħiliet u kompetenzi prinċipali.

4.

Il-Konklużjonijiet tal-Kunsill tal-11 ta' Mejju 2010 dwar id-dimensjoni soċjali tal-edukazzjoni u t-taħriġ (2), li enfasizzaw l-importanza li jiġu żgurati opportunitajiet indaqs għall-aċċess għal edukazzjoni ta' kwalità, kif ukoll l-ekwità fit-trattament u eżiti li jkunu indipendenti mill-isfond soċjoekonomiku u fatturi oħra li jistgħu jwasslu għal żvantaġġ edukattiv, u li rrikonoxxew il-ħsieb ekonomiku u soċjali biex jogħlew il-livelli ġenerali ta' kisba fl-edukazzjoni u biex jiġu żviluppati livelli għolja ta' ħiliet u nnotaw li l-forniment ta' ħiliet u kompetenzi prinċipali għal kulħadd ser ikollu rwol kruċjali fit-titjib tal-impjegabbiltà taċ-ċittadini, l-inklużjoni soċjali u s-sodisfazzjon personali.

5.

Il-Konklużjonijiet tal-Kunsill tat-28 ta' Novembru 2011 dwar l-immodernizzar tal-edukazzjoni għolja (3), li stiednu lill-Istati Membri biex jippromwovu l-iżvilupp sistematiku ta' strateġiji effettivi sabiex jiġi żgurat aċċess għall-gruppi sottorappreżentati u jżidu l-isforzi sabiex jitnaqqsu kemm jista' jkun ir-rati ta’ tluq bikri mill-edukazzjoni għolja billi jittejbu l-kwalità, ir-rilevanza u l-attraenza tal-korsijiet, b'mod partikolari permezz ta’ tagħlim iċċentrat fuq l-istudent u billi jiġu pprovduti appoġġ, gwida u pariri rilevanti wara li jibdew l-edukazzjoni għolja.

6.

Il-Komunikazzjoni ta' Bukarest mill-Ministri li attendew il-Konferenza Ministerjali tal-Proċess ta' Bolonja tas-26 u s-27 ta' April 2012, li fiha qablu li jadottaw miżuri nazzjonali biex jitwessa' l-aċċess b'mod ġenerali għal edukazzjoni għolja ta' kwalità u tennew l-objettiv li l-istudenti li jibdew u jtemmu l-edukazzjoni għolja għandhom jirriflettu d-diversità tal-popolazzjonijiet tal-Ewropa, flimkien mat-trattament speċifiku tad-dimensjoni soċjali fl-edukazzjoni għolja fir-rapport ta' implimentazzjoni tal-Proċess ta' Bolonja tal-2012, li jeżamina l-informazzjoni ta' statistika disponibbli dwar l-impatt tal-isfond tal-istudenti fuq il-parteċipazzjoni fl-edukazzjoni għolja u l-approċċi ta' politika differenti biex iwessgħu l-aċċess.

7.

Il-Komunikazzjoni tal-20 ta' Novembru 2012 mill-Kummissjoni lill-Parlament Ewropew, il-Kunsill, il-Kumitat Ekonomiku u Soċjali Ewropew u l-Kumitat tar-Reġjuni – Reviżjoni tal-Edukazzjoni: Ninvestu fil-ħiliet għal eżiti soċjoekonomiċi aħjar  (4), li fid-dokument ta' ħidma tal-persunal (5) li jakkumpanjah jippromwovi l-iżvilupp u t-tisħiħ ta' sħubijiet u ta' mogħdijiet flessibbli għall-iżvilupp tal-ħiliet tul il-ħajja.

8.

Ir-Rakkomandazzjoni tal-Kunsill tal-20 ta' Diċembru 2012, dwar il-validazzjoni tat-tagħlim mhux formali u informali (6), fejn l-Istati Membri qablu li jiġu stabbiliti arranġamenti għall-validazzjoni ta' dan it-tagħlim, bil-ħsieb li jiġi żgurat li l-individwi jingħataw l-opportunità li jużaw dak li jkunu tgħallmu barra mill-edukazzjoni u t-taħriġ formali għall-karrieri tagħhom kif ukoll għall-għan ta' tagħlim ulterjuri, inkluż fl-edukazzjoni għolja.

