This document is an excerpt from the EUR-Lex website
Document 52013DC0141
COMMUNICATION FROM THE COMMISSION TO THE EUROPEAN PARLIAMENT AND THE COUNCIL Enhancing Maternal and Child Nutrition in External Assistance: an EU Policy Framework
KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL Intejbu n-Nutrizzjoni Materna u dik tat-Tfal fl-Assistenza Esterna Qafas Politiku tal-UE
KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL Intejbu n-Nutrizzjoni Materna u dik tat-Tfal fl-Assistenza Esterna Qafas Politiku tal-UE
/* COM/2013/0141 final */
KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL Intejbu n-Nutrizzjoni Materna u dik tat-Tfal fl-Assistenza Esterna Qafas Politiku tal-UE /* COM/2013/0141 final */
KOMUNIKAZZJONI TAL-KUMMISSJONI
LILL-PARLAMENT EWROPEW U LILL-KUNSILL Intejbu n-Nutrizzjoni Materna u dik tat-Tfal
fl-Assistenza Esterna Qafas Politiku tal-UE Nuqqas ta’ nutrizzjoni - traġedja li tista’
tiġi evitata L-effetti ta’ nutrizzjoni ħażina
jirrappreżentaw waħda mill-aktar traġedji serji u li tista'
tiġi evitata ta' żmienna. Sfortunatament, il-progress biex
jintlaħaq l-Għan ta' Żvilupp tal-Millennju sabiex jitnaqqas
bin-nofs il-proporzjon tan-nies li jbatu l-ġuħ qiegħed lura
f’ħafna pajjiżi, b’tifel/tifla minn kull sitta għadhom taħt
il-piż. Dawn it-tfal huma vittmi ta' ċirku vizzjuż, fejn
il-faqar, id-dieta mhux xierqa u l-mard ikkumbinati kollha f'daqqa
jagħtuhom l-agħar bidu għall-ħajja, bl-individwi u
s-soċjetajiet jinqabdu fil-faqar. L-UE hija attur ewlieni f’termini tas-sigurtà
tal-ikel u n-nutrizzjoni - deċiżjonijiet finanzjarji għal
żvilupp rurali, ippjanar territorjali, agrikoltura sostenibbli u sigurtà
tal-ikel u n-nutrizzjoni jammontaw għal medja ta’ aktar minn
EUR 1 biljun kull sena għall-perjodu ta’ bejn l-2006 u l-2011.
Inizjattivi partikolari, li kollha kemm huma kkontribwixxew għal sigurtà
msaħħa tal-ikel u n-nutrizzjoni, inkludew il-Faċilità Alimentari
ta’ EUR 1 biljun, li għenet lil dawk il-pajjiżi li huma
l-aktar affettwati mill-kriżi tal-prezzijiet tal-ikel tal-2007/2008 u
l-Iniżjattiva MDG (Għan ta' Żvilupp tal-Millennju) ta’
EUR 1 biljun, li tappoġġja lil dawk il-pajjiżi li
għadhom lura biex jilħqu l-miri inkluż b’mod partikolari
l-MDG 1c dwar it-tnaqqis bin-nofs tal-proporzjon tan-nies li jbatu
l-ġuħ, kif ukoll l-MDG 3 u 4. Barra minn hekk, l-UE tindirizza
nuqqas akut ta' sigurtà tal-ikel u n-nutrizzjoni permezz ta’ assistenza
umanitarja u għall-iżvilupp. Kull sena, bejn terz u nofs
tal-baġit annwali umanitarju tal-UE jintefaq sabiex ikopri
l-ħtiġijiet tal-ikel u tan-nutrizzjoni. Riċentement, fil-qafas tal-London Global
Hunger Event tal-2012, il-Kummissjoni ħadet impenn politiku biex
tappoġġja lil pajjiżi msieħba fit-tnaqqis tal-għadd
ta’ tfal taħt il-ħames snin li kellhom nuqqas ta’ żvilupp b’minn
tal-inqas 7 miljuni sal-2025. Din il-Komunikazzjoni hija t-tweġiba
tal-Kummissjoni biex tikseb din il-mira u b'mod aktar wiesa’ biex tnaqqas
in-nuqqas ta' nutrizzjoni materna u tat-tfal b'mod globali. Sabiex tiġi indirizzata din il-problema,
huwa meħtieġ approċċ multisettorjali, li jgħaqqad
flimkien l-agrikoltura sostenibbli, l-iżvilupp rurali, is-sigurtà
alimentari u tan-nutrizzjoni, is-saħħa pubblika, l-ilma u s-sanità,
il-protezzjoni soċjali u l-edukazzjoni. Dan jeħtieġ
ir-rikonoxximent tal-problema minn pajjiżi msieħba u impenn biex din
tiġi ttrattata, sabiex in-nisa u t-trabi jkunu jistgħu jirċievu
l-kura u n-nutrizzjoni meħtieġa għal bidu ta’ ħajja
deċenti. Il-komunità internazzjonali hija determinata li tagħmel dak
kollu li tista’ biex tappoġġja lil pajjiżi msieħba
fl-isforzi tagħhom biex isaħħu n-nutrizzjoni materna u dik
tat-tfal. Il-qafas politiku tal-UE
għall-iżvilupp huwa stabbilit fil-proposta tal-Kummissjoni għal Aġenda
għall-Bidla[1]
u l-Konklużjonijiet tal-Kunsill sussegwenti ta’ Mejju 2012[2]. L-approċċ tal-UE
lejn sigurtà alimentari u assistenza umanitarja tal-ikel f’pajjiżi terzi
ġie aktar irfinut fil-Komunikazzjonijiet dwar is-Sigurtà Alimentari
tal-UE u l-Politiki dwar l-Assistenza Umanitarja tal-Ikel[3] u sussegwentement il-Konklużjonijiet
tal-Kunsill ta’ Mejju 2010[4].
