This document is an excerpt from the EUR-Lex website
Document 52012DC0446
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS Social Protection in European Union Development Cooperation
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Il-Protezzjoni Soċjali fil-Kooperazzjoni għall-Iżvilupp tal-Unjoni Ewropea
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Il-Protezzjoni Soċjali fil-Kooperazzjoni għall-Iżvilupp tal-Unjoni Ewropea
/* COM/2012/0446 final */
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Il-Protezzjoni Soċjali fil-Kooperazzjoni għall-Iżvilupp tal-Unjoni Ewropea /* COM/2012/0446 final */
KOMUNIKAZZJONI TAL-KUMMISSJONI
LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI
EWROPEW U LILL-KUMITAT TAR-REĠJUNI Il-Protezzjoni Soċjali fil-Kooperazzjoni
għall-Iżvilupp tal-Unjoni Ewropea 1. Għaliex hija importanti
l-protezzjoni soċjali Il-faqar persistenti u vulnerabilità
dejjem tiżdied L-Aġenda għall-Bidla[1] tfisser il-politika tal-UE dwar
il-kooperazzjoni għall-iżvilupp fil-futur. Issejjaħ, fost
affarijiet oħra, għal approċċ iktar komprensiv fejn
jidħol l-iżvilupp uman, is-sostenn ta’ access aħjar għal
servizzi ta’ kwalità ta’ saħħa u ta’ edukazzjoni kif ukoll għal
protezzjoni soċjali msaħħa b’appoġġ għal tkabbir
inklużiv ikkaratterizzat mill-“abilità tal-persuni biex jipparteċipaw
u jibbenefikaw mill-ġid u mill-ħolqien tal-impjiegi”. Fis-snin riċenti l-ekonomija dinjija rat
tkabbir impressjonanti f’xi pajjiżi li qed jiżviluppaw,
speċjalment fl-Asja. Ħames pajjiżi b’popolazzjoni kbira
laħqu l-istatus ta’ pajjiżi bi dħul medju (PDM). Madankollu,
żewġ terzi mill-popolazzjoni dinjija fost l-ifqar 1.5 biljun persuna
llum jgħixu f’pajjiżi bi dħul medju. Barra minn hekk,
il-globalizzazzjoni ġiet assoċjata, b’mod aktar estiż, ma’
vulnerabilità akbar, mat-tħarbit tas-sistemi tradizzjonali ta’ solidarjetà
u, f’xi każijiet, ma’ żieda fil-polarizzazzjoni soċjali. Għadd kbir ta’ ħaddiema każwali,
informali u migranti m’għandhom l-ebda aċċess għal xi
assikurazzjoni soċjali relatata mal-impjieg, jew xi forma oħra ta’
protezzjoni soċjali. Filwaqt li aktarx tintlaħaq l-mira
tal-Għan ta’ Żvilupp tal-Millenju li l-proporzjon ta’ persuni li
jgħixu fil-faqar estrem jonqos bin-nofs, ħafna unitajiet
domestiċi għadhom vulnerabbli, u qed jgħixu kemm kemm 'l fuq
mil-linja tal-povertà[2]. Fejn hemm faqar persistenti dan qed jiġi
dejjem aktar assoċjat mal-esklużjoni u l-marġinalizzazzjoni
bħala riżultat ta’ fatturi speċifiċi bħal ma huma
l-iżolament ġeografiku, id-diżabilità, is-sess jew
l-etniċità. Fil-pajjiż bi dħul
baxx (PDB), b’mod partikolari, in-nuqqas ta' saħħa u l-mard,
in-nutrizzjoni mhux adegwata, speċjalment fejn jidħlu t-tfal,
in-nuqqas ta' ħiliet, b’mod partikolari għal żgħażagħ,
in-nuqqas ta’ riżorsi xierqa u l-esponiment għal diversi skossi
fil-mod kif jaqilgħu l-għajxien tagħhom ma jħallix lil
miljuni ta’ persuni fqar li jipparteċipaw b’mod effettiv fis-suq
tax-xogħol jew bħala imprendituri sabiex jaħarbu l-faqar.
Il-kriżijiet globali fejn jidħol l-ikel, il-karburanti u dik
finanzjarja komplew għarrqu dawn l-impatti fuq il-kwalità u s-sigurtà
tal-għajxien u tal-impjieg tal-foqra. Il-protezzjoni soċjali b’sostenn
għall-iżvilupp inklużiv Il-protezzjoni soċjali jista’ jkollha
rwol kruċjali fit-tnaqqis tal-faqar u tal-vulnerabbiltà. Biż-żieda
tal-ekwità – pereż. permezz ta’ trasferimenti soċjali u aktar
aċċess għal servizzi soċjali bażiċi – u
bl-għoti ta’ protezzjoni kontra r-riskji, il-protezzjoni soċjali
tista’ tkun ta’ sostenn għat-tnaqqis tal-faqar u għat-tkabbir
inklużiv, kif ukoll tkun ta’ sostenn għall-koeżjoni u
l-istabbiltà soċjali. Madankollu, l-istess profili differenti ħafna
tal-ekonomiji li qed jiżviluppaw, kif ukoll il-livelli għolja ta'
informalità fis-swieq tax-xogħol tagħhom jippreżentaw xenarju
differenti ħafna minn dak li fih kienu ġew stabbiliti
l-biċċa l-kbira tas-sistemi ta' protezzjoni soċjali fid-dinja
żviluppata, u dan jitlob soluzzjonijiet innovattivi u mfassla apposta,
ibbażati fuq ħtiġijiet u prijoritajiet speċifiċi
għall-pajjiż. Il-protezzjoni soċjali
fil-kooperazzjoni għall-iżvilupp tal-UE fil-futur Il-Kunsill tal-Unjoni Ewropea, il-Parlament
Ewropew, l-organizzazzjonijiet internazzjonali u s-soċjetà ċivili sejħu
lill-Kummissjoni biex iħejju proposta dwar il-protezzjoni soċjali
fil-kooperazzjoni għall-iżvilupp tal-UE[3]. Ir-Rapport Ewropew dwar
l-Iżvilupp tal-2010 jappella biex il-protezzjoni soċjali ssir parti
integrali tal-politika ta’ żvilupp tal-UE[4].