9.

L-Istħarriġ Annwali dwar it-Tkabbir tal-2013, li jidentifika l-edukazzjoni bħala xprun fundamentali għat-tkabbir u l-kompetittività, flimkien mal-innovazzjoni u r-riċerka u l-iżvilupp, u jissottolinja r-rwol fundamentali tal-investimenti fil-kapital uman għat-trattament tal-qgħad u t-tħejjija għall-irkupru ekonomiku.

10.

L-attività ta' tagħlim bejn il-pari tal-ET 2020 dwar il-politiki u l-prattiki biex jitnaqqas it-tluq bikri u jkun hemm titjib fir-rati ta' tlestija tal-edukazzjoni għolja, li saret fi Praga f'Marzu 2013, li ffukat fuq l-approċċi fil-livell nazzjonali, istituzzjonali u Ewropew biex ikun hemm titjib fir-rati ta' tlestija u biex ir-realtajiet istituzzjonali jiġu adattati għal korp studentesk b'aktar diversità, b'sostenn mill-evidenza u l-analiżi.

1.

Filwaqt li l-isfidi li qed taffaċja l-Ewropa llum ma jistgħux jiġu solvuti biss bl-edukazzjoni u t-taħriġ weħidhom, huwa kruċjali kemm f'termini ekonomiċi kif ukoll soċjali li n-nies jiġu mgħammra bil-ħiliet u l-kompetenzi ta' livell għoli li teħtieġ l-Ewropa, inkluż b'impenn biex jiġi żgurat aċċess aktar ekwu għall-parteċipazzjoni fl-edukazzjoni għolja u t-tlestija tagħha. Għad hemm wisq individwi kapaċi li ma jipparteċipawx fl-edukazzjoni għolja għal raġunijiet soċjali, kulturali jew ekonomiċi jew minħabba n-nuqqas ta' sistemi suffiċjenti ta' appoġġ u gwida.

2.

L-irkupru ekonomiku tal-Ewropa u l-ħidma għat-tkabbir sostenibbli, inkluż permezz ta' riċerka u innovazzjoni msaħħa, jiddependu dejjem aktar fuq il-kapaċità tagħha li tiżviluppa l-ħiliet taċ-ċittadini kollha tagħha, li turi l-interdipendenza tal-objettivi soċjali u ekonomiċi. B'mod parallel mal-isforzi biex jiġu mtejba l-ħiliet permezz tal-edukazzjoni u t-taħriġ vokazzjonali, l-edukazzjoni għolja ta' kwalità u t-tagħlim tul il-ħajja għandhom ukoll rwol kruċjali fit-tisħiħ tal-impjegabbiltà u biex tiżdied il-kompetittività, waqt li fl-istess ħin jippromwovu l-iżvilupp personali u professjonali tal-istudenti u l-gradwati, u jistimulaw is-solidarjetà soċjali u l-impenn ċiviku.

3.

Il-Proċess ta' Bolonja kif ukoll l-iżvilupp sussegwenti ta' Żona Ewropea ta' Edukazzjoni Għolja (EHEA), l-aġenda tal-UE għall-immodernizzar tal-edukazzjoni għolja u l-Istrateġija Ewropa 2020 kollha juru li l-kooperazzjoni Ewropea u r-risponsi ta' politika kondiviżi għandhom kontribut siewi x'jagħtu fl-affrontar ta' sfidi komuni permezz ta' skambju ta' prassi tajba, analiżi tal-politika komparattiva bbażata fuq l-evidenza u l-provvista ta' appoġġ finanzjarju, kif ukoll permezz ta' għajnuna biex jiġu pprovduti mekkaniżmi sostenibbli li jiffaċilitaw mobbiltà akbar ta' gruppi diversi ta' studenti.

