52013SC0074

DOKUMENT TA’ ĦIDMA TAL-PERSUNAL TAL-KUMMISSJONI

SOMMARJU EŻEKUTTIV TAL-VALUTAZZJONI TAL-IMPATT

Li jakkumpanja d-dokument

Proposta għal Regolament tal-Parlament Ewropew u tal-Kunsill

dwar miżuri biex tonqos l-ispiża biex isiru netwerks tal-komunikazzjoni elettronika b'veloċità għolja

1.           Definizzjoni tal-problema

It-tkabbir intelliġenti, sostenibbli u inklużiv kif maħsub fl-Istrateġija Ewropa 2020 se jkun jiddependi ħafna fuq id-disponibbiltà u l-użu mifrux ta' internet b'veloċità għolja. Infrastruttura diġitali bi kwalità għolja tirfed prattikament kull settur ta' ekonomija moderna u innovattiva. Din hija s-sinsla tas-Suq Uniku, sors kbir tat-tkabbir u li fil-biċċa l-kbira tiegħu għadu mhux sfruttat, u fattur ewlieni għall-kompetittività tal-UE.

L-Aġenda Diġitali għall-Ewropa, waħda mill-inizjattivi ewlenin tal-Istrateġija Ewropa 2020, tiffissa miri ambizzjużi għall-kopertura u l-veloċità tal-broadband. Madanakollu, filwaqt li l-kumpaniji diġà għamlu investimenti sinifikanti fis-settur tat-telekomunikazzjoni, jidher li hemm bżonn li jissaħħu l-isforzi biex jiġi stimulat it-tifrix tal-broadband.

Din il-valutazzjoni tal-impatt takkumpanja proposta leġiżlattiva li, jekk tiġi adottata mill-Parlament Ewropew u mill-Kunsill, għandha traħħas u tiffaċilita t-tifrix tan-netwerks tal-broadband b'veloċità għolja. Dan isir billi jkun żgurat aċċess aħjar għal infrastruttura passiva li tkun adattata għat-twettiq tal-broadband, aktar opportunitajiet għal koperazzjoni fil-ħidmiet tal-inġinerija ċivili, proċeduri razzjonalizzati għall-għoti tal-permessi, u aktar bini lest li jiflaħ l-internet b'veloċità għolja. Il-proposta tħejjiet wara sejħa mill-Kunsill tar-rebbiegħa tal-2012 sabiex jittieħdu passi fuq il-livell tal-UE ħalli jiġu ffrankati l-ispejjeż bħala parti mill-isforzi biex jitlesta s-Suq Uniku Diġitali sal-2015. Din hija parti mill-Att II dwar is-Suq Uniku.

Din l-inizjattiva tindirizza l-problema li ġejja mill-bosta ineffiċjenzi u konġestjonijiet li hemm fil-proċess tat-twettiq tan-netwerks broadband. Dawn l-ineffiċjenzi u konġestjonijiet joħolqu spejjeż kbar u piżijiet amministrattivi kbar għall-impriżi li jixtiequ jagħmlu n-netwerks. Għandu jiġi nnutat ukoll li l-akbar spiża (sa 80%) biex jinfirxu netwerks ġodda hija marbuta mal-inġinerija ċivili.

Ġew identifikati erba' oqsma ta' azzjoni, abbażi ta' studji u rispons estensiv mingħand il-partijiet interessati: (1) l-ineffiċjenzi jew il-konġestjonijiet fejn jidħol l-użu tal-infrastruttura passiva eżistenti (bħal pereżempju l-kanali, il-pajpijiet flessibbli, it-toqob tal-ispezzjoni, il-kaxxi, l-arbli, l-antenni, l-installazzjonijiet, it-torrijiet u strutturi oħra ta' appoġġ), (2) il-konġestjonijiet marbutin mal-użu kondiviż, (3) ineffiċjenzi fejn jidħol l-għoti ta' permessi amministrattivi, u (4) il-konġestjonijiet marbutin mal-użu ġol-bini bil-ħsieb li jiġu konnessi l-klijenti.

Huwa maħsub li jistgħu jiġu ffrankati bejn 20 u 30% billi f'dawn l-oqsma jiġi adottat sett ta' miżuri koerenti u li jsaħħu lil xulxin.

