10.1.2013   

MT

Il-Ġurnal Uffiċjali tal-Unjoni Ewropea

C 6/18

1.

L-Impriża Konġunta Ewropea għall-implimentazzjoni tal-Inizjattiva Konġunta tat-Teknoloġija dwar in-Nanoelettronika (l-Impriża Konġunta ENIAC), tinsab fi Brussell u twaqqfet f’Diċembru 2007 (1) għal perjodu ta’ 10 snin.

2.

L-objettiv prinċipali tal-Impriża Konġunta huwa li tiddefinixxi u timplimenta "Aġenda għar-Riċerka" għall-iżvilupp ta’ kompetenzi ewlenin għan-nanoelettronika f’oqsma differenti ta’ applikazzjoni sabiex jissaħħu l-kompetittività u s-sostenibbiltà tal-Ewropa u jkun possibbli l-iżvilupp ta’ swieq ġodda u applikazzjonijiet fis-soċjetà (2).

3.

Il-Membri Fundaturi tal-Impriża Konġunta huma l-Unjoni Ewropea rrappreżentata mill-Kummissjoni, l-Istati Membri, il-Belġju, l-Estonja, Franza, il-Ġermanja, il-Greċja, l-Irlanda, l-Italja, il-Pajjiżi l-Baxxi, il-Polonja, il-Portugall, Spanja, l-Isvezja u r-Renju Unit u l-Assoċjazzjoni għall-Attivitajiet Nanoelettroniċi Ewropej (AENEAS). Stati Membri oħrajn u pajjiżi assoċjati, kif ukoll kwalunkwe pajjiż ieħor jew kwalunkwe entità ġuridika oħra li kapaċi tagħti kontribuzzjoni finanzjarja sostanzjali għall-kisba tal-objettivi tal-Impriża Konġunta ENIAC, jistgħu jsiru membri tal-Impriża Konġunta ENIAC.

4.

Il-kontribuzzjoni massimu tal-UE lill-Impriża Konġunta ENIAC li tkopri l-ispejjeż operazzjonali u l-attivitajiet ta’ riċerka hija ta’ EUR 450 miljun li għandha titħallas mill-baġit tas-Seba’ Programm Kwadru (3). L-AENEAS għandha tagħmel kontribuzzjoni massima ta’ EUR 30 miljun għall-ispejjeż operazzjonali tal-Impriża Konġunta. L-Istati Membri fl-ENIAC għandhom jagħmlu kontributi in natura għall-ispejjeż operazzjonali (permezz tal-faċilitazzjoni tal-implimentazzjoni tal-proġetti), u jagħtu kontribuzzjonijiet finanzjarji ta’ mill-inqas 1,8 darbiet aktar mill-kontribuzzjoni tal-UE. Kontributi in natura għandhom jingħataw ukoll mill-organizzazzjonijiet tar-riċerka li qegħdin jipparteċipaw fil-proġetti. L-organizzazzjonijiet li qed jipparteċipaw fil-proġetti ta’ riċerka għandhom jagħmlu kontributi in natura li huma minn tal-inqas daqs il-kontribuzzjoni tal-Kummissjoni u tal-Istati Membri.

5.

L-Impriża Konġunta ngħatat l-awtonomija finanzjarja tagħha fis-26 ta’ Lulju 2010.

6.

L-approċċ tal-verifika meħud mill-Qorti fih proċeduri tal-verifika analitiċi, ittestjar tat-tranżazzjonijiet fil-livell tal-Impriża Konġunta u valutazzjoni tal-kontrolli ewlenin tas-sistemi ta’ sorveljanza u kontroll. Dan huwa supplimentat b’evidenza pprovduta mix-xogħol ta’ awdituri oħrajn (fejn huwa relevanti) u analiżi tar-rappreżentazzjonijiet tal-maniġment.

7.