Fl-2011 il-Kummissjoni nediet proċess ta' konsultazzjoni li kkonferma
r-relevanza u t-tempestività tal-iżvilupp ta’ qafas ta’ politika għal
appoġġ futur tal-UE għall-protezzjoni soċjali. Din il-Komunikazzjoni għandha l-għan
li tispjega r-rwol tal-protezzjoni soċjali fl-irfid tal-iżvilupp
inklużiv u sostenibbli u r-rwol tal-kooperazzjoni għall-iżvilupp
tal-UE fis-sostenn tat-tisħiħ tal-linji ta’ politika u tas-sistemi
ta’ protezzjoni soċjali. 2. X’Inhi il–Protezzjoni
Soċjali u għal xiex tiswa? Id-definizzjoni
ta’ ‘Protezzjoni Soċjali’ Id-definizzjonijiet
ta’ ‘Protezzjoni Soċjali’ jvarjaw ħafna madwar id-dinja. Xi
approċċi huma normattivi ħafna, ibbażati fuq
il-kunċett tal-protezzjoni soċjali bħala dritt kif stipulat fi
strumenti tan-NU, inklużi l-konvenzjonijiet tal-Organizzazzjoni
Internazzjonali tax-Xogħol (ILO), filwaqt li oħrajn jiffukaw aktar
fuq il-funzjonijiet tal-protezzjoni soċjali fit-tkabbir ekonomiku u
t-tnaqqis tal-faqar. Xi strateġiji għall-protezzjoni soċjali
jenfasizzaw il-funzjonijiet tagħha biex jgħinu nies foqra
jaħarbu mill-faqar, filwaqt li oħrajn jenfasizzaw ir-rwol tagħha
fil-promozzjoni tal-inklużjoni soċjali, il-ġustizzja
soċjali u mal-iżgurar ta’ sigurtà ta’ dħul, kwalità
tal-edukazzjoni u kura tas-saħħa għal kulħadd.
Il-protezzjoni soċjali tista’ tiġi ddefinita għalhekk bħala
politiki u azzjonijiet li: ·
jsaħħu l-kapaċità tan-nies kollha,
imma l-aktar tal-foqra u ta’ gruppi vulnerabbli, biex jaħarbu mill-faqar,
jew biex jevitaw li jaqgħu fil-faqar, u jimmaniġġjaw aħjar
ir-riskji u x-xokkijiet kif ukoll ·
għandhom l-għan li jipprovdu livell
ogħla ta’ sigurtà soċjali permezz ta’ sigurtà tad-dħul u
aċċess għal servizzi essenzjali (partikolarment,
is-saħħa u l-edukazzjoni) matul perijodi attivi kif ukoll dawk mhux
attivi u perjodi ta’ bżonn matul iċ-ċiklu tal-ħajja. L-obbligu għall-gvernijiet biex jipprovdu
kopertura ta’ protezzjoni ċivili joħroġ mid-dritt
għas-sigurtà soċjali mnaqqax fid-Dikjarazzjoni Universali
tad-Drittijiet tal-Bniedem tal-1948. L-istandards tas-sigurtà soċjali huma
definiti mill-ILO, partikolarment fil-Konvenzjoni tas-Sigurtà Soċjali
(Standards Minimi) tal-1952 (Nru 102), li ġiet kompletament jew
parzjalment ratifikata minn sebgħa u erbgħin pajjiż,
prinċipalment ta’ dħul għoli. Kif
il-Protezzjoni Soċjali ssostni l-iżvilupp inklużiv Il-protezzjoni
soċjali għandha l-potenzjal li tippromwovi l-iżvilupp inklussiv
f’għadd ta’ modi: ·
Il-protezzjoni soċjali żżid
l-aċċess għas-servizzi pubbliċi, b’mod li ttejjeb
is-saħħa, l-edukazzjoni u n-nutriment tan-nies tax-xogħol u
t-tfal tagħhom, issostni l-parteċipazzjoni tal-foqra fl-ekonomija u
tkattar il-produttività ta' min jaħdem. ·
Il-protezzjoni soċjali tista’ tipprovdi
l-għodod għall-ġestjoni tar-riskju għal
individwi u l-assi tagħhom, b’mod li tippermettilhom jiddefendu
l-potenzjal tagħhom li jiġġeneraw id-dħul għat-tul kif
ukoll li jagħmlu l-investimenti. ·
Il-protezzjoni soċjali tippromwovi l-istabilità
tad-dħul u tista’ tistimula d-domanda għal prodotti u
servizzi lokali, mhux l-anqas billi taġixxi bħala stabilizzatur
makroekonomiku fi żminijiet ta’ taqlib ekonomiku. ·
Il-protezzjoni soċjali tnaqqas
l-inugwaljanza, li tikkontribwixxi kemm għal tkabbir sostenibbli u
inklużiv kif ukoll tista’ tgħin fit-tisħiħ tal-kuntratt
bejn iċ-ċittadini u l-istat u tippromwovi l-inklużjoni
soċjali, il-koeżjoni u responsabbiltà akbar. ·
Il-protezzjoni soċjali tista’ tipprovdi ekwità
interġenerazzjonali billi tqassam il-benefiċċji
soċjali tul iċ-ċiklu tal-ħajja mill-ġenerazzjoni li
hija produttiva fil-preżent għal fuq it-tfal, iż-żgħażagħ
u l-anzjani. Dan jikkontribwixxi lejn is-sigurtà, l-istabilità fis-soċjetà
u l-prevedibbiltà għall-individwu. Ir-rwol tal-politiki u miżuri ta’
protezzjoni soċjali fl-appoġġ għal tkabbir inklużiv u
t-tnaqqis tal-faqar fil-livell nazzjonali huwa rifless fil-kontribut
tagħhom lejn il-kisba tal-MDGs. Il-Protezzjoni Soċjali bħala sostenn għall-MDGs MDG 1: Faqar u ġuħ estrem L-Għotja ta' Għajnuna għat-Tfal fl-Afrika ta’ Isfel kienet ta' kontribut biex id-diskrepanza tal-faqar tonqos b’47 fil-mija[5]. L-MDGs 2 u 3: Titjib fir-riżultati edukattivi anki skont is-sessi Bejn l-1996 u l-2002/3, id-dħul nett ta’ bniet fl-iskejjel primarji fil-Bangladexx żdied minn 48% għal 86%. Ħafna riċerkaturi jattribwixxu dan fil-parti għall-programm ta’ stipendju għall-edukazzjoni tal-bniet, li kien appoġġjata minn fondi tal-UE[6]. L-MDGs 4, 5 u 6: Kura tas-saħħa mtejba u tnaqqis fil-mard Il-programm Oportunidades fil-Messiku ikkombina trasferimenti ta’ flus u servizzi tas-saħħa b’xejn ma’ titjib fil-provvista ta’ servizzi tas-saħħa, li wassal għal tnaqqis ta’ 17% fil-mortalità tat-trabi fl-inħawi rurali fil-Messiku fuq medda ta' tliet snin[7]. 3. Il-Protezzjoni soċjali