2.           Analiżi tas-sussidjarjetà

Dawn il-miżuri huma meħtieġa fuq il-livell tal-Unjoni biex jitjiebu l-kundizzjonijiet għall-istabbiliment u l-funzjonament tas-suq intern, bħala kumpliment tal-qafas regolatorju għall-komunikazzjoni elettronika, sabiex:

– jitneħħa x-xkiel għall-funzjonament tas-Suq Uniku li ġej mit-traqqigħ tar-regoli fuq il-livelli nazzjonali u subnazzjonali, li jfixkel milli jsir aktar żvilupp u tkabbir ta' kumpaniji Ewropej, li għandu impatt negattiv fuq il-kompetittività Ewropea, u li jxekkel l-investiment u l-ħidma transfruntiera, u għalhekk ifixkel il-libertà li jingħataw servizzi u jinħolqu netwerks tal-komunikazzjoni elettronika kif tiżgura l-leġiżlazzjoni eżistenti tal-Unjoni;

– tiġi stimulata kopertura ambizzjuża tal-broadband, li hija prekundizzjoni għall-iżvilupp tas-Suq Uniku Diġitali, u għalhekk tgħin biex jitneħħa xkiel importanti milli jitlesta s-Suq Uniku;

– jingħaraf il-potenzjal sinifikanti mhux sfruttat li jonqsu l-ispejjeż u jitħeffef it-tifrix tal-broadband.

3.           Għanijiet

Din l-inizjattiva għandha l-għan speċifiku li jonqsu l-ispejjeż u tiżdied l-effiċjenza fit-tifrix tal-broadband b'veloċità għolja. B'aktar preċiżjoni, l-ispejjeż fit-tifrix tal-broadband b'veloċità għolja għandhom jonqsu b'25%. Fl-istess waqt, azzjoni f'dan il-qasam fuq il-livell tal-UE se jikkonsolida wkoll is-Suq Uniku.

Dan l-għan speċifiku doppju jrid jitqies fil-kuntest ġenerali li jiġi stimulat it-tifrix tal-broadband mal-UE, skont il-miri tal-Aġenda Diġitali.

Din l-inizjattiva għandha dawn l-għanijiet operattivi:

(1) Jiżdied l-użu tal-infrastruttura passiva eżistenti li hija adattata biex jinfirex il-broadband, billi tinkiseb aktar trasparenza fejn tidħol din l-infrastruttura u reġim regolatorju aktar konsistenti u effettiv fejn jidħol l-aċċess għaliha, irrispettivament mis-sid;

(2) Tiżdied il-koperazzjoni fil-proġetti tal-inġinerija ċivili li huma rilevanti għat-tifrix tal-broadband mal-UE, b'mod partikolari billi tkun żgurata t-trasparenza u tiżdied iċ-ċertezza legali għal koperazzjoni bejn is-setturi (koperazzjoni intersettorjali) jew bejn l-impriżi tas-settur pubbliku;

(3) Jiġu razzjonalizzati l-proċeduri amministrattivi marbuta mat-tifrix tan-netwerk mal-UE, prinċipalment billi tiżdied it-trasparenza u l-koordinazzjoni tal-proċessi għall-għoti tal-permessi, filwaqt li jkun żgurat l-infurzar tal-iskadenzi u standards minimi fir-rigward tal-"kundizzjonijiet raġonevoli"; u

(4) Jiżdied l-ammont ta' binjiet li jkunu lesti b'infrastruttura miftuħa li tiflaħ l-internet b'veloċità għolja mal-UE, sabiex jonqsu l-ispejjeż u l-piżijiet marbutin mal-modifiki li jsiru wara.

4.           Għażliet Ta' Politika

Intgħażlu erba' għażliet ta' politika wisgħin għal aktar analiżi, imsejsa fuq il-potenzjal li għandhom biex inaqqsu l-ispejjeż tat-tifrix tal-broadband u jħaffuh, fuq il-koerenza u l-kompletezza ġenerali tagħhom, u fl-aħħar nett fuq il-karattru teknoloġikament newtrali.

Bl-Għażla 1, il-Kummissjoni tibqa' għaddejja bil-ħidma tas-soltu għax dawn il-miżuri mhumiex ġodda għalkollox u diġà ħerġin l-aqwa prattiċi. L-azzjoni tinkludi li jsir monitoraġġ, jiġu infurzati r-regoli eżistenti u tingħata aktar gwida dwar ċerti artikoli.