Skont id-dispożizzjonijiet tal-Artikolu 287(1) tat-Trattat dwar il-Funzjonament tal-Unjoni Ewropea, il-Qorti vverifikat il-kontijiet annwali (4) tal-Impriża Konġunta ENIAC, li jikkonsistu fir-“rapporti finanzjarji” (5) u fir-“rapporti dwar l-implimentazzjoni tal-baġit” (6) għas-sena finanzjarja li ntemmet fil-31 ta’ Diċembru 2011, u l-legalità u r-regolarità tat-tranżazzjonijiet li fuqhom huma bbażati dawk il-kontijiet.

8.

Din id-Dikjarazzjoni ta’ Assigurazzjoni hija indirizzata lill-Parlament Ewropew u lill-Kunsill skont l-Artikolu 185(2) tar-Regolament tal-Kunsill (KE, Euratom) Nru 1605/2002 (7).

9.

Bħala uffiċjal li jawtorizza, id-Direttur jimplimenta d-dħul u l-infiq tal-baġit skont ir-regoli finanzjarji tal-Impriża Konġunta, fuq ir-responsabbiltà tiegħu stess u fil-limiti tal-approprjazzjonijiet awtorizzati (8). Id-Direttur huwa responsabbli milli jistabbilixxi (9) l-istruttura organizzattiva u s-sistemi u l-proċeduri ta’ ġestjoni u ta’ kontroll interni relevanti għat-tħejjija ta’ kontijiet finali (10) li jkunu ħielsa minn dikjarazzjoni skorretta materjali, sew jekk minħabba fi frodi u sew jekk minħabba xi żball, u biex jiżgura li t-tranżazzjonijiet li fuqhom huma bbażati dawk il-kontijiet huma legali u regolari.

10.

Ir-responsabbiltà tal-Qorti hija li tipprovdi, abbażi tal-verifika tagħha, dikjarazzjoni ta’ assigurazzjoni dwar l-affidabbiltà tal-kontijiet annwali tal-Impriża Konġunta u dwar il-legalità u r-regolarità tat-tranżazzjonijiet li fuqhom huma bbażati.

11.

Il-Qorti mexxiet l-awditu (verifika) tagħha skont l-Istandards Internazzjonali tal-Awditjar (Verifika) u l-Kodiċijiet tal-Etika tal-IFAC (11) u l-ISSAI. Dawn l-istandards jeżiġu li l-Qorti tikkonforma mar-rekwiżiti etiċi u professjonali u li tippjana u twettaq l-awditu (verifika) sabiex tikseb aċċertament (assigurazzjoni) raġonevoli dwar jekk il-kontijiet humiex ħielsa minn kwalunkwe dikjarazzjoni skorretta materjali u dwar jekk it-tranżazzjonijiet li fuqhom huma bbażati jkunux legali u regolari.

12.

L-awditu (verifika) tal-Qorti jinvolvi t-twettiq ta’ proċeduri biex tinkiseb evidenza għall-awditjar (verifika) dwar l-ammonti u d-divulgazzjonijiet (żvelar) fil-kontijiet u dwar il-legalità u r-regolarità tat-tranżazzjonijiet li fuqhom huma bbażati. Il-proċeduri magħżula, inkluża l-valutazzjoni tagħha tar-riskji ta’ dikjarazzjoni skorretta materjali tal-kontijiet jew ta’ tranżazzjonijiet illegali jew irregolari, sew jekk minħabba frodi jew inkella minħabba xi żball, jiddependu fuq il-ġudizzju tal-awditu (verifika) tagħha. Meta jsiru dawk il-valutazzjonijiet tar-riskju, jiġu meqjusa l-kontrolli interni relevanti għat-tħejjija u l-preżentazzjoni tal-kontijiet sabiex jiġu mfassla proċeduri tal-awditjar (verifika) li jkunu xierqa skont iċ-ċirkostanzi. L-awditu (verifika) tal-Qorti jinkludi wkoll evalwazzjoni tal-adegwatezza tal-politiki kontabilistiċi użati u r-raġonevolezza tal-istimi kontabilistiċi magħmula mill-maniġment, kif ukoll evalwazzjoni tal-preżentazzjoni kumplessiva tal-kontijiet.