Dawn id-dokumenti jagħmlu l-istess enfasi dwar kull wieħed mill-erba'
pilastri dwar is-sigurtà alimentari - id-disponibbiltà tal-ikel,
l-aċċess għall-ikel, nutrizzjoni mtejba, u prevenzjoni u
mmaniġġjar aħjar tal-kriżijiet u jenfasizzaw l-isfidi
partikolari sabiex jinkisbu riżultati marbutin man-nutrizzjoni f’kuntesti
umanitarji. Din il-Komunikazzjoni tikkompleta u tiżviluppa l-pilastru
mtejjeb tan-nutrizzjoni. Dan il-qafas politiku kien ikkumplementat
mill-Komunikazzjoni dwar l-Approċċ tal-UE
għar-Reżiljenza: Nitgħallmu mill-Kriżijiet tas-Sigurtà
tal-Ikel[5],
li tenfasizza kif in-nutrizzjoni u r-reżiljenza huma interkonnessi
ħafna f'ċerti kuntesti (b’mod partikolari fir-reġjuni ta’ Sahel
u l-Qarn tal-Afrika fejn ir-reżiljenza hija l-prinċipju ta’ gwida
tal-inizjattivi AGIR[6]
u SHARE[7]
b’bosta msieħba biex jindirizzaw il-kriżijiet tal-ikel u
n-nutrizzjoni). Finalment, il-Pjan ta' Azzjoni tal-UE dwar
l-Ugwaljanza bejn is-Sessi u t-Tisħiħ tal-Pożizzjoni tan-Nisa
fl-Iżvilupp 2012-2015[8]
jenfasizza r-rabtiet b’saħħithom bejn l-MDG 1, 3 u 4 u r-rwol
tan-nisa u l-ugwaljanza bejn is-sessi. Dan id-dokument ta’ politika dwar
in-nutrizzjoni jenfasizza l-bżonn għal koordinazzjoni aħjar bejn
l-għajnuna umanitarja u għall-iżvilupp sabiex tiżdied
ir-reżiljenza tal-popolazzjonijiet affettwati. Dan ġie mitlub
mill-Kunsill u l-Qorti tal-Awdituri u jistabbilixxi r-responsabbiltà primarja
tal-gvernijiet nazzjonali għan-nutrizzjoni, kif ukoll ir-rwol importanti
tan-nisa u l-irġiel fil-pajjiżi li qed jiżviluppaw, bħala
muturi tal-bidla. 1. Raġunijiet L-iskala tal-problema L-Organizzazzjoni Dinjija tas-Saħħa
tqis li n-nuqqas ta’ nutrizzjoni huwa l-aktar theddida importanti
għas-saħħa dinjija. F’ħafna pajjiżi li qed
jiżviluppaw din hija kawża prinċipali ta’ mill-inqas terz
tal-imwiet tat-tfal kollha u 20 % tal-mortalità materna kull sena[9]. Miljuni ta’ tfal jgħixu,
iżda ma jiżviluppawx kemm suppost (b’tul baxx għall-età
tagħhom u żvilupp mentali batut) u/jew ikunu esperjenzaw bosta
episodji ta' wasting (telf ta' piż) qabel ma jilħqu l-età ta'
ħames snin. Globalment, madwar 165 miljun, jew kwart tat-tfal
tad-dinja, isofru minn nuqqas ta’ żvilupp[10]
u 2,6 miljun tifel u tifla taħt l-età ta’ ħames snin imutu kull
sena b’riżultat ta’ nuqqas ta’ nutrizzjoni[11]. Aktar minn 90 % ta’ dawn
it-tfal jgħixu fl-Afrika u fl-Asja. Barra minn hekk, madwar 52 miljun
(8 %) tat-tfal tad-dinja ta’ taħt il-ħames snin huma
magħluba, bl-akbar għadd jinsab ukoll fl-Asja u fl-Afrika[12]. Se tingħata attenzjoni partikolari
lill-popolazzjonijiet li jbatu minn nuqqas ta’ nutrizzjoni fejn
il-kapaċità istituzzjonali hija dgħajfa u diżastri frekwenti jew
kunflitti għandhom effett devastanti fuq l-aktar gruppi vulnerabbli
bħalma huwa l-każ f'pajjiżi fraġli. In-nuqqas ta’
nutrizzjoni jaqbad lill-individwi u lis-soċjetà fiċ-ċirku
vizzjuż tal-faqar. It-tfal li jikbru f’unitajiet domestiċi foqra
għandhom aktar tendenza li jbatu minn nuqqas ta' nutrizzjoni, li
jdgħajjef l-abbiltà tagħhom biex jitgħallmu u jagħmilhom
aktar suxxettibbli għall-mard. Dan ifixkel il-kapaċità ta' tifel jew
tifla sabiex jassigura impjieg meta jkun adult u biex ikollu ħajja
produttiva u għaldaqstant jintiret il-faqar minn ġenerazzjoni
għall-oħra. In-nuqqas ta’ nutrizzjoni huwa sever b’mod partikolari
fost il-popolazzjonijiet rurali li huma foqra u dawk li jbatu
d-diskriminazzjoni. Il-proporzjon ta’ tfal li kellhom nuqqas ta’ żvilupp
huwa 1,5 darba aktar f’żoni rurali minn f’dawk urbani[13]. Filwaqt li tirrikonoxxi dan,
l-UE hija impenjata li tappoġġja agrikoltura fuq skala żgħira
u għajxien rurali. Ħafna nisa fil-pajjiżi li qed
jiżviluppaw huma wkoll qosra fl-istatura tagħhom (nuqqas ta’
żvilupp) u/jew taħt il-piż. Min-nisa tal-Afrika
sub-Saħarjana, 10 sa 20 % minnhom, u 25 sa 35 % tan-nisa
tan-Nofsinhar tal-Asja huma klassifikati bħala eċċessivament
irqaq. L-anemija kkawżata minn nuqqas ta’ ħadid hija l-aktar problema
nutrizzjonali mifruxa għal dan il-grupp u taffettwa kważi nofs
in-nisa kollha[14].
Il-perjodu mit-tqala sat-tieni sena tat-tifel jew tifla - l-ewwel
1,000 jum - huwa meqjus bħala l-aktar wieħed kritiku
għall-prevenzjoni tan-nuqqas ta’ nutrizzjoni u l-konsegwenzi tiegħu
fil-ħajja adulta. Daqs nofs min-nuqqas ta’ żvilupp fit-tfal
kollha jseħħ fl-utru, li jenfasizza l-importanza kritika ta’
nutrizzjoni aħjar għan-nisa u l-bniet fl-età riproduttiva. Ir-riskju
li wieħed ikollu tarbija żgħira huwa kbir għall-ommijiet li
huma taħt il-piż, għandhom nuqqas ta’ żvilupp u/jew huma
anemiċi. Il-progress globali dwar l-indirizzar
tan-nuqqas ta’ żvilupp u l-wasting kien bil-mod. Il-proporzjon ta’ tfal li
għandhom nuqqas ta’ żvilupp niżel minn 40 % fl-1990
għal 26 % fl-2011[15].
Il-progress fl-indirizzar tal-wasting kien saħansitra aktar bil-mod u juri
li għad hemm ħafna aktar xi jsir. Minbarra n-nuqqas ta’ żvilupp
u l-wasting, nuqqasijiet ta’ mikronutrimenti, essenzjali biex jikbru u
jiżviluppaw l-individwi (eż. il-vitamina A, il-jodju,
il-ħadid u ż-żingu) jaffettwaw kważi żewġ biljun
persuna madwar id-dinja[16].