L-Għażla 2 tippromwovi applikazzjoni aktar intensiva, koerenti u armonizzata tad-dispożizzjonijiet u l-għodod eżistenti tal-qafas regolatorju għall-komunikazzjoni elettronika. B'mod konkret, il-Kummissjoni toħroġ Rakkomandazzjoni li tiċċara l-applikazzjoni ta' dawn id-dispożizzjonijiet.

Bl-Għażla 3, il-Kummissjoni tipproponi miżuri aktar olistiċi u ambizzjużi biex jonqsu l-ispejjeż mal-UE, li jkunu japplikaw ukoll għall-atturi li mhumiex tat-telekomunikazzjoni. B'mod konkret, qed jiġu proposti dawn il-miżuri li ġejjin:

(1) dritt ġenerali li jkunu offruti u jintużaw l-infrastrutturi fiżiċi eżistenti li huma adattati għat-tifrix tal-broadband skont termini u kundizzjonijiet ġusti, irrispettivament minn jekk dawn ikunux proprjetà tal-fornituri tan-netwerks tal-komunikazzjoni elettronika jew użati minnhom. It-termini dwar l-użu jitħallew għal negozjati kummerċjali, bil-possibbiltà għal intervent minn mekkaniżmu għas-soluzzjoni tat-tilwim biss meta n-negozjati kummerċjali jfallu mingħajr xi ġustifikazzjoni raġonevoli;

(2) dritt għal aċċess ta' informazzjoni trasparenti dwar l-infrastrutturi fiżiċi eżistenti li huma adattati għat-tifrix tal-broadband, irrispettivament minn sidhom (operaturi tat-telekomunikazzjoni jew mhux tat-telekomunikazzjoni, partijiet privati jew pubbliċi);

(3) drittijiet u obbligi speċifiċi bil-għan li tkun tista' ssir aktar koordinazzjoni fil-ħidmiet tal-inġinerija ċivili (dritt ġenerali biex tiġi nnegozjata l-koordinazzjoni fil-ħidmiet tal-inġinerija ċivili flimkien ma' dritt ġenerali għal aċċess ta' informazzjoni dwar il-ħidmiet ċivili ppjanati; huma maħsuba obbligi oħra meta l-ħidmiet ikunu ffinanzjati minn flus il-poplu);

(4) zieda fit-trasparenza u l-puntwalità fejn jidħlu l-proċeduri għall-għoti tal-permessi, flimkien ma' salvagwardji bil-għan li jiżguraw rekwiżiti u/jew kundizzjonijiet nondiskriminatorji, trasparenti, oġġettivament ġustifikati u proporzjonati;

(5) obbligu li l-bini ġdid u l-bini qadim li jsirlu xogħol ta' rinnovament kbir, jingħataw infrastruttura fiżika interna li tiflaħ l-internet b'veloċità għolja (eż. spazju biżżejjed spazju fil-kanali ż-żgħar), filwaqt li tkun żgurata n-newtralità teknoloġika, u obbligu li l-bini l-ġdid u rinnovat bil-kbir li jkun fih ħafna abitazzjonijiet ikollu punt ta' konċentrazzjoni intern jew estern.

L-Għażla 3 tinqasam f'żewġ għażliet iżgħar, it-3a u t-3b, li jvarjaw fil-funzjoni tal-istrument propost biex jimplimenta l-miżuri deskritti hawn fuq.

Bl-Għażla 4, il-Kummissjoni tipproponi strument vinkolanti ġdid, li jistabbilixxi atlasijiet tal-infrastrutturi li jsegwu l-istandards tal-UE, obbligu ta' aċċess għall-infrastrutturi kollha li huma adattati għat-tifrix tal-broadband bi prezzijiet orjentati lejn l-ispiża, aktar obbligi li ssir koperazzjoni fil-ħidmiet tal-inġinerija ċivili, il-ħolqien ta' post wieħed mnejn ikunu jistgħu jinkisbu l-permessi kollha meħtieġa għat-tifrix tal-infrastruttura l-ġdida, u dispożizzjoni mandatorja li l-binjiet kollha jkunu lesti b'infrastruttura li tiflaħ l-internet b'veloċità għolja sal-2020.