fl-Unjoni Ewropea Impenn komuni iżda
approċċi differenti Il-protezzjoni soċjali tinsab fil-qalba
tal-mudell soċjali Ewropew. Il-politika tal-protezzjoni soċjali hija
ġeneralment ir-responsabbiltà tal-Istati Membri individwali skont
il-prinċipju tas-sussidjarjetà. Madankollu, fil-livell tal-UE ġie
stabbilit il-‘Metodu Miftuħ ta’ Koordinazzjoni’, proċess
volontarju għal kooperazzjoni politika bbażat fuq ftehim dwar
għanijiet komuni u indikaturi komuni. Is-sistemi ta’ protezzjoni
soċjali jvarjaw ħafna madwar l-Unjoni. Madankollu, l-Istati Membri
tal-UE kollha huma fil-prinċipju impenjati li jipprovdu aċċess
universali għall-protezzjoni soċjali kontra r-riskji ewlenin
tal-ħajja, f’konformità mal-garanzija li hemm fl-Artikolu 34
tal-Karta tad-Drittijiet Fundamentali tal-Unjoni Ewropea. Is-sistemi ta’ protezzjoni soċjali
Ewropej servew ta’ lqugħ importanti kontra l-faqar ġej mir-riskji u
mid-dħul, kif ukoll illimitaw l-inugwaljanza fl-Ewropa, iżda
d-diffikultajiet ekonomiċi persistenti minħabba l-kriżi
finanzjarja qajmu mistoqsijiet diffiċli dwar kemm huma sostenibbli u
effiċjenti. Bi tweġiba, l-UE qed tipprova tiżviluppa modi
ġodda ta’ kif jitwasslu livelli għolja ta’ protezzjoni soċjali
b’anqas spejjeż, inkluż b’enfasi akbar fuq l-attivazzjoni ta’
żgħażagħ u anzjani. ‘Ewropa 2020’, l-istrateġija
tal-UE għal tkabbir intelliġenti, sostenibbli u inklussiv, tnediet
fl-2010 immirata lejn żieda fl-impjieg u tnaqqis tal-faqar u
l-esklużjoni soċjali. Dawn huma s-suġġett ta’
monitoraġġ u analiżi dettaljati permezz tas-Simestru Ewropew, li
nbeda fl-2011 sabiex tissaħħaħ il-koordinazzjoni tal-politiki
għall-irkupru u t-tkabbir. 4. Il-protezzjoni soċjali
fl-ekonomiji li qegħdin jiżviluppaw L-ekonomiji tal-pajjiżi li qed
jiżviluppaw ikunu spiss ikkaratterizzati minn livelli għolja ta’
informalità, ta’ bażi baxxa tat-taxxa fuq id-dħul, allokazzjonijiet
baġitarji relattivament baxxi fejn tidħol il-protezzjoni soċjali
u sistemi ta’ assigurazzjoni soċjali frammentati ħafna li
ġeneralment ikunu ta’ benefiċċju għal minoranza
żgħira biss fis-settur formali. Bħala medja, il-pajjiżi li
qed jiżviluppaw jonfqu madwar kwart ta’ dak li jonfqu l-ekonomiji
avvanzati fejn tidħol il-protezzjoni soċjali. Konsegwentement madwar
id-dinja huwa biss madwar 20% tal-popolazzjoni fl-età tax-xogħol li
għandu aċċess għal protezzjoni soċjali komprensiva. Fil-pajjiżi ta’dħul medju,
l-isfidi huma li titwessa’ l-kopertura u li tittejjeb l-effiċjenza. F’ħafna pajjiżi ta’ dħul medju,
l-elementi ta’ sistema moderna ta’ protezzjoni soċjali diġà ġew
stabbiliti hekk kif iddaħħlu xi elementi tal-assigurazzjoni
soċjali. Madankollu, il-kopertura – partikolarment ta’ skemi kontributorji
– hija ġeneralment tant baxxa li hija parti relattivament ċkejkna
tal-popolazzjoni li tibbenefika, prinċipalment dawk li jaħdmu
fl-ekonomija formali. F’dawn il-kuntesti, l-isfida ewlenija hija li tiġi
estiża l-kopertura, partikolarment għal dawk fl-ekonomija informali. Il-pajjiżi bi dħul medju
għandhom it-tendenza wkoll li jħaddmu għadd ta’ programmi
diskreti ta’ assistenza soċjali mfassla biex jilħqu gruppi
speċifiċi, bħall-fqar, u jżidu l-aċċess tagħhom
għal servizzi bażiċi. L-effettività ta’ dawn l-iskemi tvarja
ferm, għalkemm l-evidenza kemm mill-Asja kif ukoll mill-Amerika Latina
tindika li programmi mfassla tajjeb jistgħu jkunu ferm effettivi biex
jintlaħqu l-foqra u gruppi vulnerabbli oħrajn. Barra minn hekk, il-gvernijiet komunement
użaw sussidji għall-enerġija u/jew kontrolli tal-prezzijiet
bħala mezz biex jipprovdu protezzjoni tad-dħul nozzjonali għal
partijiet tal-popolazzjoni. Madankollu, huwa fatt li dawn il-politiki huma
għalja, rigressivi u ineffiċjenti. Fil-pajjiżi ta’ dħul baxx,
il-finanzjament u l-kapaċità istituzzjonali huma x-xkiel ewlieni Fil-pajjiżi bi dħul baxx,
l-għoti tal-protezzjoni soċjali huwa ħafna drabi saħansitra
aktar ristrett minħabba n-nuqqas relattiv ta’ riżorsi u, kritikament,
id-dgħufija tal-istituzzjonijiet pubbliċi. F’kuntest ta’
industrijalizzazzjoni limitata u ta’ popolazzjonijiet rurali kbar, ħafna
miċ-ċittadini jibqgħu mhux koperti minn metodi organizzati ta’
protezzjoni soċjali u huma vulnerabbli għal xokkijiet, għalkemm
il-familja u n-netwerks informali oħra jistgħu jipprovdu kumpens
parzjali. Programmi ta’ trasferiment soċjali – sew jekk immirati sew jew
le, kundizzjonali jew mhux kundizzjonali – jibqgħu l-forma dominanti ta’
protezzjoni soċjali bid-donaturi sikwit jaqdu rwol importanti fit-tfassil
u l-finanzjament tagħhom. Programmi bħal dawn ikunu spiss frammentati
u ħafna naqsu milli jiżviluppaw f’sistemi sostenibbli, tal-gvern.