Il-kawżi Il-kawżi ta’ nuqqas ta’ nutrizzjoni
jvarjaw minn kuntest għall-ieħor, u minn individwu
għall-ieħor u sommarju tagħhom jinsab fil-kaxxa ta’ hawn
taħt. Dawn għandhom tendenza li joperaw fi tliet livelli (ara
d-dijagramma ta’ hawn taħt): ·
Kawżi immedjati għandhom żewġ
dimensjonijiet: teħid ta’ ikel inadegwat (f’termini ta’ kwalità jew
kwantità) u mard. ·
Kawżi prinċipali huma marbuta mill-qrib
mal-faqar u jinkludu tliet kategoriji: nuqqas ta’ sigurtà alimentari domestika,
kura inadegwata għat-tfal/in-nisa u ambjent tas-saħħa/servizzi
tas-saħħa foqra. ·
Kawżi bażiċi joperaw fil-livelli
sottonazzjonali, nazzjonali u internazzjonali: minn governanza fqira għal
tkabbir demografiku; mill-kunflitt għat-tibdil fil-klima; minn
riżorsi nazzjonali skarsi għal prezzijiet tal-ikel għoljin u
volatili. L-importanza relattiva ta’ kawżi potenzjali
tiddependi fuq id-dinamiċi speċifiċi ta’ kull sitwazzjoni u
grupp tal-popolazzjoni. Għal dan il-għan, analiżi bir-reqqa hija
prerekwiżit kritiku għal kull sforz ta’ rispons. Id-determinanti
differenti ta’ nuqqas ta’ nutrizzjoni huma interkonnessi u jeħtieġu
rispons multisettorjali. Konsegwenzi Fuq livell individwali, in-nuqqas ta’
nutrizzjoni huwa l-kawża prinċipali ta’ mortalità konsiderevoli fost
it-tfal u l-ommijiet. Dan jikkontribwixxi għal 35 % tal-mard li jbatu
minnu t-tfal taħt il-ħames snin[17],
u nuqqas ta’ nutrizzjoni fit-tul (nuqqas ta’ żvilupp u/jew episodji
frekwenti ta’ wasting u nuqqasijiet ta’ mikronutrimenti) u jikkawża
ħsara devastanti u irreversibbli. In-nuqqas ta’ jodju u n-nuqqas ta’
żvilupp huma marbuta ma’ tnaqqis sinifikanti fl-iżvilupp konoxxittiv[18]. In-nuqqas ta’ żvilupp mhuwiex biss
traġedja personali u li tista’ tiġi evitata; dan jaħdem kontra
l-progress ekonomiku - kemm għal familji individwali kif ukoll
għan-nazzjonijiet. L-ispejjeż ekonomiċi tan-nuqqas ta’
nutrizzjoni kienu stmati għal madwar 10 % tad-dħul tul
il-ħajja ta’ individwu[19]
u minn 2 % sa 8 % tal-Prodott Domestiku Gross (PDG). In-nuqqas ta’
nutrizzjoni jagħmel pressjoni wkoll fuq sistemi tas-saħħa
prekarji, minħabba li individwi b'nuqqas ta' nutrizzjoni għandhom
tendenza li jkunu aktar ma jifilħux, u n-nuqqas ta' nutrizzjoni
fit-tfulija huwa marbut ma' mard kroniku u li jiswa ħafna flus, aktar ’il
quddiem fil-ħajja. Sfidi biex jiġi indirizzat in-nuqqas
ta’ nutrizzjoni l-indirizzar tan-nuqqas ta’ nutrizzjoni, jeħtieġ
jingħelbu bosta sfidi. Dawn l-isfidi jindikaw ħtieġa għal: ·
Investiment akbar fuq livell ta’ pajjiż
fin-nutrizzjoni (b’mod partikolari fuq terminu twil). Dan jinvolvi wkoll
tisħiħ fit-tmexxija nazzjonali, l-oqfsa legali u l-maniġment u
l-kapaċitajiet strateġiċi għan-nutrizzjoni sabiex
jimmobilizza l-atturi li għandhom għan komuni u approċċ
multisettorjali koerenti. ·
Allinjament ta’ politiki li għandhom impatt
fuq in-nutrizzjoni mifrux f’dipartimenti differenti tal-ministeri tal-Gvern u
dipartimenti tad-donaturi. Dan jinkludi l-integrazzjoni tan-nutrizzjoni
bħala l-objettiv ewlieni tal-politiki dwar l-iżvilupp rurali u
inizjattivi bbażati fuq il-komunità, agrikoltura sostenibbli, is-sajd,
is-sigurtà alimentari, is-saħħa pubblika u dik riproduttiva, l-ilma u
s-sanità, il-protezzjoni soċjali u l-edukazzjoni. ·
Il-promozzjoni ta’ ugwaljanza bejn is-sessi u
l-għoti tas-setgħa lin-nisa fis-setturi kollha marbuta
man-nutrizzjoni[20]
abbażi tal-identifikazzjoni tad-determinanti soċjali tan-nuqqas ta’
nutrizzjoni. Ir-rwoli ekonomiċi, soċjali, riproduttivi u
domestiċi tan-nisa huma kollha essenzjali għas-sigurtà alimentari u
tan-nutrizzjoni. ·
Minħabba li n-nuqqas ta’ nutrizzjoni huwa
problema interġenerazzjonali u huwa r-riżultat tal-kriżi u
daqstant ieħor tax-xejriet fuq terminu twil, huma vitali l-bini ta’ aktar
koerenza u l-koordinazzjoni għan-nutrizzjoni fl-ispettru kollu
tal-emerġenza – l-żvilupp. ·
Huwa meħtieġ fehim aħjar ta’ “x’inhu
tajjeb” għan-nutrizzjoni permezz ta’ riċerka applikata u
monitoraġġ u evalwazzjoni bir-reqqa għall-identifikazzjoni ta'
politiki u azzjonijiet effettivi għan-nutrizzjoni f’setturi differenti u
għaż-żieda tal-intervenzjonijiet. Hija essenzjali aktar
effettività tan-nutrizzjoni u intervenzjonijiet sensittivi għan-nutrizzjoni
skont il-prinċipji ġenerali tal-effettività tal-għajnuna. ·
L-UE tqis li l-appoġġ lil agrikoltura ta'
skala żgħira għandu l-kapaċità li jżid
l-aċċess kemm tal-foqra f'żoni rurali kif ukoll ta' dawk
f'żoni urbani għal ikel nutrittiv u għal impatt pożittiv
fuq l-għajxien. Dan jinkludi l-identifikazzjoni u l-isfruttar ta’
opportunitajiet biex titjieb in-nutrizzjoni tul il-ktajjen ta’ valur biex
tiżdied id-disponibbiltà, l-aċċess u t-teħid ta’ ikel mimli
nutrijenti għall-foqra. ·
Il-bini fuq impenni politiki u ta’ finanzjament
globali biex jiġi indirizzat in-nuqqas ta’ sigurtà tal-ikel u n-nuqqas ta’
nutriment, b’mod partikolari fid-dawl tal-qafas MDG għal wara l-2015 huwa
meħtieġ. 2. Prinċipji ta’ Gwida u objettivi Prinċipji ta' gwida L-appoġġ tal-UE huwa kemm jista’
jkun allinjat ma’ politiki u prijoritajiet tal-imsieħba, skont
il-prinċipji tal-effettività tal-għajnuna. L-indirizzar tan-nuqqas
ta’ nutrizzjoni jeħtieġ rikonoxximent minn pajjiżi msieħba
tal-problema u impenn biex din tiġi indirizzata. Il-komunità internazzjoni
se tagħmel dak kollu li tista’ biex tappoġġja lill-pajjiżi
msieħba fl-isforzi tagħhom biex isaħħu n-nutrizzjoni
materna u dik tat-tfal, iżda jeħtieġ li jitwarrbu wkoll
ir-riżorsi mill-gvernijiet infushom sabiex jiġi żgurat li
n-nuqqas ta’ nutrizzjoni jiġi indirizzat b’mod sostenibbli. L-UE għandha l-għan li tiżgura
kumplementarità massima u sekwenza bejn intervenzjonijiet umanitarji u dawk
tal-iżvilupp. L-impenn tal-UE biex tiżdied ir-reżiljenza
jippreżenta opportunitajiet ġodda għan-nutrizzjoni: atturi umanitarji
u dawk għall-iżvilupp se jaħdmu flimkien biex jiżviluppaw