5.           Valutazzjoni tal-Impatti

Peress li prinċipalment din l-inizjattiva għandha natura ekonomika, l-iktar impatti importanti huma dawk ekonomiċi. L-impatti soċjali u ambjentali, l-aktar li għandhom huwa karattru indirett, għax jiddependu fuq l-investiment li jsir fin-netwerk u mill-bqija tal-impatti ekonomiċi indiretti. Ġie analizzat l-impatt li l-miżuri proposti jħallu fuq id-drittijiet fundamentali.

Huwa mistenni li x-xenarju ta' "ħidma bħas-soltu" (l-Għażla 1) la jnaqqas b'mod konsiderevoli l-ispejjeż għat-tifrix tal-broadband mal-Ewropa kollha, u lanqas ikollu effett qawwi fuq l-investiment. Peress li mal-EU kollha huwa mistenni biss impatt limitat ħafna fuq l-investiment, l-effetti sekondarji tiegħu jkunu limitati ukoll. Barra minn hekk, aktarx ħafna li tiżdied il-frammentazzjoni attwali tar-regoli fl-UE. Minħabba l-impatt limitat fuq l-investiment, l-effetti soċjali u ambjentali jkunu marġinali wkoll.

Minħabba l-ispejjeż u l-benefiċċji għall-partijiet interessati ewlenin involuti u l-effetti aktar qawwijin ta' Rakkomandazzjoni meta mqabbla mal-gwida u l-iskambju tal-aqwa prattika, huwa mistenni li bl-Għażla 2 jitħalla impatt pożittiv moderat ġenerali fuq l-investiment fin-netwerks. Minħabba f'hekk, huwa mistenni li jkun hemm kopertura tal-broadband pjuttost akbar u aktar kompetizzjoni. Madanakollu, b'din l-għażla, il-potenzjal kollu li jiġu ffrankati l-ispejjeż bil-koperazzjoni bejn l-impriżi tas-settur pubbliku fil-livell tal-infrastruttura (fejn jidħlu l-immappjar u l-kondiviżjoni tal-infrastruttura u l-koordinazzjoni tal-ħidmiet ċivili) jibqa' mhux sfruttat biżżejjed u għalhekk jintlaqat ħażin il-proporzjon kostijiet-benefiċċji tal-eżerċizzju kollu. Iridu jiġu sfruttati wkoll l-effetti makro pożittivi moderati fuq l-ekonomija. Safejn għandu x'jaqsam is-Suq Uniku, aktarx li Rakkomandazzjoni żżid biss, sa ċertu punt, il-konsistenza fl-UE peress li l-implimentazzjoni tad-dispożizzjonijiet tal-qafas regolatorju tkun promossa iktar. Safejn għandhom x'jaqsmu l-impatti soċjali, huwa mistenni li l-effett pożittiv moderat fuq l-investiment fin-netwerks jissarraf f'effett pożittiv żgħir fuq il-ħolqien tax-xogħol. Aktar trasparenza u koordinazzjoni tal-ħidma fis-settur tat-telekomunikazzjoni jissarrfu wkoll f'impatt pożittiv modest fuq l-ambjent (l-aktar minħabba li jevitaw ix-xogħol doppju).

L-Għażla 3 ("li tippermetti titjib fl-effiċjenza") toħloq benefiċċji netti għoljin għall-impriżi kollha tal-UE li jixtiequ jużaw il-broadband, prinċipalment minħabba ffrankar sinifikanti fin-nefqa kapitali fuq l-investimenti fin-networks li jkun ġej miż-żieda fit-trasparenza, opportunitajiet l-infrastruttura passiva eżistenti biex tintuża ferm aktar, opportunitajiet ta' użu kondiviż bejn is-setturi, tifrix aktar mgħaġġel, eħfef u orħos fosthom permezz ta' permessi ssimplifikati u binjiet li jkunu jifilħu l-internet b'veloċità għolja. Għas-sidien tal-infrastruttura passiva, l-għażla tkun tinvolvi obbligu li jagħtu informazzjoni u aċċess fuq l-infrastrutturi tagħhom, u għalhekk timplika ċerti spejjeż. Madanakollu l-benefiċċji ikunu aktar mill-ispejjeż, b'mod partikolari minħabba li l-aċċess jingħata wara li jsiru n-negozjati kummerċjali, u għalhekk dan jippermetti dħul addizzjonali. Safejn għandhom x'jaqsmu l-awtoritajiet pubbliċi, minkejja li l-ispejjeż ta' dawn il-miżuri jidhru għoljin, jeżistu bosta sinerġiji bejn dawn il-miżuri u miżuri oħra li huma meħtieġa mill-politika nazzjonali (eż. il-prevenzjoni mid-diżastri) jew mil-liġi tal-UE (eż. id-Direttiva INSPIRE) li jnaqqsu l-ispejjeż generali.