13.

Il-Qorti tqis li l-evidenza għall-awditjar (verifika) miksuba hija suffiċjenti u adegwata biex tipprovdi bażi għall-opinjonijiet imniżżlin hawn taħt.

14.

Fl-opinjoni tal-Qorti, il-kontijiet annwali tal-Impriża Konġunta jippreżentaw b’mod ġust, fl-aspetti materjali kollha, il-pożizzjoni finanzjarja tagħha fil-31 ta’ Diċembru 2011 u r-riżultati tal-operazzjonijiet tagħha u l-flussi tal-flus (likwidità) tagħha għas-sena li tkun intemmet dakinhar, skont id-dispożizzjonijiet tar-regoli finanzjarji tagħha.

15.

L-istrateġija ta’ verifika ex-post  (12) tal-Impriża Konġunta ġiet adottata minn deċiżjoni tal-Bord ta’ Tmexxija fit-18 ta’ Novembru 2010 u hija kontroll ewlieni (13) għal valutazzjoni tal-legalità u r-regolarità tat-tranżazzjonijiet ta’ bażi. Il-pagamenti magħmula fl-2011 li jirrelataw ma ċertifikati ta’ aċċettazzjoni tal-ispejjeż maħruġa mill-Awtoritajiet ta’ Finanzjament Nazzjonali (NFAs) tal-Istati Membri ammontaw għal EUR 6,8 miljun, li jirrappreżentaw 45 % tat-total tal-pagamenti operazzjonali. L-implimentazzjoni tal-istrateġija tal-verifika ex-post bdiet fl-2011.

16.

Il-verifika tal-klejms għall-ispejjeż tal-proġetti ġiet iddelegata lill-NFAs tal-Istati Membri. Il-ftehimiet amministrattivi ffirmati mal-NFAs ma jinkludux l-arranġamenti prattiċi għall-verifiki ex-post. Sa tmiem il-verifika (Settembru 2012), l-Impriża Konġunta ma kinitx irċeviet informazzjoni suffiċjenti relatata mal-istrateġiji tal-verifika tal-NFAs (14) u ma kinitx f’pożizzjoni li tivvaluta jekk l-istrateġija tal-verifika ex post tipprovdix assigurazzjoni suffiċjenti fir-rigward tal-legalità u r-regolarità tat-tranżazzjonijiet ta’ bażi (15). Barra minn hekk, ma twettqet ebda verifika ex-post mill-NFAs fuq l-għotjiet imħallsa sal-aħħar tal-2011.

17.

L-informazzjoni disponibbli fuq l-implimentazzjoni tal-istrateġija tal-verifika ex-post tal-Impriża Konġunta mhijiex suffiċjenti biex tikkonkludi jekk dan il-kontroll ewlieni hux qed jiffunzjona b’mod effettiv.

18.

Fl-opinjoni tal-Qorti, għajr għall-effetti possibli tal-kwistjoni deskritta fil-bażi għal opinjoni kwalifikata fil-paragrafi 15 sa 17, it-tranżazzjonijiet li fuqhom huma bbażati l-kontijiet annwali tal-Impriża Konġunta għas-sena finanzjarja li ntemmet fil-31 ta’ Diċembru 2011 huma legali u regolari fl-aspetti materjali kollha.

19.

Il-kummenti li jsegwu fil-paragrafi 20 sa 33 ma jixħtux dubju fuq l-opinjonijiet tal-Qorti.

20.