fehim komuni tas-sitwazzjoni tan-nutrizzjoni (permezz ta’ analiżi komuni u
valutazzjonijiet operazzjonali) li se jintużaw bħala bażi biex
jiġu definiti prijoritajiet strateġiċi komuni għall-ipporgrammar
ta’ fondi umanitarji u għall-iżvilupp. L-assistenza tal-UE
għan-nuqqas ta’ nutrizzjoni fi kriżijiet umanitarji tkompli tkun
iggwidata mill-prinċipji umanitarji tal-umanità, in-newtralità,
l-imparzjalità u l-indipendenza u jsegwu approċċ ibbażat
għalkollox fuq il-ħtiġijiet. L-UE għandha twieġeb permezz ta’
setturi multipli biex tindirizza l-bosta determinanti tan-nuqqas ta’
nutrizzjoni. Dan l-approċċ jirrikonoxxi li intervenzjonijiet
speċifiċi għan-nutrizzjoni biss ma jkunux biżżejjed
għal tnaqqis sostenibbli tan-nuqqas ta' nutrizzjoni. B’mod partikolari,
azzjonijiet li jindirizzaw l-iżvilupp rurali[21], l-agrikoltura sostenibbli,
is-sigurtà alimentari u tan-nutrizzjoni, is-saħħa pubblika, l-ilma u
s-sanità, il-protezzjoni soċjali u l-edukazzjoni se jkunu rilevanti
ħafna. Intervenzjonijiet fl-iżvilupp
tan-nutrizzjoni se jagħtu prijorità sabiex jinħolqu l-kundizzjonijiet
it-tajba għall-aħjar tkabbir matul “iż-żmien kruċjali
ta’ opportunità" tal-ewwel "1 000 jum” bejn
il-konċepiment u l-ewwel sentejn. L-UE għandha taħdem biex
tippreveni u timminimizza kwalunkwe effett negattiv li l-assistenza tagħha
jista’ jkollha mingħajr intenzjoni fuq in-nutrizzjoni. Pereżempju,
dan huwa importanti b'rabta mas-sikurezza ta’ innovazzjonijiet u l-użu ta’
prodotti speċjalizzati tan-nutrizzjoni. Miżuri ta’ kontroll huma
essenzjali wkoll biex inaqqsu r-riskji bħal żieda fil-mard
trażmess mill-ikel jew mill-ilma, jew fix-xogħol tal-mara
għad-detriment tal-kura tat-tfal. Barra minn hekk, l-UE se tiżgura
koerenza u konsistenza bejn il-politiki tagħha li għandhom impatt fuq
is-sigurtà alimentari u tan-nutrizzjoni bħall-kummerċ, it-tibdil
fil-klima, is-saħħa, l-ambjent u l-impjiegi, eċċ. L-UE se ssaħħaħ
il-kollaborazzjoni tagħha mal-atturi istituzzjonali: il-pajjiżi
msieħba, l-Istati Membri tal-UE u donaturi bilaterali oħra,
organizzazzjonijiet internazzjonali u netwerks globali (eż. is-SUN;
sistema umanitarja ta’ raggruppament). Barra minn hekk, l-UE għandha
tespandi u ssaħħaħ is-sħubiji tagħha ma’ atturi mhux
istituzzjonali. Fejn huwa possibbli u xieraq, l-UE għandha timmassimizza
s-sostenibbiltà tal-intervenzjonijiet billi tippromwovi l-integrazzjoni
tagħhom fil-oqfsa u l-pjanijiet tal-politika nazzjonali. L-UE għandha ssaħħaħ
mill-ġdid is-sħubiji tagħha mal-gruppi tas-soċjetajiet
ċivili, l-organizzazzjonijiet mingħajr profitt u l-korpi
tar-riċerka, billi ssejjes fuq l-ispeċjalizzazzjoni tagħhom,
tgħin biex toħloq ambjent li jippermetti
l-parteċipazzjoni/il-mobilizzazzjoni taċ-ċittadini u governanza
tajba, u tappoġġja l-implimentazzjoni/it-twassil tal-kapaċità
tagħhom fejn huwa rilevanti. L-UE għandha tfittex aktar
kollaborazzjoni mas-settur privat. Hija tixtieq tiffaċilita l-impenn
tan-negozji fil-ġlieda kontra n-nuqqas ta' nutrizzjoni, biex
tikkapitalizza fuq il-vantaġġi komparattivi tagħhom u tisfrutta
l-ispeċjalizzazzjoni tagħhom (eż. il-kontroll tas-sikurezza
tal-prodott, il-fortifikazzjoni, l-infurzar taċ-ċertifikazzjoni u
t-teknoloġiji ta' komunikazzjoni u sensibilizzazzjoni permezz tal-kummerċjalizzazzjoni
soċjali). Għaldaqstant, l-UE se tippromwovi prattiki responsabbli
tan-negozju, Responsabbiltà Soċjali Korporattiva, ambjent politiku u
regolatorju effettiv kif ukoll tevita l-kunflitt ta’ interess u ta’
vantaġġ inġust. Objettivi Il-politika msemmija f’din il-Komunikazzjoni
għandha l-għan li ssaħħaħ in-nutrizzjoni materna u
tat-tfal billi tnaqqas il-mortalità, il-morbożità, kif ukoll il-kobor u
l-iżvilupp inqas milli suppostminħabba n-nuqqas ta' nutrizzjoni.
B’mod aktar speċifiku din għandha l-għan li tikseb objettivi speċifiċi
fuq żewġ livelli: ·
Tnaqqas l-għadd ta’ tfal taħt
il-ħames snin li għandhom nuqqas ta’ żvilupp. ·
Tnaqqas l-għadd ta’ tfal taħt
il-ħames snin li huma magħlubin. L-ewwel objettiv huwa allinjat mal-ewwel Mira
Globali tal-Assemblea Dinjija tas-Saħħa (WHA) approvata fl-2012
jiġifieri tnaqqis ta' 40 % sal-2025 tal-għadd globali
tat-tfal taħt il-ħames snin li għandhom nuqqas ta’ żvilupp[22]. Dan jimplika tnaqqis
fl-għadd ta’ tfal għandhom nuqqas ta’ żvilupp b’aktar minn
70 miljun sal-2025. Ix-xejriet attwali se jikkontribwixxu biex jittaffa
n-nuqqas ta’ żvilupp b’madwar 40 miljun tifel u tifla, iżda jkun
ferm taħt il-mira tad-WHA. In-nuqqas ta’ żvilupp globali qed
jonqos b’rata ta’ 1,8 % kull sena bħala medja. Ir-rata
meħtieġa biex tintlaħaq il-mira tad-WHA sal-2025 hija ta’
3,9 % jiġifieri l-isforzi kollettivi jeħtieġ li
jiżdiedu b’mod sinifikanti biex tiġi rduppjata r-rata attwali ta’
tnaqqis. Għaldaqstant, il-Kummissjoni impenjat ruħha biex
tappoġġja lil pajjiżi msieħba biex inaqqsu l-għadd ta’
tfal taħt il-ħames snin li għandhom nuqqas ta’ żvilupp
b'minn tal-inqas 7 miljuni lil hinn mill-perkors attwali. In-nuqqas ta’ żvilupp bħala objettiv
speċifiku jindika d-determinazzjoni tal-UE biex tindirizza dan l-ostaklu
ewlieni għall-iżvilupp uman u dak ekonomiku. Madankollu, dan ma
jipprekludix l-assistenza biex tindirizza forom oħra ta’ nutrizzjoni
ħażina fejn dawn huma ta' sinifikat għas-saħħa
pubblika u prijorità għall-gvernijiet imsieħba. It-tieni objettiv huwa wkoll allinjat mal-Mira
Globali tad-WHA. Il-Kummissjoni se tikkontribwixxi permezz tal-istrateġija
ġenerali tagħha għall-mira globali tad-WHA (2012) biex
tnaqqas u żżomm il-wasting fit-tfal għal inqas minn 5 %[23]. Fi kriżijiet
umanitarji, meta r-rata ta’ mortalità jew il-prevalenza ta’ wasting taqbeż
il-livelli kritiċi[24],
l-UE għandha tintervjeni sabiex tnaqqas ir-rata ta’ mwiet li
jirriżultaw min-nuqqas ta’ nutrizzjoni. 3. Prijoritajiet strateġiċi B’kunsiderazzjoni tal-kuntest, l-isfidi