Għalhekk bl-Għażla 3 huwa mistenni impatt pożittiv sinifikanti ġenerali fuq l-investiment fin-netwerks b'veloċità għolja, u għaldaqstant kopertura tal-broadband akbar u aktar kompetizzjoni. In-netwerks broadband jilħqu bnadi li altrimenti jitqiesu li mhumiex kummerċjalment attraenti. Biż-żieda fl-investiment fin-netwerks, jibdew ifeġġu makroeffetti pożittivi fuq l-ekonomija, kemm mil-lat ta' effetti sekondarji għal industriji relatati (manifatturi tat-tagħmir, kumpaniji tal-ħidma ċivili), kif ukoll mil-lat ta' aktar innovazzjoni u produttività għall-impriżi kollha inklużi l-SMEs. Dan jista' jħalli effett ġenerali pożittiv fuq il-kompetittività tal-UE permezz ta' tifrix mgħaġġel ta' sistemi tat-trasport intelliġenti u tal-ismartgrid, u titjib relatat fl-effiċjenza enerġetika.

Miżuri ta' armonizzazzjoni bħal dawn inaqqsu wkoll l-ostakli għad-dħul, l-aktar għal operaturi iżgħar, u jnaqqsu b'mod sinifikanti l-frammentazzjoni fis-Suq Uniku Diġitali.

Safejn għandhom x'jaqsmu l-impatti soċjali, l-Għażla 3 tiżgura impatti pożittivi sinifikanti fuq l-investiment, u għalhekk anki fuq is-suq tax-xogħol. Iż-żieda fil-kondiviżjoni tal-infrastruttura u l-koordinazzjoni tal-ħidmiet ċivili tiżgura li jonqos l-inkonvenjent pubbliku.

Minħabba l-karattru intersettorjali tal-miżura, jekk jiżdiedu s-sinerġiji, dawn jaf iħallu wkoll impatt ambjentali sinifikanti, permezz ta' tifrix mgħaġġel ta' sistemi tat-trasport intelliġenti u tal-ismartgrid, u għaldaqstant itejbu l-effiċjenza enerġetika.

Fejn jidħlu l-impatti tal-Għażla 4, l-obbligu ta' aċċess għal infrastrutturi passivi bejn l-impriżi tas-settur pubbliku bi prezzijiet orjentati lejn l-ispiża, iżid kemm jista' jkun il-kondiviżjoni, iżda joħloq ukoll riskju sinifikanti li jiddiżinċentiva l-investiment f'infrastrutturi fiżiċi. Barra minn hekk, uħud mill-miżuri jidhru diffiċli wisq biex jiġu implimentati u jaf jirduppjaw l-ispejjeż u l-isforzi amministrattivi. Minħabba f'hekk l-impatti ekonomiċi huma stmati li se jkunu inqas minn dawk tal-għażla ta' politika preċedenti. Min-naħa l-oħra, lis-Suq Uniku din l-għażla tippreżentalu benefiċċji ċari.

Bl-Għażla 4 huwa mistenni wkoll impatti soċjali u ambjentali pożittivi.

6.           Tqabbil tal-Għażliet

L-għażliet tqabblu filwaqt li tqiesu l-effikaċja tagħhom, l-effiċjenza tagħhom (inklużi l-ispejjeż u l-benefiċċji deskritti hawn fuq), u l-koerenza tagħhom (bilanċ bejn l-effetti ekonomiċi, soċjali u ambjentali, koerenza ma' għanijiet ta' politika ġenerali tal-UE).

Għaldaqstant, minħabba dan in-nuqqas ta' effikaċja, l-Għażla 1 ma tilħaqx l-għanijiet mixtieqa u għalhekk ma tidhirx proporzjonata.