1.

Jadottaw objettivi nazzjonali, li huma maħsuba biex iżidu l-aċċess, il-parteċipazzjoni u r-rati ta' tlestija ta' gruppi sottorappreżentati u żvantaġġati fl-edukazzjoni għolja, bil-ħsieb li jimxu 'l quddiem lejn l-għan tal-Proċess ta' Bolonja li l-istudenti li jibdew, jipparteċipaw fi u jtemmu l-edukazzjoni għolja fil-livelli kollha għandhom jirriflettu d-diversità tal-popolazzjonijiet tal-Istati Membri.

2.

Jinkoraġġixxu l-kooperazzjoni bejn fornituri tal-edukazzjoni fil-livelli kollha, inkluzi dawk li jipprovdu tagħlim mhux formali u informali, u partijiet interessati rilevanti oħra, sabiex jidentifikaw il-gruppi partikolari li jistgħu jkunu sottorappreżentati fl-edukazzjoni għolja, kif ukoll jippromwovu parteċipazzjoni akbar ta' gruppi sottorappreżentati fi ħdan il-professjoni tal-għalliema nfisha fis-setturi kollha tal-edukazzjoni.

3.

Jiffaċilitaw l-iżvilupp ta' strateġiji proattivi u strutturi relatati fil-livell istituzzjonali, inkluż attivitajiet ta' sensibilizzazzjoni u opportunitajiet ta' tagħlim tul il-ħajja, l-għoti ta' informazzjoni dwar opportunitajiet u eżiti edukattivi u dawk relatati mas-suq tax-xogħol, gwida dwar l-għażla adegwata tal-korsijiet, konsulenza u gwida bejn il-pari u servizzi ta' appoġġ.

4.

Jippromwovu l-permeabbiltà u l-iżvilupp ta' toroq ta' progressjoni flessibbli u trasparenti għall-edukazzjoni għolja, b'mod partikolari mill-edukazzjoni u t-taħriġ vokazzjonali u mit-tagħlim mhux formali u informali, ffaċilitat mill-għodod ta' trasparenza bħal oqfsa nazzjonali ta' kwalifiki marbuta mal-Qafas Ewropew tal-Kwalifiki.

5.

Iżidu l-opportunitajiet għat-tagħlim flessibbli billi jiddiversifikaw il-mod kif jitwassal il-kontenut tat-tagħlim, pereżempju billi jadottaw approċċi ċċentrati fuq l-istudenti għat-tagħlim mogħti u miksub, billi jestendu l-għoti ta' tagħlim part-time, billi jiżviluppaw apprentistati bbażati fuq kreditu, billi jimmodularizzaw programmi u tagħlim mill-bogħod permezz tal-użu tal-ICT u billi jiżviluppaw riżorsi edukattivi miftuħa b'garanzija ta' kwalità tajba.

6.

Jesploraw kif il-mekkaniżmi ta' finanzjament jistgħu jipprovdu inċentivi għall-istituzzjonijiet biex jiżviluppaw u jagħtu opportunitajiet ta' tagħlim flessibbli u b'garanzija ta' kwalità.

7.

Jeżaminaw kif l-istruttura globali tal-finanzjament istituzzjonali u tal-appoġġ finanzjarju għall-istudenti tħalli impatti fuq il-parteċipazzjoni ta' gruppi sottorappreżentati u ta' dawk żvantaġġati fl-edukazzjoni għolja u jikkunsidraw kif l-aħjar jiġi mmirat l-appoġġ finanzjarju biex itejjeb l-aċċess, il-parteċipazzjoni u r-rati ta' tlestija.

8.

Jaħdmu flimkien mal-istituzzjonijiet ta' edukazzjoni għolja u partijiet interessati rilevanti oħra biex iżidu r-rati ta' tlestija tal-edukazzjoni għolja billi jtejbu l-kwalità tal-proċess ta' tagħlim mogħti u miksub, b'mod partikolari permezz ta' aktar flessibbiltà fit-twassil u bl-għoti ta' appoġġ rilevanti wara li tinbeda l-edukazzjoni għolja, u billi titjieb l-attraenza tal-korsijiet u r-rilevanza għas-suq tax-xogħol.