tagħha u l-prinċipji ta' hawn fuq, il-Kummissjoni identifikat tliet
prijoritajiet strateġiċi għall-ħidma tagħha li
jiffukaw fuq in-nutrizzjoni materna u dik tat-tfal, bħalma huwa enfasizzat
permezz tar-riżultati msemmija hawn fuq. Prijorità strateġika 1:
Jissaħħu l-mobilizzazzjoni u l-impenn politiku għan-nutrizzjoni Fuq livell ta’ pajjiż, il-mobilizzazzjoni
u l-impenn politiku se jitfittxu li jintlaħqu permezz tad-djalogu politiku
u l-promozzjoni. It-tmexxija u s-sjieda nazzjonali huma ċentrali biex
jiġi indirizzat in-nuqqas ta' nutrizzjoni. L-UE, b’kollaborazzjoni
mill-qrib mal-moviment SUN, għandha tħeġġeġ impenji
speċifiċi reċiproċi għat-tnaqqis tan-nuqqas
tan-nutrizzjoni materna u tat-tfal mill-membri tas-SUN, inklużi
l-pajjiżi msieħba. Il-Kummissjoni u xi Stati Membri diġà
jaġixxu bħala donaturi tas-SUN li jippresjedu f’għadd ta’
pajjiżi biex jappoġġjaw l-isforzi nazzjonali, jimmobilizzaw
ir-riżorsi u jiżguraw koerenza akbar fost id-donaturi u
l-appoġġ globali internazzjonali. Fil-livell internazzjonali, l-UE għandha
taħdem għal armonizzazzjoni u koerenza akbar u għal rispons
internazzjonali aktar effettiv. L-UE għandha tinvolvi ruħha
fil-proċessi rilevanti - b’mod partikolari, il-G8/G20, id-WHA, il-Kumitat
dwar is-Sigurtà Alimentari Dinjija, il-Moviment SUN, u l-Kumitat Permanenti
tan-NU dwar in-Nutrizzjoni, il-Kumitat għal Għajnuna Alimentari u
s-sistema umanitarja ta’ raggruppament. Pereżempju, l-UE għandha
tappoġġja koordinazzjoni aħjar għan-nutrizzjoni bejn
is-setturi u ma’ atturi internazzjonali involuti fir-rispons tan-nutrizzjoni
għal kriżijiet umanitarji, notevolment f'dawk l-organizzazzjonijiet
internazzjonali fejn għandha rwol importanti permezz
tal-kontribuzzjonijiet ta' finanzjament tagħha. L-UE għandha
tappoġġja b’mod ugwali lill-Moviment SUN billi
tħeġġeġ aktar pajjiżi b’piż għoli biex
jissieħbu, filwaqt li żżomm impenn politiku u tmexxija ta’
livell għoli, u billi tiffaċilita il-koordinazzjoni ta’ sforzi
internazzjonali. Hija se tikkoordina mal-Istati Membri tal-UE biex
iżżid l-effettività u tassigura aktar mobilizzazzjoni bejn is-setturi
kif ukoll parteċipazzjoni fi sforzi internazzjonali. Hija se taħdem
biex tassigura li n-nutrizzjoni tkun involuta b’mod prominenti fl-objettivi
tal-aġenda tal-iżvilupp ta’ wara l-2015. Il-Kummissjoni tirrikonoxxi
r-rwol kritiku li s-soċjetà ċivili jista’ jkollha biex
tħeġġeġ lill-pajjiżi sabiex jassiguraw impenn
politiku. Sabiex issaħħaħ il-governanza
tan-nutrizzjoni b’mod aktar effettiv fil-livelli nazzjonali u internazzjonali,
l-UE se tibni fuq ir-rwol tagħha fis-SUN u b'mod partikolari fuq
l-influwenza tal-“Grupp ta’ Tmexxija” tagħha. Dan il-Grupp jgħaqqad
lill-Kapijiet tal-Istat, il-Kapijiet tal-Aġenziji għall-Iżvilupp
inkluż il-Kummissarju tal-UE għall-Iżvilupp, il-Kapijiet
tal-Aġenziji tan-NU, rappreżentanti ewlenin mis-Soċjetà Ċivili
u s-settur privat. Prijorità strateġika 2:
Żieda fl-azzjonijiet fuq livell ta’ pajjiż Iż-żieda fl-azzjonijiet fuq livell
ta’ pajjiż jeħtieġu użu aħjar tar-riżorsi
eżistenti u riżorsi finanzjarji addizzjonali sabiex jitjiebu
r-riżultati tan-nutrizzjoni. L-UE għandha żżid
il-kontribuzzjoni finanzjarja tagħha għan-nutrizzjoni u
tinkoraġġixxi l-iżvilupp ta' programmi li għandhom
approċċ favur in-nutrizzjoni. L-UE għandha tippromwovi b’mod
attiv din l-istrateġija ma’ gvernijiet oħra. F'kuntesti ta’ żvilupp, l-assistenza
esterna tal-UE hija allinjata mal-prijoriatjiet u l-politiki stabbiliti
mill-pajjiżi msieħba b’appoġġ għall-implimentazzjoni
tal-pjanijiet nazzjonali. (a)
It-tisħiħ tal-kapaċità umana
u istituzzjonali/tas-sistema L-UE għandha tippromwovi l-iżvilupp
ta' oqfsa ta' politika nazzjonali li jwasslu għan-nutrizzjoni materna u
tat-tfal (jiġifieri l-inklużjoni ta' objettivi tan-nutrizzjoni, miri,
indikaturi u implikazzjonijiet tal-baġit). Dan se jappoġġa: ·
L-iżvilupp ta’ strateġiji tal-gvern u
pjanijiet ta’ azzjoni pprezata[25]
għan-nutrizzjoni. ·
Mekkaniżmi ta' koordinazzjoni multisettorjali
u b’diversi atturi li jinvolvu atturi umanitarji u dawk tal-iżvilupp biex
jiffaċilitaw il-kondiviżjoni tat-tagħrif, id-djalogu, l-ippjanar
konġunt, l-istabbiliment ta' kollaborazzjonijiet u l-kondiviżjoni
tar-rwoli. ·
L-iżvilupp ta’ kapaċitajiet
strateġiċi u maniġerjali fi ħdan il-korpi rilevanti
(eż. id-dipartimenti tal-gvern u l-istrutturi umanitarji ta’
koordinazzjoni). ·
Bini ta’ kapaċità teknika
għan-nutrizzjoni fort l-atturi umanitajri u dawk tal-iżvilupp
fl-iżvilupp rurali, l-agrikoltura sostenibbli, is-sigurtà alimentari u
tan-nutrizzjoni, is-saħħa pubblika, l-ilma u s-sanità, il-protezzjoni
soċjali u s-setturi tal-edukazzjoni. (b)
Żieda fl-intervenzjonijiet imfassla
speċifikament għan-nutrizzjoni fil-kuntesti umanitarji u dawk
tal-iżvilupp L-UE għandha żżid
l-investimenti tagħha fl-intervenzjonijiet b’effettività evidenzjata
għall-implimentazzjoni fil-pajjiżi kollha b'piż għoli ta'
nuqqas ta' nutrizzjoni. Dawn ġeneralment huma miġbura fi tliet
kategoriji: 1) komunikazzjoni dwar il-bidla fl-imġiba (eż.
il-promozzjoni tat-treddigħ u alimentazzjoni kumplimentari xierqa), 2)
provvediment ta' mikronutrijenti u intervenzjonijiet
għat-tneħħija tad-duda (eż. supplimentazzjoni jew
fortifikazzjoni tal-ħadid) u 3) intervenzjonijiet kumplimentari/addizzjonali
u terapewtiċi tal-alimentazzjoni. Din tal-aħħar se tingħata
enfasi partikolari f’oqsma fejn il-wasting huwa tħassib
tas-saħħa pubblika (inkluż fi kriżijiet umanitarji).
Il-kategoriji u l-listi ta’ intervenzjonijiet speċifiċi
għan-nutrizzjoni b’biżżejjed evidenza biex jiġu
implimentati fuq skala kbira fil-pajjiżi b’rata għolja ta’ nuqqas ta’
nutrizzjoni se jiġu aġġornati meta tkun disponibbli evidenza
ġdida. Barra minn hekk, l-UE għandha tappoġġja
intervenzjonijiet b’effettività evidenzjata f’kuntesti speċifiċi.