Konsegwentement, l-esklużjoni totali u inugwaljanza kbira fejn jidħol
aċċess għall-protezzjoni soċjali jibqgħu fatturi ewlenin. L-isfida komuni: finanzjament
sostenibbli, estensjoni tal-kopertura, il-bini tal-kapaċità Minkejja dawn il-limitazzjonijiet, tinsab
għaddejja bidla importanti fl-attitudnijiet. Fejn kibru l-ekonomiji,
id-domanda miċ-ċittadini għall-protezzjoni soċjali żdiedet
ukoll u l-gvernijiet huma taħt pressjoni biex jirrreaġixxu.
Madankollu l-isfida għalihom hija kemm dik li jfasslu programmi ta’
protezzjoni soċjali li jkollhom kopertura aħjar - u għalhekk
jindirizzaw kwistjonijiet ta’ ekwità - iżda wkoll li jħaddmuhom
b’aktar effiċjenza u b’modi li jkunu fiskalment fattibbli u sostenibbli.
Barra minn dan, il-mod li bih il-gvernijiet ikunu jistgħu jirreaġixxu
jiddependi mhux biss fuq l-iffinanzjar – u l-abbiltà
għall-ġenerazzjoni tad-dħul mit-taxxi jew li jiġu mmobilizzati
l-kontribuzzjonijiet aktar milli jistrieħu fuq id-dejn jew l-iffinanzjar
mid-donaturi – iżda wkoll fuq il-kapaċità istituzzjonali ta’
pajjiż u l-faċilità li biha din tkun tista’ tintuża
għall-protezzjoni soċjali. Impenn imġedded mill-komunità internazzjonali Bi tweġiba għal dawn l-isfidi kien
hemm imbuttatura ġdida biex jissaħħaħ l-impenn tal-komunità
internazzjonali fil-promozzjoni tal-protezzjoni soċjali. Dan huwa rifless
fl-inizjattiva dwar il-Protezzjoni Soċjali Bażika (Social
Protection Floors –SPF) żviluppata b’inizjattiva tat-tmexxija tal-ILO,
li ngħata appoġġ qawwi mill-Konferenza Internazzjonali
tax-Xogħol (ILC) tal-2011 u fil-Laqgħat Għolja tal-G20 tal-2011
u tal-2012. Fl-2012 il-mexxejja tal-G20 qablu wkoll li jgħinu
lill-pajjiżi ta’ dħul baxx fil-bini tal-kapaċità
għall-implimentazzjoni ta’ SPFs nazzjonali permezz ta’ koerenza politika,
kordinazzjoni, koperazzjoni u l-qsim tal-għarfien. Ir-‘Rakkomandazzjoni
dwar is-Sistemi Nazzjonali ta’ Protezzjoni Soċjali Bażika’, li
tipprovdi gwida dwar l-implimentazzjoni progressiva ta’ protezzjoni
soċjali bażika bħala element fundamentali tas-sistemi
tas-sigurtà soċjali nazzjonali inklużivi, ġie adottat fl-ILC
tal-2012. Filwaqt li l-SPF hija inizjattiva globali u
hija bbażata fuq sett ta’ prinċipji, li huma espressi bħala
garanziji, mhix approċċ li jixraq f’kull sitwazzjoni. It-tfassil u
l-implimentazzjoni tal-SPFs hija kwistjoni għal kull pajjiż skont
strutturi speċifiċ-nazzjoni istituzzjonali, limitazzjonijiet ekomomiċi,
dinamiċi politiċi u aspirazzjonijiet soċjali. Protezzjoni Soċjali Bażika Il-protezzjoni soċjali bażika tikkomprendi sett bażiku ta’ garanziji soċjali għal kulħadd (id-dimensjoni orizzontali) u l-implimentazzjoni gradwali ta’ standards ogħla (id-dimensjoni vertikali) bħala sett integrat ta’ politiki soċjali mfasslin biex jiggarantixxu s-sigurtà tad-dħul u l-aċċess għal servizzi soċjali essenzjali għal kulħadd, b’attenzjoni partikolari għal gruppi vulnerabbli u l-protezzjoni u l-ogħti tas-setgħa lin-nies tul iċ-ċiklu tal-ħajja[8]. Ir-rakkomandazzjoni dwar il-Protezzjoni Soċjali Bażika adottata fl-ILC tal-2012 tiddikjara li l-protezzjoni soċjali bażika għandha tinkludi għall-inqas il-garanziji ta’ sigurtà soċjali bażiċi li ġejjin: (a) aċċess għal sett ta’ prodotti u servizzi definit nazzjonalment, li jikkostitwixxi kura tas-saħħa essenzjali, inkluża l-kura tal-maternità, li tissodisfa l-kriterji ta’ disponibilità, aċċessibilità, aċċettabilità u kwalità; (b) sigurtà ta’ dħul bażiku għat-tfal, għall-inqas sa livell minimu definit nazzjonalment, li jipprovdi aċċess għan-nutriment, l-edukazzjoni, il-kura u u kwalunkwe prodott u servizz ieħor neċessarju; (c) sigurtà ta’ dħul bażiku, għall-inqas sa livell minimu definit nazzjonalment, għal persuni f’età attiva li ma jkunux f’pożizzjoni li jaqilgħu dħul biżżejjed, b’mod partikolari f’każijiet ta’ mard, qgħad, maternità u diżabilità; kif ukoll (d) sigurtà ta’ dħul bażiku, għall-inqas sa livell minimu definit nazzjonalment, għal persuni anzjani[9]. 5. Id-direzzjoni futura
tal-kooperazzjoni għall-iżvilupp tal-UE b’sostenn