9.

Jeżaminaw u jfittxu li jnaqqsu kwalunkwe differenza reġjonali u ġeografika fl-Istati Membri f'termini ta' aċċess għal, parteċipazzjoni fi, u t-tlestija tal-edukazzjoni għolja.

10.

Jinvolvu ruħhom fil-ġbir sistematiku ta' data komparabbli rilevanti – filwaqt li jagħmlu l-aħjar użu tar-riżorsi eżistenti – sabiex titjieb il-bażi ta' evidenza għall-iżvilupp tal-politika u sabiex jippermettu l-monitoraġġ effettiv tal-objettivi nazzjonali dwar l-aċċess, il-parteċipazzjoni u r-rati ta' tlestija fl-edukazzjoni għolja fost gruppi sottorappreżentati u żvantaġġati.

(a)

tibda studju ta' tfassil tal-politiki dwar l-aċċess u r-rati ta' tluq bikri mill-iskola u t-tlestija fl-edukazzjoni għolja bil-ħsieb li tiġi analizzata l-effettività ta' approċċi nazzjonali u istituzzjonali differenti u kif fatturi strutturali, istituzzjonali, personali, soċjokulturali u soċjoekonomiċi, jinfluwenzaw it-tluq bikri u t-tlestija;

(b)

issegwi ħidma konġunta mal-Eurostat dwar studju ta' fattibbiltà biex ikun hemm titjib fil-metodoloġija għall-ġbir ta' data amministrattiva dwar it-tul tal-istudji u r-rati ta' tlestija fl-edukazzjoni għolja;

(c)

tiżviluppa studju dwar l-influwenza ta' mudelli differenti ta' finanzjament, jew ta' kondiviżjoni tal-ispejjeż, fuq l-effettività, l-effiċjenza u l-ekwità tal-edukazzjoni għolja f'konformità mal-impenji fl-aġenda tal-2011 għall-immodernizzar tal-edukazzjoni għolja (7).

1.

Iwettqu l-ħidma fuq id-dimensjoni soċjali tal-edukazzjoni għolja, pereżempju billi jiżviluppaw it-tagħlim bejn il-pari u l-analiżi tal-politika bbażata fuq l-evidenza dwar dan is-suġġett permezz tal-użu tal-Metodu Miftuħ ta' Koordinazzjoni, kif ukoll permezz ta' ħidma fi ħdan il-Proċess ta' Bologna u mal-korpi adegwati u bl-inizjattivi eżistenti.

2.

Jużaw ir-riżultati u l-eżiti tal-istudji u ta' ħidma oħra li qed twettaq il-Kummissjoni u sorsi oħra rilevanti bħala bażi għal aktar dibattitu u konsiderazzjoni tal-politika fl-eżami ta' kwistjonijiet ta' aċċess, parteċipazzjoni, tlestija u l-impatt ta' mudelli differenti ta' finanzjament fir-rigward tal-edukazzjoni għolja.

3.

Isaħħu s-sinerġiji bejn l-UE u l-Proċess ta' Bolonja fit-twettiq tad-dimensjoni soċjali tal-edukazzjoni għolja bl-aħjar użu tal-appoġġ finanzjarju taħt il-programm tal-Unjoni ta' wara l-2013 fil-qasam tal-edukazzjoni, it-taħriġ, iż-żgħażagħ u l-isport.

4.

Jużaw l-appoġġ finanzjarju taħt l-Inizjattiva favur l-Impjieg taż-Żgħażagħ għall-għoti ta' opportunitajiet immirati fl-edukazzjoni għolja għal żgħażagħ żvantaġġati u bla xogħol taħt l-età ta' 25 sena, sabiex dawn ikunu jistgħu jiksbu ħiliet speċifiċi għall-impjieg.