Dawn se jinkludu firxa ta’ azzjonijiet imfassla għal kuntest
speċifiku bħad-diversifikazzjoni ta’ dieti permezz ta’ aktar
aċċess għal ikel nutrittiv fil-livell tal-unitajiet
domestiċi jew trasferimenti tal-flus biex titjieb in-nutrizzjoni tat-tfal
u dik materna. Il-prevenzjoni u l-indirizzar tan-nuqqas ta’
nutrizzjoni fin-nisa fl-età riproduttiva se jkunu essenzjali biex inaqqsu
n-nuqqas ta’ nutrizzjoni materna u dik tat-tfal. (c)
Żieda fl-azzjonijiet li huma sensittivi
għan-nutrizzjoni fil-kuntesti umanitarji u għall-iżvilupp ·
Dawn l-azzjonijiet għandhom tendenza li
jindirizzaw ir-raġunijiet prinċipali u bażiċi ta' nuqqas
ta' nutrizzjoni (eż. programm tal-ilma/tas-sanità li jtejjeb l-iġene
u jnaqqas ix-xogħol tan-nisa, jiffaċilita l-aċċess
għall-ilma, intervenzjoni tas-sigurtà alimentari u tan-nutrizzjoni li
timmira b’mod speċifiku lejn teħid ta' ikel diversifikat,
il-promozzjoni ta’ aċċess liberu għall-kura tas-saħħa
għall-individwi b’riskju għoli ta’ wasting matul kriżi
umanitarja). Dawn jeħtieġu li t-tħassib dwar in-nutrizzjoni jkun
inkorporat f'bosta approċċi tas-setturi, sabiex jiggwida
l-implimentazzjoni lejn riżultati aħjar tan-nutrizzjoni. Dan jista’
jinkiseb permezz ta’: ·
kunsiderazzjoni sistematika tan-nutrizzjoni
fl-analiżi tas-sitwazzjoni u meta jkun hemm teħid ta’
deċiżjoni dwar strateġiji tas-settur, azzjonijiet u kriterji
mmirati. Ħafna setturi, sew jekk inċidentalment jew intenzjonalment,
jistgħu jikkontribwixxu għan-nutrizzjoni. Fost dawk l-aktar li
għandhom tendenza li jkunu l-aktar effettivi hemm: is-sigurtà alimentari
(inkluż agrikoltura fuq skala żgħira, azzjonijiet li jimmiraw
għat-titjib ta’ għajxien rurali u trasferimenti soċjali),
is-saħħa, il-protezzjoni soċjali, l-ilma/is-sanità u
l-edukazzjoni; ·
inklużi indikaturi rilevanti
għan-nutrizzjoni fil-qafas tal-monitoraġġ; ·
l-inkorporazzjoni ta’ miżuri li
jsaħħu l-poter ekonomiku tal-unitajiet domestiċi u n-nisa,
filwaqt li jissalvagwardjaw l-ħila tagħhom biex jieħdu
ħsieb it-tfal żgħar. Prijorità strateġika 3:
Għarfien għan-nutrizzjoni (tisħiħ
tal-ispeċjalizzazzjoni u tal-bażi tal-għarfien Hemm żewġ dimensjonijiet għal
din il-prijorità strateġika: tisħiħ tal-bażi
tat-tagħrif għat-teħid tad-deċiżjonijiet u l-offerta
ta’ speċjalizzazzjoni/assistenza teknika. (a)
Tagħrif għat-teħid
tad-deċiżjonijiet L-UE tirrikonoxxi r-rwol kruċjali ta’
tagħrif rilevanti u affidabbli biex iwassal għal
deċiżjonijiet għaqlin. Għaldaqstant, din se tinvesti
fir-riċerka applikata u tappoġġja sistemi tat-tagħrif. ·
Riċerka applikata L-UE għandha tinvesti fir-riċerka
biex tkabbar l-bażi ta’ evidenza dwar l-effiċjenza u l-effettività
ta’ bosta azzjonijiet skont il-kuntesti. Fl-aħħar nett, dan
għandu jinforma lill-iżvilupp tal-politika u t-tfassil
tal-intervenzjonijiet u jwessa’ l-għażliet għar-rispons f’bosta
setturi ewlenin (eż. is-saħħa, l-ilma/is-sanità, l-argrikoltura
sostenibbli, is-sigurtà alimentari u n-nutrizzjoni). Minkejja r-raġunar teoretiku qawwi
għal kisbiet nutrittivi permezz ta’ intervenzjonijiet għas-sigurtà
alimentari, il-bażi tal-evidenza empirika għal dan tibqa’
dgħajfa u jeħtieġ tissaħħaħ b’mod urġenti.
Bħala waħda mill-akbar donaturi dinjija fis-sigurtà alimentari u
tan-nutrizzjoni u l-assistenza umanitarja tal-ikel, l-UE għandha vantaġġ
komparattiv distint u sinifikanti, kif ukoll responsabbiltà, biex timla dan
in-nuqqas ta’ evidenza. Hija se tappoġġja r-riċerka
operazzjonali li se tikkontribwixxi għall-bażi tal-evidenza, filwaqt
li tqabbel il-prestazzjoni ta’ firxa ta’ strateġiji għas-sigurtà
alimentari u n-nutrizzjoni u l-assistenza alimentari. Għal dawk l-azzjonijiet b’effiċjenza
evidenzjata (jew speċifika b’mod globali jew skont il-kuntest), l-UE
għandha tappoġġja r-riċerka biex tidentifika
mekkaniżmi tat-twassil vijabbli biex tagħmel tranżizzjoni minn
intervenzjonijiet fuq skala żgħira għal azzjoni mifruxa
man-nazzjon. ·
Sistemi ta' tagħrif L-UE għandha tappoġġja sistemi
ta’ tagħrif, b’mod partikolari f’pajjiżi li huma suxxettibbli
għall-kriżijiet, sabiex: –
issaħħaħ il-kwalità u r-rilevanza
tal-bażi ta’ tagħrif għat-teħid tad-deċiżjonijiet –
tiffaċilita t-tixrid u l-użu
tat-tagħrif għat-teħid tad-deċiżjonijiet –
tikseb aktar istituzzjonalizzazzjoni u
sostenibbiltà ta’ dawn is-sistemi –
ittejjeb il-koordinazzjoni ta’ inizjattivi u
sistemi differenti li jipprovdu dejta dwar in-nutrizzjoni u/jew tagħrif
rilevanti għan-nutrizzjoni (b)
Speċjalizzazzjoni teknika u assistenza
għall-bini tal-kapaċità Minbarra r-riżorsi finanzjarji,
il-Kummissjoni se tipprovdi wkoll speċjalizzazzjoni teknika u assistenza
għall-implimentazzjoni ta’ din il-Komunikazzjoni, fi ħdan il-kuntest
ta’ Pjanijiet ta’ Azzjoni u Strateġiji għan-Nutrizzjoni
speċifiċi għall-pajjiż. Dan se jkollu fil-mira tiegħu
Delegazzjonijiet tal-UE, l-uffiċċji ECHO fejn xieraq kif ukoll
kontropartijiet tal-Gvern u msieħba meta dan ikun vijabbli. 4. Ir-responsabbiltà
għar-riżultati Il-Kummissjoni se tittraċċa
l-investimenti finanzjarji tagħha u timmonitorja r-riżultati marbuta
magħhom għall-azzjonijiet kemm dawk li huma speċifiċi
għan-nutrizzjoni kif ukoll dawk li huma sensittivi għan-nutrizzjoni.