Il-baġit finali tal-2011 kien jinkludi approprjazzjonijiet ta’ impenn u ta’ pagament li ammontaw għal EUR 66 miljun u EUR 35 miljun rispettivament. Ir-rati ta’ utilizzazzjoni għall-approprjazzjonijiet ta’ impenn u ta’ pagament disponibbli kienu 97 % u 48 % (16) rispettivament. Mill-EUR 63,6 miljun f’approprjazzjonijiet ta’ impenn disponibbli għal attivitajiet operazzjonali, EUR 20,1 miljun kienu implimentati bħala impenn globali għall-ewwel sejħa għall-proposti 2011 u EUR 42,2 miljun ġew implimentati bħala impenn globali għat-tieni sejħa għall-proposti 2011.

21.

Nuqqas ta’ proċeduri adegwati u dgħufijiet fil-kontroll kienu osservati fid-diżimpenjar ta’ approprjazzjonijiet mhux użati. Approprjazzjonijiet li kellhom jiġu implimentati sa tmiem l-2010 u approprjazzjonijiet li kellhom jiġu implimentati sa tmiem l-2011 ġew diżimpenjati f’Jannar 2012. L-impenn globali ta’ EUR 2,8 miljun li ma ntużax fuq il-linja tal-baġit tal-attivitajiet operazzjonali għall-2010 b’data finali ta’ implimentazzjoni tal-31 ta’ Diċembru 2011 ma ġiex diżimpenjat.

22.

Is-sejħiet għall-proposti organizzati fl-2008, l-2009 u l-2010 rriżultaw fi ftehimiet ta’ għotja ffirmati li jammontaw għal total ta’ EUR 107,9 miljun, li jirrappreżentaw 25 % tal-kontribuzzjoni massima tal-UE lill-Impriża Konġunta għall-attivitajiet ta’ riċerka (17). Fl-2011, tnedew żewġ sejħiet għall-proposti li ammontaw għal EUR 62,3 miljun, imma l-firma tal-ftehimiet tal-għotja baqgħet għaddejja. Fl-2012, tnedew żewġ sejħiet oħra għall-proposti li ammontaw għal EUR 84,5 miljun. Matul l-2013, kieku jkollhom jiġu mnedija żewġ sejħiet oħra għall-proposti b’baġit ta’ EUR 185,3 miljun (42 %) sabiex il-kontribuzzjoni disponibbli tal-UE ta’ EUR 440 miljun tintuża kompletament.

23.

L-Impriża Konġunta s’issa għadha ma implimentatx kontrolli interni u sistemi ta’ informazzjoni finanzjarja effettivi u effiċjenti b’mod sħiħ. Dan irriżulta fi żbalji u dewmien sinifikanti fir-rappurtar finanzjarju li ġew ikkoreġuti qabel l-adozzjoni tal-kontijiet finali.

24.

L-Uffiċjal tal-Kontabilità tal-Impriża Konġunta vvalida s-sistemi finanzjarji u kontabilistiċi (ABAC u SAP) fl-20 ta’ Diċembru 2010. Madankollu, il-proċessi ta’ negozju ta’ bażi li jipprovdu informazzjoni finanzjarja, b’mod partikolari dak li jipprovdi informazzjoni finanzjarja dwar il-validazzjoni u l-pagamenti tal-klejms għall-ispejjeż irċevuti mill-NFAs, ma ġewx ivvalidati matul l-2011.

25.

L-Artikolu 6(2) tar-Regolament tal-Kunsill li jistabbilixxi lill-ENIAC jistipola li l-Impriża Konġunta għandha jkollha l-kapaċità tal-verifika interna. Madankollu, fi tmiem l-2011, dan l-element importanti tas-sistema ta’ kontroll intern kien għadu ma ġiex stabbilit.

26.

Fl-2011, is-Servizz ta’ Awditjar Intern tal-Kummissjoni wettaq eżerċizzju ta’ valutazzjoni tar-riskju. Abbażi tar-riżultati tal-valutazzjoni tar-riskju, il-pjan strateġiku tal-verifika għall-2012-2014 ġie ppreżentat lill-Bord tat-Tmexxija għall-adozzjoni fit-22 ta’ Novembru 2011.