għall-protezzjoni soċjali fil-pajjiżi msieħba. L-ekwità, l-inklużjoni soċjali
u l-koeżjoni soċjali L-għan tal-kooperazzjoni
għall-iżvilupp tal-UE fis-sostenn tal-protezzjoni soċjali huwa
li jtejjeb l-effiċjenza u l-ekwità fl-għoti tagħha, filwaqt li
tiġi appoġġjata l-inklużjoni soċjali u
l-koeżjoni, bħala l-bażi essenzjali ta’ tkabbir sostenibbli,
inklużiv, u t-tnaqqis tal-faqar. Dawn l-għanijiet joħorġu
b’mod naturali mill-valuri fundamentali tal-Unjoni Ewropea. It-tqegħid tal-protezzjoni
soċjali fiċ-ċentru tal-istrateġiji ta’ djalogu dwar
strateġiji nazzjonali għall-iżvilupp L-UE tfittex li tinkludi protezzjoni
soċjali fid-djalogi ta’ politika tagħha ma’ pajjiżi msieħba
dwar l-istrateġiji ta’ żvilupp nazzjonali tagħhom u għandha
tkompli tippromwovi u tassisti l-iżvilupp ta’ sistemi ta’ protezzjoni
soċjali speċifiċi għall-kuntest li huma effiċjenti,
ġusti u sostenibbli. Id-djalogi ta’ politika ma’ gvernijiet
sħab għandhom jiżguraw li s-sistemi ta’ protezzjoni soċjali
jkunu sostnuti minn prinċipji li jimmiraw li jiksbu aċċess
ugwali u universali għall-protezzjoni soċjali tul ħajjet
in-nies, b’attenzjoni partikolari għall-aktar nies vulnerabbli u żvantaġġjati,
bħal tfal u persuni b’diżabbiltà. L-appoġġ tal-politiki u
l-programmi nazzjonali L-UE għandha tappoġġja
l-iżvilupp ta’ politiki u programmi ta’ protezzjoni soċjali
b’responsbilità nazzjonali, inkluża protezzjoni soċjali
bażika, filwaqt li tfittex li tippromwovi prattika tajba fit-tfassil
tal-politika u t-tfassil u l-iżvilupp tas-sistemi tal-protezzjoni
soċjali. Prattika tajba tista’ tipikament tinkludi manuvri biex jiġu
razzjonalizzati u unifikati sistemi maħsuba sabiex itejbu
l-effiċjenza u tiġi żviluppata bażi aħjar biex
tiġi stabbilita kopertura usa’ u aktar effettiva, inkluż permezz ta’
moviment minn xbieki protettivi selettivi li jiswew għal żmien qasir
lejn sistemi komprensivi. Il-politiki għandhom jirriflettu
l-ħtiġijiet speċifiċi u l-prijoritajiet ta’ pajjiżi
sħab individwali. Riforma tad-dħul għal spazju
fiskali Protezzjoni soċjali effettiva u
sostenibbli għandha finalment tkun ibbażata fuq ridistribuzzjoni
tal-ġid intern aktar milli internazzjonali. Is-Sħubija ta’ Busan
għal Koperazzjoni Effettiva fl-Iżvilupp[10] tappella biex l-introjti
tal-gvernijiet sħab stess jaqdu rwol akbar fl-iffinanzjar
tal-ħtiġijiet ta’ żvilupp sabiex jitnaqqas il-faqar u
jseħħ progress lejn il-kisba tal-MDGs, filwaqt li
tissaħħaħ is-sostenibbiltà permezz ta’ anqas dipendenza fuq
l-għajnuna barranija. F’konformità mal-Komunikazzjoni tal-2010 dwar
it-Tassazzjoni u l-Iżvilupp[11]
u mal-prinċipji tal-governanza tajba fil-qasam tat-tassazzjoni, l-UE se
tappoġġa miżuri effettivi sabiex tiżviluppa sistemi ta’
taxxa effikaċji, ġusti u sostenibbli, skont il-kapaċitajiet ta’
pajjiżi sħab individwali, sabiex jiżdied l-ispazju fiskali li
jiffinanzja l-protezzjoni soċjali. Dan jista’ jinkludi l-bini
tal-kapaċità għal riforma fl-amministrazzjoni tat-taxxa u s-sistemi
tad-dħul biex tittejjeb il-bażi tat-taxxa kif ukoll is-sostituzzjoni
ta’ sussidji rigressivi b’miżuri ta’ protezzjoni soċjali aktar
effettivi. Bini ta’ kapaċità għal
istituzzjonijiet b’saħħithom It-twaqqif ta’ qafas legali u istituzzjonali
xieraq hija sfida ewlenija biex ikun hemm l-għoti ta’ kopertura effettiva
u effiċjenti ta’ protezzjoni soċjali. L-UE għandha tissokta
bl-appoġġ tagħha lil pajjiżi sħab permezz ta’
kooperazzjoni teknika, fit-twaqqif tal-qafas strateġiku, politiku, legali
u istituzzjonali, ibbażat fuq l-analiżi lokali u l-prijoritajiet
tagħhom. L-UE għandha wkoll tkompli tappoġġja l-bini ta’
kapaċitajiet istituzzjonali fil-livelli kollha (nazzjonali,
provinċjali, lokali; tal-gvern u mhux tal-gvern) sabiex jiġu
żviluppati u msaħħa l-kapaċitajiet amministrattivi u
implimentattivi tal-gvernijiet, tal-aġenziji implimentattivi,
tal-imsieħba soċjali u ta’ atturi mhux tal-istat. Is-sistemi tal-protezzjoni soċjali
jistgħu jbatu minn livelli għolja ta’ ħela. Għaldaqstant,
l-appoġġ se jkollu wkoll jindirizza kwistjonijiet ta’ governanza
tajba u ġestjoni finanzjarja pubblika, mhux l-anqas sabiex titnaqqas