Dan jippermetti mhux biss analiżi tal-effiċjenza tal-użu
tar-riżorsi, iżda wkoll analiżi tax-xejriet: kemm qed jintefaq,
fejn u sa lima punt. Permezz tar-rappurtar tagħha,
il-Kummissjoni se tfittex li tkabbar ir-responsabbiltà liċ-ċittadini
Ewropej, il-pajjiżi msieħba, l-Istati Membri tal-UE, l-aġenziji
msieħba u l-benefiċjarji tagħhom. (a)
Monitoraġġ/kejl tar-riżultati Il-Kummissjoni se tiżviluppa sistema biex
tkejjel ir-riżultati tan-nutrizzjoni tal-azzjoni tagħha b’fowkus
speċifiku fuq it-tnaqqis tan-nuqqas ta’ żvilupp. Din il-mira hija
bidla kbira lil hinn minn sempliċiment kejl tal-kontributi u
r-riżultati u l-Kummissjoni għamlet l-isfida lilha nnifisha li
tivvaluta b’mod oġġettiv sa fejn l-isforzi tagħna se
jikkontribwixxu għall-ksib ta’ tnaqqis fin-nuqqas ta’ żvilupp li
aħna nixtiequ naraw. Din se taħdem għal sistema komuni ta’
monitraġġ tan-nutrizzjoni fost l-imsieħba tal-iżvilupp u
l-pajjiżi. Il-Kummissjoni se tkompli tirrapporta dwar ir-riżultati
tal-intervenzjonijiet tagħha dwa in-nuqqas ta’ nutrizzjoni fil-kriżijiet
umanitarji. (b)
Traċċar tar-riżorsi L-UE għandha ssaħħaħ
is-sistema tagħha li tittraċċa l-investimenti
għan-nutrizzjoni, biex tislet id-dejta b’mod aktar preċiż dwar
l-infiq relattiv fuq approċċi speċifiċi għan-nutrizzjoni
u sensittivi għan-nutrizzjoni. Traċċar aħjar huwa komponent
essenzjali ta’ qafas ta’ responsabbiltà mtejjeb għan-nutrizzjoni. Hija se
tikkontribwixxi wkoll għal sistema aħjar ta’ traċċar li
hija kondiviża mal-imsieħba tal-iżvilupp u l-pajjiżi
taħt il-kappa tal-Moviment SUN. L-użu ta’ markatur tan-nutrizzjoni,
flimkien mas-sistema ta’ kodiċi OECD DAC, se jiġu esplorati.
Is-sistema għandha ttejjeb il-preċiżjoni tar-rappurtar u
l-konsistenza fost id-donaturi, u għaldaqstant, tippermetti għarfien
aħjar tal-flussi tal-infiq għan-nutrizzjoni globalment u
responsabbiltà akbar fil-livelli kollha. Dan għandu jtejjeb ukoll
l-eżattezza permezz tal-użu ta’ kriterji li huma mmexxija
mill-objettivi u r-riżultati mistennija ta’ azzjonijiet individwali.
It-tagħrif se jkun kondiviż għall-iskrutinju pubbliku, rivedut u
użat bħala bażi għal azzjoni sabiex jissewwa kwaluwke
preġudizzju jew nuqqas. 5. Il-Pass ’il Quddiem – Sommarju tal-passi
li għandha tieħu l-UE Billi tiffoka fuq in-nutrizzjoni materna u
ta-tfal, l-UE tagħmel pass ’il quddiem u tpoġġi lilha nnifisha
fuq quddiem nett fil-ġlieda biex tikkumbatti l-ġuħ dinji u
n-nuqqas ta’ sigurtà alimentari u tan-nutrizzjoni. Din il-Komunikazzjoni
tindika l-mod sabiex jiġu żgurati t-titjib fir-riżultati
tan-nutrizzjoni u kif dan jista’ jinkiseb. 1. L-UE għandha
tappoġġja l-pajjiżi fl-isforzi tagħhom biex jikkumbattu
n-nuqqas ta’ nutrizzjoni u l-agħar manifestazzjonijiet tiegħu,
jiġifieri n-nuqqas ta’ żvilupp u l-wasting L-indirizzar
tan-nutrizzjoni huwa primarjament ir-responsabbiltà ta' pajjiżi
msieħba, li huma mħeġġa jiżviluppaw strateġiji u
pjanijiet ta’ azzjoni bi spiża kkalkulata, li għandhom jinkludu
l-investimenti nazzjonali. L-appoġġ tal-UE għall-iżvilupp
għandu jkun allinjat ma’ politiki u prijoritajiet tal-imsieħba, skont
il-prinċipji tal-effettività tal-għajnuna. Barra minn hekk, l-UE se
tiżgura l-koerenza bejn il-politiki tagħha li għandhom impatt
fuq is-sigurtà alimentari u tan-nutrizzjoni. 2. L-ewwel 1 000 jum
ta’ ħajja huma meqjusa kritiċi għall-prevenzjoni tan-nuqqas ta’
nutrizzjoni u l-konsegwenzi tiegħu. Għaldaqstant, l-UE għandha
taħdem sabiex ittejjeb in-nutrizzjoni tal-ommijiet u t-tfal. Barra minn
hekk, il-bniet u n-nisa fl-età riproduttiva għandhom ikunu wkoll fil-mira
bħala grupp prijoritarju. 3. Ir-rispons umanitarju
għall-kriżijiet se jiffoka fuq dawk l-aktar vulnerabbli li jsofru
minn nuqqas akut ta’ nutrizzjoni jew jinsabu f’riskju li jbatu minnu. L-UE
għandha tkompli, skont il-prinċipji tar-reżiljenza, tindirizza
l-problema ta’ nuqqas ta’ nutrizzjoni kroniku f’dawn iċ-ċirkustanzi. 4. Huwa meħtieġ aktar
investiment fin-nutrizzjoni biex jitjiebu r-riżultati tan-nutrizzjoni,
kemm f’kuntest ta’ żvilupp kif ukoll f’dak umanitarju u l-Kummissjoni se
tiżviluppa qafas ta’ responsabbiltà għal dawn l-investimenti. Hija se
tiżviluppa u tikkondividi l-għodod biex tittraċċa
l-investimenti fin-nutrizzjoni u metodoloġija biex tkejjel l-impatt u
r-riżultati tal-isforzi biex tikkumbatti n-nuqqas ta' nutrizzjoni.
Il-Kummissjoni impenjat ruħha biex tappoġġja pajjiżi
msieħba fit-tnaqqis tal-għadd tat-tfal taħt il-ħames snin
li għandhom nuqqas ta’ żvilupp b’minn tal-inqas seba’ miljuni u biex
tiżviluppa l-qafas ta’ responsabbiltà tagħha biex tkejjel u
tittraċċa l-progress bejn issa u l-2025. 5. L-indirizzar tan-nutrizzjoni
jeħtieġ approċċ multisettorjali. L-UE għandha
tippromwovi approċċ li jirrikonoxxi l-ħtieġa li l-politiki
dwar l-iżvilupp rurali, l-agrikoltura sostenibbli, is-saħħa
pubblika, l-ilma u s-sanità, il-protezzjoni soċjali u l-edukazzjoni jiġu
allinjati sabiex titjieb is-sigurtà alimentari u tan-nutrizzjoni u jkollu
impatt effettiv fuq l-istatus nutrittiv tan-nisa u t-tfal. Għandha ssir
reviżjoni sistematika tal-istatus nutrittiv tal-pajjiżi sabiex l-UE
tkun tista’ tassigura li t-tħassib dwar in-nutrizzjoni huwa inkorporat
f’approċċi rilevanti għas-settur u biex jiggwida
l-implimentazzjoni għal riżultati aħjar tan-nutrizzjoni, kemm
fl-azzjonijiet umanitarji kif ukoll fl-iżvilupp. 6. L-indirizzar tan-nutrizzjoni
jeħtieġ kooperazzjoni mill-qrib bejn l-atturi umanitarji u dawk
tal-iżvilupp. L-UE hija impenjata li ssaħħaħ dawn
il-konnessjonijiet, pereżempju permezz ta' analiżi konġunta dwar
il-vulnerabbiltà u ppjanar operazzjonali, sabiex tinbena r-reżiljenza
tal-aktar popolazzjonijiet vulnerabbli. 7. L-UE għandha tinvesti
fir-riċerka sabiex tkabbar il-bażi ta’ evidenza dwar
l-effiċjenza u l-effettività ta’ bosta azzjonijiet b’rabta
man-nutrizzjoni. Hija se tappoġġja wkoll sistemi ta’ tagħrif u
l-ħolqien ta’ speċjalizzazzjoni teknika u kapaċità dwar in-nutrizzjoni. 8. L-involviment tan-negozju huwa
essenzjali fil-ġlieda kontra n-nuqqas ta’ nutrizzjoni u l-UE għandha
tfittex li trawwem il-kollaborazzjoni mas-settur privat b'tali mod li
tippromwovi prassi responsabbli tan-negozju. 9. L-UE għandha tippromwovi
n-nutrizzjoni fil-fora internazzjonali bħall-G8/G20, id-WHA, il-Kumitat
dwar is-Sigurtà Alimentari Dinjija, u tkompli tieħu sehem f'inizjattivi
ewlenin bħall-Moviment SUN, il-Kumitat Permanenti dwar in-Nutrizzjoni,
il-Kumitat dwar l-Assistenza Alimentari, iż-Zero Hunger Challenge,
il-Konferenza Internazzjonali fin-Nutrizzjoni (ICN2) u s-sistema umanitarja ta’
raggruppament. L-UE għandha tistinka wkoll biex tiżgura li
n-nutrizzjoni tkun riflessa sew fl-aġenda tal-iżvilupp ta’ wara
l-2015 u se tkompli taħdem għal governanza aktar b'saħħitha
tan-nutrizzjoni internazzjonali. 10. Il-Moviment SUN kien
strumentali biex iqajjem kuxjenza internazzjonali dwar in-nutrizzjoni.