27.

Il-karta tal-missjoni tas-Servizz ta’ Awditjar intern tal-Kummissjoni ġiet adottata mill-Bord tat-Tmexxija fit-18 ta’ Novembru 2010. Madankollu, ir-regoli finanzjarji tal-Impriża Konġunta għadhom ma ġewx emendati sabiex jinkludu d-dispożizzjoni tar-Regolament ta’ Qafas (18) li jirreferi għas-setgħat tal-awditur intern tal-Kummissjoni.

28.

L-istatuti tal-Impriża Konġunta ENIAC jistipulaw li l-kontribuzzjonijiet finanzjarji mill-Istati Membri fl-ENIAC għandhom jammontaw għal total ta’ minn tal-inqas 1,8 drabi (19) tal-kontribuzzjoni finanzjarja tal-UE, filwaqt li l-għotjiet tal-Impriża Konġunta jistgħu jilħqu massimu ta’ 16,7 % tat-total tal-ispejjeż eliġibbli tal-proġetti. Għall-ewwel ħames sejħiet għall-proposti, il-kontribuzzjoni finanzjarja mill-Istati Membri fl-ENIAC ammontat għal 1,55 drabi tal-kontribuzzjoni finanzjarja tal-UE.

29.

Għall-kuntrarju tal-Istatuti tal-Impriża Konġunta tal-ENIAC (20), il-Greċja qiegħda tuża l-fondi strutturali tal-EU biex tkopri l-kontribuzzjonijiet nazzjonali tagħha lill-benefiċjarji Griegi tal-proġetti ENIAC (21) minflok ma tipprovdi finanzjament nazzjonali. L-Impriża Konġunta aċċettat li l-Greċja tkompli tipparteċipa fil-proġetti ENIAC imma ebda finanzjament m’huwa qed jiġi pprovdut mill-Impriża Konġunta lill-benefiċjarji Griegi, minħabba li mhuwiex permess kofinanzjament ma’ sors ieħor ta’ finanzjament tal-UE (22).

30.

Skont l-Artikoli 19(4) tal-Istatuti tal-Impriża Konġunta u l-Artikolu 40 tar-Regoli Finanzjarji, tagħha u d-Direttur Eżekuttiv huwa mitlub iħejji rapport ta’ attività annwali. Ir-rapport ta’ attività annwali għandu jindika r-riżultati tal-operazzjonijiet b’referenza għall-objettivi stabbiliti, ir-riskji assoċjati ma’ dawn l-operazzjonijiet, l-użu li jkun sar mir-riżorsi pprovduti u l-effiċjenza u l-effettività tas-sistema ta’ kontroll intern. Għandu jikkonferma wkoll li l-informazzjoni li tifforma l-kontenut tar-rapport tippreżenta stampa ċara u ġusta sakemm ma jkunx ġie speċifikat mod ieħor fi kwalunkwe riżerva relatata ma’ oqsma definiti ta’ dħul u nfiq.

31.

Ir-rapport ta’ attività annwali ma jinkludix valutazzjoni tal-effiċjenza u l-effettività tas-sistema ta’ kontroll intern. Ir-rapport annwali jinkludi d-dgħufijiet li ġejjin:

32.

Matul l-2011 l-Impriża Konġunta stabbilixxiet Pjan tal-Kontinwità tan-Negozju u għamlet progress fil-formalizzazzjoni tal-politiki tas-sigurtà tal-IT. Aktar xogħol huwa meħtieġ sabiex il-Pjan ta’ Rkupru minn Diżastru jiġi ffinalizzat.

33.

Il-ftehim mal-Istat Ospitanti (23) bejn l-Impriża Konġunta u l-awtoritajiet Belġjani dwar spazju għall-uffiċċji, il-privileġġi u l-immunitajiet u appoġġ ieħor li għandu jingħata ġie ffirmat fit-2 ta’ Frar 2012.