il-frodi, il-prattika ħażina u l-ħela, kif ukoll titmexxa ’l
quddiem ir-responsabbiltà. Il-valur miżjud tal-UE
f’kooperazzjoni teknika L-UE akkumulat minjiera ta’ esperjenzi u
strateġiji fil-qasam tal-protezzjoni soċjali. Id-differenzi bejn
l-Istati Membri tal-UE fejn jidħlu l-iffinanzjar tal-protezzjoni
soċjali, il-livelli ta’ kopertura, is-sistemi ta’ amministrazzjoni u ta’
konsenja, joffru firxa wiesgħa ta’ esperjenzi u għarfien li
jistgħu jipprovdu bażi soda għall-bini tal-kapaċità u
konsulenza politika f’appoġġ għall-pajjiżi sħab. Fejn
ikun rilevanti, l-UE għandha wkoll tiffaċilita l-koperazzjoni
Nofsinhar-Nofsinhar, bil-kondiviżjoni ta’ esperjenzi u riċerka. Il-Kummissjoni se tagħmel aktar użu
ta’ għodod eżistenti, bħal TAIEX, u tiżviluppa għodod
ġodda biex tippermetti mobilitazzjoni rapida ta’ prattikanti esperti kemm
mill-Ewropa kif ukoll minn pajjiżi terzi rilevanti f’paradigma ta’
koperazzjoni Nofsinhar-Nofsinhar jew trijangolari. Appoġġ għall-ħolqien
ta’ postijiet tax-xogħol u għall-impjiegi Il-protezzjoni soċjali effettiva
għandha ukoll tinkludi jew tkun mill-qrib assoċjata ma’, miżuri
li jippermettu lill-benefiċjarji li jipparteċipaw f’attività
ekonomika u f’impjiegi produttivi. Ir-rwol essenzjali ta’ impjiegi produttivi u
xogħol deċenti fit-tnaqqis tal-faqar huwa mniżżel ċar
fl-ewwel MDG, kif ukoll fid-Dokument ta’ Ħidma tal-Persunal
tal-Kummissjoni dwar il-Promozzjoni tal-Impjieg permezz tal-Koperazzjoni
għall-Iżvilupp tal-UE[12]. L-UE għandha tappoġġja
lill-gvernijiet nazzjonali fl-iżvilupp ta’ programmi ta’ impjiegi, ta’
skemi ta’ ħolqien tal-impjiegi, u ta’ appoġġ
għall-imprenditorija. Għandha wkoll tappoġġja d-djalogu
soċjali u l-istandards tax-xogħol skont l-Aġenda tax-Xogħol
Deċenti[13]
u l-provvista ta’ protezzjoni soċjali fil-kuntest ta’ swieq
tax-xogħol informali ħafna, inklużi approċċi
innovattivi bħall-iskemi ta’ mikroassigurazzjoni. L-UE għandha
tappoġġja wkoll programmi nazzjonali sabiex jittejbu
l-opportunitajiet ta’ impjieg ta’ gruppi vulnerabbli u marġinalizzati,
bħall-persuni b’diżabbiltajiet. Jiddaħħlu s-soċjetà
ċivili u s-settur privat Filwaqt li l-gvernijiet għandhom
ir-responsabbiltà ewlenija għall-politika u l-għoti tal-protezzjoni
soċjali, hemm xi sitwazzjonijiet li fihom l-iskemi ta’ protezzjoni
soċjali jkunu jistgħu l-aħjar jiġu kkonsenjati permezz ta’
sħubijiet pubbliċi-privati. Fl-appoġġ tagħha
għall-iżvilupp tas-sistemi tal-protezzjoni soċjali l-UE
għandha tirrikonoxxi r-rwol importanti li għandhom fornituri
tas-servizz tas-settur privat u ta’ entitajiet mhux governattivi. L-inizjattiva
tal-UE fir-Responsabbiltà Soċjali Korporattiva tistà tappoġġja
s-settur privat f’pajjiżi li qed jiżviluppaw biex jimplimentaw linji
gwida internazzjonali rilevanti sabiex jiksbu tkabbir aktar inklussiv u
sostenibbli u aktar żvilupp. Is-soċjetà ċivili u l-imsieħba
soċjali għandhom jingħataw is-setgħa u jiġu
mħeġġa biex jissieħbu mal-Istat fl-iżvilupp u
l-implimentazzjoni ta’ sistemi ta’ protezzjoni soċjali.
Il-parteċipazzjoni tagħhom tista’ tgħin fil-promozzzjoni
tal-effiċjenza fil-forniment kif ukoll għal konsultazzjoni u
inklużjoni usa’. Dawn jistgħu jaqdu rwol kruċjali bħala
sostenituri tal-protezzjoni soċjali kif ukoll billi jirresponsabilizzaw
lill-komunitajiet u lill-individwi, partikolarment l-iżvantaġġjati
u lill-esklużi, billi jitqajjem l-għarfien u tittejjeb
l-informazzjoni. F’xi każijiet, jistgħu wkoll jgħinu
fil-monitoraġġ u l-evalwazzjoni tal-iskemi ta’ protezzjoni
soċjali. Appoġġ għal Protezzjoni
Soċjali Trasformattiva L-approċċi trasformattivi jestendu
l-kunċett tal-protezzjoni soċjali biex tkun tinkludi ‘żoni
bħalma huma l-ekwità, ir-responsabbilizzazzjoni u d-drittijiet
ekonomiċi, soċjali u kulturali, aktar milli tillimita l-ambitu
tal-protezzjoni soċjali għal trasferimenti mmirati ta’ dħul u
ta’ konsum’[14].
Din jallinja sew mal-valuri li jirfdu l-iżvilupp tal-protezzjoni
soċjali fl-UE u l-kooperazzjoni għall-iżvilupp tal-UE
għandha għalhekk tappoġġja strateġiji bħal dawn.