Il-Kummissjoni se tkompli tippromwovi x-xogħol tal-moviment u l-isforzi
tiegħu biex inaqqas in-nuqqas ta’ nutrizzjoni fil-livell ta’ pajjiż.
Il-Kummissjoni se tħeġġeġ aktar pajjiżi b’rata
għolja ta’ nuqqas ta’ nutrizzjoni u pajjiżi donaturi biex
jissieħbu fil-moviment. Din il-Komunikazzjoni hija kkumplementata
mid-Dokument ta’ Ħidma tal-Persunal dwar in-Nuqqas ta’ Nutrizzjoni
fl-Emerġenzi, filwaqt li tenfasizza l-prinċipji bażiċi
għar-rispons umanitarju għall-problemi ta’ nutrizzjoni u tiddeskrivi
l-aqwa prassi. Il-Parlament Ewropew u l-Kunsill huma
mistiedna li jesprimu l-opinjonijiet tagħhom dwar il-kors tal-azzjonijiet
proponut mill-Kummissjoni. Anness 1:
Glossarju
Sigurtà alimentari
teżisti meta n-nies kollha, il-ħin kollu, ikollhom aċċess
fiżiku u ekonomiku għal biżżejjed ikel nutrittiv li huwa
sigur li jissodisfa l-ħtiġijiet tad-dieta tagħhom u preferenzi
tal-ikel għal ħajja attiva u sana. Kriżi umanitarja hija avveniment jew serje ta’ avvenimenti li jirrappreżentaw
theddida kritika għas-saħħa, is-sikurezza, is-sigurtà jew
il-benessri ta’ komunità jew grupp ieħor kbir ta’ nies. Kriżi
umanitarja jista’ jkolli kawżi naturali jew magħmula mill-bniedem,
jista’ jkollha bidu rapidu jew bil-mod u tista’ tkun għal żmien qasir
jew twil. Nutrizzjoni ħażina hija kundizzjoni fiżika relatata mal-użu tan-nutrijenti
mill-ġisem. Hemm żewġ forom ta’ nutrizzjoni ħażina:
nuqqas ta’ nutrizzjoni jew nutrizzjoni żejda. Nuqqasijiet ta’ mikronutrijenti huma l-forma tan-nuqqas ta’ nutrizzjoni marbuta mal-vitamini u
l-minerali. Nuqqasiijiet ta’ ħadid, jodju, vitamina A u żingu
huma fost l-ewwel 10 kawżi prinċipali ta' mewt permezz ta' mard
fil-pajjiżi li qed jiżviluppaw. Nutrizzjoni hija
x-xjenza ta’ kif in-nutrijenti u sustanzi oħra fl-ikel jaġixxu u
jinteraġixxu b’rabta mas-saħħa. Nuqqas ta’ nutrizzjoni jinkludi: i) restrizzjoni tal-iżvilupp fil-utru li twassal
għal piż baxx fit-twelid; ii) nuqqas ta’ żvilupp iii) wasting u
oedema nutrittiva; u iv) nuqqasijiet ta’ mikonutrijenti essenzjali. Piż baxx iżżejjed jinkludi tfal b’piż baxx għat-tul tagħhom (wasting) jew
tul baxx għall-età (nuqqas ta’ żvilupp). Wasting hija
kundizzjoni li tirriżulta minn telf ta’ piż rapidu riċenti, jew
nuqqas milli jiżdied il-piż, fuq medda ta’ żmien qasira. Din
hija karatterizzata minn piż baxx tal-ġisem meta mqabbel mat-tul. Nuqqas ta’ żvilupp jiddeskrivi nuqqas ta’
nutrizzjoni kronika, karatterizzat minn tul baxx meta mqabbel mal-età.
Il-perjodu ta’ żmien itwal li matulu jkun affettwat it-tul għall-età
jagħmlu iktar utli għal ippjanar fuq perjodu ta’ żmien twil u
l-iżvilupp tal-politika. [1] COM(2011)637 [2] Dok. 9369/12 [3] COM(2010)127 u COM(2010)126 [4] Dok. 9597/10 [5] COM(2012)586 [6] Alliance Globale pour l’Initiative Résilience [7] Supporting the Horn of Africa’s Resilience [8] SEC(2010)265 [9] Black R. E. et al., Maternal and child undernutrition:
global and regional exposures and health consequences, The Lancet, 2008 [10] UNICEF, WHO, The World Bank, Levels & Trends in
Child Malnutrition, 2012 (dejta mill-2011) [11] UNICEF, Levels and trends in child mortality, 2011 [12] UNICEF, WHO, The World Bank, Levels & Trends in
Child Malnutrition, 2012 (dejta mill-2011) [13] Ibid [14] De
Benoist B . et al., Worldwide Prevalence of Anemia 1993-2005: WHO
Global Database on Anaemia, WHO and Centers for Disease Control and
Prevention, 2008 [15] Ibid [16] WHO, WFP, UNICEF, Preventing and controlling
micronutrient deficiencies in populations affected by an emergency - Multiple
vitamin and mineral supplements for pregnant and lactating women, and for
children aged 6 to 59 months, 2007 [17] Black R. E. et al., Maternal and child undernutrition:
global and regional exposures and health consequences, The Lancet, 2008 [18] S Grantham-McGregor et al., Development potential in
the first 5 years for children in developing countries, The Lancet, 2007 [19] World Bank, Repositioning Nutrition as Central to
Development - A Strategy for Large-Scale Action, 2006 [20] Inkluż is-sensibilizzazzjoni tan-nisa u inklużi
kwistjonijiet tas-saħħa dwar ir-riproduzzjoni jekk applikabbli. [21] Politiki rurali b’saħħithom ibbażati fuq
il-komunità li għandhom approċċ multisettorjali jistgħu
jkunu parti mis-soluzzjoni. [22] WHO, il-ħamsa u sittin
Assemblea Dinjija tas-Saħħa, A65/11, 2012 [23] WHO, il-ħamsa u sittin
Assemblea Dinjija tas-Saħħa, A65/11, 2012 [24] Rata ta’ mortalità taħt
il-5 snin >2/10000/jum; GAM>15%
jew GAM>10% b’fatturi aggravanti. (Dokument
ta' Ħidma tal-Persunal tal-Kummissjoni dwar “l-indirizzar tan-nuqqas ta’
nutrizzjoni f’emerġenzi”) [25] Inklużi l-investimenti nazzjonali