L-Għażla 2, li tippromwovi applikazzjoni aktar intensiva, koerenti u armonizzata tad-dispożizzjonijiet u l-għodod eżistenti tal-qafas regolatorju attwali għall-komunikazzjoni, ikollha xi effetti pożittivi meta mqabbla max-xenarju bażi, iżda xorta ma ttejjibx l-effiċjenza daqs kemm mistenni, b'mod partikolari peress li ma tisfruttax il-potenzjal li jonqsu l-ispejjeż marbut mal-koperazzjoni intersettorjali u l-koordinazzjoni tal-proċeduri għall-għoti tal-permessi.

B'kuntrast, l-Għażla 3 tassew tisfrutta l-potenzjal li jonqsu l-ispejjeż billi twessa' l-ambitu tal-miżuri vinkolanti fost is-setturi u matul l-istadji tat-tifrix tal-broadband. Fl-istess waqt, l-Għażla 3 tħares in-negozjati kummerċjali, inċentiv minnu nnifsu, u tirrispetta l-awtonomija organizzattiva tal-Istati Membri. L-ispejjeż tal-implimentazzjoni jiddependu ferm fuq l-istrutturi u s-sistemi fis-seħħ fl-Istati Membri, u għalhekk jista' jkun hemm iffrankar. Aktar importanti minn hekk, dawn l-ispejjeż jidher li se jiġu kkumpensati mill-benefiċċji sinifikanti li huma mistennija b'tifrix aktar effiċjenti tal-broadband min-naħa tal-operaturi, u b'kopertura tal-broadband aħjar għas-soċjetà kollha. B'mod ġenerali, l-Għażla 3 tiżgura effikaċja fid-dawl tal-għanijiet identifikati bi proporzjon tajjeb ħafna tal-ispejjeż u l-benefiċċji, u koerenza mal-għanijiet ta' politika ġenerali tal-UE (bħal-Linji Gwida għal Għajnuna mill-Istat għall-Broadband, u d-Direttiva INSPIRE).

Jidher li l-Għażla 4 żżid kemm jista' jkun il-benefiċċji għall-impriżi li jixtiequ jużaw in-netwerks broadband. Madanakollu, dan jinvolvi għadd ta' obbligi u limitazzjonijiet li jaf ma jkunux meħtieġa jew jaf ikunu sproporzjonati mal-kisba tal-għanijiet mixtieqa. L-Għażla 4 żżid ukoll il-kumplessità istituzzjonali b'mod sinifikanti, inklużi t-trasferimenti tal-kompetenzi. Barra minn hekk, l-għażliet kummerċjali jaf jintlaqtu ħażin ħafna, bir-riskju ta' diżinċentivi assoċjati għall-investiment, li jwassal għal inqas benefiċċji soċjali u ambjentali, u għalhekk jixxekklu l-għanijiet ġenerali tal-UE u l-koerenza ġenerali ta' din l-għażla.

Fid-dawl ta' dan ta' hawn fuq, jidher li l-Għażla 3 hija l-aħjar għażla disponibbli, kemm minħabba l-effikaċja tagħha biex jintlaħqu l-għanijiet identifikati, l-effiċjenza tagħha u l-koerenza tagħha biex jiġi sfruttat il-potenzjal li jonqsu l-ispejjeż fl-għanijiet ta' politika ġenerali tal-UE.

7.           Monitoraġġ u Evalwazzjoni

Serje ta' indikaturi li jikkorrispondu mal-għanijiet ġenerali u speċifiċi ta' din l-inizjattiva Se jiġi ssorveljat fil-qafas tal-eżerċizzju tal-Valutazzjoni tal-Aġenda Diġitali. B'mod partikolari, l-għan ġenerali (li jistimula t-tifrix tal-broadband) u l-għan speċifiku (li tiżdied l-effiċjenza u jonqsu l-ispejjeż tat-tifrix tal-broadband) se jiġu ssorveljati billi jiġu analizzati l-investimenti annwali fin-netwerks.

Kull erba' snin hemm maħsub li jsir eżerċizzju ta' evalwazzjoni dwar l-impatt tal-istrument, li jkun imsejjes fuq l-informazzjoni miksuba mill-monitoraġġ u l-istudji profondi bil-ħsieb li, jekk ikun hemm bżonn, jiġu proposti l-aġġustamenti meħtieġa.