Kien hemm, madankollu, ftit riċerka dwar l-effettività tagħhom u
għalhekk l-UE għandha tikkunsidra l-appoġġ għal
riċerka operattiva li tiddokumenta l-prattika tajba u tiġġenera
xhieda dwar l-impatti tal-protezzjoni soċjali trasformattiva sabiex
tinbena bażi ta’ għarfien sod għall-azzjoni. Is-sessi
fil-Protezzjoni Soċjali ‘In-nisa u l-irġiel
jiffaċċjaw riskji u vulnerabiltajiet differenti, xi wħud
speċifiċi għas-sess tagħhom u oħrajn aggravati minn
inugwaljanzi u diskriminazzjoni bejn is-sessi’[15]. Biex jiġi żgurat li
l-irġiel u n-nisa jibbenefikaw bl-istess mod, is-sistemi ta’ protezzjoni
soċjali jridu jindirizzaw ir-riskji assoċjati maċ-ċiklu
tal-ħajja tan-nisa u l-piz ta’ kura li jkollhom, kif ukoll l-ostakoli li
n-nisa jaffaċċjaw biex ikollhom aċċess
għax-xogħol. L-UE għandha
tassigura li l-preokkupazzjonijiet relatati mas-sess ta’ persuna jkunu
indirizzati fil-politika tal-protezzjoni soċjali u fit-tfassil
tal-programmi. 6. L-Ipprogrammar
tal-Kooperazzjoni għall-Iżvilupp u l-Modalitajiet Il-modalitajiet kollha tal-għajnuna huma
rilevanti għall-appoġġ tal-iżvilupp, skont il-kuntest u
l-għan tal-appoġġ. F’konformità tal-Aġenda
għall-Bidla, il-protezzjoni soċjali tista’ tintgħażel
bħala wieħed mis-setturi ta’ kooperazzjoni f’programmi individwali
reġjonali jew għall-pajjiż kollu, jew tkun preżenti
bħala dimensjoni fi programmi settorjali oħra (eż. l-impjiegi,
is-saħħa, l-edukazzjoni, is-sigurtà tal-ikel, l-agrikoltura u
l-iżvilupp tas-settur privat, eċċ). Il-protezzjoni soċjali
tista’ wkoll tiġi appoġġata permezz ta’ programmi tematiċi,
li għandhom jikkomplementaw il-programmi ġeografiċi. L-approċċi settorjali[16] jistgħu jkunu modalità
partikolarment xierqa għall-appoġġ tal-protezzjoni soċjali,
minħabba l-użu tagħhom ta’ sistemi u proċessi ta’
pajjiżi msieħba u l-fatt li huma msejsa fuq id-djalogu politiku. L-appoġġ baġitarju[17], akkumpanjat minn djalogu ta’
politika, jista’ jkun ta’ għajnuna fl-inċentivar ta’ sistemi ta’
protezzjoni soċjali li jkunu integrati bis-sħiħ fil-proċssi
nazzjonali ta’ ppjanar tal-baġit u ta’ ppjanar f’qafas ta’ responsabbiltà
mill-gvern lejn il-parlament u l-poplu. 7. Sħubijiet ta’ Zvilupp
differenzjati L-Aġenda għall-Bidla tipproponi
approċċ tal-UE differenzjat biex jgħin fl-allokazzjoni u
fit-tisħib. L-appoġġ għall-iżvilupp ta’ sistemi ta’
protezzjoni soċjali huwa relevanti kemm għall-pajjiż bi
dħul baxx kif ukoll medju, iżda l-pajjiżi bi status ta’
dħul medju se jkollhom kapaċità fiskali u istituzzjonali akbar minn
dik ta’ dawk bi dħul baxx. Xi wħud minn dawn il-pajjiżi se jkunu
għaddew minn iffinanzjar fuq skala kbira ta’ koperazzjoni
għall-iżvilupp tal-UE li jkun ingħata permezz ta’ programmi
ġeografiċi bilaterali. Madankollu, l-appoġġ
għall-iżvilupp ta’ sistemi ta’ protezzjoni soċjali f’dawn
il-pajjiżi, partikolarment fejn tidħol l-assistenza teknika, l-iskambji
u r-riċerka operattiva kollaborattiva, jista’ jingħata permezz ta’
programmi reġjonali u tematiċi. Minħabba r-rwol kritiku li l-protezzjoni
soċjali tista’ taqdi fl-indirizzar tal-livelli għoljin ta’ faqar u
vulnerabilità li għadhom jeżisti f’ekonomiji emerġenti huwa
wkoll essenzjali li l-protezzjoni soċjali tibqa’ punt ewlieni fid-djalogu
politiku u ta’ politika tal-UE ma’ dawn is-sħab. Il-koperazzjoni għall-iżvilupp
tal-UE tista’ tintuża biex jiġi ffinanzjat it-twaqqif u
t-tisħiħ ta’ sistemi ta’ protezzjoni soċjali, inkluż
f’sitwazzjonijiet li jitolbu l-iżvilupp ta’ sistemi li jkunu jistgħu
jiġu mwessa’ malajr biex jindirizzaw diżastri naturali rikorrenti.
L-iffinanzjar ta’ benefiċċji jew trasferimenti ta’ protezzjoni
soċjali jista’ jiġi ġġustifikat fi stati fraġli u
f’sitwazzjonijiet ta’ wara l-kunflitt f’każijiet partikolari fejn
il-protezzjoni soċjali tista’ taqdi rwol kritiku fl-għajnuna lil
popli affettwati sabiex jirkupraw l-assi. Madankollu, l-UE għandha
taħdem lejn l-iżvilupp ta’ sistemi bbażati fuq finanzjament
domestiku. 8. Azzjoni kkoordinata tal-UE L-Aġenda għall-bidla ssejjaħ
għal sforzi mġedda biex l-għajnuna tal-UE ssir iktar effettiva,
inkluż permezz ta’ pprogrammar konġunt u l-iżvilupp ta’ qafas
armonizzati ta’ riżultati. Konsultazzjonijiet mal-pajjiżi
msieħba, l-Istati Membri tal-UE, organizzazzjonijiet internazzjonali,
imsieħba soċjali, is-soċjetà ċivili u l-pubbliku
inġenerali kollha taw l-appoġġ tagħhom għal
koordinazzjoni ikbar mill-UE fl-appoġġ tal-protezzjoni soċjali fl-iżvilupp.
Il-koordinazzjoni għandha sseħħ fuq il-livell lokali
fil-pajjiżi msieħba. L-UE esprimiet l-appoġġ
għall-kunċett ta’ limiti minimi ta’ protezzjoni soċjali li
jitfasslu fuq bażi nazzjonali, kif adottati mill-100 sessjoni tal-ILC
fl-2011, u kkontribwiet biex dan tħaddan mill-G20. Hija kkontribwiet lejn
u sostniet l-adozzjoni tar-Rakkomandazzjoni dwar Protezzjoni Soċjali
Bażika fl-ILC tal-2012. Il-kunċett ta’ SPF jista’ jipprovdi bażi
definita sewwa biex fuqha jinbena appoġġ koordinat u, fejn possibbli,
konġunt tal-UE għall-protezzjoni soċjali ma’ pajjiżi
sħab li jiddeċiedu li jiżviluppawhom. L-UE tista’ wkoll tfittex li tipparteċipa
f’inizjattivi globali, bħall-Bord bejn l-Aġenziji tal-Protezzjoni
Soċjali li ġie propost mill-Grupp ta’ Ħidma dwar l-Iżvilupp
tal-G20. 9. Koerenza mtejba fost
il-politiki tal-UE. F’ekonomija globalizzata, il-koerenza fost
il-politiki hija essenzjali. Id-dimensjoni esterna tal-politiki tal-UE jista’
jkollha impatt fuq il-protezzjoni soċjali f’pajjiżi msieħba.
L-UE għandha tiżgura l-konsistenza bejn il-politiki ta’
appoġġ għall-protezzjoni soċjali fil-politiki ta’
kooperazzjoni għall-iżvilupp u fil-politiki tal-UE rilevanti
l-oħra kollha. L-UE hija impenjata li tippromwovi l-ftuħ
għall-kummerċ u l-integrazzjoni fis-swieq dinjin bħala bażi
għal tkabbir ekonomiku u żvilupp inklussiv u sostenibbli[18]. Aktar trasparenza tista’
twassal għal żieda fil-vulnerabbiltà għal dawk impjegati
f’setturi li jistgħu ma jibqgħux kompetittivi, effett li jista'
jittaffa jekk ikun hemm sistema effettiva ta’ protezzjoni soċjali. L-UE
hija wkoll impenjata li ssaħħaħ il-kooperazzjoni bejn l-Istati
Membri sabiex jiżviluppaw approċċ aktar koerenti lejn
il-koordinazzjoni tas-sigurtà soċjali ma’ pajjiżi terzi[19]. It-tranżizzjoni b’suċċess minn
għajnuna umanitarja lejn koperazzjoni għal-iżvilupp se tkun
tiddependi wkoll b’mod kritiku fuq it-twaqqif ta’ sistemi effettivi ta’
protezzjoni soċjali. L-integrazzjoni effettiva tal-għajnuna
umanitarja u ta’ żvilupp għandha tiġi promossa f’konformità
mal-Komunikazzjoni dwar ‘L-irbit bejn is-Solljev, ir-Riabilitazzjoni u
l-Iżvilupp”[20]
biex jiġi żgurat li s-sistema internazzjonali ta’ għajnuna tkun
topera b’mod konsistenti, koerenti u trasparenti biex jiġu indirizzati
l-vulnerabbiltajiet. Sistema ta’ protezzjoni soċjali effettiva
għandha tiffaċilita l-mobilità tax-xogħol billi tassigura
l-portabilità tad-drittijiet tas-sigurtà soċjali għal ħaddiema
migranti. Il-protezzjoni soċjali u l-miżuri ta’ adattament
għall-bidla fil-klima wkoll għandhom jintrabtu mill-qrib sabiex
inaqqsu l-vulnerabilità tal-foqra għall-effetti tat-tibdil fil-klima. [1] COM (2011) 637, Konklużjonijiet tal-Kunsill 9316/12 [2] S. Chen u M. Ravallion, The developing world is
poorer than we thought, but no less successful in the fight against poverty,
WB, 2008 [3] Konklużjonijiet tal-Kunsill 11068/07,
Riżoluzzjoni tal-Parlament Ewropew 2011/2047. [4] Ir-Rapport Ewropew dwar l-Iżvilupp tal-2010, Social
Protection for Inclusive Development, A new perspective in EU cooperation with
Africa. [5] DFID, Cash Transfers Evidence Paper, 2011. [6] Unicef, Accelerating the MDGs with Equity, 2010. [7] DFID, Cash Transfers Evidence Paper, 2011. [8] ILO, Protezzjoni soċjali bażika għal
globalizzazzjoni ġusta u inklużiva. Rapport tal-Grupp Konsultattiv
għall-Protezzjoni Soċjali Bażika, 2011. [9] ILO, l-Artikolu 5 tar-Rakkomandazzjoni dwar sistemi
nazzjonali ta' Protezzjoni Soċjali Bażika, 2012. [10] Ir-raba’ Forum ta’ Livell Għoli dwar l-Effikaċja
tal-Għajnuna, Busan, il-Korea, Novembru 2011. [11] COM(2010) 163, Konklużjonijiet tal-Kunsill 10349/10 [12] SEC(2007)495. [13] COM (2006) 249, Konklużjonijiet
tal-Kunsill 11068/07. [14] S. Devereux u R. Sabates-Wheeler, Transformative social protection, IDS,
2004 [15] Promoting pro-poor growth: social protection, OECD 2009 [16] Approċċ skont is-settur huwa mod ta’ involviment
fil-koperazzjoni għall-iżvilupp ibbażat fuq il-prinċipju ta’
appoġġ ikkoordinat għal programm ta’ żvilupp
b’responsabbiltà lokali, bħal ma tkun strateġija nazzjonali
għat-tnaqqis tal-faqar, jew programm għal xi settur. [17] COM (2011) 638 Konklużjonijiet
tal-Kunsill 9323/12 [18] COM (2012) 22 u l-
Konklużjonijiet tal-Kunsill 7412/12 [19] COM(2012) 153. [20] COM(2001) 153